http://www.prek-kosova.org

Konferencë shtypi e Dr. Bujar Bukoshi, kryetar i PReK-ut

Prishtinë, 7 prill 2003 / Nga Zyra për informim e PReK-ut

1. Partia e Re e Kosovës shpreh keqardhje për Këshillin e Evropës  lidhur me veprimin absolutisht të ngutshëm dhe të parakohshëm për të pranuar Serbinë anëtare të tij. Për Partinë e Re të Kosovës, Serbia është ende shtet që nuk ka kurrëfarë qëndrimi konstruktiv ndaj problemit të Kosovës. Ky shtet ende nuk është i konsoliduar dhe ka një ardhëmri ende të paqartë. PReK-u konsideron se Serbia nuk është liruar as për së afërmi nga strukturat e atij regjimi që shkaktoi katër konflikte të përgjakshme dhe bëri gjenocid mbi popuj. Konsiderojmë se kjo është edhe një fitore për kriminelin Millosheviq në Hagë dhe mesazh i gabuar kur bëhet fjalë për standardet. Nëse Serbia po mundka të futet pa plotësuar kurrëfarë kushtesh, nëse për Serbinë nuk vlejnë kurrëfarë standarde, atëherë në Kosovë nuk duhet të krijohet konfuzion me standarde, përveç nëse nuk është ky një pretekst kundër pavarësisë së Kosovës.

Nëse Serbia do t’i kishte arritur ato kushte për tu bërë anëtare e Këshillit të Evropës, atëherë kjo do të ishte pozitive edhe për Kosovën. Mirëpo, ne e dimë se nuk është ashtu dhe konstatojmë se aty është futur një shtet i gabuar dhe problematik. Qindra milionë euro nga taksapaguesit evropianë tani po i akordohen një shteti, pa kërkuar nga ai kurrëfarë parakushtesh.

2. Lidhur me përpjekjet e z. Steiner që t’i përfitojë zyrtarët e Beogradit duke i përkëdhelur ata dhe duke ju dhënë llogari atyre se cilat kompetenca ai nuk e paska ndërmend tua dorëzojë shqiptarëve, Partia e Re e Kosovës me keqardhje konstaton dështime të UNMIK-ut në Kosovë me çdo ditë që po kalon, sidomos në mosqeverisjen e  tërë territorit të Kosovës si dhe në lëmin e ekonomisë.

Partia e Re e Kosovës konsideron se Kosova ka arritur pikën ku nuk mund të pritet kurrëfarë përparimi, përderisa nuk ngjallet urgjentisht ekonomia. Në të kundërtën, Partia e Re e Kosovës është e bindur se të gjitha ato efekte pozitive dhe rezultate që janë arritur në Kosovë, janë në rrezik të komprometohen.

Nëse vazhdon kjo gjendje alarmante në ekonominë e Kosovës, me këtë papunësi galopante, me një varfëri që kërcënon shoqërinë kosovare dhe me një situatë të pashpresë për rininë e Kosovës, asgjë e mirë nuk mund të pritet në Kosovë. Partia e Re e Kosovës është pa masë e shqetësuar me fillimin e një trendi në të cilin të rejat dhe të rinjt e Kosovës, në mungesë të çfarëdo perspektive, po fillojnë të bëhen gadi ta braktisin Kosovën me çdo kusht, dhe të vërsulen në vendet perëndimore sikur para luftës. Ky do të ishte dështimi përfundimtar i misionit të UNMIK-ut.

Qytetarët e Kosovës janë ngopur me demagogji dhe premtime, ata duan të shohin zgjidhje konkrete për këto probleme konkrete, siç janë ekonomia, infrastruktura, shkollimi, punësimi, bujqësia, kultura, luftimi i krimit, drejtësia dhe ligjëshmëria, por para se gjithash ata duan formulimin e qartë të ardhmërisë së Kosovës.

3. Partia e Re e Kosovës konsideron se obstruksioni i Serbisë dhe manipulimi i disa zyrtarëve të Beogradit me pakicën serbe në Kosovë është tragjedi për ata serbë të pafajshëm të Kosovës dhe komplikim shtesë për zgjidhjen e problemit të Kosovës. Vetë serbët po thonë: në Kosovën nën Serbi po, në Kosovën e pavarur jo. Pavarësia e Kosovës është punë e shumicës dhe nuk ka të bëjë me teket e ekstremistëve serbë. Elitat ndikuese të Beogradit që e njohin realitetin në Kosovë, le të urdhërojnë që nga serbët e Kosovës të kërkojnë integrimin e tyre në organet e Kosovës. Nëse do të kishte sinjale pozitive në këtë drejtim, do të ishte ky një plus për Kosovën, për serbët në Kosovë dhe për Serbinë.

Partia e Re e Kosovës poashtu konsideron se do të ishte një hap i vullnetit të mirë i Beogradit sikur Qoviqi të dëbohej nga ai post dhe të eliminohej obstruksioni i tij në proceset në Kosovë.

4. Partia e Re e Kosovës është skandalizuar me një inisiativë të cuditshme të kryetarit të Partisë Demokratike të Kosovës, që është përmendur në një intervistë dhënë televizionit serb „Palm plus“. Me këtë inisiativë, kryetari i kësaj partie na paska kërkuar moratorium shqiptaro-serbo-malazezo-ndërkombëtar.

Me këtë rast, Partia e Re e Kosovës dëshiron ta bëjë fare të qartë se proceset që nuk ndalen, nuk mund t’i nënshtrohen moratoriumit. Vetëm infantilët politikë mund të propozojnë moratoriume për një popull i cili nuk i ka borxh askujt. Partia e Re e Kosovës shtron pyetjen se çfarë momenti i ri, përvec ndoshta ambicieve personale, na doli për këtë nismë të pakuptimtë?

Partia e Re e Kosovës do ta ngrisë zërin gjithmonë kundër çdo tentimi të sabotimit të pavarësisë së Kosovës.

Copyright©2000-2003 Trepca.net - Të gjitha të  drejtat e rezervuara.