Lajme

E hëne, 7 prill 2003

Përmbajtja:

• Kryeparlanetarri Daci priti shefen e Zyrës suedeze

• Përfaqësuesit e Këshillit të Evropës biseduan me udhëheqjen komunale të Prishtinës

• Udhëheqja e KK të Prishtinës priti edhe komandantin e Batalonit suedez

• Zv.Komisionerja e UNHCR-it bisedoi me personalitetet më të larta të Kosovës dhe ndërkombëtare

• Më 9 prill në Gjilan vihet gurthemeli i shtatores së Agim Ramadanit

• Në Kosovë me programe të ndryshme po shënohet Dita ndërkombëtare e fëmijëve

• Zv.Komisionerja e Lartë i Kombeve të Bashkuara për Refugjatë ndodhet për një vizitë në Kosovë

• Banka Kredituese e Frankfurtit angazhohet edhe më tej për stabilizimin e termocentralit "Kosova A"

• Ekstremisti Ivanoviq kërkon formimin e ushtrisë serbe në Kosovë

• Zëdhënësi i UNMIK-ut thotë se secili që tenton të krijojë struktura paralele të sigurisë do të përballet me ligjin

• S.Hasellok thotë se rezistenca e autoriteteve në Beograd nuk do të mund ta ndalë bartjen e kompetencavetë

• Mbrëmë në Shkup ka ndodhur një shpërthim

• Sot është bllokuar autostradën Tetovë – Shkup

• Policia e Shkodrës ka konfiskuar rreth 200 kilogram lëndë narkotike dhe ka arrestuar 13 persona

• Beogradi do t'i ekstradojë në Hagë ish-shefin e Shërbimit sekret të Serbisë dhe ish-komandantin e "Beretave të kuqe"

• Qeveria e Shqipërisë i ka dërguar UNMIK-ut kërkesën për nënshkrimin e marrëveshjes për tregtinë e lirë me Kosovën

• Kondiliza Rajs ka biseduar sot në Moskë me Ivanovin për konfliktin në Irak

• Ushtria ameriane ka filluar të transportojë me aeroplanë luftëtarët opozitarë irakianë

• Ekspertët amerikanë besojnë të kenë zbuluar në Irak armë të shkatërrimit në masë

• Tanket amerikane kanë bombarduar pallatin kryesor të Sadam Hyseinit në qendër të Bagdadit

• Nga pasojat e zjarrit vdiqën 21 nxënës në Siberi

• Është gjetur i vdekur Ali Hasan al-Mexhid, me nofkën "Ali kimiku"

• Në luftimet e sotme janë vrarë dy marinsa amerikanë dhe janë palagosur shumë të tjerë

• Amerikanët në zemër të Bagdad

• Përparime në frontet e tjera

• Bush dhe Bler diskutojnë sot të ardhmen e Irakut

• Aeroplani amerikan bombardon të vetët

• Plagosen pesë diplomatët rusë

Kryeparlanetarri Daci priti shefen e Zyrës suedeze

 

Prishtinë, 7 prill 2003 - Kryetarti i Kuvendit të Kosovës, Nexhat Daci pati sot një takim njohës me shefen e Zyrës suedeze në Prishtinë, Signe Burgstoller, me të cilën bisedoi për zhvillimet në Kosovë dhe mundësitë e thellimit të bashkëpunimit ndërmjet të dy vendeve dhe sidomos ndërmjat dy parlamenteve.

Profesor Daci, në këtë takim është shprehur në mënyrë kritike për mbarëvajtjet e punëve në shumë segmente të jetës në Kosovë. Në këtë dritë e ka përmendur edhe bartjen e kompetencave më të mëdha për institucionet e Kosovës.

 

Ai vuri në pah faktin që disa nga këto kompetenca të premtuara, janë shumë të vonuara, sepse ato buronin vetvetiu nga Rezoluta 1244 e KS të OKB-së dhe duhej të zbatoheshin edhe më parë.

Diplaomatja suedeze, Burgstoller, theksoi faktin që Suedia edhe më parë, me aktivitete të ndryshme, ka qenë e pranishme në Kosovë, kurse tash pas ngritjes së Zyrës në Prishtinë, premtoi se bashkëpunimi do të jetë edhe më i fryrtshëm.

Kryetari Daci, shprehu interesin për bashkëpunim me Parlamentin suedez dhe për njohjen e praktikave parlamentare të këtij shteti të përparuar skandinav.

 

Ndërkaq, kurreshtjes së diplomates suedeze për gjasat që Kosova të jetë demokratike dhe multietnike i është përgjigjur se Kosova do të jetë atdhe i të gjithë qytetarëve të saj që e ndjejnë atë vend të vetin. Kurse sa i përketë demokracisë, ne po mësojmë shpejt nga bota e përparuar, e cila na monitoron me vëmendje, ka thënë Daci, thuhet në një njoftim nga ky takim.

 

 

Përfaqësuesit e Këshillit të Evropës biseduan me udhëheqjen komunale të Prishtinës

 

Prishtinë, 7 prill 2003 - Përfaqësuesit e Këshillit të Evropës për Decentralizim të pushtetit lokal Gyorgy Bergou, zëvendëskryetar dhe dhe Ivo Shanc, këshilltar, biseduan me Ismet Beqirin, kryetar, Shefki Gashi, nënkryetar dhe Sami Hamiti, kryeshef Ekzekutiv i Kuvendit Komunal të Prishtinës.

Zoti Bergou tha se vizitat në disa komuna të caktuara të Kosovës po realizohet me qëllim të njohjes më për së afërmi me punët dhe aktivitetet e pushtetit lokal në Kosovë, si dhe për mënyrën e ndarjes së kompetencave dhe pikëpamjet lidhur me për decentralizimin e mëtejmë të pushtetit lokal.

Kryetari i Komunës së Prishtinës, Ismet Beqiri tha se udhëheqja e Prishtinës është në fazën e zgjedhjes së qeverisë komunale. Ndërkaq, duke folur për bartjen e kompetencave, z. Beqiri tha se janë bërë përgatitjet e duhura për marrjen e kompetencave.

 

Përveç përgjegjësive të rezervuara të Përfaqësuesit Special, ai tha se është i mendimit se janë krijuar rrethanat për bartjen e kompetencave nga pushteti qendror në pushtetin lokal. Aktualisht, tha ai, ka probleme rreth pronës, ndërsa Agjencioni Kosovar i Mirëbesimit (AKM), duket se i ka ngatërruar kompetencat që kanë të bëjnë me pronën dhe pushteti lokal duhet t'i marrë ato nga niveli qendror.

Për procesin e decentralizimit, kryetari i KK të Prishtinës tha se nuk pranohet kurrfarë decentralizimi në baza etnike dhe sespe kjo do të shkonte në favor të enklavizimit, ndërkohë që nuk do ta ndihmonte integrimin e minoriteteve në Kosovë. Një decentralizim i këtillë është i papranueshëm, tha Beqiri.

Ivo Shanc tha se KE është i interesuar të bëjë një rekomandim për formën e qeverisjes dhe nuk e quan decentralizim, por reformë e qeverisjes. Prishtina është qytet i madh dhe reformat nuk mund të ndodhin menjëherë, por në një fazë të gjatë, tha Shanc. Duke folur për komunitetet, z.Shanc tha se sa i përket dimensionit etnik, e kupton sensibilizimin e kësaj çështjeje, ndërsa në hartën evropiane nuk ekziston harta etnike, tha ai.

Në vazhdim Ismet Beqiri shtroi problemin e formimit të bashkësive të komunave serbe dhe shtoi se Këshilli i Evropës duhet të bëjë më shumë kundër formimit të bashkësisë së komunave serbe, ndërsa edhe institucioni i Këshillit të Evropës duhet të jetë më i qartë rreth këtij problemi.

 

 

Udhëheqja e KK të Prishtinës priti edhe komandantin e Batalonit suedez

 

Prishtinë, 7 prill 2003 – Komandanti i Batalonit suedez, nënkolonel-lejtnant, Ola Truedsson dhe bashkëpunëtorët e tij, vizituan sot Kuvendin Komunal të Prishtinës dhe u pritën nga Ismet Beqiri, kryetar, Shefki Gashi, nënkryetar dhe Sami Hamiti, shef i Ekzekutivit të KK të Prishtinës.

Gjatë bisedës, Ismet Beqiri shprehu shqetësimet e tij lidhur me gjendjen në fshatrat që shtrihen përgjatë brezit kufitar me Serbinë dhe tha se banorët po ndjejnë pasiguri të madhe, pasi ditëve të fundit xhandarmëria serbe ka lëvizur, madje edhe ka hyrë brenda kufirit të Kosovës.

Lidhur me këtë çështje nënkoloneli Truedsson i premtoj kryetarit Beqiri se do të zhvillojë biseda me kolegët çekë. "Jemi anëtar të NATO-s prandaj edhe kemi përgjegjësi për kryerjen e detyrave", tha ai.

 

 

Zv.Komisionerja e UNHCR-it bisedoi me personalitetet më të larta të Kosovës dhe ndërkombëtare

 

Prishtinë, 7 prill 2003 - Gjatë qëndrimit në Prishtinë, sot zonja Mary Ann Wyrsch, Zv.Komisionere e Lartë e Kombeve të Bashkuara për Refugjatë (UNHCR), bisedoi me personalitetet më të larta të Kosovës dhe ndërkombëtare.

Zonjën Mary Ann Wyrsch e priti në një takim edhe presidenti i Kosovës Ibarhim Rugova, në të cilin u fol për progresin e arritur në Kosovë, integrimin e grupeve etnike dhe krijimin e kushteve për kthimin e të zhvendosurve.

Presidenti Rugova tha se qëndrimi i institucioneve të Kosovës është që të krijohen kushte për të gjitha grupet etnike që janë në Kosovë, dhe të bëhen kushtet më aktraktive për ata që dëshirojnë të kthehen në Kosovë.

 

Ai tha se edhe në këtë plan ka një progres, dhe ndonëse ky është pushtet i rezevruar i UNMIK-ut, e përkrahin edhe institucionet e Kosovës. Zoti Rugova nënvizoi se një prej çështjeve që do të lehtësonte punën e integrimit të shoqërisë kosovare është edhe njohja e pavarësisë së Kosovës.

Presidenti Rugova falendëroi UNHCR-in për ndihmën që ka dhënë për Kosovën, sidomos në rëndërtimin dhe kthimin e popullatës në vend.

Zonja Wyrsch është takuar edhe me kryedministratorin Mihael Shtajner me të cilin ka biseduar për bashkëpunimin ndërmjet UNMIK-ut dhe UNHCR-it.

"Çështja kryesore për të cilën folëm me Shtajnerin ishte që të punojmë së bashku me UNMIK-un në kthimin e minoriteteve në Kosovë", tha zonja Wyrsch, e cila shtoi se ka vizituar shumë lokalitete të Kosovës, siç tha, për t'u njohur për së afërmi me situatën dhe gjendjen e minoriteteve në Kosovë.

Mary Ann Wyrsch është takuar sot edhe me komandantin e KFOR-it Fabio Mini dhe kryeministrin e Kosovës Bajram Rexhepi.

 

 

Më 9 prill në Gjilan vihet gurthemeli i shtatores së Agim Ramadanit

 

Gjilan, 7 prill 2003 - Një datë e veçantë në kalendarin e luftës së Ushtrisë Çlirimtare të Kosovës, është 9 prilli i vitit 1999, dita kur, pas një beteje të ashpër me forcat serbe, u rrëzua muri ndërshqiptar.

Katër vite më vonë, të mërkurën në Gjilan do të vihet gurthemeli i shtatores së Agim Ramadanit, njërit prej kryeprotagonistëve të epopesë së Koshares, i cili së bashku me shokët e "Brigadës 138", shkulën përgjithmonë nga trualli shqiptar gurin me mbishkrimin Republika Federative e Jugosllavisë.

Ngjarja do të paraprihet nga një manifestim përkushtues, që do të mbahet në palestrën e sporteve, nga ora 13:00, ku pritet të marrin pjesë përfaqësues nga institucionet qendore të Kosovës, nga Shtabi i Përgjithshëm i TMK-së, nga strukturat komunale, ish-komandantë dhe luftëtarë të Brigadës 138 "Agim Ramdani", familjarë të dëshmorëve e të tjerë.

Në pjesën artistike të programit, do të paraqiten me recitale aktorët Çun Lajqi, Hadi Shehu, pastaj këngëtarët e njohur të estradës: Shkurte Fejza, Ilir Shaqiri, Shyhrete Behluli, Zeqë Kuqi, Shaban Shishmani, Edona Llalloshi e të tjerë.

Ftohen qytetarët që të marrin pjesë në manifestim.

 

 

Në Kosovë me programe të ndryshme po shënohet Dita ndërkombëtare e fëmijëve

 

Prishtinë, 7 prill 2003 - Në shumë mjedise në Kosovë me programe të ndryshme po shënohet Dita ndërkombëtare e fëmijëve.

 

Një manifestim i tillë u mbajt edhe në hotelin "Grand" të Prishtinë, organizuar nga Organizata Botërore e Shëndetësisë, Ministria e Shëndetësisë së Kosovës dhe disa organizata joqeveritare, në të cilin u tha se shëndetit të fëmijëve po i kanoset rreziku nga mjedisi i ndotur.

Sipas një deklatarate të lëshuar nga Organizata Botërore e Shëndetësisë çdo vit në botë vdesin mbi 5 milionë fëmijë nën moshën 15 vjepare nga sëmundjet që vijnë si pasojë e ambientit të ndotur.

 

Ndër sëmundjet kryesore thksohen diareja, sëmundjet e frymëmarrjes dhe sëmundjet që përhapen nga insektet e ndryshme dhe kushtet e jetesës. Por në deklaratë thuhet se fëmijët janë edhe viktima të incidenteve të ndryshme dhe të lëndimeve të paqëllimta.

 

 

Zv.Komisionerja e Lartë i Kombeve të Bashkuara për Refugjatë ndodhet për një vizitë në Kosovë

 

Prishtinë, 7 prill 2003 - Zonja Mary Ann Wyrsch, Zv.Komisionere e Lartë e Kombeve të Bashkuara për Refugjatë, ndodhet për një vizitë triditore në Kosovë. Kjo vizitë ka për qëllim njohjen dhe vënien e kontakteve me përfaqësues të organizatave ndërkombëtare dhe të autoriteteve lokale, e po ashtu njohjen me realitetin e përditshëm në terren.

Përveç takimeve me stafin e UNHCR-së, janë caktuar një sërë takimesh me zyrtarë të lartë.

Sot znj. Wyrsch do të takojë komandantin e KFOR-it, gjeneralin Fabio Minin, presidentin Ibrahim Rugova dhe kryeministrin Bajram Rexhepi. Ajo do të takojë edhe shefin e UNMIK-ut Mihael Shtjaner.

 

 

Banka Kredituese e Frankfurtit angazhohet edhe më tej për stabilizimin e termocentralit "Kosova A"

 

Frankfurt, 7 prill 2003 - Kontributi gjerman në Ballkan, veçanërisht në Kosovë mund të vërehet më së miri nëpërmjet ndihmës që ky vend ka dhënë në kuadër të Paktit të Stabilitetit nëpërmjet Bankës Kredituese për Rindërtim me seli në Frankfurt.

 

Menaxheri i projekteve për Evropën Juglindore Hans Maksdall thekson se Banka Kredituese për Rindërtim, e angazhuar në Kosovë menjëherë pasluftës, do të vazhdojë edhe mëtej të jetë aktive në vendin tonë.

 

Ai ka shtuar se prioritetet e Bankës Kreditore për Rindërtim ishin programet për ndihmat emergjente, siç janë uji i pijëshëm, energjia dhe projektet për kredi të vogla, ka deklaruar ky menaxher gjerman në radion "Dojçe vele".

Gjermania në vitin 1999 ka ndarë 1.2 miliard marka gjermane dhe gjatë katër viteve në vende të ndryshme të Ballkanit për realizimin e projekteve janë shpërndarë 300 milionë marka gjermane.

Banka Kreditore për Rindërtim në Kosovë ka filluar me programin për ndihma emergjente, përfshirë këtu edhe një ndihmë të drejtëpërdrejt për nxjerrjen e thëngjillit, që është nevojitur urgjentisht për të prodhuar energji elektrike.

Banka për Rindërtim është duke u angazhuar edhe mëtej në termocentralin "Kosova A" për ta stabilizuar atë, thotë Maksdall. Ai shton se kjo bankë në Kosovë ka ngritur mikrobankën e parë menjëherë pasluftës, e cila ka qenë e vetmja bankë e licencuar që ka guxuar të operojë në Kosovë.

 

Ajo ka financuar ndërmarrje të vogla dhe të mesme në mënyrë që të mund të krijohen vende të raja pune dhe të fillonte rritja ekonomike. Ai thotë se kjo bankë ende është aktive në Kosovë në fushën e furnizimit me rrymë për të mbajtur në punë termocentralin e vjetër "Kosova A" ku këtë vit do të riparohet një gjeneratorë në këtë termocentral për t'ia zgjatur jetën.

 

 

Ekstremisti Ivanoviq kërkon formimin e ushtrisë serbe në Kosovë

 

Mitrovicë, 7 prill 2003 - Kryetari i të ashtuquajturit "Këshilli nacional serb" në verit të Mitrovicës citohet të ketë thënë se kalimi i kompetencave nga administrata ndërkombëtare në instutitucionet e Kosovës nuk është në kompetencë të z, Mihael Shtajner.

 

Ivanoviq ka theksuar se nëse Shtajner nuk heqë dorë nga kjo, atëherë në Kosovë do të ketë destabilizim, sepse serbët, siç u shpreh ai, do të jenë të detyruar të vetorganizohen, të formojnë ushtrinë e vet dhe të mbrojnë sigurinë dhe lirinë e tyre të rrezikuar.

 

Ekstremisti Ivanoviq ka thënë se formimi i ushtrisë serbe në Kosovë ka për qëllim të pengojë përpjekjet e Mihael Shtajnerit për pavarësinë e Kosovës.

Ndryshe mbi Ivanoviqin ngarkon një akuzë për sulme kundër forcave paqeruajtëse në Mitrovicën e Veriut, por është është liruar të mbrohet në liri më kaucion.

 

 

Zëdhënësi i UNMIK-ut thotë se secili që tenton të krijojë struktura paralele të sigurisë do të përballet me ligjin

 

Mitrovicë, 7 prill 2003 - Çdokush që tenton të krijojë struktura paralele të sigurisë do të përballet me ligjin, thonë zyrtarët e policisë së UNMIK-ut në Mitrovicë si reagim ndaj deklaratës së liderit ekstremist serb Millan Ivanoviq për formimin e ushtrisë serbe të Kosovës.

 

Zëdhënësi i UNMIK-ut Soxhi Idovi ka nënvizuar se KFOR-i dhe policia janë strukturat e vetme të sigurisë në Kosovë dhe çfarëdo organizate që thotë se bën sigurinë e qytetarëve të Kosovës është e paligjshme. Secili që shkel ligjin do të nxirret para gjyqit, tha Idovi.

 

Sipas tij çdokush që mendon se policia dhe KFOR-i nuk janë duke kryer detyrën si duhet gënjejnë veten dhe të tjerët.

 

 

S.Hasellok thotë se rezistenca e autoriteteve në Beograd nuk do të mund ta ndalë bartjen e kompetencavetë

 

Prishtinë, 7 prill 2003 - Drejtori për Informim i UNMIK-ut Sejmon Hasellok ka thënë se në takimin e nivelit të lartë që do të mbahet të martën do të caktohet dinamika e kalimit të përgjegjësive në institucionet vendore.

 

Ai ka nënvizuar se rezistenca e autoriteteve në Beograd nuk do të mund ta ndalë bartjen e kompetencave. Hasellok thotë se KS i OKB-së kërkon që të shpejtohet ky proces.

 

Ai ka shtuar se pozicioni i UNMIK-ut është shumë i qartë: transferi i kompetencave është një obligim sipas Rezolutës 1244 dhe këtë ua kemi shprehur edhe autoriteteve të Beogradit.

 

Ky proces ka të bëjë me përgjegjësitë që parasheh kapitulli V i Kornizës, kurse ato të kapitullit VIII si drejtësia, siguria, policia dhe marrëdhëniet me jashtë mbesin të drejta të rezervuara për shefin e UNMIK-ut, ka theksuar Hasellok.

 

 

Mbrëmë në Shkup ka ndodhur një shpërthim

 

Shkup, 7 prill 2003 - Mbrëmë vonë në pjesën veriore të Shkupit ka ndodhur një shpërthim i fuqishëm si dhe ka pasur disa të shtëna nga armë zjarri. Sipas policisë maqedonase, bëhet fjalë për një bombë dore.

 

 

Sot është bllokuar autostradën Tetovë – Shkup

 

Shkup, 7 prill 2003 - Këshilli për Lirimin e të Burgosurve, sot në mëngjes me mekanizma të ndërtimtarisë dhe me automjete motorizuara kanë bllokuar autostradën Tetovë - Shkup, në afërsi të fshatit Zhelinë.

Organizatori ka paralajmëruar se bllokada do të zgjasë deri në orën 10, por se ajo do të vazhdojnë edhe gjatë ditëve të ardhshme.

Pjesëmarrësit e bllokadës kërkojnë lirimin e të dënuarve dhe të burgosurve ish-pjesëtarë të UÇK-së, në mesin e të cilëve është edhe Krenar Osmani, i cili është i dënuar me 6 vjet burg.

 

 

Policia e Shkodrës ka konfiskuar rreth 200 kilogram lëndë narkotike dhe ka arrestuar 13 persona

 

Shkodër, 7 prill 2003 - Në bazë të kontrolleve të vazhdueshme të forcave antidrogë të policisë së qarkut të Shkodrës u arrit të bllokohen rreth 200 kilogram lëndë narkotike, si dhe 700 kubik prodhim narkotikësh të cilët ishin përgatitur për t'u kultivuar.

 

Kjo sasi është konfiskuar në kuadër të një aksioni në shkallë të gjerë të policisë së Shqipërisë që ka për qëllim që brenda këtij viti të pastrojë të gjithë territorin e vendit nga bimët për prodhimin e drogës.

 

 

Beogradi do t'i ekstradojë në Hagë ish-shefin e Shërbimit sekret të Serbisë dhe ish-komandantin e "Beretave të kuqe"

 

Beograd, 7 prill 2003 - Ministri i jashtëm i Serbisë dhe Malit të Zi Goran Svilanoviq tha se Beogradi do t'i ekstradojë në Hagë ish-shefin e Shërbimit sekret të Serbisë Jovica Stanishiq dhe ish-komandantin e "Beretave të kuqe", Frenki Simatoviq, në qoftë se ata akuzohen për krime lufte nga Tribunali i Hagës.

 

Stanishiq dhe Simatoviq ndodhen në paraburgim nën akuzën në lidhje me mafian e "Klanit të Zemunit" e cila ka vrarë edhe kryeministrin serb Zoran Gjingjiq.

 

 

Qeveria e Shqipërisë i ka dërguar UNMIK-ut kërkesën për nënshkrimin e marrëveshjes për tregtinë e lirë me Kosovën

 

Tiranë, 7 prill 2003 - Qeveria e Shqipërisë i ka dërguar UNMIK-ut propozimin për nënshkrimin e marrëveshjes për tregtinë e lirë me Kosovën.

 

Në një prononcim për media në Tiranë ministri i Ekonomisë Arben Malaj konfirmoi se bisedimet për këtë marrëveshje do të zhvillohen në nivel ekspertësh dhe se Qeveria e Shqipërisë i ka paraqitur zyrtarisht UNMIK-ut propozimet e saj, por pa i saktësuar ato.

 

Z. Malaj u shpreh se brenda muajit prill të këtij viti mund të fillojnë bisedimet e para për nënshkrimin e marrëvshjes së tregtisë së lirë me Kosovën. Ai tha se Shqipëria pret që UNMIK-u të përgjigjet për datën e fillimit të këtyre negociatave.

 

 

Kondiliza Rajs ka biseduar sot në Moskë me Ivanovin për konfliktin në Irak

 

Moskë, 7 prill 2003 - Këshilltarja e Presidentit amerikan për Siguri Kombëtare, Kondiliza Rajs ka biseduar sot në Moskë me ministrin e jashtëm rus Igor Ivanov për konfliktin në Irak.

Pas bisedimeve, pala amerikane nuk ka dhënë komunikatë, por njoftimet bëjnë të ditur se temë e bisedimeve ka qe incidenti që ndodhi të dielën, në të cilën në një sulm me arëm zjarri ishin plagosur disa diplomatë rusë në Irak të cilët udhëtonin në drejtim të kufirit sirian.

Sipas BBC-së, Moska dhe Uashingtoni duhet të gjejnë mënyrën për të kapërcyer tensionin e shkaktuar me këtë incident nëse duan që të përmirësojnë partneritetin e tyre të luhatur strategjik.

 

 

Ushtria ameriane ka filluar të transportojë me aeroplanë luftëtarët opozitarë irakianë

 

Ushington, 7 prill 2003 – Ushtria ameriane ka filluar të transportojë me aeroplanë luftëtarët opozitarë irakianë që t'i bashkohen luftës, ka deklaruar një gjeneral i lartë, ndonëse Pentagoni ka tërhequr vëmendjen se ushtarakët mund të kthehen në vend më shumë se gjashtë muaj pas konfliktit, njofton AFP.

 

"Këta janë qytetarë irakianë që dëshirojnë të luftojnë për Irakun e lirë, të cilët do të jenë bërthamë bazë e armatës së re irakiane kur Iraku të jetë i lirë", ka thënë gjen. Piter Pejs për televizionin ABC.

 

Njoftohet gjithashtu se luftëtarët kanë fluturuar me aeroplan nga Iraku verior në Irakun jugor dhe deri tash kanë arritur atje 700 sish dhe u përkasin të gjitha grupimeve: islamistë, komunistë dhe nacionalistë.

 

 

Ekspertët amerikanë besojnë të kenë zbuluar në Irak armë të shkatërrimit në masë

 

Afër Bagdadit, 7 prill 2003 – Ekspertët amerikanë të armëve biologjike dhe kimike besojnë të kenë zbuluar një vend depozitimi të armëve të shkatërrimit në masë, ka deklaruar një zyrtar amerikan sot (të hënën), njofton Rojter. "Detektorët tanë kanë treguar diçka", ka thënë majori Ros Kofman dhe ka shtuar se "vendi ndodhet në jug të qytetit Hindija".

 

 

Tanket amerikane kanë bombarduar pallatin kryesor të Sadam Hyseinit në qendër të Bagdadit

 

Bagdad, 7 prill 2003 – Tanket dhe automjetet e blinduara amerikane kanë depërtuar thellë në qendër të kryeqytetit irakian dhe e kanë bombarduar pallatin kryesor presidenncial të Sadam Hyseinit dhe kanë goditur edhe disa caqe të tjera, njofton BBCWorld.

 

Mbi 100 automjete të blinduara, përfshirë edhe 70 tanke, kanë marrë pjesë në këtë sulm të furishëm sot heret në mëngjes (të hënën), gjatë të cilit janë mbështetur edhe me aeroplanë të telekomanduar pa pilot, kanë bërë të ditur burimet ushtarake amerrikane.

 

Një zytrtar i Pentagonit ka thënë se operacioni ushtarak amerikan është një "shou i forcës", që i dërgon një mesazh të fuqishëm regjimit irakian, por nuk konsiderohet domosdo "betejë për Bagdadin".

 

 

Nga pasojat e zjarrit vdiqën 21 nxënës në Siberi

 

Moskë, 7 prill 2003 - Nga një zjarr që përfshiu sot një shkollë në Siberi vdiqën 21 nxënës dhe mësuesi i tyre, ka bërë të ditur Ministria ruse e Emergjencës, ndërkaq dhjetë të tjerë me plagët e marra janë transferuar në spital.

Zjarri kishte përfshirë ndërtesën dykatëshe të shkollës në qytetin Sidibal të Jakutisë, 4.800 km në lindje të Moskës. Nxënësit ishin të moshës 11 e 16-vjeçare, njoftojnë agjencitë e lajmeve.

 

 

Është gjetur i vdekur Ali Hasan al-Mexhid, me nofkën "Ali kimiku"

 

Basra, 7 prill 2003 – Ali Hasan al-Mexhid, të cilit kundërshtarët e regjimit irakian ia kishin vënë nofkën "Ali kimiku", për shkak se më 1988 kishte urdhëruar vrasjen me helmim me gaz të mijëra kurdëve, është gjetur i vdekur, ka bërë të ditur një zyrtar britanik sot (të hënën).

 

Majori Endrju Xhekson i Batalionit të tretë të Regjimentit të parashutistëve ka konfirmuar vdekjen e personit, i cili ishte kushëri i parë i Sadam Hyseinit dhe një nga pjesëtarët më brutal të rrethit të tij të berendshëm. Al-Mexhid është vrarë të shtunën kur aeroplanët e forcave të koalicionit me predha të drejtuara me laser e kishin goditur shtëpinë e tij në Basra.

 

Xhekson ka thënë se trupi i tij është gjetur së bashku me atë të truprojës së tij dhe udhëheqësit të shërtbimit të zbulimit në Basra. Sadami ia kishtë besuar al-Mexhidit mbrojtjen e Irakut jugor kundër okupimit nga ana e forcave të koalicionit.

 

 

Në luftimet e sotme janë vrarë dy marinsa amerikanë dhe janë palagosur shumë të tjerë

 

Bagdad, 7 prill 2003 – Dy marinsa amerikanë janë vrarë dhe shumë të tjerë janë palagosur sot (të hënën) në luftimet për të sigururar dy ura mbi lumin në hyrje të Bagdadit, të cilat kanë qenë objektivat kryesore të forcave amerikane për përparim dhe hyrje në qytet, ka deklaruar një ushtarak amerikan.

 

Marinsat kanë thënë se që të dy urat janë dëmtuar shumë gjatë luftimeve dhe janë bërë të pakalueshme për tanke dhe automjete të rënda të blinduara.

 

Të dy marinsat janë vrarë kur një predhë artilerike e ka goditur automjetin e tyre, i cili ka shpërthyer, duke vrarë kështu marinsat, që kanë qenë brenda dhe duke plagosur edhe shumë të tjerë.

 

 

Amerikanët në zemër të Bagdad

 

Bagdad, 7 prill 2003 - Njoftimet më të fundit nga Bagdadi flasin për goditje të rënda me artileri dhe tanke. Një korrespondent i BBC-së në zemër të kryeqytetit irakian thotë se nga ballkoni i hotelit të tij mund të shohë dy tanke amerikane në zemër të qytetit pranë lumit Tigër dhe një pallati presidencial.

 

Ai tha se ndërsa beteja po vazhdonte nga rajoni presidencial dëgjoheshin të shtëna të forta mitralozi dhe artilerie, por shtoi se situata ishte ende konfuze.

Një kolonel amerikan i intervistuar nga një televizion amerikan jashtë pallatit presiencial tha se ai dhe ushtarët e tij po zhvillonin kërkime brenda pallatit dhe se trupa të tjera amerikane kishin kapur ndërtesa të rëndësishme gjetkë në Bagdad, përfshirë hotelin Rashid.

Koloneli tha se forcat amerikane kishin nën kontroll qendrën e Bagdadit dhe zemrën e strukturës qeverisëse irakiane. Imazhe televizive kanë treguar një numër personash me uniforma të zeza të milicisë Fedajin që vraponin përgjatë bregut të lumit Tigër, shumica të parmatosur.

 

 

Përparime në frontet e tjera

 

Qerbela, 7 prill 2003 - Forcat amerikane thonë se kanë marrë nën kontroll qytetin qendror irakian të Qerbelasë pas dy ditë betejash të ashpra me luftëtarët paraushtarakë.

Zëdhënësit e trupave amerikane në Qerbela thonë se ata kishin luftuar rrugë më rrugë dhe kishin besim se nuk ekzistonte më ndonjë kërcënim për sulme irakiane.

Amerikanët thonë se disa dhjetra irakianë dhe një ushtar amerikan ishin vrarë. Pala irakiane nuk i ka përmenduar ende luftimet në Qerbela, i cili ndodhet në jug të Bagdadit.

 

Shefi i shtabit britanik gjeneral majori Piter Uall tha se trupat e rregullta irakiane ishin larguar nga Basra, por se milicia dhe besnikët e partisë Ba'ath ishin ende një kërcënim.

 

 

Bush dhe Bler diskutojnë sot të ardhmen e Irakut

 

Londër, 7 prill 2003 - Pika kryesore në takimin e planifikuar për sot në Iralndën e Veriut, mes presidentit Bush dhe kryeministrit britanik do të jetë korniza për rindërtimin e Irakut, politikisht dhe ekonomikisht, pasi të jetë hequr nga pushteti Sadam Huseini.

 

Për presidentin Bush dhe kryeministrin Bler, përparimi i shpejtë i forcave të koalicionit drejt kontrollit ushtarak të Irakut e bën edhe më urgjente rënien dakord rreth një kornize të gjërë për fazën e ardhshme duke mbajtur premtimet se do t'ju sjellin një jetë më të mirë dhe një qeveri demokratike për popullin e Irakut.

 

 

Aeroplani amerikan bombardon të vetët

 

Bagdad, 7 prill 2003 - Një aeroplan luftarak amerikan në veri të Irakut ka bombarduar gabimisht një grup ushtarësh amerikanë të forcave speciale. Disa prej ushtarëve amerikanë dhe disa luftëtarë kurdë kanë humbur jetën gjatë sulmit. Korrespondenti i BBC-së, që u ndodh në vendngjarje është plagosur.

 

Ai e pa bombën që shpërtheu ndërsa një kolonë makinash kurde parakaloi makinat me ushtarë amerikanë. Mes të plagosurve në bombardim është vëllai i Masud Barzanit, udhëheqësit të Partisë Demokratike Kurdistane.

Komandantë ushtarakë amerikanë thonë se po hetojnë një incident të shkaktuar nga një aeroplan F15, gjatë të cilit humbën jetën tre ushtarë amerikanë dhe pesë të tjerë u palgosën. Ata nuk përmendën viktima kurde, por komandantë kurdë thonë se 14 ushtarë të tyre humbën jetën në incident.

 

 

Plagosen pesë diplomatët rusë

 

Bagdad, 7 prill 2003 -Të paktën pesë diplomatë rusë janë plagosur në Irak, kur kolona e makinave me të cilat ata po udhëtonin, u sulmua teksa po largohej nga Bagdadi.

Sipas njoftimeve, kolona e makinave me flamuj rusë, u sulmua me armë zjarri rreth 8 km jashtë Bagdadit në rrugën drejt kufirit me Sirinë. Në kolonë ndodheshin gjithsej 25 persona, disa prej tyre gazetarë.

Ka njoftime kontradiktore nëse vetë ambasadori rus është plagosur apo jo gjatë sulmit. Sipas zyrtarëve rusë, për itinerarin e rrugës që do ndiqej dhe për kohën e evakuimit, ambasada kishte rënë dakord si me forcat e koalicionit, edhe me palën irakjane.

Ushtria amerikane tha se nuk ka trupa në zonën ku ndodhi sulmi, por vëzhguesit rusë janë skeptikë.

Copyright©2000-2003 Trepca.net - Të gjitha të  drejtat e rezervuara.