Lajme

E enjte, 3 prill 2003

Përmbajtja:

• Deputetët përkrahën raportin e Qeverisë për punën e saj njëvjeçare

• Sami Hamiti u zgjodh kryeshef i ri i Ekzekutivit në komunën e Prishtinës

• Mitrovicë: Në kuadër të shëndetësisë primare kanë filluar punën edhe dy ambulanca shëndetësore

• Serbët në një protestë në Mitrovicë kërkuan kthimin e ushtrisë dhe policisë serbe në Kosovë

• Shtajner vizitoi Prizrenin

• Në dy incidente në Kërpimeh të Podujevës plagosen 3 persona

• Dy vëllezërit me maska dënohen me nga 60 ditë burgim

• Deputetët e Kuvendit të Kosovës po diskutojnë sot për raportin e punës njëvjeçare të Qeverisë

• I.Kadare: Shqiptarët kanë përkrahur luftën kundër diktaturës irakiane, sepse edhe vetë e kanë përjetuar një tragjedi të tmerrshme

• Serbët në veri të Mitrovicës kanë paralajmëruar për sot protestën me moton: "Sebia po - Kosova e pavarur jo"

• Qeveria e Kosovës ka hedhur poshtë kërkesën e KEK-ut që nga suficiti buxhetor të financohen projektet e caktuara

• Në Shkodër u përkujtua demonstrata antikomuniste e 2 prillit të vitit 1991

• Më në fund u shfuqizua ligji i gjendjes së luftës midis Shqipërisë dhe Greqisë

• Sipas presidentit slloven, modeli i Marrëveshjes së Ohrit do të duhej të zbatohej edhe në Kosovë

• Kryesuesi serb i Kryesisë së Bosnje e Hercegovinës ka dhënë dorëheqje për shkak të aferës për shitjen e armëve Irakut

• Në një incident të armatosur në Tetovë janë plagosur 4 të rinj shqiptarë

• Janë vrarë rreth 500 trupa irakiane në përleshjet e sotme me forcat amerikane

• Pauell në Bruksel: Sadam Huseini të hiqet nga pushteti

• Ka humbur jetën kamermani i BBC pasi kishte shkelur në një minë

• Trupat amerikane kanë përparuar deri në 6 mile në jug të Bagdadit

• Kidnapohet një anije pasagjerësh në portin e Havanës

• Vazhdon përhapja e epidemisë së mushkërive "SARS"

• Paralajmërohen greva masive në Francë

• Nga rrëzimi i helikopterit amerikan kanë humbur jetën 7 ushtarë dhe janë plagosur edhe 4 të tjerë

• Forcat izraelite kanë vrarë sot 6 palestinezë

• Trupat e koalicionit i janë afruar Bagdatit 30 kilometra

• Është rrëzuar një aeroplan dhe një helikopter amerikan

• Turqia lejon kalimin tokësor të trupave aleate

• Rusia zbut tonet për luftën në Irak

• Gjermania pro rrëzimit të qeverisë irakiane

• Nga shpërthimet në Filipine janë vrarë 15 vetë

Deputetët përkrahën raportin e Qeverisë për punën e saj njëvjeçare

 

Prishtinë, 3 prill 2003 - Grupet parlamentare shqiptare në Kuvendin e Kosovës në seancën e sotme përkrahën punën njëvjeçare të Qeverisë së Kosovës, sikurse edhe shumica e deputetëve, por disa nga deputetët patën edhe në vërejtje në punën e saj.

Duke folur për raportin e kryeministrit Sabri Hamiti, shef i Grupit parlamentar të LDK-së, ditën e sotme e vlerësoi si të veçantë sepse një institucion po diskuton për punën e një institucion tjetër. Prandaj, theksoi ai, Kosova po hyn përfundimisht në rrugën e demokracisë.

 

"Këtë mënyrë të tillë të hyrjes në diskutimin tim për punën njëvjeçare të qeverisë e bëj duke qenë i vetëdijshëm se ne kemi një institicion të lartë ekzekutiv të Kosovës, qeverinë të cilën e kemi ndërtuar të gjithë bashkë me një marrëveshje, kështu që vetvetiu kemi përjashtuar mundësinë e krijimit të opozitës, rreth qeverisë në parlamentin tonë", tha deputeti Hamiti.

 

Ai tha se vendi ndodhet në një moment kur të gjithë duhet t'i marrin përgjegjësitë së bashku, duke e ditur se qeveria është fryt i koalicionit të tri partive kryesore. Por ai kërkoi që institucionet e Kosovës të forcohen, të profesionalizohen dhe të jenë më të përgjegjshme.

Ndërkaq deputeti i PDK-së Hashim Thpçi, theksoi mbështetjen e partisë që kryeson për qeverinë dhe për kryeminsitrin. Ai vlerësoi se arritja e marrëveshjes për krijimin e institucioneve të Kosovës ka relaksuar marrëdhëniet ndërmjet partive politike. Thaçi kërkoi bartjen e kompetencave nga UNMIK-u në institucionet e Kosovës dhe vuri në pah nevojën e krijimit të ministrive të reja në kuadër të qeverisë ekzistuese.

Ndërkaq, Dragisha Kërstoviq, shef i koalicionit serb "Kthimi" kritikoi punën e qeverisë duke thënë se raporti në shumë pjesë flet hapur për pavarësinë e Kosovës dhe prandaj është papranueshëm për deputetët serbë, theksoi ai.

Bajram Kosumi, deputet i AAK-së tha se grupi parlamentar i AAK-së mbështet pa rezervë punën njëvjeçare të qeverisë dhe të kryeministrit. Ai tha se qeveria ka realizuar shkallën më të lartë të punës dhe nuk mund të pritet më tepër nga ajo.

 

Por ai vlerësoi se mungesa e kompetencave është parakusht për zhvillimin e mëtejshëm të vendit, duke kërkuar njëherit një angazhim të përbashkët për krijimin e një kualiteti të ri kushtetues dhe institucional në Kosovë.

Kuvendi vendosi që Ligji për arsimin e lartë të mbetet valid, i miratuar nga ku Kuvend muaj më parë, megjithëse nuk është nënshkruar ende nga kryeadministratori Shtajner.

 

Nexhat Daci sqaroi se Qeveria dhe në këtë kuadër edhe Ministria e Arsimit dhe universiteti të gjitha aktivitetet që dalin nga përgjegjësitë me institucionet e shkollimit të lartë duhet t'i bazojnë në dispozitat e Ligjit për arsimin e lartë në Kosovë i miratuar anga Kevendi i Kosovës në korrik të vitit 2002. Ky qëndrim u miratua nga deputetët e Kuvendit.

 

 

Sami Hamiti u zgjodh kryeshef i ri i Ekzekutivit në komunën e Prishtinës

 

Prishtinë, 3 prill 2003 - Më shumicë votash, Sami Hamiti, nga radhët e LDK-së, u zgjodh sot kryeshef i ri i Ekzekutivit në komunën e Prishtinës. Ndërkaq këshilltarët e PDK-së kundërshtuan zgjedhjen e tij. Këtë e bëri shefi i grupit të kësaj partie Shemsi Veseli.

Ish-kryetari i Komunës së Prishtinës Sali Gashi vlerësoi lart punën e deritashme të Sami Hamitit në krye të Drejtoratit të inspeksionit. Këshilltarët e PDK-së dhe AAK-së nuk morën pjesë në procesin e votimit të kryeshefit të ekzekutivit.

 

 

Mitrovicë: Në kuadër të shëndetësisë primare kanë filluar punën edhe dy ambulanca shëndetësore

 

Mitrovicë, 3 prill 2003 - Drejtori i Drejtorisë për Shëndetësi dhe Mirëqenie Sociale, dr. Sadije Asllani - Bilalli, ka bërë të ditur se në komunën e Mitrovicës, që nga fillimi i këtij muaji, në kuadër të shëndetësisë primare, kanë filluar së punuari edhe dy ambulanca shëndetësore, të cilat do të ofrojnë shërbime për qytetarët e komunës.

Pasi që është bërë kompletimi me inventar dhe aparaturë moderne mjeksore, me mjete nga buxheti komunal i shëndetësisë, në kazermën "Isa Boletini", të Zonës së IV të TMK-së, më një prill ka filluar punën mjeku i praktikës së përgjithshme nga shtëpia e shëndetit, i cili dy herë në javë do tu ofrojë shërbime pjestarëve të TMK-së.

Shtëpia e shëndetit do ta furnizojë këtë ambulancë edhe me medikamente dhe material tjetër sanitar.

Dr. Asllani-Bilalli, ka bërë të ditur se edhe në Bajgorë të Shalës, ka filluar punë ambulanca shëndetësore, në të cilën një herë në javë të sëmurit do t'i vizitojë mjeku i praktikës së përgjithshme, kurse tekniku medicinal do tu ofrojë shërbime banorëve të kësaj ane për çdo ditë.

 

 

Serbët në një protestë në Mitrovicë kërkuan kthimin e ushtrisë dhe policisë serbe në Kosovë

 

Mitrovicë, 3 prill 2003 - Mijëra serbë sot protestuan në veri të Mitrovicën me moton "Po në Serbi - jo në Kosovën e pavarur". Oratorët u kanë bërë thirrje udhëheqësve të tyre që të braktisin instititucionet e Kosovës posa të kalojnë kompetencat nga UNMIK-u në institucionet e Kosovës, duke thënë se Kosova në këtë mënyrë po ecën drejt pavarësië.

 

Gjithashtu ata bënë thirrje që të formohen struktura paralale të serbëve dhe të mbahet një referendum me të cilën veriu i Mitrovicës do të shpallej komunë në vete.

Njëri nga liderët serbë, Milan Ivanoviq, kërkoi kthimin e ushtrisë dhe policisë serbe në Kosovë, sepse sipas tij, kjo na qenka pjesë e Serbisë! Ai tha se serbët nuk e njohin as SHPK-në.

Protesta do të organizohen edhe ditëve të ardhshme, paralajmëruan serbët e Mitrovicës në këtë tubim.

 

 

Shtajner vizitoi Prizrenin

 

Prizren, 3 prill 2003 - Kryeadminisrtatori i Kosovës Mihael Shtajner vizitoi Prizrenin, ku fillimisht është takuar me zyrtarë lokalë dhe ndërkombëtarë të këtij qyteti: Eqrem Kryeziun, kryetar i Asamblesë komunale, me administratorin rajonal Grejv Uiliams, me komandantin e policisë rajonale të UNMIK-ut etj.
Pastaj Shtajner bëri një sheti në këmbë nëpër qytet dhe u ndal te xhamia e Sinan Pashës dhe bisedoi me kryetarin e Bashkësisë Islame të Prizrenit Ali Vezaj.

Duke folur para mediave për kalimin e kompetencave nga UNMIK-u tek vendorët, Shtajner tha se drejtuesit e instituicioneve të Kosovës duhet të jenë të vetëdijshëm se do të kenë një përgjegjësi shumë të madhe në punën që i pret.

 

 

Në dy incidente në Kërpimeh të Podujevës plagosen 3 persona

 

Podujevë, 3 prill 2003 - Në dy incidente të lidhura ndërmjet vete rreth orës 9 të mëngjesit 3 persona janë plagosur sot (e enjte) në fshatin Kërpimeh të Podujevës, ka njoftuar zv.komandanti i stacionit të policisë në Podujevë z. Majkëll Shllikovej. Ai pohoi se është arrestuar një i dyshimtë i mundshëm në lidhje me ngjarjen.

"Një nga të dyshuarit, pas rastit ka shtënë edhe në drejtim të KFOR-it çek-sllovak", tha z. Shllikovej i cili tha se motivet e këtij incidenti ende nuk dihen.

Burimet e informacionit në Qendrën emergjente të Prishtinë bëjnë të ditur se në trajtim mjekësor janë 3 të plagosur nga Podujeva.

Vjollca Bogiqi, sekretare në Qendrën emergjente tha se fjala është për Sahit Tahirin (1970), Ekrem Tahirin dhe Remzie Tahirin (1985).

 

 

Dy vëllezërit me maska dënohen me nga 60 ditë burgim

 

Deçan, 3 prill 2003 - Pas arrestimit nga policia, vëllezërit Haki dhe Amir Mataj janë dërguar në Gjykatën për kundërvajtje në Deçan ku janë dënuar me nga 60 ditë burgim.

 

Gjatë procedurës gjyqësore është vërtetuat se vëllezërit Mataj më 31 mars të këtij viti me maska në kokë kanë sulmuar fizikisht me shufra bejzbolli Naser Humajn.

 

Gjatë përleshjes Naseri ia heq njërit maskën, por megjithatë ai merr lëndime të rënda trupore. Me vëllezërit Mataj kanë qenë edhe dy sulmues të tjerë të cilët end nuk janë arrestuar, shkruan shtypi i sotëm.

Ndryshe paraqitja e njerëzve me maska në komunën e Deçanit është një dukuri që shqetëson qytetarët e kësaj ane.

 

 

Deputetët e Kuvendit të Kosovës po diskutojnë sot për raportin e punës njëvjeçare të Qeverisë

 

Prishtinë, 3 prill 2003 - Pas disa shtyrjeve, më në fund deputetët e Kuvendit të Kosovës po diskutojnë sot për raportin e punës njëvjeçare të Qeverisë së Kosovës.

 

Fillimisht për raportin në fjalë folën shefat e grupeve parlamentare në Kuvendin e Kosovës, të cilët, përveç atij serb, me disa vërejtje e përkrahën raportin e qeverisë për punën njëvjeçare. Shefi grupit parlamentar serb e kritikoi ashpër raportin e kryeministrit të Kosovës.

Për debat janë paraqitur shumë deputetë.

Ndryshe sot pritet të shqyrtohet për herë të dytë Projektligji për Bibliotekat, iniciativa për shpalljen e Bjeshkëve të Nemuna – Park Nacional, si dhe propozimi i grupeve parlamentare për emërimin e anëtarëve të Komisionit për media.

 

Gjithashtu do të nxirret para deputetëve edhe çështja e fillimit të zbatimit të Ligjit për Arsimin e Lartë të Kosovës, i miratuar nga Kuvendi i Kosovës, por ende i pashpallur nga PSSP të OKB-së për Kosovë.

 

 

I.Kadare: Shqiptarët kanë përkrahur luftën kundër diktaturës irakiane, sepse edhe vetë e kanë përjetuar një tragjedi të tmerrshme

 

Lozanë, 3 prill 2003 - "Mendoj se një prej arsyeve pse Shqipëria, Kosova dhe në përgjithësi shqiptarët kanë qenë të qartë dhe kanë mbajtur atë qëndrim në përkrahje të luftës kundër diktaturës irakiane, është nga fakti, sepse ata vetë e kanë përjetuar një tragjedi të tmerrshme", tha shkrimtari ynë i mirënjohur Ismail Kadare në një intervistë dhënë gazetës "Bota sot".

Kadare thotë se shqiptarët pranuan bombardimin e NATO-s të ndërgjegjshëm se disa nga ato bomba do të binin edhe mbi ta, që do të thotë se shqiptarët ishin të gatshëm të sakrifikoheshin kështu, duke e paguar çmimin e lartë të lirisë.

 

"Shqiptarët aq sa ishin fisnikë, aq ishin edhe të etshëm për paqe dhe liri dhe për çlirimin nga ana e një regjimi të egër shekullor, kështu që edhe pse ranë bombat mbi kokat e shiqptarëve, ata fare nuk u ankuan dhe i falën këto gabime padashje, ashtu siç dinë të falin shqiptarët".

Ndërkaq duke komentuar zhvillimet më të reja në Serbi, Kadare theksoi se "kaosi dhe kriminaliteti që po mbretëron sot në Serbi nuk do të reflektohen apo nuk do të ketë ndikim në Kosovë, sepse ajo është ditur dhe është pritur: shtëpia mafioze e Milosheviçit është shtëpia më e madhe mafioze në Evropë".

I pyetur të komentojë një iniciativë për unionin e shqiptarëve në Kosovë, në Shqipëri e Maqedoni, Ismail Kadare u përgjegj:

"T'ju them të drejtën për këtë as që kam dëgjuar e as që di se për çka është fjala këtu. Ka disa herë disa nisma që duken shumë ultrapatriotike në pamjen e parë dhe ultrashqiptare që më shumë kanë qëllime të tjera me qëllim të gjoja sfidimit të tjerëve duke menduar se ja, ne do të jemi të parët që do të bëjmë bashkimin e Shqipërisë me Kosovën apo me ndonjë rajon tjetër.

 

Mendoj se këto nisma nuk janë të mira për momentin dhe se ato janë më shumë të dëmshme sesa të dobishme, kur dihet se Kosova dhe shqiptarët një ditë do të jenë të bashkuar dhe të drejtuar nga një Evropë e bashkuar.

 

Megjithatë institiucionet e Kosovës dhe shqiptarët disa herë para komunitetit ndërkombëtar janë dëshmuar se janë për paqe dhe për demokraci dhe nuk janë faktorë të destabilitetit në rajon. Këto iniciativa nuk kanë një bazë objektive për t'u mbështetur dhe ato mund të kthehen thjesht në aventura që të diskreditojnë një ide që mund të jetë reale dhe e vërtetë".

Ndërkaq në pyetjen nëse Kosova e pavarur duhet t'i ketë simbolet e veta, Kadare tha se Kosova mund të ketë shenja të saj, por këto shenja nuk duhet të jenë përjashtuese të shenjave kombëtare.

"Siç e dini shenjat kombëtare, heraldika kombëtare shqiptare është parashtetërore. Shqipëria këtë e ka pasur para se të jetë shtet. Është një ringjallje e një heraldike që tashmë nuk lidhet me asnjë institucion shtetëror dhe është kthyer në një kulturë të dytë politike dhe historike të popullit shqiptar.

 

Prandaj ajo nuk mund të e jetë e përjashtuar. Nëse rregullat ndërkombëtare do ta kërkonin në Kosovë, sigurisht Kosova duhet ta ketë heraldikën e saj që ta përfshinte në një mënyrë apo tjetër heraldikën e vjetër të kombit shqiptar".

Duke komentuar për integrimet kulturore brendashqiptare, Kadare tha me keqardhje se ka pengesa, të cilat janë të panevojshme dhe që nuk ndihmojnë për asgjë. "Ka rishfaqje grindjesh kundër procesit të intergimit.

 

Ta zëmë grindjen për gjuhën të cilën unë do ta quaja meskine dhe të kotë, që sipas mendimit tim është vetëm penguese. Grindje tjetër mund të jetë edhe ajo fetare, që fatmirësisht ende nuk ka dalë dhe besoj se shqiptarët në këtë drejtim do të tregohen të kujdesshëm sikur deri më tani".

"Po ashtu ka një mosbesim midis rivaliteteve, është e pranishme një lloj ndjenje jo e shëndetshme rivaliteti midis kulturave, për shembull midis asaj që zhvillohet në Kosovë apo Shqipëri.

 

Do të thotë të ketë proces vetëm afirmimi dhe afrimi që është kjo mbeturinë e një mentaliteti tribal, feudal të vjetër që ne shqiptarët duhet ta shtyjmë larg e më larg", tha mes tjerash në këtë intervistë Ismail Kadare.

 

 

Serbët në veri të Mitrovicës kanë paralajmëruar për sot protestën me moton: "Sebia po - Kosova e pavarur jo"

 

Mitrovicë, 3 prill 2003 - Serbët në veri të Mitrovicës ka paralajmëruar se sot do të organizojnë një protestë me moton: "Serbia po - Kosova e pavarur jo", me të cilën do të kundërshtohet edhe transferimi i pushtetit në duart e institucioneve të Kosovës.

Është paralajmëruar se këto protesta do të mbahen edhe në vendbanjmet e tjera të serbëve në Kosovë.

Milan Ivanoviq, një nga liderët serbë, tha se serbët me prezencën e tyre masive ata do të dëshmojnë se janë kundër pavarësisë së Kosovës.

Kryetari i Parlamentit të Kosovës Nexhat Daci ka dënuar palajmërimet për fillimin e protestave serbe në veri të Mitrovicës. Ai ka pohuar se asnjë grup minoritar në Kosovë dhe asnjë shtet fqinjë nuk mund të ndalë procesin e bartjes së kompetencave nga ndërkombëtarët tek vendorët, sepse kjo është edhe kërkesë e KS të OKB-së.

 

 

Qeveria e Kosovës ka hedhur poshtë kërkesën e KEK-ut që nga suficiti buxhetor të financohen projektet e caktuara

 

Prishtinë, 3 prill 2003 - Në mbledhjen e djeshme të Qeverisë së Kosovës është debatuar për zhvillimet aktuale në vend, për gjyqësinë, si dhe për një numër projektligjesh dhe vendimesh.

Kryeministri Rexhepi ka njoftuar se në javën e ardhshme do të mbahet takimi i Këshillit për Bartjen e Kompetencave, por do të përgatiten edhe propozime konkrete të Qeverisë për zgjerimin e saj me ministri të reja.

Në mbledhje për situatën e sigurisë dhe pozitën e gjyqësisë ka referuar komesioneri i policisë së UNMIK-ut Shtefan Feler, i cili e ka cilësuar më të mirë se sa që paraqitet ndonjëherë në media. Me këtë rast ai ka prezentuar të dhëna dhe fakte statistikore të cilat dëshmojnë për rënien e numrit të krimeve në Kosovë.

Në komunikatën për media thuhet se në mbledhjen e djeshme Qeveria e Kosovës ka hedhur poshtë një kërkesë të KEK-ut që nga suficiti buxhetor të vitit të kaluar të financojë projektet e caktuara të kësaj koorporate energjetike, duke nënvizuar se KEK-u duhet t'i ofrojë Qeverisë raportin e fundit financiar dhe të shpenzimeve, si dhe të japë sqarim për 49 milionë euro, që akoma ndodhen në buxhetin e KEK-ut.

 

 

Në Shkodër u përkujtua demonstrata antikomuniste e 2 prillit të vitit 1991

 

Shkodër, 3 prill 2003 - Qytetarë dhe përfaqësues të partive të grupimit opozitar Bashkimi për Demokraci përkujtuan dje në qytetin e Shkodrës demonstratën antikomuniste të 2 prillit të vitit 1991, kur në përleshje me forcat e policisë mbetën të vrarë katër të rinj shkodranë si dhe u plagosën më shumë se 60 demonstrues të tjerë.

 

Në mesin të vrarëve ishte edhe studenti Arben Broci, një nga nismëtarët e themelimit të partisë së parë opozitare në Shqipëri - Partisë Demokratike.

Në përkujtimet e djeshme të ngjarjes të 2 prillit ishte i pranishëm edhe nënkryetari i PD-së z. Bamir Topi, ish-kryeparlamentari Pjetër Arbnori si dhe sekretari për marrëdhëniet me jashtë në PD Besnik Mustafaj.

Duke përshëndetur takimin përkujtimor Besnik Mustafaj tha se idealet e demonstruesve të 2 prillit për vendosjen e demokracisë në Shqipëri ende nuk janë realizuar plotësisht.

 

 

Më në fund u shfuqizua ligji i gjendjes së luftës midis Shqipërisë dhe Greqisë

 

Athinë, 3 prill 2003 - Më në fund shfuqizohet kapitulli i Ligjit të gjendjes së luftës midis Shqipërisë dhe Greqisë, që kishte mbetur në fuqi si një paradoks pas heqjes së tij nga Komisioni parlamentar i politikës së jashtme dhe asaj të mbrojtjes së Greqisë në vitet 80-ta dhe vendosjes së marrëdhënieve të ngushta dhe miqësore bilateral që pasoi rënien e komunizmit në Shqipëri.

Ky lajm u bë i ditur pas takimit të kryeministrit shqiptar Fatos Nano dhe homologut të tij grek, Kosta Simitis, që u mbajt dje në mesditë në rezidencën e këtij të fundit, u vlerësua se lijgi i gjendjes së luftës politikisht dhe juridikisht është i mbyllur me arsyetimin se nënshkrimi i traktati të miqësisë midis dy vendeve në vitin 1996 dhe ratifikimi i tij parlamentar shënoi edhe shfuqizimin e këtij ligji.

Nano dhe Simitis pasi kanë vlerësuar situatën e qëndrueshme në Kosovë kanë rënë dakord që në samitin përfundimtar të presidencës greke në Selanik, që do të mbahet në muajin qershor të përfaqësohet edhe Kosova.

 

 

Sipas presidentit slloven, modeli i Marrëveshjes së Ohrit do të duhej të zbatohej edhe në Kosovë

 

Shkup, 3 prill 2003 - Presidenti i Sllovenisë, Janez Dërnovshek gjatë vizitës së djeshme në Shkup ka nënvizuar se marrëveshja e Ohrit nëse shënon rezultate konkrete, mund të aplikohej edhe në vende të tjera ku janë prezente tensionet ndëretnike.

 

Ai ka shtuar se modeli i Marrëveshjes së Ohrit do të duhej të zbatohej edhe në Kosovë dhe, siç është shprehur, bashkësia ndërkombëtare do ta përkrahte këtë model në të cilin mbështetet bashkëjetesa dhe përfaqësimi adekuat i etniteteve të ndryshme në institucionet shtetërore.

 

Dërnovshek dhe Qeveria sllovene kanë shprehur gatishmëri për dhënien e ndihmës konkrete Maqedonisë në pjesën që ka të bëjë me angazhimet e Maqedonisë për integrim në BE dhe në NATO.

Ndërkaq presidenti maqedonas Boris Trajkovski ka thënë se është e patjetërsueshme një gjetje e modaliteteve të reja të bashkëpunimit ekonomik midis Maqedonisë dhe Sllovenisë e në
veçanti në tërheqjen e investimeve sllovene në ekonominë maqedonase.

 

 

Kryesuesi serb i Kryesisë së Bosnje e Hercegovinës ka dhënë dorëheqje për shkak të aferës për shitjen e armëve Irakut

 

Sarajevë, 3 prill 2003 - Kryesuesi serb i Kryesisë së Bosnje e Hercegovinës Mirko Sharoviqit ka dhënë dorëheqje nga ky post për shkak të aferës për shitjen e armëve Irakut dhe të një afere tjetër të spiunazhit në kreun e ushtrisë së "Republika serpska" e cila është vënë në lidhje edhe me vrasjen e kryeministrit serb Zoran Gjingjiq.

 

Kjo dorëheqje është bërë me kërkesë të administratorit ndërkombëtar të Bosnjes Pedi Eshdaun, i cili siç njoftohet dje ka marrë vendimin edhe për pezullimin e Këshillit të lartë të mbrojtjes të "Republikës serpskës".

Ndërkaq, sekretari i përgjithshëm i NATO-s Xhorxh Robertson ka dënuar rolin e Sharoviqit në shitjen e armëve në Irak dhe në aferën e spiunimit. Një hetim i NATO-së ka rezultuar edhe me përfshirjen e Mirko Sharoviqit në aferën e spiunimit të përfaqësuesve të bashkësisë ndërkombëtare.

 

 

Në një incident të armatosur në Tetovë janë plagosur 4 të rinj shqiptarë

 

Tetovë, 3 prill 2003 - Në një përleshje të armatosur që ka ndodhur dje në mesditë në Tetovë, në afërsi të Universitetit të Tetovës, ka ndodhur një incident i armatosur, ku janë plagosur rëndë 4 të rinj shqiptarë, të moshës prej 15-25 vjeç.

 

Të plagosurit kanë marrë plagë të shkaktuara nga armë zjarri dhe se dy prej tyre ndodhen për shërim në spitalin e Tetovës, ndërkaq dy të tjerë janë dërguar në Klinikën shtetërore në Shkup.

Sipas mediave lokale, bëhet fjalë për një incident i cili është shkaktuar në mes të dy grupeve të armatosura. Në njërin grup të cilët edhe janë plagosur kanë qenë Muhamet Asllani dhe Sabit Terziu nga Tetova, kurse në grupin tjetër Osman Ismaili dhe Habil Ademi nga Reçica e Madhe e Tetovës.

 

Ky i fundit është vëllai i sekretarit të përgjithshëm të Partisë Demokratike Kombëtare Xhevat Ademi.

 

 

Janë vrarë rreth 500 trupa irakiane në përleshjet e sotme me forcat amerikane

 

Jugperendim i Bagdadit, 3 prill 2003 – Rreth 500 trupa irakiane, përfshirë këtu edhe pjesëtarët e njësitit më të fuqishëm të Sadam Hyseinit, janë vrarë sot (të enjten) në përleshjet me forcat amerikane për marrjen e një ure rreth 30 kilometra (20 mile) në jugperendim të Bagdadit, kanë bërë të ditur zyrtarët amerikanë, njofton AFP.

 

"Në një sulm dhe kundërsulm për këtë urë, rreth 500 ushtarë janë vrarë", ka thënë majori Xhon Altman, një oficer zbulimi i brigadës së parë të Divizionit të tretë të këmbësorisë.

 

 

Pauell në Bruksel: Sadam Huseini të hiqet nga pushteti

 

Bruksel, 3 prill 2003 - Ndërsa sekretari amerikan i shtetit, Kolin Pauell, fillon bisedimet me ministrat e Jashtëm evropian në Bruksel, Gjermania, Franca dhe Rusia e kanë bërë të qartë se duan që Sadam Huseini të hiqet nga pushteti.

Por kancelari gjerman, Gerhard Shrëder gjithashtu ka ritheksuar pozicionin e përgjithshëm evropian që Kombet e Bashkuara të luajnë rolin qëndror në Irak pasi të përfundojë lufta Tre vendet që kundërshtuan më së shumti luftën tani po dërgojnë mesazhe me nota më pajtuese drejt Uashingtonit.

Ministri gjerman i jashtëm, Joshka Fisher, tha se shpresonte që regjimi i Irakut të binte sa më shpejt të ishte e mundur.

Ndërkohë kancelari gjerman Shrëder shpresonte se një fund më i shpejtë i luftës, do të shkaktonte një numër më të vogël viktimash dhe se populli irakjan do të tejkalonte diktaturën për të jetuar në paqë dhe liri.

Komentet më të fundit të liderëve evropianë sugjerojnë fillimin e një debati të ri rreth asaj se çfarë duhet të ndodhë pas luftës në Irak.

 

 

Ka humbur jetën kamermani i BBC pasi kishte shkelur në një minë

 

Sylejmania, 3 prill 2003 – Kamermani Kevih Goulstejn, që punonte për BBC në Irakun Verior ka humbur jetën pasi kishte shkelur në një minë, ndërsa producenti Stjuart Hjufs, i cili punonte me kamermanin Goulstejn, është plagosur në këtë shpërthim, por korrespondenti Xhim Mur dhe përkthyesi vendës kanë shpëtuar të palënduar, njofton BBCWorld.

 

Incidenti ka ndodhur kur ata të katër udhëtonin me një automjet afër qytetit Kifri. Z. Goulstejn kishte zbritur nga makina dhe kishte shkelur në një minë tokësore dhe ka vdekur në vend. Z. Hjufs, i cili është nga Kardifi, ka marrë plagë në këmbë dhe po trajtohet në njësitin mjekësor amerikan afër qytetit Sylejmania.

 

 

Trupat amerikane kanë përparuar deri në 6 mile në jug të Bagdadit

 

Afër Bagdadit, 3 prill - Trupat amerikane kanë përparuar të enjten deri në gjashtë mile në jug të periferisë së Bagdadit dhe janë përgatitur të luftojnë për të marrë kontrollin e aeroportit të qytetit, kanë bërë të ditur zyrtarët amerikanë, njofton Rojter.

 

Burimet ushtarake kanë bërë tw ditur gjithashtu se përparimi i njësiteve të blinduara të Divizionit të 3-të amerikan të këmbësorisë ka hasur në rezistencë të vogël derisa po marshonin në drejtim të periferisë së qytetit.

 

Elementë të elitës së Divizionit të Gardës republikane, të shkëputur nga trupat irakiane, kanë lëvizur në jug për të mbrojtur qytetin. "Ne kemi përparuar vërtet shpejt", ka thënë kapiteni Kevin Xhekson.

 

"Nuk duket të ketë më kundërshtim", ka shtuar ai. Shtabi amerikan në Katar ka njoftuar zyrtarisht se trupat amerikane tash janë afër aeroportit kryesor të Bagdadit, i cili është vetëm 12 mile në jugperëndim të qendrës së qytetit pesëmilionësh.

 

 

Kidnapohet një anije pasagjerësh në portin e Havanës

 

Majami, 3 prill 2003 - Një grup kubanez ka kidnapuar në portin e Havanës një anije pasagjerësh dhe në det të hapur është nisur në drejtim të Shteteve të Bashkuara të Amerikës.

 

Sipas të dhënave të stacioneve të ndryshme televizive amerikane anija është vërejtur fillimisht në ujërat ndërkombëtare në jug të Key Vest. Në bordin e anijes mendohet të jenë rreth 50 njerëz.

 

 

Vazhdon përhapja e epidemisë së mushkërive "SARS"

 

Gjenevë, 3 prill 2003 - Sipas vlerësimeve të Organizatës Botërore të Shëndetësisë përhapja e epidemisë së mushkërive të rrezikshme për jetë "SARS" nuk ka arritur ende kulmin e saj.

 

Vetëm në Kinë ndërkohë numri i të vdekurve nga virusi i kësaj sëmundjeje ka arritur në 50. Posaçërisht dramatike gjendja vazhdon të mbetet ashtu si më parë në metropolin Hongkong.

 

Organizata Botërore e Shëndetësisë rekomandon që të shtyhen të gjitha udhëtimet për në Hongkong dhe në pjesën jugore të Kinës.

 

 

Paralajmërohen greva masive në Francë

 

Paris, 3 prill 2003 - Si pasojë e grevave të paralajmëruara të Shërbimit Publik në të gjitha pjesët e vendit Franca ndodhet në prag të një kaosi në komunikacion. Për sot është e paevituar shtyerja e pjesës më të madhe të fluturimeve nga Parisi.

 

Vështirësi të mëdha pritet të ketë edhe në sistemin hekurudhor. Sindikatat kanë bërë thirrje që përmes këtyre grevave të protestohet kundër sistemit francez pensional.

 

 

Nga rrëzimi i helikopterit amerikan kanë humbur jetën 7 ushtarë dhe janë plagosur edhe 4 të tjerë

 

Afër Qerbelasë, 3 prill 2003 – Helikopteri ushtarak amerikan "Black Hawk" me të paktën gjashtë persona është qëlluar me zjarr të armëve të vogla dhe është rrëzuar në Irakun qendror, kanë thënë zyrtarët ushtarak amerikan, njofton Rojter.

 

Një zyrtar i Pentagonit, duke folur me kusht të anonimitetit, ka thënë se helikopteri UH-60 është rrëzuar sot heret (të enjten) afër Qerbelasë, 50 mile në jug të Bagdadit dhe në këtë incident kanë humbur jetën shtatë ushtarë dhe janë plagosur edhe katër pjesëtarë të tjerë të bordit.

 

 

Forcat izraelite kanë vrarë sot 6 palestinezë

 

Gaza, 3 prill 2003 – Forcat izraelite kanë vrarë sot heret në mëngjes (të enjten) katër palestinezë gjatë një sulmi me tanke dhe helikopter në kampin e refugjatëve në jug të Rripit të Gazës, kanë bërë të ditur dëshmitarët dhe zyrtarët spitalorë, njofton Rojter.

 

Armata ka thënë se në operacionin gjatë natës në kampin Rafah janë vënë në shenjestër ndërtesat e përdorura nga personat e armatosur dhe kontrabandistët. Njoftohet gjithashtu se në qytetin Nablus të Bregun Perendimor, forcat speciale kanë vrarë edhe një militant.

 

Po kështu, në qytetin Kelkilia, gjithashtu në Bregun Perendimor, trupat izraelite kanë vrarë një djalosh 14-vjeçar jashtë shtëpisë së tij. Izraelitët thonë se janë përpjekur të arrestojnë militantët, por ata kanë kundërshtuar, andaj janë vrarë. Gjatë këtij operacioni janë arrestuar edhe dy vendës.

 

 

Trupat e koalicionit i janë afruar Bagdatit 30 kilometra

 

Bagdad, 3 prill 2003 - Forcat e koalicionit po përparojnë në drejtim të Bagdadit në dy drejtime, nga jugu dhe juglindja e kryeqytetit irakian. Gazetarët që udhëtojnë me divizionin e tretë të këmbësorisë amerikane thonë se disa njësi të divizionit kanë avancuar në drejtim të veriut përtej qytetit Qerbela, 80 kilometra në jug të Bagdadit.

 

Zëdhënësi i Komandës Qendrore amerikane, gjenerali Vinsent Bruks, tha se forcat e koalicionit vunë nën kontroll edhe një digë jo larg qytetit, nga frika se forcat irakiane mund ta shkatërronin për të përmbytur rajonin dhe të pengonin përparimin e forcave amerikane. Më në lindje, njoftohet se marinsat amerikanë po përparojnë drejt Bagdadit në rrugën kryesore që e lidh atë me qytetin Al Kut.

 

 

Është rrëzuar një aeroplan dhe një helikopter amerikan

 

Doha/Katar, 3 prill 2003 - Amerikanët thonë se kanë humbur një avion luftarak F-A18 Hornet mbi Irak. Rrjetet televizive amerikane thonë se aeroplani, i nisur nga një aeroplanmbajtëse, ishte goditur nga një raketë tokë-ajër. Nuk dihet çfarë ka ndodhur me pilotin. Kjo është humbja e parë e një avioni luftarak pa helikë që nga fillimi i luftës.

Të mërkurën në mbrëmje edhe një helikopter Blackhaëk u rrëzua mbi në Irakun qëndror gjatë një misioni. Një deklaratë e pentagonit thotë se mendohet se në bord kishte gjashtë vetë. Fati i tyre dhe shkaku i rrëzimit po hetohen ende.

 

 

Turqia lejon kalimin tokësor të trupave aleate

 

Ankara, 3 prill 2003 - Në Turqi një autokolonë me më shumë se 20 kamionë të mbushur me xhipe ushtarakë të lehtë që kanë destinacion bazat e forcave amerikane në Irakun verior ka kaluar kufirin turko irakian.

 

Kjo është autokolona e dytë me pajisje ushtarake në dy net radhazi që janë marrë nga bazat amerikane në Turqi për t'ju dërguar forcave amerikane në Irakun verior. Çdo kamion thuhet se ka dy xhipe ushtarake.

Sekretari amerikan i Shtetit, Kolin Pauell zhvilloi bisedime të mërkurën në Turqi dhe kërkoi ndihmë për trupat amerikane në Irakun verior. Turqia më herët e kishte hapur hapësirën ajrore, por kishte refuzuar të lejonte kalimin e trupave tokësore nëpër terrritorin e saj.

 

 

Rusia zbut tonet për luftën në Irak

 

Moskë, 3 prill 2003 - Presidenti Rus Vladimir Putin tha të mërkurën se Rusia nuk është e interesuar që SHBA të humbë në luftën e saj në Irak. Ai tha se shqetësimi i tij parësor ishte që Kombet e Bashkuara të vihej përsëri në krye të zgjidhjes së konfliktit.

 

"Po të marrim parasysh konsideratat politike dhe ekonomike, Rusia nuk ka interes që SHBA të humbasë. Ne jemi të interesuar që zgjidhja e problemit të kalojë te platforma e Kombeve të Bashkuara. Për këtë jemi të interesuar. Dhe sa më shpejt të ndodhë kjo gjë, aq më mirë do të jetë për të gjitha vendet e përfshira në konflikt."

 

 

Gjermania pro rrëzimit të qeverisë irakiane

 

Berlin, 3 prill 2003 - Ministri i jashtëm britanik, Xhek Stro ka shprehur optimizëm se ndryshimet midis Europës për çështjen e Irakut mund të kapërcehen.

 

Ai po fliste në Berlin pas bisedimeve me homologun gjerman Joshka Fisher i cili për herë të parë tha se ai shpresonte se regjimi i Irakut të përmbysej. Xhek Stro tha se ishte optimist se do të arrihej një pozitë e përbashkët europiane përsa i përket Irakut.

 

Duke vënë në dukje ato që ai i quajti ndryshime të shprehura mirë mbi çështjen e Irakut, ai tha se argumentet kishin fshehur një pjesë të madhe të marrëveshjes.

Joshka Fisher gjithashtu foli me tone më të buta për herë të parë duke aprovuar ndryshim të regjimit: "Ne shpresojmë se regjimi do rrëzohet sa më shpejt dhe kështu nuk do të kemi më humbje jetësh të njerëzve. Situata, ne do ta shohim, do të jetë e ndërlikuar. Për këtë na duhet të kemi ide krijuese".

 

 

Nga shpërthimet në Filipine janë vrarë 15 vetë

 

Davao, Filipine, 3 prill 2003 – Një sërë bombash kanë shpërthyer sot (të enjten) pranë tri xhamiave në jug të qytetit jugor Davao vetëm disa orë pas një shpërthimi tjetër afër portit detar, ku u vranë 15 njerëz, kurse janë plagosur edhe 14 të tjerë.

Copyright©2000-2003 Trepca.net - Të gjitha të  drejtat e rezervuara.