E mërkure, 26 mars 2003

26.03.2003 - Trepca.net

Lajme

E mërkure, 26 mars 2003

Përmbajtja:

Uesli Klark shpreson se Kosova një ditë do të jetë e pavarur
Xhejmi Shia thotë se nuk do të ketë kthim të forcave serbe dhe nuk do të ketë ndarje të Kosovës
Procesi i transferimit të kompetencave nga UNMIK-u në institucionet e Kosovës shtyhet për "çështje teknike"
Feler: Kosova është e sigurt sikur më parë, sundon ligji dhe policët e saj veprojnë në mënyrë profesionale
“Femrat në sport” do të jetë tema e diskutimit të enjten si pjesë e muajit të historisë së grave
Ombudspersoni i Kosovës i shkuan kryeadministratorit Shtajner
Sami Hamiti zgjedhet nga paneli intervistues kandidat i vetëm për kryeshef të ekzekutivit të Prishtinës
Trupat paqeruajtëse të KFOR-it dhe policia e UNMIK-ut zhvilluan një operacion kërkimi në fshatin shqiptar Çabër
Tri shpërthime kanë ndodhur dje në kufurin Maqedoni-Kosovë
TMK-ja së shpejti do të marrë detyra të reja, të cilat do t'i kryen në partneritet me KFOR-in dhe UNMIK-un
Maqedonia ratifikoi marrëveshjen me BE-në për statusin e forcave evropiane në këtë vend
Në kufirin ndërmjet Maqedonisë dhe Bullgarisë janë konfiksuar dy kilogramë heroinë
Janë ngritur 400 padi penale kundër personave të paraburgosur në Serbi
Rezultatet e ekspertizës të pushkës snajper kanë treguar se Zvezdan Jovanoviq ka vrarë Gjingjiqin
Presidenti Moisiu tha se tash pas katër vjetësh Kosova është e lirë dhe Ballkani është çliruar nga diktatorët
Zyrtarë të Ambasadës amerikane në Shkup thonë se rihapja e kësaj ambasade është çështje e nivelit të sigurisë
Zyrtarë të bashkisë së Tiranës penguan fillimin e hetimeve financiare
Një grup ushtarësh shqiptarë pritet të marrë pjesë sot në një stërvitje ushtarake në Maqedoni
Policia ka arrestuar atentatorin e kryeministrit serb Gjingjiq
Qeveria serbe ka shpërbërë njësinë e policisë serbe për operacione speciale
Bush ka kërkuar nga Kongresi të miratojë 75 miliardë dollarë për anagazhimet e luftës
Brengosje lidhur me situatën humanitare në Irak
Bler: Lufta në Irak do të marrë kohë dhe kërkon këmbëngulje
Ministri irakian Al-Sahad thotë se forcat irakiane kanë vrarë tetë ushtarë amerikanë apo britanikë
Sipas amerikanëve në Naxhaf janë vrarë 300 ushtarë irakianë
Sot mblidhet Këshilli i Sigurimit
Persona të armatosur kanë vrarë sot një ish-ministër të një shteti të Indisë
Pas sulmeve ajrore në Bagdad shihen të pakten 15 trupa të djegur
Vriten pesë palestinezë nga izraelitët në Bregun Perëndimor
Bler takohet me Bushin
Në luftimet gjatë natës janë vrarë shumë irakianë
Forcat britanike janë ndeshur me rreth 1,000 forca policore irakiane në hyrje të Basrës
Aeroplanët amerikanë kanë bombarduar sot një “kamp terrorist të al Kaidës në veri të Irakut
Disa qindra forca irakiane u vranë dje në jug të Bagdadit
Goditet stacioni televiziv irakian
Njoftime për kryengritje në Basra

Uesli Klark shpreson se Kosova një ditë do të jetë e pavarur



Xhejmi Shia thotë se nuk do të ketë kthim të forcave serbe dhe nuk do të ketë ndarje të Kosovës



Procesi i transferimit të kompetencave nga UNMIK-u në institucionet e Kosovës shtyhet për "çështje teknike"

Prishtinë, 26 mars 2003 - Procesi i transferimit t kompetencave nga UNMIK-u në institucionet e Kosovës është shtyrë për një afat dyjavor, me justfikimin nga ana e UNMIK-ut se ende ka nevojë për t'i harmonizuar edhe disa "çështje teknike", u tha në mbedhjen e sotme të Qeverisë së Kosovës.

Kryeministri Bajram Rexhepi para mediave tha se nuk e përjashton mundësinë që në këtë shtyrje të ketë ndikuar qëndrimi refuzues i palës serbe.
Rexhepi tha se qeveria i ka bërë të gjitha përgatitjet me kohë në qeveri dhe nëpër ministri, ndonëse jo qind për qind, sepse, siç tha, ky është proces. "Mirëpo nuk është asyeja e mospërgatijes sonë sonë, por ka nevojë që të harmonizohen edhe disa çështje teknike në përputhje me Kornizën Kushtetuese dhe me disa rregullore të tjera", tha ai.
Procesi i bartjes së kompetencave është shumë i ndërlikuar, tha Rexhepi, dhe afati prej dy javësh do t'i japë edhe më shumë kohë qeverisë të përgatitet më mirë.


Feler: Kosova është e sigurt sikur më parë, sundon ligji dhe policët e saj veprojnë në mënyrë profesionale

Prishtinë, 26 mars 2003 - Në një raport të përbashkët për njëvjeçare, zyrtarët e policisë së UNMIK-ut dhe të SHPK-së thanë se statistikat tregojnë se krimi në Kosovë është në stabilizim e sipër. Policia e UNMIK-ut dhe e SHPK-së janë duke i siguruar shumë burime degës së hetuesisë së krimeve të zakonshme, tha komisioneri i policisë Shtefen Feler.
Duke komentuar njoftimet e disa mediave vendore për sulmet ndaj stacioneve policore në Prishtinë, për kinse patrullimin e forcave serbe në veri të Kosovës, Feler tha se nuk janë të vërteta këto spekulime: ekstremistët islamikë nuk kanë gjuajtur granata ndaj stacioneve policore, dhe nuk ka xhandarmëri serbe në veri të Kosovës, nënvizoi ai.

"Këto nuk janë informacione të bazuara në fakte, por neve na pengon se këto informacione po publikohen dhe po na largojnë nga e vërteta. Këto shkrime shkaktojnë te popullata pasiguri dhe frikë", tha Feler. Sipas Felerit e vërteta është se Kosova është e sigurt sikur më parë, se ligji sundon dhe policët e saj veprojnë në mënyrë efektive dhe profesonale.
Në lidhje me sulmet ndaj stacioneve policore në Prishtinë Feler tha se janë arrestuar dy persona. "Nuk kemi të bëjmë me sulme politike ose sulme terroriste, por kemi të bëjmë me disa gangsterë të cilët frikohen për shkak të punës së suksesshme të cilën ne e bëjmë kundër tyre", saktësoi Feler.
Ndërkaq kolonel Sheremet Ahmeti, këshilltar i Komisionerit për çështje të SHPK-së tha se policia e Kosovës është e depolitizuar. Kosova e ka territorin e saj, policia është një dhe është e pandashme dhe është në shërbim të kosovarëve e institucioneve të Kosovës.


“Femrat në sport” do të jetë tema e diskutimit të enjten si pjesë e muajit të historisë së grave

Prishtinë, 26 mars 2003 - Zyra e SHBA-ve dhe Biblioteka Kombëtare e Kosovës vazhdojnë shënimin njëmujor të muajit të historisë së grave të enjten, me 27 mars, në ora 6 pasdite, në auditoriumin e Bibliotekës Kombëtare, me diskutimin për femrat në sport.
Gjatë historisë femrat shpesh janë konsideruar si shumë “delikate” apo “të ndieshme” për të marrë pjesë në sporte të organizuara. Femrat vazhdimisht e kanë dëshmuar këtë botëkuptim si të gabueshëm.

Duke luftuar shpesh kundër stereotipeve, femrat kanë hapur rrugën në fusha të ndryshme sportive, kanë ngazëllyer shikuesit, kanë treguar gatishmëri të madhe fizike, kanë frymëzuar të tjerët por edhe kanë fituar të holla.
Avokatja Susan Strawn, nga Departamenti i Drejtësisë, do ta udhëheqë diskutimin e së enjtes. Zonja Strawn ka punuar me sistemin juridik të Kosovës që nga viti i kaluar ndërsa në sistemin juridik të SHBA-ve për më shumë se një dekadë.

Dashuria e saj për sporte ka filluar në fëmijëri kur në moshën shtatëvjeçare i është bashkuar ekipit të notit, thuhet në një njoftim të Zyrës amerikane në Prshtinë.


Ombudspersoni i Kosovës i shkuan kryeadministratorit Shtajner

Prishtinë, 26 mars 2003 - Ombudspersoni i Kosovës Marek Novicki i ka dërguar sot një letër kryeadministratorit Mihael Shtajner, dhe ka kërkuar nga ai që të ndërmarrë hapat e nevojshëm për të siguruar që autoritetet e policisë të përmirësojnë bashkëpunimin e tyre me Ombudspersonin.

Në veçanti, Ombudspersoni kërkoi nga Shtajneri që të udhëzojë policinë të përgjegjet në kërkesat e vazhdueshme të Ombudspersonit për informata nga autoritetet e policisë, të cilat mund të jenë të rëndësishme për hetimet mbi ankesat që individë të ndryshëm i kanë parashtruar Ombudspersonit.

Në disa nga këto ankesa është pohuar që individët janë keqtrajtuar nga policia e cila i ka ndaluar apo paraburgosur.

Në të tjerat, është pohuar që policia ka dështuar të zhvillojë hetimet mbi krime tjera apo ka dështuar që viktimave të këtyre krimeve të u sigurojë informata rreth hetimeve mbi to. Në disa nga këto raste, policia nuk ka përfillur kërkesat e përsëritura të Ombudspersonit për periudha kohore deri më 2 vite.


Sami Hamiti zgjedhet nga paneli intervistues kandidat i vetëm për kryeshef të ekzekutivit të Prishtinës

Prishtinë , 26 mars 2003 – Sami Hamiti nga një panel tetë anëtarësh është zgjedhur kandidat i vetëm për kyeshef ekzekutivi në Kuvendin komunal të Prishtinës. Ai ka marrë 119 pikë kundrejt katër kandidatëve të tjerë që kishin më pak pikë. Sami Hamiti aktualisht është drejtor i Drejtoratit për inspeksion në KK të Prishtinës.
Në mbledhjen e Kuvendit kounal të Prishtinës që do të mahet më 2 prill, pritet që këshillarët ta thonë fjalën pëfundimtare me votën e tyre për zgjedhjen e kryesheit të ekzekutivit.


Trupat paqeruajtëse të KFOR-it dhe policia e UNMIK-ut zhvilluan një operacion kërkimi në fshatin shqiptar Çabër

Zubin Potok, 26 mars 2003 - Trupat paqeruajtëse të KFOR-it dhe policia e UNMIK-ut zhvilluan një operacion të gjërë kërkimi në fshatin Çabër, fshat i vetëm shqiptar në Komunën e Zubin Potokut.

Ky operacion u zhvillua vetëm një ditë pasi shtypi i Kosovës kishte publikuar raportin se xhandarmëria serbe po vëzhgonte këtë fshat. Aksioni kishte për qëllim konfiskimin e armëve ndër banorët shqiptarë, pohuan banorët e fshatit.

Sipas banorëve të këtij fshati operacioni ka filluar rreth orës tetë të mëngjesit të djeshëm dhe ka zgjatur deri në orët e vona të mbrëmjes. Gjatë operacionit janë kontrolluar 170 shtëpi, por sipas banorëve nuk janë gjetur armë.
Njoftohet se forcat e KFOR-it dhe policia e UNMIK-ut para se të zhvillonin operacionin në Çabër kanë zhvilluar një operacion të ngjashëm në tri fshatrat serbe përreth Çabrës.


Tri shpërthime kanë ndodhur dje në kufurin Maqedoni-Kosovë

Shkup, 26 mars 2003 - Tri granata kanë shpërthyer dje në rajonin e fshatit Goshincë, në kufirin e Maqedonisë me Kosovë, ka njoftuar sot Shtatmadhoria e Armatës maqedoanse.
Në këto incidente nuk ka pjesëtarë të plagosur të Armatës së Maqedonisë dhe nuk është shkaktuar dëm material.
Menjëherë pas incidentit janë marrë masa të sigurisë, ndërkohë që janë njoftuar edhe përfaqësuesit e NATO/KFOR-it dhe të OSBE-së në Maqedoni, njofton MIA në gjuhën shqipe.


TMK-ja së shpejti do të marrë detyra të reja, të cilat do t'i kryen në partneritet me KFOR-in dhe UNMIK-un

Prishtinë, 26 mars 2003 - Trupat Mbrojtëse të Kosovës (TMK) së shpejti do të marrin detyra të reja të cilat do t'i kryejnë në partneritet me KFOR-in dhe UNMIK-un. Është ky rezultat i një takimi që komandanti i TMK-së gjenerallajtnant Agim Çeku kishte me kreun e UNMIK-ut dhe të KFOR-it si dhe me përfaqësues të vendeve të pesëshes.

Pjesëmarrësit e këtij takimi që u quajt strategjik, thanë se TMK-së do t'i caktohen detyra të reja, të cilat do të përcaktohen nga gjenerali Çeku dhe gjenerali Kamings, oficer i UNMIK-ut për ndërlidhje me TMK-në.

Gjenerali Kamings tha se në këtë takim nuk është biseduar për statusin e TMK-së, prandaj as për kërkesën e gjeneralit Çeku për transformimin e TMK-së në forca mbrojtëse të Kosovës. Ai shtoi se është arritur pajtimi që TMK-ja të kalojë në kryerjen e detyrave konkrete.
Ndërkaq, komandanti i KFOR-it, gjeneral Fabio Mini tha se është me rëndësi që TMK po fillon një fazë të re të funksionimit.
"Ne po propozojmë detyra të reja të TMK-në e cila nga ushtrimet dhe përgatitjet do të fillojë funksionimin e vërtetë për të ofruar shërbime të caktuara për njerëzit në Kosovë", tha gjenerali Mini.


Maqedonia ratifikoi marrëveshjen me BE-në për statusin e forcave evropiane në këtë vend

Shkup, 26 mars 2003 - Kuvendi i Maqedonisë me 88 vota pro dhe asnjë kundër, ka miratuar sot Ligjin për ratifikimin e Marrëveshjes ndërmjet Maqedonisë dhe Bashkimit Evropian për statusin e forcave evropiane në këtë vend.
Misioni duhet të fillojë më datën 31 të këtij muaji dhe të zgjasë deri në fund të vitit Ministrja e jashtme maqedonase Ilinka Mitreva ratifikimin e këtij ligji e ka vlerësuar një "etapë të re në marrëdhëniet ndërmjet Maqedonisë dhe BE-së", duke shtuar se këto marrëdhënie përfshijnë edhe bashkëpunim në sferën e sigurisë, njofton MIA në gjuhën shqipe.


Në kufirin ndërmjet Maqedonisë dhe Bullgarisë janë konfiksuar dy kilogramë heroinë

Shkup, 26 mars 2003 - Dy kilogramë heroinë janë konfiskuar sot në vendkalimin Delçevë, në kufirin ndërmjet Maqedonisë dhe Bullgarisë. Heroina u zbulua në një bunker special të vendosur në ndenjëset e fundit të autobusit me targa të Shkupit, që qarkullon në linjën Shkup - Stamboll.
MIA njofton se dy vozitësit e autobusit dhe udhëheqësi i grupit janë arrestuar dhe se po punohet në ndriçimin e rastit.


Janë ngritur 400 padi penale kundër personave të paraburgosur në Serbi

Beograd, 26 mars 2003 - Një zyrtar i Beogradit, Dragan Shutanoviq, ka thënë se janë ngritur 400 padi penale kundër personave të paraburgosur gjatë gjendjes së jashtëzakonshme në Serbi dhe se ata mund të procedohen që nga dita e sotme (e mërkurë).

Këto raste nuk janë vetëm në lidhje me vrasjen e kryeministrit serb Zoran Gjingjiq por edhe me krimin e organizuar, ka thënë Shutanoviq.


Rezultatet e ekspertizës të pushkës snajper kanë treguar se Zvezdan Jovanoviq ka vrarë Gjingjiqin

Beograd, 26 mars 2003 - Rezultatet e ekspertizës balistike të pushkës snajper - hekler-koh G3 - në mënyrë të sigurt kanë treguar se Zvezdan Jovanoviq, ndihmëskomandant i njëisisë speciale, më 12 mars ka vrarë kryeministrin serb Zoran Gjingjiq, ka njoftuar Ministria serbe e Punëve të Brendshme.

Pushka snajper është gjetur në Novi Beograd e fshehur pas kryerjes së atentatit ndaj Gjingjiqit. Zvezdan Jovanoviq është i lindur më 1965 në Pejë dhe ëshët arrestuar të hënën.
Në paraburgim ndodhet edhe kryeshefi i njësisisë speciale Dushan Mariçiq Gumar.


Presidenti Moisiu tha se tash pas katër vjetësh Kosova është e lirë dhe Ballkani është çliruar nga diktatorët

Tiranë, 26 mars 2003 - Presidenti i Shqipërisë Alfred Moisiu, duke folur në një mbledhje të Këshillit të Sigurimit Kombëtar kërkoi të forcohet siguria kombëtare dhe puna e shërbimeve sekrete. Vetëm në këtë mënyrë, tha Moisiu, mund të luftohet jo vetëm terrorizmi, por edhe trafiqet.
Ndërkaq, lidhur me situatën e krijuar pas ndërhyrjes ushtarake në Irak, presidenti Moisiu i përkujtoi anëtarët e Këshillit të Sigurimit Kombëtar ndërhyrjen e armatosur të udhëhequr nga Shtetet e Bashkuara të Amerikës katër vjet më parë në Kosovë si një shenjë e mospajtimit me dhunën, masakrat, politikën antihumane dhe brutalitetin e regjimit të Beogradit. "Tani pas katër vjetësh Kosova është e lirë dhe Ballkani është çliruar nga diktatorët.

Janë këto kujtime historike me vlera të jashtëzakonshme që na nxisin më shumë për t'u bashkuar me koalicionin e vullnetit të udhëhequr SHBA-të kundër regjimit diktatorial të Irakut", tha z. Moisiu. Ai theksoi se Shqipëria është pjesë e këtij koalicioni ndërkombëtar antiterror. Lufta në Irak është një luftë kundër luftës, luftë për paqen, për një botë më të sigurtë dhe më të lirë.


Zyrtarë të Ambasadës amerikane në Shkup thonë se rihapja e kësaj ambasade është çështje e nivelit të sigurisë

Shkup, 26 mars 2003 - Zyrtarë të Ambasadës amerikane në Shkup thonë se rihapja e kësaj ambasade është çështje e nivelit të sigurisë dhe jo sepse nuk shihen rreziqe.

Një zyrtar i ambasadës tha se kur nisi lufta në Irak është menduar se mbyllja e kësaj ambasade për publikun ishte gjëja më e mirë që mund të bëhej, ngase kishte informacione të besueshme për persona që synonin të sulmonin amerikanët dhe qendrat amerikane në rajon, përfshirë Maqedoninë, si përgjigje ndaj fillimit të konfliktit të armatosur në Irak.
Megjithatë, Ambasada amerikane në Shkup rifilloi dje normalisht shërbimet e saj për publikun. Sido që të jetë kjo ambasadë ka këshilluar qytetarët amerikanë që të jenë të kujdesshëm për të minimizuar rreziqet për sigurinë e tyre personale, të jenë vigjilentë në mjediset ku janë, të menjanojnë turmat e demonstratat.


Zyrtarë të bashkisë së Tiranës penguan fillimin e hetimeve financiare

Tiranë, 26 mars 2003 - Zyrtarë të bashkisë së Tiranës penguan fillimin e hetimeve financiare nga Komisioni i Parlamentit të Shqipërisë. Zyrtarët e kësaj bashkie deklaruan se kërkesa për kontroll nuk e kishte vulën e Parlamentit, nuk ishte paraqitur vendimi i Parlamentit dhe rregullorja për kontrollin që do të lehtësonte bashkëpunimin gjatë hetimeve.
Në anën tjetër përfaqësuesit e opozitës deklaruan se ky ishte një akt i papërgjegjshëm i bashkiakëve, i urdhëruar nga drejtuesit e lartë të qeverisë, përkatësisht një përjekje e dështuar sipas tyre për të fshehur korrupsionin e bashkisë.


Një grup ushtarësh shqiptarë pritet të marrë pjesë sot në një stërvitje ushtarake në Maqedoni

Tiranë, 26 mars 2003 - Një grup prej 41 ushtarësh shqiptarë pritet të marrë pjesë sot në një stërvitje ushtarake së bashku me ushtarë të Maqedonisë. Kjo stërvitje pritet të zhvillohet në poligonin ushtarak "Krivollak" në Maqedoni.

Kështu 41 ushtarë nga Shqipëria do të marrin pjesë në stërvitjen që do të zhvillohet sot gjatë së cilës ushtarët e të dy vendeve pritet të zhvillojnë veprimtari stërvitore në kuadër të partneritetit për paqe.


Policia ka arrestuar atentatorin e kryeministrit serb Gjingjiq

Beograd, 26 mars 2003 - Autoritetet e Serbisë njoftuan se kanë arrestuar personin që mendohet se është vrasësi i ish-kryeministrit serb Zoran Gjingjiq.

Kryeministri i ri Zoran Zhivkoviq thotë se policia serbe kanë arrestuar personin me emër Zvezdan Jovanoviq me nofken "Zveki", i lindur në vitin 1965 në Pejë, për të cilin ekspertiza ka dëshmuar se ai më 12 mars me pushkën snajper e ka vrarë kryeministrin e Serbisë Zoran Gjingjiq.

Jovanoviq ishte zëvendëskomandant i njësive për operacione speciale të policisë serbe të njohura për shumë krime të kryera gjatë luftrave në hapësirën e ish-Jugosllavisë, e veçmas në Kosovë.

Përveç tij është arrestuar edhe Sasha Pejakoviq gjithashtu pjesëtar i kësaj njësie speciale, i dyshuar se ka marrë pjesë në mënyrë direkte në likuidimin e kryeminstrit serb më 12 mars në oborrin e godinës së qeverisë në Beograd.
Kryeministri aktual serb tha se policia e ka zbuluar pushkën me snajper të fshehur nën tokë në lokalitetin Beogradi i Ri me të cilën dyshohet se është vrarë kryeministri Gjingjiq.


Qeveria serbe ka shpërbërë njësinë e policisë serbe për operacione speciale

Beograd, 26 mars 2003 - Pas zbulimeve më të reja për përzierje në vrasjen e kryeministrit serb Zoran Gjingjqi, Qeveria serbe ka vendosur të shpërbëjë njësinë e policisë serbe për operacione speciale. Pjesëtarët e saj urdhërohen të dorëzojnë të gjitha dokumentët dhe armatimet. Vendimi ka hyrë në fuqi menjëherë.


Bush ka kërkuar nga Kongresi të miratojë 75 miliardë dollarë për anagazhimet e luftës

Uashington, 26 mars 2003 - Presidenti i Shteteve të Bashkuara, Xhorxh Bush ka thënë se situata e luftës me Iraku është "fluide" duke i thënë Kongresit se "është urgjente nevoja" për financimin e luftës. Bush ka kërkuar nga ligjvënësit të miratojnë 75 miliardë dollarë për anagazhimet e luftës.

Presidenti amerikan ka thënë gjithashtu se fushata ushtarake e prirë nga Shtetet e Bashkuara mbetet e përqëndruar në caqet e saja, megjithë rezistencën e vazhdueshme të forcave irakiane.
"Koalicioni ynë po bën avancime të qëndrueshme. Ne po bëjmë përparime të mira", ka thënë presidenti amerikan.


Brengosje lidhur me situatën humanitare në Irak

Gjenevë, 26 mars 2003 - Disa organizata ndërkombëtare shfaqën brengosje lidhur me situatën humanitare në Irak, duke tërehequr vërejtjen për rreziqe serioze për shëndetin publik për shkak të reduktimit në funizime me ujë dhe ndotjes së ambientit nga djegja e fushave të naftës.
Inxhinierët e Kryqit të Kuq po përpiqen të riparojnë rrjetin e ujit të dëmtuar nga lufta në qytetin e Basrës.
Zjarrfiksit kuvajtian kanë shojtur dje një prej 7 puseve të naftës që digjen në jug të Irakut.
Ushtarakët britanikë thanë se ndihma humanitare në Irak do të arrij nesër në portin jugor Um Kasër.


Bler: Lufta në Irak do të marrë kohë dhe kërkon këmbëngulje

Londër, 26 mars 2003 - Kryeministri britanik, Toni Bler tha se lufta në Irak do të marrë kohë dhe kërkon këmbëngulje, por përsëriti se koalicioni i prirë nga Shtetet e Bashkuara do të largojë nga pushteti presidentin irakian, Saddam Hussein për ta spastruar Irakun nga armët për shkatërrim në masë.
Bler tha se forcat amerikano- britanike kanë arritur tek Qerrbelaja, në jug të Bagdadit dhe ballafaqohen me divizionin elit, Medina të Gardës Republikane irakiane. Bler tha se nuk është për t'u befasuar që trupat e koalicionit hasin në rezistencë.


Ministri irakian Al-Sahad thotë se forcat irakiane kanë vrarë tetë ushtarë amerikanë apo britanikë

Nasiria, 26 mars 2003 - Zyrtarët e Irakut thonë se në provincën Mutenea, midis Nasirias dhe Basrës janë zhvilluar luftime të rrepta. Ministri irakian për Informim, Said Al-Sahad thotë se në ato luftime forcat irakiane kanë vrarë tetë ushtarë amerikanë apo britanikë dhe se kanë shkatërruar rreth 30 automjete të ndryshme.
"Në provincën Mutenea mbrëmë, gjatë natës dhe në orët e mëngjesit ka patur luftime shumë të rrepta kundër një konvoji amerikan që ishte afruar rajonit", tha ministri irakian.
Ai tha gjithashtu se 16 njerëz ishin vrarë dhe 95 plagosur gjatë bombardimeve të mbrëmëshme në Bagdad.
Zëdhënësi ushtarak irakian, Hazem al-Rawi tha se një irakian ka bërë sulmin e parë vetëvrasës në luftë, duke shpartalluar një tank dhe vetëveten në ishullin jugor, Faw.


Sipas amerikanëve në Naxhaf janë vrarë 300 ushtarë irakianë

Naxhaf, 26 mars 2003 - Informacionet për fushëbetejat vazhdojnë të jenë kontardiktore. Ministria amerikanë ka njoftuar se në një betejë 160 kilometra në jug të Bagdadit në afërsi të qytetit Naxhaf, janë vrarë 300 ushtarë irakianë.

Bëhet fjalë për luftimet më të rrepte që nga enjta e javës që shkoi kur nisi lufta. Stacioni televiziv amerikan CNN ka njoftuar se në luftime, trupat aleate kanë humbur dy tanksa, por ekuipazhi i tyre ka shpëtuar. Njoftimet për humbjen e ushtarve amerikanë nuk janë bërë të njohura.


Sot mblidhet Këshilli i Sigurimit

Nju Jork, 26 mars 2003 - Kombete Bashkuara jane dakorduar se sot mbahet mbledhja urgjente e Keshillit te Sigurimit kushtuar Irakut. Mirëpo në mesin e vendeve arabe ekziston një pavendosmëri sa i përket insistimit për të kërkuar miratimin e një rezolute për ndalimin e menjehershem të operacioneve ushtarake ne Irak. Sipas ambasadorit të Sirisë në OKB, 22 vende arabe do të kërkojne miratimin e nje rezolute te ketille.


Persona të armatosur kanë vrarë sot një ish-ministër të një shteti të Indisë

Nju Delhi, 26 mars 2003 – Persona të armatosur të paidentifikuar kanë vrarë sot (të merkurën) në qytetin Ahmedabad një ish-ministër të një shteti të Indisë derisa po kthehej nga shetitja e mengjesit, njopfton UPI.

Dy të armatosur me motoçikleta kanë qëlluar në gjoks me pesë plumba ministrrin 43-vjeçar Haren Pandija, i cili ka vdekur në vend. Burimet policore kanë thënë se z. Pandija mund ta kenë vrarë militantët muslimanë, ngase ai ka qenë ministër i brendshëm i shtetit perendimor indian Guajart, ku gjatë trazirave ytë përgjakshme religjioze vitin e kaluar kanë humbur jetën rreth 1,000 muslimanë.


Pas sulmeve ajrore në Bagdad shihen të pakten 15 trupa të djegur

Bagdad, 26 mars 2003 – Të pakten 15 trupa të djegur shtrihen në afërsi të zonës së varfër të banimit në veri të Bagdadit, që janë vrarë sot (të merkurën) nga sulmet ajrore amerikane në kryeqytetin irakian, njofton Rojter.

"Shihet se dy raketa kanë goditur një bllok banesash", ka deklaruar një korrespondent nga distrikti Shaab i Bagdadit. Janë dëmtuar gjithashtu edhe disa shitore dhe apartamente, ndërsa disa automjete vazhdojnë të ndizen në vetvete pa flakë.


Vriten pesë palestinezë nga izraelitët në Bregun Perëndimor

Tel Aviv, 26 mars 2003 - Pesë palestineëz janë vrarë nga zjarri izraelit në Bregun Perëndimor, duke përfshirë një vajzë 10-vjeçare dhe një djalë 14-vjeçar, të martën në mbrëmje, që është incidenti i parë pas një armëpushimi relativ në territoret palestineze që nga fillimi i luftës në Irak më 20 mars.
Incidenti ndodhi në momentin kur komandot izraelite u orvatën të arrestojnë dy aktivistë të kërkuar të krahut radikal Hamas.


Bler takohet me Bushin

Londër, 26 mars 2003 - Kryeministri britanik, Toni Bler, shkon sot në Shtetet e Bashkuara për një takim me presidentin Bush në Kemp Dejvid.
Dy udhëheqësit pritet të diskutojnë përparimin e luftës në Irak - si dhe planet për rindërtimin e vendit dhe procesin e paqes se Lindjes së Mesme.
Një çështje shumë më e vështirë për të cilën presidenti dhe kryeministri duhet të pajtohen dakort është roli i ardhshëm i Kombeve të Bashkuara në Iraq.
Bler tha dje se Kombet e Bashkuara duhet të angazhohen në një fazë të hershme. Këtë pikëpamje e ka edhe sekretari amerikan i shtetit, Kolin Pauell.


Në luftimet gjatë natës janë vrarë shumë irakianë

Bagdad, 26 mars 2003 – Komandantët amerikanë kanë deklaruar sot (të merkurën) se trupat e tyre kanë vrarë në luftimet gjatë natës afër qytetit Najaf në jug të Bagdadit një numër të madh irakianësh, ndonëse këto vrasje nuk mund të konfirmohen veç e veç, njofton Rojter.

Ushtarakët amerikanë kanë thënë se afër qytetit Najaf, 100 mile në jug të kryeqytetit, janë zhvilluar luftime rreth dy orë me granata ndërmjet tankeve amerikane dhe luftëtarëve irakianë. Dhjetëra tanke amerikane kanë mbetur anës lumit pasi irakianët kanë hedhur në erë urën, por atyre u kanë shkuar në ndihmë shumë tanke të tjera amerikane, kanë thënë ushtarët amerikanë.


Forcat britanike janë ndeshur me rreth 1,000 forca policore irakiane në hyrje të Basrës

Basra, 26 mars 2003 – Forcat britanike janë ndeshur me rreth 1,000 forca policore irakiane në hyrje të Basrës, njofton AP. Forcat irakiane orvateshin rtë shuanin, siç thuhej, kundër Sadam Hysenit një kryengritje civile. “Duket të ketë shpërthyer gjatë natës një kryengritje në Basra”, ka thënë sot (të merkurën) zëdhënësi ushtarak britanez.


Aeroplanët amerikanë kanë bombarduar sot një “kamp terrorist të al Kaidës në veri të Irakut

Gjiri Persik, 26 mars 2003 - Aeroplanët luftarakë amerikanë kanë bombarduar sot (të merkurën) një “kamp terrorist të al Kaidës në veri të Irakut, u ka deklaruar gazetarëve pasi është kthyer nga misioni i bombardimit lejtnant komandantanti i aeroplanbartëses amerikane “Teodor Ruzvelt”, Mark Brazelton.


Disa qindra forca irakiane u vranë dje në jug të Bagdadit

Uashington, 26 mars 2003 - Pentagoni njoftoi se disa qindra forca irakiane janë vrarë pasi trupat amerikane u sulmuan ashpër dje në jug të Bagdadit. Ndërkohë që lufta për përmbysjen nga pushteti të Sadam Huseinit hyn sot në ditën e shtatë, lajmet bëjnë të ditur se janë zhvilluar protesta kundër sundimit irakian në qytetin Basra në jug të vendit, qyteti i dytë për nga madhësia.


Goditet stacioni televiziv irakian

Bagdad, 26 mars 2003 - Shtetet e Bashkuara kanë kryer një sulm në mëngjes mbi stacionin kryesor televiziv irakian.
Janë shfrytëzuar raketat kruz për të goditur televizionin dhe vendet e tjera të telekomunikacionit në Bagdad.
Sinjali i televizionit satelitor të Irakut është ndërprerë nga bombradimet. Por transmetimet vendore, të cilat nuk emetonin në kohën e sulmeve të mëngjesit - u rikthyen në eter tre orë më vonë.


Njoftime për kryengritje në Basra

Basra, 26 mars 2003 - Forcat britanike në periferi të Basrës kanë njoftuar se në qytetin jugor irakian ka nisur një kryengritje e dhunshme e civilëve ndaj regjimit të Sadam Huseinit.

Gjenerali Peter Uoll, shefi i shtabit në qendrën e forcave aleate në Katar ka konfirmuar se në Basra ka patur një kryengritje në fillimet e saj dhe se trupat britanike 'mezi prisnin' që të shfrytëzonin potencialin e kësaj kryengritjeje.