Lajme

E enjte, 27 mars 2003

Përmbajtja:

• Një vajzë kërceu nga një ndërtesë e Prishtinës dhe vdiq në vend

• KE: Në Kosovë vazhdon përforcimi i demokracisë dhe i shtetit të së drejtës

• Kuvendi i Kosovës miratoi në parim ligjin për tatimin mbi pronën e paluajtshme

• Deputetët po diskutojnë për projektligjin për tatimin mbi pronën e paluajtshme

• Më 3 prill në në Prishtinë do të mbahet konferenca rinore - "Rinia e Kosovës–brenga dhe krenaria"

• Pjesëtarët e TMK-së u kthyen nga trajnimi dyjavor në Afrikë të Jugut

• Një pjesë e parkut "Gërmia" afër Prishtinës dy ditë radhazi është përfshirë nga një zjarr

• Apel i Drejtoratit për Mbrojtje Civile dhe Emergjencë i Komunës së Prishtinës

• Qytetarët e Kosovës, të cilët do të udhëtojnë jashtë vendit me veturat e tyre do të kenë disa lehtësi

• KE kërkon nga Shkup t'i japë fund praktikës diskriminuese ndaj Kosovës

• Sipas Komisionit Evropian, Shqipëria mbetet një vend me demokraci të re dhe të paqëndrueshme

• Përfaqësuesit e BE-së dhe të Departamentit të Shtetit shfaqën vizionin për Shqipërinë

• Shqipëria dhe Bullgaria nënshkruan në Tiranë tri marrëveshje në fushën e tregtisë, të transportit dhe të arsimit

• Një grup ushtarakësh nga Shqipëria të hënën do të niset për një mision luftarak në Gjirin Persik

• Një aeroplan që fluturoi nga Prishtina në Tiranë gjatë aterimit ka dalë jashtë pistes në Rinas

• BE do të vazhdojë të ndihmojë reformat në Kosovë

• "Qelitë antiimperialiste territoriale" marrin përsipër atentatet ndaj makinave amerikane në Viçencë

• Shpërthimet e reja trondisin Bagdadin

• Në luftën e Irakut deri tash janë vrarë 24 ushtarë amerikanë

• Iraku thotë se deri tash janë vrarë mbi 350 civilë

• Dhjetëra marinsa amerikanë janë plagosur gabimisht në një shkëmbim zjarri

• Mbi 30 shpërthime të fuqishme kanë tronditur Bagdadin sot herët në mëngjes

• Ushtarët izraelitë kanë vrarë dy policë palestinezë

• Bush dhe Bler në takimin e sotëm kanë biseduar për strategjinë e luftës në Irak dhe periudhën e pasluftës

• Presidenti Bush përgëzon trupat amerikane

• Parashutistët amerikanë hapin frontin verior

• Garda Republikane ndeshet me forcat amerikane

• Rusia kërkon ndalimin e luftës në Irak

• Shtohet numri i viktimave të epidemisë SARS

• Koreja e Veriut kërcënon Korenë e Jugut dhe Japoninë

• NATO dhe shtatë shtete të Evrops Juglindore dhe Qendrore nënshkroi marrëveshjet e anëtarësimit

• Filloi gjykimi i gjashtë opozitarëve irakianë në Berlin

Një vajzë kërceu nga një ndërtesë e Prishtinës dhe vdiq në vend

 

Prishtinë, 27 mars 2003 - Një vajzë 23-vjeçare, Ganimete Haziri, nga Prishtina vdiq dje pasi diku rreth orës 9:00 të mëngjesit kishte kërcyer nga kati i katërmbëdhjetë i ndërtesës në lagjen "Lakërishte" të Prishtinës. Shkaktari i kësaj ngjarjeje tronditëse, u tha se ishte një konflikt familjar.

"Ende nuk i dimë arsyet e kësaj ngjarjeje tronditëse, mirëpo kemi dëshmitarët të cilët shpresojmë se do të na tregojnë se a ishte ngjarja aksidentale apo edhe e kundërta", tha zëdhënësi i policisë së UNMIK-ut.

 

 

KE: Në Kosovë vazhdon përforcimi i demokracisë dhe i shtetit të së drejtës

 

Bruksel, 27 mars 2003 - Komisioni Evropian në raportin më të ri thekson se në Kosovë po vazhdon të vihet re një përforcim i demokracisë dhe i shtetit të së drejtës, si dhe vënia në jetë e reformave në përputhje me kërkesat e BE-së.

 

Transferimi kompetencave tek institucionet e Kosovës konsiderohet pozitive dhe thuhet se sfida më e madhe e këtyre institucioneve është që të marrin më shumë përgjegjësi.

 

Nga autoritetet vendore kërkohet që më shumë të përqëndrohen në marrjen e këtyre e kompetencave dhe të mos harxhojnë energji të sfidojnë administratën e UNMIK-ut apo në hapjen e parakohshme të debateve për zgjidhjen e statusit të Kosovës.

Komisionit Evropian kërkon nga UNMIK-u që t'i shbërbëjë strukturat paralele të serbëve në veri të Mitrovivës, thuhet në raportin e KE.

 

 

Kuvendi i Kosovës miratoi në parim ligjin për tatimin mbi pronën e paluajtshme

 

Prishtinë, 27 mars 2003 - Kuvendi i Kosovës me shumicë votash sot miratoi në parim ligjin për tatimin mbi pronën e paluajtshme, pasi që më parë ministri i Ekonomisë dhe Financave Ali Sadria justifikoi para deputetëve se pse duhet të miratohet ky ligj.

Deputetët nuk diskutuan raportin për gjyqësinë e Kosovës sepse nuk ishin të pranishëm përgjegjësit e shtyllës së parë të UNMIK-ut. Kështu Kuvendi shtyri për një seancë tjetër shqyrtimin e këtij raporti.

Në të njëjtën kohë Kuvendi miratoi rendin e ditës së seancës së ardhshme, në të cilën duhet të debatohet për punën njëvjeçare të Qeverisë së Kosvës dhe do të bëhet shqyrtimi i projetligjit për bibliotekat.

 

 

Deputetët po diskutojnë për projektligjin për tatimin mbi pronën e paluajtshme

 

Prishtinë, 27 mars 2003 - Në seancën e sotme të Kuvendit të Kosovës, deputetët po diskutojnë për projektligjin për tatimin mbi pronën e paluajtshme.

 

Paraprakisht ministri i Ekonomisë dhe Financave Ali Sadria paraqiti një ekspoze, në të cilën tha se miratimi i një ligji të tillë është i rëndësishëm sepse krijon mundësi që komunat të përmbushin e nevojat e veta me vjeljen dhe shrytëzimin e tatimit mbi pronën e paluajtshme në territorin e tyre.

 

Sadria tha se ligji do të jetë në harmoni me standardet ndërkombëtare. Ndërkaq nga ky tatim do të përjashtohen vetëm pronat që shfrytëzohen nga institucionet vetëqeverisëse, si edhe ato ndërkombëtare në Kosovë.

Por në fillim të seancës nga rendi i ditës u hoq raporti për gjyqësinë e Kosovës, meqë nuk ishin të praishëm përgjegjesit për këtë fushë.

Në seancën e sotme po marrin pjesë të gjitha grupet e përfaqësuara në Kuvendin e Kosovës.

 

 

Më 3 prill në në Prishtinë do të mbahet konferenca rinore - "Rinia e Kosovës–brenga dhe krenaria"

 

Prishtinë, 27 mars 2003 - Më 3 prill në mjediset e hotelit "Grand" në Prishtinë do të mbahet konferenca rinore me temën:

"Rinia e Kosovës – brenga dhe krenaria".

Në këtë konferencë, përpos perfaqësuesve të organizatave dhe forumeve rinore, janë ftuar edhe përfaqësues të lartë ndërkombëtarë dhe vendorë, si dhe përfaqësues të institucioneve të Kosovës.

Një theks i veçantë në këtë konferencë do t'i kushtohet çështjes së papunësisë, shkollimit dhe universitetit si dhe fenomeneve negative në shoqëri që e rrezikojnë të ardhmen, si dhe vizioni i rinisë së Kosovës se si dëshiron ta shohë të ardhmen e saj dhe të vendit në të cilin jeton.

 

 

Pjesëtarët e TMK-së u kthyen nga trajnimi dyjavor në Afrikë të Jugut

 

Prishtinë, 27 mars 2003 - Një njësi e gardës së TMK e përbërë nga 26 pjesëtarë është kthyer dje në Prishtinë nga trajnimi dyjavor në Afrikë të Jugut. Komandanti i TMK-së, Agim Çeku këtë trajnim e cilësoi si përfaqësim të denjë të TMK-së. Ky ishte trajnimi i tretë me radhë i TMK-së i mbajtur në Afrikën Jugore.

Së shpejti një njësit nga Zona e Këtërt e TMK-së do të udhëtojë për Gjermani në një operacion tjetër profesional.

 

 

Një pjesë e parkut "Gërmia" afër Prishtinës dy ditë radhazi është përfshirë nga një zjarr

 

Prishtinë, 27 mars 2003 - Një pjesë e parkut "Gërmia" në Prishtinë tash dy ditë e kishte përfshirë një zjarr i fuqishëm, i cili ka arritur të lokalizohet pas intervenimit të njësitit të zjarrfiksve dhe policisë. Zjarret kanë përfshirë edhe pyjet në fshatrat e Vranidollit dhe të Hajkobilles.

Shkaktarët e zjarrit nuk dihen, por dyshohet se vënia e zjarrit ka qenë e qëllimshme. Lidhur me këtë kryetari i Asamblesë Komunale të Prishtinës Ismet Beqiri i ka njoftuar gazetarët se rreth 14 hektarë tokë janë përfshirë nga zjarri dhe ai dyshon se zjarri nuk është shkaktuar nga fatkeqësitë natyrore, por nga dora e njeriut.

 

 

Apel i Drejtoratit për Mbrojtje Civile dhe Emergjencë i Komunës së Prishtinës

 

Prishtinë, 27 mars 2003 – Drejtorati për Mbrojtje Civile dhe Emergjencë në KK të Prishtinës, përmes një komunikate për opinion të nënshkruar nga drejtori i këtij Drejtorati, kolonel Zaim Berisha, lëshoi sot një komunikatë për opinion, në të cilën thuhet:

 

"Apelojmë te qytetarët e Komunës së Prishtinës që mbeturinat dhe gjësendet tjera që ndizen me qëllim të pastrimit të arave dhe oborreve të tyre, t'i mbajnë nën kontroll, sepse shkaktar i tyre për ndezjen e disa dhjetëra hektarëve të pyjeve në territorin e Komunës së Prishtinës ishin edhe këto mbeturina të pakontrolluara nga qytetarët tanë.

 

Në territorin e Komunës së Prishtinës kanë shpërthyer gjashtë zjarre, me ç’rast janë dëmtuar dhjetëra hektarë me hapësirë të pyllëzuar", thuhet në fund të komunikatës për opinion të Drejtorisë për Mbrojtje Civile dhe Emergjencë të KK të Prishtinës.

 

 

Qytetarët e Kosovës, të cilët do të udhëtojnë jashtë vendit me veturat e tyre do të kenë disa lehtësi

 

Prishtinë, 27 mars 2003 - Qytetarët e Kosovës, të cilët do të udhëtojnë jashtë vendit me veturat e tyre do të kenë disa lehtësi. Së pari në rast aksidentimi në cilin do shtet të Evropës atyre do t'u paguhen të gjitha dëmet. Në anën tjetër së shpejti do të fillojë edhe dhënia e kartonave të gjelbër dhe qytetarët e Kosovës pa asnjë problem do të udhëtojnë jashtë vendit.

Tash e tutje veturat me regjistrim KS do të jenë të siguruara edhe në vende të tjera evropiane.
E tërë kjo është rezultat i marrëveshjes mes kompanisë austriake të sigurimeve AVUS dhe kompanive të Kosovës të sigurimeve.

 

 

KE kërkon nga Shkup t'i japë fund praktikës diskriminuese ndaj Kosovës

 

Bruksel, 27 mars 2003 - Maqedonia është kritikuar nga Komisioni Evropian për shkak se ndjek një politikë të dyfishtë doganore të mallrave me origjinë nga Kosova.

 

Kështu, për shembull, doganat maqedonase nuk pranojnë futjen e mallrave me taksa të ulura në territorin e saj nga Kosova, ndërkohë që ajo eksporton në Kosovë mallra me taksa të ulura, madje edhe për prodhime të tilla si banane apo kripë deti, që nuk prodhohen në Maqedoni.

 

Një praktikë e tillë diskriminuese duhet marrë fund, theksojnë zyrtarët e Komisionit Evropian.

Gjithashtu Komisioni Evropian i kërkon Shkupit shpërbërjen e plotë të formacioneve paramilitare që vepruan gjatë konfliktit në këtë vend.

 

 

Sipas Komisionit Evropian, Shqipëria mbetet një vend me demokraci të re dhe të paqëndrueshme

 

Bruksel, 27 mars 2003 - Komisioni Evropian vë në dukje se Shqipëria mbetet një vend me një demokraci të re dhe të paqëndrueshme. Edhe përparimet e vërejtura pas dialogut ndërmejt forcave politike, rrezikojnë të zhduken me shpejtësi në rast se në këtë Shqipëri nuk ngulitet një kulturë demokratike, e bazuar te koncensusi.

 

E njëjtja gjende vihet re edhe në funksionin publik. Edhe ato pak përparime në këtë fushë janë vënë në pikëpyetje nga disa emërime politike dhe nepotike në disa sektorë jetikë. Korrupsioni i shtrirë dhe krimi i organizuar vazhdojnë të përbëjnë kërcënime serioze për stabilitetin dhe përparimin e vendit.

 

Shqipëria ka dëshmuar aftësinë e saj në hartimin e planeve për veprim, në përgatitjen e maketeve në ngritjen e institucioneve të specializuara me qëllim që të pushtojnë korrupsionin.

 

 

Përfaqësuesit e BE-së dhe të Departamentit të Shtetit shfaqën vizionin për Shqipërinë

 

Tiranë, 27 mars 2003 - Përfaqësuesit e BE-së dhe Departamentit amerikan të Shtetit u konsultuan jozyrtarisht në Tiranë për vizionin e tyre për Shqipërinë. Drejtori për Ballkanin Perëndimor në BE Pribe dhe zëvendëskoordinatorja për asistencën e SHBA-ve në Evropë, Hancen theksuan se anëtarësimi i Shqipërisë në BE dhe në strukturat evroatlantike është synimi i të dyja palëve.

 

Ata e cilësuan si përparësi luftën kundër krimit të organizuar, korrupsionit dhe trafikimit si dhe njëkohësisht promovimin e mëtutjeshëm dhe të vazhdueshëm të shtetit ligjor. Të dyja palët shqyrtuan gjithashtu mënyrat për ta ndihmuar Shqipërinë për të përmbushur detyrimet e veta drejt integrimit të plotë evropian.

 

 

Shqipëria dhe Bullgaria nënshkruan në Tiranë tri marrëveshje në fushën e tregtisë, të transportit dhe të arsimit

 

Tiranë, 27 mars 2003 - Shqipëria dhe Bullgaria kanë nënshkruar në Tiranë tri marrëveshje që kanë të bëjnë me zhvillimin e tregtisë së lirë, për modernizimin e transportit dhe njohja e diplomave për studentët e titujve shkencorë për profesorët dhe akademikët midis këtyre dy vendeve u nënshkruan nga ministrat e ekomisë, arsimit dhe transportit të Shqipërisë dhe Bullgarisë, në prani të kryemiministrave Nano dhe Simeon.

Marrëveshja e tregtisë së lirë parashikon që brenda pesë vjetësh të dy vendet do të liberalizojnë tregun industrial dhe të reduktojnë gradualisht tarifat doganore.

 

Marrëveshja e transportit ndërkombëtar ka të bëjë me njohjen dhe zhvillimin e një sistemi modern të transportit, duke përdorur avantazhin e transportit hekurudhor, rrugor dhe detar. Në marrëveshjen e tretë mnë fushën e arsimit parashikohet njohja e diplomave dhe e titujve shkencorë.

 

 

Një grup ushtarakësh nga Shqipëria të hënën do të niset për një mision luftarak në Gjirin Persik

 

Tiranë, 27 mars 2003 - Një grup ushtarakësh nga Shqipëria të hënën do të niset për një mision në Gjirin Persik. Ky është kontigjenti i tretë paqeruajtës shqiptar pas Bosnjes dhe Afganistanit. Këtë kontigjent e përbëjnë 70 ushtarë dhe pesë oficerë të lartë, që do të thotë misioni tremujor në Irak.

Ky kontigjent do të jetë nën komandën amerikane dhe do të përqëndrohet në misione të sigurisë dhe ruajtjes së objekteve.

 

 

Një aeroplan që fluturoi nga Prishtina në Tiranë gjatë aterimit ka dalë jashtë pistes në Rinas

 

Tiranë, 27 mars 2003 - Një aeroplan që po fluturonte nga Prishtina në Tiranë gjatë aterimit ka dalë rreth 50 metra jashtë pistes së aeroportit "Nëna Tereze" në Rinas. Ngjarja ka ndodhur rreth orës 14:30. Njoftohet se asnjëri nga 20 udhëtarët që gjendeshin në aeroplan nuk janë lënduar dhe nuk ka pasur dëme materiale.

Për fat pjesa e tokës ku kaloi avioni është me tel, gjë që e uli ndjeshëm shpejtësinë e tij dhe ka bërë të mundur frenimin nga piloti. Sipas njoftimit të Ministrisë së Rendit Publik nuk ka pasur asnjë të dëmtuar nga pasagjerët. Nga të dhënat e para rezulton se pilotët nuk kanë mundur të frenojnë në kohën që do të merrnin kthesen në aeroport.

 

 

BE do të vazhdojë të ndihmojë reformat në Kosovë

 

Bruksel, 27 mars 2003 - Komisioni Evropian ka miratuar raportin vjetor të shteteve ballkanike që janë përfshirë në procesin e asociim-stabilizimit. Në këtë raport theksohet se vendet ballkanike kanë arritur shumë gjatë 12 muajve të fundit sa i përket reformave, pastaj përmirësimi i sigurisë, vendosja e qeverive të zgjedhura në mënyrë demokratike në tërë rajonin, rindërtimi masiv, mbajtja nën kontroll e inflacionit, rritja e shkëmbimit tregtar dhe sidomos rritja e bashkëpunimit rajonal.

Ndonëse Kosova nuk është përfshirë në raport të veçantë, ajo përmendet në raportin për Serbinë dhe Malin e Zi. Në pjesën e raportit të KE, ku flitet për Kosovën, theksohet se BE do të vazhdojë të ndihmojë reformat në Kosovë dhe kërkon që të gjithë të përqëndrohen në reforma, e jo në debate të parakoshme për statusin final të Kosovës.

 

Megjithatë theksohet se në Kosovë po punohet drejt përforcimit të demokracisë dhe sundimit të ligjit, përfshirë këtu edhe miratimin e normave që janë kompatibile me ato evropiane. Transferi i kompetencave në institucionet e Kosovës konsiderohet pozitiv dhe thuhet se sfida më e madhe e institucioneve është që të marrin më shumë përgjegjësi.

Në këtë raport pastaj theksohet se mekanizmat për Kosovën në kuadër të procesit të asocim-stabilizimit, kanë për qëllim që Kosova të përgatitet për të hyrë në BE, pa marrë parasysh se çfarë do të jetë statusi i saj final.

 

 

"Qelitë antiimperialiste territoriale" marrin përsipër atentatet ndaj makinave amerikane në Viçencë

 

Romë, 27 mars 2003 - Grupi i quajtur "Qelitë antiimperialiste territoriale", e afërt me idetë e Brigadave të Kuqe ka marrë përsipër atentatet e paradokohshme ndaj makinave amerikane në qytetin Viçenca të Italisë.

 

Ky grup gjatë tri ditëve të fundit ka vendosur bomba ose ka hedhur mjete shpërthyese ndaj makinave ushtarake amerikane në bazën e Viçencës. Ata këtë e bënë të ditur në afishet që ia dërguan gazetës "Xhornale" të Viçencës.

 

 

Shpërthimet e reja trondisin Bagdadin

 

Bagdad, 27 mars 2003 - Shpërthimet e fuqishme dridhën qendrën e Bagdadit sot në mesditë duke shkaktuar tronditje. Korrespondenti Rojterit njofton për tri shpërthime të fuqishme nga gjuajtjet e aeroplanëve të luftës. Fill pastaj pasoi një seri shpërthimesh në qendër të qytetit.

 

 

Në luftën e Irakut deri tash janë vrarë 24 ushtarë amerikanë

 

Uashington, 27 mars 2003 – Departmenti i Mbrojtjes ka identifikuar sot (të enjten) dy ushtarët e vrarë të dielën në pritën, që iu bë një konvoji ushtarak dhe kështu numri i ushtarëve të vrarë amerikanë në luftën e Irakut ka arritur në 24 sish, njofton Rojter.

 

Pentagoni ka thënë se 7 ushtarë amerikanë zyrtarisht konsiderohen të burgosur lufte, kurse 10 të tjerë të zhdukur. Ndërkaq, deri të mërkurën vonë kërkoheshin 28 ushtarë amerikanë.

 

Ndër 24 amerikanët e vrarë në luftën kundër Irakut, 19 sish janë vrarë në luftime, ndërsa pesë kanë humbur jetën aksidentalisht, kanë thënë zyrtarët ushtarakë amerikanë. Ndërsa, Britania ka një listë prej 22 ushtarësh të saj të vrarë ose të zhdukur.

 

 

Iraku thotë se deri tash janë vrarë mbi 350 civilë

 

Bagdad, 27 mars 2003 – Iraku ka thënë sot (të enjten) se mbi 350 civilë irakianë, kryesisht gra, fëmijë dhe pleq, janë vrarë që kur Shtetet e Bashkuara dhe Britania kanë filluar okupimin një javë më parë, njofton Rojter.

 

Në një konferencë shtypi në anglisht në Bagdad, ministri i Shëndetësisë, Umid Midhat Mubarak, ka akuzuar forcat amerikane dhe britanike se kanë përdorur klasterë bomba dhe armë të tjera për të frikësuar civilët dhe për t'i maksimalizuar dëmet.

 

 

Dhjetëra marinsa amerikanë janë plagosur gabimisht në një shkëmbim zjarri

 

Nasiria, 27 mars 2003 – Dhjetëra marinsa amerikanë janë plagosur gabimisht afër qytetit jugor irakian Nasiria në një shkëmbim zjarri ndërmjet tyre, njofton AFP.

 

Predha e mortajës, thuhet në vazhdim të njoftimit, ka goditur pikën komanduese të shtabit të marinës afër Nasirisë dhe kështu ka plagosur 37 ushtarë, tre syresh në gjendje kritike dhe dy të tjerë në gjendje të rëndë, kanë thënë zyrtarët ushtarakë.

 

 

Mbi 30 shpërthime të fuqishme kanë tronditur Bagdadin sot herët në mëngjes

 

Bagdad, 27 mars 2003 - Mbi 30 shpërthime të fuqishme kanë tronditur Bagdadin sot herët në mëngjes. Në një transmetim direk të TV të Katarit Alxhazira ka mundur të shihet një ndërtesë shumëkatëshe e kapluar nga tymi.

 

Ndërkaq, rrjeti telviziv CNN njofton se në mesin e objektivave të qëlluara ka qenë edhe aeroporti afër Bagdadit në të cilin ndodhen avionët irakianë MIG, ka thënë një pilot amerikan i cili sapo ishte kthyer në aeroplanbartësen amerikane "Konstelejshën".

 

 

Ushtarët izraelitë kanë vrarë dy policë palestinezë

 

Gaza, 27 mars 2003 - Një helikopter izraelit ka shkrehur dy raketa në një pikë policore palestineze gjatë një sulmi në Rripin e Gazës dhe kështu ka vrarë dy policë, kanë bërë të ditur burimet spitalore palestineze, njofton Rojter.

 

Helikopteri, thuhet mëtej në njoftim, ka shtënë pasi policët palestinezë kanë hapur zjarr në ushtarët izraelitë, të cilët janë përpjekur të arrestojnë tre palestinezë në qytetin Beit Hanoun në veri të Gazës, kanë deklaruar zyrtarët e armatës izraelite.

 

Ky është operacioni i parë i armatës izraelite në Gaza brenda këtyre 10 ditëve dhe i pari që kur ka filluar sulmi i udhëhequr nga amerikanët në Irak. Sipas burimit palestinez, gjatë këtij sulmi izraelit janë plagosur edhe gjashtë persona të tjerë, ndër të cilët edhe disa civilë.

 

 

Bush dhe Bler në takimin e sotëm kanë biseduar për strategjinë e luftës në Irak dhe periudhën e pasluftës

 

Uashington, 27 mars 2003 – Presidenti Bush dhe aleati i tij më i ngushtë, kryeministri britanik, Toni Bler, në takimin e sotëm (të së enjtes) në Kemp Dejvid, kanë biseduar lidhur me strategjinë e luftës në Irak dhe kanë shestuar plane për periudhën e pasluftës, njofton Rojter.

 

Në krye të axhendës së dy liderëve ka qenë fushata ushtarake në tokë, ndihmat humanitare, rindërtimi i pasluftës dhe roli i Kombeve të Bashkuara në këtë periudhë.

 

Këta dy burrë shtetes patën mbrëmë një darkë shumë të vogël shoqërore në një pushimore malore të Merilendit, rreth 60 mile nga Shtëpia e Bardhë. Seria e takimeve dhe e konferencave të reja të shtypit do të vazhdojnë sot (të enjten).

 

 

Presidenti Bush përgëzon trupat amerikane

 

Uashington, 27 mars 2003 - Presidenti i SHBA-ve Xhorxh Bush, në një fjalim të mbajtur në Florida, u tha ushtarëve se trupat amerikane që po përparojnë drejt kryeqytetit të Irakut po ndeshen me disa nga luftëtarët më të egër të Sadam Huseinit.

 

"Ushtria jonë po bën përparim në Irak, megjithatë kjo luftë nuk do të mbarohjë shpejt. Ndërsa ata i afrohen Bagdadit, njësitë tona të luftimit po hasin elementët më të dëshpëruar të një regjimi që ka marrë fund", tha presidenti.

Presidenti Bush tha se njësitë e Gardës Republikane që mbrojnë kryeqytetin e Irakut janë tani nën "një sulm të drejpërdrejtë dhe intensiv", siç tha ai.

Presidenti Bush tha se nuk mund ta parashikojë sesa do të zgjasë lufta, por është i sigurt se po vjen dita e larjes së hesapeve për udhëheqësin e Irakut. "Çdo ditë e më shumë Saddam Husseini po e humbet kontrollin mbi Irakun. Çdo ditë e më shumë populli i Irakut po i afrohet lirisë" tha presidenti amerikan Bush.

 

 

Parashutistët amerikanë hapin frontin verior

 

Bagdad, 27 mars 2003 - Rreth 1000 ushtarë amerikanë kanë zbritur me parashuta në veri të Irakut dhe kanë marrë nën kontroll një fushë aviacioni të rëndësishme. Ky është dislokimi më i madh i forcave amerikane në veri të Bagdadit dhe shihet si hapja e mundshme e frontit verior në luftën kundër regjimit të Sadam Huseinit.

 

Parashutistët u hodhën nga aeroplanët transportues që fluturuan ulët në territorin e kontrolluar nga Kurdët, afër qytetit të Irbilit. Me të prekur tokën, ushtarëtt amerikanë rrethuan një aeroport në përgatitje të pritjes së aeroplanëve transportues që do të sjellin tanke dhe mjete të tjera.

 

Forcat speciale amerikane po operojnë në veri të Irakut në Bashkëpunim me autoritetet kurde në këtë rajon autonom.

 

 

Garda Republikane ndeshet me forcat amerikane

 

Bagdad, 27 mars 2003 - Iraku thotë se njësite elitë të Gardës Republikane për herë të parë janë ndeshur direkt me forcat avancuese amerikane në jug të Bagdadit. Njësitet irakiane kanë shfrytëzuar shtërngatat e rërës si mbulesë për të ndërmarrë sulme kundër pozitave amerikane.

Irakianët thonë se një numër tankesh dhe makinash të blinduara amerikane janë shkatërruar. Megjithatë, zyrtarët amerikanë thonë se këto njoftime nuk janë të vërteta. Gjithashtu ka patur luftime edhe përreth qytetit Nasirijah ku avionë amerikanë kanë bombarduar pozitat amerikane.

 

Ndërsa më poshtë në jug, një forcë irakiane me rreth 120 makina të blinduara ka dalur nga qyteti i rrethuar Basra. Avionë amerikanë dhe britanikë kanë bombarduar kolonën ndërsa ajo po shkonte në drejtim të gadishullit Al-Fao.

 

 

Rusia kërkon ndalimin e luftës në Irak

 

Moskë, 27 mars 2003 - Ministri i jashtëm rus Igor Ivanov dhe sekretari i përgjithshëm i Kombeve të Bashkuara Kofi Anan kanë shpreh brengosjen e tyre për situaten humanitare ne Irak.

 

Ivanov dhe Anan kanë zhvilluar një bisedë telefonike, ku temë kresore e bisedës ishte situata në Irak, e cila është shqyrtuar në mbledhjen e djeshme të Keshillit te Sigurimit.

 

Të dy bashkbësiduesit jane pajtuar që OKB-ja ta marrë rolin kryesor në rregullimin e situatës gjatë kohës së pasluftës në Irak.

 

 

Shtohet numri i viktimave të epidemisë SARS

 

Pekin, 27 mars 2003 - Numri i viktimave të epidemisë SARS është shumë më i lartë nga ç'mendohet. Autoritetet kineze njoftuan se deri tani, prej sëmundjes së panjohur të mushkërive kanë gjetur vdekjen 34 vetë.

 

Nga sindromi akut i bllokimit të rrugëve të frymëmarrjes, sipas Organizatës Botërore të Shëndetsisë kanë vdekur jashtë kufijve kinezë 19 vetë.

 

Organizata supozon se sëmundja buron prej krahinës kineze Kuangdong. Mjekësia duket të ketë arritur ndërkohë përparimet e para - tani thuhet se po zhvillohen provat e para të kurës.

 

 

Koreja e Veriut kërcënon Korenë e Jugut dhe Japoninë

 

Phenian, 27 mars 2003 - Në shenjë proteste ndaj manovrave ushtarake në Korenë e Jugut, Koreja e Veriut kërcënoi me ndërprerjen e marrëdhënieve kufitare.

 

Agjensia koreanoveriore, KCNA njoftoi, se qeveria do të ndërpresë dërgimin e oficerëve në takimet e planifikuara për t'u zhvilluar në pikëkalimin kufitar të Panmujonit me njësitë ndërkombëtare, të drejtuara nga amerikanët.

 

Korea e Veriut paralajmëroi edhe Japoninë për pasojat e lëshimit të një sateliti spiun. Nëse kjo do të nbdosdhë, japonia do të shkaktojë shketërrimien vet, citon agjensia koreanoveriore e lajmeve burimet qeveritare.

 

 

NATO dhe shtatë shtete të Evrops Juglindore dhe Qendrore nënshkroi marrëveshjet e anëtarësimit

 

Bruksel, 27 mars 2003 - NATO dhe shtatë shtete të Evrops Juglindore dhe Qendrore nënshkruan marrëveshjet e anëtarësimit. Fjala është për ish-republikat sovjetike, Estoni, Letoni dhe Lituani si dhe për Bullgarinë, Slloveninë dhe Sllovakinë. Në ceremoninë e rastit morën pjesë ministrat e jashtëm të shtatë shteteve përketëse.

 

Sekretari i Përgjithshëm i NATO-s, Xhorxh Robertson bëri fjalë për një kthesë në historinë e unifikimit të Evroëës. Pranimi do të përfundojë në maj 2004, pas ratifikimit të zgjerimit nga 19 parlamentet e vendeve pjesëtare.

 

 

Filloi gjykimi i gjashtë opozitarëve irakianë në Berlin

 

Berlin, 27 mars 2003 - Në sfondin e luftës në Gjirin Persik në gjykatën e landit filloi gjykimi i gjashtë opozitarëve irakianë, të akuzuar për dhunim të ambasadës irakiane në Berlin. Ata akuzohen të kenë hyrë më datën 20 gusht të vitit të shkuar me dhunë në ndërtesën e ambasadës dhe të kenë përdorur forcën ndaj personelit diplomatik.

 

Policia ndlrhyri atëhehe vetëm disa orë më pas, duke ia dalë të lironte pengjet pa pasoja në njerëz. Mbrojtja e paraqiti aktin si mbrojtje legjitime kundër regjimit të sadam Huseinit. Gjykata hodhi gjithssesi poshtë kërkeën për ndërprerjen e gjykimit për shkaqet të lidhura me politikën ndërkombëtare.

Copyright©2000-2003 Trepca.net - Të gjitha të  drejtat e rezervuara.