Lajme

E marte 2 prill 2003

Përmbajtja:

• Gjilan: Nga Kosova largohen marinsat e fundit amerikanë

• Xh.Kakuk: Kalimi i kompetencave është në përputhje me Rezolutën 1244 dhe po ecën përpara

• Bartja e kompetencave nuk do të ndërpritet, thotë kryeparlamentari Daci

• Sindikata e KEK-ut nesër organizon një protestë

• Fabio Mini ka nxitur reagime me vlerësimin e tij se zonat e banuara me serbë në Kosovë janë si kampe përqëndrimi?!

• Autoritetet e UNMIK-ut thonë se Kosova së shpejti do të ketë kodin penal dhe atë të procedurës penale

• Departamenti i Shtetit për gjendjen e të drejtave të njeriut në Kosovë në vitin e kaluar

• Policia shqiptare ndërmori një operacion të gjerë kundër trafiqeve të paligjshme dhe drogës në Shqipëri

• Një komision hetimor do të analizojë lidhjet midis Cërvenkovski dhe një biznesmeni shqiptar

• Është ndaluar ish-shefi i Shtatmadhorisë së ushtrisë jugosllave lidhur me vrasjen e Gjingjiqit

• Ministria kroate e Drejtësisë ka marrë një kërkesë nga Maqedonia për ekstradimin e Besnik Fetahut

• Departamentit i Shtetit për gjendjen e të drejtave të njeriut në Shqipëri

• Gjendja e të drejtave të njeriut në Maqedoni

• Sonte në mbrëmje ekipi i Shqipërisë do të luajë kundër ekipit të Irlandës

• Rusia proteston për bombardimin amerikan afër zonës ku ndodhet ambasada ruse

• Trupat izraelite kanë rrethuar sot rreth 2,000 palestinezë në Tulkarm

• Që nga 11 shtatori i vitit 2001 janë vrarë 38 pjesëtarë të forcave speciale amerikane

• Parlamenti i Koresë së Jugut ka miratuar një plan për të dërguar qindra trupa kundër Irakut

• Janë gjetur 11 trupa të ushtarëve të vrarë

• Shpërthime të mëdha janë dëgjuar sot në tërë Bagdadin

• Sipas ministri irakian të Informacionit janë vrarë 56 njerëz gjatë natës së kaluar

• Ushtarët amerikanë kanë përparuar në drejtim të Bagdadit nëpër grykën e Qerbelasë

• Kolin Pauell sot viziton Ankaranë dhe Beogradin

• K. Pauell: Aty ku lulëzojnë të drejtat dhe liritë e njeriut nuk ka vend për tiranët

• Një robe lufte u shpëtua nga trupat e koalicionit në Irak

• Ramsfeld pyet se ku janë udhëheqësit irakianë?

• Valë sulmesh ajrore kundër objekteve në Bagdad

• Beteja për Bagdadin

Gjilan: Nga Kosova largohen marinsat e fundit amerikanë

 

Gjilan, 2 prill 2003 - Marinsat amerikanë, të cilët së bashku me ushtarët e tjerë të NATO-s, hynë në Kosovë, para katër vitesh, për ta rikthyer te popullata e këtushme shpresën për jetë dhe për t`i shpëtuar nga tmerri i paparë që po bënte mbi ta regjimi i Beogradit, kanë përfunduar misionin e tyre në Kosovë dhe do të largohen nga Kosova.

Kryetari i komunës së Gjilanit, Lutfi Haziri ka organizuar sot një takim lamtumirës për grupin e fundit të marinsave amerikanë, të cilët kishin punuar deri tani në zyrën e çështjeve civile, e cila ndodhej në objektin e administratës komunale.

Mbylljen e kësaj zyre, koloneli amerikan, Hoffpauir e ka vlerësuar si një moment të shkëlqyer për popullin e Gjilanit, sepse kjo është dëshmi që këtu tash ka paqe, siguri dhe stabilitet, për të cilat janë angazhuar deri tani marincat, për më shumë se tri vite, ka thënë ai dhe ka shprehur mirënjohje për qytetarët e Gjilanit dhe kryetarin e komunës, Lutfi Hazirin, të cilët u dhanë përkrahje në misionin që kishin, duke qenë një shembull i mirë i bashkëpunimit të popullatës civile me ushtrinë.

Duke e rikujtuar qershorin e vitit 1999, koloneli Hoffpauir tha se ndjen kënaqësi që tash, pas më shumë se tri vitesh, kur marincat po kthehen në Amerikë, ky vend është i qetë dhe i sigurtë. "Ne erdhëm në Kosovë që të krijojmë një ambient të sigurtë për të gjithë dhe këtë e kemi arritur", tha ky zyrtar i lartë i ushtrisë amerikane.

Z. Haziri, pasi i ka falënderuar marinsat amerikanë për të gjitha sakrificat e deritashme që kanë bërë për të mirën e paqes dhe sigurisë në rajon dhe Kosovë, ka theksuar se Gjilani do t`i mbajë në mend marinsat si njerëzit e parë që në Kosovë sollën lirinë, për t`i dhënë fund tragjedisë së madhe që po bëhej mbi ta.

 

 

Xh.Kakuk: Kalimi i kompetencave është në përputhje me Rezolutën 1244 dhe po ecën përpara

 

Mitrovicë, 2 prill 2003 - Duke komentuar pakënaqësitë e serbëve të veriut të Kosovës për bartjen e përgjegjësive nga UNMIK-u tek institucionet vendore, zëdhënësi i UNMIK-ut Xhorxhi Kakuk thotë se kalimi i kompetencave është në përputhje me Rezolutën 1244 të OKB-së dhe është një proces i cili po ecën përpara.

 

Kakuk është i bindur se pakica serbe nuk do të braktisë institucinet e Kosovës, me gjithë apelin e disa liderëve të tyer që ta bëjnë këtë. Kakuk komentoi: "Askush nuk është duke i larguar serbët nga Kuvendi, askush nuk po i detyron ata me forcë ta bëjnë këtë dhe ne seriozisht shpresojmë që një gjë e tillë nuk do ë ndodhë".

Ndërkohë SHPK është në dijeni se nesër në Mitrovicë do të mbahen protesta, kurse zëdhënësi i këtij shërbimi në Mitrovicë Besim Hoti tha se policia pret protesta të qeta dhe se ato të do të jenë statike. Me këto protesta serbët do të shprehin pakënaqësinë e tyre kundër politikës së kreut të UNMIK-ut në Kosovë Mihael Shtajner.

 

 

Bartja e kompetencave nuk do të ndërpritet, thotë kryeparlamentari Daci

 

Prishtinë, 2 prill 2003 - "Me protestat e tilla që janë në vijën okupuese të Kosovës duhet të merren institucionet që kanë atë përgjegjësi. Bartja e kompetencave nuk do të ndërpritet", thotë kryetari i Kuvendit të Kosovës Nexhat Daci, duke komentuar pakënaqësitë e serbëve rreth kësaj çështjeje.

 

Sipas Dacit ky është konstatim dhe rekomandim i Këshillit të Sigurimit në Nju Jork.

"Nuk është dëshirë individuale dhe nuk mund ta pengojë asnjë vend në fqinjësi, asnjë grup i minoritar në Kosovë dhe ne mundohemi të krijojmë kushte të barabarta të jetesës", është shprehur kryeparlamentari Daci.

 

 

Sindikata e KEK-ut nesër organizon një protestë

 

Prishtinë, 2 prill 2003 - Situata e rëndë në KEK, shpërdorimet, ristrukturimi që do të ketë si pasojë zvogëlimin e numrit të punëtorve, e ka shtrënguar sindikatën e kësaj koorporate të shrehë pakanaqësinë e vet me një protestë që do të mbahet nesër. Sipas kreut të kësaj sindikate, Sherif Fejzullahu moto e kësaj proteste do të jetë "Ndal terrin në Kosovë", "Ndal largimin e punëtorëve nga puna", "Ndal korrupsionin në KEK" etj.

 

 

Fabio Mini ka nxitur reagime me vlerësimin e tij se zonat e banuara me serbë në Kosovë janë si kampe përqëndrimi?!

 

Prishtinë, 2 prill 2003 - Komandanti i forcave paqeruajtëse në Kosovë, gjenerali italian Fabio Mini ka nxitur reagime në një deklaratë të tij në mjetet serbe të informimit ku i ka përshkruar zonat e banuara me serbë në Kosovë si kampe përqëndrimi.

 

Por zyrtarët e KFOR-it nuk pranuan të komentojnë shqetësimet që kanë nxitur këto deklarata. Zëdhënësi i forcave paqeruajtëse ka thënë se qëllimi i pranisë ndërkombëtare në Kosovë është nxitja e tolerancës etnike.

 

Ai tha se ende ekzistojnë zona në Kosovë ku njerëzit nuk ndihen të sigurtë ku bëhen përpjekje për të inkurajuar kthimin e të zhvendosurëve.

 

Puna e forcave ndërkombëtare është që të krijojnë një mjedis më të sigurtë, por u takon qytetarëve të Kosovës tha ky zëdhënës që të jenë më tolerantë, më të kuptueshëm dhe të shikojnë drejt së ardhmes e cila nuk mund të jetë në një shoqëri njëetnike.

Zyrtarë të institucioneve thonë se shkalla e krimit në përgjithësi, posaçërisht ajo e dhunës etnike ka pësuar rënie të vazhdueshme në Kosovë.

 

 

Autoritetet e UNMIK-ut thonë se Kosova së shpejti do të ketë kodin penal dhe atë të procedurës penale

 

Prishtinë, 2 prill 2003 - Autoritetet e UNMIK-ut thonë se shumë shpejt Kosova do të ketë kodin e vet penal dhe kodin e procedurës penale. Sipas shefit të Zyrës juridike të UNMIK-ut Aleksandër Borg Olivie këto dy projektligje tashmë e kanë marrë formën përfundimtare dhe pas vërejtjeve që atyre mund t'i japë Qeverria dhe Parlamenti i Kosovës, do të nënshkruhen nga shefi i UNMIK-ut Mihael Shtajner.

Ai thotë se edhe këto ligje do të jenë e drejtë e rezervuar e UNMIK-ut, mirëpo roli i vendorëve në hartimin e tyre ka qenë shumë i madh. Një punë të rëndësishme në hartimin e këtyre dy ligjeve sipas tij e kanë bërë edhe ekspertë, Ismet Salihu dhe Ejup Sahiti, por edhe ekspertët ndërkombëtarë, duke filluar që nga Këshilli i Evropës e deri te Misioni i OSBE-së në Kosovë.

Mirëpo shumë nga përmbajtjet e këtyre ligjeve, pavarësisht prej kësaj janë marrë nga ligjet ekzistuese me disa ndryshime të vogla. Z. Olivie thotë se në këto dy projektligje mund të gjenden edhe modifikime të rëndësishme që janë marrë nga ligjet e ngjashme në Slloveni, Kroaci dhe në Bosnje e Hercegovinë.

 

 

Departamenti i Shtetit për gjendjen e të drejtave të njeriut në Kosovë në vitin e kaluar

 

Uashington, 2 prill 2003 - Në raportin vjetor të Departamentit të Shtetit për gjendjen e të drejtave të njeriut në botë flitet në një kapitull të veçantë për situatën në Kosovë. Në mes të tjerash aty thuhet se moszhvillimi ekonomik dhe papunësia vazhdojnë ta rëndojnë gjendjen në Kosovë.

 

Periudha e paskonfliktit është parë si përpjekje për riparimin e dëmeve masive të infrastrukturës dhe për përshpejtimin e tranzicionit ekonomik. Ndërtimtaria, thekson raporti u bë sektori më i fuqishëm ekonomik në periudhën e pasluftës. Bujqësia pati përmirësime, por nuk arriti nivelin e paraluftës. Ndërkaq sa u përket degëve kryesore të industrisë ato kanë mbetur në vendnumërim.

 

Mëtej raportit i Departamentit të Shtetit konstaton se papunësia llogaritet të kapë shifren prej 40-60 për qind. Ndërkaq UNMIK-u me përgjegjësi ka respektuar të drejtat e njeriut për qytetarët e Kosovës, por theksohet se ende kanë mbetur probleme në shumë fusha.

 

Liria e lëvizjes për pakicat kombëtare, shumica serbë, mbetet problem serioz, thekson raporti edhe pse në disa fusha ka pasur përmirësime. Rreth 200 mijë pjesëtarë të pakicave të zhvendosur pas qershorit të vitit 1999 të paktë janë ata që janë kthyer në Kosovë dhe kjo për shkak të mungesës së sigurisë, të mungesës së lirisë së lëvizjes dhe pamundësisë për t'u punësuar.

 

Megjithatë kthimi i të zhvendosurve në vitin e kaluar ka qenë gati dy herë më i madh krahasuar me vitin 2001. Raporti thotë se në vitin e kaluar në Kosovë janë shënuar edhe 68 vrasje krahasuar me 136 në vitin 2001. Nga viktimat 60 ishin shqiptarë, 6 serbë dhe dy me etnitet të panjohur. Shumica e vrasjeve të serbëve të Kosovës kanë qenë të motivuara etnikisht, por edhe shqiptarët kanë qenë viktima të vrasjeve të motivuara etnikisht.

 

Raporti sjell si shembull pjesën veriore të Mitrovicës ku shqiptarët ende kërcënohen me dëbim nga serbët dhe në disa raste ka pasur edhe vrasje. Raporti i Departamentit të Shtetit vlerëson bashkëpunimin e institucioneve të Kosovës me Gjykatën Ndërkombëtare për ish-Jugosllavinë. Në raport nënvizohet edhe fakti se gjatë vitit të kaluar në Kosovë ka pasur raste të vrasjeve me motive politike.

 

Njëherësh ka pasur sulme dhe kërcënime kundër personaliteteve politike shqiptare nga persona të cilët në raport cilësohen si të paidentifikuar. Sipas raportit në fjalë problem serioz në Kosovë mbetet dhuna dhe diskriminimi i gruas. Dhuna kundër gruas është një problem serioz dhe i vazhdueshëm në shoqërinë e Kosovës.

 

Gjatë vitit policia ka regjistruar 131 dhunime, përpjekje për dhunime dhe sulme fizike ndaj femrave. Ky numër është rritur krahasuar me vitin 2001. Kosova vazhdon të shërbejë ende si pikë tranziti dhe destinacioni për trafikimin e qenieve njerëzore, veçanërisht të grave për qëllime prostitucioni, thuhet në raportin e Departamentit të Shatetit mbi gjendjen e të drejtave të njeriut në Kosovë.

 

 

Policia shqiptare ndërmori një operacion të gjerë kundër trafiqeve të paligjshme dhe drogës në Shqipëri

 

Tiranë, 2 prill 2003 - Policia shqiptare ndërmori dje një operacion të gjerë kundër trafiqeve të paligjshme dhe drogës. Forca dhe mjete të shumta ushtruan kontrollin në gjithë Shqipërinë.

 

Tre persona u arrestuan u arrestuan për shfrytëzim prostitucioni në qytetin e Shkodrës dhe Beratit dhe të paktën 19 të tjerë u shoqëruan në komesariatit e Fierit, Tiranës, Vlorës, Durrësit dhe Laçit për kultivim droge dhe kontrabandë mallërash të ndryshme.

 

Si rezultat u janë sekuestruar 41 kilogram hashish dhe janë bllokuar dy punishte pijesh dhe një makaronash. Operacioni i ndërmarrë nga policia u përqëndrua edhe në trafikun e emigrantëve klandestinë.

Gjatë tre muajve të parë të këtij viti policia shqiptare sipas statistikave të saj ka arritur të shkatërrojë 11 organizata kriminale të trafikimit të lëndëve narkotike dhe të sekuestrojë afro pesë kilogram e gjysmë heroinë dhe mbi 2700 kilogram mariuanë.

 

Sipas policisë mbi 70 persona janë arrestuar për këta tre muaj dhe janë kapur 8 të tjerë të shpallur në kërkim për trafikim droge.

 

 

Një komision hetimor do të analizojë lidhjet midis Cërvenkovski dhe një biznesmeni shqiptar

 

Shkup, 2 prill 2003 - Parlamenti i Maqedonisë miratoi kërkesat për formimin e një komisioni hetimor për të analizuar lidhjet e mundshme midis kryeministrit Branko Cërvenkovski dhe një biznesmeni shqiptar Petrit Ame i dyshuar për vepra kriminale, por ndërkohë ai konsiderohet i zhdukur.

 

Komisioni do të marrë në shqyrtim videomaterialin që opozita maqedonase u ka dorëzuar institucioneve të larta shtetërore ku është një intervistë me z. Ame të realizuar nga policia maqedonase gjatë marrjes së tij në pyetje në vitin 1997.

 

Në këtë intervistë z. Ame pohon se ka lidhje të ngushta me z. Cërvenkovski. Komisioni do të përbëhet nga një nënkryetar, dy anëtarë të opozitës dhe tre të partive në pushtet dhe brenda 30 ditësh, duhet t'i raportojë parlamentit për këtë çështje.

 

 

Është ndaluar ish-shefi i Shtatmadhorisë së ushtrisë jugosllave lidhur me vrasjen e Gjingjiqit

 

Beograd, 2 prill 2003 - Policia e Serbisë ka arrestuar ish-shefin e Shtatmadhorisë së ushtrisë jugosllave, gjeneralin Nebojsha Pavkoviq, por edhe funksionarin e lartë të së majtës jugosllave "Jul" Ivan Markoviqin, në kuadër të hetimeve lidhur me vrasjen e kryeminstrit të Serbisë Zoran Gjingjiq.

 

Ivan Markoviq, ishte arrestuar më 29 mars të këtij viti, mirëpo ishte liruar pas zhvillimit të bisedës informative në polici.

 

 

Ministria kroate e Drejtësisë ka marrë një kërkesë nga Maqedonia për ekstradimin e Besnik Fetahut

 

Zagreb, 2 prill 2003 - Ministria kroate e Drejtësisë ka konfirmuar se ka marrë një kërkesë nga Ministria maqedonase e Drejtësisë për ekstradimin e ish-ministrit të ekonomisë Besnik Fetahut. Ai akuzohet se në mënyrë të paligjshme ka shitur ndërmarrjen botuese "Nova Makedonija".

 

Ai u arrestua në Kroaci në kufirin drejt Bosnje e Hercegovinës. Partia Demokratike Shqiptare në Maqedoni ministër i së cilës ishte z. Fetahu thotë se ai është i pafajshëm dhe se ai ka zbatuar vendimet e Qeverisë maqedonase.

Ndihmësministri Zdravko Stojanoviq në Ministrinë kroate të Drejtësisë i tha BBC-së se dje në këtë këtë ministri kanë marrë kërkesën nga Ministria maqedonase e Drejtësisë dhe pritet që procedura gjyqësore në Kroaci të fillojë sot për ekstradimin e ish-ministrit Fetahu.

 

Ai shtoi se gjykata rajonale në Kroaci do të marrë vendimin nëse janë të plotësuara kushtet për ekstradim.

 

 

Departamentit i Shtetit për gjendjen e të drejtave të njeriut në Shqipëri

 

Uashington, 2 prill 2003 - Në kapitullin për Shqipërinë, raporti veçon si një problem serioz që ndikon në sigurimin e brendshëm të vendit paaftësinë e forcave policore, profesionalizmi i të cilave pengohet nga korrupsioni.

 

Ndonëse ka patur përmirësime në disa drejtime, gjendja e të drejtave të njeriut në Shqipëri vazhdon të mbetet e dobët. Policia vazhdon të shkelë të drejtat e personave të ndaluar, të dyshuar apo të arrestuar.

Sistemi gjyqësor vazhdon të jetë i dobët. Një problem serioz për të mbetet korrupsioni dhe trysnia nga pushteti ekzekutiv. Por një nga problemet e tjera serioze për Shqipërinë është trafiku i qënieve njerëzore veçanërisht i femrave dhe fëmijve.

 

Shqipëria vazhdon të shërbejë si një vend origjine dhe tranziti. Në këtë trafik ka patur raste që janë përfshirë edhe vetë forca policore.

Shqipëria, thuhet në raport, ka probleme serioze edhe me shfrytëzimin e shtypit për qëllime politike.

 

 

Gjendja e të drejtave të njeriut në Maqedoni

 

Uashington, 2 prill 2003 - Në Maqedoni, thekson raporti i Departamentit të Shtetit, gjendja e të drejtave të njeriut është e dobët, me përmirësime të vogla në disa fusha.

 

Në shumicën e rasteve të shkeljeve të të drejtave të njeriut, qeveria e ketij vendi ka marrë masa të pamjaftueshme, ose nuk ka marrë masa fare, për të hetuar dhe ndëshkuar policët përgjegjës për shkelje. Në vend ka arrestime dhe ndalime arbitrare.

Në Maqedoni vazhdon dhuna dhe diskriminimi ndaj grave, veçanërisht në rajonet e banuara nga shqiptarët. Trafiku i grave dhe vajzave për prostuticion vazhdon të përbëjë një problem për këtë vend.
Shtypi në Maqedoni nuk është tërësisht i pavarur.

 

Pothuajse gjithë organet e shtypit janë të lidhura me interesa politike të caktuara, thuhet në raportin e Departamentit të Shtetetit për te Drejtat e Njeriut.

 

 

Sonte në mbrëmje ekipi i Shqipërisë do të luajë kundër ekipit të Irlandës

 

Tiranë, 2 prill 2003 - Pas fitores së madhe të së shtunës të Kombëtares Shqiptare kur mundi me rezultat 3:1 Rusinë, sonte atë e pret një duel edhe më i vështirë - me Kombëtarën e Republikës së Irlandës.

Përfaqësuesja e Shipërisë do të jetë më e fortë pasi që asaj i është bashkuar edhe Alban Bushi, i cili mungoi në ndeshjen e së shtunës për shkak të një lëndimi. Ndërkaq Murati e Myrtaj, kanë sanuar plotësisht lëndimin.

Fondi i shpërblimit për këtë takim (në rast se fiton ndeshjen) është edhe më i lartë se në takimin kundër Rusisë, sepse 60 mijë dollarëve të premtuar nga Federata e Futbollit Shqiptar iu kanë shtuar edhe 90 mijë dollarë nga fondi i qeverisë. Pra në rast se kombëtarja e Shqipërisë e fiton këtë takim shpërblimi do të jetë 150 mijë dollarë.

Irlandezët mbërritën të hënën pasdite në Tiranë me një aeroplan special dhe së bashku me futbollistë erdhi edhe një numër i caktuar i tifozëve dhe 90 gazetarë, gjë që tregon për interesimin e madh edhe të irlandezëve për këtë ndeshje.

Kombëtares së Republikës së Irlandës iu ka bashkua edhe Robbie Kean (futbollisti i Totenhemit), i cili kishte munguar në fitoren e ekipit të tij në Gjeorgji për shkak të një fatkeqësie familjare.

Shqipëria që aktualisht mban vendin e tretë në Grupin e 10-të eliminator për Euro 2004, në rast fitoreje me Irlandën mbërrin kuotën e 7 pikëve, duke u bërë një pretendent serioz për kalimin në finalet e Portugalisë.

Takimi fillon në orën 18.30, në stadiumin “Qemajl Stafa” në Tiranë

 

 

Rusia proteston për bombardimin amerikan afër zonës ku ndodhet ambasada ruse

 

Moskë, 2 prill 2003 - Ministria e Jashtme ruse e cilësoi incidentin në afërsi të zonës së banuar afër së cilës ndodhet ambasada ruse, si të rrezikshëm dhe të papranueshëm. Ajo i ka dorëzuar një notë proteste ambasadorit amerikan në Moskë, Aleksandër Vershbou.

Z.Vershbou u paralajmërua që të ndërmarrë masa të menjëhershme për mospërsëritjen e një incidenti të tillë përsëri.

Rusia ka tërhequr tashmë personelin jo të domosdoshëm nga ambasada e cila tashmë drejtohet nga një staf i kufizuar. Nuk ka njoftime për ndonjë viktimë, por ky incident nuk i ndihmon aspak përmirësimit të marrëdhënieve mes Rusisë dhe Shteteve të Bashkuara.

 

 

Trupat izraelite kanë rrethuar sot rreth 2,000 palestinezë në Tulkarm

 

Tulkarm, Bregu Perendimor, 2 prill 2003 - Trupat izraelite kanë rrethuar sot (të merkurën) rreth 2,000 palestinezë në qytetin e okupuar Tulkarm të Bregut Perendimor gjatë një operacioni të ri për arrestimin e militantëve të dyshimtë, kanë bërë të ditur dëshmitarët, njofton Rojter.

 

Ushtarët me tanke dhe automjete të tjera të blinduara, të mbështetura me helikopterët, kanë vënë shtetrrethimin, kanë bastisur shtëpi më shtëpi në kërkim të militantëve dhe pastaj i kanë grumbulluar meshkujt prej moshës 14 deri në 40 vjeç në oborrin e shkollës vendore, të cilët tash i pret ndëshkimi, kanë thënë banorët.

 

 

Që nga 11 shtatori i vitit 2001 janë vrarë 38 pjesëtarë të forcave speciale amerikane

 

Uashington, 2 prill 2003 - Që nga 11 shtatori i vitit 2001 janë vrarë 38 pjesëtarë të forcave speciale amerikane, e 137 janë plagosur në operacionin që është udhëhequr kundër Osama bin Ladenit dhe rrjetit të tij terrorist Al Kaida, veçanërisht në Afgainstan, ka deklaruar sot këshilltari i sekretarit amerikan të Mbrojtjes Marshall Bilingsli.

 

Ai ka thënë se gjithsej janë vrarë 64 ushtarë të forcave të koalicionit.

 

 

Parlamenti i Koresë së Jugut ka miratuar një plan për të dërguar qindra trupa kundër Irakut

 

Seul, 2 prill 2003 – Parlamenti i Koresë së Jugut ka miratuar sot (të merkurën) një plan për të dërguar qindra trupa në mbështetje të luftës së udhëhequr nga amerikanët kundër Irakut, njofton UPI.

 

Mocioni lejon t'i bashkohen luftës në Gjirin Persik edhe një personel mjekësor dhe teknik prej rreth 700 vetash.Votimi ishte 179 ndaj 68 në favor të mocionit.

 

 

Janë gjetur 11 trupa të ushtarëve të vrarë

 

Katar, 2 prill 2003 – Njëmbëdhjetë trupa të ushtarëve të vrarë, disa syresh besohet të jenë amerikanë, janë gjetur dhe janë evkuar së bashku me të burgosuren e luftës, Xhesika Linç, kur ajo u shpëtua nga një operacion i komandove amerikane në një spital të Irakut, ka bërë të ditur sot (të merkurën) zëdhënësi ushtarak.

 

Linç, 19- vjeçare, nëpunëse e logjistikës, është zënë nga Iraku më 23 mars, kur njësiti i saj pas një veprimi të gabueshëm, ka rënë në pritë në qytetin Nasirijah, që gjendet në brigjet e lumit Eufrat. Ajo është kapur së bashku me 12 anëtarët e tjerë të njësitit të saj, 5 nga të cilët ende ndodhen në listën e të zënëve robë të luftës.

 

 

Shpërthime të mëdha janë dëgjuar sot në tërë Bagdadin

 

Bagdad, 2 prill 2003 – Shpëthimet e mëdha kanë prishur sot (të merkurën) në orët e hershme të mëngjesit qetësinë në tërë Bagdadin, njofton Rojter. Shpërthimet kanë ndodhur në qendër të qytetit, kurse tymi i dendur po ngritet lart nga pjesa jugore e Pallatit të Vjetër.

 

Shumë shpërthime goditën Bagdadin brenda 30 minutave pas shpërthimit të parë të mëngjesit. Ushtima e shpërthimeve shqetësuese dhe e të shtënave të herëpashershme kundërajrore mund të dëgjohen që larg.

 

Pallati i Vjetër, selia ceromoniale qeveritare në bregun perendimor të lumit Tigër dhe kompleksi i ndërtesave të Gardës së Republikës, kanë qenë shpesh në shënjestër të sulmeve ajrore gjatë natës.

 

Sulmet e së merkurës kanë pasuar shpërthimet dyditore nga aeroplanët luftarakë të aleatëve dhe shpërthimet nga goditjet me projektile të selisë së olimpike të Irakut, një nga pallatet e Sadam Hyseinit dhe të një klubi të oficerëve të forcave ajrore.

 

 

Sipas ministri irakian të Informacionit janë vrarë 56 njerëz gjatë natës së kaluar

 

Bagdad, 2 prill 2003 - Ministri irakian i Informacionit, Muhamed Said al- Sahaf ka thënë se 56 njerëz janë vrarë dhe 268 të tjerë janë plagosur gjatë bombardimeve të natës së kaluar, përfshirë edhe 24 të vrarë në Bagdad. Ai tha se 9 fëmijë, ndër të cilët edhe një foshnje, janë vrarë dje në qytetin Hillah, rreth 50 mila në jug të kryeqytetit.

 

 

Ushtarët amerikanë kanë përparuar në drejtim të Bagdadit nëpër grykën e Qerbelasë

 

Qerbela, 2 prill 2003 – Ushtarët amerikanë kanë përparuar në drejtim të Bagdadit, duke kaluar sot (të merkurën) nëpër grykën në perendim të Qerbelasë pasi gjatë gjithë natës natës së kaluar kishin bombarduar këtë qytet strategjik dhe pasi ishin ndeshur për herë të parë në luftimet e ashpra tokësore me Gardën Republikane të Sadam Hyseinit, njofton AP.

 

Divizioni i 3-të i këmbësorisë ka bombarduar fuqishëm mbi qytet dhe mbi pozicione në veri të Qerbelasë, ku 2,000 pjesëtarë paramilitarë të Fedajinëve të Sadam Hyseinit dhe të Partisë Baath kanë bërë rezistencë. Të pakten 20 irakianë janë vrarë dhe një numër i papërcaktuar luftëtarësh janë zënë robë. Viktima s’ka pasur.

Qerbelaja është vend i shenjtë musliman, rreth 50 kilometra nga kryeqyteti irakian dhe për të poeti ynë i madh, Naim Frashëri, ka shkruar poemën e njohur epike "Qerbelaja" të cilën e bototi më 1898.

 

 

Kolin Pauell sot viziton Ankaranë dhe Beogradin

 

Ankara, 2 prill 2003 - Sekretari amerikan i Shtetit Kolin Pauell pritet të takohet të mërkurën gjatë ditës në Ankara me udhëheqësit turq, prej të cilëve ai do të kërkojë bashkëpunim për fushatën amerikane nga veriu i Irakut.

Zoti Pauell e ka bërë të qartë se Amerika është e zhgënjyer nga sensi zvarritës dhe më pas refuzimi i Turqisë, për të lejuar trupat amerikane që të nisinin një ofensivëë ndaj Irakut në veri prej kufirit turk.

Misioni i Kolin Pauellit në Ankara është që të sigurojë se Turqia do të ndihmojë dhe jo pengojë fushatën amerikane në veri të Irakut. Nga ana tjetër, ai do të përpiqet të rindërdërtojë urat e bashkëpunimit për një kohë më të gjatë.

Sekretari i Shtetit Pauell do të qëndrojë për një kohë të shkurtër edhe në Beograd për të takuar zyrtarët më të lartë të vendit, siç njoftohet, pas sugjerimeve nga Amabasada amerikane në Beograd.

 

 

K. Pauell: Aty ku lulëzojnë të drejtat dhe liritë e njeriut nuk ka vend për tiranët

 

Uashington, 2 prill 2003 - Sekretari amerikan i Shtetit Kolin Pauell duke shpallur botimin e raportit për mbrojtjen e të drejtave të njeriut bëri një lidhje të drejtëpërdrejt mes të drejtave të njeriut dhe terroristëve. Aty ku lulëzojnë të drejtat e njeriut dhe liritë nuk ka vend për terroristët dhe tiranët, nuk ka vend për kaos dhe konflikte rajonale.

Raporti akuzon veprimin e Sadam Huseinit për shkelje në shkallë të gjerë të të drejtave të njeriut. Raporti akuzon gardën republikane dhe forcat e tjera irakiane të sigurimit për vrasje, tortura, zhdukje personash, për dhunime dhe shkelje të tjera.

 

 

Një robe lufte u shpëtua nga trupat e koalicionit në Irak

 

Uashington, 2 prill 2003 - Komanda Qëndrore e Shteteve të Bashkuara njoftoi se një robe lufte, e cila ndodhej në duart e forcave irakiane, u shpëtua nga trupat e koalicionit në Irak.

 

Gjeneral-brigadieri Vinsent Bruks njoftoi shpëtimin në një takim të rallë me gazetarët në orët e vona të mbrëmjes në Katar. Ai tha se forcat e koalicionit kryen një mision të sukseshëm dhe kthyen një ushtare amerikane në një zonë të kontrolluar nga koalicioni.

Zyrtarët e ushtrisë amerikane e identifikuan ushtaren e shpëtuar si Xhesika Lynç. 19 vjeçarja Lynç, e cila ishte shpallur si e humbur në aksion, u shpëtua në Nasirijah.

 

 

Ramsfeld pyet se ku janë udhëheqësit irakianë?

 

Uashington, 2 prill 2003 - Për të tretën ditë me radhë zyrtari i lartë i Pentagonit i bëri sfidë Sadam Huseinit në se ai ende është në pushtet, duke vënë në dukje këtë herë dështimin e Sadam Huseinit për të dalë personalisht në televizion që të lexonte një deklaratë, e cila u lexua nga ministri i informacionit.

 

Sekretari i mbrojtjes Ramsfeld e cilësoi mungesën në publik të Sadam Huseinit, djemve të tij dhe zyrtarëve të tjerë të lartë si diçka që meriton vëmëndje. "Ku janë udhëheqësit e Irakut?

 

Natën para se të fillonte lufta në tokë, forcat e koalicionit sulmuan një ndërtesë ku po mbahej një takim i zyrtarëve të lartë irakianë të komandës dhe kontrollit. Që prej asaj dite prej tyre nuk kemi dëgjuar. Fakti që Sadam Huseini nuk doli vetë për të lexuar deklaratën në televizion është diçka interesante".

 

 

Valë sulmesh ajrore kundër objekteve në Bagdad

 

Bagdad, 2 prill 2003 - Avionët e koalicionit kryen të paktën tri valë sulmesh ajrore kundër objekteve në Bagdad dhe në zonat përreth si edhe kundër pozicioneve të forcave të Gardës Republikane. Mes objekteve që u goditën ishte Pallati Republikan i udhëheqësit irakian, Sadam Husein.

Ministri irakian i Informimit, Muhamed Said al-Sahaf, tha se bombardimet gjatë 24 orëve të fundit në Bagdad kanë shkaktuar vdekjen e 19 civilëve dhe plagosjen e më shumë se 100 të tjerëve.

 

Ai tha gjithashtu se disa persona u plagosën dje në perëndim të kryeqytetit, kur avionët amerikanë bombarduan dy autobusa irakianë me civilë, të cilët ai i cilësoi si vullnetarë, përfshirë amerikanë, që po vepronin si mburoja njerëzore.

 

 

Beteja për Bagdadin

 

Bagdad, 2 prill 2003 - Njoftimet nga jugu i kryeqytetit irakian tregojnë se formacionet amerikane janë të përfshira në luftime me forcat e Gardës Republikane që mbrojnë qytetin. Luftime të ashpra janë njoftuar edhe rreth qytetit Qerbela, rreth 80 kilometra në jug të Bagdadit.

Korrespondentët thonë se këto luftime janë beteja e parë mes forcave toksore amerikane dhe Gardës Republikane.

Në Gjirin Persik vazhdojnë të mbërrijnë përforcime ushtarake. Njoftimet thonë se mijëra ushtarë të Divizionit të Katërt të Këmbësorisë kanë mbërritur në Kuvajt.

Ata duhet të kishin hyrë në Irak nga veriu, por planet u anulluan për shkak se Turqia nuk pranoi të bashkëpunonte.

Copyright©2000-2003 Trepca.net - Të gjitha të  drejtat e rezervuara.