Lajme

E shtune, 29 mars 2003

Përmbajtja:

• Futboll: Shqipëria - Rusia 3:1

• Shtajner i dërgon për shqyrtim Qeverisë kodin penal

• Gjenerali Mini: "Ne kemi raporte për aktivitetet e grupacioneve të vogla radikale dhe kriminale

• Liderët e DOS-it nismën e Shtajnerit e kanë quajtur "veprim të papranueshëm dhe të nxituar"

• Ndihma e Unionit Evroperëndimor për vendet e Ballkanit nuk do të mungojë përkundër luftës në Irak

• Planifikohet që në Kosovë deri në vitin 2007 të ndërtohen rreth 61 mijë banesa

• Serbët kërcënohen se do të formojnë struktura dhe institucione paralele në veri të Mitrovicë

• Në Mitrovicë është hequr nga oborri i Kuvendit përmendorja e konsullit rus Shqerbinski

• Në Izbicë u bë rivarrimi i dhjetë viktimave nga 147 sa u vranë dhe u masakruan nga forcat serbe në konfliktin e Kosovës

• Gjenerali amerikan Kif tha se nuk do të ketë reduktim të forcave amerikane në Kosovë

• Rino Harnish e ka dënuar formimin e "bashkisë së komunave serbe" të Anamoravës

• Nuk do të ketë grevë të mësimdhënësve të Kosovës që është paralajmëruar më herët

• UNICEF-i ka shprehur shqetësim për burgjet në Maqedoni ku vuajnë dënimin të miturit

• Bush dhe ndihmësit e tij kanë mbrojtur strategjinë e tyre të Irakut

• Nga një autobombë vriten 5 ushtarë amerikanë

• Sot ka "shumë të vrarë" nga shpërthimet në Bagdad

• Ministri irakian i Informacionit thotë se 58 vetë kanë vdekur

• Ramsfeld akuzoi Sirinë se po lejon trafikimin e pajisjeve ushtarake nëpër kufirin e saj me Irakun

• Bombardime të reja në Nasaria

• Forcat aleate në pauzë

• OKB hap rrugën e ndihmave

• Një raketë godet kryeqytetin kuvajtian

• Flesher: qeveria amerikane nuk mund të parashikojë sesa do të zgjatë luftë në Irak

• Lufta në Irak: Përçarja transatlantike

• Ekipe amerikane për likuidimin e liderëve irakianë

Futboll: Shqipëria - Rusia 3:1

 

Prishtinë, 29 mars 2003 - Sonte në Shkodër në stadiumin "Loro Boriqi" reprezentacioni i Shqipërisë, me golat e Altin Rraklit, Lalës dhe Igli Tarës, mposhti reprezentacionin e Rusisë me rezultat 3:1. Kjo ndeshje u luajt në kuadër të kualifikimeve për kampionatin evropian të futbollit që do të mbahet në Portugali në vitin 2004.

 

    

Shtajner i dërgon për shqyrtim Qeverisë kodin penal

 

Prishtinë, 29 mars 2003 - Kryeadministratori i Kosovës Mihael Shtajner i dërgoi dje kryeministrit Bajram Rexhepi Kodin e Përkohshëm Penal dhe Kodin e Përkohshëm të Procedurës Penale, për shqyrtim nga Kryeministria dhe Kuvendi i Kosovës.

Në një letër dërguar kryeministrit Rexhepi, Shtajner thotë se "kjo ka qenë një sipërmarrje e madhe, e shumëpritur prej kosovarëve. Do t'ju isha shumë mirënjohës nëse do ta shqyrtonit këtë tekst".

Në letër thuhet se çështjet që lidhen me sigurinë dhe ligjin penal janë nën kompetencat e rezervuara të të Dërguarit Special të OKB-së dhe të dyja Kodet do të publikohen nga i Dërguari Special si rregullore të UNMIK-ut. Por institucionet e Kosovës duhet të angazhohen tërësisht në këtë iniciativë tëA madhe ligjore, e cila do të përbëjë një kontribut domethënës për administratën e Drejtësisë në Kosovë, tha Shtajner.

 

Përgatitja e dy Kodeve është bërë nga një sërë institucionesh, ku përfshihen ekspertët ligjorë kosovarë në Këshillin e Përbashkët Këshillues për Çështje Ligjore, institucion i cili ka qenë një iniciativë e ish-kryeadministratorit Bernard Kushner.

 

 

Gjenerali Mini: "Ne kemi raporte për aktivitetet e grupacioneve të vogla radikale dhe kriminale

 

Prishtinë, 29 mars 2003 - "Nuk ka ndonjë evidencë të grupacioneve të uniformuara dhe të armatosura, të cilat operojnë në Kosovë, apo në rajonet kufitare.

 

Por, ne kemi raporte nga popullata për aktivitetet e grupacioneve të vogla radikale dhe kriminale", deklaroi në një intervistë dhënë gazetës "Bota sot" komandanti i KFOR-it Fabio Mini, i pyetur se çfarë të dhënash ka KFOR-i për AKSH-në.

 

Sipas gjeneralit Mini, këto grupacione përdorin uniforma jo për të luftuar, por për të shqetësuar popullatën dhe për të rrëmbyer me forcë. "Ata përdorin emblemat e njerëzve të luftës për të ushtruar forcën e tyre kriminale mbi popullatën, mbi të afërmit dhe fqinjët e tyre", tha gjenerali Mini në këtë intervistë.

 

 

Liderët e DOS-it nismën e Shtajnerit e kanë quajtur "veprim të papranueshëm dhe të nxituar"

 

Beograd, 29 mars 2003 - Liderët e koalicionit qeveritar serb DOS në një takim të mbrëmshëm, nismën e Shtajnerit për bartjen e kompetencave tek institucionet e Kosovës e kanë quajtur "veprim të papranueshëm dhe të nxituar".

 

Sipas liderëve serbë nuk janë pjekur kushtet, sepse shoqëria e Kosovës, si dhe pushteti i Kosovës, ende nuk janë aftësuar të bartin një përgjegjësi aq të madhe.

 

 

Ndihma e Unionit Evroperëndimor për vendet e Ballkanit nuk do të mungojë përkundër luftës në Irak

 

Prishtinë, 29 mars 2003 - "Mbështetja financiare është e nevojshme përe Ballkanin për një nga çështjet më të rëndësishme të saj e ajo është zhvillimi ekonomik, punësimi i të rinjve dhe ulja e mundësisë që njerëzit t'i kthehen krimit".

 

Kështu tha dje kryetari i Asamblesë së Unionit Evroperëndimor, Zhan Dirk Blou pas takimit në Prishtinë me kryeministrin Bajram Rexhepi. Ndihma e Unionit Evroperëndimor për vendet e Ballkanit nuk do të mungojë përkundër luftës në Irak.

Ky zyrtar i lartë i Unionit Evroperëndimor po ashtu ka theksuar se nëse bashkësia ndërkombëtare nuk e lë Kosovën anash, apo të margjinalizohet nga zhvillimet në Irak dhe të investojë para në ekonominë kosovare, atëherë kjo sipas tij do të ndikonte si në uljen e shkallës së krimit, ashtu edhe në zbutjen e papunësisë, por edhe do të zvoglohet shkalla e emigrimit të rinisë kosovare jashtë Kosovës.

Nga ana e tij, kryeministri Rexhepi pas këtij takimi citohet të ketë thënë se zgjidhja e vetme e statusit të Kosovës do të jetë pavarësia e saj, pavarësisht se BE ende nuk e ka gatishmërinë që të pranojë atë dhe e ka përfshirë Kosovën në të gjitha dokumentët e veta si pjesë të Unionit Serbi - Mali i Zi.

 

 

Planifikohet që në Kosovë deri në vitin 2007 të ndërtohen rreth 61 mijë banesa

 

Prishtinë, 29 mars 2003 - Sipas Ministrisë së Tregtisë dhe Industrisë në Kosovë planifikohen që deri në vitin 2007 të ndërtohen rreth 61 mijë banesa. Prezentimi i projekteve u bë dje në Prishtinë në organizim të Ministrisë së Ekonomisë dhe Financave si dhe me praninë e donatorëve. Ky projekt është quajtur "Plani i vogël Mars hall".

Ministri Ali Jakupi tha se kjo do të bëjë zvoglimin e kostos së ndërtimeve për 50 për qind. Ai theksoi kundërthënien e madhe të mjedisit tonë të varfër, por me çmime enorme të banesave. Përveç uljes së çmimeve të banesave ky projekt do të jetë edhe impuls i zhvillimit ekonomik.

 

Me këtë do të aktivizohen kapacitetet e industrisë së materilit ndërtimor, do të intensifikohet tregtia dhe do të hapen vende të reja të punës. Njëherësh ndërtimi i këtyre banesave do të ruajë 1530 hektarë tokë po të ndërtoheshin në vend të tyre shtëpi.

 

 

Serbët kërcënohen se do të formojnë struktura dhe institucione paralele në veri të Mitrovicë

 

Mitrovicë, 29 mars 2003 - Serbët e Mitrovicës e akuzojnë shefin e UNMIK-ut Mihael Shtajner se nuk i ka përmbushur premtimet për decentralizim dhe i ka mundësuar shumicës shqiptare të realizojë qëllimin e shtetit të pavarur.

 

Kryetari i të ashtuquajturit "Këshilli nacional serb" për veriun e Mitrovicës Milan Ivanoviq tha se kjo kinse paraqet dështimin e UNMIK-ut dhe paralajmëroi veprimet e ardhshme të "bashkësisë serbe".

 

Në ditët e ardhshme ky këshill do të organizojë protesta paqësore me rastin e paralajmërimit të transferit të kompetencave nga administrata e UNMIK-ut në institucionet e përkohshme të Kosovës, ku pjesëtarët e pakicës serbe do të parqesin kundërshtimet e tyre për këtë qëndrim të z. Shtajner.

 

 

Në Mitrovicë është hequr nga oborri i Kuvendit përmendorja e konsullit rus Shqerbinski

 

Mitrovicë, 29 mars 2003 - Në Mitrovicë është hequr nga oborri i Kuvendit komunal përmendorja e konsullit rus Shqerbinski, e cila ishte vendosur nga regjimi serb në vitet nëntëdhjeta.

 

Këshilltarët e Asamblesë komunale të Mitrovicës patën kërkuar disa herë largimin e përmendores së konsullit rus, por një gjë e tillë nuk ishte lejuar nga UNMIK-u.

 

Mirëpo, këshilltarët e Kuvendit në mbledhjen e fundit kanë votuar me shumicë votash për heqjen e kësaj përmendore, vendim ky që është realizuar dje.

 

 

Në Izbicë u bë rivarrimi i dhjetë viktimave nga 147 sa u vranë dhe u masakruan nga forcat serbe në konfliktin e Kosovës

 

Izbicë, 29 mars 2003 - Në Izbicë u përkujtua me dhembje katërvjetori i vrasjes dhe masakrimit të 147 civilëve shqiptar nga forcat serbe. Deri më tash janë gjetur vetëm 10 viktima të kësaj masakre të cilat janë rivarrosur dje në Izbicë.

 

Masakra e Izbicës është ndër më të mëdha të forcave serbe ndaj popullatës civile në Kosovë. Forcat serbe pasi kanë kryer këtë akt barbar, në përpjekje për të fshehur krimin, kanë zhvarrosur viktimat dhe sot e asaj dite nuk dihet se ku janë eshtrat e tyre.

 

 

Gjenerali amerikan Kif tha se nuk do të ketë reduktim të forcave amerikane në Kosovë

 

Bondstill/Ferizaj, 29 mars 2003 - KFOR-i dhe UNMIK-u po punojnë së bashku për ta jetësuar Rezolutën 1244 dhe askush mos të gabohet për këtë, ka deklaruar dje gjenerali amerikan Daniel Kif pas një stërvitje të përbashkët të ekipeve nga 14 shtete të ndryshme të KFOR-it në kampin "Bondstill" afër Ferizajt.

 

Ai ka theksuar se paqeruajtësit amerikanë janë të përkushtuar në misionin e tyre në Kosovë dhe se misioni nuk ka pësuar ndonjë ndryshim për shkak të luftës në Irak.

 

Ushtarët amerikanë do të qëndrojnë në Kosovë për të realizuar misionin e tyre në kuadër të KFOR-it dhe nuk parashohin reduktim të veçantë, tha gjenerali Kif. Ai ka shtuar se stërvitjet e djeshme me helikopterë të KFOR-it dëshmojnë përkushtimin e tyre për të përmbushur detyrat e përcaktuara me Rezolutën 1244 të KS së bashku me Misionin e OKB-së.

Gjenerali amerikan Kif ka falënderuar me këtë rast popullin e Kosovës për përkrahjen që ua ofron ushtarëve të KFOR-it derisa ata vazhdojnë misionin për ta bërë Kosovën një vend më të mirë.

 

 

Rino Harnish e ka dënuar formimin e "bashkisë së komunave serbe" të Anamoravës

 

Prishtinë, 29 mars 2003 - Shefi i Misionit amerikan në Prishtinë Rino Harnish e ka dënuar formimin e "bashkisë së komunave serbe" të Anamoravës dhe e quajti një përpjekje për të krijuar sovranitete artificiale të bazuara në etnicitet.

 

Z. Harnish ka theksuar se Shtetet e Bashkuara vazhdojnë të përkrahin një strukturë të vetme të institucioneve politike, të cilat u shërbejnë të gjithë qytetarëve të Kosovës.

"Na inkurajon fakti se anëtarët e koalicionit serb 'Kthimi' ashtu si edhe shumë liderë të tjerë etnikë serbë në Kosovë janë distancuar nga kjo përpjekje jokonstruktive dhe e kanë bërë të qartë se ata nuk e përkrahin një bashkim të tillë", ka theksuar Harnish.

 

 

Nuk do të ketë grevë të mësimdhënësve të Kosovës që është paralajmëruar më herët

 

Prishtinë, 29 mars 2003 - Nuk do të ketë grevë të mësimdhënësve të Kosovës që është paralajmëruar më herët. Marrëveshjen për këtë e kanë arritur dje SBASHK-u dhe Ministria e Arsimit të Kosovës.

 

Në komunikatën e kësaj ministrie thuhet se gjatë tre muajve të ardhshëm do të bisedohet për zgjidhjen e këtij problemi.

 

 

UNICEF-i ka shprehur shqetësim për burgjet në Maqedoni ku vuajnë dënimin të miturit

 

Shkup, 29 mars 2003 - Fondi i OKB-së për fëmijët UNICEF po ndihmon Qeverinë e Maqedonisë për përgatitjen e një reforme në sistemin e drejtësisë për të miturit.

 

UNICEF-i ka shprehur shqetësim për burgjet ku vuajnë dënimin të miturit, duke vlerësuar se në kushtet e tanishme në këto institucione të miturit mund të kthehen në kriminelë. Ky organizëm evropian ka një sërë projektesh në Maqedoni për mbrojtjen e fëmijëve dhe zhvillimin e tyre.

 

 

Bush dhe ndihmësit e tij kanë mbrojtur strategjinë e tyre të Irakut

 

Uashington, 29 mars 2003 – Presidenti Xhorxh Bush dhe ndihmësit e tij të lartë kanë mbrojtur strategjinë e tyre të Irakut pasi një komandant i lartë amerikan ka deklaruar se luftimet po zhvillohen ndryshe dhe se lufta si duket do të zgjasë më gjatë se sa është planifikuar, njofton AFP.

 

Ata s'e kanë demantuar deklaratën e gjeral Uiliam Uollsit, por Bushi dhe ndihmësit e tij kanë insistuar se forcat amerikane dhe britanike po bëjnë "përparim të mirë".

 

 

Nga një autobombë vriten 5 ushtarë amerikanë

 

Naxhaf, 29 mars 2003 - Zyrtarë ushtarakë amerikanë thonë se pesë ushtarë amerikanë janë vrarë në një sulm në një pikë kontrolli ushtarake pranë qytetit të Naxhafit.

 

Zyrtarët thonë se një taksi të cilës po i jepte një civil ndaloi pranë një postblloku dhe shpërtheu ndërkohë që ushtarët amerikanë u afruan në atë që u duk të jetë një sulm vetëvrasës.

 

Më në jug gjatë natës, një zëdhënës amerikan tha se dy avionë sulmuan një ndërtesë në Basra pasi morën njoftime se 200 anëtarë të një force paraushtarake irakiane ishin mbledhur në një takim. Zëdhënësi tha se ndërtesa dykatëshe ishte shkatërruar.

 

Sipas BBC-së mendohet se të gjithë kanë vdekur.

 

 

Sot ka "shumë të vrarë" nga shpërthimet në Bagdad

 

Bagdad, 29 mars 2003 - Avionët amerikanë kanë filluar një valë të re sulmesh kundër Bagdadit në orët e para të mëngjesit.

Korrespondentët thonë se qyteti u trondit nga një sërë shpërthimesh ndërkohë që avionët fluturonin sipër.
Të premten të paktën 50 civilë kanë gjetur vdekjen gjatë një sulmi ajror mbi një treg në Bagdad, thonë autoritetet irakiane.

Imazhet televizive tregonin njerëz që përpiqeshin të gërmonin nëpër gërmadha për të gjetur viktimat e goditjes në lagjen rezidenciale Shula.

Njoftimet për shpërthimet erdhën ndërsa forcat e koalicionit rifilluan bombardimet gjatë natës mbi kryeqytetin irakian.

Dr Osama Sakhari nga spitali al-Noor, që është pranë tregut, i tha agjencisë së lajmeve Reuters se ai kishte numëruar 55 vetë të vrarë dhe më shumë se 47 të plagosur nga sulmi i të premtes. Ai tha se një foshnje kishte vdekur në duart e tij.

 

 

Ministri irakian i Informacionit thotë se 58 vetë kanë vdekur

 

Bagdad, 29 mars 2003 - Ministri irakian i Informacionit, Mohhamed Saeed Sahaf, i tha rrjetit televiziv arab al-Hayat-LBC se 58 vetë kishin vdekur dhe ai priste që numri i viktimave të shtohej.

Korrespondentetë në Bagdad thonë se nuk ka ende informacion të qartë se kush mund ta ketë shkaktuar shkatërrimin e tregut al-Nasser.

Një korrespondent i BBC-së në Bagdad thotë se banorët besojnë se shpërthimi është shkaktuar nga një raketë kruiz, dhe se është një shembull tjetër i moskokëçarjes së SHBA-së për jetët e civilëve.

 

 

Ramsfeld akuzoi Sirinë se po lejon trafikimin e pajisjeve ushtarake nëpër kufirin e saj me Irakun

 

Uashington, 29 mars 2003 - Në një zhvillim të veçantë, sekretari amerikan i Mbrojtjes, Donald Ramsfeld, akuzoi Sirinë se po lejon trafikimin e pajisjeve ushtarake nëpër kufirin e saj me Irakun dhe tha se vendi do të mbante përgjegjësi për atë që amerikanët e konsiderojnë si "veprim armiqësor".

Siria mohoi të ketë dërguar furnizime dhe tha se Shtetet e Bashkuara po gënjenin në përpjekje për të shmangur vëmendjen nga viktimat ndër civilët irakianë.

Zoti Rumsfeld paralajmëroi gjithashtu edhe Iranin - që organizoi të premten mitingje kundër luftës - që të mos lejojë rebelët irakianë të mbështetur nga Irani që të kalojnë në Irak.

 

 

Bombardime të reja në Nasaria

 

Nasaria, 29 mars 2003 - Një javë pas fillimit të luftimeve përreth qytetit Nasirijah, forcat amerikane kanë filluar bombardime të reja me artileti mbi qytet i cili ndodhet në një rrugë strategjike mbi lumin Eufrat.

Megjithë sulmet e ashpra amerikane, përfshirë sulme ajrore dhe përdorimin e helikopterëve, rezistenca irakiane vazhdon.

Zhurma e goditjeve të artilerisë është bërë e zakonshme në Nasiriyah.

Në fillim dëgjohet një fishkëllimë e fortë ndërsa predhat e artilerisë qëllohen, pastaj një shpërthim dhe dridhjet e mëdha të tokës.

Këtë mëngjes duket se shumica e predhave janë drejtuar kundër pozicioneve irakiane në anën lindore të qytetit, pranë kalimit stategjik të lumit Eufrat.

 

 

Forcat aleate në pauzë

 

Iraku Qendror, 29 mars 2003 - Zyrtarë ushtarakë amerikanë po refuzojnë të komentojnë mbi një njoftim se ata kanë vendosur të ndalojnë përkohësisht përparimin drejt Bagdadit për disa ditë.

Raporti i një pauze erdhi nga një korrespondent i Rojterit që është me forcat amerikane në Irakun Qëndror.

Oficerë amerikanë, emrat e të cilëve nuk u bënë të ditur, citohen të kenë thënë se përparimi i tyre pothuajse i kishte dhënë fund linjave të tyre të furnizimit, por se sulmet ajrore kundër forcave irakiane do të vazhdonin.

Një korrespondent i BBC-së që ndodhet me forcat e marinsave amerikanë tha se ata kanë ndaluar rreth 160 km në jug të Bagdadit.

 

 

OKB hap rrugën e ndihmave

 

OKB, 29 mars 2003 - Kombet e Bashkuara kanë votuar njëzëri rifillimin e programit të ndihmave 'naftë për ushqim' në Irak Rezoluta transferon administrimin e skemës në duart e Sekretarit të Përgjithshëm të Kombeve të Bashkuara Kofi Annan, në vend të udhëheqësit irakian Saddam Hussein.

Korrespondentët thonë se rezoluta do të përshpejtojë shpërndarjen e milardave dollarëve ndihma të vlefshme nën këtë skemë.

Presidenti Sadam Husein e ka kontrolluar më herët këtë program. Qeveria britanike tha se rezoluta u paraqit nga Gjermania, me mbështetje të Britanisë, Francës, Kilit dhe Bullgarisë.

 

 

Një raketë godet kryeqytetin kuvajtian

 

Kuvajt, 29 mars 2003 - Një raketë ka shpërthyer pranë një dyqani në buzë të detit në Kuvajt Siti. Autoritetet vendase thonë se dy persona janë lënduar lehtë.

Raketa ra në det vetëm pak metra larg dyqanit, duke thyer dritare dhe një derë xhami.

Zyrtarë kuvajtianë besojnë se raketa mund të jetë gjuajtur nga gadishulli Faw në Irak dhe ka kaluar pranë sipërfaqes së detit pasi radarët kuvajtianë nuk e zbuluan atë.

Po ashtu sirenat nuk ranë para shpërthimit.

Që prej fillimit të luftës në Irak, disa raketa janë gjuajtur në Kuvajt. Shumica janë interceptuar ose kanë rënë në zona të pabanuara.

 

 

Flesher: qeveria amerikane nuk mund të parashikojë sesa do të zgjatë luftë në Irak

 

Uashington, 29 mars 2003 - Zëdhënësi i Shtëpisë së Bardhë, Ari Flesher, tha se qeveria amerikane nuk mund të parashikojë sesa do të zgjatë luftë në Irak.

 

Zoti Flesher e bëri këtë koment në përgjigje të njoftimeve se fushata po ecën më ngadalë dhe po ndeshë në qendresë më të fortë sesa ishte parashikuar fillimisht. Zëdhënësi theksoi se disa gjëra janë të paparashikuar në ecurinë e luftës dhe shtoi se presidenti Bush është i bindur se forcat amerikane do të dalin fitimtare.

Deklaratat në mbrojtje të përpjekjeve të luftës së udhëhequr nga Shtetet e Bashkuara pasojnë komentet kontradiktore të komandantit të forcave amerikane në rajonin e Gjirit Persik. Gjeneral lejtnant Uilliam Uallas tha se ka të ngjarë që përmbysja e qeverisë irakiane të marrë më shumë kohë sesa mendohej fillimisht.

 

 

Lufta në Irak: Përçarja transatlantike

 

Uashington, 29 mars 2003 - Ish-sekretari amerikan i Shtetit, Henri Kisinxher, e cilëson përçarjen midis Gjermanisë e Francës nga njera anë dhe Shteteve të Bashkuara e Britanisë nga ana tjetër, një pikëkthesë historike. Ai thekson se ka ndodhur një çarje në institucionet ndërkombëtare dhe aleancat strategjike.

Dan Hamilton i Qendrës për Marrëdhëneit Ndërkombëtare pranë Universitetit Xhon Hopkins, është i njejtit mendim me zotin Kisinxher, se në radhët e aleancës perëndimore ka ndodhur një e çarë e thellë.

"Natyrisht, që dëmi brenda Evropës,- thotë zoti Hamilton,- është po aq i madh sa edhe ai në marrëdhëniet transatlantike."

Profesori Hamilton thotë se për evropianët, qëndrimet e njëanshme dhe fuqia e pakufizuar e Shteteve të Bashkuara, janë çështje madhore.

 

 

Ekipe amerikane për likuidimin e liderëve irakianë

 

Uashington, 29 mars 2003 - Ekipet sekrete amerikane të zbulimit dhe ushtarake janë infiltruar në qytetet irakiane dhe kanë për qëllim të vrasin liderët më të lartë të qeverisë dhe ushtrisë irakaine, njofton sot gazeta amerikane "Uashington post".

Copyright©2000-2003 Trepca.net - Të gjitha të  drejtat e rezervuara.