Lajme

E premte, 11 prill 2003

Përmbajtja:

• Rugova: Historinë s'mund ta harrojmë, por do të punojmë që Kosova e lirë sa më shpejt të jetë e pavarur

• Ambasadori amerikan Uiliem Uoker vizitoi sot Pejën

• Organizohet aksioni për pastrimin e qytetit të Mitrovicës

• Nexhat Daci thotë se nuk dihet se ku shpenzohen 100 milion euro të suficitit buxhetor të Kosovës

• AAK: Vullneti politik nuk mund të konservohet e as të mbahet peng nga askush

• Shtajneri refuzon të pranojë korrespondencë nga Ombudspersoni Novicki

• Fieski kundërshton krijimin e "komunave serbe" në Kosovë

• Serbët e Leposaviqit kërkojnë shpërndarjen e Parlamentit të Kosovës

• NATO: Tërheqja e ushtarëve rus nga Kosova nuk do të ketë kurrëfarë ndikimi negativ në situatën e sigurisë

• Në Gorazhdec të Pejës disa serbë kanë lënduar rëndë Bekim Shalën

• Forcat e KFORit në Plemetin të Obiliqit kanë gjetur armë automatike, granatahedhës edhe armë antitanke

• D. Çapell thotë se nuk është arrestuar asnjë nga personat e armatosur që u paraqitën në Deçan

• Fituesi i tenderit për aviokopaninë ajrore të Kosovës do të dihet të hënën e ardhshme

• Basketboll: Drita – Dukagjini 101:98

• UEFA: Porto dhe Boavista më afër finales

• Ilir Meta pati një bisedë telefonike me sekretarin amerikan të Shtetit, Kolin Pauell

• Sorosi kritikon administratën e Bushit për luftën në Irak

• Tomi Frenks ka deklaruar sot se lidershipi i regjimit irakian, "ose është i vdekur ose ka ikur"

• Rreth 200 irakianë kanë hyrë me dhunë në ambasadën e tyre në Teheran

• Korparmata e 5-të irakiane është dorëzuar në Mosul dhe është pajtuar për armëpushim

• "Gardian": Bagdad po zhvillohet një luftë spiunazhi amerikano-ruse

• Në një sulm vetëvrasës është vrarë një ushtar amerikan

• Marinsat amerikanë kanë kanë vrarë sot dy të rinj në një pikë kontrolli

• Në qytetin e shenjtë Naxhaf është vrarë lideri i shitëve irakianë

• Rusia thotë se Kombet e Bashkuara duhet të kenë rol qendror në Irakun e pasluftës

• Forca të koalicionit hynë në Mosul

• Udhëheqësit arabë reagojnë me një ndjenjë lehtësimi, por shprehin shqetësim rreth gjendjes në Irak

• SHBA-ja ia pret shkurt evropianëve

• Aeroplanët irakianë kanë bombarduar shtëpinë e vëllait të Sadam Hyseinit

• Turqia e shqetësuar nga një Kirkuk kurd

Rugova: Historinë s'mund ta harrojmë, por do të punojmë që Kosova e lirë sa më shpejt të jetë e pavarur

 

Prishtinë, 11 prill - Presidenti i Kosovës Ibrahim Rugova pas takimit dje pasdite me një delegacion shqiptaro-amerikan që kryesohehej nga ambasadori Uiliam falënderoi delegacionin dhe ambasadorin Uoker që kanë ardhur për të përkujtuar një ngjarje të historisë së Kosovës. Z. Rugova tha se Kosova nuk duhet ta harrojë historinë dhe të punojë që më kurrë të mos përsëritet ajo dhe duke shtuar se ngjarjet e të kaluarës meritojnë të përkujtohen.

"Ne historinë s'mund ta harrojmë, do ta përkujtojmë dhe do të punojmë që sot në Kosovën e lirë sa më shpejt të jetë e pavarur dhe të mos përsëritet historia as për Kosovën, as për vendet e tjera të kësaj pjese të Evropës dhe të botës", tha presidenti Rugova. Presidenti edhe njeherë falënderoi ambasadorin Uiliam Uoker për atë që ka bërë për Kosovën, sidomos kur zoti Uuker ishte dëshmitar i masakrave të vitit 1999.

"Për fat të keq ka pasur shumë masakra në këto troje dhe ne e kujtojmë këtë, që këto masakra të mos përsëriten më kurrë. Falë miqve tanë dhe Shteteve të Bashkuara të Amerikës, falë Zotit dhe aleatëve evropianë, sot jemi të lirë dhe të njihet edhe formalisht pavarësia e Kosovës sa më shpejt", tha presidenti Rugova pas këtij takimi.

Ambasadori Uoker pas përkujtoi se ka qenë disa herë në Kosovë dhe në rrethana shumë të vështira, tha se kjo është hera e katërt që vjen në Kosovë pas përfundimit të luftës. "Secilën herë që jam këtu e pyes z. Rugova për situatën. Ai gjithnjë më thotë se gjërat po ecin për të mirë. Unë e di se ende ka probleme, por kur dëgjoj se gjërat po ecin për të mirë kjo më inkurajon", tha para gazetarëve ambasadori Uoker.

Ndërkaq njëri ndër veprimtarët e Këshilit Shqiptaro-amerikan, Hajdar Bajraktari tha se qëllimi i vizitës është që të përkujtohen viktimat e ngjarjeve tragjike që kanë ndodhur në Kosovë dhe theksoi se komuniteti shqiptaro-amerikan do të vazhdojë përpjekjet që rastet e tilla të mos përsëriten dhe Kosova të jetë e pavarur ku të gjithë qytetarët e saj pa dallim do të jenë të lirë.

Dom Anton Kqira, famullitar i Kishës Katolike në Detroit, tha se luftërat që me shekuj i ka përjetuar populli shqiptar dhe gjaku i derdhur duhet të jenë dëshmi për një angazhim të të gjithëve në ndërtimin e jetës demokratike.

Udhëheqësi i Këshillit organizativ, Mark Krasniqi, tha se përkujtimi i masakrave që janë bërë në Kosovë nuk do të thotë se populli i saj dëshiron hakmarrje, por përkundrazi mizoritë e ushtruara ndaj tij të mos përsëriten. Ndërkaq, angazhimi i popullit shqiptar të Kosovës gjithmonë ka qenë ndërtimi i një vendi të lirë dhe demokratik.

 

 

Ambasadori amerikan Uiliem Uoker vizitoi sot Pejën

 

Pejë, 11 prill - Ambasadori amerikan Uiliem Uoker qëndroi sot në Pejë dhe vizitoi Kuvendin komunal të Pejës, ku u prit nga kryetari i kësaj komune Ali Lajçi me bashkëpunëtorët. Udhëheqja komunale e njoftoi ish-shefin e Misionit verifikues të Kosovës Uoker për arritjet që janë bërë në këtë komunë dhe për ndërtimin e institucioneve demokratike.

Ambasadori Uoker u shpreh i lumtur që ndodhet në Pejë, por tha se ndiehet edhe më i lumtur për kthesat që janë bërë këtu në rindërtimin e këtij qyteti të bukur. Uoker tha se ndien veten mirë të jetë pjesëtar i Kosovës për të mirën e këtij vendi, për të ecur përpara, për ta ngritur edhe më shumë.

 

Ai tha se ka një dashuri të madhe për Kosovën dhe se është duke punuar së bashku me komunitetin shqiptaro-amerian për t'i ndihmuar Kosovës edhe më të ardhmen. Uoker shtoi se ndien veten shumë krenar për gjithë atë që kanë bërë kosovarët prej korrikut të vitit 1999 e deri më tash, tha ambasadori amerikan.

 

 

Organizohet aksioni për pastrimin e qytetit të Mitrovicës

 

Mitrovicë, 11 prill - Aksioni për pastrimin e qytetit, që zhvillohet gjatë prillit në tërë vendin, në kuadër të "Muajit të pastërtisë", të shpallur nga Ministria e Ambientit dhe Planifikimit Hapësinor, në komunën e Mitrovicës do të fillojë të hënën, më 14 prill dhe do të zgjasë deri më 21 prill.

Në organizim të Kuvendit të Komunës, TMK-së, SHPK-së, shkollave dhe NP "Uniteti", aksioni ka për qëllim pastrimin e qytetit dhe varrezat e dëshmorëve nga mbeturinat, si dhe mbëltimin e fidaneve nëpër oaza të ndryshme të qytetit.

Përveç punëtorëve të NP "Uniteti", qytetarëve dhe pronarëve të lokaleve, në aksionin për pastrimin e qytetit, për çdo ditë do të angazhohen edhe nga 30 nxënës të shkollave të mesme dhe 10 pjesëtarë të TMK-së, në ndërkohë që pjesëtarët e SHPK-së do t'u ndihmojnë këtyre duke i kryer obligimet e tyre që dalin me këtë rast.

Kuvendi i Komunës për këtë qëllim ka ndarë 1.600 euro, me të cilat do të blehen pajisje të nevojshme, si dhe do të sigurohet nga një shujtë në ditë për ata që do të punojnë në pastrim, kurse me mjete ndihmëse aksionin do ta ndihmojë edhe Ministria e Ambientit dhe Planifikimit Hapësinor.

 

 

Nexhat Daci thotë se nuk dihet se ku shpenzohen 100 milion euro të suficitit buxhetor të Kosovës

 

Dardanë, 11 prill - "Kosova më nuk ka nevojë për numër aq të madh të burokracisë, e cila i kushton tepër shtrenjtë bashkësisë ndërkombëtare, ndërsa për ne është bërë pengesë e zhvillimeve demokratike dhe ekonomike", ka thënë sot në Dardanë kryeparlamentari Daci.

Ai ka thënë se ka ardhur koha që institucionet e Kosovës të kenë kompetenca të plota, ndërkaq ndërkombëtarët të mbesin në rolin e këshilldhënësve. Gjatë vizitës në Dardanë, ish-Kamenica, z.Daci është takuar edhe me këshilltarët e kësaj komune dhe ka biseduar për zhvillimet në komunë.

Kryeparlamentari Daci ka thënë se në Kosovë është rrezikuar të humbet ajo që është arritur për katër vjet dhe ka theksuar shumë probleme me të cilat përballen qytetarët.

Daci ka thënë se çdo vit ka mbi 100 milionë euro suficit në buxhetin e Kosovës që tregon mungesën e profesionalizmit, por në rastin e Kosovës kjo është mungesë për të ushtruar profesionalizmin. Ai tha se as Qeveria as Kuvendi nuk dinë se ku orientohet ky suficit buxhetor.

 

 

AAK: Vullneti politik nuk mund të konservohet e as të mbahet peng nga askush

 

Prishtinë, 11 prill - Aleanca për Ardhmërinë e Kosovës (AAK), në një komunikatë për media thekson se vullneti i popullit të Kosovës, për Kosovën shtet sovran dhe të pavarur, nuk mund të mbahet peng nga askush dhe nuk mund të konservohet a as të eksperimentohet.

 

AAK-ja thotë se shpallja e Kosovës shtet sovran dhe i pavarur dhe jetësimi i pavarësisë së Kosovës është përgjegjia e vetme dhe e domosdoshme për realizimin e vullnetit të popullit të Kosovës dhe për stabilizimin e rajonit.

Ndërkaq, thuhet më tutje në komunikatë, Parlamenti i Kosovës, forcat politike në parlament, që kanë shumicën parlamentare, mbajnë përgjegjësi politike para popullit dhe procesit në të cilin ndodhemi, për shpalljen e Kosovës shtet sovran dhe të pavarur.

 

Politika e pritjes ka sjellë në vazhdimësi pasoja për procesin politik. Qeveria e Kosovës duhet ta përgatisë projektin dhe programin e punës për qeverinë e kompletuar dhe vetëm mbi këtë projekt të bisedojë me UNMIK-un.

 

 

Shtajneri refuzon të pranojë korrespondencë nga Ombudspersoni Novicki

 

Prishtinë, 11 prill - Gjatë javëve të kaluara, Ombudspersoni i Kosovës Marek Antoni Novcki është përpjekur t'i dorëzojë shefit të UNMIK-ut Mihael Shtajner letra dhe raporte mbi të drejtat e njeriut.

 

Stafit të UNMIK-ut i është thënë se asnjë anëtar i UNMIK-ut nuk do të duhej të nënshkruajë dëftesën e pranimit apo të ofrojë çfarëdo forme tjetër të dëshmisë që UNMIK-u, apo së paku Shtajneri, ka pranuar çfarëdo korrespondence nga kushdo, e aq më pak nga Ombudspersoni, thuhet në një komunikatë të lëshuar nga zyra e z.Novicki.

Edhe PTK-ja konfirmoi sot që shefi i UNMIK-ut gjithashtu ua ka ndaluar stafit të tij të nënshkruajë dëftesa të pranimit të korrespondencës edhe përmes PTK-së.

Në komunikatë më tutje thuhet se tipari kryesor i qeverisjes së mirë demokratike është besimi që institucionet qeveritare e gëzojnë te njerëzit. Një besim i tillë fillon me transparencë dhe përgjegjësi e jo me atë që autoritetet qeveritare ta mbrojnë vetveten nga njerëzit.

Sipas zyrës së Ombudspersonit të Kosovës, refuzimi i autoriteteve për t'ia siguruar një individi dëshminë me shkrim, që është përpjekur të angazhojë këto autoritete, reflekton si mosrespektin ndaj atij individi, ashtu edhe në ndjenjën e vetërëndësisë së tepruar të këtyrë autoriteteve, thuhet mes tjerash në këtë komunikatë.

 

 

Fieski kundërshton krijimin e "komunave serbe" në Kosovë

 

Gjilan, 11 prill - Shefi i Misionit të OSBE-së në Kosovë, ambasadori Paskal Fieski, lavdëroi dje në Gjilan punën e udhëheqejes së kësaj komune, ndërkaq e cilësoi të papranueshme krijimin e "bashkësisë së komunave serbe" në Kosovë.

 

Ai ka theksuar se Gjilani mund të merret si model i mirë edhe për komuna të tjera për udhëheqje dhe zhvillimin e saj, duke përmendur si të veçantë multietnicitetin dhe integrimin e minoriteteve institucionet komunale.

Ndërkaq, duke shfaqur qëndrimin e tij lidhur me formimin e bashkësisë së "komunave serbe" në Anamoravë, z. Fieski tha se OSBE nuk përkrah asociacione dhe bashkësi që krijojnë bariera ndërmjet bashkësive etnike, çfarë është "bashkësia e komunave serbe".

Nga ana tjetër, kryetari i Asamblesë komunale të Gjilanit, Lutfi Haziri ka thënë se kontributi i zotit Fieski ka qenë gjithnjë i rëndësishëm në zhvillimet e gjithëmbarshme pozitive në Kosovë dhe në Gjilan. Ai tha se zhvillimet pozitive do të vazhdojnë edhe në të ardhmen përkundër pengesave që po paraqiten nga minoriteti serb në Anamoravë.

 

 

Serbët e Leposaviqit kërkojnë shpërndarjen e Parlamentit të Kosovës

 

Leposaviq, 11 prill - Disa qindra serbë kanë protestuar dje pasdite në Leposaviq me moton: "Po në Serbi - Jo Kosova e pavarur", duke kundërshtuar kështu transferimin e kompetencave nga administrata e UNMIK-ut në institucionet Kosovës.

Në këtë protestë ekstremistët serbë kanë kërkuar madje edhe shpërndarjen e Parlamentit të Kosovës. Në këtë protestë anëtari i koalicionit "Kthimi" Goran Llazoviq ka ftuar kryeadministratorin e Kosovës Mihael Shatjner që të respektojë Rezolutën 1244 të KS të OKB-së dhe ka vlerësuar qëndrimin e përbashkët të "bashkësisë serbe se Kosova duhet të mbetet në kuadër dhe pjesë e Serbisë".

 

Ndërkaq anëtari i "këshillit nacional serb" për veriun e Kosovës Vlladimir Rakiq ka theksuar se shefi i UNMIK-ut duhet të shpërndajë Parlamentin e Kosovës, pasi sipas tij kërkesa e liderëve shqiptarë për pavarësinë e Kosovës kinse është kundër Rezolutës 1244 dhe gjithashtu qëllimet e Parlamentit të Kosovës janë që TMK-ja të bëhet ushtri.

 

 

NATO: Tërheqja e ushtarëve rus nga Kosova nuk do të ketë kurrëfarë ndikimi negativ në situatën e sigurisë

 

Bruksel, 11 prill - Një zyrtar i lartë në selinë e NATO-s ka theksuar se largimi i kontigjentit rus nga Kosova dhe Bosnja nuk do të jetë një hap dramatik për Aleancën Veriatlantike.

 

Në këtë Aleancë çdo gjashtë muaj bëhen konsultime në mes planeve dhe ushtarakëve të situatës në Kosovë dhe Bosnjë dhe çdo herër pas analizimit të situatës së sigurisë merret një vendim ose për të shtuar ose për të zvogluar numrin e ushtarëve në misionet paqeruajtëse.

 

Ky zyrtar i NATO-s ka thënë se duke marrë parasysh faktin se situata e sigurisë si në Kosovë dhe në Bosnje dukshëm është përmirësuar dhe nuk nevojitet një prani aq e madhe e paqeruajtësve ndërkombëtarë.

 

Në NATO janë të mendimit se largimi i rusëve në asnjë mënyrë nuk do ta kërcënojë situatën e sigurisë pasi që Aleanca Veriatlantike ka mjaft ushtarë si në Kosovë dhe në Bosnjë për të përballuar çdo sfidë eventuale, e cila mund të paraqitet rreth situatës së sigurisë.

 

Në Kosovë për momentin janë të pranishëm 650 ushtarë rus dhe ata janë të përqëndruar kryesisht në Aeroportin e Prishtinës.

 

 

Në Gorazhdec të Pejës disa serbë kanë lënduar rëndë Bekim Shalën

 

Pejë, 11 prill - Në enklaven serbe të Gorazhdecit të Pejës është qëlluar me gurë nga disa serbë Bekim Shala. Sipas mjekëve të Spitalit të Pejës Bekimit i është thyer kafka dhe për shkak të lëndimeve të rënda që ka pësuar në kokë ai është transferuar për mjekim në Qendrën Spitalore të Universitetit të Prishtinës.

 

 

Forcat e KFORit në Plemetin të Obiliqit kanë gjetur armë automatike, granatahedhës edhe armë antitanke

 

Kastriot, 11 prill - Në enklavën serbe në fshatin Plemetin të Komunës së Kastriotit, ish-Obiliqit dje janë gjetur armë automatike, kallashnikov, pushkë, fishekë, granatahedhës, madje edhe armë antitanke.

 

Armët kanë qenë të fshehura në shtëpitë dhe në oborret e serbëve. Janë gjetur edhe shumë uniforma të ushtrisë serbe. Të gjitha këto armë janë gjetur deri në mesditë. Përfaqësuesit e KFOR-it kanë thënë se kohëve të fundit në këtë lokalitet janë shënuar shumë incidente me granata dore dhe njerëzit janë frikësuar.

Sipas ushtarëve të KFOR-it në Plemetin janë gjetur 8 kallashnikovë, 9 pistoleta, 2 raketa antitankë, 6 pushkë, shumë armë të tjera automatike dhe me mijëra fishekë.

KFOR-i thotë se nuk përjashtohet mundësia se do të zbulohen edhe shumë armë të tjera. Në këtë operacion kanë marrë pjesë mbi 300 ushtarë të KFOR-it suedez, finlandez dhe norvegjez.

 

 

D. Çapell thotë se nuk është arrestuar asnjë nga personat e armatosur që u paraqitën në Deçan

 

Prishtinë, 11 prill - Asnjë nga personat e armatosur dhe të maskuar që janë paraqitur të hënën në mbrëmje në fshatin Irzniq të Deçanit nuk është arrestuar pohojnë zyrtarët e policisë. Megjithatë këta njerëz po krijojnë një klimë të frikës te banorët, thotë zëdhënësi i policisë së UNMIK-ut Derek Çapell.

 

E vetmja masë parandaluese për veprimin e njerëzve të armatosur me maska në rajone të ndryshme të Kosovës, është bashkëpunimi mes policisë dhe qytetarëve, pohojnë zyrtarët e Shërbimit Policor të Kosovës dhe zyrtarët e policisë së UNMIK-ut. Ata theksojnë se ende nuk e dinë motivin e paraqitjes së njerëzve me maska në rajonin e Deçanit.

"Ne nuk mund të garantojmë se kjo nuk mund të ndodhë, por mund të garantojmë se çdo herë që na lajmërojnë qytetarët ne do të bëjmë atë që është e mundur që këta njerëz të zbulohen dhe të kapen", ka thënë Çapell. Ai ka shtuar se grupi i njerëzve me maska është një grup i vogël.

 

 

Fituesi i tenderit për aviokopaninë ajrore të Kosovës do të dihet të hënën e ardhshme

 

Prishtinë, 11 prill - Njoftimi publik se kush do të jetë fitues i tenderit për aviokopaninë ajrore të Kosovës do të bëhet e ditur të hënën e ardhshme.

 

Ndërkohë, Ministria e Transportit dhe Telekominikacionit të Kosovës shpreh habinë se si janë paraqitur në opinion fituesit e mundshëm të kompanive me faktin që emrat e anëtarëve të komisionit vlerësues për oferta nuk janë publikuar.

 

Njoftohet se komisioni vlerësues e ka kryer punën e vlerësimit të aplikacioneve të konkurruesve, është zgjedhur kompania fituese dhe pritet që kjo të miratohet nga ministri për Transport e Telekomunikacion, Zef Morina dhe nga kryesuesi i Shtyllës së Katërt të UNMIK-ut, Endy Berpark.

 

Këta të dy të hënën pritet të shpallin fituesin e tenderit, tha zëdhënësi i kësaj ministrie.

 

 

Basketboll: Drita – Dukagjini 101:98

 

Gjilan, 11 prill – Mbrëmë në Gjilan në Palestrën e Sporteve “Bashkim Selishta – Petriti” u zhvillua takimi i fundit i javës 21 të Ligës ABK në basketboll në mes të Dritës vendëse dhe liderit të Ligës ABK, Dukagjinit nga Peja.

Në palestër ishin mbi 2000 shikues, por mysafirët kishin udhëtuar në Gjilan pa simpatizuesit e tyre “Shqiponjat” për shkak të incidenteve që ndodhën të shtunën e kaluar në Pejë pas takimit Dukagjini - MEB Prishtina.

Gjatë gjithë kohës Drita dhe Dukagjini zhvilluan një lojë me një rivalitet të denjë, të cilën gjë e tregon edhe rezultatii cili në të shumtën e rasteve ishte shumë i ngusht, në favor të Dritës apo të Dukagjinit.

 

Në fund të takimit fitues doli Drita me rezultat 101:98 dhe për këtë fitore më i merituari është Womack me 38 pikë të shënuara, i cili në finish të ndeshjes me aksione më shumë individuale arriti që ta shpartalloj mbrojtjen e Dukagjinit dhe t'i sigurojë fitoren ekipit të tij.

Në radhët e Dukagjinit lojtari më i mirë ishte Aleksandër Damo me 32 pikë të shënuara.

Kjo fitore Dritës ia rrit gjasat që në fundtë rradhitet në mesin e katër skuadrave që do të luajnë në pjesën përfundimtare të Ligës ABK.

 

 

UEFA: Porto dhe Boavista më afër finales

 

Prishtinë, 11 prill – Mbrëmë u zhvilluan ndeshjet e para të gjysmëfilales së Kupës së UEFA-së.
Gjasat janë që në finale të Kupës UEFA të luajnë dy skuadra nga Portugalia, pasiqë Porto në terren të vetin mposhti Lacion me 4:1, ndërkaq skuadra tjetër portugeze, Boavista si mysafir luajti bara 1:1 me skuadrën spanjole Sevila.

Rezultatet:
Seltik – Boavista 1:1 dhe

Porto – Lacio 4:1

Ndeshjet e kthimit do të zhvillohen më 24 prill.

 

 

Ilir Meta pati një bisedë telefonike me sekretarin amerikan të Shtetit, Kolin Pauell

 

Tiranë, 11 prill - Ministri shqiptar i Punëve të Jashtme Ilir Meta, pati dje pasdite një bisedë telefonike me sekretarin amerikan të Shtetit, Kolin Pauell.

Sekretari Pauell e falenderoi zotin Meta në emër të SHBA për mbështetjen e gjithanshme që Shqipëria i ka dhënë SHBA-së dhe vendeve të koalicionit për çarmatimin e Irakut.

Pauell çmoi mbështetjen e Shqipërisë si një "mbështetje solide" për të cilën Shtetet e Bashkuara do t’i jenë asaj gjithmonë mirënjohëse.

 

Ai shprehu falenderimin për përkrahjen që Shtetet e Bashkuara kanë marrë nga të gjitha institucionet shtetërore të Shqipërisë duke vlerësuar në veçanti Rezolutën e Parlamentit shqiptar, qëndrimet e shprehura nga Presidenti, Kryeministri dhe Qeveria e Republikës së Shqipërisë.

Më tej Pauell u shpreh se SHBA do të vazhdojë të mbështesë Shqipërinë në rrugën e saj të integrimit, duke theksuar se nënshkrimi së shpejti në Uashington i Kartës së Adriatikut do të jetë një hap konkret drejt anëtarësimit në NATO.

Zoti Meta duke e falenderuar zotin Pauell për telefonatën, u shpreh se ngjarjet e djeshme në Bagdad janë të rëndësishme, dhe përjetohen me emocion edhe nga vetë shqiptarët pasi u revokojnë atyre përmbysjen e regjimeve diktatoriale, kujtimet e hidhura të të cilave janë ende të freskëta në mendjet e tyre.

 

 

Sorosi kritikon administratën e Bushit për luftën në Irak

 

Vjenë, 11 prill - Miliarderi amerikan dhe spekulanti i bursave Xhorxh Soros ka përshëndetur përmbysjen e regjimit të Sadam Huesinit, por ka vlerësuar se lufta kundër Irakut nuk ka pasur bazë dhe se në administratën e presidentit Bush "dimonojnë ekstremistët".

Sipas Sorosit, çlirimi nga diktatori Sadam Husein është një çështje, por është shumë e rrezikshme të niset lufta pa bazë legale - kjo nuk mund të pranohet, ka thënë ai në një intervistë dhënë kanalit televiziv austriak ORF.

 

 

Tomi Frenks ka deklaruar sot se lidershipi i regjimit irakian, "ose është i vdekur ose ka ikur"

 

Bagram, Afganistan, 11 prill – Gjenerali amerikan, Tomi Frenks, komandant i trupave amerikane në Irak, ka deklaruar sot (të premten) se lidershipi i regjimit irakian, "ose është i vdekur ose është arratisur", njofton Rojter. Ai u ka thënë kështu gazetarëve gjatë një vizite të trupave amerikane në bazën amerikane në Afganista.

 

 

Rreth 200 irakianë kanë hyrë me dhunë në ambasadën e tyre në Teheran

 

Teheran, 11 prill – Rreth 200 irakianë kanë hyrë me dhunë në ambasadën e tyre në kryeqytetin iranian, në Teheran, dhe kanë thyer fotografitë e Sadam Hyseinit dhe kanë brohoritur kundër liderit të zhdukur irakian dhe për mundësinë që Shtetet e Bashkura të formojnë qeverinë, e cila do ta zëvendësonte atë, njofton Rojter.

 

Policia iraniane ka arrestuar 60 persona dhe ka deklaruar se asnjë diplomat s'ka qenë atëherë në ambasadën irakiane. Policia ka rrethuar ambasadën.

 

 

Korparmata e 5-të irakiane është dorëzuar në Mosul dhe është pajtuar për armëpushim

 

Kampi Sejlia, Katar, 11 prill – Korparmata e 5-të irakiane është dorëzuar në Mosul dhe është pajtuar për armëpushim, ka thënë sot (të premten) komandanti amerikan i Komandës qendrore. Forcat amerikane tokësore do të vendosin nëse do të trajtohen kapituluesit si të burgosur lufte të armikut apo do të lihen të shkojnë në shtëpi, ka shtuar ai.

 

 

"Gardian": Bagdad po zhvillohet një luftë spiunazhi amerikano-ruse

 

Londër, 11 prill - Gazeta britanike "Gardian" shkruan se në Bagdad po zhvillohet një luftë spiunazhi amerikano-ruse për dokumente sekrete për shkeljen e të drejtave të njeriut dhe zhvillimin e armëve për shkatërrim në masë.

Gazeta thekson se trupat amerikane kanë siguruar ndërtesën e Ministrisë së Punëve të Brendshme irakaine, arkivat e së cilës së shpejti do të gjenden në duart e ekspertëve të CIA-s.

Gjithashtu "Gardian", duke u mbështetur në burimet sekerte, shkruan se bahkëshortja dhe e bija e Sadam Huseinit kinse kanë braktisur Irakun dhe nëpërmjet Sirisë kanë shkuar në një vend të tretë, ndërkaq Sadam Huseini dhe djemtë e tij me siguri ndodhen në qytetin Tikrit, shkruan kjo gazetë.

 

 

Në një sulm vetëvrasës është vrarë një ushtar amerikan

 

Bagdad, 11 prill – Bagdadi ka rënë në një gjendje kaosi, ndërtesat e ministrisë po digjen, kurse plaçkitësit po marrin gjithçka, njofton AFP. Ndërkohë ka ndodhur edhe vetëvrasja e parë me bombë që kur ka rënë regjimi i Sadamit. Është vrarë një ushtar amerikan.

 

Sulmi ndodhi vetëm një ditë pas rënies së qytetit në duarët e trupave amerikane dhe kollapsit të regjimit. Burimet ushtarake kanë thënë se sulmi vetëvrasës ka ndodhur në qytetin e Sadamit, në lagjen e varfër në periferi të Bagdadit.

 

 

Marinsat amerikanë kanë kanë vrarë sot dy të rinj në një pikë kontrolli

 

Nasirija, 11 prill – Marinsat amerikanë kanë deklaruar se ata kanë vrarë sot (të premten) dy tw rinj në një pikë kontrolli, kur shoferi i automjetit, me të cilin të rinjtë po udhëtonin, nuk iu përmbajtën paralajmërimit për t'u ndalur dhe kështu shkaktuan frikën nga sulmi vëtëvrasës, njofton Rojter. Po kështu, njoftohet se edhe 9 persona të tjerë në automjet janë plagosur në këtë incident.

 

 

Në qytetin e shenjtë Naxhaf është vrarë lideri i shitëve irakianë

 

Kuvajt, 11 prill – Një lider i lartë i shitëve irakianë, Abdul Mexhid al-Koei, është vrarë me atentat dje në xhami të qytetit të shenjtë Naxhaf, ka thënë një anëtar i familjes së tij, bënë të ditur në një njoftim të sotëm (e premte) Rojter.

 

 

Rusia thotë se Kombet e Bashkuara duhet të kenë rol qendror në Irakun e pasluftës

 

Dushanbe, 11 prill – Rusia ka deklaruar sot (të premten) se Kombet e Bashkuara duhet të kenë rol qendror në Irakun e pasluftës, duke iu bashkuar kështu isos së thirrjeve të ngjashme të Francës dhe Gjermanisë, njofton Rojter.

 

“Ne shpresojmë që Kombet e Bashkuara të luajnë rol qendror, posaçërisht në rregullimin e situatës së pas luftës në Irak”, iu ka thënë gazetarëve ministri i jashtëm rus, Igor Ivanov, gjatë vizitës në Taxhikistan.

 

Liderët e Rusisë, Francës dhe Gjermanisë, thuhet më tej në këtë njoftim, pritet të fillojnë sot (të premten) bisedimet në qytetin e dytë rus, Petersbug, lidhër me rindërtimin e Irakut, rolin e Kombeve të Bashkuara dhe përmirësimin e lidhjeve me Shtetet e Bashkuara.

 

 

Forca të koalicionit hynë në Mosul

 

Mosul, 11 prill - Sekretari amerikan i Mbrojtjes, Donald Ramsfeld, tha se ushtarët irakianë në qytetin verior të Mosulit kanë rastin të dorëzohen në mënyrë paqesore. Sekretari Rumsfeld tha se Mosuli është gati të bier në duart e forcave të udhëhequra nga Shtetet e Bashkuara.

Ai theksoi se të enjten luftëtarët kurdë morën qytetin Kirkuk dhe rrëzuan dy statuja të Sadam Huseinit.

 

Pentagoni thotë se forcat e ushtrisë së rregullt irakiane në pjesën veriore të vendit janë prania e fundit e rëndësishme ushtarake tokësore irakiane.

 

 

Udhëheqësit arabë reagojnë me një ndjenjë lehtësimi, por shprehin shqetësim rreth gjendjes në Irak

 

Bagdad, 11 prill - Udhëheqësit arabë po reagojnë ndaj marrjes së Bagdatit nga forcat amerikane me një lloj ndjenje lehtësimi që regjimi i Sadam Huseinit u përmbys, por në të njetën kohë po shprehin shqetësim rreth gjendjes së sigurimit dhe mundësisë së qëndrimit të trupave amerikane për një kohë të gjatë në rajon.

Jordania, Egjipti dhe Arabia Saudite, tre nga aleatët më të ngushtë arabë të Washingtonit, bënë thirrje që në Bagdat të vendoset rendi dhe që qeveria e ardhshme e Irakut të zgjidhet nga vetë irakianët.

Sekretari i Përgjithshëm i Lidhjes Arabe, Amër Musa tha se zgjidhja e krizës midis izraelitëve dhe palestinezëve duhet të jetë detyra tjetër që duhet të zgjidhë komuniteti ndërkombëtar.

Përsa i përket reagimit të qytetarëve të thjeshtë për rënien e Bagdatit, njoftimet nga rajoni venë në dukje se disa janë të gëzuar që regjimit të Sadamit i erdhi fundi, ndërsa të tjerë po shprehin zemërim që ushtarët irakianë nuk bënë rezistencë më të fortë.

 

 

SHBA-ja ia pret shkurt evropianëve

 

Uashington, 11 prill - Administrata e Bushit ka dhënë më shumë detaje lidhur me rolin që ajo parasheh që Kombet e Bashkuara të luajnë në Irakun e pasluftës.

Sekretari i shtetit Kolin Pauell tha se Amerika do të zgjedhë udhëheqësit që do të marrin pjesë në qeverinë e përkohshme të Irakut.

Ndërkohë administrata i kërkoi qeverive të Francës, Rusisë dhe Gjermanisë që t'i falin Irakut një pjesë të borxheve ndaj tyre.

 

 

Aeroplanët irakianë kanë bombarduar shtëpinë e vëllait të Sadam Hyseinit

 

Kampi Sejlia, Kastar, 11 prill – Aeroplanët irakianë kanë bombarduar shtëpinë e vëllaut prej babës së Sadam Hyseinit dhe ish-udhëheqës i Shërbimit të zbulimit irakian Mukhabarat, Barzan Ibrahim Hasan al-Tikriti, me gjashtë "bomba inteligjente" (të teledirigjuara), ka bërë të ditur sot (të premten) zëdhënësi ushtarak amerikan, njofton Rojter.

 

Rezultati i këtij bombardimi ende nuk dihet. Ai kishte jetuar në këtë shtëpi afër qytetit Ramadi, 70 mile ne perendim të Bagdadit dhe prej saj ka udhëhequr shërbimin irakian të zbulimit. Nuk dihet të ketë qenë me të lideri irakian.

 

 

Turqia e shqetësuar nga një Kirkuk kurd

 

Ankara, 11 prill - Luftëtarë të milicisë kurde kanë marrë nën kontroll pjesën më të madhe të Kirkukut me përkrahje të forcave amerikane. Kurdët nuk kanë plane për të mbajtur qytetin duke pranuar se SHBA do të luajë rol në drejtimin e qytetit.

 

Por marrja e qytetit ka shkaktuar reagime nga fqinji verior i Irakut, Turqia. Ministri i Jashtëm turk, Abdullah Gul u tha gazetarëve se qeveria po ndiqte ngjarjet me kujdes dhe se do të bënte çfarë të ishte e nevojshme.

Copyright©2000-2003 Trepca.net - Të gjitha të  drejtat e rezervuara.