Lajme

E hëne, 24 mars 2003

Përmbajtja:

• Kryeparlamentari Daci priti zv.komandantin e KFOR-it Dë Kermabon

• Shtajner: UNMIK-u të mërkurën do të bartë kompetencat tek institucionet vendore

• Prizren: Sali Veseli u dënua me 10 vjet burgim, tre të akuzuarit e tjerë - të pafajshëm

• Një nismë për asfaltimin e rrugëve rurale në Tërnavë, Bellopojë dhe Sharban

• Forumi Rinor i LDK-së me moton "Ditët e shpresës" po shënon 24 marsin, kur forcat e NATO-s filluan intervenimin kundër Beogradit

• KFOR përgënjeshtron pohimet se ka shtuar numrin e pjesëtarëve të tij përgjatë kufirit Kosovë – Shqipëri

• Qendrën tregtare në Pejë e përfshiu një zjarrë i fuqishëm i cili shkaktoi dëme të mëdha materiale

• Ende nuk ka të arrestuar lidhur me sulmet me granata ndaj dy stacioneve të policisë në Prishtinë

• F. Riker thotë se SHBA-të pavarësisht nga lufta në Irak vazhdojnë të mbesin të anagazhuara në Ballkan

• Boks: Muriqi arrin edhe fitore tjetër - mposht Tejlorin

• Në Prishtinë vdiq aktori i njohur Xhevat Qena

• Liga Arabe diskuton sot në Egjipt për Irakun dhe palestinezët

• Kritika për luftën gjatë ndarjes së çmimit Oskar

• Në Serbi në paraburgim ndodhen 1.031 persona

• Gjenerali kroat Mirko Norac dënohet me 12 vjet burgim

• Presidenti maqedonas thotë se vendi i tij është në anën e koalicionit kundër regjimit të Sadam Huseinit

• Ambasada amerikane dhe ajo britanike në Shkup vazhdojnë të jenë të mbyllura për publikun

• Zgjedhjet presidenciale në Mal të Zi do të mbahen më 11 maj

• Çeçenët votojnë për Federatën ruse

• Sadam Huseini parashikon përsëri fitore të Irakut

• Irakun pohon se ka rrëzuar sot dy helikopterë amerikanë

• Gjashtë vetë kanë vdekur në aksidentin e një helikopteri ushtarak amerikan në Afganistan

• Komanda amerikane thotë se 12 ushtarë janë zhdukur

• Bush-Bler: Lufta sipas planit

• Mohohet roli i Moskës në shitjen e pajisjeve ushtarake Irakut

• SHBA kritikojnë Rusinë për shitje armësh Irakut

• Rusia do të nga KS të bëjë vlerësimin politik dhe legal të sulmit në Irak

• N.Sabri: Qeveria irakiane po e përballon me sukses veprimin ushtarak amerikan

• Një raketë ka vrarë 5 vetë në Siri

• Sllovenët në favor të futjes në BE e NATO

• Kapet një uzinë e dyshimtë kimike

• Ende herët të flitet për një fabrikë me armë kimike

• Presidenti Bush paralajmëron Irakun të mos i keqtrajtojë robërit e luftës

• Forcat e koalicionit marrin nën kontroll një uzinë kimike

• Bombardime intensive sot në Bagdad

• Raketa që goditi Iranin mund të jetë lëshuar nga forcat irakiane

• Kanë filluar luftimet ndërmjet kurdëve të Irakut dhe trupave qeveritare

• Bisedime me zyrtarët e Turqisë rreth planeve turke për dërgimin e trupave në Irakun Verior

• Trupat amerikane janë larguar nga një bazë logjistike turke në drejtim të kufirit me Irakun

• Forcat irakiane kërkojnë për dy pilotë të forcave të koalicionit

• Bush u ka tërhequr vëmendjen amerikanëve se nuk duhet të presin një luftë të shkurtër në Irak

• Forcat e koalicionit i janë afruar 160 kilometra kryeqytetit irakian

• Zyrtarët amerikanë kanë konfirmuar se një avion aleat mund të ketë humbur në luftimet në Irak

• Taha Jasin Ramadan tha dje se irakianët kanë kapur robër lufte

• Një avion britanik është rrëzuar me gabim si duket nga bateritë raketore Patriot

• Në Kashmir vriten 24 persona

Kryeparlamentari Daci priti zv.komandantin e KFOR-it Dë Kermabon

 

Prishtinë, 24 mars 2003 - Kryetari i Kuvendit të Kosovës, Nexhat Daci priti në një takim njohës zëvendëskomandantin e KFOR-it, Iv dë Kermabon dhe bisedoi me të për zhvillimet në Kosovë, me theks të veçantë për përmirësimin e mëtutjeshëm të gjendjes së sigurisë për qytetarët e Kosovës.

Zoti Daci i vlerësoi të shkëlqyeshme marrëdhëniet e qytetarëve dhe të institucioneve të Kosovës me Forcat e KFOR-it dhe besimin e madh që kanë ata në forcat paqeruajtëse në Kosovë, por shprehu edhe brengosjen e tij që ende vazhdon të mos kontrollohet nga forcat ndërkombëtare dhe vendëse rreth një e treta e territorit të Kosovës.

 

Kryeparlamentari i Kosovës e vlerësoi me efekte negative për paqen dhe stabilitetin e Kosovës e të rajonit bashkimin e komunave me shumicë të popullsisë serbe në pjesën veriore të Kosovës, që, u shpreh ai, ka për qëllim përfundimtar ndarjen e Kosovës. Situatën, ndërkaq, tha Daci, e rëndon shumë gjendja e rëndë ekonomike dhe sociale e popullsisë së Kosovës.

Zëvendëskomandanti i KFOR-it, Dë Kermabon e garantoi kryetarin Daci se KFOR-i ka ardhur në Kosovë një një mision të përbashkët paqeruajtës dhe pjesëmarrësit e këtij misioni do të jenë unikë në përmbushjen e detyrës.

Të dy bashkëbiseduesit vlerësuan domosdoshmërinë për thellimin e bashkëpunimit të ndërsjellë, në interes të paqes e të krijimit të perspektivave për zhvillim të përshpejtuar të Kosovës, thuhet në një njoftim nga ky takim.

 

 

Shtajner: UNMIK-u të mërkurën do të bartë kompetencat tek institucionet vendore

 

Sharr, 24 mars 2003 - Kryeadministratori i Kosovës Mihaal Shtajner vizitoi sot komunën e Sharrit (ish-Dragashin), ku paraprakisht zhvilloi një takim me dyer të mbyllura me kryetarin e komunës Halim Shemsedinin, e pastaj foli edhe para këshilltarëve të komunës.

 

Shtajner foli për situatën përgjithshme në Kosovë, duke përkujtuar me këtë rast se si sot, para katër vjetëve forcat e NATO-s bombarduan objektivat serbe.

 

Atëherë sytë e bvotës ishin drejtuar drejt Kosovës, kurse sot bota e është drejtuar kah Iraku, prandaj, tha Shtajner duhet shtuar të gjitha përpkjekjet në terren. Nëse kosovarët dëshirojnë ta tërheqin ndihmën ndërkombëtare duhet bërë me dije bashkësinë ndërkombëtare se janë kryer detyrat e shtëpisë.

Shtajner gjatë vizitës theksoi prioritetet aktuale, si zhvillimi ekonomik, hapja e vendeve të reja të punës, parandalimi i kriminalitetit dhe kurrupsionit, dhe të gjithë kosovarëve t'u krijohet siguri dhe prosperitet, tha Shtajner, i cili theksoi se Sharri ka pasuri natyrore, por ka edhe mangësi sepse është një vend i izoluar dhe duhet përqendruar në punët që i presin qytetarët.

 

Kjo, tha Shtajner do të bëhet posi që UNMIK-u të mërkurën do të bartë kompetencat tek institucionet vendore. Shtajner vizitoi edhe disa fshatra të kësaj komune.

 

 

Prizren: Sali Veseli u dënua me 10 vjet burgim, tre të akuzuarit e tjerë - të pafajshëm

 

Prizren, 24 mars 2003 - Gjykata e qarkut në Prizren sot shpalli aktgjykimin në procesin për vrasjen e Ekrem Rexhës, komandant "Drinit". Ky proces maratonik gjyqësor u zhvillua kundër katër të akuzuarve: Sali Veselit, Abit Haziraj, Halil Çadraku, Xhemail Beqiraj.

Trupi gjykues i ndërkombëtare në mungesë të provave liroi nga aktakuza tre të pandehur në këtë proces: Hazirajn, Çadrakun dhe Beqirajn, kurse Sali Veseli u dënua me 10 vjet burgim për nixtjen e kryerjes së vrasjes së Ekrem Rexhës.

 

Sipas aktakuzës Veseli në muajin shkurt të vitit 2000 e ka nxitur Fazli Nezirajn në shtëpinë e tij në fshatin Grejkoc për ta vrarë Ekrem Rexhën.

Xhemail Beqiraj u dënua me një vit burgim për armëmbajtje pa leje, mu si dhe Halil Çadraku i cili dënua me 2,5 vjet burgim.

Në këtë proces Abit Haziraj u shpall i pafajshëm.

 

 

Një nismë për asfaltimin e rrugëve rurale në Tërnavë, Bellopojë dhe Sharban

 

Podujevë, 24 mars 2003 - Qytetarët e Podujevës kanë marrë një nismë për asfaltimin e rrugëve rurale të kësaj komune. Në këtë aspekt aktulisht po punohet në realizimin e një nisme të banorëve të fshatrave Tërnavë, Bellopojë dhe Sharban.

 

Për asfaltimin e rrugës së këtyre fshatrave nevojiten rreth 600 mijë euro, ndërkaq rreth 250 mijë euro deri më tash janë mbledhur, thotë kryetari i Komisionit për asfaltimin e kësaj rruge, Zenel Podvorica.

 

Ai ka shtuar se kjo iniciativë është e vetë popullatës.

Në këtë projekt do të participojë edhe Kuvendi Komunal i Prishtinës aq sa i përket atij, thotë kryetari i KK të Prishtinës, Ismet Beqiri.

 

 

Forumi Rinor i LDK-së me moton "Ditët e shpresës" po shënon 24 marsin, kur forcat e NATO-s filluan intervenimin kundër Beogradit

 

Prishtinë, 24 mars 2003 - Forumi Rinor i LDK-së me moton "Ditët e shpresës" me disa aktivitete po shënon 24 marsin ditën kur forcat e NATO-s filluan intervenimin ushtarak ajror kundër regjimit serb.

 

Nënkryetari i Forumit Rinor të LDK-së, Sejdë Tolaj në një konferencë me gazetarë ka theksuar se 24 marsi është një nga datat më të rëndësishme në historinë më të re të Kosovës. Ai ka nënvizuar se mesazhi i të rinjëve të LDK-së është i qartë: ata i japin përkrahje të fuqishme KFOR-in, Misionit të SHBA-ve, sigurisë, paqes dhe stabilitetit në Kosovë dhe në rajon.

Tolaj ka njoftuar gazetarët edhe për shumë aktivitete të tjera, që Forumi Rinor i LDK-së ka organizuar për të shënuar 24 marsin. Ai ka bërë të ditur se gjatë paraditës së sotme në gjithë Kosovën në shenjë mirënjohjeje do të bëhen vizita në kampet e KFOR-it.

 

Forumi i Rinisë në të gjitha degët, në të gjitha komunat ku ai vepron do t'i vizitojë këto trupa të KFOR-it me buçeta lulesh dhe do t'i falenderojë për të gjitha ato që kanë bërë dhe po bëjnë edhe sot e kësaj dite për Kosovën dhe popullin e saj.

 

Ai ka theksuar se sonte në orën 18:00 në Hotelin Grand të Prishtinës do të mbahet një manifestim solemn, ku do të marrin pjesë personalitetet më të larta politike dhe ushtarake të Kosovës dhe ku për këtë datë të rëndësishme do të flasë presidenti i Kosovës dr. Ibrahim Rugova.

 

Ndërkaq, në orët e mbrëmjes në Sheshin Skenderbej do të ketë një spektakël me yjet e estradës muzikore.

 

 

KFOR përgënjeshtron pohimet se ka shtuar numrin e pjesëtarëve të tij përgjatë kufirit Kosovë – Shqipëri

 

Prishtinë, 24 mars 2003 - Forcat paqeruajtëse të Brigadës Shumëkombëshe Jug-Perëndim kanë hedhur poshtë pohimet e dy ditëve të fundit, në veçanti ato ku thuhet se KFOR-i ka shtuar numrin e ushtarëve përgjatë kufirit të Kosovës me Shqipërinë, pas sulmeve ndaj dy stacioneve policore në Prishtinë.

Zëdhënësi i këtyre forcave Peter Vocniak tha se gjendja në kufirin Kosovë - Shqipëri është e zakonshme, prandaj edhe nuk është paraqitur nevoja për shtimin e forcave dhe se paqeruajtësit ndërkombëtarë do të bëjnë gjithë që është e mundur për të siguruar kufirin.

 

Ai i quajti të pavërteta pohimet për shtim të forcave përgjatë kufirit, duke theksuar se KFOR-i ka sistem të saktësuar të fuqisë njerëzore dhe pikave mbikëqyrëse dhe se shtimi i trupave mund të bëhet nëse paraqitet nevoja. Mirëpo sipas tij, situata është normale, prandaj është e panevojshme një gjë e tillë.

Edhe zyrtarët e forcave paqeruajtëse në Prishtinë kanë hedhur poshtë njoftimet për shtim të forcave të tyre përgjatë kufirit me Shqipërinë për siç thuhej pranimin e paligjshëm të personave shtetasë nga vendet arabe.

 

 

Qendrën tregtare në Pejë e përfshiu një zjarrë i fuqishëm i cili shkaktoi dëme të mëdha materiale

 

Pejë, 24 mars 2003 - Në orët e mëngjesit të djeshëm rreth orës 6:30 një zjarr i fuqishëm ka përfshirë 15 dyqane në qendrën e njohur tregtare "Çarshia e gjatë" në Pejë. Dyshohet se këtë zjarr e ka shkaktuar instalimi i vjetruar i energjisë elektrike. Viktima në njerëz nuk ka, por dëmet materiale janë të mëdha.

 

 

Ende nuk ka të arrestuar lidhur me sulmet me granata ndaj dy stacioneve të policisë në Prishtinë

 

Prishtinë, 24 mars 2003 - Ende nuk ka të arrestuar lidhur me sulmet me granata ndaj dy stacioneve të policisë në Prishtinë. Zëdhënësi i policisë ndërkombëtare, Beri Fleçër ka thënë se policia ka parabargosur disa persona por asnjëri nuk ka pasur të bëjë me këtë sulm.

 

Ai ka shtuar se në këtë fazë të hetimeve po bëhen përpjekje të gjenden dëshmitarët. "Ideja se prapa këtyre sulmeve është një grup terrorist, nuk qëndron", thotë zëdhënësi Fleçër. Megjithatë, sulmet me granata ndaj policisë, por edhe thirrjet e rreshme për bomba po shkaktojnë pasiguri te qytetarët.

Ndërkohë zyrtarë të policisë vazhdimisht kërkojnë nga qytetarët të njoftojnë policinë në mënyrë që sulmuesit sa më shpejt të arrestohen.

 

 

F. Riker thotë se SHBA-të pavarësisht nga lufta në Irak vazhdojnë të mbesin të anagazhuara në Ballkan

 

Uashington, 24 mars 2003 - Pavarësisht nga përqëndrimi i vëmendjes tek Iraku, Shtetet e Bashkuara të Amerikës vazhdojnë të mbesin të anagazhuara në rajonin e Ballkanit.

 

Por zëdhënësi i Departamentit amerikan të Shtetit, Filip Riker thotë së megjithë angazhimin e forcave amerikane në Irak SHBA-të vazhdojnë t'i kushtojnë një vëmendje të rëndësishme rajonit të Ballkanit.

 

Z. Riker thotë se ai nuk parashikon një pakësim të pranisë amerikane në Ballkan. Ai shtoi se ky rajon mbetet shumë i rëndësishëm për politikën e jashtme amerikane. SHBA-të vazhdimisht kanë dëshmuar gatishmërinë e tyre për të bashkëpunuar me evropianët dhe me vendet ballkanike për vendosjen e qëndrushmërisë dhe demokracisë në këtë rajon.

Duke përmendur në mënyrë specifike Maqedoninë, ku ai ka shërbyer për disa vite z. Riker tha se Maqedonia nuk ka një mik më të mirë se Shtetet e Bashkuara. Evropianët tani kanë marrë përsipër misionin ushtarak në Maqedoni nga NATO-ja.

 

Ky vendim është mbështetur nga SHBA-të dhe kurrësesi nuk duhet të interpretohet si paksim i angazhimit amerikan në Maqedoni dhe në Ballkan.

Z. Riker i tha seksionit maqedonisht të "Zërit të Amerikës" se Departamenti i Shtetit i kushton një vëmendje të madhe Maqedonisë dhe se ambasadori amerikan në Shkup, Lorens Batler po punon në mënyrë aktive për qëndrushmërinë dhe demokratizimin e atij vendi.

Z, Riker tha se ai nuk është në dijeni nëse emri i kryetarit të BDI-së Ali Ahmeti është hequr nga lista e zezë e presidentit amerikan Xhorxh Bush.

 

  

Boks: Muriqi arrin edhe fitore tjetër - mposht Tejlorin

 

Nju Jork, 24 mars 2003 - Elvir Muriqi, i quajtur ndryshe nga mjeshtrit dhe media amerikane e boksit "Kosova Kid" ("Djali i Kosovës"), e deklasoi fare boksierin amerikan Tajuon Tejlor. Meçi është zhvilluar në Villa Barone Manor, në Nju Jork.   Elvir Muriqi (25-1) vs. Tajuon Tejlor (21-7-1) në garën e boksierëve profesionistë për peshën gjysmë të lehët sipas revistës amerikane të boksit "Vegas-Sports-Betting" pati vetëm një protogonist.

   

Por duke iu referuar gjithmonë kësaj reviste me famë për boksin, thuhet se bokseri shqiptar Muriqi ka arritur kohët e fundit rezultate fantastike me ndeshejet nga të cilat ai klasifikohet në shkallën e rezultateve 26 (fitore) 1 (humbje), 16 KB.

Grushtimet e Muriqi e shtrinë në ring gjatë meçit disa herë boksierin amerikan Tejlor, derisa në raundin e tretë, pa qenë nevoja e grushtave u desh ndërhyrja e gjyqtarit të ndalonte meçin, para "super" grushtave të papërmbajtshëm të Muriqit.

 

 

Në Prishtinë vdiq aktori i njohur Xhevat Qena

 

Prishtinë, 24 mars 2003 - Në moshën 70-vjeçare, mbrëmë në Prishtinë vdiq aktori i njohur Xhevat Qena, aktor teatri, filmi e televizioni. Si aktori profesionist Xhevat Qena i kaloi disa dekada në Teatrin Popullor Krahinor, e tani Teatri Kombëtar, ku realizoi një galeri rolesh nga më të ndryshmet. Gjithashtu interpetoi edhe disa role në film dhe në TV.

 

 

Liga Arabe diskuton sot në Egjipt për Irakun dhe palestinezët

 

Kajro, 24 mars 2003 - Në përshtypjen e ngjarjeve në Irak, sot në kryeqytetin e Egjiptit do të mblidhet Liga Arabe. Ministrat e jashtëm të organizatës me 22 anëtarë do të flasin ndër të tjera për luftën e Irakut dhe pasojat e saj për sigurinë e vendeve arabe. Një temë tjetër është gjendja e vështirë ekonomike në zonat e palestinezëve të pushtuara nga Izraeli.

 

 

Kritika për luftën gjatë ndarjes së çmimit Oskar

 

Holuvud, 24 mars 2003 - Regjisori amerikan i filmave dokumentarë, Majkëll Mur, ka kritikuar presidentin Bush gjatë ceremonisë së dhënies së çmimeve Oskar në Hollivud.

Ndërsa pranoi çmimin që mori për filmin e tij kundër armëve ("Bowling for Columbine") zoti Mur e quajti zotin Bush një president fiktiv që po e dërgonte Amerikën në luftë për arsye fiktive. "Ne jemi kundër luftës, zoti president - T'ju vijë turp!" tha ai.

Zoti Mur u fishkëllye nga shumë vetë në sallë, por u duartrokit nga të tjerë.

Më vonë aktori Adrien Brodi, i cili fitoi çmmin Oskcar si aktori më i mirë për rolin e tij në filmin "The Pianist", u duartrokit gjatë dhe në këmbë pasi i bëri thirrje sallës të lutet për zgjidhjen e shpejtë të konfliktit irakian.

Çmimi Oskar për filmin më të mirë i shkoi filmit "Chicago" dhe Roman Polanski u shpall regjizori më i mirë.
Çmimi për aktoren më të mirë iu dha Nicole Kidmanit, dhe Ketrin Zeta-Xhons mori çmimin si aktorja më e mirë në rol dytësor. I njëjti çmim, por për meshkujt, iu dha aktorit Kris Kuper.

 

 

Në Serbi në paraburgim ndodhen 1.031 persona

 

Beograd, 24 mars 2003 - Që nga vrasja e kryeministrit serb Zoran Gjingjiq, policia ka ndaluar 3.438 persona, kurse 1.031 i ka parabugosur. Janë paraqitur 395 kallëzime penale, ndërkaq 269 persona të cilët janë arrestuar i takojnë grupit kriminal të Zemunit.

 

Gjithashtu është zbuluar një sasi e madhe e armëve, bombave, municionit dhe drogës, si dhe pajisje të tjera.

 

 

Gjenerali kroat Mirko Norac dënohet me 12 vjet burgim

 

Rijekë, 24 mars 2003 - Një gjykatë e Rijekës në Kroaci ka dënuar me 12 vjet burg gjeneralin Mirko Norac për shkak të vrasjes së 50 civilëve serbë më 1991.

 

Gjykata e ka shqiptuat këtë dënim për shkak se, siç thuhet "grupi i Gospiqit" së cilit i ka takuar edhe Norac, pa ndonjë arsye ka ekzekutuar civilët të cilët nuk kanë qenë pjesë e forcave të rebeluara srebe.

 

E njëjta gjykatë Tihomir Oreshkoviqin e ka dënuar me 15 vjet burgim kurse Stjepan Grandiqin me 10 vjet burgim.

 

 

Presidenti maqedonas thotë se vendi i tij është në anën e koalicionit kundër regjimit të Sadam Huseinit

 

Shkup, 24 mars 2003 - Presidenti maqedonas Boris Trajkovski theksoi në një intervistë për të përditshmen maqedonase "Dnevnik" se vendi i tij është në anën e koalicionit antiterrorist kundër regjimit të Sadam Huseinit dhe se pozicioni i Maqedonisë tani ka vetëm dimension politik.

 

Ai ka nënvizuar se Maqedonia ka përcaktur pozicionin e saj në bazë të argumenteve të Shteteve të Bashkuara se regjimi i Sadam Huseinit përbën rrezik për njerëzimin, për zhvillimin, për paqen dhe stabilitetin në botë.

 

Trajkovksi citohet të ketë thënë se Qeveria e Maqedonisë ka mbështetur letrën e tij dërguar ditë më parë presidentit amerikan Xhorxh Bush në lidhje me pjesëmarrjen e Maqedonisë në çarmatimin e Irakut, duke shtuar se nuk ka dilema në lidhje me çarmatimin e regjimit të Sadam Huseinit dhe se ndryshimet midis shteteve në lidhje me këtë çështje qëndrojnë në mënyrën, se si mund të bëhej kjo.

 

 

Ambasada amerikane dhe ajo britanike në Shkup vazhdojnë të jenë të mbyllura për publikun

 

Shkup, 24 mars 2003 - Ambasada amerikane dhe Ambasada britanike në Shkup ende po mbahen të mbyllura për publikun. Ndërkaq, Mediat maqedonase, theksojnë se hapësira ajrore e këtij vendi e ofruar në rast nevoje për koalicionin antiterrorist nuk është përdorur deri tani nga forcat aleate për luftën në Irak.

 

 

Zgjedhjet presidenciale në Mal të Zi do të mbahen më 11 maj

 

Podgoricë, 24 mars 2003 - Zgjedhjet presidenciale në Mal të Zi do të mbahen më 11 maj 2003. Këto zgjedhje tash po përsëriten ngase kandidatët në zgjedhjet e para nuk fituan shumicën e votave të parapara me ligjin zgjedhor.

 

Në zgjedhjet e dyta presdienciale do të jetë Fili Vujanoviqi nga radhët e "Koalicionit për Malin e Zi evropian" të Gjukanoviqit. Ndërkaq partitë opozitare në këtë vend ende janë në kërkim të kandidatit. Njëri nga kandidatët e mundshëm është edhe Bullatoviqi.

 

 

Çeçenët votojnë për Federatën ruse

 

Grozni, 24 mars 2003 - Rezultatet e para të referendumit të djshëm në Çeçeni tregojnë se shumica dërmuese janë shprehur për një status special në kuadër të Federatës ruse.

 

Madje nga votat e numëruara nga 196 vendvotime, tregojnë se 96 për qind janë shprehur për kushtetutën e re të republikës me të cilën Çeçenia shpallet pjesë integrale e Rusisë me një shkallë të vetëqeverisjes.

 

 

Sadam Huseini parashikon përsëri fitore të Irakut

 

Bagdad, 24 mars 2003 - Presidenti irakian Sadam Husein ka mbajtur një fjalim në televizion dhe ka thënë se Iraku do të dalë fitimtar kundër forcave amerikano-britanike.

Udhëheqësi irakian lavdëroi në mënyrë të përsërituar "trimërinë e ushtarëve irakianë" dhe përmendi Divizionin 11 irakian të këmbësorisë dhe Divizionin 45, që veprojnë në jug përreth portit në Um Kasër.

Husein, i cili përmendi disa herë pjesë nga Kurani, tha se Iraku po sulmohej nga "forcat e së keqes" dhe se ushtria e tij do të triumfonte.

Por ai tha gjithashtu se forcat e tij do të bëjnë që lufta të zgjasë sa më shumë të jetë e mundur dhe do t'i zënë forcat amerikane e britanike në grackë.

 

 

Irakun pohon se ka rrëzuar sot dy helikopterë amerikanë

 

Bagdad, 24 mars 2003 - Iraku pohon se ka rrëzuar sot dy helikopterë amerikanë "Apaçi" dhe ka zënë robër dy pilotë. "Një grup i vogël fshatarësh ka rrëzuar dy Apaçë", ka thënë ministri irakain i Informacionit Mohamed Saed al Sahhaf. "Ndoshta do të shfaqim pamje të pilotëve. TV irakian ka paraqitur vetëm një pilot të heliktorit të rrëzuar, njofton AP.

Ndërkohë Pentagoni ka bërë të ditur se është zhdukur një helikopter, duke mos dhënë detaje të tjera.

 

 

Gjashtë vetë kanë vdekur në aksidentin e një helikopteri ushtarak amerikan në Afganistan

 

Uashington 24 mars 2003 - Gjashtë vetë kanë vdekur në aksidentin e një helikopteri ushtarak amerikan në Afganistan, ka njoftuar Komanda qendore amerikane. Helikopteri amerikan u rrëzua në lindje të Afganistanit ndërsa ndodhej në një mision të shpëtimit mjekësor.

 

 

Komanda amerikane thotë se 12 ushtarë janë zhdukur

 

Doha, 24 mars 2003 - Shtabi i Komandës qendrore amerikane në Doha të Katarit ka njoftuar sot se katër ushtarë amerikanë janë plagosur, kurse 12 të tjerë konsiderohen të zhdukur gjatë luftimeve rreth Nasirisë. Sipas incizimeve të Al Xhazirës 12 ushtarë sipas të gjasave janë ekzektuar, ka bërë të ditur gjenerali amarikan Abizeid.

 

 

Bush-Bler: Lufta sipas planit

 

Uashington, 24 mars 2003 - Pavarësisht nga luftimet e ashpra të fundit dhe humbjet në radhët ushtarëve, presidenti Xhorxh Bush dhe kryeministri britanik Toni Bler thonë se fushata ushtarake e trupave të tyre në Irak po shkon sipas planeve.

 

Zoti Bush tha se presidenti irakian Sadam Huseini po e humb kontrollin mbi vendin e tij dhe se trupat amerikane "ngadalë, por sigurtë" po e arrijnë qëllimin e tyre.

Edhe kryeministri britanik Blair pohoi se përkundër pamjeve në televizion, fushata në Irak po ecën e sigurtë.

"Këto gjëra kurrë nuk janë të lehta, do të ketë kohë të vështira para nesh, por kjo po ecën sipas planit përkundër tragjedive që po ndodhin," tha zoti Bler.

 

"Ta çlirojnë popullin e Irakut nga një prej diktaturave më brutale në kohërat moderne," tha kryeministri Blair duke përmbledhur qëllimin e luftës.

 

 

Mohohet roli i Moskës në shitjen e pajisjeve ushtarake Irakut

 

Moskë, 24 mars 2003 - Agjencia ruse për eksportin e armëve Rosoboron-export e ka mohuar rolin e saj në shitjen e pajisjeve ushtarake Irakut.

Shtetet e Bashkuara i akuzuan kompanitë e Rusisë se i kanë shitur regjimit të Saddam Husseinit pajisje për pengimin e radarëve dhe predha antitank

 

 

SHBA kritikojnë Rusinë për shitje armësh Irakut

 

Uashington, 24 mars 2003 - Shtetet e Bashkuara të Amerikës e kanë kritikuar Rusinë për shitjen e furnizimeve ushtarake Irakut. Zëdhënësi i Shtëpisë së Bardhë, Riçard Bauçer deklaroi se sipas të dhënave të shërbimit të fshehtë amerikan, CIA, sipërmarrje ruse i kanë shitur Irakut para fillimit të luftës në Gji, pajisje ushtarake.

 

Me këtë ato kanë shkelur embargon tregtare të vendosur nga OKB-ja ndaj Irakut: "Sanksionet kundër Irakut kanë ekzistuar dhe ato janë modifikuar disa herë nga SHBA, për të shmangur goditjen e popullit të Irakut", ka thënë Bauçer.

 

 

Rusia do të nga KS të bëjë vlerësimin politik dhe legal të sulmit në Irak

 

Moskë, 24 mars 2003 - Zëvendësministri i Jashtëm rus Zuri Fedotov tha se Rusia do të kërkojë nga Këshilli i Sigurimit të bëjë vlerësimin politik dhe legal të sulmit në Irak.

Ai tha se Shtetet e Bashkuara dhe Britania e Madhe duhet t'i adresojnë pasojat humanitare të aksioneve të tyre në Irak.

 

 

N.Sabri: Qeveria irakiane po e përballon me sukses veprimin ushtarak amerikan

 

Bagdad, 24 mars 2003 - Ministri i Jashtëm irakian, Naxhi Sabri, tha se qeveria irakiane po e përballon me sukses veprimin ushtarak amerikan. Zoti Sabri, i cili ndodhet në Kajro ku pritet që të mbahet një takimi i nivelit të lartë të vendeve arabe, se autoritetet irakiane po funksionojnë një lloj si edhe para luftës.

 

 "Unë nuk do të shpalos para jush se si funksionojmë ne, por mund t'iu them se ne po funksionojmë aq mirë sa edhe para këtij agresioni kolonial ndaj Irakut," tha zoti Sabri.

 

 

Një raketë ka vrarë 5 vetë në Siri

 

Damask, 24 mars 2003 - Një raketë amerikane ka qëlluar një autobus me udhëtarë në Siri dhe me atë rast janë vrarë 5 vetë dhe 10 të tjerë janë plagosur, njoftohet nga Damasku.

 

 

Sllovenët në favor të futjes në BE e NATO

 

Lubjanë, 24, mars 2003 - Sllovenët kanë votuar në favor të futjes së vendit në NATO dhe Bashkimin Evropian në dy referendume të njëkohshme.

Komisioni elektoral shtetëror tha se 89,61 përqind e votuesve kishin votuar në favor të futjes në BE, dhe 66,02 përqind mbështetën anëtarësinë në NATO.

Kryeministri slloven Anton Pop tha se ishte i kënaqur me rezultatet duke i përshkruar ato si "fundi i një epoke dhe fillimi i një epoke të re."

Rezultet e referendumeve, që janë të detyrueshme për autoritetet, u mirëpritën në Bruksel nga udhëheqësit e BE-së dhe NATO-s.

Sllovenia është i vetmi vend anëtar i ish-Jugosllavisë që është ftuar për t'u bërë anëtare e BE-së në vitin 2004.

 

 

Kapet një uzinë e dyshimtë kimike

 

Uashington, 24 mars 2003 - Njoftimet nga Uashingtoni thonë se forcat amerikane në Irak kanë mbërritur në një uzinë, që dyshohet se është kimike, në jug të kryeqytetit Bagdad.

Stacioni televiziv amerikan Fox New citonte burime të Pentagonit të thonë se trupat amerikane ishin tani në kontroll të uzinës - pranë qytetit të Najafit - dhe po hetonin nëse kishte armë kimike.

Qeveria irakiane ka mohuar të ketë armë kimike, biologjike dhe bërthamore, apo programe për t'i prodhuar ato.

 

 

Ende herët të flitet për një fabrikë me armë kimike

 

Uashington, 24 mars 2003 - Pentagoni nuk po komenton publikisht rreth njoftimeve se trupat amerikane mund të kenë zbuluar një fabrikë që dyshohet se prodhon armë kimike në Najaf. Privatisht, ka zyrtarë që thonë se është ende herët të thuhet se flitet për një fabrikë të tillë, por shtojnë se ata po shqyrtojnë disa vende që paraqesin interes në këtë pikë.

 

 

Presidenti Bush paralajmëron Irakun të mos i keqtrajtojë robërit e luftës

 

Uashington, 24 mars 2003 - Presidenti Bush tha se çdo irakian që keqtrajton robërit e luftës do të konsiderohet kriminel lufte. Presidenti Bush tha dje se pret nga Iraku t'i trajtojë robërit amerikanë të luftës në mënyrë njerëzore ashtu si ushtaria amerikane trajton robërit irakianë të luftës.

 

Presidenti Bush e bëri këtë deklaratë pasi stacioni televiziv Al-Xhazira me bazë në Katar, paraqiti trupat e disa robërve amerianë të luftës, për të cilët Pentagoni beson se janë nga të 12 ushtarëve që ranë në pritën e irakianë në jug të vendit. Trupat kishin plagë që tregonin se ushtarët mund të jenë ekzekutuar.

 

 

Forcat e koalicionit marrin nën kontroll një uzinë kimike

 

Bagdad, 24 mars 2003 - Sipas njoftimeve të medias, forcat e koalicionit në Irak kanë marrë nën kontroll një uzinë kimike në jug të Bagdadit. Sipas lajmeve, zyrtarë të Agjencisë amerikane të Zbulimit dhe të Pentagonit si dhe gazetarë që po udhëtojnë me forcat amerikane thonë se forcat e koalicionit kanë marrë nën vërrejtje gjeneralin irakian që kontrollonte uzinën.

 

Ka patur mjaft spekulime se uzina përdorej për të prodhuar armë kimike, por nuk ka patur njoftime zyrtare se çfarë kanë gjetur forcat amerikane në këtë uzinë.

 

 

Bombardime intensive sot në Bagdad

 

Bagdad, 24 mars 2003 - Avionët e koalicionit kanë bombarduar fuqishëm Bagdadin pasi forcat amerikane dhe britanike kaluan ditën më të vështirë të luftimeve që nga enjtja kur sulmuan Irakun.

 

Shpërthime të fuqishme përfshinë Bagdadin sot në orët e para të ditës, duke e kthyer në zjarr e flakë kryeqytetin irakian.

 

Gazetarët që ndodhen në qytet thonë se nuk u dëgjuan sirena alarmi para se të fillonte sulmi. Një sulm i mëparshëm nga ajri gjatë natës kishte si objektiv pika të caktuara në kompleksin e pallatit të Sadam Huseinit, duke shkaktuar shpërthime të fuqishme.

 

 

Raketa që goditi Iranin mund të jetë lëshuar nga forcat irakiane

 

Teheran, 24 mars 2003 - Irani thotë se ka të ngjarë që një raketë që ra në pjesën veriperëndimore të vendit afër kufirit me Irakun të jetë lëshuar nga forcat irakiane. Sipas agjencisë zyrtare të lajmeve, IRNA, Ministri i Brendshëm tha se hetimet e deritanishme deshmojnë se raketa që ra dje në rajonin Sardasht ishte irakiane.

Fillimisht, Irani kishte thenë se raketat u lëshuan nga aeroplanët e forcave të koalicionit.

 

 

Kanë filluar luftimet ndërmjet kurdëve të Irakut dhe trupave qeveritare

 

Kirkut, 24 mars 2003 - Në verilindje të Irakut kanë filluar luftimet ndërmjet kurdëve të Irakut dhe trupave qeveritare, pas bombardimeve të forcave ajrore të koalicionit në qytetet Çamçamal dhe Kirkuk.
Ndërkohë, forcat speciale të Shteteve të Bashkuara kanë hyrë në zonën lindore të kontrolluar nga Unioni Patriotik i Kurdistanit.

 

 

Bisedime me zyrtarët e Turqisë rreth planeve turke për dërgimin e trupave në Irakun Verior

 

Stamboll, 24 mars 2003 - I dërguari special i Shteteve të Bashkuara Zalmaj Khalilzad po zhvillon bisedime me zyrtarët e Turqisë rreth planeve turke për dërgimin e trupave në Irakun Verior.

Kryeministri i Turqisë Rexhep Taip Erdogan tha se dërgimi i trupave turke do t'u ndihmonte refugjatëve dhe do t'i parandalonte provokimet e ndryshme kundër sigurisë së Turqisë.

 

 

Trupat amerikane janë larguar nga një bazë logjistike turke në drejtim të kufirit me Irakun

 

Nusajib/Turqi, 24 mars 2003 - Trupat e Shteteve të Bashkuara sot janë larguar nga baza logjistike turke Nusajbin në drejtim të kufirit me Irakun. Trupat janë pjesë e forcave që muajin e kaluar u stacionuan në Turqi për të rinovuar bazat ajrore të Turqisë.

 

 

Forcat irakiane kërkojnë për dy pilotë të forcave të koalicionit

 

Uashington, 24 mars 2003 - Shefi i shtabit të bashkuar amerikan, gjenerali Riçard Mejers, i mohoi sot njoftimet e Irakut se dy pilote të forcave të koalicionit u detyruan te hidheshin nga aeroplani i tyre me parashutë mbi Bagdat.

 

Gjenerali Mejers tha se nuk ka asnjë provë të konfirmojë pretendimin se ndonjë prej pilotëve eshte detyruar te hidhet mbi Bagdat.

 

Gjatë një interviste sot gjenerali Mejers tha se asnjë aeroplan i koalicionit nuk mungon. Komentet e tij u bënë ndërkohë që televizioni Al Xhazira njoftoi sot se trupat irakiane kishin gjetur dy ushtarë amerikanë ose britanikë të fshehur në brigjet e lumit Tiger.

 

 

 

Bush u ka tërhequr vëmendjen amerikanëve se nuk duhet të presin një luftë të shkurtër në Irak

 

Uashington, 24 mars 2003 - Presidenti i Shteteve të Bashkuara, Xhorxh Bush u ka tërhequr vëmendjen Amerikanëve se ata nuk duhet të presin një luftë të shkurtër dhe të padhembje në Irak. Bush tha se forcat aleate po bëjnë progres në konflikt, por ka theksuar se lufta do të jetë "e rreptë", siç e ka cilësuar.

 

"E di se Sadam Huseini po e humb kontrollin e vendit të tij, kurse ne jemi duke arritur ngadalë por të sigurtë