Lajme

E enjte, 10 prill 2003

Përmbajtja:

• Presidenti Rugova priti një deklegacion 25 anëtarësh shqiptaro-amerikan të kryesuar ambasadori Uiliem Uoker

• Deputetët kërkojnë formimin e ministrisë së drejtësisë

• Proceset në Mitrovicë nuk mund të çohen përpara pa u kryer procesi i integrimit administrativ të komunës

• Presidenti Bush i drejtohet me një mesazh popullit irakian

• Rexhepi është i pakënaqur me efikasitetin e gjyqësisë së Kosovës

• Novicki bisedon me qytetarët e Pejës

• Rusia ka vendosur të tërheqë kontigjentin e saj paqeruajtës nga Kosova

• Mungesa e ligjeve dhe zbatimi i ligjeve të ish-Jugosllavisë paraqet problem kryesor në gjyqësinë e Kosovës

• Ombudspersoni i Kosovës sot kontakton qytetarët e Pejës

• Filloi procesi i bartjes së kompetencave nga policia e UNMIK-ut në SHPK

• Sipas zëdhënësit Fleçër krimi i organizuar shqiptar bashkëpunon në mënyrë perfekte me krimin e organizuar serb

• Në një tribunë shkencore u tha se arkivat përbëjnë një pjesë të thelbësore të pasurisë historike dhe shkencore

• Në Prishtinë ka filluar punimet konferenca e parë ndërkombëtare e mjekësisë familjare

• Alarmi për vendosjen e një lënde shpërthyese në lokalet e PTK-së ishte i rrejshëm

• U luajtën ndeshjet e para çerekfinale të Ligës së kampionëve, sonte ndeshjet e para gjysmëfinale të UEFA-s

• Futboll: U hodh shorti për të tetën e finales së Kupës së Kosovës, takimi më interesant Drita – Besiana
  Liga ABK: MEB Prishtina – Trepça 98:73

• Buçkovski ka pezulluar kreun e Akademisë Ushtarake maqedonase

• I. Meta: Tirana dhe Beogradi duhet të kontribuojnë për klimë të qëndrueshme në Kosovë

• Pjësmarrësit e Samitit të Evropës Juglindore mbështetën edhe Rezolutën e OKB-së për Kosovën

• Presidenti Moisiu u takua dje në Beograd me homologun serb Maroviq ku u bë fjalë edhe për Kosovën

• Gjenerali francez Maral e konsideron të suksesshëm fillimin e misionit "Konkordia" në Maqedoni

• Forcat kurde morën qytetin Kirkuk

• Në Bagdad janë parë të shtrirë 21 trupa të vdekur të ushtarëve dhe civilëve irakianë

• Arabët janë të "dëshpruar" me rënien e Bagdadit

• Ulen çmimet e naftës pas rënies së rrufeshme të Sadamit

• "Liberasion": Shiraku do të bëhet mbreti i paqes, por një mbret pa kurorë

• Në Arabinë Saudite ekzekutohet një pakistanez

• Dy palestinezë kanë vrarë sot dy izraelitë afër një kolonie hebraike

• Lojalistët e Sadam Hyseinit kanë vrarë një marins dhe kanë plagosur rreth 20 të tjerë

• Luftëtarët arabë janë goditur gabimisht nga aeroplanët amerikanë

• Armata izraelite ka vrarë sot 12 palestinezë

• Edhe dy persona kanë vdekur nga virusi SARS në Kinë

• Zjarri merr jetët e 28 fëmijëve

• Mbi 80 sulme kundër firmave amerikane në botë

• Pentagoni thotë se në Irak janë vrarë 101 pjesëtarë të forcave amerikane

• Zyrtarë amerikanë paralajmërojnë se lufta në Irak nuk ka përfunduar

• Ramsfeld: Sadami ka zënë tani vendin që i takon krahas Hitlerit, Stalinit, Çausheskut

• SHBA paralajmërojnë Sirinë dhe vende të tjera të mos prodhojnë armë të shkatërrimit në masë

• Luftime të reja në Bagdad

• Sulmohet vendlindja e Sadamit

Presidenti Rugova priti një deklegacion 25 anëtarësh shqiptaro-amerikan të kryesuar ambasadori Uiliem Uoker

 

Prishtinë, 10 prill 2003 - Presidenti i Kosovës Ibrahim Rugova priti sot një deklegacion 25 anëtarësh shqiptaro-amerikan, i cili kryesohet nga shefi i dikurshëm i misionit verifikues të OSBE-së në Kosovë ambasadori Uiliem Uoker. Në një bisedë të pëzemërt e miqësore presidenti Rugova foli para mysafirëve për arritjet që janë bërë në Kosovën e lirë dhe për zhvillimet aktuale në të gjitha fushat e jetës. Presidenti me këtë rast falënderoi ambasadorin Uoker si dhe anëtarët e tjerë të deklegacionit për ndihmën dhe përkrahjen që kanë dhënë për Kosovën.

 

Me të mbërritjur në Prishtinë, ambasadori Uoker tha se ndiehet i lumtur që sërish viziton Kosovën dhe e sheh të lirë, duke thënë se shpreson që një ditë ta shohë edhe të pavarur.

Ky delegacion do të marrë pjesë të shtunën në Pejë një mbledhje përkujtimore kushtuar 90-vjetorit të gjenocidit malazez dhe rezistencës së shqiptarëve të Dukagjinit, e cila organizohet nën patronazhin e presidentit Rugova.

 

 

Deputetët kërkojnë formimin e ministrisë së drejtësisë

 

Prishtinë, 10 prill 2003 - Pas një raporti të Komidonit legjislativ për gjendjen në gjyqësinë e Kosovës, shumë deputetë pastaj disktuan lidhur me këtë çështje. Deputetët me tone kritike u shrehën për gjendjen në këtë fushë dhe kërkuan sa më parë të formimin e ministrisë së drejtësisë.

Ndërkaq shefi i shtyllës së UNMIK-ut për drejtësi dhe gjyqësi Zhan Kristian Kadi dha në pasqyrë për gjendjen e gjyqësisë në Kosovë. Ai tha se UNMIK-u ka si synim krijimin e një sistemi të pavarur e shumetnik gjyqësor, duke shtuar se ky sistem është në fazën fillestare. Kadi premtoi se gjendja në gjyqësi do të përmirosohet pas miratimit të ligjeve penale.

Një temë tjetër që ka preokuar sot deputetët ishte edhe çështja e personave të zhdukur. Fillimisht në këtë temë raportoi kryetarja e Komisionit parlamentar Flora Brovina duke kërkuar që të bëhet më shumë këtë drejtim.

Edhe në këtë temë janë paraqitur shumë deputetë për të disktuar dhe mbledhje ende po i vazhdon punimet.

 

 

Proceset në Mitrovicë nuk mund të çohen përpara pa u kryer procesi i integrimit administrativ të komunës

 

Mitrovicë, 10 prill 2003 - Një delegacion i lartë i Këshillit të Evropës, me në krye ambasadorin Karlo Çivileti, përgjegjës për decentralizim në Këshillin e Evropës, ka qëndrua sot në komunën e Mitrovicës, dhe ka biseduar me kryetarin e Kuvendit të Komunës Faruk Spahija dhe bashkëpunëtorët e tij.

Temë bosht e bisedimeve ka qenë vlerësimi i gjendjes aktuale në funksionimin e pushtetit lokal dhe hartimi i një koncepti për decentralizimin e pushtetit, përkatësisht realizimi i konceptit për bartjen e kompetencave nga niveli më i lartë në nivelin lokal.

Pasi që ka përkrahur aktivitet në këtë drejtim, kryetari Spahija ka thënë se Mitrovica i ka specifikat e veta që dallojnë nga komunat tjera dhe se parakusht për realizimin e këtij koncepti në komunën e Mitrovicës, është funksionalizimi i pushtetit lokal për ushtrimin e kompetencave të parapara me Rezolutën 1244 dhe rregulloret që dalin nga kjo në vetëqeverisjen e qytetit të integruar, përkatësisht në tërë territorin e komunës.

Spahija u ka thënë zyrtarëve të lartë nga Këshilli i Evropës se proceset e tjera në komunë nuk mund të çohen përpara pa u kryer procesi i integrimit administrativ të komunës.

Sipas zotit Spahija, pengesë kryesore që mund t'i prolongojë këto procese, janë tendencat e ekstremistëve serbë për ta penguar me çdo kusht procesin e integrimit dhe praninë e institucioneve vendore në këtë pjesë të komunës.

 

 

Presidenti Bush i drejtohet me një mesazh popullit irakian

 

Uashington, 10 prill 2003 - Në një mesazh të regjistruar për popullin irakian që do të transmetohet pas pak në televizion presidenti amerikan Xhorxh Bush thotë se qeveria dhe e ardhmja e vendit do t'u përkasin vetë irakianëve.

"Në këtë moment, regjimi i Sadam Huseinit po hiqet nga pushteti dhe epokës së gjatë të frikës dhe krimeve po i vjen fundi”,-thotë presidenti Bush.

Mesazhi i presidentit, i përkthyer në arabisht, do të transmetohet në orën 18 sipas orës lokale të Bagdatit. Mesazhi do të shënojë fillimin e një emisioni televiziv të përditshëm prej 6 orësh të përgatitur nga Departamenti amerikan i Mbrojtes.

Ndërsa trupat e koalicionit ndodhen në Bagdat, presidenti Bush thotë se lufta për të përmbysur Sadam Huseinin do të përfundojë së shpejti.

"Ju meritoni një jetë më të mirë se tirania, korrupsioni dhe torturat, që keni jetuar deri tani. Ju meritoni të jetoni si njerëz të lirë dhe unë ju siguroj ju të gjithëve se vendi juaj do të jetë së shpejti i lirë", - thotë presidenti Bush.

Emisioni televiziv do të përmbajë edhe një mesazh të ngjashëm nga kryeministri britanik Toni Bler.

 

 

Rexhepi është i pakënaqur me efikasitetin e gjyqësisë së Kosovës

 

Deçan, 10 prill 2003 - Duke folur para protestuesve sot në Deçan, kryeministri i Kosovës Bajram Rexhepi ka thënë se deri në fund të prillit çështja e mbrojtjes së vlerave të luftës do të përcillet në parlamentin e Kosovës. Rexhepi është shrehur të jetë i pakënaqur me efikasitetin e gjyqësisë së Kosovës.

 

Ndërkaq për dënimet e shqiptuara për grupin e Dukagjinit ai tha se lënda tani do të kalojë në Gjykatën Supreme të Kosovës dhe ai shpreson në një vendim të drejtë të kësaj gjykate.

Kryeministri me këtë rast ka kërkuar nga protestuesit që të mos bllokojnë rrugët.

 

 

Novicki bisedon me qytetarët e Pejës

 

Pejë, 10 prill 2003 - Ombudspersoni i Kosovës Marek Antoni Novciki, i cili sot ndodhet në Pejë, ka deklaruar se ka shkuar në këtë qytet për të biseduar me qytetarët për problemet e tyre.

 

Novicki sot ka rezevruar kohën prej orës 10 deri në 17.00 për të biseduar me qytetarët e interesuar dhe ai ndërkohë ka biseduar me mbi 30 qytetarë të cilat janë ankuar për hallet e problemet e tyre rreth çështjeve sociale, atyre të banimit dhe problemeve që kanë nëpër gjykata, por edhe rreth problemeve të papunësisë.

 

 

Rusia ka vendosur të tërheqë kontigjentin e saj paqeruajtës nga Kosova

 

Moskë, 10 prill 2003 - Sipas njoftimeve nga Moska, Rusia ka vendosur të tërheqë kontigjentin e saj paqeruajtës nga Kosova dhe Bosnja e Hercegovina, citohet t'i ketë deklaruar agjencisë ruse të lajmeve Interfaks një zyrtar i Ministrisë ruse të Mbrojtjes.

 

"Ne kremi marrë vendimin përfundimtar për dhënien fund të pjesëmarrjes sonë në operacionin në Ballkan dhe ditëve ta ardhshme do të bëhet publik dokumenti zyrtar", ka thënë ky zyrtar rus.

 

"Rusia nuk ka më interes strategjik në Ballkan. Ne kemi hyrë më 1999 në krahinën jugosllave, në Kosovë, për të mbrojtur serbët. Tani serbë atje praktikisht nuk ka siç nuk ka më as Jugosllavi", ka thënë ai.

Ky zyrtar rus është ankuar se qëndrimi i paqeruajtëse rusë kushton 25 milion dollarë në vit dhe këto mjete më mirë të shfrytëzohen për ndërtimin e forcave të armatosura të Rusisë ka thënë ky zyrtar i panjëjtësuar rus.

 

 

Mungesa e ligjeve dhe zbatimi i ligjeve të ish-Jugosllavisë paraqet problem kryesor në gjyqësinë e Kosovës

 

Prishtinë, 10 prill 2003 - Në seancën e sotme të rregullt deputetët e Kuvendit të Kosovës fillimisht dëgjuan një raport të përgatitur nga Komisioni legjislativ lidhur me gjyqësinë e Kosovës.

Kryetari i këtij komisioni Arsim Bajrami tha se në Kosovë ende nuk ekziston një gjyqësi e pavarur dhe e bazuar në standardet demokratike. Bajrami tha se mungesa e ligjeve dhe zbatimi i ligjeve të ish-Jugosllavisë, një shtet ky inekzistent, paraqet problem kryesor në gjyqësinë e Kosovës.

 

Ai tha se UNMIK-u ende ushtron kontrollin mbi gjyqësinë dhe në këtë fushë ka raste të shkeljes së rëndë, sidomos nëpërmjet të ashtuquajturit "urdhër ekzekutiv".

Politika e kuadrove dhe mungesat materiale janë një problem tjetër që rëndon mbi gjyqësinë e Kosovës, thekson Komisioni legjislativ.

 

Sipas këtij komisioni krijimi i ministrisë së drejtësisë dhe i gjykatës kushtetuese janë çështjet më parësore që do të ndihmonin në vendosjen e shtetit të së drejtës, duke propozuar njëherit hartimin e ligjeve penale dhe civile, ngase në këtë mënyrë do të hiqeshin nga përdorimi ligjet e ish-Jugosllavisë.

Gjatë kësaj mbledhjeje duhet të japë sqarime lidhur me çështjet e gjyqësisë Zhan Kristian Kadi, përfaqësues i shtyllës së parë të UINMIK-ut.

Në këtë mbledhje do të paraqitet edhe një raport i Komisionit për personat e zhdukur.

 

 

Ombudspersoni i Kosovës sot kontakton qytetarët e Pejës

 

Prishtinë, 10 prill 2003 - Z. Marek Antoni Novicki, Ombudspersoni i Kosovës sot në Pejë prej orës 10:00 deri në orën 17:00, organizon "Ditë të hapur" për qytetarët.

Qytetarët e Pejës do të kenë mundësi që Ombudspersonin e Kosovës ta kontaktojnë drejtpërdrejt.

 

 

Filloi procesi i bartjes së kompetencave nga policia e UNMIK-ut në SHPK

 

Prishtinë, 10 prill 2003 - Një zëdhënës i policisë ndërkombëtare të OKB-së në Kosovë ka thënë se tashmë ka filluar procesi i bartjes së kompetencave nga policia ndërkombëtare në Shërbimin Policor të Kosovës.

 

Kjo bartje e kompetencave, ka thënë ai, është në vazhdim e sipër edhe në Mitrovicë dhe se radhët e Shërbimit Policor të Kosovës po shtohen dita me ditë, duke shtuar se ky shërbim po aftësohet të marrë edhe përgjegjësitë që i takojnë në shoqërinë e Kosovës.

 

 

Sipas zëdhënësit Fleçër krimi i organizuar shqiptar bashkëpunon në mënyrë perfekte me krimin e organizuar serb

 

Prishtinë, 10 prill 2003 - Vrasja e kryeministrit serb Zoran Gjingjiq dhe zhvillimet e mëvonshme nuk kanë ndikuar mbi situatën e sigurisë në Kosovë, kanë thënë zyrtarët e policisë së UNMIK-ut.

 

Mirëpo, zëdhënësi i policisë së UNMIK-ut, Beri Fleçër ka thënë se nuk përjashtohet mundësia që ndonjë element kriminal nga Serbia të jetë strehuar në Kosovë, ndonëse për këtë aktualisht nuk ka dëshmi.

Zëdhënësi Fleçër ka theksuar se kufiri ndërmjet Kosovës dhe Serbisë nuk është kufi ndërkombëtar, prandaj ka qindra e ndoshta edhe mijëra mënyra për t'u kaluar kufiri pa u vërejtur.

Krimi i organizuar që vepron në Kosovë, thotë ai, është pjesë e një rrjeti rajonal të krimit të organizuar, dhe ka shtuar se krimi i organizuar shqiptar bashkëpunon në mënyrë perfekte me krimin e organizuar serb.

 

Kriminelët serbë nuk do të thotë se vijnë dhe veprojnë në Kosovë, por duke qenë pjesë e rrjetit ata janë të vëmendshëm për territorin e tyre gjeografik.

 

 

Në një tribunë shkencore u tha se arkivat përbëjnë një pjesë të thelbësore të pasurisë historike dhe shkencore

 

Prishtinë, 10 prill 2003 - Arkivat përbëjnë një pjesë thelbësore dhe të pazëvendësueshme të pasurisë kulturore, historike dhe shkencore të një vendi.

 

Kështu u tha në tribunën shkencore në Prishtinë në temën "Historia jonë, dokumente dhe dëshmi të reja", të cilën e organizoi Arkivi i Kosovës në bashkëpunim me Drejtorinë e Përgjithshme të Arkivave të Shqipërisë dhe Arkivin Shtetëror të Kroacisë.

 

 

Në Prishtinë ka filluar punimet konferenca e parë ndërkombëtare e mjekësisë familjare

 

Prishtinë, 10 prill 2003 - Në Prishtinë ka filluar punimet konferenca e parë ndërkombëtare e mjekësisë familjare. Qëllimi i kësaj konference është krijimi i një strategjie të përbashkët mes ekespertëve vendas dhe atyre ndërkombëtarë për zhvillimin e mjekësisë familjare në Kosovë.

 

 

Alarmi për vendosjen e një lënde shpërthyese në lokalet e PTK-së ishte i rrejshëm

 

Prishtinë, 10 prill 2003 - Alarmi për vendosjen e një lënde shpërthyese në lokalet e Posttelekomit të Kosovës në Prishtinë ishte i rrejshëm, kanë thënë zyrtarët e policisë së UNMIK-ut.

 

Në të vërtetë dje në mesditë SHPK kishte marrë një thirrje anonime se një mjet shpërthyes është i vendosur në lokalet e PTK-së. Me këtë rast ishin evakuar të gjithë punonjësit e PTK-së.

Sipas bashkëpunëtorit të lartë për marrëdhënie me publikun Rexhep Krasniqi në PTK sigurimi i ndërtesës dhe SHPK kanë bërë kontrollimin e ndërtesës, dhe pasi kanë vërtetuar se në ndërtesën e PTK-së nuk kishte mjet shpërthyes, personeli u kthye në objekt.

 

 

U luajtën ndeshjet e para çerekfinale të Ligës së kampionëve, sonte ndeshjet e para gjysmëfinale të UEFA-s

 

Prishtinë, 10 prill 2003 – Të martën dhe të mërkurën u luajtën takimet e para të çerekfinale të Ligës së Kampionëve evropianë.

U arritën këto rezulate:

Real Madrid – Mançester Unaited 3:1,

Ajax – Milan 0:0,

Inter –Valensia 1:0 dhe

Juventus – Barcelona 1:1.

Ndeshjet e kthimit do të luhen më 22 dhe 23 prill.

Sonte do të luhen edhe ndeshjet e para të gjysmëfinals së UEFA-së ku do të takohen: Seltik – Boavista (20.05) dhe Porto - Lacio (22.00)

 

 

Futboll: U hodh shorti për të tetën e finales së Kupës së Kosovës, takimi më interesant Drita – Besiana

Prishtinë, 10 prill 2003 - Dje u hodh shorti për të tetën e finales së Kupës së Kosovës në futboll. Prishtina takohet me Besën e Pejës kurse Gjilani pret Flamurtarin.

Ndeshja më interesante pritet të jetë ajo Drita – Besiana.

Çiftet e të tetës së finales janë:

 

KEK-u – Kosova(V),

Liria – 2 Korriku(P),

Gjilani – Flamurtari,

Kosova(P) – Shqiponja,

Prishtina – Besa,

Drenica – Deçani,

Drita – Besiana dhe

Vëllaznimi - Ramiz Sadiku.

 

 

Liga ABK: MEB Prishtina – Trepça 98:73

 

Prishtinë, 10 prill 2003 – Mbrëmë në Prishtinë para 2500 shikuesve, në një atmosferë madhështore dhe sportive u zhvillua derbi i javës së 21-të të Ligës ABK në basketboll në mes të kampionit dhe nënkampionit aktual, (MEB Prishtina – Trepça).

Në këtë takim basketbolllistët vendës, ata të MEB Prishtinës ishin shumë më të disponuar për lojë dhe duhet dalluar basketbollistin me numër 9 të MEB Prishtinës, Marin Përskalo i cili me 25 pikët e shënuar ishte basketbollisti më i mirë i këtij takimi.

 

Prishtinasit në asnjë moment nuk lejuan që kundërshtari t'ua rrezikojë fitoren, përveç se në minutën e parë kur me treshen e Besim Brahës mysafirët nga Mitrovica arrijnë të avancojnë me 3:2 gjatë gjithë pjesës tjetër të lojës avantazhi i prishtinasve ishte i larte dhe në fund të gjysmëlojës së parë diferenca ishte 22 pikë në të mirë të MEB Prishtinës.

Në fund rezultati përfundimtarë ishte MEB Prishtina – Trepça 98:73.

 

Në takimet tjera të kësaj jave u arritën këto rezuktate:

 

Excluzive – Mabetex 75:91

Ylli – QMI Bashkimi 75:78 dhe

Drita – Dukagjini, ky takim zhvillohet sonte dhe transmetohet nga RTK drejtpërdrejtë nga ora 8,10.

Rezultatet dhe Tabela

 

 Liga ABK

 

Rezultatet - xhiroja e 21-të

Me 9 dhe 10 prill 2003

MEB Prishtina - Trepça - 98:73

Excluzive - Mabetex - 75:91

Ylli - QMI Bashkimi - 75:78

Drita - Dukagjini - sot

Në xhironë e 22-të,
më 12/13 prill, takohen: Drita - MEB Prishtina, QMI Bashkimi - Trepça, Ylli - Mabetex, Excluzive - Dukagjini.

Buçkovski ka pezulluar kreun e Akademisë Ushtarake maqedonase

Shkup, 10 prill 2003 - Ministri i Mbrojtjes i Maqedonisë Vllado Buçkovski ka pezulluar kreun e Akademisë Ushtarake, kolonelin Stojçe Deskovski, pasi disa civilë të dehur, të dielën kishin hyrë në kazermë dhe e kishin rrahur një ushtar shqiptar.

Dy nga sulmuesit menjëherë janë arrestuar nga policia.

Deklarata thotë se ministria, ashpër e dënon incidentin dhe i hedh poshtë pohimet për ekzistimin e dhunës etnike në ushtri.

 

 

I. Meta: Tirana dhe Beogradi duhet të kontribuojnë për klimë të qëndrueshme në Kosovë

 

Beograd, 10 prill 2003 - Tirana dhe Beogradi duhet të kontribuojnë për një klimë më të qëndrueshme ka thënë ministri i Jashtëm i Shqipërisë Ilir Meta në intervistën dhënë radios "Evropa e lirë".

 

Ai thotë se me zyrtarët e Beogradit është biseduar edhe për problemin e Kosovës, por edhe për pozitën e shqiptarëve në Luginën e Preshevës.

I pyetur se çka ka menduar ai kur ka thënë se Tirana duhet të luajë rolin e një ure me Beogradin për zgjidhjen e statusit final të Kosovë, ministri Meta tha:

 

"Më vjen keq që jam keqkuptuar. Unë kam shprehur në mënyrë të vazhdueshme se Tirana dhe Beogradi përveç zhvillimit të marrëdhënieve dypalëshe, kam parasysh këtu fushën e ekonomisë, tregtisë, turizmit, transportit.

 

Por kam thënë se këto dy vendet duhet të kontribuojnë edhe për një klimë më të qëndrueshme në Kosovë, për t'i inkurajuar shqiptarët dhe serbët e Kosovës për të punuar së bashku në institucionet demokratike".

 

 

Pjësmarrësit e Samitit të Evropës Juglindore mbështetën edhe Rezolutën e OKB-së për Kosovën

 

Beograd, 10 prill 2003 - Pjesëmarrësit e Samitit të Ballkanit Perëndimor, përkatësisht të Evropës Juglindore kanë miratuar mbrëmë në Beograd një deklaratë me të cilën kërkohet shpejtimi i procesit të integrimit në institucionet evropiane dhe evroatlanike.

 

Në këtë deklaratë ritheksohet vullneti i përbashkët për forcimin e bashkëpunimit, paqes dhe sigurisë në rajon, përfshirë këtu edhe mosndryshimin e kufijve ekzistues.

 

Si prioritet i bashkëpunimit rajonal theksohet edhe liberalizimi i mëtejmë i regjimit të vizave, angazhimi për krijimin e zonës së tregëtisë së lirë në rajon, bashkëpunimi në fushën e telekomunikacionit, të trafikut dhe të energjetikës.

Nëntë vendet e Evropës Juglindore që morën pjesë në këtë samit konfirmuan mbështetjen për aktet dhe rezolutat e deritashme të OKB-së, mes të cilave përmendet edhe Rezoluta 1244 e KS të OKB-së për Kosovën.

 

 

Presidenti Moisiu u takua dje në Beograd me homologun serb Maroviq ku u bë fjalë edhe për Kosovën

 

Beograd, 10 prill 2003 - Presidenti i Shqipërisë Alfred Moisiu është takuar dje me homologun e tij të Unionit serbo-malazez Svetozar Maroviq, ku është ritheksuar thellimi i marrëdhënieve dypalëshe, jo vetëm në rrafshin politik por edhe në atë ekonomik.

 

Në këtë takim është folur edhe për çështjen e Kosovës, siç është dialogu i ndërsjellë, zhvillimi i demokracisë dhe i institucioneve, si dhe kanë vlerësuar rrugët për zgjidhjen pa probleme të çështjeve që janë ende të hapura.

 

Sipas burimeve nga takimi, Maroviq ka njohur rolin që edhe Tirana mund të luajë në dialogun mes Prishtinës dhe Beogradit.

 

 

Gjenerali francez Maral e konsideron të suksesshëm fillimin e misionit "Konkordia" në Maqedoni

 

Shkup, 10 prill 2003 - Dhjetë ditë nga zëvendësimi i prezencës ushtarake të NATO-s me atë të Bashkimit Evropian në Maqedoni, gjenerali francez Pier Maral, në një intervistë për BBC-në në shqip, e konsideroi të suksesshëm fillimin e misionit "Konkordia".

Maral tha se suksesi i parë ishte zëvendësimi i ushtarëve të NATO-s më 31 mars pa asnjë problem mes BE-së dhe NATO-s. Sipas tij, ndërrimi i misionit nuk shkaktoi asnjë shqetësim edhe tek popullsia, qoftë shqiptare, qoftë maqedonase.

 

"Shumë vetë menduan se popullsia shqiptare, largimin e NATO-s, mund ta interpretonte si braktisje, duke menduar se forca e BE-se nuk do të ishtë një mision i vërtetë. Por kjo nuk ndodhi", tha Maral.

 

 

Forcat kurde morën qytetin Kirkuk

 

Kirkuk, 10 prill 2003 - Forcat kurde të mbështetura nga Amerika kanë hyrë në qendër të qytetit verior të Kirkukut, vetëm një ditë pasi në Bagdad u rrëzua regjimi i Sadam Huseinit.

Një korrespondente e BBC-së që po udhëton me trupat, tha se banorët lokalë po festojnë, atë që duket si rënia e Kirkukut.

Ende ka xhepa të rezistencës, por duket se ushtria e ka braktisur qytetin, që kontrollon fusha nafte me rëndësi strategjike në veri të Irakut.