Lajme

E shtune, 12 prill 2003

Përmbajtja:

• Në Pejë u mbajt një akademi përkujtimore në 90-vjetorin e gjenocidit malezez në Dukagjin

• Shtajner përkrah idenë për moratoriumin për statusin përfundimtar të Kosovës

• E. Hasani: Propozimi për shpalljen e moratoriumit për statusin e Kosovës është vlerësim i gabuar

• LDK: Çfarëdo idesh për pezullim të punës për njohjen formale të pavarësisë së Kosovës janë të papranueshme

• Brajshou: Kosova është duke arritur gradualisht standardet evropaine

• Mbrëmë është minuar ura hekurudhore afër Zveçanit

• Dallimet racore nuk janë kategori biologjike dhe natyrore që i dallojnë njerëzit

• Mekshejn: Beogradi t'u thotë qartë serbëve se patjetër duhet të punojnë brenda institucioneve të Kosovës

• I.Meta: Parësore në përcaktimin e statusit final të Kosovës të jetë e drejta e qytetarëve për t'u shprehur për të ardhmen e saj

• Qeveria serbe ka akuzuar partinë e Koshtunicës se ka pasur lidhje me njerëzit që vranë Gjingjiqin

• Partia e Sheshelit është financuar nga grupi kriminal i Zemunit

• Familjarët e të burgosurve shqiptarë ndërprenë grevën e urisë pasi morën premtimet se ata do të lirohen nga burgu

• Xh. Robertson thotë se largimi i ushtarëve rus nga Kosova dhe Bosnja nuk ka kurrëfarë motivi politik, por ekonomik

• Takimi Putin, Shirak, Shrëder në Sankt Petersburg - "samit i humbësve"

• Zyrtarët amerikanë kanë filluar të mbështeten në dëshmitë se ndofta Sadami është i vdekur

• Shkencëtarë irakianë të armëve biologjike kanë ikur në Siri

• NATO-ja thotë se misioni i saj në Kosovë nuk do të ketë ndryshime

• Plaçkitjet s'kanë të ndalur në Bagdad

• Kurdët fillojnë tërheqjen nga Kirkuku

• Takim me opozitën irakiane për administratën

• Presidenti amerikan paralajmëron Sirinë

• Ramsfeld kritikon mediat lidhur me grabitjet në Irak

• Beteja për Tikritin vazhdon

Në Pejë u mbajt një akademi përkujtimore në 90-vjetorin e gjenocidit malezez në Dukagjin

 

Pejë, 12 prill 2003 - Sot në Pejë, nën patronazhin e presidentit të Kosovës Ibrahim Rugova, u mbajt një Akademi përkujtimore, me rastin e 90-vjetorit të gjenocidit malazez dhe rezistencës së shqiptarëve në Rrafshin e Dukagjinit.

Duke hapur këtë akademi, Ali Lajçi, kryetar i Asamblesë komunale të Pejës tha se populli i Kosovës ka përjetuar vuajtje të mëdha, e madje edhe deri gjenocid.

Duke e përshëndetur në emër të Presidenti Rugova këtë akademi, këshilltari i lartë politik i tij, Skënder Hyseni, tha se ngjarjet e ndryshme gjatë historisë sonë duhet të kujtohen vazhdimisht me qëllim që të mos të harrohen.

 

Çdo periudhë e historisë, e sidomos periudhat e dhembjes së saj nëse harrohen ka rrezik që të përsëriten, tha Hyesni. Ai theksoi se populli i Kosovës nuk ka qenë i pushtuar vetëm gjatë viteve të fundit, por edhe gjatë njëqind vjetëve të kaluara.

Ndërkaq ambasadori amerikan dhe miku i shqiptarëve Uiliem Uoker tha në fjalën e tij se ndiehet i lumtur që është në mesin e një populli të shkëlqyer dhe në mesin e njerëzve me të cilët ndan të njëjtat aspirata e ambicie - kjo është pavarësia e Kosovës dhe mirëqenia e saj ekonomike.

 

"Ne shpresojmë se ata njerëz që kanë masakruar shqiptarët më 1913 do të dënohen nga Zoti, kurse Millosheviqin dhe klikën e tij Gjukata e Hagës", tha Uoker.

Poashtu në këtë akademi për gjenocidin malazez mbin popullsinë shqiptare më 1913 folën edhe akademik Mark Krasniq dhe dr. Zekeria Cana.

 

 

Shtajner përkrah idenë për moratoriumin për statusin përfundimtar të Kosovës

 

Prishtinë, 12 prill 2003 - Kryeadministratori i Kosovës Mihael Shtajner ka përkrahur idenë për një moratoriumi të përkohshëm mbi statusin përfundimtar të Kosovës. Këtë mbështetje z. Shtajner e ka bërë pas një takimi me kreun e PDK-së Hashim Thaçi në selinë e UNMIK-ut.

 

"Moratoriumi i z. Thaçi do të na lejonte të përqëndroheshim në çështjet me interes për qytetarët, si zhvillimi ekonomik e çështje të tjera", tha z. Shtajner, duke e quajtur këtë një ide konkrete dhe që ndihmon procesin e përgjithshëm të zhvillimit të Kosovës, siç është ekonomia, hapja e më shumë vendeve të punës, çështja e privatizimit dhe lufta më efektive ndaj krimit të organizuar.

"Moratoriumi na mundëson që të përqëndrohemi në rrugën tonë përpara dhe kjo është integrimi i strukturave kosovare në Evropë" - ka thënë z. Shtajner.

 

Hashim Thaçi, ndërkaq propozimin për moratorium e ka quajtur një projekt jo vetëm të Kosovës, por edhe të ndërkombëtarëve!. Ai tha se kohëzgjatja e këtij moratoriumi duhet të caktohet nga të gjitha palët e interesuara, duke shtuar se ky projekt është kushtëzuar nga statuskuoja në të cilin ka hyrë Kosova!

 

 

E. Hasani: Propozimi për shpalljen e moratoriumit për statusin e Kosovës është vlerësim i gabuar

 

Prishtinë, 12 prill 2003 - Enver Hasani, profesor i së drejtës ndërkombëtare, në një intervistë dhënë radeio "Evropa e lirë" ka thënë se propozimi për shpalljen e moratoriumit për statusin përfundimtar të Kosovës është vlerësim i gabuar. Ai theksoi se ky propozim i shkon për shtati asaj pjese të bashkësisë ndërkombëtare që mëton të shtyjë zgjidhjen e statusit të Kosovës për një kohë tjetër.

"Mendoj se propozimi i njërit prej liderëve të partive politike është synim për të legalizuar një gjendje e cila defakto në Kosovë ekziston, përkatësisht për t'iu përshtatur një pjese të caktuar të bashkësisë ndërkombëtare, e cila synon me çdo kusht ta mbajë këtë status quo dhe ta shtyjë për një kohë shumë të pacaktuar çështjen e zgjidhjes së statusit final të Kosovës", ka thënë z. Hasani.

 

Ai ka shtuar se një ide e tillë është gabim sepse statusi i Kosovës është duke u zgjidhur në mënyrë graduale dhe hap pas hapi.

 

 

LDK: Çfarëdo idesh për pezullim të punës për njohjen formale të pavarësisë së Kosovës janë të papranueshme

 

Prishtinë, 12 prill 2003 - LDK-ja qëndron fuqishëm në përcaktimin e saj për jetësimin e plotë të pavarësisë së Kosovës në bazë të vullnetit të popullit të shprehur në referendum më 1991.

LDK-ja insiston dhe punon në njohjen formale të pavarësisë së Kosovës nga bashkësia ndërkombëtare.

Kosova tashmë po e kalon fazën e protektoratit ndërkombëtar dhe pas gjithë këtij procesi të zhvillimit të gjithanshëm gjatë katër vjetëve në liri, çfarëdo përpjekjesh apo idesh joserioze dhe të tejkaluara për pezullim të punës për njohjen formale të pavarësisë së Kosovës janë të papranueshme për LDK-në.

Prandaj, LDK-ja i kundërshton fuqishëm, pa marrë parasysh nga kush vijnë.

 

 

Brajshou: Kosova është duke arritur gradualisht standardet evropaine

 

Prishtinë, 12 prill 2003 - Zv.kryeadministratori i Kosovës Çarlls Brajshou në një ceremoni me rastin e diplomimit të kadetëve të rinj të SHPK-së tha se Kosova është duke arritur gradualisht standardet evropaine dhe kjo është mënyra më e mirë për të ardhmne e Kosovës që e synon aq shumë populli i saj.

 

Brajshou vuri në pah se policia e Kosovës do të ndihmojë në vendosjen e rendit dhe ligjit në mënyrë që populit të Kosovës t'i garantohen të drejtat e tij në një amebient të sigurt, të mbrojtur nga kriminelët dhe kjo përbën një nga standardet e kërkuara nga komuniteti ndërkombëtar.

Ai tha se ka zëra që thonë se standardet janë një lloj mashtrimi i krijuar që të mbajnë qytetarët jashtë ambicieve për Kosovën, mirëpo ata zëra e kanë gabim, tha Brajshou. Populli i Kosovës dëshiron të jetojë në një ambient tolerant e demokratik, të mbrojtur vetëm nga ligjet dhe me punën e policëve të Kosovës, të cilët do të krijojnë një të ardhme më të mirë për qytetarët e saj.

 

 

Mbrëmë është minuar ura hekurudhore afër Zveçanit

 

Zveçan, 12 prill 2003 - Nga minimi i urës hekurudhore me eksploziv, mbrëmë në mesnatë në vendin e quajtur Lozishte afër Zveçanit në pjesën veriore të Kosovës, është dëmtuar konstruksioni metalik i urës. Sipas mediave serbe supozohet se ende ka eksploziv të paaktivizuar.

 

Trafiku hekurudhor është ndërprerë ndërmjet Leposaviqit dhe Mitrovicës. Po kjo urë është minuar edhe para tri vejetësh.

Pjesëtarët e KFOR-it dhe të policisë së UNMIK-ut po i kryejnë hetimet.

Ky rajon është i banuar dhe kontrollohet kryekëput nga serbët.

 

 

Dallimet racore nuk janë kategori biologjike dhe natyrore që i dallojnë njerëzit

 

Prishtinë, 12 prill 2003 - Dallimet racore nuk janë kategori biologjike dhe natyrore që i dallojnë njerëzit nga njëri tjetri, por këto dallime krijojnë vetë vetë shoqëritë dhe qeveritë. Kështu tha profesori Entoni Li nga Los Anxhelosi, i cili mbajti dje një ligjeratë për ndërtimin e pakicave brenda një shoqërie në kuadër të "Javës së Bibliotekës", që tash një javë po mbahet në Prishtinë.

 

 

Mekshejn: Beogradi t'u thotë qartë serbëve se patjetër duhet të punojnë brenda institucioneve të Kosovës

 

Londër, 12 prill 2003 - Ministri britanik për Evropën Denis Mekshejn, duke folur prë Kosovën, pas vizitës në Prishtinë, deklaroi se transferimi i kompetecave nga UNMIK-u tek institucionet e Kosovës është pjesë e rezolutës së Kombeve të Bashkuara për Kosovën, prandaj pala serbe do të duhej të pushojë me kundërshtimet e pandërprera ndaj atij procesi dhe t'i pranojë.

Mekshejn tha në një intervistë për BBC-në se s'ka ndonjë datë të përcaktuar për fillimin e bisedimeve për statusin përfundimtar të Kosovës dhe bashkësia e atjeshme serbe duhet ta dijë që KB nuk do të tërhiqen nga Kosova para se të formohet një administratë e standardit evropian.

"Qëndrimi ynë është edhe më tutje i qartë, e kjo është se synojmë të shohim një Kosovë e cila funksionon, përkatësisht të shohim realizimin e termit të dobishëm 'standardet para statusit'," tha ministri britanik.

Mekshejn gjithashtu tha se këtë duhet ta përkrahë edhe Beogradi dhe t'u rekomandojë qartë serbëve të Kosovës se patjetër duhet të punojnë brenda institucioneve të Kosovës dhe të pushojnë që si deri më tash të presin instruksione dhe udhëzime nga Beogradi.

 

 

I.Meta: Parësore në përcaktimin e statusit final të Kosovës të jetë e drejta e qytetarëve për t'u shprehur për të ardhmen e saj

 

Tiranë, 12 prill 2003 - Duke komentuar idenë e hedhur për të shpallur një moratorium për statusin e Kosovës dhe qëndrimin e udhëheqjes së re në Beograd.

 

Ministri i jashtëm shqiptar Ilir Meta, tha se çështja e statusit final të Kosovës do të kërkonte jo vetëm kushte të brendshme më të mira, por edhe një angazhim më të madh të komunitetit ndërkombëtar për definimin përfundimtar të kësaj çështjeje, ashtu sikurse do të kërkonte edhe rrethana më të mira rajonale.

"Ne gjithmonë kemi theksuar se parësore në përcaktimin e statusit final të Kosovës duhet të jetë e drejta e të gjithe qytetarëve te Kosovës pa dallime etnike, për t'u shprehur për të ardhmen e saj. Kjo shprehje e vullnetit të tyre duhet të bëhet në bashkëpunim të ngushte dhe ne mirëkuptim të ngushtë me komunitetin ndërkombëtar", tha z. Meta.

Përsa i takon qëndrimit në Beograd, ministri shqiptar tha se udhëheqja e re e Beogradit synon hapjen e një dialogu sa më të shpejtë për zgjidhjen e statusit të Kosovës. Megjithatë, kjo është një çështje e cila kërkon kohën e saj.

"Problemi themelor që unë dëshiroja të nënvizoja për sa i takon statusit të Kosovës është ajo që ka të bëjë me pasojat që mund të sjellë mospërcaktimi i këtij statusi për proceset e integrimit të Kosovës në institucionet evropiane", nënvizoi Ilir Meta para gazetarëve.

Meta përshëndet angazhimet e Shtajnerit për të ecur në drejtim të transferimit të shumë të drejtave të rezervuara që deri tani i takojnë atij si përfaqësues i Sekretarit të Përgjithshëm të OKB-së drejt qeverisë dhe autoriteteve të Kosovës. "Ne do të dëshironim në Samitin e Selanikut një angazhim me të qartë të Bashkimit Evropian për sa i takon perspektivës evropiane të Kosovës dhe përfshirjes së saj në procesin e Stabilizim-Asocimit", tha ai.

Duke inkurajuar Kosovën në këtë drejtim të integrimit evropian mendoj se çështja e përcaktimit të statusit final të saj do të bëhej në një mënyrë më të natyrshme dhe më të pranueshme nga te gjithë, theksoi Ilir Meta.

 

 

Qeveria serbe ka akuzuar partinë e Koshtunicës se ka pasur lidhje me njerëzit që vranë Gjingjiqin

 

Beograd, 12 prill 2003 - Hetimet pas vrasjes së kryeministrit Gjingjiq shpie nga blloku i të të ashtuquajturave "forca patriotike", në krye të të cilave është Partia Demokratike e Serbisë, thuhet në një komunikatë të Qeverisë së Serbisë.

 

Deri tani janë arrestuar rreth 20 persona të cilët kanë qenë të afërt me PDS-në të Vojisllav Koshtunicës. Në mesin e tyre janë Rade Bulatoviq dhe Aco Tomiq, të cilët në dëshmimet në polici kanë konfirmuar se shumë herë në vende të ndryshme janë takuar me Dushan Spasojeviqin dhe Milorad Lukoviqin.

Sipas pohimeve të policisë, kabineti i Vojisllav Koshtunicës ka mbajtur lidhje me "Beretata e kuqe" përmes Gradimir Naliqit prej tetorit të vitit 2000.

Policia serbe ka arrestuar edhe bashkëpunëtorët më të afërt të shefit të dikurshëm të Sigurimit sekret të Serbisë Jovica Stanishiqit. Këta janë ndihmësi i Jovica Stanishiqit, Dragisha Ristojeviq, si edhe Vlada Dragiqeviq, përndryshe shef i kabinetit të Stanishiqit, i cili prej janarit ka qenë edhe këshilltar i shefit të një shërbimi sekret serb (BIA), Andreja Saviqit.

 

 

Partia e Sheshelit është financuar nga grupi kriminal i Zemunit

 

Beograd, 12 prill 2003 - Qeveria serbe akuzon Partinë Radikale Serbe se është finanucar nga ana e Dushan Spasojeviqit, i quajtur "Shiptar", pjesëtarë i grupit kriminal të Zemunit, Ndërkaq Vojisllav Shesheli bashkë me Klanin e Zemunit e ka planifikuar vrasjen e Zoran Gjingjiqit, Nebojsha Çoviqit dhe Gasha Knezheviqit.

 

 

Familjarët e të burgosurve shqiptarë ndërprenë grevën e urisë pasi morën premtimet se ata do të lirohen nga burgu

 

Tetovë, 12 prill 2003 - Familjarët e pjesëtarëve të UÇK-së të cilët ndodhen në burgjet maqedonase e ndërprenë grevën e urisë pas premtimeve se të afërmit e tyre do të lirohen së shpejti. Kryetari i Bashkimit Demokratik për Integrim, Ali Ahmeti u premtoi familjeve të të burgosurve se ish-anëtarët e UÇK-së Krenar Osmani dhe tre shqiptarët tjerë brenda dhjetë ditësh do të lirohen nga burgu.

 

 

Xh. Robertson thotë se largimi i ushtarëve rus nga Kosova dhe Bosnja nuk ka kurrëfarë motivi politik, por ekonomik

 

Bruksel, 12 prill 2003 - I lutur të komentojë vendimin për largimin e ushatarëve rusë nga Kosova dhe Bosnja, sekretari i përgjithshëm i NATO-s Xhorxh Robertson ka thënë se largimi i ushtarëve rusë nga misionet në Kosovë dhe në Bosnje e Hercegoinë nuk ka kurrëfarë motivi politik, por thjesht ka arsye ekonomike.

 

Rusia ka paralajmëruar se të gjithë ushtarët nga misionet në Kosovë dhe në Bosnjë do t'i tërheqë deri në gusht të këtij viti. Kjo bëhet për shkaqe praktike dhe pragmatike për shkak se dërgimi i ushtarëve në misione të tilla është ngarkim, ka thënë Robertson.

Ai e ka quajtur megjithatë këtë vendim si dëshmi se situata në Ballkan tash është përmirësuar dukshëm me kontributin po ashtu edhe të ushtarëve rusë.

 

 

Takimi Putin, Shirak, Shrëder në Sankt Petersburg - "samit i humbësve"

 

Sankt Petersburg, 12 prill 2003 - Pozicioni i Rusisë, Gjermanisë dhe Francës për problemin irakian parimisht nuk ka ndryshuar dhe "ai mund dhe duhet të zgjidhet me rolin qendror të Kombeve të Bashkuara", ka deklaruar presidenti rus Vladimir Putin në Sankt Petersburg pas samitit me presidentin farencez Shirak dhe kancelarin gjerman Shrëder, i quajtur nga shtypi rus edhe "samit i humbësve".

Shirak ka theksuar se Kombet e Bashkuara kanë "legjitimitetin dhe efikasitetin e domosdoshëm" për zgjidhjen e problemit irakian. Shrëder ka thënë se nuk mund të ketë dyshim se SHBA-të dhe Britania kanë fituar në Irak, por ka nënvizuar se është e nevojshme që nga "fitorja ushtarake të nxirret dobi afatgjate për popullin irakian dhe politikën ndërkombëtare".

 

Ndërkaq, Putin ka theksuar se qëllimi i vetëm legjitim "çarmatimi i Irakut, nuk është realizuar", duke shtuar se në Irak nuk janë gjetur armë për shkatërrim në masë. Meqë nuk janë gjetur armë, Putin pyet se çka ka dashur të arrijë aleanca anglo-amerikane.

 

 

Zyrtarët amerikanë kanë filluar të mbështeten në dëshmitë se ndofta Sadami është i vdekur

 

Uashington, 12 prill 2003 – Fati i Sadam Hyseinit është ende i paqartë, por zyrtarët amerikanë kanë filluar të mbështeten në dëshmitë se ndofta Sadami është i vdekur, kanë deklaruar zyrtarët amerikanë, njofton Rojter.

 

Agjencitë amerikane të zbulimit kanë mbledhur të dhëna nga bashkëbisedimet e qytetarëve irakianë dhe të atyre që kanë qenë të afërt me qeverinë e rrëzuar të Sadamit, sipas të cilave thuhet se janë dëgjuar duke thënë se ata besojnë se ai ka vdekur.

 

Se Sadami më parë është i vdekur se i gjallë dëshmohet edhe me rënien e shpejtë të qeverisë së tij fill pas bombardimit të ndërtesës qeveritare në Bagdad, ku sipas CIA-s brenda saj ndodheshin Sadami me të dy djemtë e tij.

 

 

Shkencëtarë irakianë të armëve biologjike kanë ikur në Siri

 

Uashington, 12 prill 2003 – Disa shkencëtarë kryesorë irakianë të armëve biologjike besohet se kanë ikur në Siri, shkruan "Uashington Post" në numrin e sotwm (e shtunë), duke cituar zyrtarët qeveritarë amerikanë të paidentifikuar, njofton Rojter.

 

Ndër këta, vazhdon njoftimi, është Huda Salih Mahdi Amash, e cila është e njohur nga oficerët e zbulimit amerikan me nofkën "Znj. Antraks" dhe Rihab Taha, i njohur me nofkën "Dr. Germ". Raportet e zbulimit thonë se të dy kanë ikur në kryeqytetin sirian, Damask.

 

 

NATO-ja thotë se misioni i saj në Kosovë nuk do të ketë ndryshime

 

Bruksel, 12 prill 2003 - NATO-ja thotë se misioni i saj në Kosovë nuk do të ketë ndryshime për shkak të angazhimeve eventuale në Irak. Duke komentuar paralajmërimet e federatës ruse se do të tërheqë nga Kosova dhe nga Bosnja e Hercegovina të gjithë ushtarët e saj nga misionet paqeruajtëse, zyrtarët e NATO-s kanë thënë se ushtarët rusë kanë dhënë deri më tash një kontribut të madh në stabilizimin e rajonit, duke bashkëpunuar me ushtarët e NATO-s, ndërkaq sipas tyre nuk ka kurrëfarë qëllimesh politike prapa vendimeve të Qeverisë ruse.

 

 

Plaçkitjet s'kanë të ndalur në Bagdad

 

Bagdad, 12 prill 2003 - Ndërsa trupat amerikane dhe ato britanike vazhdojnë të godasin me sukses xhepat e izoluar të rezistencës irakiane, po vazhdojnë dhe plaçkitjet dhe anarkia.

Anarkia ka vazhduar në rrugët e Bagdadit, ku plaçkitësit janë përqëndruar veçanërisht në spitalet e qytetit.

Komiteti Ndërkombëtar i Kryqit të Kuq i ka apeluar forcave të drejtuara nga amerikanët që të rivendosin urgjentisht rregullin.

Sipas Kryqit të Kuq, sitemi shëndetësor është në kolaps për shkak të plaçkitjeve, frikës së anarkisë dhe dëmtimeve nga luftimet.

Stafi mjekësor dhe civilët në disa spitale kanë marrë armët për t'u mbrojtur.

Sipas BBC-së Bagdadi është bërë qytet barrikadash. Banorët e shumë lagjeve kanë bllokuar rrugët për të ndaluar plaçkitjet e shtëpive të tyre nga banorë të lagjeve të tjera.

 

 

Kurdët fillojnë tërheqjen nga Kirkuku

 

Kirkuk, 12 prill 2003 - Trupat kurde kanë filluar, siç kishin premtuar, të tërhiqen nga qyteti i Kirkukut në veri të Irakut.

Një zyrtar i lartë kurd tha se tërheqja ka filluar pjesërisht dhe se tërheqja totale do të fillojë kur në qytet të mbërrijnë më shumë trupa amerikane.

Sarbast Hussein i Bashkimit Patriotik të Kurdistanit tha se kurdët do ta mbajnë premtimin dhe do të tërhiqen nga qyteti.

Amerika i ka premtuar Turqisë se nuk do t'i lejojë forcat kurde të kontrollojnë Kirkukun.
Turqia ka frikë se ekspansioni kurd mund të çojë deri në formimin e një shteti të pavarur të kurdëve.

 

 

Takim me opozitën irakiane për administratën

 

Nasiria, 12 prill 2003 - Shtetet e Bashkuara kanë njoftuar se një delegacion amerikan do të takohet me pjesëtarë të opozitës irakiane të martën në qytetin e Nasarias.

Zëdhënësi i departamentit amerikan të Shtetit, Richard Boucher, tha se takimi do të përqëndrohet në të ardhmen e Irakut dhe në përpjekjet për krijimin e një qeverie të përkohshme për vendin.
Ky lajmërim pasoi daljen në shesh të enjten e javës së shkuar të ndarjeve të mëdha në Uashington lidhur me formimin e një administrate irakiane.

Ndërkaq burim i tensioneve duket se është Ahmed Chalabi, udhëheqësi i Kongresit Kombëtar Irakian, i cili nga disa pjesëtarë të administratës së Bushit admirohet, nga disa të tjerë nuk është figurë e besueshme.

 

 

Presidenti amerikan paralajmëron Sirinë

 

Uashington, 12 prill 2003 - Presidenti amerikan Bush e ka paralajmëruar Sirinë që të mos i ofrojë strehim pjesëtarëve të qeverisë së Sadam Huseinit. Bush tha se pret bashkëpunim të plotë nga Damasku
"U bëjmë thirrje që të mos i lejojnë anëtarët e partisë Ba'ath apo pjesëtarë të familjes së Sadamit që të gjejnë strehim atje," tha zoti Bush.

"Ne presim që ata të bëjnë sa munden t'i ndalojnë ata që janë fajtorë të largohen nga Iraku, dhe nëse ata ndodhen në Siri, presim që autoritetet siriane t'i dorëzojnë," tha ai.

Më herët amerikanët thanë se Siria i ka njoftuar se e ka mbyllur kufirin me Irakun për të gjitha llojet e trafiqeve, më përjashtim të atij humanitar.

 

 

Ramsfeld kritikon mediat lidhur me grabitjet në Irak

 

Uashington, 12 prill 2003 - Sekretari amerikan i Mbrojtjes, Donald Ramsfeld ka kritikuar mbulimin që media i ka bërë grabitjeve dhe incidenteve të dhunshme në Irak pas rrëzimit të qeverisë së Sadam Huseinit.

I pyetur nëse përshkrimet e anarkisë dhe mungesës së ligjit ishin zgjedhur me qëllim të keq zoti Ramsfeld tha "absolutisht".

Ai tha se Iraku ishte një vend që po çlirohej. Zoti Ramsfeld shtoi se ishte fatkeqësi që spitalet po vidheshin, por furnizimet dhe medikamentet po vinin në Irak. Ai tha se forcat e koalicionit e ndjenin si detyrë të ofronin siguri dhe po shkonin nëpër spitale që po grabiteshin për të ndaluar sulme të tilla.

 

 

Beteja për Tikritin vazhdon

 

Tikrit, 12 prill 2003 - Komandantët e ushtrisë amerikane thonë se forcat irakiane mund të përpiqen të bëjnë një qendresë të fundit në Tikrit, vendlindja e Saddam Husseinit dhe njëri prej qyteteve të mëdha irakiane që ende nuk ka rënë në duart e forcave të koalicionit. Banda ushtarësh irakianë u diktuan duke shkuar drejt këtij qyteti në veri të Bagdadit dje.

 

Aeroplanët amerikanë kanë bombarduar vazhdimisht pozicionet e Gardës Republikane përreth Tikritit, por zyrtarët ushtarakë thonë se nuk është e qartë nëse këto forca irakiane që kanë mbetur do të jenë në gjendje ta mbrojnë qytetin.

Forcat tokësore amerikane në Irakun verior ndodhen më pak se 100 kilometra larg nga Tikriti, pasi trupat irakiane braktisën qytetet veriore, Kirkuk dhe Mosul. Sipas lajmeve vetëm një numër i vogël trupash amerikane kanë hyrë në këto qytete dhe banorët janë duke vandalizuar gjithçka u del përpara.

Copyright©2000-2003 Trepca.net - Të gjitha të  drejtat e rezervuara.