Lajme

E hëne, 1 prill 2003

Përmbajtja:

• Në një fshat të Sharrit dy fëmijë vdesin nga pasojat e zjarrit

• Të enjtën para deputetëve edhe çështja e fillimit të zbatimit të Ligjit për Arsimin e Lartë të Kosovës

• Gjilan: Kryetari i komunës - tatimpagues i parë

• Dega e LDK-së në Mitrovicë mbështet organet komunale dhe kërkon angazhim më të madh në realizimin e projekteve zhvillimore

• Përfaqësues të KKSHA-s nga senatori Liberman morën mbështjetjen për një sërë çështjesh shqiptare

• KFOR-i është i gatshëm të përballet me çfarëdo rreziku që i kërcënohet sigurisë së Kosovës

• Në Prizren sivjet mbahet Festivalin e Pestë i Foklorit

• Pas largimit të KFOR-it amerikan nga fshati Muçibabë xhandarmeria serbe po i keqtrajton banorët shqiptarë të kësaj ane

• Ivanoviq thotë se tensionet do të shtohen nëse UNMIK-u do të bartë përgjegjësitë te institucionet e Kosovës

• Nuk ekzistojnë kurrfarë problemesh në këmbimin tregtar ndërmjet Maqedonisë dhe Kosovës, thonë në doganat maqedonase

• Në një fshat afër Bujanocit policia serbe ka zbuluar shumë armë e pajisje ushtarake

• Forcat evropiane të mbrojtjes e filluan misionin e parë paqësor në Maqedoni

• Parlamenti shqiptar vendosi që Nano të përgjigjet para deputetëve lidhur me kritikat nga BE

• Legija ka qëndruar edhe në Shqipëri

• Krimineli Legija kërkon mbrojtjen e Tribunalit të Hagës

• Amerikanët thonë se i është shkaktuar dëm i madh Gardës Republikane irakiane

• Rrëshqitja e baltës ka mbuluar mbi 400 shtëpi, mund të jenë zhdukur rreth 700 njerëz në Bolivi

• Pauell takohet të enjten me ministrat e jashtëm të NATO-s dhe të BE-së në Bruksel

• Një marins amerikan ka vrarë sot një irakian të paarmatosur në një pikë ushtarake kontrolli

• Një burrë i armatosur me dy granata dore ka rrëmbyëer një aeroplan kuban me 46 udhëtarë

• Shpërthime të njëpasnjëshme masive në pjesën qëndrore të Bagdadit

• Bush: Çdo ditë forcat e koalicionit i afrohen Bagdadit dhe fitores

• Vriten gra dhe fëmijë irakianë

Në një fshat të Sharrit dy fëmijë vdesin nga pasojat e zjarrit

 

Sharr, 1 prill 2003 - Gjatë natës së mbrëmshme në fshatin Brezne të Sharrit (ish-Dragashi) nga pasojat e zjarrit kanë vdekur dy fëmijë, të moshës 12 e 13 vjeçare.

 

Zjarrfikësit pasi kanë arritur për të shuar zjarrin, kanë nxjerrë dy fëmijët dhe pastaj i kanë dërguar në Ambulancën e Sharrit, ku mjekët kanë mundur të konstatojnë vetëm vdekjen e tyre. Hollësi të tjera nuk njoftohen përveç se policia po i zhvillon hetimet.

 

 

Të enjtën para deputetëve edhe çështja e fillimit të zbatimit të Ligjit për Arsimin e Lartë të Kosovës

 

Prishtinë, 1 prill 2003 - Kryesia e Kuvendit të Kosovës, në mbledhjen e saj të rregullt, të drejtuar nga kryetari Nexhat Daci, ka përcaktuar rendin e punës për seancën pralamentare të 3 prillit dhe ka përvijuar edhe atë të seancës së 10 prillit.

Në këtë të enjte deputetët e Kuvendit të Kosovës do të debatojnë për ekspozenë e Kryeministrit dhe për punën njëvjeçare të Qeverisë së Kosovës. Do të shqyrtohet për herë të dytë Projektligji për Bibliotekat, do të shtrohet për miratim iniciativa për shpalljen e Bjeshkëve të Nemuna – Park Nacional, si dhe propozimi i grupeve parlamentare për emërimin e anëtarëve të Komisionit për media.

Me qëllim të mbarëvajtjes së arsimit të lartë në Kosovë dhe sipas kërkesës së Komisionit parlamentar për arsim, shkencë dhe teknologji, do të nxirret para deputetëve edhe çështja e fillimit të zbatimit të Ligjit për Arsimin e Lartë të Kosovës, i miratuar nga Kuvendi i Kosovës, por ende i pa shpallur nga PSSP të OKB-së për Kosovë.

Për shkak se nuk është siguruar pjesëmarrja e kompetentëve ndërkombëtarë për gjyqësinë e Kosovës, është shtyrë për seancën e 10 prillit shqyrtimi i raportit për gjendjen e gjyqësisë në Kosovë.

 

Atë ditë do të shqyrtohen edhe dy projektligje: ai për lëndën arkivore dhe arkivat dhe ai për kooperativat bujqësore.

 

 

Gjilan: Kryetari i komunës - tatimpagues i parë

 

Gjilan, 1 prill 2003 - Komuna e Gjilanit ka filluar zyrtarisht shpërndarjen e faturave të tatimit në pronë, ndërsa tatimpagues i parë është kryetari Lutfi Haziri, i cili e pranoi sot solemnisht faturën prej 40 euro, ndërsa faturat e zëvendëskryetarit, Xhemajl Hyseni dhe të kryeshefit, Enver Muja, peshonin 164 euro, përkatësisht 24 euro.

Duke e dhënë kështu shembullin personal të kryerjes së një obligimi kaq të rëndësishëm për Gjilanin, udhëheqja komunale shpreson se edhe qytetarët do t`i përgjigjen këtij obligim, i cili iu garanton atyre zhvillim dhe jetë më të mirë.

"Ky është një hap i madh për një jetë më të mirë në të ardhmen", tha Lutfi Haziri, duke e marrë faturën e parë nga drejtori i buxhetit dhe financave, Zijadin Maliqi.

Zyrtari i lartë në Ministrinë e Financave, Nijazi Selmanaj tha se tatimi është investim kolektiv për jetë më të mirë dhe u shpreh optimist se qytetarët e Kosovës do ta përbumushin këtë detyrim.

 

 

Dega e LDK-së në Mitrovicë mbështet organet komunale dhe kërkon angazhim më të madh në realizimin e projekteve zhvillimore

 

Mitrovicë, 1 prill 2003 - Në mbledhje të Kryesisë së Deges të LDK-së në Mitrovicë, ku morën pjesë Alush Gashi dhe Hajzer Krasniqi, anëtarë të Kryesisë qendrore, u diskutua për situatën aktuale politike dhe aktivitetet e këaj dege.

 

Fillimisht Ramadan Kelmendi, kryetar i Degës, foli lidhur me aktivitetin e kësaj Dege, me theks të veçantë për interesimin dhe angazhimin e fuqishëm të anëtarësisë së LDK-së për fuqizimimin e mëtejshëm të institucioneve komunale në shërbim të qytetarëve të kësaj komune.

 

Ai me këtë rast veçoi frymën konstruktive që e përshkon bashkëpunimin ndërmjet Kryesisë së Degës së LDK-së dhe organeve komunale, duke theksuar nevojën për prani dhe angazhim më të madh të organeve qendrore të Kosovës lidhur me aktivizimin e prodhimit të Trepçës dhe lirisë së lëvizjes për të gjithë qytetarët në tërë territorin e komunës.

Lidhur me punën e organeve komunale foli Kryetari i Komunës, Faruk Spahija dhe diskutues të tjerë, të cilët theksuan domosdonë për investime në këtë komunë, e në veçanti aktivizimin e prodhimit në minierat e Trepçës.

Z. Gashi dhe Krasniqi në diskutimet e tyre mbështetën aktivitetin e kësaj Dege dhe kërkuan vazhdimin e mbështetjes për institucionet komunale dhe qendrore, si dhe angazhim më të theksuar në realizimin e programeve zhvillimore për këtë komunë.

 

 

Përfaqësues të KKSHA-s nga senatori Liberman morën mbështjetjen për një sërë çështjesh shqiptare

 

Uashington, 1 prill 2003 - Udhëheqës të komunitetit shqiptaro-amerikan dhe përfaqësues të Këshillit Kombëtar Shqiptaro-Amerikan (KKSHA) në një takim që patën me senatorin amerikan Xhozef Liberman morën mbështjetjen e tij për një sërë çështjesh shqiptare, sidomos pavarësinë e Kosovës dhe anëtarësimin e Shqipërisë në NATO dhe strukturat euro-atlantike. Senatori Lieberman, një përkrahës i flaktë i ndërhyrjes së SHBA-ve në Kosovë, është njëri prej kandidatëve të Partisë Demokratike për zgjedhjet presidenciale të vitit 2004.

Duke shprehur përkrahje për "shpresat dhe aspiratat e popullit shqiptar", senatori Liberman nënvizoi rëndësinë e vazhdimit të përfshirjes së SHBA-ve në Ballkan, sidomos në Kosovë. Ai shprehu mirënjohje për mbështjetjen e madhe që shqiptarët kanë dëshmuar ndaj përpjekjes së kryesuar nga Amerika për rrëzimin e regjimit të Sadam Huseinit.

Kryetari i KKSHA-së Riçard S. Lukaj theksoi se populli shqiptar në Shqipëri, Kosovë e kudo në botë do të mbetet gjithnjë një aleat besnik e i patundur i SHBA-ve. Lukaj po ashtu nënvizoi rëndësinë e territorive shqiptare ndërkohë që SHBA-të kanë nisur të shqyrtojnë hapjen e bazave të tjera afatgjata për operacionet e tyre ushtarake, që aktualisht ndodhen në Gjermani dhe Lindjen e Mesme. Lukaj i rikujtoi senatorit se shqiptarët i kanë bërë një ftesë të hapur SHBA-ve për të konsideruar veprime ushtarake më afatgjata në Kosovë dhe Shqipëri.

Kryetari i KKSHA-së njëkohësisht kërkoi mbështjetjen e Libermanit edhe për investime konkrete në rajon nga SHBA-të dhe Izrali, për të ndihmuar me zhvillimin e aftësive të intelegjencës ushtarake të forcave shqiptrare të sigurimit si dhe Trupave Mbrojtëse të Kosovës.

Senatori Liberman shprehu mirënjohje për përkrahjen që votuesit shqiptaro-amerikanë i dhanë në të kaluarën kur ai ishte kandidat për zevendespresident në fushatën elektorale të Al Gorit. Ai shtoi se priste një përkrahje të ngjashme nga shqiptarët në fushatën e ardhshme elektorale. Nëse ai shpallet fitues në garën presidenciale të vitit 2004, senatori nga shteti i Konektikat-it do të jetë presidenti i parë me origjinë çifute në historinë e SHBA-ve.

Hebrenjtë dhe shqiptarët "kanë kaluar kaq shumë sfida të vështira së bashku dhe historitë e tyre janë aq të përbashkëta saqë unë ndiehem tepër i lidhur me popullin shqiptar, ëndrrat dhe aspiratat e tyre", tha Liberman. Ai shtoi se edhe pse të ndeshur me pengesa të mëdha gjatë historisë së tyre të lashtë, si shqiptarët ashtu dhe hebrenjtë gjithnjë kanë ditur të mbijetojnë dhe triumfojnë.

Drejtori ekzekutiv i KKSHA-së, Martin Vulaj, paraqiti çështjen e Kosovës, duke argumentuar se ajo përbën një sukses të madh në politikën e jashtme amerikane. Ai njëkohësisht vuri në dukje se vetëm një Kosovë e pavarur do të bëjë të mundur që progresi i arritur atje të shfrytëzohet siç duhet dhe që Kosova t’i kapërcejë të gjitha sfidat me sukses e të bëhet faktor stabiliteti në rajon. "Pavarësia e Kosovës është rruga më e sigurt drejtë një Ballkani në paqe, stabilitet politik dhe prosperitet ekonomik", tha Vulaj.

Z.Lukaj bëri të ditur qëllimin e KKSHA-së për krijimin e Fondit Kosovar të Ndërmarrjes me një vlerë prej 100 milionë dollarësh amerikanë dhe kërkoi mëbshtetjen e senatorit, duke kërkuar kështu që të përsëritet suksesi i madh i Fondit Shqiptar të Ndërmarrjes.

 

 

KFOR-i është i gatshëm të përballet me çfarëdo rreziku që i kërcënohet sigurisë së Kosovës

 

Prishtinë, 1 prill 2003 - Një zëdhënës i KFOR-it ka deklaruar se KFOR-i është i gatshëm të përballet me çfarëdo rreziku që i kërcënohet sigurisë së Kosovës. Ai ka theksuar se nuk dëshiron të komentojë deklaratat e politikanëve të vendeve të tjera, por është këtu për sigurinë e Kosovës.

 

KFOR-i është në Koosvë sipas mandatit të Rezolutës 1244 për të ruajtur sigurinë në Kosovë dhe ka forca të mjaftueshme për të'u përballur jo me kërcënimet por për çfarëdo rreziku për sigurinë e Kosovës, tha zëdhënësi.

 

 

Në Prizren sivjet mbahet Festivalin e Pestë i Foklorit

 

Prishitnë, 1 prill 2003 - Në një takim me mediat u bënë të ditura kriteret për pjesëmarrje në Festivalin e Pestë të Foklorit që do të mbahet në Prizren më 10, 11 e 12 qershor.

 

Organizatorët e këtij festivali, Departamenti për Kulturë dhe Manifestime Publike dhe Forumi i Rinisë së LDK-së, thanë se në këtë manifestim mund të marrin pjesë të gjitha SHKA-të, në programin e të cilave ka forma të ndryshme të foklroit burimor muzikor, të valleve tradicionale burimore, të lojërave zbavitëse dhe forma të tjera të fushës etnomuzikore, por edhe forma të tjera të foklorit të përpunuar dhe koreografi të reja origjinale.

 

 

Pas largimit të KFOR-it amerikan nga fshati Muçibabë xhandarmeria serbe po i keqtrajton banorët shqiptarë të kësaj ane

 

Gjilan, 1 prill 2003 - Pas largimit të patrullave të KFOR-it amerikan nga fshati Muçibabë në vijën kufitare Kosovë - Serbi xhandarmëria serbe çdo natë hyn në brendësi të këtij fshati, duke keqtrajtuar banorët e kësaj ane. "Ne nuk e dimë se çfarë duhet bërë dhe askush nuk interesohet për ne", thotë Fadil Fazliu banor i fshatit Muçibabë dhe shton se situatë në këtë fshat është shumë e rëndë.

Ndërkaq, kryetri i fshatit, Vahid Ibrahimi rrëfen për rastin ku popullata ishte alarmuar dhe përgatiteshin për largim nga fshati, ngase ishin dëgjuar të shtëna armësh të shpeshta nga ana serbe dhe banorët nga frika kanë tentuar të tërhiqen nga Muçibaba dhe të shkojnë në vende më të sigurta.

Banorët e këtij fshati kërcënohen me largim masiv nga këtu dhe nëse kjo ndodhë atëherë kufiri me Serbinë do të jetë në dalje të Gjilanit, sepse në midisin e Parteshit të Serbisë, gjendet vetëm fshati Muçibabë.

 

 

Ivanoviq thotë se tensionet do të shtohen nëse UNMIK-u do të bartë përgjegjësitë te institucionet e Kosovës

 

Prishtinë, 1 prill 2003 - Anëtari serb i Kryesisë së Parlamentit të Kosovës, Oliver Ivanoviq ka thënë se tensionet në Kosovë do të shtohen nëse administrata ndërkombëtare do të vazhdojë me politikën e kalimit të përgjegjësive tek institucionet e Kosovës.

 

Kjo, sipas tij, do të shkaktojë edhe bojkotimin e institucioneve të këtushme nga ana e serbëve të Kosovës dhe themelimin e institucioneve paralele serbe dhe në këtë mënyrë Kosova sipas Ivanoviqit do të jetë e ndarë në dy etnicitete: atë shqiptare dhe serbe.

 

Ai ka thënë se nëse vazhdohet me një qasje të tillë në këto zhvillime atëherë mund të pasojnë edhe konflikte të reja mes shqiptarëve dhe serbëve.

Zëdhënësi i administratës së UNMIK-ut, Sunil Narula ka thënë se shefi i tij Shtajner po punon vetëm atë që i ka dhënë mandat KS i OKB-së.

 

 

Nuk ekzistojnë kurrfarë problemesh në këmbimin tregtar ndërmjet Maqedonisë dhe Kosovës, thonë në doganat maqedonase

 

Shkup, 1 prill 2003 - Drejtoria e doganave e Maqedonisë ka bërë të ditur se me shërbimin doganor të UNMIK-ut i kanë kryer të gjitha përgatitjet e domosdoshme teknike rreth formaliteteve për dhënien dhe pranimin e vërtetimeve për qarkullim të mallrave EUR.1, me të cilat realizohet e drejta e shfrytëzimit e preferencialeve në këmbimin tregtar.

 

Drejtoria maqedonase e doganave i ka njoftuar përgjegjësit doganorë dhe u ka dorëzuar instruksione me të cilat është paraparë procedura për pranimin e vërtetimeve për qarkullim të EUR. 1.

"Për momentin, nga ana e UNMIK-ut, këto vërtetime jipen në gjuhën angleze dhe nuk ekzistojnë kurrfarë problemesh në këmbimin tregtar ndërmjet Maqedonisë dhe Kosovës", thonë në Drejtorinë e doganave të Maqedonisë.

Por ditë më parë Komisioni Evropian në një raport të tij kishte kritikuar doganat e Maqedonisë për politikë diskriminuese ndaj mallrave që vijnë nga Kosova.

 

 

Në një fshat afër Bujanocit policia serbe ka zbuluar shumë armë e pajisje ushtarake

 

Bujanoc, 1 prill 2003 - Policia serbe ka njoftuar se afër fshatit Tërnoc i Vogël të Bujanocit, në luginën e Preshevës, ka zbuluar një sasi të amdhe të armëve dhe pajisjeve ushtarake.

 

Bëhet fjalë për dy topa, gjashtë mortaja të kalibrit 81 mm, tre mitrolozë, 10 pushkomitrolozë dhe disa pushkë gjusmautomatike dhe autotomatike.

 

Policia serbe thotë se këto armë i kanë fshehur ish-pjesëtarët e UÇPMB-së në zonën e dikurshme të sigurisë mes Kosovës e Serbisë.

 

 

Forcat evropiane të mbrojtjes e filluan misionin e parë paqësor në Maqedoni

 

Shkup, 1 prill 2003 - Forcat për ndërhyrje të shpejtë të Bashkimit Evropian me 350 paqeruajtëse, e filluan dje misionin e tyre të parë paqësor në Maqedoni me emrin e koduar "Konkordia", i cili për gjashtë muaj do të jetë nën komandën e një gjenerali francez. Ky mision do të zëvendësojë forcat e NATO-s që kanë shërbyer në Maqedoni gjatë dy viteve të fundit.

Presidenti maqedonas Boris Trajkovski ka theksuar në këtë ceremoni rasti se kjo është një ditë historike jo vetëm për Bashkimin Evropian, por edhe për Maqedoninë.

Ndërkaq, sekretari i përgjithshëm i NATO-s, Xhorxh Robertson tha se duke marrë këtë mision BE tregon se projektet e tij për një politikë evropiane të mbrojtjes dhe sigurisë i ka ardhur koha.

Ndërkaq, shefi i diplomacisë së BE-së Havier Solana tha se ky nuk është mision i parë në të cilin marrin pjesë forcat evropiane dhe shtoi se kjo është një ditë shumë e mirë edhe për NATO-n edhe për Bashkimin Evropian, duke shtuar se të gjithë operacionet që nga viti 2001 janë udhëhequr nga gjeneralët e vendeve evropiane.

 

 

Parlamenti shqiptar vendosi që Nano të përgjigjet para deputetëve lidhur me kritikat nga BE

 

Tiranë, 1 prill 2003 - Parlamenti shqiptar ka vendosur mbrëmë që kryeministri i Shqipërisë Fatos Nano duhet të vijë përpara deputetëve më 14 prill për t'u përgjigjur në një mocion debati lidhur me kritikat që raporti i Bashkimit Evropian drejtuar autoriteve shqiptare.

 

Mocioni për debat u kërkua nga deputetët e opozitës pasi sipas tyre verifikimi i hapave që ka ndërmarrë Shqipëria nga shtetet e Komisonit Evropian dhe të Bashkimit Evropian janë tronditëse dhe shqetësuese, pasi sipas tyre Shqipëria ende nuk po punon me ritme të duhura për të përmbushur kushtet për integrimin në Evropë.

 

 

Legija ka qëndruar edhe në Shqipëri

 

Beograd, 1 prill 2003 - Një nga krerët e klanit kriminal të Zemunit Milorad Lukoviq - Legija (Legjionari), ka pasur pasaportë dilpomatike dhe një pasaportë falso kroate, kanë njoftuar mbrëmë mediat elektronike serbe. Lukoviq statusin e diplomatit e ka marrë duke vrarë ose duke keqtrajtuar kundërshtarët politikë të regjimit të Millosheviqit.

Me këtë pasaportë, sipas mediave elektronike serbe, Lukoviq kishte udhëtuar në shumë vende, si në Maqedoni, Shqipëri, Spanjë etj. për trafikim me narkotikë dhe për punë të tjera kriminale.

 

 

Krimineli Legija kërkon mbrojtjen e Tribunalit të Hagës

 

Beograd/Hagë, 1 prill 2003 - Një nga të akuzuarit për vrasjen e kryeministrit serb Gjingjiq, Milorad Lukoviq - Legija, nëpërmjet një ndërmjetësuesi është interesuar për mundësitë që Gjykata e Hagës t'ia bëjë të mundur ta ndryshojë identitetin dhe vendqëndrimin, si shkëmbim për informacionet për ish-udhëheqësin e serbëve të Bosnjës Radovan Karaxhiqin dhe gjeneralin Ratko Mladiq, kanë bërë të ditur burimet diplomatike për një agjenci serbe të lajmeve.

 

Zëdhënësja e Prokurorisë së Hagës, Florans Hartman, e pyetur për këtë lajm, ka thënë: "Këtë nuk mund ta komentoj. Kjo është temë tejet e ndieshme".

 

 

Amerikanët thonë se i është shkaktuar dëm i madh Gardës Republikane irakiane

 

Bagdad, 1 prill 2003 - Komandantët amerikanë thonë se një dëm i madh i është shkaktuar njësive të Gardës Republikane irakiane, në jug të Bagdadit nga bombardimi i rëndë ajror dhe me artileri gjatë ditëve të fundit.

Vlerësimi i tyre, pason luftime të ashpra ditën e henë mes trupave amerikane dhe forcave irakiane në Naxhaf, dhe vende të tjera përgjatë lumit Eufrat, të cilat shkojnë deri në Hindija rreth 80 km nga Bagdadi.

Amerikanët thonë se njoftimet e zbulimit trëgojnë se divizione të Gardës Republikane në jug të Bagdadit janë përforcuar me trupa të ardhur nga Iraku verior.

Korrespondenti i BBC-së për çështjet e mbrojtjes, thotë se kjo mund të dëshmojë shkallën e dëmit të shkatuar Gardës Republikane.

 

 

Rrëshqitja e baltës ka mbuluar mbi 400 shtëpi, mund të jenë zhdukur rreth 700 njerëz në Bolivi

 

La Paz, 1 prill 2003 – Rrëshqitja e madhe e baltës ka mbuluar më shumë se 400 shtëpi në qytetin e largët minerar Çima në Bolivinë Veriore, ku mund të jenë zhdukur edhe rreth 700 njerëz, kanë bërë të ditur burimet vendore, njofton AFP. Shmë të lënduar janë dërguar në spitalin e qytetit të afërm Tipuani, por është e pamundshme të jipet një vlerësim fillestar, ngase numri i viktimave të rrëshqitjes së baltës po ndryshon nga çasti në çast, ka thënë udhëheqësi i minierave të rajonit.

 

 

Pauell takohet të enjten me ministrat e jashtëm të NATO-s dhe të BE-së në Bruksel

 

Bruksel, 1 prill 2003 – Sekretari i Shtetit, Kolin Pauell, do të takohet të enjten me ministrat e jashtëm të NATO-s dhe të Bashkimit Evropian në Bruksel për të diskutuar luftën në Irak, ka deklaruar sot (të martën) Komisioni Evropian, njofton Rojter.

 

"(Pauell) do të takohet në selinë e NATO-s me treshin e BE-së, ministrin grek të jashtëm, Jorgos Papandreu, komisionerin për Marrëdhënie të Jashtme, Kris Paten dhe Përfaqësuesin e lartë, Havier Solana", ka thënë zëdhënësi kryesor i Komisionit, Reixho Kempinen.

 

"Ai gjithashtu do të ketë një takim me Këshillin e NATO-s dhe një drekë të përbashkët me ministrat e BE-së dhe NATO-s", ka shtuar ai. Kempinen ka thënë se ende nuk dihet se sa ministra të BE-së do të jenë të pranishëm. Diskutimi do të përqendrohet në luftën e Irakut dhe pas saj.

 

 

Një marins amerikan ka vrarë sot një irakian të paarmatosur në një pikë ushtarake kontrolli

 

Shatra, Irak, 1 prill 2003 – Një marins amerikan ka vrarë sot (të martën) një irakian të paarmatosur në një pikë ushtarake kontrolli në jug të Irakut, njofton Rojter. Incidenti ka ndodhur në Shatra, 20 mile nga Nasirija, vetëm disa orë pasi në një incident të ngjashëm janë vrarë shtatë gra dhe një fëmijë.

 

"Mendova se ishte autovetëvrasës me bombë", ka thënë ushtari që ka shtënë në automjet. Kamioni nuk ishte i ngarkuar dhe në të s'kishte njëri tjetër pos shoferit të vrarë, i cili nuik ishte i uniformuar dhe as i armatosur, ka thënë marinsi.

 

 

Një burrë i armatosur me dy granata dore ka rrëmbyëer një aeroplan kuban me 46 udhëtarë

 

Havana, 1 prill 2003 – Një burrë i armatosur me dy granata dore ka rrëmbyëer një aeroplan kuban me 46 udhëtarë dhe ekuipazhin e aeroplanit, njofton Rojter. Rrëmbyesi është përpjekur të vejë në SHBA. Ai ka rrëmbyer aeroplanin e tipit sovjetik "Antonov 24" nga bregdeti kuban dhe e ka urdhëruar pilotin të fluturrojë në SHBA.

 

Autoritetet kubane kanë zhvilluar bisedime me të sot heret në mengjes (të martën), por ende nuk është arritur kurrëfarë marrëveshjeje. Aeroplani me udhëtarë e ekuipazh po qëndron në aeroportin e Havanës me drita të fikura, ku ka pasur të marrë edhe karburante.

 

 

Shpërthime të njëpasnjëshme masive në pjesën qëndrore të Bagdadit

 

Bagdad, 1 prill 2003 - Shpërthime të njëpasnjëshme masive goditën pjesën qëndrore të Bagdadit, ndërkohë që trupat amerikane ndërmorën sulme kundër pjesës jugore të kryeqytetit.

 

Shtëllunga të mëdha tymi u ngritën mbi zonën përreth kompleksit presidencial që përdoret nga udhëheqësi irakian Sadam Husein. Sulmet e forcave të koalicionit vunë gjithashtu në shënjestër ministrinë irakiane të informacionit dhe njësi të Gardës Republikane përreth Bagdadit.

 

Trupat amerikane ndodhen në qytetin Hindijah, 80 kilometra në jug të Bagdadit. Presidenti Bush tha se çdo ditë forcat e koalicionit po i afrohen më shumë Bagdadit dhe fitores.

 

Në përleshjet që u zhvilluan në Hindijah dhe gjetkë, u njoftua se më shumë se 100 luftëtarë irakianë u vranë dhe dhjetra irakianë, që thanë se ishin anëtarë të Gardës Republikane, u kapën. Zyrtarë të koalicionit thanë se të paktën 1 ushtar amerikan humbi jetën.

 

 

Bush: Çdo ditë forcat e koalicionit i afrohen Bagdadit dhe fitores

 

Uashington, 1 prill 2003 - Presidenti Bush tha se forcat e koalicionit të udhëhequr nga Shtetet e Bashkuara përparojnë drejt Bagdadit, në të ardhmen na presin shumë rreziqe, duke përfshirë edhe mundësinë e sulmeve terroriste. Gjatë një vizite në portin e Filadelfias, presidenti bëri përsëri një lidhje midis udhëheqjes irakiane dhe terrorizmit ndërkombëtar.

 

Presidenti Bush vazhdon të jetë i bindur, megjithëse paksa i përmbajtur, kur flet për luftën. Ai tha se çdo ditë forcat e koalicionit i afrohen Bagdadit dhe fitores. “Dhe kur fitorja të vijë, ajo do të ndahet me popullin e shumë vuajtur të Irakut, i cili meriton liri dhe dinjitet”.

 

Presidenti Bush tha se janë korrur suksese në fushë betejat e Irakut, ku pjesa më e madhe e Irakut perëndimor dhe atij jugor është nën kontrollin e forcave të koalicionit.

 

 

Vriten gra dhe fëmijë irakianë

 

Bagdad, 1 prill 2003 - Trupat amerikane kanë vrarë shtatë gra dhe fëmijë dhe kanë plagosur dy persona të tjerë pasi makina, me të cilën po udhëtonin, nuk u ndalua në një pikë kontrolli në afërsi të qytetit Naxhaf.

 

Një zëdhënës ushtarak i SHBA-ve, në Komandën Qendrore në Katar, tha se ushtarët amerikanë shtinë fillimisht në ajër në shenjë paralajmërimi por makina i injoroi të shtënat.

 

Zëdhënësi tha se, si zgjidhje e fundit, trupat shtinë në makinën e udhëtarëve. Kur hapën dyert e makinës, gjetën trembëdhjetë gra dhe fëmijë brenda, shtatë nga të cilët të vrarë dhe dy të plagosur. Një hetim po zhvillohet.

Copyright©2000-2003 Trepca.net - Të gjitha të  drejtat e rezervuara.