Lajme

E marte, 8 prill 2003

Përmbajtja:

• Presidenti Rugova i ka thënë ministrit Mekshejn se angazhohet për një Kosovë demokratike, të integruar në BE dhe në NATO

• Këshilli i Evropës nuk aprovon bashkësitë e komunave serbe

• Bush dhe Bler thonë se OKB do të luajë rol jetik në rindërtimin e Irakut

• Mekshej u tha gazetarëve se pa zgjidhjen e statusit të Kosovës nuk mund të zgjidhet as statusi i Unionit Serbi - Mali i Zi

• LDK kërkon ligj për zgjedhje

• Bukoshi kritikon administratën e UNMIK-ut për standarde të dyfishta në Kosovë

• Shteti i Suedisë ende nuk do të lëshojë viza në Prishtinë

• Qeveria e Kosovës pret që me bartjen e kompetencave të fillojë një fazë e re e funksionalizimit të institucioneve vendore

• Tirana e gatshme të bëjë ekstradimin e personave më të kërkuar nga Intepoli

• P.Mur: BE-ja me një forcë ushtarake me fuqi botërore (?) - kjo është një ëndërr dhe është e parealizueshme!

• Raport kritik i Avokatit të Popullit për të drejtat e njeriut në Shqipëri

• Trupat komando nga Shqipëria u nisën drejt Gjirit Persik në mbështetje të forcave aleate anglo-amerikane

• Këshilli Organizativ i Protestave mori vendim për të mos bllokuar aksin rrugor Tetovë - Gosativar dhe Tetovë – Jazhincë

• Institucionet e Maqedonisë kanë miratuar një ligj për decentralizimin e pushtetit

• Qeveria maqedonse miratoi propozim-ligjin për azilkërkuesit me të cilin do të rregullohet qëndrimi dhe lëvizja e të huajv

• Kryeministri serb akuzon individë nga partitë politike të implikuar në atentatin kundër Gjigjiqit

• Partia e Koshtunicës akuzon qeverinë serbe se është në anën e njërit grup kriminal

• Forcat amerikane kanë ndërmarrë sot një sulm të përgjithshëm në ndërtesat qeveritare në Bagdad

• Rendi i nevojshëm në Basra për të penguar vjedhjet

• Presidenti italian ka dekoruar pas vdekjes zbuluesin e virusit SARS

• Edhe pesë gazetarë janë plagosur nga një shpërthim i sotëm në Bagdad

• Është rrëzuar një aeroplan bombardues amerikan

• Dje e sot janë vrarë tre gazetarë në Bagdad

• Bush dhe Bler mirëpresin rolin e Kombeve të Bashkuara në periudhën e pasluftës

• Forcat e koalicionit sulmuan udhëheqjen irakiane në Bagdad

• Zgjerohet kontrolli mbi Bagdadin

Presidenti Rugova i ka thënë ministrit Mekshejn se angazhohet për një Kosovë demokratike, të integruar në BE dhe në NATO

 

Prishtinë, 8 prill 2003 - Ministri në Qeverinë britanike për Evropën, Denis Mekshejn gjatë qëndrimit të djeshëm në Kosovë është takuar pasdite me presidentin e Kosovë Ibrahim Rugova. Gjatë këtij takimi presidenti Rugova e ka falenderuar diplomatin Mekshejn për përkrahjen që Qeveria britanike dhënë Kosovës deri më tash dhe e ka njoftuar për objektivat e Kosovës.

Ndërkaq pas takimit presidenti Rugova ka thënë: "Ne do të angazhohemi që të kemi një progres edhe në integrimin e grupeve etnike dhe ato duhet të tregojnë vullnet se do të inkuadrohen në shoqërinë kosovare".

 

Presidenti Rugova tha se institucionet e Kosovës po angazhohen në luftën kundër krimit, duke ritheksuar qëndrimin e tij për një Kosovë të pavarur, demokratike, të integruar në Bashkimin Evropian dhe në NATO.

Denis Mekshejn tha se ka sjellë në Kosovë mesazhin që Britania e Madhe të shohë më pak UNMIK dhe më shumë përgjegjësi për administratën e Kosovës. Mund të ndodhë që UNMIK-u të qëndrojë në Kosovë edhe 50 vjet nëse institucionet e Kosovës nuk tregohen të afta për zgjidhjen e problemeve të shumta që kanë brenda Kosovës, ka theksuar Mekshejn.

Qeveria e Kosovës, ka thënë Mekshejn, do të duhej që të merrej me zgjidhjen e problemeve konkrete në Kosovë e jo me, siç tha ai, deklarata dhe kërkesa të ndryshme politike ndaj bashkësisë ndërkombëtare.

 

Ai ka porositur udhëheqësit e Kosovës të punojnë seriozisht për vendin e tyre në mënyrë që ai të mos mbetet gjatë nën administrimin e UNMIK-ut.

Diplomati britanik ka thënë se administrata e kryeministrit Bler dëshiron të shohë bartjen e më shumë kompetencave në mënyrë që administrata vendore të mund të dëshmohet si pjesë e suksesshme e Evropës së sotme.

Diplomati britanik ka ritheksuar vazhdimësinë e një angazhimi të fuqishëm të Britanisë së Madhe për ndërtimin e një Kosove demokratike dhe multietnike.

Ministri Mekshejn në takime të veçanta ka takuar edhe kryeministrin Bajram Rexhepi si dhe kreun e UNMIK-ut Mihael Shtajner. Ai poashtu ka vizitur trupat britanike të stacionuara në Kosovë.

 

 

Këshilli i Evropës nuk aprovon bashkësitë e komunave serbe

 

Gjilan, 8 prill 2003 - "Këshilli i Evropës është kundër institucioneve të dyfishta në Kosovë, siç janë bashkësitë e komuave serbe, sepse platformat e këtilla për organizim në baza etnike janë në kundërshtim me konceptin që kemi ne", ka thënë sot në Gjilan, ambasadori Karlo Çivileti, pas një takimi me udhëheqjen komunale.

Kryetari i komunës dhe i AKK-së, Lutfi Haziri, pasi i ka prezentuar z. Çivileti dhe dy bashkëpunëtorëve të tij, z. Ivo Shanc dhe z. Gjergj Bergun, gjendjen në pushtetin lokal të Kosovës, ka thënë se do të bashkëpunohet me Këshillin e Evropës në realizimin e konceptit të bartjes së kompetencave në nivel lokal, ku sipas tij, janë të domosdoshme reformat.

Ndërkaq, edhe z. Xhemajl Hyseni, zëvendëskryetar i komunës është dakorduar me pikëpamjet e ambasadorit Çivieti se vetëqeverisja lokale duhet të jetë sa më afër qytetarëve, por para kësaj duhet të definohen kompetencat ndërmjet nivelit qendror të pushtetit dhe atij lokal, ku mund të pritet një "luftë" në përvetësimin e sa më shumë kompetencave pas bartjes së tyre nga autoriteti i UNMIK-ut, që duhet të bëhet tani, tha ai.

Pasi të definohen kompetencat në këtë relacion, në një proces afatgjatë,ne synojmë një shtrirje graduale të shërbimit civil edhe nëpër fshatra e vendbanime tjera të komunës, sa më afër qytetarëve, duke i shfrytëzuar edhe përvojat pozitive të vendeve demokratike.

Në momentin e tashëm, këtë proces e bëjnë më të vështirë edhe tendencat për komuna monoetnike, tha Hyseni.

 

 

Bush dhe Bler thonë se OKB do të luajë rol jetik në rindërtimin e Irakut

 

Belfast, 8 prill 2003 - Presidenti amerikan Bush dhe kryeministri britanik Toni Bler thanë se Kombet e Bashkuara do të luajnë një rol jetik në rindërtimin e Irakut të pas luftës. Dy udhëheqësit i bënë këto komente sot në një konferencë shtypi pas takimit në Irlandën e Veriut.

Presidenti Bush tha se koalicioni nën udhëheqjen e Shteteve të Bashkuara do të veprojë sa më shpejt që të jetë e mundur për të vendosur qeverinë e përkohëshme në Irak, pas përmbysjes nga pushteti të regjimit të Sadam Husseinit, për të cilin kryeministri britanik Toni Bler tha se është tashmë duke u rrëzuar.

Të dy udhëheqësit ranë dakord që komuniteti ndërkombëtar, përfshirë edhe Kombet e Bashkuara, duhet të luajnë një rol të rëndësishëm për rindërtimin e Irakut, por ata gjithashtu theksuan se Iraku do të qeveriset nga vetë populli irakian.

Presidenti Bush tha se nuk e di nëse udhëheqësi irakian u vra gjatë bombardimit të djeshëm të një restoranti në Bagdad. Por presidenti tha se e di me siguri që Sadam Huseinin po e humbet pushtetin.
Presidenti Bush ka ndër mend të caktojë një gjeneral amerikan për të drejtuar vendin, deri në momentin kur të vendoset qeveria e përkohshme në Irak.

 

 

Mekshej u tha gazetarëve se pa zgjidhjen e statusit të Kosovës nuk mund të zgjidhet as statusi i Unionit Serbi - Mali i Zi

 

Prishtinë, 8 prill 2003 - Duke folur para mediave rreth bartjes së kompetencave nga administrata e UNMIK-ut tek institucionet vendore, Denis Mekshejn tha se Britania është e interesuar që ky proces të shkojë sa më mirë dhe që sa më shumë kompetenca të barten tek institucionet e Kosovës.

 

Sipas tij theksi kryesor mbetet ai i mëparshmi se Britania ka ambicie që në Kosovë të respektohen të drejtat e minoriteteve, të mos ketë tolerancë ndaj krimit të organizuar si dhe të vendosen standardet që ekzistojnë në vendet evropiane demokratike.

Mekshejn ka theksuar se pa zgjidhjen e statusit të Kosovës nuk mund të zgjidhet as statusi real i bashkësisë se re shtetërore Serbi - Mali i Zi, pra derisa Kosova të jetë nën administrimin e Rezolutës 1244.

"Ky është një problem i madh evropian dhe unë do të bisedoj me ministra të tjerë evropian në takimin e Këshillit të Evropës që fillon në javën e ardhshme dhe do t'i këshiloj ata që të rifokusohen në këtë rajon, pavarësisht nga lufta në Irak", ka thënë Mekshejn.

 

Ai ka nënvizuar se përfshirja e këtij unioni në KE, ku përfshihet edhe Kosova, nuk prejudikon në fakt statusin final të Kosovës.

 

Sipas tij kosovarët nuk duhet të bien në provokime të deklaratave të ndryshme për përfshirjen e Kosovës në Unioni Serbi - Mali i Zi, pasi siç tha ai, statusi i tashëm i Kosovës është Rezoluta 1244 e OKB-së dhe Këshilli i Evropës e di këtë shumë mirë.

 

 

LDK kërkon ligj për zgjedhje

 

Prishtinë, 8 prill 2003 - Dr. Alush Gashi, anëtar i Grupit punues për zgjedhje që vepron në kuadër të OSBE-së që nga korriku i vitit 2002, i deklaroi QIK-ut se Lidhja Demokratike e Kosovës angazhohet që debati lidhur me zgjedhjet të bëhet në Kuvendin e Kosovës.

 

Prandaj Dr. Gashi kërkon nga Qeveria e Kosovës që sa më parë të hartojë projektligjin për zgjedhjet, i cili pas procedurës së rregullt, do të miratohej në Kuvendin e Kosovës.

 

 

Bukoshi kritikon administratën e UNMIK-ut për standarde të dyfishta në Kosovë

 

Prishtinë, 8 prill 2003 - Bujar Bukoshi ka akuzuar administratën e UNMIK-ut për standarde të dyfishta në Kosovë, duke i ledhatuar ekstremistët serbë. Në një konferencë me gazetarë kryetari i Partisë së Re të Kosovës, Bujar Bukoshi ka theksuar se në rast se shqiptarët do të deklaroheshin sikur që po deklarohen serbët me siguri se do të arrestoheshin për nxitje të urrejtjes nacionale.

Bukoshi ka theksuar se Serbia ende nuk ka kurrëfarë qëndrimi konstruktiv ndaj problemit të Kosovës dhe nuk është liruar as për së afërmi nga strukturat e ish-regjimit të Milosheviqit.

Bukoshi gjithashtu ka kritikuar edhe Këshillin e Evropës, sepse në radhët e tij është pranuar një shtet i gabuar dhe problematik, i cili, sipas tij, nuk është konsoliduar dhe me një ardhmëri të paqartë.

Bukoshi po ashtu ka kundërshtuar fuqishëm idenë e fundit të drejtuesit të PDK-së për arritjen e njëfarë moratoriumi ndërmjet Serbisë, Malit të Zi dhe bashkësisë ndërkombëtare që lidhet me statusit përfundimtar të Kosovës, duke thënë se vetëm infatilët politikë mund të propozojnë moratoriume.

 

 

Shteti i Suedisë ende nuk do të lëshojë viza në Prishtinë

 

Prishtinë, 8 prill 2003 - Shteti i Suedisë nuk do të lëshojë viza në zyrën e vet në Prishtinë, edhepse zyra e saj është hapur para një muaji. Shefja e Misionit të Zyrës suedeze në Kosovë thotë se Zyra suedeze ende nuk është kompletuar me stafin e duhur dhe me pajisje teknike të nevojshme për lëshimin e vizave për qytetarët e Kosovës të cilët dëshirojnë të udhëtojnë në Suedi.

 

 

Qeveria e Kosovës pret që me bartjen e kompetencave të fillojë një fazë e re e funksionalizimit të institucioneve vendore

 

Prishtinë, 8 prill 2003 - Qeveria e Kosovës pret që me fillimin e implementimit të procesit të bartjes së kompetencave të fillojë edhe një fazë e re e funksionalizimit të institucioneve vendore, ka vlerësuar dje kryeministri i Kosovës Bajram Rexhepi.

 

Ai tha se sot i shoqëruar nga disa prej ministrave të Qeversisë së tij, do të takohen me shefin e Misionit të OKB-së dhe kreun e lartë të kësaj administrate, që të përcaktojnë një dinamikë të kalimit të autorizimeve dhe përgjegjësive nga UNMIK-u tek institucionet vendore.

 

Kryeministri Rexhepi po ashtu ka thënë se qeveria ka bërë të gjitha përgatitjet e nevojshme dhe u shpreh i gatshëm, që duke filluar nga sot, qeveria e tij të marrë mbi vete autorizime shtesë dhe përgjegjësi për shumë fusha, për të cilat deri tash nuk kanë qenë në kompetencë të pushtetit vendor.

 

 

Tirana e gatshme të bëjë ekstradimin e personave më të kërkuar nga Intepoli

 

Tiranë, 8 prill 2003 - Ministria e rendit e Shqipërisë ka publikuar emrat dhe fotografitë e dhjetë shtetasve shqiptarë, të cilët ka vite që kërkohen prej policisë ndërkombëtare, Interpol.

Shumica e tyre janë arrestuar në vende fqinje pas akuzave për krime të rënda si vrasje, krijim bandash të armatosura dhe rrëmbime personash.

Por mes të arrestuarve, sipas ministrisë së rendit të Shqipërisë, janë edhe dy prej drejtuesve të skemave financiare piramidale.

Fjala është për Lefter Cenaj, i kompanisë Cenaj dhe Ylli Kambo, i skemës më të njëjtin emër.
Dy të fundit akuzohen për veprën penale të mashtrimit me anë të vjedhjes, akuzë për të cilën është shpallur tashmë dënimi me burg nga gjykatat e Shqipërisë.

 

 

P.Mur: BE-ja me një forcë ushtarake me fuqi botërore (?) - kjo është një ëndërr dhe është e parealizueshme!

 

Pragë, 8 prill 2003 - Duke komentuar misionin e parë ushtarak paqeruajtës në Maqedoni dhe simbolikën politike të këtij misioni, analisti i radios "Evropa e lirë", Patrik Mur thotë se aspekti i rëndësishëm i këtij misioni është që Bashkimi Evropian të tregojë se mund t'ia dalë mbanë.

 

Ka njerëz në Berlin dhe në Paris, të cilët po flasin për një qeveri të përbashkët franko-gjermane, për një politikë të përbashkët të sigurisë dhe punëve të jashtme, e cila deri tani ka dështuar dhe një ushtri të përbashkët evropiane, thotë Mur.

 

Sa për 300 ushtarët e vendosur në Maqedoni, që varen nga logjistika e NATO-s, si hapin e parë drejt një ushtrie të madhe evropiane analisti Mur thotë se kjo është tepër ambicioze.

Patrik Mur thotë se nëse (anëtarët e BE-së) duan të bëhen një forcë e besueshme, ose për të konkurruar me Shtetet e Bashkuara, se janë një partner më me vlerë sesa tani, do t'u duhet të harxhojnë më shumë para se deri më tani, dhe duket që nuk ka gatishmëri për të bërë këtë hap.

Ndërkaq, duke komentuar pohimin e një zyrtari gjerman se këto 300 trupa në Maqedoni mund të jenë hapi i parë drejt një force që një ditë mund të bëhet një fuqi botërore, ai tha se ndoshta kjo s'është e vërtetë, por nëse do të realizohet, po ndiqet rruga e gabuar.

 

"Para se të qeshim dhe të themi se kjo është një ëndërr dhe është e parealizueshme, le të rikujtojmë se tani që flasim, EURO është një realitet dhe vetëm para disa vjetësh njerëzit nuk e konsideronin si të mundur. Pra, të shohim se çdo të ndodhë", thotë analisti i radios "Evropa e lirë".

 

 

Raport kritik i Avokatit të Popullit për të drejtat e njeriut në Shqipëri

 

Tiranë, 8 prill 2003 - Avokati i Popullit Ermir Dobjani i paraqiti të hënën një raport kritik Parlamentit për shkeljen e të drejtave të njeriut në Shqipëri gjatë vitit të kaluar. Avokati i Popullit ka trajtuar në këtë periudhë 4, 675 ankesa, pjesa dërrmuese e të cilave i adresohen shkeljeve nëpër gjykata, prokurori, ministritë e drejtësisë, të rendit publik si edhe të pushtetit vendor.

Një numër i madh shkeljesh janë regjistruar në çështjet që lidhen me njohjen e respektimin e pronave të qytetarëve, për të cilat Avokati i Popullit ashtu si dhe Bashkimi Europian kanë kërkuar hartimin e ligjeve të reja.

Zoti Dobjani i është drejtuar Parlamentit me propozime për ndryshime ligjore që të pakësojnë hapësirat e korrupsionit për administratën shtetërore. Ai është i mendimit se korrupsioni në Shqipëri ka një tendencë për t’u shndërruar në normë, falë mentalitetit të qytetarëve skeptikë për zyrtarët që marrin rryshfete në këmbim të shërbimeve pubilke.

 

Ai vlerëson se shumë liri dhe të drejta të njeriut në Shqipëri vazhdojnë të shkelen dhe janë të rrezikuara, si e drejta e jetës, liria e shprehjes dhe e shtypit.

Disa ditë më parë në Tiranë u prit me shqetësim edhe raporti i Departamentit të Shtetit për të drejtat e njeriut në Shqipëri, kritikat e të cilit gjithashtu ishin drejtuar kryesisht mbi policinë, gjykatat e korruptuara dhe administratën shtetërore.

 

 

Trupat komando nga Shqipëria u nisën drejt Gjirit Persik në mbështetje të forcave aleate anglo-amerikane

 

Tiranë, 8 prill 2003 - Pesë trupat e para komando nga Shqipëria u nisën dje drejt Gjirit Persik në mbështetje të forcave aleate anglo-amerikane. Njësia shqiptare do të dislokohet në Kuvajt për të marrë pjesë në luftimet në Gjirin Persik si një përmasë e rëndësishme e mbështetjes së Shqipërisë ndaj aleatëve anglo-amerikanë.

 

Ministri i Mbrotjes Pandeli Majko e konsideroi këtë hap të Shqipërisë një tregues të qartë të marrëdhënieve të saj me aleatët dhe të nivelit të ushtrisë shqiptare. Në muajin maj do të niset një kontigjent i dytë. Majko po ashtu ka theksuar se nisja e trupave komando nga Shqipëria në Gjirin Persik është konkretizim i një marrëveshje ushtarake me aleatët.

 

 

Këshilli Organizativ i Protestave mori vendim për të mos bllokuar aksin rrugor Tetovë - Gosativar dhe Tetovë – Jazhincë

 

Tetovë, 8 prill 2003 - Në Maqedoni Këshilli për lirimin e të burgosurve shqiptarë, ish-pjesëtarë të UÇK-së, ka blllokuar dje në mëngjes me disa automjete autostradën Tetovë - Shkup në një postbllok në afërsi të fshati Zhelinë plot tetë orë ka mbajtur të bllokuar këtë autostradë.

 

Mirëpo me kërkesën e këshilltares së ambasadorit të BE-së në Maqedoni, Klaris Pasori, Këshilli Organizativ i Protestave në momentin e fundit ka marrë vendim për të mos bllokuar aksin rrugor Tetovë - Gosativar dhe magjistralen Tetovë - Jazhincë drejt kufirit me Kosovën.

 

Pjesëmarrësit në këtë protestë kërkuan lirimin e menjëherëshëm të të burgosurve në mesin e të cilëve është edhe Krenar Osmani i dënuar me gjashtë vjet burg dhe Ibrahim Sylejmani i dënuar me 15 vjet burg. Që të dy akuzohen për vepra për të cilat avokatët dhe familjarët e tyre vlerësojnë se janë në kundërshtim me Ligjin për Amnistinë.

Partitë politike shqiptare u kanë dhënë mbështetje protestave të djeshme. Ndërkaq Bashkimi Demokratik për Integrim konsideron se protestat nuk janë mënyra më e mirë për të shprehur pakënaqësinë sepse ato mund vetëm ta ndërlikojnë situatën.

 

 

Institucionet e Maqedonisë kanë miratuar një ligj për decentralizimin e pushtetit

 

Shkup, 8 prill 2003 - Institucionet e Maqedonisë kanë miratuar një ligj për decentralizimin e pushtetit, por parlamenti duhet të miratojë edhe disa akte të tjera për të plotësuar paketën e ligjeve të të nevojshme për realizimin e decentralizimit të pushtetit.

Ministri për pushtetin lokal thotë se ligji i ri për decentralizimin e pushtetit do të ndihmojë qytetarët në nivel lokal të zgjidhen më lehtë problemet e tyre dhe të vendosin vet për çështje që kanë të bëjnë me arsimin, shëndetësinë, kulturën dhe të tjera.

 

Ai ka thënë se deri më tash Maqedonia ishte një nga shtetet më të centralizuara, ndërkaq me ligjin e ri qytetarët mund të zgjidhin çështje mjaft të rëndësishme.

 

 

Qeveria maqedonse miratoi propozim-ligjin për azilkërkuesit me të cilin do të rregullohet qëndrimi dhe lëvizja e të huajv

 

Shkup, 8 prill 2003 - Qeveria e Maqedonisë ka miratuar propozim-ligjin për azilkërkuesit me të cilin do të rregullohet qëndrimi dhe lëvizja e të huajve në këtë vend. Derit tash kishte një ligj të papërshtatshëm për lëvizjen dhe qëndrimin e të huajve.

 

Zëdhënësi i Qeverisë maqedonase, Sasho Çollakovski u tha gazetarëve se azili paraqet mbrojtje që Maqedonia e jep me kusht dhe procedurë të parashikuar për personat me këtë status: refugjat i pranuar, refugjatë sipas konventës për statusin e refugjatëve nga viti 1951 dhe protokolli për statusin e refugjatit nga viti 1967, si dhe për persona nën përkujdesje humanitare në bazë të konventës ndërkombëtare për mbrojtjen e të drejtave dhe lirive të njeriut.

 

Qeveria e Shkupit me këtë propozim-ligj e harmonizon qëndrimin dhe lëvizjet e të huajve sipas standardeve evropiane.

 

 

Kryeministri serb akuzon individë nga partitë politike të implikuar në atentatin kundër Gjigjiqit

 

Beograd, 8 prill 2003 - Kryeministri serb Zoran Zhivkoviq ka akuzuar "disa individë" nga disa parti politike se janë të implikuar në atentatin ndaj Zoran Gjingjiqit.

 

Zhivkoviq pohon se në hetimet rreth vrasjes së Gjingjiqit përmendet "edhe një numër i politikanëve aktualë dhe i ish-politikanëve", mirëpo nuk ka përmendur emrat e tyre. Ai ka theksur se secili që është akuzuar do të paraqitet para gjykatave serbe, por edhe para Gjykatës së Hagës.

 

 

Partia e Koshtunicës akuzon qeverinë serbe se është në anën e njërit grup kriminal

 

Beograd, 8 prill 2003 - Partia Demokratike e Serbisë ka akuzuar të Qeverinë aktuale të Serbisë se ka dalë haptas në anën e njërit grup kriminal, duke i qëruar hesapet me tjetrin, duke e përgatitur për rolin e dëshmitarit të mbrojtur pikërisht shefin e njërit prej atyre grupeve.

 

Partia Demokratike e Serbisë, në krye të së cilës është Vojisllav Koshtunica, thotë se "një nënkryetar i qeverisë në atë kohë e ka vizituar në burg njërin prej udhëheqësëve të Klanit të Zemunit Dushan Spasojeviqin "Shiptarin" dhe pastaj me të është shoqëruar".

 

 

Forcat amerikane kanë ndërmarrë sot një sulm të përgjithshëm në ndërtesat qeveritare në Bagdad

 

Bagdad, 8 prill 2003 – Forcat amerikane kanë ndërmarrë sot (të martën) një sulm të përgjithshëm në ndërtesat kryesore qeveritare në zemër të Bagdadit, njofton BBCWorld. Ky sulm është ndërmarrë vetëm një ditë pas sulmit në pallatin kryesor të Sadamit në qendër të qytetit. Në këtë sulm, që ka filluar që para agimit, po përdoren pushkomitarlozë, raketa dhe mortaja.

 

Aeroplanët A-10 po bombardojnë dhe po rrënojnë ndërtesën e Ministrisë së planifikimit afër Pallatit republikan. Këto luftime po bëhen nën velin e paqartësive rreth fatit të Sadamit, i cili ishte të hënën në shenjestër të bombardimit, kur aeroplanët amerikanë bombarduan zonën rezidenciale al-Mansour të kryeqytetit, ku sipas zbulimit amerikan, Sadam Hysein dhe dy djemtë e tij kanë qenë aty.

 

Në këtë njoftim thuhet se ende nuk dihet në është vrarë apo jo Sadami apo ndonjë zyrtar tjetër i lartë.

 

 

Rendi i nevojshëm në Basra për të penguar vjedhjet

 

Basra, 8 prill 2003 - Banorët e Basras kanë boshatisur ndërtesat qeveritare duke marrë kompjuterë dhe mobilje. Një gazetar pa një piano të një hoteli luksoz që po shtyhej nëpër rrugë.

Vjedhjet filluan menjëherë pasi trupat britanike konsoliduan pozicionet e tyre në Basra.

Zyrtarët e lartë ushtarakë britanikë thonë se ata nuk janë në gjendje që të kryejnë punën e policit në qytet derisa përpjekjet e tyre për të shkatërruar luftëtarët e parregullt të mos përfundojnë.

 

 

Presidenti italian ka dekoruar pas vdekjes zbuluesin e virusit SARS

 

Romë, 8 prill 2003 - Presidenti i Italisë Karlo Çampi ka dekoruar pas vdekjes doktor Karlo Urbanin, virulog, i cili i pari paralajmëroi botën për rrezikun nga virusi SARS.

Urbanit i është ndarë Urdhëri për merita në shëndetësi për vetëflijim në punë në kuadër të Organizatës Shëndetësore Botërore, e cila e ka shpallur hero. Ai ka zbuluar virusin atipik të quajtur SARS dhe u bë një nga viktimat e para të tij. Urbani vdiq më 29 mars dhe harroi veten duke menduar për të tjerët.

 

 

Edhe pesë gazetarë janë plagosur nga një shpërthim i sotëm në Bagdad

 

Bagdad, 8 prill 2003 – Katër pjesëtarë të stafit të të Rojterit: reporteri, fotografisti, kamermani i televizionit dhe një teknik i televizionit dhe një gazetar spanjoll janë plagosur nga një shpërthim i sotëm (e marte) në një ndërtesë hoeliere, kryesisht për media të huaja, në Bagdad, njofton Rojter.

 

Forcat amerikane kanë thënë se një tank i tyre ka goditur hotelin pasi ka vërejtur se një snajperist kishte hapur zjarr me raketë. Tanku kishte shkrehur vetëm një herë. Të plagosurit janë dërguar në spital. Shkalla e plagëve të tyre ende nuk është qartësuar.

 

 

Është rrëzuar një aeroplan bombardues amerikan

 

Baza As Sajlia, 8 prill 2003 - Një aeroplan bombardues amerikan A-10 "uoçdog" është rëzuar sot jo larg aeroportit të Bagdadit, por piloti ka arritur të shpëtojë, ka njoftuar Komanda qendore amerikane në Katar.

Piloti ka katapultuar i sigurt, ndërkaq forcat e tokësore amerikane e kanë gjetur afër aeroportit të Bagdadit, thuhet në komunikatën që e trasmenton Rojter. Aeroplani është rrëzuar sot në mëngjes ndërsa po bombardonte pozicionet kundërajrore irakiane rreth aeroportit.

 

 

Dje e sot janë vrarë tre gazetarë në Bagdad

 

Bagdad, 8 prill 2003 – Televizioni Al-Xhazira ka bërë të ditur sot (të martën) se kameremani i tij Tarik Ajub është vrarë gjatë bombardimeve amerikane në Bagdad. Ndërkaq dje janë vrarë dy gazetarë të tjerë, një spanjoll dhe një gjerman. Bëhet fjalët për gazetarin Hulio Parado i gazetës "El Mundo" dhe Kristian Libig i gazetës së përjavshme gjermane "Fokus".

Rrjeti satelitor i Katarit ka njoftuar se një jordanez ka humbur jetën pasi që ishte plagosur kur është bombarduar zyra e TV Al Xhazira afër Ministrisë së informatave. Në të njëjtin njoftim thuhet se është plagosur edhe një tjetër gazetar i këtij televizioni gjatë bombardimeve të lartpërmendura.

 

 

Bush dhe Bler mirëpresin rolin e Kombeve të Bashkuara në periudhën e pasluftës

 

Belfast, 8 prill 2003 – Të kënaqur me sukseset në fushëbeteja, presidenti Bush dhe kryeministri Bler, në takimin e sotëm (të së martes) janë pajtuar të mirëpresin rolin e Kombeve të Bashkuara në periudhën e pasluftës të Irakut, por jo si autoritet kontrolli, njofton Rojter.

 

Të dy liderët kanë tërhequr vëretjtjen se periudha e pasluftës, tash kur trupat anglo-amerikane duket të kënë përparësi të dukshme në luftë, do të vënë në një dokument diferencat që kanë lidhur me nivelin e rolit të Kombebve të Bashkuara.

 

Ata janë takuar në darkë mbrëmë në një kështjellë të shekullit XVIII dhe sot në mengjes (të martën) para konferencës së sotme të shtypit.

Ndërkaq, sekretari i Shtetit, Kolin Pauell, ka thënë se diferencat ndërmjet Bushit dhe Blerit lidhur me rolin e Kombeve të Bashkuara janë të fryra dhe se madje edhe Kofi Anan nuk do të dëshironte që Kombet e Bashkuara të ngarkohen me përgjegjësi në Irakun e pasluftës.

 

 

Forcat e koalicionit sulmuan udhëheqjen irakiane në Bagdad

 

Bagdad, 8 prill 2003 - Forcat e koalicionit sulmuan një objekt udhëheqës në Bagdad. Nuk u bë menjëherë e qartë se kush u vu në shënjestër, por zyrtarët thanë se ata besojnë që ishte një ose më shumë prej udhëheqësve të lartë të ushtrisë ose qeverisë në regjimin irakian. Zyrtarët po vlerësojnë këtë sulm dhe nuk kanë vendosur ende në se ai ishte i sukseshëm.

Ndërkaq dje, zyrtarë amerikanë dhe britanikë shprehën mendimin se gjenerali irakian Al Hasan al-Maxhid, i njhur edhe si Ali Kimik, u vra të shtunën nga një sulm ajror i forcave të koalicionit.

 

Po dje, Sekretari amerikan i Mbrojtjes Donald Ramsfelld tha se rrethimi për udhëheqësin irakian Sadam Husein, po ngushtohet, ndërsa pjesa më e madhe e Irakut është nën kontrollin e forcave të koalicionit Sekretari Ramsfelld thotë se nuk ka dijeni nëse Sadam Husein ka vdekur, është plagosur apo thjeshtë nuk ka dëshirë të shfaqet. Por ai u tha gazetarëve në Pentagon se Sadami nuk ka më kontroll mbi pjesën më të madhe të Irakut.

 

 

Zgjerohet kontrolli mbi Bagdadin

 

Uashington, 8 prill 2003 - Zyrtarë ushtarakë amerikanë thanë se avionët amerikanë kanë bombarduar të martën një lagje rezidenciale, pasi morën informacione nga shërbimet sekrete se Sadam Huseini dhe djemtë e tij ishin atje.

Një zëdhënës ushtarak në Komandën Qendrore të forcave të koalicionit në Katar, konfirmoi sulmi ishte autorizuar prej komandës mbi atë që u përshkrua si shënjestër udhëheqjeje në rajonin rezidencial Mansur në Bagdad.

Ai shtoi se informacioni që ata kishin marrë kërkonte qe të veprohej sa më shpejt.

Zyrtarë e Pentagonit thanë se aeroplanë B1 lëshuan 400 kilgramë bomba të drejtuara me satelitë, të afta të shkatërrojnë bunkerët e nëndheshëm.

Copyright©2000-2003 Trepca.net - Të gjitha të  drejtat e rezervuara.