Lajme

E hëne, 31 mars 2003

Përmbajtja:

• Kryeparlamentari Daci priti ministrin e arsimit, Osmani dhe rektorin, Kelmendi

• B.Rexhepi: "Koha optimale kur duhet të fillojë definimi i statusit është viti 2004"

• U përurua objekti i rindërtuar i konviktit dhe ngrohtorja në Qendrën e Studentëve

• Fatmir Mehmeti është paraburgosur nën dyshimin se me veprimet e tij paraqet rrezik për paqen dhe sigurinë në rajon

• U arrestuan tre persona me dyshimin se kanë alarmuar rrejshëm se do të sulmohet stacioni i policisë në Gjilan

• Ndërkombëtarët dhe vendorët nuk i shqetëson kërcënimi i Çoviqit se shpallja e pavarësisë së Kosovës shkakton një luftë të re

• "Këshilli nacional serb" në veri të Mitrovicës paralajmëron protesta shtatëditëshe kundër z. Shtajner

• UNMIK-u dhe autoritetet e Kosovës thonë se organizimi i zgjedhjeve nga serbët në veri të Mitrovicës është i paligjshëm

• Fleçër thotë se krimi në Kosovë në tre muajt e fundit ka rënë dukshëm - ka pasur vetëm 18 vrasje

• Shkupi e Tirana në rrugën drejt integrimeve evroatlantike

• Mirjana Markoviq hedh poshtë akuzat për përzierje në vrasjen e Stamboliqit

• Ferhat Dinosha - kryetar i ri i Unionit Demokratik të Shqiptarëve

• Në Maqedoni fillon misioni paqësor i forcave evropiane të mbrotjes "Konkordia"

• Në Shkup u takuan ministrat e mbrojtjes së Shqipërisë, Maqedonisë, Kroacisë dhe Serbisë e Malit të Zi

• Sot në poligonin ushtarak të Krivollakut mbahen stërvitjet e përbashkëta të ushtrisë shqiptaro-maqedonase

• Policia serbe dha urdhërarresti ndërkombëtar kundër Mira Markoviqit për kthimin e saj nga Rusia në Serbi

• Persona të panjohur kanë hedhur një bombë në Tetovë

• Një i vrarë dhe dhjetë të lënduar në një incident në kishën shqiptare në Miçigan të SHBA-ve

• Qyteti Nasaria - objektiv i forcave amerikane

• Trupat amerikane zhvillojnë luftime me irakianët anës lumit Eufrat afër Babilonit

• T.Aziz: "Në luftën kundër armikut të gjitha mjetet janë të justifikuara të përdoren"

• Mubarak: Lufta kundër Irakut do të prodhojë “100 bin Ladena të rinj”

• Forcat amerikane kanë goditur me projektile kryqëzore Ministrinë e informacionit në Bagdad

• Bombë ndaj amabasadës amerikane në Qipro

• Komandantët amerikanë kanë njoftuar sot për betejën e parë serioze me elitën Gardës republikane irakiane

• Pauell ua ka tërhequr vërejtjen Sirisë e Iranit të ndërprejnë mbështetjen e regjimit të Sadam Hyseinit

• Forcat amerikane kanë vrarë sot rreth 100 forca irakiane

• Forcat amerikane hynë sot në qytetin Hindia

• Vazhdojnë pa reshtur bombardimet në Bagdad

• Iraku thotë se ka rrëzuar një helikopter amerikan dhe kanë vrarë 2 pilotë

• Majërs thotë se luftimet më të vështira në Irak ende nuk kanë filluar

• Forcat speciale amerikane dhe britanike në veprim

• Vihet në dyshim fati i udhëheqjes së Irakut

• Vazhdojnë sulmet amerikano-britanike në Irak

• Ekspertë amerikanë kritikojnë strategjinë e luftës në Irak

• Në botë vazhdojnë protestat kundër luftës në Irak

• Organizatat humanitare kërkojnë mundësi për të ndihmuar në Irak

• Në Rripin e Gazës vriten dy palestinezë

• Në një thëngjillminierë të Kinës humbën jetën 16 minatorë

• Në Hongong vazhdon përhapja e epidemisë së mushkërive "SARS"

Kryeparlamentari Daci priti ministrin e arsimit, Osmani dhe rektorin, Kelmendi

 

Prishtinë, 31 mars 2003 - Kryetari i Kuvendit të Kosovës Nexhat Daci priti ministrin e Arsimit Rexhep Osmanin dhe rektorin e UP Zenel Kelmendin. Gjendja e rëndë në arsimin e Kosovës, me theks të veçantë në Universitetin e Prishtinës, tratativat për ta përballuar këtë gjendje, domosdoja e zbatimit të Ligjit për Arsimin e Lartë dhe pagat e mjera për mësimdhënësit ishin temë e këtij takimi.

Në një njoftim nga ky takim thuhet se profesor Daci u pajtua se kushtet e punës në Universitet nuk janë të mira, kurse pagat e mësimdhënësve madje të mjera dhe nën çdo dinjitet njerëzor. Ai theksoi se nuk duhet lejuar pozitën e lypësit për Universitetin dhe shtoi se pagat mund të shtohen dhe kushtet e punës mund të përmirësohen.

 

Universitetin e Prishtinës, Daci e vlerësoi si njerën ndër të arriturat më të mëdha të popullit të Kosovës dhe e mbështeti edhe autonominë e Universitetit. Kryeparlamentari i Kosovës këmbënguli për domsodonë e bashkëpunimit më të mirë të Ministrisë së Arsimit dhe Universitetit të Prishtinës dhe të të dyjave me institucionet tjera të Kosovës.

Bashkëbiseduesit u pajtuan se vështirësitë në Universitet i multiplifikon mungesa e legjislacionit, prandaj shtruan domosdonë e zbatimit urgjent të Ligjit për Arsimin e Lartë, i miratuar nga Kuvendi i Kosovës, por ende i pashpallur nga PSSP të OKB-së. U insistua gjithashtu që deputetët të votojnë që ky ligj të fillojë të zbatohet në arsimin e lartë të Kosovës.

 

 

B.Rexhepi: "Koha optimale kur duhet të fillojë definimi i statusit është viti 2004"

 

Pragë, 31 mars 2003 - Koha e kërcënimeve që ka bërë Serbia ka kaluar përgjithmonë. Ne jemi nën rezolutën 1244 dhe autoritetet e vetme kompetente për çështjet e sigurisë janë KFOR-i dhe policia e UNMIK-ut - tha kryeministri i Kosovës Bajram Rexhepi, duke komentuar një deklaratë të zëvendëskryeministrit serb Nebojsha Çoviq.

 

Zoti Rexhepi i tha radios "Evropa e lirë" se "kjo është më tepër një instrumentalizim i mëtutjeshëm i komunitetit serb në Kosovë, për të penguar çdo zhvillim drejt krijimit të shtetësisë së Kosovës".

Qëllimi final konsiston në dy opcione të Serbisë, njëri që ta fusë Kosovën nën jurisdiksionin e Serbisë, sikur që është futur në preambulën kushtetuese, dhe tjetri është që të bëhet ndarja e Kosovës, sikur kanë qenë edhe projektet që i ka propozuar ish kryeministrit Gjingjiq, tha kryeministri i Kosovës.

I pyetur se deri ku ka arritur procesi bartjes së kompetencave nga UNMIK-u në institucionet e Kosovës, Rexhepi tha se janë janë bërë përgatitjet, por transferimi nuk do të bëhet në një takim njëditësh të Këshillit për transferimin e kompetencave.

 

Do të jetë vetëm pjesa politike ku caktohet orari se në çfarë kohe çka do të transferohet. Dhe kjo e pengon më së shumti Serbinë, theksoi kryeministri i Kosovës, duke shtuar se këtë proces nuk mund ta parandalojë askush, meqë për të është dhënë drita e gjelbër nga Këshilli i Sigurimit edhe nga zoti Shtajner.

Rexhepi tha se edhe UNMIK-u është vonuar me këtë transferim kompetencash dhe faji nuk është te ministrat dhe kryeministri, por faji është i përbashkët. Sipas tij, edhe kryeministria dhe ministritë nuk kemi qenë aq aktivë sa është dashur ndoshta.

Ai kritikoi burokracinë e UNMIK-ut, e cila, sipas tij, tenton që ta zhagisë këtë proces sa më tepër. "Unë nuk mendoj konkretisht në zotin Steiner, por në strukturat e UNMIK-ut, të cilat e kanë qëllimin e vet që të qëndrojnë sa më gjatë në Kosovë", saktësoi Rexhepi.

Pyetjes se kur e pret zgjidhjen e statusit të Kosovës, Kryeministri tha se statusi duhet të definohet sa më shpejt që është e mundur, porse këtë vit duhet shfrytëzuar që të ngritetim cillësia e funksionimit të institucioneve të Kosovës.

 

"Koha optimale kur duhet të fillojë definimi i statusit është viti 2004. Më 2005 ky proces duhet të përfundojë. Mos të vonohemi shumë me definimin e statusit të Kosovës edhe për çështjet që i përmenda, pra për cështje ekonomike, por edhe për çështje të tjera ku mund të jetë një revoltë e popullatës, tha Bajaram Rexhepi".

Ndërkaq duke folur për standardet që kërkohet të përmbushë Kosova, Rexhopi: "Standardet dhe çështja e statusit shkojnë bashkërisht. Statusi i Kosovës nuk mund të mbetet peng i nivelit të standardeve. Në kohën e duhur statusi i Kosovës duhet të definohet në mënyrë që këto standarde të realizohen edhe më lehtë, pra duhet të shkojnë krahas", tha Kryeministri i Kosovës në një intervistë dhënë radios "Evropa e lirë".

 

 

U përurua objekti i rindërtuar i konviktit dhe ngrohtorja në Qendrën e Studentëve

 

Prishtinë, 31 mars 2002 - Në mjediset e Qendrës së Studentëve në Prishtinë u përurua objekti i rindërtuar i konviktit si dhe ngrohtorja lokale. Ndërtimin e këtyre objekteve e ka ndihmuar Agjencioni Evropian për Rindërtim dhe Ministria e Arsimit.

U bë e ditur se studentët e Fakultetit Juridik dhe atij ekonomik të cilët kanë fituar kushtin për studime mund të aplikojnë për t'u bërë banorë të objektit në fjalë.

Ministria e Arsimit planifikon që në të ardhmen të ndërtojë edhe një konvikt të ri në vendin e barakave të vjetra, tha ministri Rexhep Osmani, i cili premtoi edhe ndihmë për studentët, por edhe për rritjen e pagave të profesorëve.

 

Kryesuesi i oparacioneve në AER Tieri Bernard Gell porositi studentët që të mirëmbajnë objektin edhe për brezat e ardhshme.

 

 

Fatmir Mehmeti është paraburgosur nën dyshimin se me veprimet e tij paraqet rrezik për paqen dhe sigurinë në rajon

 

Gjilan, 13 mars 2003 - Zyra për Informim e Brigadës Shumëkombëshe të Lindjes ka bërë të ditur se i arrestuari Fatmir Mehmeti nga Malisheva e Gjilanit, kryetar i Shoqatës së Veteranëve të Luftës së UÇK-së, dega në Gjilan, është paraburgosur meqë dyshohet se me aktivitetet e tij paraqet rrezik për paqen dhe sigurinë në rajon.

 

Ndërkaq, në një takim me gazetarë komandanti i Kampit amerikan Monte në Gjilan, koloneli Dejvid Sejf nuk e komentoi arrestimin e z. Mehmeti meqë siç u shpreh ai, këto janë çështje të Komandës së Brigadës Shumëkombëshe të Lindjes. Ai shtoi se po kërkohen edhe disa persona të tjerë të cilët po zhvillojnë aksione ekstremiste.

Koloneli Dejvid Sejf ka mohuar që në rajon të veprojë AKSH-ja, siç ka mohuar edhe aktivitetet e xhandarmërisë serbe këtej kufirit.

 

 

U arrestuan tre persona me dyshimin se kanë alarmuar rrejshëm se do të sulmohet stacioni i policisë në Gjilan

 

Gjilan, 31 mars 2003 - Policia në Gjilan ka arrestuar tre persona të cilët dyshohet se kanë alarmuar rrejshëm nëpërmjet telefonatave anonime më 23 se do të sulmohet stacioni i policisë në Gjilan.

 

Zëdhënësi i policisë së UNMIK-ut në Gjilan Xhejms Mekgert tha se këto thirrje janë bërë në kohën kur në Prishtinë ndodhën sulmet në stacionet policore. Është ky rastin i parë në Sektorin e Lindjes që kapen persona për të cilët dyshohet se bëjnë alarme të rrejshme nëpërmjet telefonatave anonime.

 

 

Ndërkombëtarët dhe vendorët nuk i shqetëson kërcënimi i Çoviqit se shpallja e pavarësisë së Kosovës shkakton një luftë të re

 

Prishtinë, 31 mars 2003 - Zëvendëskryeministri i Serbisë Nebojsha Çoviq u ka deklaruar agjencive serbe të lajmeve se shpallja e pavarësisë së Kosovës do të shkaktonte një luftë të re, pasi Serbia do të ndërhynte për të mbrojtur territorin dhe popullin, siç ka thënë Çoviq.

 

Ndërkaq, zyrtarët ndërkokombëtarë dhe vendorë në Kosovë thonë se nuk shqetësohen nga kërcënimet e tilla që vijnë nga Çoviqi, duke shtuar se ata do të vazhdojnë procesin e bartjes së kompetencave nga ndërkombëtarët te institucionet e Kosovës.

 

Këto deklarata të Çoviqit u quajtën të papërgjegjshme në kohën kur gjithandej flitet për integrime rajonale dhe për fillimin e mundshëm të dialogut ndërmjet Prishtinës dhe Beogradit.

UNMIK-u nuk ka ndonjë reagim të veçantë, tha zëdhënësi i UNMIK-ut Sunil Narula, duke theksuar se mandati i UNMIK-ut është i qartë: "Kosova aktualisht qeveriset nga Rezoluta 1244 dhe kështu do të jetë derisa Këshilli i Sigurimit nuk vendos ndryshe".

 

 

"Këshilli nacional serb" në veri të Mitrovicës paralajmëron protesta shtatëditëshe kundër z. Shtajner

 

Mitrovicë, 31 mars 2003 - I ashtuquajturi "Këshilli nacional serb" në veri të Mitrovicës ka paralajmëruar protesta shtatëditëshe kundër kryeadministratorit Mihael Shtajner me pretekst se ai ka lejuar bartjen e komptencave nga administrata ndërkombëtar tek institucionet e përkohshme të Kosovës.

 

Pavarësisht nga këto reagimeve të pakicës serbe, zyrtarët e UNMIK-ut dhe të Qeverisë së Kosovës kanë paralajmëruar se deri në gjysmën e muajit prill do të mbahet takimi i grupit të përbashkët UNMIK-Qeveri e Kosovës për bartjen e kompetencave.

Kryetari i "Këshillit nacional serb", Milan Ivanoviq thotë se serbët e Kosovës janë të pakënaqur me politikën e kreut të UNMIK-ut Mihael Shtajner në Kosovë, e cila siç tha ai, është e drejtuar në formimin e shtetit të pavarur të Kosovës.

 

 

UNMIK-u dhe autoritetet e Kosovës thonë se organizimi i zgjedhjeve nga serbët në veri të Mitrovicës është i paligjshëm

 

Prishtinë, 31 mars 2003 - Zyrtarët e UNMIK-ut dhe institucioneve të Kosovës kanë deklaruar se çfarëdo zgjedhjesh që do të organizohen nga pjesëtarët e pakicës serbe në veri të Mitrovicës pa pëlqimin e tyre do të cilësohen të paligjshme.

 

Këtë deklaratë autoritetet në Kosovë e bëjnë pas paralajmërimeve të serbëve të veriut të Kosovës se do të organizojnë një referendum dhe më pas edhe zgjedhje lokale për krijimin e një komune serbe në veri të Mitrovicës.

Zëdhënësi i UNMIK-ut në Prishtinë, Sunil Narula thotë se misioni i OKB-së në Kosovë nuk është kundër mbajtjes së protestave të serbëve në veri të Mitrovicës, ndërkaq mbajtjen e referendumit për shpalljen e komunës veriore të Mitrovicës e quajti të paligjshme.

 

Ndërkaq, mbajtja e referendumit apo çfarëdo zgjedhjeve në mënyrë private nuk ka kurrëfarë fuqie ligjore, sepse tashmë janë mbajtur zgjedhjet lokale të organizuara nga OSBE-ja në Kosovë, u shpreh z. Narula.

Ndërkohë kryetari i Komunës së Mitrovicës Faruk Spahija i tha dje BBC-së se kërcënimet e serbëve për shpalljen e veriut të Mitrovicës si komunë në vete mund të tensionojë situatën në Mitrovicë dhe të prodojë konflikte të reja ndëretnike.

 

 

Fleçër thotë se krimi në Kosovë në tre muajt e fundit ka rënë dukshëm - ka pasur vetëm 18 vrasje

 

Prishtinë, 31 mars 2003 - Krimi në Kosovë në tre muajt e fundit ka rënë dukshëm, ka thënë zëdhënësi i policisë ndërkombëtare në Prishtinë Beri Fleçër.

 

Përkundër rasteve të shumta të krimeve ordinere, ato më të rënda janë në rënie e sipër. Ai ka shtuar se për këtë periudhë ka pasur vetëm 18 vrasje që krahasuar me vendet tjera evropiane është një numër i vogël.

Sipas zëdhënësit Fleçër edhe pse fillimi i këtij viti ka qenë mjaft i rëndë sa i përket gjendjes së sigurisë, tash është normalizuar. Ai ka shtuar se për çdo vit po rritet efektivi i SHPK-së në të cilin shërbim aktualisht po punojnë 5.500 pjesëtarë.

 

Fleçër thotë se ky numër do të rritet edhe mëtej dhe SHPK-ja do të marrë më shumë përgjegjësi dhe kjo shkon në dobi të sigurisë së përgjithshme.

 

 

Shkupi e Tirana në rrugën drejt integrimeve evroatlantike

 

Shkup/Krivollak, 31 mars 2003 - Në poligonin ushtarak Krivollak në jug të Maqedonisë, ka filluar sot stërvitja e parë ushtarake e përbashkët maqedono-shqiptare, si një nga format e bashkëpunimit rajonal në rrugën drejt integrimeve evroatlantike, por edhe si paralajmërim për të gjitha format e esktremizmit në Ballkan.

 

Ministri maqedonas i Mbrojtjes Vllado Buçkovski ka thënë se kjo stërvitje e përbashkët e ushtarëve maqedonas e shqiptarë është përgjigje direkte ndaj gjithë ekstremistëve në rajon të cilët paralamërojnë ofensivat e tyre.

Ndërkaq ministri shqiptar i Mbrojtjes Pandeli Majko, i cili ndodhet në Maqedoni, ka thënë se dy vendet fqinje me sukses po përballojnë pengesat si dhe mentalitet e vjetra në marrëdhëniet ndërkombëtare. "Qëllimet tona të përbashkta që çojnë në integrimet evroatlantike do të realizohen me një bashkëpunim të shumanshëm në rajon", ka thënë Majko.

 

 

Mirjana Markoviq hedh poshtë akuzat për përzierje në vrasjen e Stamboliqit

 

Podgroicë, 31 mars 2003 - Bashkëshortja e ish-diktatorit jugosllav Sllobodan Millosheviq, Mirajana Markoviq ka hedhur poshtë të gjitha akuzat se është e përzier në vrasjen e ish-presidentit serb Ivan Stamboliq. Në një letër dërguar një gazete të Podgoricës, Mirjana Markoviq thotë se nuk ka lidhje me çfarëdo krimi në Jugosllavi as me çfarëdo kriminaliteti.

 

Ajo thotë se janë duke u bërë akuza të pamotivuara ndaj jobashkëmendimtarëve politikë dhe se akuzat kundër saj janë të motivuara edhe em faktin për ta "destabilizuar Millosheviqin në Hagë" dhe të hidhet "hije në mbrojtjen e tij brilante".

 

 

Ferhat Dinosha - kryetar i ri i Unionit Demokratik të Shqiptarëve

 

Ulqin, 31 mars 2003 - Ferhat Dinosha është zgjedhur kryetar i ri i Unionit Demokratik të Shqiptarëve në Kuvendin e katërt zgjedhor të kësaj partie të shqiptarëve në Mal të Zi. Ndërkaq, nënkryetarë janë zgjedhur Agim Qiri, Nikollë Gjokaj dhe Enver Dedushaj, kurse sekretar i përgjithshëm është zgjedhur Met Gjoni.

 

 

Në Maqedoni fillon misioni paqësor i forcave evropiane të mbrotjes "Konkordia"

 

Shkup, 31 mars 2003 - Sot në Maqedoni do të fillojë misioni paqësor i forcave evropiane të mbrotjes i quajtur "Konkordia" (Harmonia). Në ndërrimin e Misionit të NATO-s me atë të forcave evropiane do të marrin pjesë komesioneri i lartë i BE-së për Politikën e Jashtme dhe të Sigurisë Havier Solana dhe kryetari i radhës i BE-së, ministri i Jashtëm grek Jorgos Papandreu.

 

Po sot pritet të mbërrijë në Shkup edhe sekretari i përgjithshëm i NATO-s, Xhorxh Robertson, i cili do të takohet me zyrtarët më të lartë shtetëror me të cilët pritet të bisedojë lidhur me përpjekjet për t'u afruar me Aleancën, për reformat në ushtri dhe për gjendjen e sigurisë në këtë vend.

Forcat evropiane për ndërhyrje të shpejtë për herë të parë do të zhvillojnë një mision të tillë në Maqedoni.

 

 

Në Shkup u takuan ministrat e mbrojtjes së Shqipërisë, Maqedonisë, Kroacisë dhe Serbisë e Malit të Zi

 

Shkup, 31 mars 2003 - Ministrat e Mbrojtjes të katër vendeve të rajonit u takuan dje në Shkup një ditë para fillimit të stërvitjes ushtarake shqiptaro-maqedonase në një poligon të madh ushtarak në Maqedoninë qendrore.

 

Pandeli Majko, ministër i Mbrojtjes të Shqipërisë, Boris Tadiq i Unionit Serbi-Mali i Zi dhe zëvendësministri i Mbrojtjes së Kroacisë Zllatko Gelebiq kanë diskutuar në takime të ndara me homologun e tyre maqedonas Vllado Buçkovski mbi thellimin e bashkëpunimit në fushën e mbrojtjes midis vendeve respektive dhe në aspektin rajonal mbi sigurinë rajonale.

 

 

Sot në poligonin ushtarak të Krivollakut mbahen stërvitjet e përbashkëta të ushtrisë shqiptaro-maqedonase

 

Shkup, 31 mars 2003 - Sot në poligonin ushtarak të Krivollakut fillojnë stërvitjet e përbashkëta të pjesëtarëve të ushtrisë maqedonase dhe asaj të Shqipërisë. Në cilësinë e vëzhguesit pritet të asistojnë edhe përfaqësues të ministrive të mbrojtjes nga Serbia dhe Kroacia.

 

Po dje në Shkup ka arritur edhe ministri shqiptar i Mbrojtjes Pandeli Majko. Njoftohet se Majko pritet të takohet në Shkup me sekretarin e përgjithshëm të NATO-s lordin Xhorxh Robertson i cili po ashtu pritet të marrë pjesë në ndërrimin e misionit paqeruajtës të NATO-së, të cilin prej sot do ta marrin forcat evropiane.

Stërvitja e sotme do të përcillet edhe nga përfaqësues të lartë të Shqipërisë, Maqedonisë, Serbisë e Malit të Zi dhe të disa vendeve të tjera.

 

 

Policia serbe dha urdhërarresti ndërkombëtar kundër Mira Markoviqit për kthimin e saj nga Rusia në Serbi

 

Beograd, 31 mars 2003 - Bashkëshortja e ish-presidentit jugosllav Sllobodan Millosheviq, Mira Markoviq, e cila kërkohet nga policia serbe, ndodhet në Rusi.

Mira Markoviq është larguar nga Serbia më 23 shkurt të këtij viti dhe ka shkuar në Moskë për të vizituar të birin, i cili po ashtu kërkohet nga policia serbe për shkak të veprave penale.

Mira Markoviq akuzohet për përzierje në vrasjen e ish-presidentit serb Ivan Stamboliq.

Ndryshe, çifti bashkëshortor Millosheviq - Markoviq konsiderohet përgjegjës për planifikimin dhe urdhërin e likuidimin e Ivan Stamboliqit.

 

 

Persona të panjohur kanë hedhur një bombë në Tetovë

 

Tetovë, 31 mars 2003 - Në orët e hershme të mëngjesit të djeshëm ka ndodhur një shpërthim në sheshin e Tetovës, i cili shkaktoi dëme materiale, por jo viktima në njerëz.

 

Ky shpërthim ka ndodhur në afërsi të një bastoreje sporti, pronë e një shqiptari, i cili ka deklaruar se nuk mendon që shpërthimi ka të bëjë personalisht me të, porse bomba të jetë hedhur rastësisht në këtë vend. Policia maqedonase thotë se i di motivet e autorëve të këtij incidenti, por nuk i bëri të ditur ato.

 

 

Një i vrarë dhe dhjetë të lënduar në një incident në kishën shqiptare në Miçigan të SHBA-ve

 

Miçigan, 31 mars 2003 - Një person i armatosur, të dielën gjatë ceremonisë fetare në St. Paul's Albanian Church në Miçigan ka hapur zjarr me armë, duke vrarë një besimtar shqiptar. Me atë rast janë lënduar 10 të tjerë. Ngjarja ka ndodhur kur një person, identiteti i të cilit nuk është bërë i ditur, me pistoletën e fshehur, ndaloi pranë kishës duke hapur zjarr ndaj viktimës.    Gjithashtu 10 persona të tjerë janë lënduar, një pjesë e tyre gjatë rrëmujës duke u munduar të dalin nga dritaret dhe dyert e tjera të kishës.

 

Personi pas incidentit është arrestuar, tha sherifi i qytetit, i cili ka theksuar se dorasi ndaloi pranë viktimës duke e qëlluar atë nga mbrapa. Ndërkaq, sipas fjalëve të një pjesëmarrësi në këtë shërbesë fetare, Luigj Gjokaj, shërbyes në kishë, dorasi hyri në kishe duke thënë: "Po, unë jam këtu", përpara se të qëllonte. Gjokaj ka thënë se i njihte të dy personat.

Sipas dëshmitarëve të tjerë, midis tyre dhe vetë famulltari i kësaj kishe, Dom Anton Kqira, ngjarja ka ndodhur si fërkim midis dy personave e jo për shkaqe që mendohej fillimisht.

 

 

Qyteti Nasaria - objektiv i forcave amerikane

 

Nasaria, 31 mars 2003 - Shtetet e Bashkuara po dërgojnë mijëra trupa të tjera për të siguruar qytetin e Nasirias, që ndodhet në një pikë me rëndësi strategjike në rrugët e furnizimit të trupave amerikano-britanike.

Ushtarë të forcave speciale dhe marinësa janë dërguar në rajonin ku më parë forcat e koalicionit kanë hasur në rezistencë të fuqishme.

Forcat amerikane dhe ato britanike po avancojnë edhe gjetkë në Irak. Ata po rrethojnë qytetin e Naxhafit dhe kanë marrë një bazë të opozitës afër Basrës.

Në Nasaria janë dërguar rreth 5 mijë trupa si përforcime në mbështetje të 7 mijë marinsave që po luftojnë atje, njofton Endru North që është me një njësit të trupave amerikane në qendër të Irakut.

 

 

Trupat amerikane zhvillojnë luftime me irakianët anës lumit Eufrat afër Babilonit

 

Bagdad, 31 mars 2003 – Trupat amerikane kanë zhvilluar sot (të hënën) luftime me luftëtarët irakianë anës lumit Eufrat afër vendit antik Babilon, i cili duket të jetë vendluftimi më i afërt deri tash me kryeqytetin e Sadam Hyseinit, njofton Rojter.

 

Në frontin rreth 110 km (70 mile) në jug të Bagdadit, forcat amerikane kanë thënë se shumë luftëtarë irakianë dhe të pakten një amerikan janë vrarë në luftimet e ashpra afër qytetit Hilla. Ka pasur gjithashtu aksione rreth urës mbi Eufrat tek Hindia, që është vetëm 80 km nga kryeqyteti.

 

 

T.Aziz: "Në luftën kundër armikut të gjitha mjetet janë të justifikuara të përdoren"

 

Bagdad, 31 mars 2003 - Zëvendëskryeministri i Irakut, Tarik Aziz, tha se qeveria e tij vlerësonte se lufta po shkonte shumë mirë për Irakun. Në një intervistë për një rrjet televiziv amerikan, zoti Aziz tha se forcat britanike dhe amerikane janë zënë në befasi prej rezistencës irakiane.

Zoti Aziz tha se gjithashtu se arabët dhe myslimanët nga e gjithë bota po e mbështesnin Irakun. Ai paralajmëroi se do të ketë më shumë sulme vetëvrasëse ndaj atyre që i quajti pushtuesit imperialistë. Zëvendëskryeministri irakian tha se në luftën kundër armikut të gjitha mjetet janë të justifikuara të përdoren.

 

 

Mubarak: Lufta kundër Irakut do të prodhojë “100 bin Ladena të rinj”

 

Kairo, 31 mars 2003 – Presidenti egjiptian, Hosni Mubarak, ka thënë sot (të hënën) se lufta e udhëhequr nga amerikanët kundër Irakut do të prodhojë "100 Bin Ladena të rinj" dhe do të nxisë militantizmin antiperendimor të muslimanëve, njofton, Rojter.

 

"Kur të përfundojë, nëse përfundon, kjo luftë do të ketë konsekuenca të tmerrshme", u ka thënë Mubaraku ushtarëve egjiptianë në qytetin e Suezit. "Në vend se të kemi një (Osama) bin Laden, ne do të kemi 100 Bin Ladena", ka shtuar ai.

 

 

Forcat amerikane kanë goditur me projektile kryqëzore Ministrinë e informacionit në Bagdad

 

Bagdad, 31 mars 2003 – Në kohën kur sulmet ajrore të ashpra në Bagdad kanë hyrë në ditën e 12-të, forcat amerikane kanë shkrehur projektile kryqëzore në Ministrinë irakaine të Informacionit, ndërsa shpërthime të tjera kanë goditur pallatin e përdorur nga i biri i Sadam Hyseinit, njofton Rojter.

 

Po sot heret në mëngjes (të hënën), qendrën e qytetit e kanë goditur edhe tri shpërthime të fuqishme, duke shkaktuar zjarr shumë afër kompleksit të ndërtesave të ministrive.

 

 

Bombë ndaj amabasadës amerikane në Qipro

 

Nikozia, 31 mars 2003 - Ndaj Ambasadës së SHBA-ve në Qipro sot (të hënën) është hedhur një bombë ndezëse, ndërkaq policia ka njoftuar se është arrestuar një i dyshuar. Një person ka dhedhur nga distanca bombën në murin e ambasadës.

 

Me këtë rast kurrfarë dëmi nuk është shkaktuar në ndërtesën e ambasadës amerikane, ka njoftuar policia. Ndryshe, opinioni publik kundërshton luftën amerikane në Irak.

 

 

Komandantët amerikanë kanë njoftuar sot për betejën e parë serioze me elitën Gardës republikane irakiane

 

Naxhaf, 31 mars 2003 – Komandantët amerikanë kanë njoftuar sot (të hënën) për betejën e parë serioze me elitën Gardës republikane irakiane, njofton Rojter. Beteja ka ndodhur kur komandot britanike kanë bërë sulmin më të madh të deritashëm në Basra.

 

Në fjalën e tyre, këta liderë ushtarakë amerikanë kanë mbrojtur fuqishëm strategjinë e tyre të luftës.

 

Po kështu, njoftohet se aeroplanët luftarakë të koalicionit po vazhdojnë të godasin Bagdadin duke e vënë në shënjestër makinerinë propagandistike të regjimit.

 

 

Pauell ua ka tërhequr vërejtjen Sirisë e Iranit të ndërprejnë mbështetjen e regjimit të Sadam Hyseinit

 

Uashington, 31 mars 2003 – Sekretari amerrikan i Shtetit, Kolin Pauell, duke folur në Komitetin amerikano-izraelit, që është grupi më i fuqishëm lobist proizraelit, ua ka tërhequr fuqishëm vërejtjen Sirisë dhe Iranit që të ndërprejnë mbështetjen e terrorizmit dhe të regjimit të Sadam Hyseinit, njofton BBCWorld. "Siria ka përgjegjësi për zgjedhjet dhe konsekuencat e saj", ka thënë Pauell.

 

Ai gjithashtu i ka bërë thirrje Iranit të ndërprejë mbështetjen e terroristëve dhe prodhimin e armëve të shkatërrimit në masë. "Është koha", ka thënë ai, për "mbarë bashkësinë ndërkombëtare të insistojë që Irani të ndërprejë mbështetjen e terrorizmit".

 

Këto vërejtje, ai i ka bërë, vetëm disa ditë pasi kolegu itij, Donald Ramsfeld, ua tërhoqi vërejtjen që të dy këtyre vendeve të mos përzihen në konfliktin e Irakut. Gjatë po këtij fjalimi, z. Pauell përsëriti gjithashtu vendosmërinë e Uashingtonit të punojë për paqe ndërmjet Izraelit dhe palestinezëve.

 

 

Forcat amerikane kanë vrarë sot rreth 100 forca irakiane

 

Baza As-Sajlia, 31 mars 2003 - Forcat amerikane kanë vrarë sot rreth 100, ndërkaq kanë zënë robër 50 forca paraushtarake irakiane jug të Irakut, njoftoi sot Komandan qendrore e forcave amerikane në bazën ushtarake As-Sajlia në Katar.

Gjithashtu komanda amerimane njoftoi se në sulmin e mbrëmshëm dhe të sotëm në mëngjes për herë të parë në histori janë shfrytëzuar të tre bombarduesit me distancë të gjatë B-1, B-2 dhe B-52 për sulme në rajonin e njëjtë.

 

 

Forcat amerikane hynë sot në qytetin Hindia

 

Hindia, 31 mars 2003 - Forcat amerikane sot kanë hyrë në qytetin Hindia, 80 km në jug të Bagdadit, duke e pushtuar rrugë për rrugë. Siç njofton agjencia e lajmeve AP me atë rast janë vrarë 15 luftëtarë irakianë. Sipas po kësaj agjencie në luftimet për qytetin Hindia janë zënë robër me dhjetra irakianë të cilët janë prezentuar si pjesëtarë të Gardës republikane.

 

 

Vazhdojnë pa reshtur bombardimet në Bagdad

 

Bagdad, 31 mars 2003 - Komandanti i forcave të koalicionit në Irak, gjenerali Tomi Frenks, tha se forcat aleate të këmbësorisë janë rreth 100 kilometra larg Bagdadit, ndërkohë që bombardimet nga ajri të kryeqytetit irakian vazhdojnë gjatë gjithë 24 orëve. Dje, gjenerali Franks mohoi njoftimet se trupat amerikane kanë pezulluar përparimin drejt Bagdadit. Ai shtoi se përparimi po ecën me një ritëm të mrekullueshëm, por nuk tha se kur mund të përfundojë ai.

Ndërkaq, sot në orët e para të ditës, një zjarr i madh filloi në qendër të Bagdadit, pasi shpërthime të fuqishme u dëgjuan në afërsi të Ministrisë së Informimit. Sulme u kryen gjithashtu edhe kundër trupave elite të Gardës Republikane, që qëndrojnë në gadishmëri përreth kryeqytetit.

 

 

Iraku thotë se ka rrëzuar një helikopter amerikan dhe kanë vrarë 2 pilotë

 

Bagdad, 31 mars 2003 - Ministri irakian i Informacionit, Mohammed Said al-Sahaf, tha se forcat irakiane kanë rrëzuar të paktën një helikopter amerikan dhe kanë vrarë 2 pilotë.

 

Zyrtarët amerikanë thonë se nuk ka informacione për ndonjë helikoper të humbur. Por nga ana tjetër ata thanë se në Irakun jugor, një helikopter i komandove amerikane u përplas në një pikë furnizmi, duke vrarë tre ushtarë.

 

 

Majërs thotë se luftimet më të vështira në Irak ende nuk kanë filluar

 

Uashington, 31 mars 2003 - Gjenerali Majërs tha se lufta deri tani, në 10 ditët e para, ka shkuar mirë. Megjithatë gjenerali amerikan e përgatiti publikun për luftime më të ashpra në të ardhmen. “Gjithmonë e kam thënë se pjesa më e vështirë e luftës ende nuk ka filluar.

 

Lufta nuk do të jetë e njëtrajtshme për sa i përket vështirësisë. Mendimi im është se pjesa më e vështirë ende nuk ka filuar”, tha zoti Majërs. Gjenerali Majërs tha se përparësia e tij kryesore është që të shmangen viktimat e panevojshme në radhët e civilëve irakianë dhe forcave amerikane e britanike.

 

Lidhur me katër ushtarët amerikanë që u vranë të shtunën si rezultat i shpërthimit vetëvrasës të një makine-bombë në qytetin Naxhaf, gjenerali Majërs tha se forcat amerikane po i ndryshojnë procedurat dhe po marrin masa të tjera për shkak të atyre që ai i ciësoi si "akte të disa personave të dëshpëruar".

 

 

Forcat speciale amerikane dhe britanike në veprim

 

Londër, 31 mars 2003 - Në fshehtësi të plotë, forca speciale britanike hynë në Irak. Madje këto forca tepër të specializuara ishin futur në Irak me një sërë misionesh të rëndësishme që përpara fillimit të luftimeve. Brenda një jave, trupa të forcave speciale amerikane ishin njësitë e para që kapën dhe morën nën kontroll pjesë të tëra strategjike të Irakut.

 

Një nga detyrat e tyre të para ishin të kërkonin për bazat e raketave irakiane SKUD si dhe vendet ku mund të ishin magazinuar mbushjet e dyshuara të tyre kimike e biologjike. Një mision tjetër i rëndësishëm i këtyre forcave ishte të siguronin fushat kryesore naftëmbajtëse në jug dhe në veri të Irakut.

 

 

Vihet në dyshim fati i udhëheqjes së Irakut

 

Uashington, 31 mars 2003 - Sekretari amerikan i Mbrojtjes Donlad Ramsfelld tha dje gjatë një interviste për rrjetin televiziv Foks se ai është i mendimit se populli irakian ka filluar të ketë dyshime për udhëheqjen e vendit, të cilët, tha ai, praktikisht nuk ekzistojnë më. "Ata e panë sulmin ndaj udhëheqjes së tyre dhe që atëhere udhëheqësit nuk i kemi parë më. Ku është Sadam Huseini?

 

Ku janë djemtë e tij Kusai dhe Idai? Ata nuk po flasin", tha Sekretari Ramsfelld. Zoti Ramsfelld tha se ndonëse Pentagoni nuk e di me saktësi se ku janë ata, ai thekson se udhëheqësit e Irakut nuk janë parë e as janë ndjerë gjatë ditëve të fundit.

 

 

Vazhdojnë sulmet amerikano-britanike në Irak

 

Bagdad, 31 mars 2003 - Kryeqyteti irakian vazhdon të mbetet cak i bombardimeve të rënda nga forcat aleate amerikano-britanike. Korrespodentët njoftojnë për shpërthime të forta në qendër të Bagdadit.

 

Të paktën një raketë ka goditur pallatin e presidentit Sadam Hysein ndërkohë që një tjetër ka shpërthyer në afërsi të Ministrisë së Informacionit. Shpërthime tjera të fuqishme janë regjistruar edhe në paralagjet e kryeqytetit ku mendohet të jenë përqëndruar forcat e Gardës Republikane të Sadamit.

 

 

Ekspertë amerikanë kritikojnë strategjinë e luftës në Irak

 

Uashington, 31 mars 2003 - Në Shtetet e Bashkuara të Amerikës po shtohen kritikat ndaj kreut të luftës kundër Irakut. Për shkak të përparimeve të ngadalshme të ushtrisë amerikane në Irak, bashkëpunëtorë të Pentagonit kanë qortuar strategjinë e ministrit amerikan të mbrojtjes Donald Ramsfeld. Ramsfeld ka hedhur poshtë akuzat duke e quajtur planin luftarak si të shkëlqyeshëm.

 

Poashtu edhe kryekomandanti i forcave amerikane të luftës në Irak, gjenerali Tomi Franks ka përgënjeshtruar se ka divergjenca sa i përket planit të luftës.

 

 

Në botë vazhdojnë protestat kundër luftës në Irak

 

Rabat, 31 mars 2003 - Në disa vende të botës qindra mijëra njerëz kanë demonstruar sërish kundër luftës në Irak. Gjatë protestave në kryeqytetin marokien Rabat demonstruesit akuzuan Ligën Arabe se është duke vështruar duarkryq luftën që po zhvillohet në Irak.

 

Protestat më të mëdha kundër luftës u regjistruan në Indonezi. Në Xhakartë para ambasadave të Shteteve të Bashkuara të Amerikës dhe Britanisë së Madhe protestuan rreth 200 mijë