Lajme

E premte, 28 mars 2003

Përmbajtja:

• UNMIK-u thotë se shtyrja e bartjes së përgjegjësive nuk është bërë për shkak të presioneve nga Beogradi

• Një pjesë e lagjes Arbëria u mbajt mbrëmë e bllokuar me dyshimin se në një veturë ishte vendosur eksploziv

• Këshilli Ekonomik Fiskal ka refuzuar kërkesën e KEK-ut për dhënien e suficitit prej 93.9 milion euro

• Shpallja e fituesit të tenderit për kompaninë ajrore të Kosovës pritet të bëhet brenda një jave

• Morgan Smith tha se Kolorado e SHBA-ve mund të ndihmojë zhvillimin e Kosovës

• Banka Botërore thotë se në Shqipëri është ulur niveli i investimeve vendëse dhe të huaja

• Shqipëria ka përshëndetur vendimin për anëtarësimin e Serbisë dhe Malit të Zi në Këshillin e Evropës

• Policia serbe ka vrarë të të dyshuar për organizimin dhe kryerjen e vrasjes së Gjingjiqit

• Bagdadi vazhdon të bombardohet me projektile kryqëzore

• Nga fronti i luftës në Irak

• Bush dhe Bler ritheksuan vendosmërinë për ta fituar luftën në Irak

• Amerika përgatitet për luftë të gjatë

• Luftë "deri në fund"

• Bler thotë se nuk e dinte nëse Sadam Hyseini është gjallë, i vdekur, i plagosur apo i palënduar

• Në Hongkong merren masa drastike për izolimin e epidemisë, SARS

• Filloi gjykimi i atentatorit të politikanit të djathtë holandez, Pim Fortajn

• Dyshime për aktivitet terrorist të një grupi islamist

• Japonia lëshoi në hapësirë dy satelitë spiunë

• Këshilltari kryesor i Ministrisë amerikane të Mbrojtjes dha dorëheqje

• Forcat paramilitare në Basra sot hapën zjarr kundër civilëve

• Forcat irakiane mund të kryejnë sulme vetëvrasëse

• Bler tha se lufta për përmbysjen e Saddam Husseinit do të marrë kohë

• Dy sisteme Patriot kanë arritur në qytetin Diarbakir

• Uolfovic tha se Turqia ka bërë "gabim të madh"

• Sllovenia ka lejuar përdorimin e hapësirës ajrore

• Së shpejti fillon spastrimi i minave për hapjen e kanalit humanitar në portin Um Kasër

• Amerikanët do të përdorin mbi 1 miliardë e 600 milionë dollarë të e Irakut për rindërtimin e vendit

UNMIK-u thotë se shtyrja e bartjes së përgjegjësive nuk është bërë për shkak të presioneve nga Beogradi

 

Prishtinë, 28 mars 2003 - Zyrtarë të administratës ndërkombëtare në Kosovë kanë përgënjeshtruar pohimet se transferimi i përgjegjësive nga institucionet ndërkombëtare në ato vendore është shtyrë për shkak të presionit të Beogradit mbi administratën e UNMIK-ut.

 

Zëdhënësi i UNMIK-ut Sunil Narula tha se ky proces është në përputhje me Rezolutën 1244 dhe do të fillojë në muajin prill pavarësisht nga kundërshtimet serbe.

 

Ai nënvizoi se Beogradi nuk ka ndikim në punën e administratës ndërkombëtare në Kosovë dhe shtoi se nuk ka kurrëfarë presioni. Sipas tij shtyrja e takimit të Këshillit Qendror për bartjen e përgjegjësive është bërë, sepse ka pasur nevojë që të mbahet një takim përgatitor i nivelit më të ulët për të harmonizuar disa çështje teknike.

 

 

Një pjesë e lagjes Arbëria u mbajt mbrëmë e bllokuar me dyshimin se në një veturë ishte vendosur eksploziv

 

Prishtinë, 28 mars 2003 - Në hyrje të lagjesë Arbëria ish-Dragodan të Prishtinës në afërsi të restoranit "Amadeus", mbrëmë persona të panjohur kanë stacionuar një veturë me tabela të Kosovës, KS, ku në në dyert e saj ishte vendosur një mjet.

 

Policia dhe KFOR-i dyshonin se në këtë veturë mund të jetë vendosur një lëndë shpërthyese. Për një kohë forcat e policisë dhe të KFOR-it kishin mbyllur rrugë dhe kishin ndërprerë qarkullimin e njerëzve dhe të veturave në atë drejtim.

Më vonë ushtarët e KFOR-it suedez si dhe policia e SHPK-së veturën e vendosën në një kamion dhe supozohet se e dërguan në kampin e KFOR-it suedez. Pas këtij aksioni rruga u hap dhe njerëzit u kthyen në shtëpitë e veta pasi më parë ishin larguar.

 

 

Këshilli Ekonomik Fiskal ka refuzuar kërkesën e KEK-ut për dhënien e suficitit prej 93.9 milion euro

 

Prishtinë, 28 mars 2003 - Këshilli Ekonomik Fiskal ka refuzuar kërkesën e KEK-ut për të marrë 93.9 milion euro të suficitit nga buxheti i Kosovës.

 

Ky fond u kërkua nga Korporata për rehabilitimin e termocentraleve. Por kryeministri Rexhepi tha pas mbledhjes së Këshillit se suficiti shpërndahet pas rishikimit të buxhetit dhe nëse ka nevojë emergjente në fusha të caktuara.

Kërkesë tjetër është edhe pastrimi i Minierës Sipërfaqësore për sigurimin e thëngjillit gjatë dimrit dhe disa riparime të tjera që përfshijnë 17-18 milionë euro. Mirëpo kryeministri Rexhepi tha se për këtë është kërkuar projekti i detajizuar që do të shyrtohet në mbledhjen e Qeverisë së Kosovës.

 

 

Shpallja e fituesit të tenderit për kompaninë ajrore të Kosovës pritet të bëhet brenda një jave

 

Prishtinë, 28 mars 2003 - Pasi u hapën publikisht aplikacionet dhe tenderet për projektin e emërimit të transportuesit ajror të Kosovës, një komitet do t'i vlerësojë aplikacionet e dorëzuara dhe do të propozojë fituesin, i cili do të aprovohet nga ministri për Transport dhe Telekomunikacion dhe kryesuesi i Shtyllës së Katërt të UNMIK-ut.

 

Konkurruesit janë një kompani ajrore nga Sllovenia, një tjetër kompani nga Gjermania, një nga Kosova si dhe JAT-i i Beogradit, ndërkaq Lotos Aires nuk i kishte dokumentet e plota. Adria Airveis konkurron vetë, por në rast se fiton tenderin, në interes të afarizmit sa më pozitiv, do t'u lërë gjysmën e aksioneve vendore, ka deklaruar drejtori i kësaj kompanie sllovene.

 

 

Morgan Smith tha se Kolorado e SHBA-ve mund të ndihmojë zhvillimin e Kosovës

 

Prishtinë, 28 mars 2003 - Përfaqësuesi i Zyrës për Tregti Ndërkombëtare i Shteteve të Bashkuara Morgan Smith bisedoi me kryeministrin Rexhepi për politikat prioritare të zhvillimit ekonomik të Kosovës.

 

Smith e ftoi kryeministrin Rexhepi që të vizitojë Koloradon për t'i vendosur kontaktet me biznesmenët amerikan. Kolorado shteti prej nga vjenë edhe Morgan Smith mund të ndihmojë në zhvillimin ekonomik të Kosovës.

 

 

Banka Botërore thotë se në Shqipëri është ulur niveli i investimeve vendëse dhe të huaja

 

Tiranë, 28 mars 2003 - Banka Botërore bëri publik një raport ku thuhet se gjatë vitit 2002 në Shqipëri u ul niveli i investimeve vendëse dhe të huaja. Shkaku është korrupsioni në administratë, veçanërisht në sektorin tatim-taksave dhe të doganave.

 

Gjithashtu pengesë tjetër është edhe moszgjidhja e problemit të kthimit dhe kompensimit të pronave. Përfaqësitë e Bankës Botërore dhe Koorporatës Financiare Ndërkombëtare IFC në Shqipëri kanë arritur në këtë përfundim duke mbledhur të dhëna nga afro 500 kompani e biznese vendëse dhe të huaja si dhe kanë intervistuar afër 30 përfaqësues të administratës dhe këshilltarë të ekonomisë dhe financave.

Faktikisht gjatë vitit të kaluar ka pasur një ulje të investimeve vendëse dhe të huaja, pasi për shumë biznese që duan të zgjerojnë aktivitetin e tyre ka rritje artificiale të kostos së prodhimit nga abuzimet e administratës dhe rushfetet që kërkohen.

 

 

Shqipëria ka përshëndetur vendimin për anëtarësimin e Serbisë dhe Malit të Zi në Këshillin e Evropës

 

Tiranë, 28 mars 2003 - Shqipëria ka përshëndetur vendimin për anëtarësimin e Serbisë dhe Malit të Zi në Këshillin e Evropës.

 

Në një deklaratë të Ministrisë së Jashtme thuhet se Shqipëria si një nga vendet fqinje që vazhdimisht e ka mbështetur anëtarësimin e shpejt të Serbisë dhe Malit të Zi në Këshillin e Evropës, shpreh besimin se ky hap do t'i shërbejë nxitjes së reformave demokratike të vendit fqinj, si dhe forcimit të frymës së bashkëpunimit, paqes dhe stabilitetit afatgjatë në rajon.

 

 

Policia serbe ka vrarë të të dyshuar për organizimin dhe kryerjen e vrasjes së Gjingjiqit

 

Beograd, 28 mars 2003 - Policia ka vrarë dy nga krerët e bandës kriminale të Zemunit - Dushan Spasojeviq, të quajtur "Shiptar" dhe Mile Lukoviq, të quajtur "Kum" - gjatë përpjekjes për arrestimin e tyre.

 

Në një komunikatë të Qeverisë serbe thuhet se arrestimi i tyre nuk ka qenë i mundur për shkak se kishin bërë rezistencë të armatosur.

Spasojeviq dhe Lukoviq kanë qenë të dyshuar për organizimin dhe kryerjen e atentatit ndaj kryeministrit serb Zoran Gjingjiq.

 

 

Bagdadi vazhdon të bombardohet me projektile kryqëzore

 

Bagdad, 28 mars 2003 – Një shpërthim është dëgjuar sot (të premten) në qendër të Bagdadit dhe disa të tjera në periferi të qytetit, kurse mbrojtësit irakianë po shtien në aeroplanët dhe përpiqen t'i rrëzojnë me zjarr kundërajror, njofton Rojter sipas dëshmitarëve okularë. "Unë po dëgjoj aeroplanët luftarakë mbi kokë dhe zjarrin kundërajror", i ka thënë Nadim Ladki korrespondentit të kësaj agjencie. Qyteti po goditet vazhdimisht nga bombarduesit dhe projektilet kryqëzore, ka thënë ai.

 

 

Nga fronti i luftës në Irak

 

Bagdad, 28 mars 2003 - Avionët e koalicionit bombarduan sot Bagdadin, ndërsa forcat tokësore po i afrohen edhe më shumë kryeqytetit, pasi aviacioni i tyre u ngadalësua nga stuhia e shkretëtirës së dy ditëve radhazi.

 

Bombardimi më i fundit i Bagdadit, një nga më të rëndët deri tani, filloi mbrëmë vonë. Dëshmitarët okularë njoftuan për shpërthime masive në qendër të qytetit dhe në ndërtesat qeveritare përgjatë lumit Tigër. Forcat e koalicionit thonë se objektiv i goditjeve ishin qendrat e komunikimit dhe komandës.

Në jug të Bagdadit, luftime shpërthyen në qytetet Naxhif, Nasirjah dhe Savanah, ku forcat irakiane sulmuan dy autokolona kryesore të trupave të koalicinit që udhëtonin drejt kryeqytetit.

 

 

Bush dhe Bler ritheksuan vendosmërinë për ta fituar luftën në Irak

 

Kemp Dejvid, 28 mars 2003 - Presidenti Bush dhe kryeministri britanik Toni Bler thanë se lufta kundër Irakut po përparon ngadalë por pa u ndalur. Dy udhëheqësit premtuan se Sadam Huseini do të hiqet nga pushteti. Ata i bënë gjithashtu thirrje Kombeve të Bashkuara të rifillojë një program i cili lejon shitjen e naftës irakiane për të blerë ushqime për popullatën.

Në konferencën e shtypit, që u zhvillua në vendpushimin e presidentit Bush në Kemp Dejvid në përfundim të bisedimeve, presidenti Bush dhe kryeministri Bler ritheksuan vendosmërinë e tyre për ta fituar luftën në Irak. Presidenti Bush tha se forcat aleate po përparojnë çdo ditë e më tepër.

 

Ai shtoi se nuk mund të parashikonte se kur do të vinte fitorja por theksoi se objektivat e koalicionit po realizohen.

"Ne do të vazhdojmë deri sa të kryhet detyra. Për mendimin tim nuk ka asnjë kuptim që të përpiqemi të vemë afate ose të shprehim hamendje sepse kjo nuk përcaktohet nga koha por nga natyra e vetë punës," tha kryeministri Bler.

 

 

Amerika përgatitet për luftë të gjatë

 

Uashington, 28 mars 2003 - Ushtria e Shteteve të Bashkuara e ka pranuar se rezistenca e fortë që po bëjnë irakianët në qytetet strategjike të jugut, po e ngadalëson avancimin e forcës amerikano-britanike. Në përgatitje të një beteje të gjatë në Irak, Pentagoni njoftoi se 120 mijë trupa të tjera do të dërgohen si përforcime në rajonin e Gjirit.

Ndërkohë, një njësit elitar parashutist i ushtrisë amerikane, që deri tani nuk ka qenë i përfshirë në betejë, ka përforcuar forcat amerikane dhe britanike në jug të Irakut. Divizioni Parashutist 101 ka luftuar në Afganistan kundër Talebanëve dhe al-Kaidës.

 

Komandanti më i lartë i Ushtrisë Amerikane për sulmin tokësor tha se versioni i një lufte të gjatë tani është më i mundshëm pas rezistencës së fuqishme që trupat kanë hasur në Irak.

 

 

Luftë "deri në fund"

 

Bagdad, 28 mars 2003 - Ministri irakian i mbrojtjes Sultan Hashem Ahmed, tha të enjten në Bagdad se pret që forcat amerikano-britanike ta rrethojnë qytetin brenda pesë deri dhjetë ditëve të ardhshme.

 

Ai u tha gazetarëve në Bagdad se forcat armike kanë aftësinë ta rrethojnë qytetin, por se ata do të përballen me luftime rrugë më rrugë nëse do të provojnë që të hyjnë në qytet. "Bagdadi do të jetë i padepërtueshëm sa të jenë gjallë bijtë e tij," tha gjenerali."Qëllimi ynë është që të luftojmë deri në fund".

 

 

Bler thotë se nuk e dinte nëse Sadam Hyseini është gjallë, i vdekur, i plagosur apo i palënduar

 

Londër, 28 mars 2003 – Kryeministri britanik, Toni Bler ka thënë sot se ai nuk e dinte nëse lideri irakian, Sadam Hyseini, është gjallë, i vdekur, i plagosur apo i palënduar, njofton Rojter. "Ne nuk e dimë se çfarë është situata në lidhje me Sadamin. Ne e dimë se ata kanë emituar të gjitha llojet e figurave, që do të tregonin atë", ka shtuar Bler.

 

 

Në Hongkong merren masa drastike për izolimin e epidemisë, SARS

 

Hongkong, 28 mars 2003 - Në Hongkong janë marrë masa drastike për izolimin e epidemisë atipike të mushkërive, SARS. Karantinë absolute është akodruar jo vetëm për pacientët, por edhe për rreth 1000 opersonat e tjerë, të cilët patën kontakt me ta.

 

Të gjithë udhëtarët janë të detyruar të japin shpjegime rreth gjendjes së tyre shëndetsore. Të gjitha spitalet vendase do të furnizohen me një test të Universitetit të Hongkongut, i cili mundësor identifikimin e sëmundjes edhe së stadin e saj fillestar.

 

Hongkongu dhe krahina kufitare kineze e Guangdongut konsideorhen si qendra të epidemisë. Organizata Botërore e Shëndetsisë numëron deri tani në të gjithë botën 1400 të sëmurë, 53 vetë kanë gjetur deri tani si pasojë vdekjen.

 

 

Filloi gjykimi i atentatorit të politikanit të djathtë holandez, Pim Fortajn

 

Amsterdam, 28 mars 2003 - Sot, dhjetë muaj pas vrasjes së politikanit të djathtë populist holandez, Pim Fortajn, filloi në Amsterdam procesi i gjykimit të atentatorit të dyshuar. 33-vjeçari, Folkert fan der Graf përsëriti dje para gjykatës deponimin e fajit, të bërë më parë gjatë hetimeve.

 

Ai justifikoi aktin si një masë parandalimi të rrezikut, që Pim Fortajn paraqiste për shoqërinë. I pandehuri sqaroi, se politikani, me parullat e tij të nxitjes së urrejtes kundër të huajve, të polarizimit të shoqërisë dhe të sulmimit të partive holandeze me traditë, kishte zënë të fitonte gjithnjë e më shumë zgjedhës. Në këto kushte eleminimi fizik mbetej rruga e vetme e ndalimit të tij, sqaroi i pandehuri Fan der Graf.

 

 

Dyshime për aktivitet terrorist të një grupi islamist

 

Karlsruhe, 28 mars 2003 - Në Gjermani janë shtuar dyshimet për aktivitetin terrorist të një grupi islamist. "Süddeutsche Zeitung" dhe "Berliner Tagesspiegel" njoftuan, se hetuesit kanë zbuluar në banesën e një afrikanoveriori në Gelsenkirchen një program kompjuterik për simulimin e navigacionit ajror, një listë kimikatesh dhe një manual helmesh.

 

Në fundjavë, prokuroria federale kishte lëshuar një urdhër arresti për 32-vjeçarin, e dyshuar për krijimin e një organizate terroriste.

 

 

Japonia lëshoi në hapësirë dy satelitë spiunë

 

Tokio, 28 mars 2003 - Në sfondin e konfliktit për programin bërthamor të Koresë së Veriut Japonia njoftohet të ketë lëshuar në hapësirë dy satelitë spiunë. Zëdhënësi i Qendrës japoneze të kërkimeve në hapësirë njoftoi se nisja e raketës transportuese të satellitëve ishte kryer me sukses.

 

Satelitët, e prodhuar në Japoni janë në gjendje të dallojnë objkete më të vogla se një metër. me nidhmën e tyre, autoritetet japoneze synojnë të vëzhgojnë programet bërthamore dhe ato të prodhimit të raketave në Korenë e Veriut.

 

 

Këshilltari kryesor i Ministrisë amerikane të Mbrojtjes dha dorëheqje

 

Uashington, 28 mars 2003 - Këshilltari kryesor i Ministrisë amerikane të Mbrojtjes, Riçard Perle njoftohet të ketë dhënë dorëheqjen. Ai është njëri prej përkrahësve më të flaktë të luftës në Uashington, i cili pati ndikim të madh në hartimin e strategjisë së luftës në Irak.

 

Javën e shkuar Perle kritikoi ashpër qëndrimin e OKB-së dhe NATO-s në krizën e Irakut. Dorëheqjn e vet, ai e justifikoi me diskutimin e lindur për shkak të angazhimit të tij për një ndërmarrje telekomunikacioni, të rrezikuar prej falimentimit.

 

 

Forcat paramilitare në Basra sot hapën zjarr kundër civilëve

 

As Sajlia, 28 mars 2003 - Zëdhënësi i ushtrisë britanike tha se forcat paramilitare në Basra sot hapën zjarr kundër civilëve që u përpoqën ta braktisin qytetin.

Roni Mekkurt tha se paramilitarët irakianë gjuajtën me mortaja dhe automatikë në drejtim të mijëra civilëve, të cilët largoheshin në veri dhe perëndim të Basrës.

 

 

Forcat irakiane mund të kryejnë sulme vetëvrasëse

 

Uashington, 28 mars 2003 - Komandanti i trupave tokësore amerikane në Gjirin ka thënë se linjat e gjata furnizuese dhe luftimet e forcave irakiane e kanë ndaluar lëvizjen drejt Bagdadit, dhe ndoshta luftën mund ta zgjatin edhe më shumë.

Gjeneral lejtnant Uilliem Uallas i ka deklaruar shtypit amerikan se forcat irakiane janë të gatshme të kryejnë sulme vetëvrasëse kundër forcave më superiore amerikane dhe britanike.

 

 

Bler tha se lufta për përmbysjen e Saddam Husseinit do të marrë kohë

 

Londër, 28 mars 2003 - Kryeministri i Britanisë Toni Bler tha se lufta për përmbysjen e Saddam Husseinit do të marrë kohë, dhe se ajo i ka "momentet e ashpra e të vështira".

Bler tha se Kombet e Bashkuara sot ose nesër mund ta miratojnë rezolutën për riaktivizimin e programit humanitar naftë për ushqim.

Pas bisedimeve me sekretarin e përgjithshëm Kofi Anan, Bler tha se kur Kombet e Bashkuara sërish të angazhohen në Irak, kjo "do të shkaktojë ndryshim të madh të qëndrimeve".

Programi, i cili parasheh ndihma në ushqim për 60 % të irakenëve, u pezullua para fillimit të luftës në Irak.

 

 

Dy sisteme Patriot kanë arritur në qytetin Diarbakir

 

Diarbakir, 28 mars 2003 - Dy sisteme të tjera mbrojtëse të NATO-s Patriot kanë arritur në qytetin Diarbakir, në juglindje të Turqisë. NATO tha se dërgesa e sistemeve Patriot ka për qëllim mbrojtjen e Turqisë nga ndonjë sulm i Irakut.

 

 

Uolfovic tha se Turqia ka bërë "gabim të madh"

 

Uashington, 28 mars 2003 - Zëvendëssekretari amerikan i Mbrojtjes Pol Uolfovic tha se Turqia ka bërë "gabim të madh" kur parlamenti nuk u lejoi trupave amerikane ta shfrytëzojnë territorin e Turqisë për të invaduar Irakun.

Uolfovic tha se megjithatë, Shtetet e Bashkuara kërkuan shumë nga Turqia, e cila prapëseprapë u dakordua të lejojë fluturimin e aeroplanëve amerikanë mbi territorin e saj.

 

 

Sllovenia ka lejuar përdorimin e hapësirës ajrore

 

Lubjanë, 28 mars 2003 - Sllovenia e ka lejuar përdorimin e hapësirës ajrore për transportin e personelit, pajisjeve dhe ndihmave humanitare në Irak. Shumica e sllovenëve, të cilët të dielën votuan për të hyrë në NATO, e kundërshtojnë fushatën ushtarake të prirë nga Shtetet e Bashkuara në Irak.

 

 

Së shpejti fillon spastrimi i minave për hapjen e kanalit humanitar në portin Um Kasër

 

Kambera, 28 mars 2003 - Zyrtarët e Mbrojtjes të Australisë thanë se së shpejti do të fillojë spastrimi i minave për hapjen e kanalit humanitar në portin Um Kasër në Irakun jugor.

Si porti i vetëm i përshtatshëm, Um Kasër është i domosdoshëm për operacionet ushtarake dhe humanitare.

 

 

Amerikanët do të përdorin mbi 1 miliardë e 600 milionë dollarë të e Irakut për rindërtimin e vendit

 

Uashington, 28 mars 2003 - Shtetet e Bashkuara thanë se planifikojnë të përdorin mbi 1 miliardë e 600 milionë dollarë të konfiskuara nga asetet e Irakut për rindërtimin e vendit pas luftës.

Departamenti i Thesarit tha se mjetet, që qeveria e Irakut i kishte deponuar në bankat amerikane, janë "ngrirë" para më se 10 viteve.

Copyright©2000-2003 Trepca.net - Të gjitha të  drejtat e rezervuara.