Lajme

 E marte, 25 mars 2003

Përmbajtja:

• Presidenti Rugova tha se 24 marsi i vitit 1999 është datë historike për Kosovën

• Presidenti Rugova ngushëllon familjen e aktorit Xhevat Qena

• Kryesia përcaktoi rendin e punës për dy seancat e Kuvendit të Kosovës

• Policia e UNMIK-ut përgënjeshtron njoftimet e mediave në lidhje me ngjarjet që ndodhën javën e kaluar

• Kapërcehen problemet e krijuara në Degën e LDK-së së Gjilanit

• P. Majko: Kam përshtypjen që lufta e Kosovës për herë të parë tregoi se çfarë energji të fshehura ne shihnim si komb

• Në Mitrovicë dhe në Vushtrri u përkujtua katërvjetori i vrasjes së veprimtarit të shquar të LDK-së Latif Berisha

• Në varrezat e Prishtinës u varros aktori Xhevat Qena

• Një i vdekur dhe dy të lënduar në një aksident trafiku afër Banjës së Pejës

• Zyra amerikane përgënjeshtroi njoftimet se ajo mund të mbyllet për shkak të ndonjë kërcënimi

• Ismail Kadare dhe Tedi Papavrami marrin pjesë në një takim letrar që organizohet në Lozanë

• Në Prishtinë me një ceremoni rasti u hap Fakulteti i Edukimit

• Xh. Shia: NATO-ja nuk e filloi fushatën e bombardimeve katër vjet më parë për ta lënë punën në gjysmë

• BE kërkon nga Shqipëria të luftojë krimin e organizuar

• Musa Xhaferi premtoi se Qeveria e Maqedonisë do ta mbështesë ndërtimin e një shoqërie të hapur demokratike

• Shumë të vrarë afër qytetit Nasiria

• Në një spital ushtarak në Gjermani trajtohen 17 ushtarë amerikanë

• Vriten rreth 500 luftëtarë irakianë

• Anan sot takohet me këshilltaren e presidentit amerikan për sigurinë kombëtare

• Solana: BE është i gatshëm të ndihmojë rindërtimin e Irakut por me mandatin e OKB-së

• Autoritetet amerikane të shëndetësisë kanë identifikuar virusin që shkakton sindromin e organeve të frymëmarrjes

• Bler shkon në Uashington

• Sërish takohen zyrtarë amerianë e turq

• Janë identifikuar 7 marinsat e vrarë të dielën afër qytetit jugor Nasiria

• Pas luftimeve pesëditëshe në Irak bilanci i viktimave civile e ushtarake në të dy anët është mbi 250

• Britania ka bërë të ditur se ushtari i dytë i saj është vrarë në luftimet gjatë natës së kaluar

• Të paktën 41 ushtarë amerikanë dhe britanikë janë vrarë që nga fillimi i luftës në Irak

• Irakianët mund të përdorin armët kimike

• Një stuhi e rërës pengon depërtimin e trupave amerikane drejt Bagdadit

• Sadam Hysein është plagosur vërtet nga bombat amerikane javën e kaluar në Bagdad

• Sot në Bagdad ka pasur 10 shpërthime brenda 10 minutash

• Forcat e koalicionit i janë afruar Bagdadit rreth 80 kilometra

• Bler: Qëllimi jetik i trupave të koalicionit është të arrijnë sa më shpejt Bagdadin

• Gjenerali Tom Franks, ka vlerësuar ecurinë e deritashme të fushatës ushtarake

• Një njësi speciale polake po lufton me trupat aleate

• Bush ka zhvilluar bisedë telefonike me Putinin

• Vendet arabe kanë kërkuar tërheqjen e menjëhershme të trupave amerikane nga Iraku

• Forcat e koalicionit marshojnë drejt Bagdadit

• Trupat britanike sulmojnë Basrën

• Bush kërkon 75 miliardë dollarë për luftën

Presidenti Rugova tha se 24 marsi i vitit 1999 është datë historike për Kosovën

 

Prishtinë, 25 mars 2003 - Me një manifestim të organizuar nga Forumi Rinor i LDK-së të titulluar "Ditët e shpresës", të cilin e hapi kryetari i këtij forumi Lulzim Zeneli, mbrëmë në Prishtinë u shënua katërvjetori i ndërhyrjes së forcave të NATO-s në Kosovë.

Presidenti i Kosovës Ibrahim Rugova tha se pajtohet me të rinjtë që me të drejtë e kanë quajtur 24 marsin - Ditën e shpresës. Ndërkaq Dita e lirisë është 12 qershori i vitit 1999 dhe kjo do të jetë ndër datat më të shënuara në historinë tonë, tha Presidenti Rugova, duke theksuar se 24 marsi i vitit 1999 është datë historike për Kosovën. Ai shtoi se bombardimi i NATO-s i dha fund shtypjes së regjimit të Millosheviqit ndaj popullatës së Kosovës.

Në vazhdim Presidenti Rugova tha: "Në këtë katërvjetor përkujtojmë përsëri progresin e madh që ka arritur Kosova për këto katër vite në të gjitha fushat e jetës dhe tash po hyjmë në fazën e zhvillimit ekonomik, zhvillimit demokratik dhe në fazën e njohjes formale të pavarësisë së Kosovës".

Kjo datë, tha presidenti Rugova, të përkujton edhe angazhimin e tashëm të Shteteve të Bashkuara në luftën për lirinë e popullit të Irakut.

"Mund të themi se pas katër vjetëve se Kosova është një shembull i mirë i mbrojtjes ndërkombëtare të një populli për shpëtimin e një populli, i cili vuante nën shtypje, nën dhunë dhe prandaj është mesazhi ynë që gjithmonë duhet të ndërhyjë bashkësia ndërkombëtare, kur shtypen njerëzit, kur shtypen të drejtat e tyre", tha zoti Rugova.

 

Ai me këtë rast përshëndeti forcat e koalicionit në krye me Shtetet e Bashkuara të Amerikës për eliminimin e një diktature dhe për kthimin e lirisë, për krijimin e lirisë së atij populli dhe të asaj pjese të botës.

Presidenti i Kosovës edhe më këtë rast përshëndeti presidentin Bush, kryeministrin britanik Bler, të cilët po udhëheqin forcat e koalicionit në Irak për lirinë dhe demokracinë e këtij vendi dhe për forcimin e paqes botërore.

Ndërkaq, kryetari i Kuvendit të Kosovës Nexhat Daci, në këtë manifestim tha se "as shkenca nuk mund të japë përgjigje të saktë se si është e mundur që të kremtohet një ditë kur hudhen bomba në një vend dhe shtoi se këtë kremtim e nxit vetë nxjerrja e një populli prej robërisë dhe diktaturës së egër mbi të".

 

"Liria në Kosovë", tha kryeparlamentari Daci, "erdhi si rezultat i angazhimit të Shteteve të Bashkuara të Amerikës dhe intervenimit të NATO-s, por edhe i luftës së popullit të Kosovës për liri".

 

Ai nënvizoi se duhet të përkujtohen edhe ata kosovarë, të cilët sonte katër vjet më parë ranë, duke qenë krah përkrah me NATO-n, luftëtarët në Gllogjan, në Drenicë dhe gjithkund anekënd Kosovës.

Në përkujtim të 4-vjetorit të intervenimit të forcave të NATO-s kundër forcave militare e paramilitare serbe në Kosovë, Forumi i Rinisë i LDK-së organizoi mbrëmë edhe një koncert në Sheshin "Skënderbeu", ku morën pjesë këngëtarët më të shquar të estradës së Kosovës.

 

 

Presidenti Rugova ngushëllon familjen e aktorit Xhevat Qena

 

Prishtinë, 25 mars 2003 - Presidenti i Kosovës Ibrahim Rugova i ka dërguar një telegram ngushëllimi familjes së aktorit Xhevat Qena me këtë përmbajtje.

"Me rastin e vdekjes së më të dashurit Tuaj dhe aktorit të njohur Xhevat Qenës, Ju shpreh ngushëllimet e mia të thella.

Xhevat Qena do të mbetet në historinë e artit skenik kombëtar të Kosovës si njëri ndër aktorët më të mëdhenj, sidomos në skenën e humorit".

"Zonja Leze Qena, bëhuni e fortë në këto momente të rënda për Ju, dhe bëhuni krenare për Xhevatin Tuaj, që për dekada të tëra patët të përbashkët artin skenik dhe jetën".

 

 

Kryesia përcaktoi rendin e punës për dy seancat e Kuvendit të Kosovës

 

Prishtinë, 25 mars 2003 - Kryesia e Kuvendit të Kosovës, nën drejtimin e Nexhat Daci, kryetar, ka vendosur që në seancën parlamentare të 27 marsit të nxjerrë për shqyrtim të parë Projektligjin për tatimin në pronën e paluajtshme. Në po këtë seancë do të shqyrtohet edhe raporti për gjendjen e gjyqësisë në Kosovë.

Në mbledhje u tha se debati pë ekspozeun e kryeministrit Bajram Rexhepi dhe për punën njëveçare të Qeverisë së Kosovës, i shtyrë nga seanca e shkuar, mund të realizohet në njerën nga këto dy seanca, varësisht nga agjenda e Qeverisë.

Për seancën e ardhshme Kryesia e Kuvendit ka paraparë, ndërkaq, të nxirret për shqyrtim të dytë Projektligji për bibliotekat. Do të shqyrtohet gjithashtu edhe Propozimi për miratimin e iniciativës për shpalljen e Bjeshkëve të Nemuna – Park Nacional.

Kryesia ka shqyrtuar edhe një sërë çështjesh për funksionalizimin më të mirë të mekanizmave të brendshëm të Kuvendit.

 

 

Policia e UNMIK-ut përgënjeshtron njoftimet e mediave në lidhje me ngjarjet që ndodhën javën e kaluar

 

Prishtinë, 25 mars 2003 - Policia e UNMIK-ut përgënjeshtron njoftimet e disa mediave të Kosovës në lidhje me ngjarjet që ndodhën javën e kaluar. Zëdhënësi i kësaj policie, Derek Çapell tha se mediat me këto njoftime kanë tejkaluar dijen ndërmjet gazetarisë legjitime dhe sensacionit.

 

Këto njoftime kishin të bënin me sulmet me bomba kundër stacioneve policore në Prishtinë, paraqitjet e policisë serbe në veri të Kosovës, ofrimi i 100 mijë eurove për dëshmi të rreme, paraqitjen e AKSH-së dhe frikën e qytetarëve për sigurinë në Prishtinë.

 

Çapell tha se frika e njerëzve mund të rritet si pasojë e këtyre raporteve sensacionale të disa mediave.

 

 

Kapërcehen problemet e krijuara në Degën e LDK-së së Gjilanit

 

Gjilan, 25 mars 2003 - Në një takim pune të kryesisë së Degës së LDK të Gjilanit ku mori pjesë edhe një delegacion nga Kryesia qendrore e LDK-së në përbërje Alush Gashi dhe Hajzer Krasniqi (anëtarë kryesie), Sabit Rrustemi (Këshilli i Përgjithshëm) dhe Sejdë Tolaj (Forumi i Rinisë), është arritur koncenzus për kapërcimin e probleme të krijuara në Degën e LDK-së së Gjilanit, probleme këto më shumë të natyrës së çështjeve të kuadrove, por që ngritën tensione si në komunë po edhe jashtë saj.

Kryesia e Degës së LDK të Gjilanit, edhe në dy takimet e mëhershme paraprake, gjerë e gjatë kishte shqyrtuar dhe debatuar situatën e muajve të fundit Brenda vetë Kryesisë së Degës si dhe Kuvendit të Komunës (ku më pas ishin bartur këto probleme) dhe,përmes një fryme konstruktive, tolerante dhe mirëkuptimi ishin pajtuar që para delegacionit nga Qendra të manifestojnë shenjat e para të rikthimit të një uniteti në Degë.

Ky unitet, që në të kaluarën ka qenë shembull edhe në nivel të Kosovës, sa i përket organbizimit partiak por edhe shtetëror në komunë, zuri të rikthehej edhe falë tolerimit të presidentit Ibrahim Rugova si dhe angazhimeve të anëtarëve të delegacionit nga kryesia qendrore, z.Alush Gashi dhe Hajzer Krasniqi.

Është lutje, kërkesë po edhe nevojë që për shkak të rrugës së ecur deri më tash bashkarisht po edhe të shumë angazhimeve të tjera që i kemi përpara, të ecim bashkarisht edhe rrugën tjetër që na ka mbetur deri te realizimi i projektit më madhor të LDK-së, njohjes formale të pavarësisë së Kosovës, theksoi zoti Krasniqi.

Ndërkaq z.Alush Gashi, duke u ndërlidhur në këtë vizitë e cila ka qenë e planifikuar shumë muaj më parë para se të shfaqeshin këto probleme në Degën e LDK të Gjilanit, po që nuk u realizua as në këtë degë dhe as në 35 degët tjera të LDK-së, shkaku i situatës dhe rrethanave që u krijuan menjëherë pas zgjedhjeve të dyta locale, tha se kur është fjala për qëllimet e larta dhe fisnike, duhet kapërcyer dallimet eventuale me debat.

Çështjes si rikthimit të frymës vepruese në Degë dhe në komunë, ju qasën edhe shumica dërmuese e anëtarëve të kryesisë, pas së cilave njëzëri iu dha mbështje presidentit Rugova dhe udhëheqjes qendrore për angazhimet e deritashme në realizimin e objektivave programore dhe statutare të LDK-së si dhe në strukturat shtetërore të Kosovës.

Njëkohësisht mbështetje iu dha edhe organeve komunale të Gjilanit, kuvendit komunal dhe ekzekutivit dhe u kërkua që edhe për problemet e deritashme po,edhe për çdo problem tjetër që mund të shfaqet në ndërkohë,të gjendet dhe të zbatohet vetëm vendosja institucionale, respektimi i akteve legjitime dhe atyre të zgjedhura.

 

 

P. Majko: Kam përshtypjen që lufta e Kosovës për herë të parë tregoi se çfarë energji të fshehura ne shihnim si komb

 

Tiranë, 25 mars 2003 - Ministri shqiptar i Mbrojtjes Pandeli Majko, i cili para katër vitesh ishte kryeministër i Shqipërisë, duke përkujtuar intervenimin e NATO-s kundër forcave serbe në Kosovë, ndër të tjera ka thënë:

"Kam përshtypjen që lufta e Kosovës për herë të parë tregoi se çfarë energji të fshehura ne shihnim si komb. Duke kaluar parashikimet jo vetëm tonat, por edhe ato parashikime që në fund të fundit ndërkombëtarët kishin për ne.

 

Në qoftë se para luftës së Kosovës do të bëheshin parashikime të natyrave se çfarë do të ndodhte me Shqipërinë dhe me shqiptarët nëse do të realizoheshin planet e Millosheviqit, ashtu siç u realizuan pra me bomben njerëzore që ai kishte përgatitur në fazën e bombardimeve të NATO-s pak do të ishin ata optimistë se shqiptarët do të dinin ta përmbanin veten dhe të ruanin pikërisht ekulibrat e situatës.

 

Ndodhi pikërisht ajo që sot të kemi të drejtë të krenohemi të gjithë së bashku".

 

 

Në Mitrovicë dhe në Vushtrri u përkujtua katërvjetori i vrasjes së veprimtarit të shquar të LDK-së Latif Berisha

 

Mitrovicë-Vushtrri, 24 mars 2003 - Disa qindra banorë dhe përfaqësues të institucioneve të Kosovës kanë shënuar dje në fshatin Gjytezë të Vushtrrisë katërvjetorin e vrasjes mizore të poetit dhe veprimtarit të shquar të LDK-së Latif Berisha. Me këtë rast u zbulua lapidari dhe u përkujtua si veprimtar dhe atdhetar i shquar.

Prof. Latif Berisha është vrarë në natën e 24 marsit të vitit 1999, pak kohë pasi filluan sulmet ajrore të NATO-s mbi caqet serbe.

 

 

Në varrezat e Prishtinës u varros aktori Xhevat Qena

 

Prishtinë, 25 mars 2003 - Në varrezat e Prishtinës sot u bë ceremonia mortore e varrimit të aktorit të njohur Xehavt Qena, i cili vdiq të dielën mbrëma. Merrnin pjesë familjarë e kolegë të të ndjerit dhe shumë qytetarë të Prishtinës.

Ndërkaq në orët e paradites në Teatrin Kombëtar, ku i ndjeri i kaloi disa dekada si aktor profesionist, u mbajt një mbledhje përkujtimore, ku për figurën e aktorit Xhevat Qena folën kolegët e tij aktorë.

 

 

Një i vdekur dhe dy të lënduar në një aksident trafiku afër Banjës së Pejës

 

Pejë, 25 mars 2003 - Mbrëmë rreth orës 20,00 afër Banjës së Pejës ndodhi një akisdent i rëndë trafiku, ku humbi jetën një person e dy të tjerë u lënduan rëndë. Në këtë akisident ka vdekur në vend Elez Hakaj (1972), nga fshati Orogosh i komunës së Istogut, kurse lëndime të të rënda kanë pësuar Vehbi Metaj, Ismet Haxhaj, të cilët ndodhen në spital.

Aksidenti ka ndodhur kur vetura e tyre është përplasur për një shtyllë elektrike dhe shkaktar kryesor ka qenë shpejtësia e madhe, thonë hetimet e para të policisë.

 

 

Zyra amerikane përgënjeshtroi njoftimet se ajo mund të mbyllet për shkak të ndonjë kërcënimi

 

Prishtinë, 25 mars 2003 - Zyra Amerikane në Prishtinë ka përgënjeshtruar njoftimet se kjo zyrë mund të mbyllet për shkak të ndonjë kërcënimi të ri. Në një deklaratë shtypi Majkëll Mekllellen, përgjegjës për marrëdhënie publike në Zyrën Amerikane në Prishtinë, thotë se kjo zyrë po punon normalisht dhe se nuk ka plane për mbylljen e saj.

 

Ai ka theksuar se disa mjete rajonale të informimit kishin njoftuar se kinse Zyra Amerikane do të mbyllej për shkak të kërcënimeve terroriste.

 

Z. Mekllellen i cilësoi këto njoftime si të papërgjegjshme dhe kërkoi nga mjetet e informimit që të verifikojnë raportet dhe të mos përsërishin thashethemet.

 

 

Ismail Kadare dhe Tedi Papavrami marrin pjesë në një takim letrar që organizohet në Lozanë

 

Lozanë, 25 mars 2003 - Shkrimtari i mirënjohur Ismail Kadare dhe violinisti i njohur Tedi Papavrami më 1 prill marrin pjesë në një mbrëmje letrare që organizohet në Lozanë.

 

Gjithashtu në këtë manifestim do të ekzekutojnë pjesë muzikore edhe studentët e Akademisë së Muzikës në Lozanës, Krenar Arifi dhe Gjon Guralumi. Manifestimin e organizojnë Qendra e Përkthimeve Letrare të Universitetit të Lozanës dhe Rrethi Letrar të Lozanës.

 

 

Në Prishtinë me një ceremoni rasti u hap Fakulteti i Edukimit

 

Prishtinë, 25 mars 2003 - Dje në Prishtinë me një ceremoni rasti u bë hapja e fillimit të punës së Fakultetit të Edukimit. Me këtë rast drejtuesit e Kuvendit të Kosovës dhe Qeverisë së Kosovës, si dhe donatorët kanadezë hapjen e këtij e fakulteti e vlerësuan si hap shumë të rëndësishëm për reformimin e arsimit fillor dhe të mesëm në Kosovë.

 

 

Xh. Shia: NATO-ja nuk e filloi fushatën e bombardimeve katër vjet më parë për ta lënë punën në gjysmë

 

Prishtinë, 25 mars 2003 - Ish-zëdhënësi i NATO-s, Xhejmi Shia gjatë qëndrimit të djeshëm në Kosovë, me rastin e katërvjetorit të sulmeve ajrore të Aleancës kundër caqeve serbe në Kosovë, në një intervistë dhënë RTK-së tha se "po të mos ndodhnin këto sulme sot Kosova nuk do të ishte e lirë, golgota e shqiptarëve do të ishte dukshëm më e madhe dhe Millosheviqi nuk do të ishte sot në Hagë".

Ai theksoi se në krahasim me vitin e kaluar kur ishte këtu, ka vërejtur më shumë progres dhe kjo është shenjë e mirë. Kosova, tha ai, sot ka institucionet e veta vetëqeverisëse të cilat po kërkojnë gjithnjë e më shumë përgjegjësi.

"Besoj se situata është shumë më e mirë dhe do të përmirësohet akoma më shumë në të ardhmen", tha Xhejmi Shia.

 

Ai shtoi se Kosova duhet të qëndrojë në këmbët e saj, duhet të jetë e aftë të menaxhojë punët e veta, duhet të dëshmojë se ka një qeveri të tipit evropian, se është e aftë të drejtojë ekonominë, të luftojë krimin dhe t'u ofrojë siguri qytetarëve të vetë. Kur këto gjëra të arrihen sigurisht njerëzit do të jenë në gjendje të diskutojnë për çështje që ndërlidhen me statusin përfundimtar.

I pyetur se me gjendjen e krijuar në Irak, kosovarët kanë frikë se ndërkombëtarët po i harrojnë, z. Shia u përgjigj: "Jo. Është e qartë se jetojmë me një botë të trazuar, ku duhet të merremi me shumë çështje në të njëjtën kohë.

 

Nuk mund të merremi vetëm me Irakun dhe ta harrojmë Afganistanin, nuk mund të merremi me Afganistanin dhe ta harrojmë Bosnjen apo Kosovën ose vendet e tjera. Ne duhet të jemi të shumanshëm për të vepruar në shumë fronte. Mirëpo KFOR-i është këtu dhe do të qëndrojë në Kosovë".

Ai tha se NATO-ja është e interesuar për Kosovën dhe bashkësia ndërkombëtare po vazhdon të ndihmojë. NATO-ja nuk e filloi fushatën e bombardimeve katër vjetë më parë për ta lënë punën në gjysmë", tha ndër të tjera ish-zëdhënësi i NATO-s, Xhejmi Shia.

 

 

BE kërkon nga Shqipëria të luftojë krimin e organizuar

 

Tiranë, 25 mars 2003 - Bashkimi Evropian i ka kërkuar Shqipërisë të vazhdojë luftën kundër krimit të organizuar, ndërsa në Tiranë po zhvillohen bisedime konsultative në kuadër të arritjes së marrëveshjes së asociim-stabilizimit.

Zyrtarë të lartë të BE-së kanë vlerësuar si të dukshëm përparimin e bërë nga qeveria shqiptare, por kanë thënë se mbetet ende shumë për të bërë.

Kreu i delegacionit evropian, Rainhard Pribe, tha se Shqipëria "ka nevojë për një fitore bindëse kundër krimit të organizuar".

Ndërkaq, ministri shqiptar për Integrim, Sokol Nako, ka thënë se qeveria shqiptare mbetet shumë e angazhuar për të luftuar krimin e organizuar. Ai permend disa prej aksioneve të fundit që policia shqiptare ka kryer ne terren.

 

Zoti Nako i tha BBC-së se çështjet e drejtësisë dhe të rendit do të jenë dy nga momentet kryesore mbi te cilat do të raportojë pala shqiptare.

 

 

Musa Xhaferi premtoi se Qeveria e Maqedonisë do ta mbështesë ndërtimin e një shoqërie të hapur demokratike

 

Shkup, 25 mars 2003 - Në Shkup sot i ka filluar konferenca dyditore kombëtare me temë "Ndërtimi i pushtetit të hapur përmes shpërqëndrimit".

"Shpërqendrimi dhe shoqëria e hapur tashmë nuk janë tabu-tema as në këto hapësira. Realizimi ose mosrealizimi i tyre për ne paraqesin linjë të hollë ndërmjet të rejës dhe të vjetrës, të kaluarës dhe të ardhmes, jostabilitetit dhe reformës", theksoi nënkryetari i Qeverisë së Maqedonisë, Musa Xhaferi, në fjalimin e tij hyrës, njofton MIA në gjuhën shqipe.

Zoti Xhaferi premtoi se Qeveria do ta mbështesë ndërtimin e një shoqërie të hapur demokratike dhe të shpërqendruar, në pajtim me standardet evroatlantike.

Drejtori i Misionit të Agjencisë amerikane për zhvillim ndërkombëtar (USAID), Riçard Goldman, theksoi se shpërqëndrimi si një nga parime fundamentale të Bashkimit Evropian është provë shumë e rëndësishëm për Maqedoninë. Duke folur për nevojën për investime në infrastrukturën urbane, ai nënvizoi se një shoqëri bashkëkohore duhet të sigurojë mjete për rehabilitimin e rrugëve dhe të shkollave.

Ndërkaq, drejtori ekzekutiv i Fondacionit të Institutit të shoqërisë së hapur Maqedoni, Vladimir Milçin, tha se qytetarët nuk do ta harrojnë premtimin e Qeverisë për bashkëpunim gjatë realizimit të procesit të shpërqëndrimit.

 

 

Shumë të vrarë afër qytetit Nasiria

 

Nasiria, 25 mars 2003 - Me dhjetra trupa burrash të vrarë ndodhen në një rrugë jo larg qytetit Nasiria, njofton Frans Pres, ndërkaq një oficer amerikan në vendin e ngjarjes pohoi se ka numëruar "mbi njëqind" të vrarë.

 

Një reporter i Rojterit tha se ka parë të paktën 30 viktima që ndodhen në rrugën 20 km larg qytetit Nasiria, e janë parë të shkatërruar edhe dy autobusë, dy kamionë dhe dy automobila.

 

 

Në një spital ushtarak në Gjermani trajtohen 17 ushtarë amerikanë

 

Mynih, 25 mars 2003 - Shtetet e Bashkuara thanë se 17 ushtarë amerikanë trajtohen në spitalin ushtarak në Landstuhl, nga plagët e marra në Irak.

Zëdhënësja e spitalit Mary Shaw tha se janë ndërmarrë të githa përgatitjet për trajtimin e të lënduarve, madje edhe nga armët biologjike apo kimike.

 

 

Vriten rreth 500 luftëtarë irakianë

 

Iraku Jugor, 25 mars 2003 - Rreth 500 luftëtarë irakianë janë vrarë gjatë dy ditëve të fundit nga Divizioni i tretë tankist dhe nga trupat e mekanizuara në Irakun Jugor, bëri të ditur majori Kenet Preston nga komanda qendrore e aleatëve, njofton AP (Asoshieted Press).

 

 

Anan sot takohet me këshilltaren e presidentit amerikan për sigurinë kombëtare

 

Nju Jork, 25 mars 2003 - Sekretari i përgjithshëm i Kombeve të Bashkuara Kofi Anan sot pritet të takohet me këshilltaren e presidentit amerikan për sigurinë kombëtare Kondoliza Rajs për të diskutuar çështjet humanitare në Irak.

Annan tha se Kombet e Bashkuara duan ta vazhdojnë ndihmën humanitare në Irak sa më shpejt të jetë e mundur.

 

 

Solana: BE është i gatshëm të ndihmojë rindërtimin e Irakut por me mandatin e OKB-së

 

Berlin, 25 mars 2003 - Shefi i politikës së Jashtme të Bashkimit Evropian Havier Solana tha se unioni është i gatshëm të ndihmojë rindërtimin e Irakut pas luftës, nëse do t'i jepej mandati nga Kombet e Bashkuara.

Në një intervistë dhënë televizionit gjerman, Solana tha se Kombet e Bashkuara duhet ta kenë rolin qendror në rindërtimin e Irakut.

 

 

Autoritetet amerikane të shëndetësisë kanë identifikuar virusin që shkakton sindromin e organeve të frymëmarrjes

 

Uashington, 25 mars 2003 - Autoritetet amerikane të shëndetësisë thanë se e kanë identifikuar virusin, i cili mund të jetë shkaktari i sindromit akut të organeve të frymëmarrjes.

Ndërkohë në Francë, ministria e Shëndetësisë tha se është regjistruar rasti i parë i kësaj pneumonie misterioze, e cila deri tani në botë shkaktoi vdekjen e 17 njerëzve.

 

 

Bler shkon në Uashington

 

Londër, 25 mars 2003 - Kryeministri britanik Toni Bler gjatë javës do ta vizitojë Uashingtonin, që me presidentin amerikan të diskutojë krizën mbi Irakun.

Të hënën, Bler i tha parlamentit britanik se qëllimi i forcave amerikane dhe britanike në Irak është që sa më shpejtë të jetë e mundur të arrijnë në Bagdad.

 

 

Sërish takohen zyrtarë amerianë e turq

 

Ankara, 25 mars 2003 - Zyrtarë amerikanë dhe turq sot sërish do të diskutojnë rreth kontestit për praninë e trupave turke në Irakun Verior.

Shtetet e Bashkuara dhe Bashkimi Evropian i kanë bërë thirrje Turqisë të mos dërgojë trupa në Irakun verior shkaku i destabilizimit të mundshëm dhe përleshjeve me kurdët e Irakut.

 

 

Janë identifikuar 7 marinsat e vrarë të dielën afër qytetit jugor Nasiria

 

Uashington, 25 mars 2003 – Departnmenti amerikan i Mbrojtjes ka identifikuar sot (të martën) shtatë marinsat amerikan tëë vrarë të dielën në luftimet afër qytetit jugor Nasiria dhe kështu numri i përgjithshjëm i konfirmuar i viktimave amerikane në luftën kundër Itrakut ka arrritur në 18 sish, njofton Rojter.

 

 

Pas luftimeve pesëditëshe në Irak bilanci i viktimave civile e ushtarake në të dy anët është mbi 250

 

Doha, 25 mars 2003 - Pas luftimeve pesëditëshe në Irak bilanci i viktimave civile e ushtarake në të dy anët është mbi 250 persona, citojnë agjencitë e lajmeve zyrtarët e forcave të koalicionit dhe ato irakiane.

 

Zyrtarët e forcave të koalicionit kanë konfirmuar se në aksionet e gjertanishme janë vrarë 20 ushtarë amerikanë dhe 18 britanikë, ndërsa 14 ushtarë amerikanë konsiderohen si të zhdukur. Në mesin e tyre janë edhe ata ushtarë që janë paraqitur në televizionin irakian, pohon Pentagoni.

Zyrtarët irakianë theksojnë se gjatë aksioneve të këtyre pesë ditëve kanë pësuar mbi 200 civilë, ndërkohë që nuk njoftohet bilanci i viktimave në mesin e ushtarëve irakianë.

Departamenti amerikan i Mbrojtjes pohon se forcat e koalicionit kanë zënë robër 3.000 ushtarë irakianë.

 

 

Britania ka bërë të ditur se ushtari i dytë i saj është vrarë në luftimet gjatë natës së kaluar

 

Londër, 25 mars 2003 – Britania ka bërë të ditur se ushtari i dytë i saj është vrarë në luftimet gjatë natës së kaluar, njofton AFP. Ushtari, thuhet më tej në njoftim, ka qenë pjesëtar i Regjimentit legjendar skotlandez "Black Ëatch".

 

Zëdhënësi i Ministrisë së Mbrojtjes ka thënë se ushtari është vrarë në luftimet afër qytetit al-Zubajir, në jugperendim të Basrës. Identifikimi i ushtarit të vrarë ende nuk është bërë.

 

 

Të paktën 41 ushtarë amerikanë dhe britanikë janë vrarë që nga fillimi i luftës në Irak

 

Tokio, 25 mars 2003 - Të paktën 41 ushtarë amerikanë dhe britanikë janë vrarë që nga fillimi i luftës në Irak, njofton agjencia japoneze e lajmeve Kjodo, duke u bazuar në njoftimet zyrtare ushtarake, por pa saktësuar burimin. Kjo agjenci gjithashtu njofton se të paktën 16 ushtarë të forcave të koalicionit konsiderohen si të zhdukur, e disa prej tyre me siguri janë zënë robër.

 

 

Irakianët mund të përdorin armët kimike

 

Uashington, 25 mars 2003 - Zyrtarët amerikanë kanë deklaruar se udhëheqja irakiane ka përcaktuar "linjën e kuqe" në hartën rreth Bagdadit dhe se Garda Republikane irakiane ka marrë leje që të përdorë armët kimike nëse ushtarët aleatë kalojnë atë linjë, njofotn Rojter, duke shtuar se ky lajm ende konfirmuar.

 

 

Një stuhi e rërës pengon depërtimin e trupave amerikane drejt Bagdadit

 

Bagdad, 25 mars 2003 - Një stuhi e rërës ka përfshirë sot në mëngjes trupat amerikane në rrugën drejt Bagdadit, duke zvogëluar dukshmërinë dhe duke vështirësuar operacionin e përparimit drejt kryeqytetit irakian.

"Era jugore filloi të fryjë gjatë natës, kështu që dukshmëria sot në mëngjes është zvogëluar në rreth 500 metra", ka deklaruar Luk Bejker nga Divizioni i tretë i këmbësorisë amerikane, që ndodhet te qyteti Najaf, rreth 160 km larg Bagdadit.

 

 

Sadam Hysein është plagosur vërtet nga bombat amerikane javën e kaluar në Bagdad

 

Uashington, 25 mars 2003 – Lideri irakian Sadam Hysein është plagosur vërtet nga bombat amerikane të hedhura në kompleksin e ndërtesave qeveritare në jug të Bagdadit në javën e kaluar, ka bërë të ditur në një shkrim të sotëm (e martë) gazeta "USA To day", njofton Rojter.

 

"Ne e dimë se e kemi qëlluar. Ne e dimë se është plagosur", i ka thënë kësaj gazete një zyrtar i paidentifikuar i zbulimit. "Ne e dimë gjithashtu se ai s'e ka braktisur Bagdadin", ka thënë ai.

 

 

Sot në Bagdad ka pasur 10 shpërthime brenda 10 minutash

 

Bagdad, 25 mars 2003 – Shpërthime të reja e kanë tronditur sot (të martën) jugun e Bagdadit, njofton Rojter. Këto, thuhet në vazhdim të njoftimit, janë valët më të reja të sulmeve ajrore amerikane.

 

Ka pasur rreth 10 shpërthime brenda 10 minutash, ndonëse ishte vështirë të vlerësohet numri i tyre për shkak të stuhisë me pluhur, thuhet në njoftim. Megjithatë, s’ka pasur alarme sirenash.

 

 

Forcat e koalicionit i janë afruar Bagdadit rreth 80 kilometra

 

Bagdad, 25 mars 2003 - Forcat e udhëhequra nga Shtetet e Bashkuara që po e ngushtojnë rrethimin e kryeqytetit të Irakut, Bagdad, po sulmojnë njërën prej linjave më të forta të mbrojtjes së Sadam Huseinit, njësitë e Gardës së tij Republikane, të stërvitur më së miri, e cila është vendosur përreth kryeqytetit.

 

Komandantët e koalicionit po paralajmërojnë se gjatë ditëve të ardhshme mund të zhvillohen betejat më të ashpra. Njoftohet se pararoja e trupave tokësore të koalicionit, divizioni i tretë i këmbësorisë i ushtrisë amerikane, është tani rreth 80 kilometra larg kryeqytetit irakian. "Ndodhemi tani mbi 320 kilometra në brendësi të territorit irakian. Forcat po hasin në rezistencë sporadike".

Gjenerali Stanley McChrystal i shtatmadhorisë së Pentagonit thotë se forcat aleate po kryejnë sulme kundër njësive të Gardës Republikane në jug të kryeqytetit irakian. "Sulmet ajrore vazhdojnë të përqendrohen në objektiva kryesore të udhëheqjes së regjimit për të mposhtur kërcënimet me raketa balistike, për të dobësuar Garden Republikane dhe njësi speciale të Gardës Republikane".

 

 

Bler: Qëllimi jetik i trupave të koalicionit është të arrijnë sa më shpejt Bagdadin

 

Londër, 25 mars 2003 – "Qëllimi jetik" i trupave të koalicionit është të arrijnë sa më shpejt që të jetë e mundur Bagdadin, ka thënë kryeministri britanik, Toni Bler.

Bler, përpara parlamentit britanik, ka deklaruar se trupat amerikane gjenden 90 kilometra larg Bagdatit dhe së shpejti do të ballfaqohen me trupat e Gardës Republikane të Sadam Hyseinit. "Ndërsa në veri, qëllimi ynë është të mbrojmë popullin kurd në zonën autonome, të ruajmë fushat naftëmbajtëse dhe të sigurojmë se në veri nuk do të ketë baza të rezistencës të trupave të Sadamit", tha Bler.

 

 

Gjenerali Tom Franks, ka vlerësuar ecurinë e deritashme të fushatës ushtarake

 

Uashington, 25 mars 2003 - Komandanti i trupave amerikane dhe drejtuesi ushtarak i forcave të koalicionit në Irak, gjenerali Tom Franks, ka vlerësuar ecurinë e deritashme të fushatës ushtarake. "Formacionet e trupave tokësore të koalicionit vazhdojnë të ecin përpara, siç e keni parë dhe vetë, në 3 –4 ditët e fundit.

 

Përparimi drejt objektivave tona ka qenë i shpejtë dhe në disa raste dramatik", theksoi gjenerali Franks. Ky i fundit ka nënvizuar se 3000 irakianë janë robër lufte dhe se 20 ushtarë amerikanë janë vrarë apo llogariten të zhdukur.

 

 

Një njësi speciale polake po lufton me trupat aleate

 

Varshavë, 25 mars 2003 - Një njësi e trupave speciale polake po lufton së bashku me trupat amerikano –britanike në zonat përreth qytetit Um-Kasër, në jug të Irakut. Polonia ka dërguar 54 trupa speciale dhe 74 ushtarë të specializuar në mbrojtjen kimike, njoftojnë burimet polake.

 

 

Bush ka zhvilluar bisedë telefonike me Putinin

 

Uashington, 25 mars 2003 - Presidenti amerikan, Xhorxh Bush, ka zhvilluar bisedë telefonike me homologun e tij rus, Vladimir Putin, lidhur me shqetësimet e Uashingtonit se Moska ka pajisur me materiale ushtarake regjimin e Bagdadit.

 

Lidhur me këtë çështje Zëdhënësi i Shtëpisë së Bardhë, Ari Fleisher, ka nënvizuar: "Ka informacione të një bashkëpunimi dhe mbështetje që vazhdon ende për forcat ushtarake të Irakut nga ana e kompanive ruse."

 

 

Vendet arabe kanë kërkuar tërheqjen e menjëhershme të trupave amerikane nga Iraku

 

Kajro, 25 mars 2003 - Ministrat e jashtëm të vendeve arabe kanë kërkuar tërheqjen e menjëhershme dhe të pakushte të trupave amerikane nga Iraku. Kjo kërkesë ka ardhur pas takimit të mbajtur gjatë ditës në Kajro.

 

 

Forcat e koalicionit marshojnë drejt Bagdadit

 

Bagdad, 25 mars 2003 - Forcat e koalicionit amerikano-britanik në Irak kanë filluar operacionet për të qëlluar zemrën e regjimit të Sadam Huseinit, Bagdadin. Ky operacion shihet si faza vendimtare e luftës.

 

Helikopterë amerikanë kanë bombarduar pozicione të Gardës Republikane të pozicionuara në të dalë të Bagdadit. Dëshmitarë okularë thanë se zhurma e sulmeve të fundit, e shoqëruar me dritë që ndriçoi qiellin mbi Bagdad, tregon se bombarduesit amerikanë B52, kanë lëshuar një sasi të madhe bombash.

Njësitet e gardës republikane janë sulmuar edhe në Karbala, një qytet rreth 80 km në jug të Bagdadit. Avancimi i trupave amerikane në këtë qytet, shënon pikën më të afërt deri tani të forcave drejt Bagdadit. Bombardime të mëdha ka patur dhe në veri të Irakut.

 

 

Trupat britanike sulmojnë Basrën

 

Basra, 25 mars 2003 - Trupat britanike kanë filluar një operacion për të hyrë në qytetin e Basrës, i dyti për nga madhësia pas Bagdadit. Basra ka mbetur pa ujë dhe pa dritë elektrike që nga e shtuna.

 

Kombet e Bashkuara kanë paralajmëruar se dhjetëra mijra irakianë në qytetin jugor të Basrës kërcënohen nga sëmundje.

Ekziston frika se 100 mijë fëmijë janë në rrezik të sëmuren