Lajme

E shtune, 5 prill 2003

Përmbajtja:

• Kosova mbetet një nga vendet e rralla në Evropë pa asnjë mekanizëm mbrojtës ndërkombëtar, thotë Novcki

• Shtajneri hodhi poshtë kërkesat e zyrtarëve të Beogradit që të shtyhet bartja e kompetencave

• Ministri britanik Denis Mekshejn të hënën viziton Kosovën

• Kryeministri Rexhepi thotë se pranimi i Serbisë dhe Malit të Zi në Këshillin e Evropës nuk nxjerr asnjë detyrim për Kosovën

• Sindikata organizoi një protestë për pozitën e pafavorshme të punëtorëve dhe kundër territ në Kosovë

• Analisti amerikan Xhonson thotë se Kosova i përket një njësie që në fakt nuk ekziston më

• Sonte në Pejë zhvillohet superderbi i Ligës ABK: Dukagjini – MEB Prishtina

• Fillon konkurrimi për bursat Fullbrajt për vitin 2004

• Beogradi lëshon urdhërarrest për Mirjana Markoviqin

• Ambasadori amerikan në Tiranë bën thirrje që të luftohet korrupsioni në polici dhe gjyqësi

• Policia e Serbisë ka paraburgosur rreth 7000 të dyshuar në hetimet rreth vrasjes së kryeministrit Gjingjiq

• Human Rights Watch tha se komandantët irakianë i ekzekutojnë dhe rrahin vartësit e tyre

• Solana u takua në Uashington me sekretarin e Shtetit Pauell

• Ushtari amerikan është akuzuar për vrasje të paramenduar

• Bush u ka urdhëruar autoriteteve të shëndetësisë t'i izolojnë amerikanët e sëmurë nga pneumonia

• Forcat amerikane me të gjitha armët po sulmojnë Qerbelanë

• Trupat e koalicionit iu kanë afruar qendrës së Bagdadit

• Të pakten katër ushtarë amerikanë janë plagosur në luftimet e sotme në Bagdad

• Bombardime të fuqishme në Bagdad gjatë natës

• Komanda qendrore amerikane bën të ditur se janë vrarë dy pilotë të helikopterëve të marinës

• Kina dhe Rusia bëjnë thirje që t'i jepet fund menjëherë luftës në Irak

• Trupat e koalicionit hyjnë në Bagdad

• Pentagoni ka identifikuar sot tetë trupa të ushtarëve të vdekur

• Rajs: SHBA-të do të kenë rolin drejtues pas luftës

• Udhëheqësi irakian del në rrugët e Bagdadit

• Bler: Siria dhe Irani nuk do të sulmohen

• Kryengritësit çeçenë vrasin tetë njerëz në Grozni

Kosova mbetet një nga vendet e rralla në Evropë pa asnjë mekanizëm mbrojtës ndërkombëtar, thotë Novcki

 

Londër, 5 prill 2003 - Pas anëtarësimit të Serbisë dhe Malit të Zi në Këshillin e Evropës, Kosova mbetet një nga vendet e rralla në Evropë e cila nuk është përfshirë në asnjë mekanizëm mbrojtës ndërkombëtar për mbrojtjen e të drejtave të njeriut, i tha BBC-së ombudspersoni Marek Antoni Novcki.

 

Të gjitha mekanizmat mbrojtës ndërkombëtarë janë të bazuar në ligjet evropiane dhe ai që dëshiron të jetë pjesë e atij sistemi duhet të ratifikojë instrumentet ndërkombëtare, tha ai. Novicki thotë se për fat të keq në Kosovë askush nuk ka të drejtë ta bëjë këtë dhe se të gjithë qytetarët e Kosovës janë viktima të rrethanave në terren.

 

Gjithnjë derisa Kosova nuk mbulohet me mekanizmin e mbrojtjes, qytetarët nuk kanë mundësi që për ndihmë t'i drejtohen gjykatës ndërkombëtare për të drejtat e njeriut në Strasbur apo në çfarëdo mënyre të realizojnë të drejtat e tyre në ndonjë kontest me UNMIK-un dhe KFOR-in, thotë Novicki.

 

 

Shtajneri hodhi poshtë kërkesat e zyrtarëve të Beogradit që të shtyhet bartja e kompetencave

 

Beograd, 5 prill 2003 - Kryeadministratori i Kosovës Mihael Shtajner ka qëndruar dje në një vizitë zyrtare në Beograd ku ka biseduar me kryeministrin Zoran Zhivkoviq, me zëvendëskryeministrin Çoviq dhe me gjeneralin Branko Kërga.

 

Vizita e Shtajner filloi me telashe, ngase në aeroportin e Beogradit iu ndal pasaporta me justifikim se ai duhej të kishte vizë për të hyrë në këtë vend. Megjithatë, pas këtij incidenti z. Shtajner e mori pasaportën dhe vazhdoi vizitën e tij në Beograd.

Ai u ka thënë zyrtarëve serbë se procesi i bartjes së kompetencave nga UNMIK-u në institucionet e Kosovës do të fillojë, duke nënvizuar se transferimi i kompetencave do të kryhet deri në fund të këtij viti, sepse kështu ka vendosur KS i OKB-së.

 

Shtajner përsëriti se kalimi i një pjese të kompetencave në institucionet e Kosovës nuk do të thotë kurrëfarë lloji i përgatitjes së statusit definitiv të Kosovës. "Ne do t'i përmbahemi plotësisht Rezolutës 1244 të KS", tha Shtajner.

Shefi i UNMIK-ut ka thënë se nuk ka pretendime që të bëjë bartjen e përgjegjësive në fushën e sigurisë, politikës së jashtme, atë ushtarake dhe të gjyqësisë. Ndërkaq ndër prioritetet për Kosovën kryeadministratori ka veçuar luftën kundër krimit të organizuar, ekonominë dhe papunësinë.

Autoritetet e Beogradit kanë marrë përgjigje negative nga kryeadministratori Shtajner ndaj kërkesës së tyre që procesi i bartjes së kompetencave të shtyhet. Në takimin që ka zgjatur mbi dy orë është biseduar edhe për kthimin e të zhvendosurve serbë në Kosovë.

"Dialogu mes Prishtinës dhe Beogradit nuk mund të fillojë tash për tash për shkak të situatës se krijuar në Serbi pas vrasjes së kryeministrit serb Zoran Gjingjiq", ka thënë Shtajner dhe ka shtuar se për këtë do të vendosë bashkësia ndërkombëtare dhe KS i OKB-së.

Kryetari i Qeverisë së Serbisë, Zoran Zhivkoviq pas bisedës me z. Shtajner ka deklaruar: "Nuk morëm përgjigjje pozitive për shtyrjen e bartjes së kompetencave nga UNMIK-u tek institucionet e Kosovës.

 

Nuk mund të jemi të kënaqur me atë çfarë ka bërë bashkësia ndërkombëtare brenda katër viteve në Kosovë". Ai ka shtuar se prioritetet e Beogradit për sa i përket Kosovës janë kthimi i të zhvendosurve, siguria dhe lëvizja e lirë e qytetarëve.

Ndërkaq, sipas Çoviqit nuk do të vlejë transferimi i kompetencave në institucionet e Kosovës, sepse sipas tij, ato nuk janë as kompetente e as multietnike. Serbët, tha Çoviq do të refuzojnë të bëjnë pjesë në institucione të tilla.

 

Ai shtoi se midis përfaqësuesëve të qeverisë serbe dhe Shtajnerit ekzistojnë dallime të mëdha, ngase Beogradi mendon që bartja e kompetencave nuk duhet të bëhet para se të kthehen të zhvendosurit dhe të ketë siguri për minorietetet në Kosovë.

 

 

Ministri britanik Denis Mekshejn të hënën viziton Kosovën

 

Prishtinë, 5 prill 2003 - Ministri britanik i Shtetit Denis Mekshejn të hënën do të vizitojë Kosovën. Sipas një njoftimi të Zyrës britanike në Prishtinë, Mekshejn gjatë kësaj vizite do të riafirmojë vendosmërinë e Britanisë në ndërtimin e një Kosove demokratike dhe multietnike.

 

Ministri britanik në takimet që do t'i ketë me liderët e Kosovës do t'i inkurajojë ata për t'u angazhuar në përmbushjen e standardeve para statusit dhe për kthimin e të zhvendosurve.

Mekshejn gjatë qëndrimit në Prishtinë do ta takohet me shefin e UNMIK-ut Mihaal Shatjner, me presidentin e Kosovës Ibrahim Rugova, me kryeministrin Bajram Rexhepi dhe me përfaqësuesit serbë të Kosovës.

 

 

Kryeministri Rexhepi thotë se pranimi i Serbisë dhe Malit të Zi në Këshillin e Evropës nuk nxjerr asnjë detyrim për Kosovën

 

Prishtinë, 5 mars - Kryeministri i Kosovës Bajram Rexhepi i ka shkruar një letër kryetarit të Asamblesë Parlamentare të Këshillit të Evropës me të cilën konstaton se pranimi i Serbisë dhe Malit të Zi në Këshillin e Evropës nuk nxjerr asnjë detyrim për Kosovën.

 

Kryeministri Rexhepi ka shprehur preokupimin e Qeverisë së Kosovës se një hap i tillë mund të inkurajojë politikën destruktive të Beogradit ndaj Kosovës.

"Institucionet e Kosovës mbeten të përkushtuara për pranimin e Kosovës në Këshillin e Evropës", ka shkruar ndër të tjera kryeministri Rexhepi.

 

 

Sindikata organizoi një protestë për pozitën e pafavorshme të punëtorëve dhe kundër territ në Kosovë

 

Prishtinë, 5 prill 2003 - Mijëra punëtorë të KEK-ut dhe sindikatave të pavarura kanë protestuar dje në Prishtinë për shkak të pozitës së tyre të pafavorshme dhe territ në Kosovë. Në këtë protestë morën pjesë të gjithë anëtarët e sindikatave të pavarura të SPEK-ut, si dhe sindikatave të tjera të pavarura të Kosovës.

"Sistemi i prodhimit në termocentrale dhe të gjitha pikat vitale të sistemit të KEK-ut nuk guxuan që të ndalen. Kërkesat tona janë transparente dhe ato ua përcjellim të gjitha organeve përgjegjëse", tha kryetari i SPEK-ut, Sherif Fejzulahu.

Ai ka shtuar se sindikata po mundohet të gjejë zgjidhje bashkë me bordet udhëheqëse të KEK-ut, që t'i thuhet ndalë territ në Kosovë, ndalë përjashtimit të punëtorëve nga puna, ndalë ristrukturimit të paprogramuar në KEK, ndalë diskriminimit të punëtorëve, jo vetëm të KEK-ut, por edhe në gjithë Kosovën.

 

 

Analisti amerikan Xhonson thotë se Kosova i përket një njësie që në fakt nuk ekziston më

 

Uashington, 5 prill 2003 - Analisti amerikan Ros Xhonson në një tryzë të qendrës amerikane "Udro Uilson" në Uashington, ku u bë fjalë për situatën në Evropën juglindore, ka theksuar se nuk mund të bëhet fjalë për njohjen e pavarësisë së Kosovës brenda një periudhe afatshkurtër, por për hapjen e një diskutimi mbi zgjidhjen e statusit të saj.

 

Ai nënvizoi se Kosova i përket një njësie që në fakt nuk ekziston më.

Ndërkaq, analisti i njohur anglez Misha Gleni e shikon zgjidhjen e çështjes së Kosovës si një element kritik të ruajtjes së një qëndrushmërie ne rajonin e Ballkanit.

 

Pa zgjidhjen e kësaj çështjeje, thotë ai, zemërimi dhe nervozizmi politik i shqiptarëve, si dhe ndikimi i kësaj atmosfere në qëndrushmërinë e Serbisë përbën një kërcënim serioz për mbarë stabilitetin në rajon.

 

 

Sonte në Pejë zhvillohet superderbi i Ligës ABK: Dukagjini – MEB Prishtina

 

Prishtinë, 5 prill 2003 – Sonte në Pejë do të takohen dy skuadrat basketbollistike më të suksesshme të Ligës ABK - Dukagjini dhe MEB Prishtina. Derisa Dukagjini me fitore do t'i shmangej për dy pikë MEB Prishtinës, në të kundërtën MEB Prishtina do të barazohej më të dhe do të ketë pastaj përparësinë, pasi që takimi i ardhshmë mes këtyre dy skuadrave do të zhvillohej në Prishtinë.

Këtë takim RTK do ta transmetojë drejtpërdrejt sonte në orën 20.10.

Në takimet tjera të kësaj xhiroje do të takohen:

Në Mitrovicë: Trepça – Ylli (ora 18.00),

në Prizren: QMI Bashkimi – Excluzive (ora 19.00) dhe

në Prishtinë: Mabetex – Drita (ora 17.00), ky takim do të zhvillohet pa praninë e shikuesve për shkak se komisioni i garave ka dënuar Mabetexin për organizim të dobët të takimit para dy javësh Mabetex – Dukagjini.

 

 

Fillon konkurrimi për bursat Fullbrajt për vitin 2004

 

Prishtinë, 5 prill 2003 – Zyra e SHBA-ve në Prishtinë shpall fillimin e procesit konkurrues për programin Fullbrajt për vitin 2004 të bursistëve vizitues.

Kandidatët duhet të jenë të kualifikuar që të mund të shkojnë në SHBA në kohëzgjatje 3-4 muajshe për të hulumtuar dhe për të ligjëruar në ndonjë universitet në SHBA. Kandidatët duhet të kenë doktoraturën, të flasin dhe shkruajnë anglishten rrjedhshëm dhe të kenë përvojë mësimdhënëse. Bordi i Fullbrajtit preferon kandidatët të cilët janë duke ligjëruar në universitet.

Afati për dërgimin e formularëve të plotësuar në Zyrën e SHBA-ve është 17 tetor 2003, ditë e premte.
Edhepse afati për aplikim është pas gjashtë muajve, kandidatëve mund t'u nevojitet kjo kohë për të përgatitur një aplikacion të suksesshëm.

Kandidatët që mendojnë se anglishtja e tyre duhet të përmirësohet poashtu mund ta përdorin kohën e mbetur për të ushtruar të shprehurit dhe të shkruarit e anglishtes kështu që kandidatura e tyre të jetë më e fortë.

Kandidatët që zgjedhen në këtë program do të shkojnë në SHBA duke filluar nga shtatori i vitit 2004. Për kandidatët që zgjedhen, Programi Fullbrajt do të paguajë shpenzimet e rrugës deri te institucioni ku do të bëhet hulumtimi dhe një stipendion mujor.

Për më shumë informata lidhur me materialet (formularët) për kandidim, ju lutem shkoni në ueb sajtin e Këshillit për Shkëmbime Ndërkombëtare të Shkencëtarëve (CIES - Council for International Exchange of Scholars) në internet adresën: http://www.cies.org dhe hapeni faqen “Programi i Shkencëtarëve Vizitues” (Visiting Scholar Program) e cila gjendet nën kategorinë “Programet për Shkencëtarët jashtë SHBA-ve” (Non-U.S. Scholar Programs).

 

 

Beogradi lëshon urdhërarrest për Mirjana Markoviqin

 

Beograd, 5 prill 2003 - Njoftimet nga Beogradi bëjnë të ditur se është nxjerrë një urdhërarresti për Mirjana Markoviqin, bashkëshorten e ish-diktatorit jugosllav, Sllobodan Millosheviq.

Mirjana Markoviq akuzohet se ka gisht në rrëmbimin dhe vrasjen e Ivan Stamboliqit, njërit prej ish presidentëve të Serbisë.

Stamboliq u zhduk dy vjet e gjysëm më parë. Trupi i tij u gjet javën e e kalur i varrosur në një kanal në Serbinë veriore.

Autoritetet thonë se duan të marrin në pyetje Mirjana Markoviqin dhe burrin e saj, Sllobodam Millosheviq lidhur me këtë vrasje.

Ajo besohet se është larguar nga Serbia dhe thuhet se qëndron bashkë me djalin e saj Marko Millosheviq në Rusi, për të cilin poashtu është lëshuar fletarresti ndërkombëtar.

 

 

Ambasadori amerikan në Tiranë bën thirrje që të luftohet korrupsioni në polici dhe gjyqësi

 

Tiranë, 5 prill 2003 - Ambasadori amerikan në Tiranë, Xhejms Xhefri në një tryezë të përbashkët në Tiranë me përfaqësuesit nga qeveria shqiptare dhe organiztatat joqeveritare, të organizuar nga koalicioni shqiptar kundër korrupsionit, iu bashkua kritikave të BE-së për mungesën e masave efikase kundër krimit në Shqipëri.

 

Ai ka thënë se në Shqipëri krimi i organizuar dhe trafikantët po sfidojnë shtetin që po i humb betejat me ta. Ai ka bërë thirrje që të luftohet korrupsioni në radhët e policisë dhe në sistemin gjyqësor, sepse ka segmente që bashkëpunojnë me organizatat kriminale.

 

 

Policia e Serbisë ka paraburgosur rreth 7000 të dyshuar në hetimet rreth vrasjes së kryeministrit Gjingjiq

 

Beograd, 5 prill 2003 - Policia e Serbisë ka paraburgosur rreth 7000 të dyshuar në hetimet rreth vrasjes së kryeministrit Zoran Gjingjiq. Policia i ka akuzuar udhëheqësit e krimit të organizuar se qëndrojnë pas atentatit.

 

Askush nuk do të kursehet, ka thënë kryeshefi i sigurimit publik Sreten Llukiq, duke shtuar se operacioni i policisë është më i madhi i këtij lloji në Evropë.

 

 

Human Rights Watch tha se komandantët irakianë i ekzekutojnë dhe rrahin vartësit e tyre

 

Nju Jork, 5 prill 2003 - Human Rights Watch tha se komandantët irakianë i ekzekutojnë dhe rrahin vartësit e tyre, për të ruajtur disiplinën te trupat në Irakun Verior.

Ushtarë irakienë që u janë dorëzuar forcave kurde thanë se deri tani janë ezekutuar 10 dezerterë.

 

 

Solana u takua në Uashington me sekretarin e Shtetit Pauell

 

Uashington, 5 prill 2003 - Shefi i politikës së jashtme të Bashkimit Evropian Havier Solana u takua në Uashington me sekretarin e Shtetit Kolin Pauell.

Pas takimit, ata thanë se do të ketë nevojë që Kombet e Bashkuara ta luajnë rolin e tyre në Irak.

"Jemi në fillim të procesit të dialogut pragmatik, të përcaktojmë cili mund të ishte roli i duhur i Kombeve të Bashkuara. Ato gjithsesi do të jenë partner në gjithë këtë", tha Pauell, duke shtuar se së shpejti, aleatët do ta kenë kontrollin e plotë mbi Irakun.

 

 

Ushtari amerikan është akuzuar për vrasje të paramenduar

 

Uashington, 5 prill 2003 - Ushtari amerikan, i cili para dy javësh e hodhi granatën në kampin e ushtrisë në Kuvajt, është akuzuar për vrasje të paramenduar të dyfishtë.

 

32-vjeçari Hasan Akbar gjithashtu përballet edhe me 17 akuza për tentim vrasjeje. Akbar mund të dënohet me vdekje nëse shpallet fajtor nga gjykata ushtarake.

 

 

Bush u ka urdhëruar autoriteteve të shëndetësisë t'i izolojnë amerikanët e sëmurë nga pneumonia

 

Uashington, 5 prill 2003 - Presidenti i Shteteve të Bashkuara Xhorxh Bush u ka urdhëruar autoriteteve të shëndetësisë t'i izolojnë amerikanët e sëmurë nga forma vdekjeprurëse e pneumonisë, e cila me shpejtësi përhapet nëpër botë.

Dy raste të reja dje u regjistruan në Floridë. Në Shtetet e Bashkuara janë regjistruar gjithsejt 100 raste të sëmundjes.

Sindromi Akut i Organeve të Frymëmarrjes deri tani ka shkaktuar vdekjen e 85 njerëzve në Azi dhe Kanada, ndërsa ka infektuar mbi 2.300 vetë anekënd botës.

 

Forcat amerikane me të gjitha armët po sulmojnë Qerbelanë

 

Afër Qerbelasë, 5 prill 2003 - Aeroplanë dhe trupa të mëdha amerikane po sulmojnë sot qytetin e Qerbelasë, duke mbrojtur prapavijën e forcave amerikane që po lëvizin drejt Bagdadit, citon Rojteri një oficer amerikan.

Forcat amerikane po hapin zjarr me helikopterë, me artileri dhe me armë të rënda.

 

 

Trupat e koalicionit iu kanë afruar qendrës së Bagdadit

 

Bagdad, 5 prill 2003 – Një numër i konsiderueshëm i trupave të koalicionit i janë afruar sot (të shtunën) qendrës së Bagdadit dhe s'kanë plan të kthehen prapa, ka deklaruar zëdhënësi i Komandës qendrore, njofton AP.

 

"Sot në mëngjes, forcat e koalicionit janë në Bagdad", ka thënë kapiteni Frenk Thorp. "Duke hyrë në qytet, ne patëm luftime sporadike, kaluam nëpër divizionet e Gardës republikane gati deri në qendër të qytetit. Tash kemi forca të konsiderueshme duke lëvizur në qytet", ka thënë ai.

 

 

Të pakten katër ushtarë amerikanë janë plagosur në luftimet e sotme në Bagdad

 

Bagdad, 5 prill 2003 – Të pakten katër ushtarë amerikanë janë plagosur, njëri syresh rëndë, në luftimet e sotme (të shtunën) brenda dhe rreth Bagdadit, njofton Rojter. Njoftohet se një helikopter Apash e ka evakuar njërin prej të plagosurve, i cili kishte qenë qëlluar në kokë.

 

 

Bombardime të fuqishme në Bagdad gjatë natës

 

Bagdad, 5 prill 2003 - Avionët e koalicionit po bombardojnë Bagdadin, ndërkohë që forcat e udhëhequra nga Shtetet e Bashkuara po rrethojnë kryeqytetin irakian.

 

Shpërthime të reja u dëgjuan gjatë natës në Bagdad, duke ngritur shtëllunga tymi dhe flake në qiell, ndërsa artileria kundërajrore ndriqoi qiellin e errët të natës.

 

Sulmet u kryen pasi komanda qendrore amerikane tha se trupat në terren morën nën kontroll aeroportin ndërkombëtar të Bagdadit, 20 kilometra nga qendra e qytetit. Zyrtarët ushtarakë thanë se trupat po vazhdojnë përpjekjet për të eliminuar rrezistencën e forcave irakiane.

 

 

Komanda qendrore amerikane bën të ditur se janë vrarë dy pilotë të helikopterëve të marinës

 

Katar, 5 prill 2003 - Komanda qendrore amerikane në Katar bën të ditur se dy pilotë të helikopterëve të marinës u vranë sot, kur helikopteri i tyre u rrëzua në pjesën qendrore të Irakut. Zyrtarët thonë se ngjarja po hetohet, por nuk duket të ketë rezultuar nga zjarri irakian.

 

Dëshmitarët thonë se mijra civilë irakianë kanë mbushur makinat dhe po largohen nga Bagdadi, ndërkohë që po afrohen forcat amerikan.

 

 

Kina dhe Rusia bëjnë thirje që t'i jepet fund menjëherë luftës në Irak

 

Pekin, 5 prill 2003 - Kina dhe Rusia po bëjnë thirje që t’i jepet fund menjëherë luftës së udhëhequr nga Shtetet e Bashkuara në Irak, duke thënë se Kombet e Bashkuara duhet të jenë përgjegjëse për zgjidhjen e konfliktit në mënyrë paqësore.

Zëvendësministri i Jashtëm i Rusisë Juri Fedotov tha se të dy vendet ndjejnë një shqetësim të thellë lidhur me pasojat humanitare të luftës dhe se duan të vazhdojnë të punojnë me Kombet e Bashkuara për të arritur një zgjidhje diplomatike. Zoti Fedotov foli me gazetarët në Pekin pas dy ditë bisedimesh me udhëheqësit kinezë.

 

 

Trupat e koalicionit hyjnë në Bagdad

 

Bagdad, 5 prill 2003 - Zyrtarë ushtarakë amerikanë thonë se disa prej tankeve të tyre kanë hyrë në Bagdad për herë të parë në një mision rikonjicioni. Ata i thanë se disa tanke "abrams" shkuan në periferinë jugore të kryeqytetit rreth 13 km larg qendrës së Bagdadit.

 

Ndërkohë që forcat amerikane konsolidojnë marrjen e aeroportit ndërkombëtar të Bagdadit, nuk ka patur shenja të ndonjë veprimi jo konvencional që Iraku tha do të përdorë në përpjekje për t'i shkatërruar ata.

 

 

Pentagoni ka identifikuar sot tetë trupa të ushtarëve të vdekur

 

Uashington, 5 prill 2003 – Pentagoni ka identifikuar sot (të shtunën) tetë trupa të ushtarëve të vdekur, të gjetur gjatë shpëtimit të burgosures amerikane të luftës, Xhesika Linç, njofton AP. Trupi i nëntë i pa jetë, thhet më tej në njoftim, që është transferuar në Dover, nuk është identifikuar.

 

 

Rajs: SHBA-të do të kenë rolin drejtues pas luftës

 

Uashington, 5 prill 2003 - Këshilltarja amerikane për çështje të sigurisë, Kondoliza Rajs thotë se forcat e udhëhequra nga SHBA dhe jo Kombet e Bashkuara do të luajnë rol drejtues në Irak pas luftës. Ajo tha se kjo nuk ka pse të jetë befasi, pasi ata kanë dhënë jetën dhe gjakun për atë që ajo e quajti çlirim i Irakut.
Rajs tha se fillimisht Iraku në të vërtetë do të drejtohet nga një zyrë që do të ketë në krye një gjeneral amerikan të dalë në pension e cila do të përgjigjet para Pentagonit.

 

 

Udhëheqësi irakian del në rrugët e Bagdadit

 

Bagdad, 5 prill 2003 - Televizioni irakian ka shfaqur pamje që paraqesin Sadam Huseinin duke u takuar me banorë që brohorasin nëpër rrugët e Bagdadit. Videoja tregonte një burrë duke buzëqeshur dhe të relaksuar i veshur me uniformë ushtarake i cili në një moment përqafoi një foshnjë.

 

Zëdhënës amerikanë kanë sugjeruar se personi ishte sozia e udhëheqësit irakian. Por një korrespondent i BBC-së në Bagdad thotë se një grup irakianësh të cilët panë filmin thanë se ai ishte presidenti irakian.

 

Ata thanë se lëvizjet ishin ato të Sadam Huseinit dhe se edhe ecja ishte tipike e presidentit Sadam. Tymi i zi i parë në sfond tregonte se pamjet ishin filmuar pas flllimit të luftës përpara dy javësh.

 

 

Bler: Siria dhe Irani nuk do të sulmohen

 

Londër, 5 prill 2003 - Kryeministri britanik, Toni Bler ka thënë se amerikanët nuk kanë plane të sulmojnë Sirinë apo Iranin pas largimit nga pushteti të Sadam Huseinit.

Ai tha se njerëzit duhet t'i japin fund teorive të konspiracionit rreth një liste vendesh për t'u goditur.
"Lufta nuk është për këtë", - tha zoti Bler.

 

Komentet e tij në një intervistë për seksion arab të BBC-së pasojnë deklarata nga zyrtarë të lartë në administratën e Bushit që paralajmërojnë Sirinë dhe Iranin të mos lejojnë vullnetarë ose pajisje ushtarake të shkojnë në Irak.

 

 

Kryengritësit çeçenë vrasin tetë njerëz në Grozni

 

Grozni, 5 prill 2003 - Si pasojë e një sulmi terrorist të kryengritësve çeçen në kryeqytetin Grozni janë vrarë të paktën tetë njerëz. Numri i të vdekurve mund të rritet në çdo çast pasi që si pasojë e sulmit janë plagosur shumë persona.

 

Sipas të dhënave të autoriteteve kryesit e sulmit kishin aktivizuar një minë të fshehur në afërsi të rrugës nëpër të cilën kaloi një autobuz me punëtorë ndërtimi. Siç njofton televizioni rus punëtorët po ktheheshin në shtëpitë e tyre pasi që kishin përfunduar punët në një bazë ushtarake ruse.

 

Copyright©2000-2003 Trepca.net - Të gjitha të  drejtat e rezervuara.