Lajme

E marte, 15 prill 2003

Përmbajtja:

• Rugova e Shtajner diskutuan rreth procesit të transferimit të kompetencave dhe çështjeve të tjera

• Idetë për moratoriume janë të papranueshme dhe politikisht të papërgjegjshme, thotë zëdhënësi i Presidentit të Kosovës

• Gjilan: Komuna nderon zjarrfikësin që shpëtoi nga zjarri vogëlushin 4- vjeçar

• Pejë: Dje pasdite në një pritë janë vrarë Ilir e Feride Selimaj dhe tre të tjerë janë plagosur

• Përkrahet iniciativa e LDK-së për nxjerrjen e një ligji për zgjedhjet

• Vrasja afër Pejë mund të jetë me motive hakmarrjeje, thotë policia e UNMIK-ut

• Kryesuesi i Bundestagut gjerman thotë se statusi përfundimtar i Kosovës do të zgjidhet paralelisht me zhvillimin ekonomik

• Kreu i PDK-së thotë se ka marrë mbështetjen për idenë e moratoriumit nga shefi i zyrës amerikane

• Shefi i Zyrës kanadeze nuk ka pranuar të deklarohet për propozimin e kreut të PDK-së për moratoriumin

• Ministrat e jashtëm të BE-së vlerësuan se ende nuk ka ardhur koha për zgjidhjen e statusit përfundimtar të Kosovës

• Në Gjilan hapet "Vullneti Rinor 2003"

• Dy fëmijë marrin lëndime nga shpërhtimi i një granate në një fshat të Vushtrrisë

• Zyrtarët e LDK-së vizituan fshatin Çabër të Zubinpotokut

• Ekspertët sllovenë të biznesit ligjëruan për përvojat në menaxhimin e ndërmarrjeve

• Fleçër ka hedhur poshtë mundësinë që AKSH -ja të jetë përgjegjëse për minimin e urës hekurudhore në afërsi të Zveçanit

• Zëdhënësi Idou ka mohuar të ketë informacione për ekzistimin e AKSH-së në rajonin e Mitrovicës

• Qëndrime të kundërta mes vendorëve dhe ndërkombëtarëve

• Konfiskohen 34 kilogramë marihuanë dhe hashash në Qafë të Thanës

• Tiranë: Debate të ashpra në parlament mbi Raportin e Komisionit Evropian

• Zhivkoviq e Çoviq thonë se transferimi i kompetencave në Kosovë është i papranueshëm

• Ministri serb kërkon që privatizimi i ekonomisë së Kosovës të bëhet në marrëveshje me Serbinë

• Një person i armatosur ka vrarë një djalosh dhe ka plagosur tri nxënëse të një gjimnazi në Nju Orleans

• Shrëder do të kërkojë votëbesimin e partisë së tij për reformat sociale

• Disidentët në Kubë kërkojnë përkrahje nga Komisioni i OKB-së për të drejtat e njeriut

• Disfatë e rëndë e partisë në pushtet në Kanada në zgjedhjet parlamentare

• SHBA dhe Britania kanë filluar sot bisedimet me grupimet irakiane se si të qeveriset vendi pas luftës

• SHBA-të thonë se lufta në Irak ka përfunduar

• Forcat izraelite kanë vrarë sot një palestinez dhe kanë arrestuar dy të tjerë

• Në dy aksidente janë vrarë tre ushtarë amerikanë dhe janë plagosur tre të tjerë

• E ardhmja e Irakut - temë e mbledhjes së irakianëve vendas dhe nga diaspora

• Uashingtoni intensifikon kritikat ndaj Sirisë

• Egjipti dhe Jordania kërkojnë qeveri irakiane të besueshme

• Patrulla të përbashkëta në Bagdad

Rugova e Shtajner diskutuan rreth procesit të transferimit të kompetencave dhe çështjeve të tjera

 

Prishtinë, 15 prill 2003 - Presidenti i Kosovës Ibrahim Rugova dhe shefi i UNMIK-ut Mihael Shtajner diskutuan sot rreth procesit të transferimit të kompetencave nga ndërkombëtarët tek institucionet vendore. Të dy bashkëbiseduesit thanë se Kosova ndodhet në një fazë të zhvillimit e cila kërkon bashkëpunim të ngushtë ndërmjet UNMIK-ut dhe institucioneve të Kosovës. Prandaj edhe ky takim ka pasur temë qendrore çështjen e transferimti të përgjegjësive aq të diskutuara kohëve të fundit.

  

Kryeadministratori Shtajner ritheksoi qëndrimin e tij tashmë të njohur se procesi duhet të jetë gradual. "Njerëzit kërkojnë zhvillim ekonomik, luftë kundër krimit dhe korrupsionit, mbrojtje të minoriteteve", tha Shtajner, ndërkaq transferimi përgjegjësive, sipas tij, do t'u mundësojë institucioneve vendore që të bëjnë punën e tyre dhe të përmbushin kërkesat e qytetarëve.

Nga ana e tij presidenti Rugova theksoi se ndërmjet UNMIK-ut dhe institucioneve vendore do të ketë edhe më tutje një bashkëpunim të ngushtë. "Biseduam shumë për çështjet që të përqendrohemi në problemet ekonomike, në hapjen e vendeve të reja të punës, rreth privatizimit dhe për hapat konkretë, sepse këto janë çështje kryesore për qytetarët dhe për integrimin e grupeve etnike në shoqërinë kosovare", tha presidenti Rugova.

Ndërkaq lidhur me idenë e hedhur për moratoriumin rreth statusit të Kosovës, presidenti Rugova theksoi se një ide të tillë nuk e sheh të arsyeshme. "Momentalisht ndodhemi nën një protektorat ndëkombëtar, pra administratë ndërkombëtare dhe vazhdojmë të punojmë për shoqërinë dhe vendin tonë si dhe për perspektivat për të ardhmen e vendit, dhe kjo është pavarësia e Kosovës", nënvizoi presidenti Rugova.

Shtajner tha se qëndrimi i bashkësisë ndërkombëtare është i qartë - koncentrimi rreth e çështjeve praktike, ndërkaq statusi nuk do të zgjidhet gjatë këtij viti". Ai tha se qëndrimet e tij dhe të presidentit Rugova rreth moratoriumit, pavarësisht se duken të ndryshme, nuk janë të tilla. "Në fund të fundit ne nuk kemi dallime.

 

Unë nuk besoj se ndonjë lider i përgjegjshëm në Kosovë ka qëndrim të ndryshëm sepse edhe ideja për moratorium e arrin synimin për aq sa ajo na lejon të përqëndrohemi në prioritetet tona", theksoi Shtajner, por nevojitet një marrëveshje e gjerë, tha ai.

Presidenti Rugova tha se nuk ka pasur ndonjë presion nga ndërkombëtarët për ta pranuar këtë ide (moratorimin) dhe Kosova tashmë duhet të mësohet me diferencat në ide dhe duhet të thyejë logjikën uniforme.

 

 

Idetë për moratoriume janë të papranueshme dhe politikisht të papërgjegjshme, thotë zëdhënësi i Presidentit të Kosovës

 

Prishtnë, 15 prill 2003 - Në lidhje me idetë për të ashtuquajturin "moratorium" për statusin përfundimtar të Kosovës, z. Muhamet Hamiti, zëdhënës i Presidentit të Kosovës, Dr. Ibrahim Rugova, ka lëshuar dje pasdite këtë deklaratë:

"Presidenti i Kosovës konsideron se idetë për moratoriume janë të papranueshme dhe politikisht të papërgjegjshme.

Kosova është në procesin e sigurt të ndërtimit të strukturave të veta dhe insiston për njohjen formale të pavarësisë së Kosovës, në bashkëpunim të ngushtë me SHBA-të dhe me Unionin Evropian.

Njohja e pavarësisë do të shpejtonte zhvillimin ekonomik dhe demokratik të Kosovës dhe do të qetësonte këtë pjesë të Evropës dhe të botës", thuhet në fund të deklaratës.

 

 

Gjilan: Komuna nderon zjarrfikësin që shpëtoi nga zjarri vogëlushin 4- vjeçar

 

Gjilan, 15 prill 2003 - Kryetari i komunës së Gjilanit, Lutfi Haziri e ka nderuar me mirënjohje zjarrëfikësin Murat Ramadani, për guximin dhe sakrificën që ka bërë ai ditën e 10 prillit të këtij viti, për ta shpëtuar nga zjarri vogëlushin katër vjeçar Besnik Qazimi, i cili gjendej në shtëpinë që po digjej.

Komuna është duke punuar në themelimin e çmimit "Mirënjohje për trimëri", që do të jipet për kontribute të veçanta dhe Murat Ramadani, me veprën e tij të guximshme, që tani do të jetë njëri nga kandidatët e mundshëm për këtë, ka thënë z. Haziri.

Kur dikush rrezikon veten për të shpëtuar jetën e dikujt tjetër që mund të gjendet në rrezik, pavarësisht nga koha në të cilën ndodhë rasti - ky është një akt trimërie që meriton nderimin tonë, theksoi kryetari i komunës, duke ia dorëzuar mirënjohjen zjarrfikësit Ramadani.

Sikur të vonohej ndihma ose të mungonte gatishmëria e Muratit për t`u futur brenda nëpër flakë, familja Qazimi do të ishte sot dhe në të ardhmen, në dhembje të shumëfishtë.

 

 

Pejë: Dje pasdite në një pritë janë vrarë Ilir e Feride Selimaj dhe tre të tjerë janë plagosur

 

Pejë, 15 prill 2003 - Në një pritë të kurdisur ndërmjet fshatit Nabërgjan dhe Osdrim të Pejës është vrarë Ilir Selimaj 23 vjeç dhe Feride Selimaj (32), bashkëshorte e xhaxhait të tij, Demë Selimaj, i cili po ashtu është plagosur, si dhe dy fëmijët e tij, Drita 15-vjeçe dhe Kreshniku 4-vjeçar.

 

Ata ishin duke u kthyer nga Peja në shtëpinë e tyre, kur në veturën e tyre u zbrazën një breshëri plumbash nga persona të paidentifikuar.

Tre personat e lënduar janë jashtë rrezikut për jetë dhe po trajtohen në spitalin e Pejës. Policia e UNMIK-ut menjeherë ka dalë në vendin e ngjarjes dhe është duke i zhvilluar hetimet, por nuk ka dhënë detaje për këtë vrasje mizore. Deri tash nuk ka dëshmitarë për ngjarjen dhe nuk dihen motivet e vrasjes.

Ilir Selimaj ka qenë ish-anëtar i UÇK-së i brigadës 136 "Rugova" dhe i njësitit sepcial "Shqiponjat e zeza". Ilir Selimaj vitin e kaluar ka dëshmuar në procesin e "Grupit të Dukagjinit".

 

 

Përkrahet iniciativa e LDK-së për nxjerrjen e një ligji për zgjedhjet

 

Prishtinë, 15 prill 2003 - Kryesia e Kuvendit të Kosovës shqyrtoi dhe përkrahu iniciativën e LDK-së për miratimin e një ligji për zgjedhjet. Shefi i Grupit parlamentar të LDK-së Sabri hamiti duke justifikuar nxjerrjen një ligji të tillë tha se pas mabjtjes së zgjedhjeve të kaluara të organizuara nga OSBE-ja pret mbështetjen e deputetëve rreth këdsaj iniciative.

 

Ai tha se nuk paragjykon asgjë, por mendon se për zhvillimin demokratik të Kosovës ligji për zgjedhjet është alfa e omega pas tri palë zgjedhjeve të mbajtura pas luftës. Është koha që ligji të nxirret në parlamentin e Kosovës dhe mendon se do të ketë mbështetjen e deputetëve.

Kjo iniciativë do të shqyrtohet në mbledhjen e javës së ardhshme pasi ka marrë mbështetjen e kryesisë së Kuvendit dhe të Komisionit për çështje legjislative.

Ndërkaq në seancën e së enjtës Kuvendi do të shqyrtojë projektligjin për arkivat, atë për tatimin për pronat e paluajtshme dhe për kooperitivat.

 

 

Vrasja afër Pejë mund të jetë me motive hakmarrjeje, thotë policia e UNMIK-ut

 

Prishtinë, 15 prill 2003 - Në lidhje me vrasjen e dyfishtë dhe plagosjen e tre personave afër fshatit Nabërgjan të Pejës, policia e UNMIK-ut është duke i zhvilluar hetimet, u tha në takimin e sotëm për media të policisë së UNMIK-ut.

 

Sipas policisë së UNMIK-ut kjo vrasje mund të ketë motive hakmarrjeje, për shkak se njëri nga të vrarët ka qenë dëshmitar në një proces të mëparshëm. Bëhet fjalë për procesin kundër pesë ish-pjesëtarëve të UÇK-së të ashtuquajturit "Grupi i Dukagjinit" që u zhvillua në vitin e kaluar.

Policia ndërkombëtare hedh poshtë pohimet e organizatës së quajtur AKSH të jetë përgjegjëse për hedhjen në ajër të urës hekurudhore afër Zveçanit.

 

 

Kryesuesi i Bundestagut gjerman thotë se statusi përfundimtar i Kosovës do të zgjidhet paralelisht me zhvillimin ekonomik

 

Prishtinë, 15 prill 2003 - Statusi përfundimtar i Kosovës do të zgjidhet paralelisht me zhvillimin ekonomik, ka deklaruar Kristian Shmit, kryesuesi i delegacionit të Bundestagur gjerman, i cili ka qëndruar dje në Kosovë.

 

Pas takimeve me kryetarin e Parlamentit të Kosovës Nexhat Daci dhe me kryeministrin Bajram Rexhepi, z. Shmit tha se Gjermania është e gatshme të ndihmojë zhvillimin e fushave të ndryshme të jetës në Kosovë.

 

 

Kreu i PDK-së thotë se ka marrë mbështetjen për idenë e moratoriumit nga shefi i zyrës amerikane

 

Prishtinë, 15 prill 2003 - Kryetari i PDK-së Hashim Thaçi u prit dje nga shefi i Zyrës amerikane Rino Harnish. Pas këtij takimi Thaçi u deklaroi gazetarëve se z. Harnish e ka mbështetur idenë për vendosjen e moratoriumit mbi statusin përfundimtar të Kosovës.

 

Mirëpo, shefi i Zyrës amerikane Rino Harnish, ndonëse takimi u mbajt në selinë e tij, nuk dha asnjë deklaratë lidhur me këtë takim.

 

 

Shefi i Zyrës kanadeze nuk ka pranuar të deklarohet për propozimin e kreut të PDK-së për moratoriumin

 

Prishtinë, 15 prill 2003 - Kreu i PDK-së Hashim Thaçi dje pasdite është takuar me shefin e Zyrës kanadeze në Prishtinë Shon Barber. "Askush nuk dëshiron që çështja e statusit përfundimtar të Kosovës të shtyhet, por kjo duhet të arrihet duke i përmbushur standardet", ka deklaruar z. Barber.

 

Ai ka shtuar se Kanadaja nuk dëshiron të shohë statusin e Kosovës jashtë axhendës për dhjetë apo pesë vjet, por dëshiron që statusi përfundimtar i Kosovës të zgjidhet sa më shpejt.

 

Barber nuk ka pranuar të deklarohet drejtpërdrejt për idenë e moratoriumit nga kreu i PDK-së, por ka thënë se përkrah institucionet e Kosovës në procesin e marrjes së kompetencave që u takojnë sipas Rezolutës 1244 dhe Kornizës Kushtetuese të Kosovës.

 

 

Ministrat e jashtëm të BE-së vlerësuan se ende nuk ka ardhur koha për zgjidhjen e statusit përfundimtar të Kosovës

 

Luksemburg, 15 prill 2003 - Ministrat e jashtëm të vendeve anëtare të Bashkimit Evropian në takimin e djeshëm në Luksemburg kanë diskutuar edhe për zhvillimet në Kosovë. BE u ka bërë thirrje subjekteve politike në Kosovë, duke veçuar këtu sidomos Parlamentin e Kosovës, që të rifukusohen në politikën standardet para statusit.

 

Duke komentuar këto fjalë të përfshira edhe në konkluzionet zyrtare nga takimi ministror një diplomat i BE-së ka thënë se para se gjithash porosia ka të bëjë me tërheqjen e vërejtjes që të nxitohet në hapa të njëanshëm, të cilët në çfarëdo mënyre do të paragjykonin statusin e Kosovës.

Ministrat e jashtëm të BE-së kanë mbështetur fuqishëm transferin e kompetencave nga UNMIK-u tek institucionet e Kosovës. Por ministrat e BE-së kanë konstatuar se ende nuk ka ardhur koha për zgjidhjen e statusit përfundimtar të Kosovës, ndërkohë që përshëndetën përpjekjet e UNMIK-ut që bashkë me Bankën Evropiane për Rindërtim të fillojnë dhënien e kredive për Kosovën.

Këshilli i ministrave të BE-së edhe njëherë përkujton rëndësinë që i jep dialogut mes Beogradit dhe Prishtinës për çështjet praktike me interes të përbashkët.

 

 

Në Gjilan hapet "Vullneti Rinor 2003"

 

Gjilan, 15 prill 2003 - Rinia e Gjilanit, duke e vazhduar një traditë të mëhershme të organizimit të manifestimeve verore, dje ka hapur për sivjet "Vullnetin Rinor 2003".

Vizatimi i hartës së Kosovës, në sheshin "Agim Ramadani" në Gjilan, edhe simbolikisht ka shënuar fillimin e këtij manifestimi të të rinjve që organizohet nga Forumi Rinor i LDK-së, ndërsa do të ketë shtrirje në gjithë territorin e komunës.

Burim Elezi, anëtar i Kryesisë së Forumit, i cili e ka zbërthyer programin e manifestimit, tha se qëllim i "Vullnetit Rinor 2003" është që rinia e komunës së Gjilanit të shkarkohet nga problemet e përditshme.

Ditët e "Vullnetit Rinor 2003" do të jenë të mbushura me seminare, lojëra, mbrëmje rinore e vizita nëpër vende që karakterizohen për ndonjë ngjarje historike.

"Rinia dhe standardet" - do të jetë njëra nga temat aktuale që për të rinjtë e Gjilanit do të ligjërohet, në kuadër të ditëve të manifestimit, nga referues të njohur kosovarë.

 

 

Dy fëmijë marrin lëndime nga shpërhtimi i një granate në një fshat të Vushtrrisë

 

Mitrovicë, 15 prill 2003 - Burimet e policisë në Mitrovicë kanë njoftuar për gjetjen e tri granatave të pashpërthyera të dorës në fshatin Stanofc të Vushtrrisë, nga disa fëmijë që po luanin në vendin e ngjarjes.

 

Zëdhënësi i policisë Soxhi Idovu, ka njoftuar se pasi që fëmijtë i kanë gjetur granatat, nga mosdija kanë filluar të luajnë me to, dhe me atë rast njëra prej granatave ka shpërthyer dhe ka lënduar dy nga tre fëmijtë.

 

Sipas tij, një djalë shqiptar ka marrë lëndime në fytyrë dhe në dorën e djathtë, kurse një vajzë ka marrë lëndime më të lehta në këmbën e majtë. Që të dy fëmijët janë shrtirë në spital për trajtim dhe jreta e tuyer nuk është në rrezik.

 

 

Zyrtarët e LDK-së vizituan fshatin Çabër të Zubinpotokut

 

Mitrovicë, 15 prill 2003 - Anëtari Kryesisë qendrore të LDK-së dhe kryetar i KK të Mitrovicës, Faruk Spahija dhe anëtari i Këshillit të Përgjithshëm të LDK-së, Ibush Jonuzi, kanë viztuar degët e LDK-së në Skenderaj dhe Çabër.

 

Zyrtarët e LDK-së, Spahija dhe Jonuzi, janë njoftuar nga udhëheqjet e degëve të LDK-së në Skenderaj dhe Çabër (komuna e Zubinpotokut) me zhvillimet aktuale në Brenda këtij subjekti dhe me ato në komuna.

 

Spahija dhe Jonuzi i kanë njoftuar udhëheqëjet dhe veprimtarët e këtyre dy degëve me qëndrimet e LDK-së lidhue me propozimet joserioze të disa subjekteve politike të vendit që kanë të bëjnë me statusin e Kosovës.

 

 

Ekspertët sllovenë të biznesit ligjëruan për përvojat në menaxhimin e ndërmarrjeve

 

Prishtinë, 15 prill 2003 - Ekspertët sllovenë të biznesit ligjëruan në Prishtinë për përvojat sllovene në menaxhimin e ndërmarrjeve të vogla të mesme. Ata theksuan se në Slloveni i jepet mbështetje e fuqishme këtyre ndërmarrjeve, të cilat paraqesin boshtin ekonomisë së këtij vendi.

 

 

Fleçër ka hedhur poshtë mundësinë që AKSH -ja të jetë përgjegjëse për minimin e urës hekurudhore në afërsi të Zveçanit

 

Prishtinë, 15 prill 2003 - Policia ndërkombëtare në Prishtinë ka hedhur poshtë mundësinë që organizata e quajtur AKSH të jetë përgjegjëse për incidentin që ka ndodhur të shtunën në afërsi të kufirit verior të Kosovës me Serbinë, edhepse në faqen e internetit të kësaj organizate thuhet se aksionin e kanë kryer pjesëtarët e saj dhe me atë rast dy prej tyre kanë humbur jetën.

Zëdhënësi i policisë së UNMIK-ut Beri Fleçër tha se policia ndërkombëtare nuk ka ndonjë dëshmi për t'i besuar komunikatës së AKSH-së, por dikush ka dashur ta hedhë në ajër urën dhe me atë rast ka mbetur i vdekur një vend një person i paidentifikuar, tepër i dëmtuar i cili në momentin e shpërthimit ka qenë shumë afër bombës, tha z.Fleçër.

Si argument për të hedhur poshtë faktin se AKSH-ja e ka kryer këtë akt, z. Fleçër merr pikërisht faktin se ndryshe nga komunikata, ku flitet për dy të vrarë, policia ka gjetur në vendin e ngjarjes vetëm kufomën e një personi të vrarë dhe nëse AKSH ka qenë e përfshirë në incident, atëherë i fton ata të tregojnë se kush është ai person në mënyrë që të njoftohet familja e tij.

Fleçër ka hedhur poshtë edhe ekzistimin në Kosovë të AKSH-së si ushtri, duke shtuar se policia nuk ka informacione të konfirmuara se AKSH-ja vepron në Kosovë.

Ndërkaq gazeta "Zëri" citon një burijm nga SHP i TMK-së se një pjesëtar i saj ka humbur jetën në incidentin që ndhodhi në urën e Lozishtes afër Zveçanit.

 

 

Zëdhënësi Idou ka mohuar të ketë informacione për ekzistimin e AKSH-së në rajonin e Mitrovicës

 

Mitrovicë, 15 prill 2003 - Zëdhënësi i policisë së UNMIK-ut në Mitrovicë Soxhi Idou ka mohuar të ketë informacione për ekzistimin e AKSH-së në rajonin e Mitrovicës. "Ne nuk jemi në dijeni për ekzsitimin e AKSH-së në rajonin e Mitrovicës.

 

Por ne jemi të vetëdijshëm për vebsajdin e tyre përmes të cilit kanë marrë përgjegjësinë për shpërthimin e fundit", tha zëdhënësi Idou.

Ai tha se policia nuk do të ndërmarrë asnjë veprim pa pasur fakte të besueshme.

 

 

Qëndrime të kundërta mes vendorëve dhe ndërkombëtarëve

 

Prishtinë, 15 prill 2003 - Zyrtarë të Ministrisë së Arsimit të Kosovës, të UNMIK-ut dhe të Zyrës amerikane në Prishtinë diskutuan në një debat të hapur rreth nevojës që ka Kosova për universitetet etnike. Në debat dolën në pah qëndrime të kundërta mes vendorëve dhe ndërkombëtarëve mbi këtë çështje.

 

Ministri i arsimit Rexhep Osmani kundërshtoi me këtë rast idenë e universiteteve në baza etnike, duke aluduar në universitetin serb në Mitrovicë. Ai ka thënë se funksionimi i universitetit serb në Mitrovicë forcon enklavizimin e Kosovës, duke shtuar se në këtë mënyrë nuk mund të arrihet qëllimi kryesor i afrimit të njerëzve.

Themelimin e universitetit serb në Mitrovicë e mbështet UNMIK-u me arsyetimin se ai është bërë për shkaqe teknike e jopolitike. Përfaqësuesi i UNMIK-ut Abdylaziz Kan pohoi se UNMIK-u angazhohet për shumetenicitet edhe në sferën e arsimit.

 

Ai ka theksuar se të gjitha institucionet e arsimit të lartë qofshin një apo shumetnik, duhet t'u ofrojnë edukim cilësor, duhet të zbatojnë reformen në mënyrë që të arrijnë të integrohen në Evropë, tha Kan.

Edhe përfaqësuesi i Zyres amerikane Majkëll Mekllellen u angazhua për largim të politikës nga sistemi arsimor. Ai ka nënvizuar me këtë rast se Kosova nuk ka nevojë për universitete etnike, ajo ka nevojë për universitete në gjuhë të caktuara.

 

 

Konfiskohen 34 kilogramë marihuanë dhe hashash në Qafë të Thanës

 

Shkup, 15 prill 2003 - Në vendkalimin kufitar të "Qafës së Thanës" ndërmjet Maqedonisë dhe Shqipërisë, dje pasdite janë konfiskuar 34 kilogramë marihuanë dhe hashash.

Drejtoria e Doganave maqedonase njofton se droga është gjetur në një automjet udhëtarësh të markës "Mercedes".

Në këtë trafikim me narkotikë janë involvuar shtetas të Maqedonisë dhe të Turqisë, të cilët u janë dorëzuar policisë maqedonase dhe hetimet e mëtejshme vazhojnë.

 

 

Tiranë: Debate të ashpra në parlament mbi Raportin e Komisionit Evropian

 

Tiranë, 15 prill 2003 - Parlamenti shqiptar do të vazhdojë edhe të martën debatin mbi raportin e Komisionit Evropian. Punimet e tij u ndërprenë të hënën në mesnatë pas diskutimesh të shumta, një pjesë e mirë e të cilave u kthyen në shkëmbim akuzash ndërmjet pozitës dhe opozitës.

 

Kjo e fundit ka bërë përgjegjëse qeverinë për kritikat e ashpra të Komisionit Evropian ndaj zhvillimeve në Shqipëri. Ndërsa Kryeministri Fatos Nano, nga ana e tij, rreshtoi një seri reformash, që ai thotë se janë ndërmarrë dhe po përgatiten për t’iu përgjigjur standarteve të kërkuara nga Bashkimi Evropian.

 

 

Zhivkoviq e Çoviq thonë se transferimi i kompetencave në Kosovë është i papranueshëm

 

Beograd, 15 prill 2003 - Kryeministri dhe zv.kryeministri i Serbisë, Zoran Zhivkoviq dhe Nebojsha Çoviq kanë biseduar mbrëmë me krerët e koalicionit serb "Kthimi", në Kuvendin e Kosovës, lidhur me situatën politike në Kosovë.

 

Në këtë takim është thënë se procesi i transferimit të kompetencave nga UNMIK-u tek institucionet vendore në Kosovë, ashtu siç ka propozuar Mihael Shtajner, nuk është i pranueshem.

Qeveria e Serbisë mbështet plotësisht koalicionin "Kthimi" në përpjekjet për të përfaqësuar dhe mbrojtur interesat e serbëve, theksohet në një komunikatë.

Deputeti i koalicionit "Kthimi" Oliver Ivanoviq ka thënë se Beogradi duhet të angazhohet më shumë që procesi i transferimit të kompetencave të ngadalësohet apo të ndalohet.

 

 

Ministri serb kërkon që privatizimi i ekonomisë së Kosovës të bëhet në marrëveshje me Serbinë

 

Beograd, 15 prill 2003 - Sipas ministrit serb të ekonomisë dhe privatizimit Aleksandar Vlahoviq, privatizimi i ekonomisë së Kosovës është i mundur vetëm në marrëveshje me Serbinë.

 

Privatizimi në Kosovë nuk mund të bëhet duke u privatizuar pasuria e ndërmarrjeve të Kosovës, dhe pa u konsultuar kreditorët, ka thënë Vllahoviq dhe ka shtuar se "kjo duhet të bëhet bashkarisht". Njësitë punuese të ndërmarrjeve serbe në Kosovë mbeten në pronësi të ndërmarrjeve serbe dhe privatizmi është i tepërt, thotë ai.

Vlahoviq nga çështjet ende të hapura lidhur me privatizimin në Kosovë ka veçuar çështjet e borxheve, duke thënë se UNMIK-u nuk mund t'i shesë ndërmarrjet në Kosovë, kurse boxhet e atyre ndërmarrjeve t'i kthejë shteti i Serbisë.

 

 

Një person i armatosur ka vrarë një djalosh dhe ka plagosur tri nxënëse të një gjimnazi në Nju Orleans

 

Nju Orleans, SHBA, 15 prill 2003 – Një person i armatosur me pushkë automatike AK-47 ka hapur dje zjarr ndaj nxënësit të një gjimnazi dhe kështu ka vrarë një djalosh, kurse ka plagosur tri vajza, ka bërë të ditur policia e Nju Orleansit, njofton Rojter.

 

Policia ka arrestuar katër meshkuj të dyshimtë të moshës prej 15 deri në 19-vjeçare, kundër të cilëve pritet të ngritet aktpadia. Dëshmitarët kanë deklaruar se vrasësi ka qenë i shoqëruar nga tre shoqërues.

 

 

Shrëder do të kërkojë votëbesimin e partisë së tij për reformat sociale

 

Berlin, 15 prill 2003 - Kryetari Partisë Socialdemokrate gjermane kancelari Gerhard Shrëder, do të kërkojë në një kongres të jashtëzakonshëm të partisë së tij në qershor, votëbesimin për reformat sociale të kontestuara që parashikon të ndërmarrë qeveria e tij.

 

Bëhet fjalë për aftësinë qeverisëse të socialdemokratëve është shprehur në Berlin sekretari i përgjithshëm i partisë Olaf Sholc.

 

Krahu i majtë i partisë dhe sindikatat kanë krituar ashpër veçanërisht synimet e Shrëderit për shkurtimin e kohës së përfitimin nga ndihma për të papunët dhe shkurtimet në kontributet e shoqërive të sigurimit shëndetësor.

 

 

Disidentët në Kubë kërkojnë përkrahje nga Komisioni i OKB-së për të drejtat e njeriut

 

Havana, 15 prill 2003 - Disidentët e goditur nga vala e fundit e arrestimeve në Kubë presin dënimin e qeverisë së vendit nga komisioni i Kombeve të Bashkuara për të drejtat e njeriut. Kjo u bë e ditur për gazetarët në Havanë nga një aktivist për të drejtat e njeriut.

 

Komisioni pritet të diskutojë nesër zhvillimet e fundit në Kubë. Ndërkohë Ministrat e jashtëm të BE kanë kritikuar ekzekutimet e fundit në ishullin komunist si dhe dënimet e disidentëve. Gjatë një takimi në Luksemburg ata paralajmëruan Kubën për përkeqësim të marrëdhënieve.

Të premten e kaluar tre vetë u ekzekutuan në Kubë si dhe u dënuan me shumë vjet heqje lirie rreth 75 aktivistë të të drejtave të njeriut.

 

 

Disfatë e rëndë e partisë në pushtet në Kanada në zgjedhjet parlamentare

 

Montreal, 15 prill 2003 - Në zgjedhjet parlamentare në provincën franko-kanadeze Kebek përkrahësit e pavarësisë pas rreth 9 vjetësh në pushtet kanë pësuar një disfatë të rëndë.

 

Sipas rezultateve paraprake partia Kebekua e kryetarit të qeverisë Bernard Landri ka fituar vetëm 47 nga 125 mandatet parlamentare. Fituese e qartë e zgjedhjeve është partia liberale me 74 mandate e cila është kundër shkëputjes së Kebekut nga Kanadaja.

 

 

SHBA dhe Britania kanë filluar sot bisedimet me grupimet irakiane se si të qeveriset vendi pas luftës

 

Nasirija, 15 prill 2003 – Pas deklarimit të luftës së tyre 27-ditëshe kundër Sadam Hyseinit të përfunduar, Shtetet e Bashkuara dhe Britania kanë filluar sot (të martën) bisedimet me grupimet irakiane se si do të qeveriset vendi tash pas luftës, njofton Rojter.

 

Bisedimet po zhvillohen afër qytetit antik mesopotamian Ur, 110 mile në jug të Bagdadit dhe qëllimi është të gjendet forma e qeverisjes së Irakut të pasluftës. Mirëpo, gjatë këtij takimi dolën në drtitë ndarjet dhe mospajtimet e thella ndërmjet këtyre grupimeve opozitare.

Në bisedime po marrin pjesë 60 irakianë, që përfaqësojnë rrymat qendrore të grupimeve muslimane shite dhe sunite, kurdët dhe përkrahësit e monarkisë të rrëzuar më 1958. Shumë syresh janë të irituar nga vendimi amerikan për të imponuar gjeneralin e pensionuar amerikan, Xhej Garner, udhëheqës të administratës së pasluftës.

 

Ahmet Çalabi, një biznismen i shquar, i favorizuar nga Pentagoni, ka thënë se ai do të dërgojë në këtë takim përfaqësuesin e tij në vend se të marrë pjesë vetë. Grupi kryesor i muslimanëve shit ka vendosur të bojkotojë këtë takim.

 

 

SHBA-të thonë se lufta në Irak ka përfunduar

 

Bagdad, 15 prill 2003 - Shtetet e Bashkuara thonë se betejat më të mëdha në Irak kanë përfunduar dhe për këtë arsye një pjesë e personelit po tërhiqet. Gjeneralmajori Stenli Mekkristël tha se konflikti po kalonte në një fazë ku amerikanët prisnin luftime të shkurtra me grupet që kanë mbetur ende brenda vendit.

Pentagoni tha se dy avionë të mëdhenj transportues janë kthyer në Amerikë, ndërkohë që forcat ajrore po tërheqin avionët që filluan bombardimet në Irak, katër javë më parë.

Prioriteti kryesor për regjimin e ri të Irakut do të jetë vendosja e sigurisë, shërbimit shëndetësor dhe kthimi në normalitet i furnizimit me ujë dhe energji elektrike.

 

 

Forcat izraelite kanë vrarë sot një palestinez dhe kanë arrestuar dy të tjerë

 

Nablus, 15 prill 2003 – Forcat izraelite kanë vrarë sot (të martën) një palestinez të armatosur dhe ka kanë arrestuar dy militantë të tjerë, pasi më parë kishin rrethuar banesën e tyre, ku banonin tre militantët e kërkuar, kanë bërë të ditur dëshmitarët, njofton Rojter.

 

Ndërkaq, në qytetin Rafah në jug të Rripit të Gazës, është vrarë një militant i Xhihadit islamik nga një raketë e shkrehur nga një aeroplan i armatës izrtaelite. Militanti i vrarë është Abdel-Hamid Abu el-Eish.

 

Bëhet e ditur gjithashtu se prej fillimit të kryengritjes në fillim të shtatotrit 2000, janë vrarë 1992 palestinezë dhe 729 izraelitë.

 

 

Në dy aksidente janë vrarë tre ushtarë amerikanë dhe janë plagosur tre të tjerë

 

Bagdad, 15 prill 2003 – Tre ushtarë amerikanë të Korarmatës së 5-të janë vrarë dhe tre të tjerë janë plagosur dje në dy aksidente, ka bërë të ditur Komanda Qendrore Amerikane sot (të martën), njofton Rojter.

 

Në rastin e parë, një granatë ka shpërthyer në postbllokun ushtarak në jug të Bagdadit dhe aty kanë humbur jetën dy ushtarë dhe janë plagosur dy të tjerë, që po punonin në një automjet.

 

Ndërkaq, në rastin e dytë, që ka ndodhur të hënën në mëngjes në Aeroportin ndërkombëtar të Bagdadit, është vrarë një ushtar nga një shkrehje aksidentale e armës së mbushur.

 

Emrat e të vrarëve nuk do të jipen pa u njoftuar më parë familjet, ndërsa hetimet për këto dy raste po zhvillohen. Të plagosurit janë dërguar në spital, por për gjendjen e tyre nuk janë dhënë hollësi.

 

 

E ardhmja e Irakut - temë e mbledhjes së irakianëve vendas dhe nga diaspora

 

Uashington, 15 prill 2003 - Zyrtarët amerikanë organizuan takimin e së hënës mes grupeve të opozitës irakiane, për diskutime mbi strukturën politike të Irakut të pasluftës. Sekretari i Shtetit, Kolin Pauëll, tha se takimi është i rëndësishëm, por shtoi se, si hap i parë, nuk pritet që të bëhet përparim i madh.

 

"Mendoj se shumica e grupeve jashtë vendit si edhe përfaqësuesit e grupeve të qendresës e kuptojnë nevojën për nisjen e procesit në këtë mënyrë, me një fillim modest, për t'i hapur rrugën dialogut", tha Pauell.

Grupi kryesor shiit irakian, Këshilli Suprem i Revolucionit Islamik të Irakut, njoftoi se do ta bojkotojë takimin. Sipas udhëheqësve të tij, populli irakian nuk do të pranojë një administratë të emëruar nga të huajt.

 

 

Uashingtoni intensifikon kritikat ndaj Sirisë

 

Nju Jork, 15 prill 2003 - Sekretari i përgjithshëm i Kombeve të Bashkuara, Kofi Anan, tha se është i shqetësuar se kritikat amerikane në rritje ndaj Sirisë lidhur me qendrimin e saj gjatë luftës në Irak, mund të destabilizojnë edhe më tej Lindjen e Mesme.

 

Zoti Anan e shprehu shqetësimin në një deklaratë që bëri të hënën, disa orë pasi Sekretari amerikan i Shtetit, Kolin Pauëll, tha se Uashingtoni po shqyrton mundësinë e sanksioneve ekonomike dhe diplomatike kundër Damaskut.

Të hënën, Presidenti Bush akuzoi personalisht për herë të parë Sirinë se zotëron armë kimike, por nuk dha hollësi të tjera.

 

 

Egjipti dhe Jordania kërkojnë qeveri irakiane të besueshme

 

Kairo, 15 prill 2003 - Egjipti dhe Jordania kanë bërrë thirrje për formimin e një qeverie të re në Bagdad e cila do të jetë e besueshme dhe përfaqësuese e të gjithë irakianëve.

Ministrat e Jashtëm të Egjyptit dhe Jordanisë i thanë gazetarëve, se një qeveri e tillë do të ndihmonte në garantimin e një tërheqje të plotë të trupave amerikane dhe britanike nga Iraku.

Ministri i Jashtëm jordanez Marvan al-Mouasher, tha se qeveria e re duhet të përbëhej nga kryesisht irakianë brënda vëndit dhe të përfshinte vetëm një numër të kufizuar të mërgatës irakiane.

 

 

Patrulla të përbashkëta në Bagdad

 

Bagdad, 15 prill 2003 - Mijëra policë irakianë po paraqiten në Bagdad për të rifilluar punën në kryeqytet, i cili është goditur rëndë nga plaçkitjet gjatë ditëve të fundit pas rënies së qeverisë së Sadam Huseinit.

Pritet që shpejt të fillojnë patrullimet e përbashkëta me ushtarët amerikanë në përpjekje për të rivendosur rendin.

Një korrespondent i BBC-së në Bagdad thotë se marinsat, që po organizojnë rekrutimin, janë mbytur nga numri i madh i aplikantëve.

Copyright©2000-2003 Trepca.net - Të gjitha të  drejtat e rezervuara.