E shtune, 22 mars 2003

22.03.2003 - Trepca.net

Lajme

E shtune, 22 mars 2003

Përmbajtja:

Presidenti Rugova dënoi shpërthimet e mbrëmshme në Prishtinë
Në 4-vjetorin e fushatës ajrore të NATO-s në Kosovë, më 24 mars organizohet manifestimi "Dita e shpresës"
Shtajner paralajmëron bartjen e kompetencave te qeveritë komunale deri në fund të vitit
Mbrëmë në Prishtinë kanë ndodhur dy shpërthime të fuqishme - nuk ka të lënduar
Departamenti i Shtetit kërkon nga qytetarët amerikanë në Kosovë të ndërmarrin hapa të matur në ditët vijuese
Katër të akuzarit për vrasjen e Ekrem Rexhës kanë mohuar aktakuzën
Numri i organizatave joqeveritare në Kosovë është zvogëluar dukshëm
Del Ponte thotë se 19 persona të akuzuar nga Gjykata e Hagës ende ndodhen në territorin e Serbisë dhe Malit të Zi
Këshilltari i kryeministrit serb vlerëson se Kosova "po rrëshqet drejt pavarësisë"
Trupat komando shqiptare gati të nisen për në Kuvajt
Pas fillimit të luftës kundër Irakut në Shqipëri ndihet një prani e shtuar e forcave policore
E. Busek: Ballkani po ballafaqohet me problemin e protektoratit mbi Bosnjen dhe Kosovën
Ish-kryeministri maqedonas përkrah idenë e lordit Oven për krijimin e shteteve të pastra etnike në Ballkan
Parlamenti maqedonas miratoi ligjin për dokumentat e udhëtimit në Maqedoni
Protesta kundër luftës
Iraku kritikon OKB-në
Përplasje e re SHBA – Francë
Shefat e shteteve të BE-së janë pajtuar se do të kenë një rol në rindërtimin e Irakut pasluftës
Sulme të fuqishme ajrore të aleatëve mbi Bagdad
Iraku thotë se plagosen mbi 200 vetë
Përplasen dy helikopterë britanikë
Komandantë dhe ushtarë irakianë dorëzohen
Dy ushtarë amerikanë janë vrarë gjatë luftimeve në Irak
Regjimi i Sadam Huseinit është histori
Turqia ka hapur hapësirën e saj ajrore për fluturimet ushtarake të trupave amerikane


Në 4-vjetorin e fushatës ajrore të NATO-s në Kosovë, më 24 mars organizohet manifestimi "Dita e shpresës"



Shtajner paralajmëron bartjen e kompetencave te qeveritë komunale deri në fund të vitit

Klinë, 22 mars 2003 - Kryeadministratori i Kosovës Mihael Shtajner ka vizituar dje Klinën, ku ka paralajmëruar bartjen e kompetencave për qeveritë komunale deri në fund të vitit.

Duke folur para këshilltarëve të Asamblesë Komunale të Klinës, kryeadministratori i Kosovës Mihael Shtajner kryesisht u orientua në situatën ndërkombëtare, luftën në Irak. Ndërkaq për faktorin e Kosovës tha se ata duhet t'i kryejnë më mirë detyrat e shtëpisë.
Ndërkaq Ferat Manaj, kryetar i Asamblesë së Klinës, e njoftoi z. Shtajner me të arriturat në këtë mjedis, problemet që e preokupojnë, si papunësia e madhe, kolapsi ekonimik, gjendja e rëndë sociale e popullatës e të tjera. Gjashtë kompani shoqërore që dikur ishin bazë të zhvillimit të punësimit po presin privatizimin më të shpejtë.
Z. Manaj ka theksuar se kthimi i serbëve në këtë komunë ende është i hershëm, pasi ende nuk dihet fati 135 shqiptarëve të zhdukur, për të cilët një pjesë të fajit e bartin edhe serbët lokal.


Mbrëmë në Prishtinë kanë ndodhur dy shpërthime të fuqishme - nuk ka të lënduar

Prishtinë, 22 mars 2003 - Mbrëmë në Prishtinë rreth orës 21.00 kanë ndodhur dy shpërthime të fuqishme me bomba dore dhe mjete të tjera shërthyese, pothuajse në të njëjtën kohë.

Dy bomba dore kanë shpërthyer afër stacionit të policisë nr. 2, në lagjen e Muhaxherëve dhe kanë dëmtuar dy vetura të policisë si dhe kanë shkaktuar dëme materiale në pjesën ku ndodhet restorani i këtij stacioni, ka deklaruar zëdhënësi i polciisë së UNMIK-ut Al Garsia.
Ndërkaq shpërthimi tjetër ka ndodhur te stacioni i policisë nr. 4 në lagjen Lakrishte, ku janë thyer xhamat e këtij stacioni të policisë.
Njoftohet se në këto dy shpërthime nuk ka pasur të lënduar.


Departamenti i Shtetit kërkon nga qytetarët amerikanë në Kosovë të ndërmarrin hapa të matur në ditët vijuese

Prishtinë, 22 mars 2003 - Departamenti amerikan i Shtetit ka kërkuar nga qytetarët amerikanë në Kosovë të ndërmarrin hapa të matur në ditët vijuese për shkak të situatës së krijuar me fillimin e luftës në Irak.

Qytetarët amerikanë dhe interesat e tyre nëpër botë janë të rrezikuar nga sulmet terroriste, duke përfshirë edhe grupet e lidhura me rrjetin e "Al Kaidës".
Zyra amerikane në Prishtinë njofton se mund të mbyllet kohë pas kohe ose të ndërpresë shërbimet publike për shkaqe të sigurisë.


Katër të akuzarit për vrasjen e Ekrem Rexhës kanë mohuar aktakuzën

Prizren, 22 mars 2003 - Katër të akuzarit për vrasjen e Ekrem Rexhës - komandant "Drinit": Sali Veseli, Abit Haziraj, Xhemajl Beqiraj dhe Halil Çadraku u shprehën njëzërit në Gjykatën e Qarkut në Prizren se nuk ndihen fajtorë për vrasjen e komandant "Drinit".
Ata kanë pohuar se një vepër të tillë as që e kanë paramenduar ta kryejnë ndonjëherë.
Ndërkaq më 24 mars pritet të shpallet aktgjykimi.


Numri i organizatave joqeveritare në Kosovë është zvogëluar dukshëm

Prishtinë, 22 mars 2003 - Numri i organizatave joqeveritare në Kosovë është zvogëluar dukshëm për shkak se ka kaluar faza emergjente dhe donacionet për këto janë zvogëluar dukshëm, u tha në një seminar të mbajtur në Prishtinë, të organizuar nga Ministria e Ekonomisë dhe Financave të Kosovës.

OJQ-të nuk po mbijetojnë edhe për faktin se shumë nga ato janë hapur për qëllime të profitimeve personale materiale, duke i shfrytëzuar donacionet.
Në vitin 2000 numri i të punësuarve në OJQ-të vendore ishte 3029 punëtorë. Ndërkaq ky numër në vitin 2002 ka rënë në 711.


Del Ponte thotë se 19 persona të akuzuar nga Gjykata e Hagës ende ndodhen në territorin e Serbisë dhe Malit të Zi

Beograd, 22 mars 2003 - Kryeprokurorja e Tribunalit të Hagës Karla Del Ponte ka deklaruar dje se bashkëpunimi i Beogradit me Tribunalin e Hagës është i pamjaftueshëm dhe i vështirë.

Kohët e fundit as që ka pasur arrestime, ka thënë Del Ponte, duke shtuar se 19 personat e akuzuar nga Gjykata e Hagës vazhdojnë të qëndrojnë në territorin e Serbisë dhe Malit të Zi.

Kështu u shpreh kryeprokurorja e Gjykatës së Hagës gjatë një paraqitje në Beograd. Ajo akuzoi shumicën e mediave serbe të cilat Karaxhiqin dhe Mlladiqin ende e cilësojnë si hero serb.


Këshilltari i kryeministrit serb vlerëson se Kosova "po rrëshqet drejt pavarësisë"

Beograd, 22 mars 2003 - Këshilltari i kryeministrit serb për politikë të jashtme Ivan Vejvoda ka deklaruar sot se Qeveria e Serbisë dhe kryeministri i saj Zoran Zhivkoviq do të vazhdojnë rrugën që e kishte filluar Zoran Gjingjiq edhe kur është fjala për hapjen e dialogut ndërmjet Beogradit e Prishtinës për statusin e Kosovës.

Ai ka vlerësuar se Kosova "po rrëshqet drejt pavarësisë".


Trupat komando shqiptare gati të nisen për në Kuvajt

Tiranë, 22 mars 2003 - Trupat komando shqiptare po presin që brenda pak ditësh të nisen për në Kuvajt për të ndihmuar procesin e paqes në Irak.

Qeveria shqiptare ka miratuar shpërblimin financiar të këtyre forcave, i cili do t'i kushtojë Shqipërisë 210 mijë dollarë në muaj. Ushtarët shqiptarë, të cilët do t'u bashkangjitën forcave amerikane e atyre britanike në luftën kundër Irakut do të kenë 100 dollarë në ditë.
Po ashtu në bazë të një marrëveshjeje me Kuvajtin është përcaktuar edhe statusi i ushtarëve shqiptarë, të cilët do të gëzojnë atje një imunitet të barabartë me atë të diplomatëve.


Pas fillimit të luftës kundër Irakut në Shqipëri ndihet një prani e shtuar e forcave policore

Tiranë, 22 mars 2003 - Për shkak të fillimit të luftës nga forcat amerikane dhe britanike kundër Irakut, javën e ardhshme presidenti Alfred Moisiu ka vendosur të thërrasë Këshillin e Sigurimit Kombëtar, ku do të analizohet kryesisht situata në vend dhe masat e marra nga qeveria.
Në Shqipëri pas fillimit të luftës kundër Irakut ndiehet një prani më e madhe e forcave të policisë jo vetëm në pikat kyçe si porta e aeroportit apo pika kufitare. Nëpër qytete dhe kryesisht në Tiranë janë vendosur postblloqe kontrolli. Në vëzhgim më të fortë nga ana e forcave policore janë institucionet kryesore shtetërore dhe ambasadat e huaja.


E. Busek: Ballkani po ballafaqohet me problemin e protektoratit mbi Bosnjen dhe Kosovën

Vjenë, 22 mars 2003 - Koordinatori i Paktit të Stabilitetit për Evropën Juglindore, Erhard Busek, duke folur në Vjenë lidhur me perspektivën evropiane të Ballkanit, tha se në këtë rrugë rajoni po ballafaqohet me dy probleme: njëri është protektorati mbi Bosnjen dhe ai tjetri është në Kosovë.
Çështja e statusit përfundimtar të Kosovës është pengesa kryesore për stabilizimin e plotë të rajonit dhe integrimin e tij në Evropë, ka vlerësuar Busek.


Ish-kryeministri maqedonas përkrah idenë e lordit Oven për krijimin e shteteve të pastra etnike në Ballkan

Shkup, 22 mars 2003 - Ish-kryeministri i Maqedonisë dhe lideri i partisë më të madhe opozitare VMRO-DPMNE Lubçe Georgievski është shprehur se agonia në Ballkan nuk mund të përfundojë pa organizimin e një konference të madhe ndërkombëtare për Ballkanin.

Në një tekst të, tij autorial të botuar në gazetën "Dnevnik" të Shkupit, ai thotë se përkrah idenë e lordit Dejvid Oven për organizimin e një konference ndërkombëtare për krijimin e shteteve të pastra etnike në Ballkan. Në këtë drejtim ai ka lavdëruar iniciativën e Gjingjiqit për zgjidhjen e çështjes së Kosovës sa më shpejtë përmes ndarjes së saj.


Parlamenti maqedonas miratoi ligjin për dokumentat e udhëtimit në Maqedoni

Shkup, 22 mars 2003 - Parlamenti maqedonas me shumicë votash ka miratuar ndryshimet dhe plotësimet e ligjit për dokumentat e udhëtimit me të cilin mundësohet përdorimi i gjuhës shqipe në brendinë dhe ballinën e pasaportave. Në ligjin e miratuar thuhet se me kërkesë të qytetarëve në pasaportë mund të përdoret edhe gjuha shqipe.

Partitë politike shqiptare në opozitë ishin kundër miratimit të ligjit për dokumentët e udhëtimit, meqë sipas tyre, ai është në kundërshtim me përcaktimin e Marrëveshjes Kornizë të Ohrit, me të cilën përveç maqedonishtes, gjuhë zyrtare është edhe shqipja.

Deputetët e PDSH-së të cilët para votimit të këtij ligji e braktisën seancën thanë se ky ligj devalvon gjuhën shqipe dhe u shprehën kundër rinegociatave rreth Marrëveshjes Kornizë, të cilat, sipas tyre, kanë përfunduar me nëshkrimin e dokumentit paqësor.
Nga ana tjetër përfaqësuesi i Bashkimit Demokratik për Integrim, deputeti Hysni Shaqiri tha se gjuha shqipe do të ketë një trajtim të njëjtë gati me gjuhën maqedonishte.
Ligji për dokumenta të udhëtimit u mbështet nga LSDM dhe nga partia opozitare maqedonase VMRO-DPMN, e cila vlerëson se ky propozimligj ishte gati i njëjtë me atë të mëparshim të propozuar kur VMRO-ja ishte në pushtet.


Protesta kundër luftës

San Francisko, 22 mars 2003 - Pavarësisht prej vazhdimit të luftimeve në shume qytete të botës janë zhvilluar demonstrata proteste. Mijëra vetë morën pjesë në një protesët në kryeqytetin e Jemenit Sana. Prej përplasjeve me policinë u vranë 2 persona dhe u plagosën 23 të tjerë.

Ndërkaq në Athine më shumë se 200 mijë vetë marshuan nëpër rrugë. Disa prej tyre u përleshën me forcat e policisë që ishin vendosur përpara ndërteses së ambasadës amerikane. Në Kairo policia përdori pompat e ujit për të shpërndarë 4 mije protestues, ndërsa ne San Francisko të SHBA 60 aktivistë pacifistë u arrestuan.


Iraku kritikon OKB-në

Bagdad, 22 mars 2003 - Ambasadori i Irakut ne OKB Muhamed Alduri e kritikoi ashpër mbrëmë Sekretarin e Pergjithshem Kofi Anan për të tërhequr inspektorët e armëve. Sipas tij kjo shënoi de jure edhe fillimin e konfliktit të armatosur.

"Unë dëshiroj të paralajmëroj se kriza e thellë që e ka përfshirë Kombet e Bashkuara, për shkak të pushtimit anglo - amerikan të Irakut dhe dështimi i saj për të ruajtur sistemin kolektiv të vendosjes në bazë të Kartës themelore, do të thellohet më tej në rast se Sekretari i Pergjithshem nuk do të zbatojë një prej neneve të saj", tha Al Duri.


Përplasje e re SHBA – Francë

Bruksel, 22 mars 2003 - Presidenti i Francës Zhak Shirak deklaroi ne takimin e fundit të liderëve të BE që u zhvillua në Bruksel se lufta shenoi dhunimin e së drejtes ndërkombetare, duke qenë se nuk u miratua nga organizmi më i lartë ndërkombëtar: pra nga Këshilli i Sigurimit i Kombeve të Bashkuara.

Por menjeherë ndaj kësaj deklarate reagoi Ministri i Jashtem i SHBA Kolin Pauell, i cili mbrojti tezën e kundërt. "Nuk jam i sigurte se për çfarë flet Presidenti Shirak.

Por ajo që di unë është se ka filluar tashmë çlirimi i Irakut dhe ne duam ta bëjmë atë në një mënyrë që bota ta kuptojë se ne jemi çlirimtarë, se ne do të vendosin një jetë më të mirë për popullin e Irakut", tha Kolin Pauell.


Shefat e shteteve të BE-së janë pajtuar se do të kenë një rol në rindërtimin e Irakut pasluftës

Bruksel, 22 mars 2003 - Shefat e shteteve të BE-së janë pajtuar do të ketë një rol në rindërtimin e Irakut pasluftës edhepse këto shtete gjatë samitit të djeshëm kishin mbetur të ndara në qëndrimet rreth kësaj lufte dhe arsyetimeve të saj.

Kryeministri i Greqisë Kosta Simitis, shteti i të cilit kryeson BE-në deri në fund të muajit qershor të këtij viti ka pohuar se ky samit megjithatë nuk mbeti viktimë e lufës sepse në të u diskutuan edhe tema tjera, siç është situata ekonomike në BE.
Një pjesë e debatit i është kushtuar edhe situatës në Ballkan, posaçërisht asaj në Serbi pas vrasjes së kryeministrit serb Zoran Gjingjiq. Në konkluzat nga ky takim thuhet se Samiti i Selanikut do të jetë një pikë e rëndësishme në etapën e stabilizimit të Ballkanit dhe të integrimit të vendeve të Ballkanit në Bashkimin Evropian. Është thënë po ashtu se vendet e Ballkanit duhet t'i vazhdojnë reformat.


Sulme të fuqishme ajrore të aleatëve mbi Bagdad

Bagdad, 22 mars 2003 - Valë avionësh dhe raketash kanë sulmuar Bagdadin dhe qytete të tjera e objekte në Irak, ndërkohë që lufta e udhëhequr nga Amerika për të rrëzuar Sadam Huseinin hyri në ditën e tretë. Kryeqyteti irakian u trondit nga shpërthime që shkaktuan mjegulla tymi në një qiell të ndriçuar megjithëse natë. Ndërtesat qeveritare u përfshinë nga flakët.

Ndërsa po zbardhte, bombarduesit u rikthyen. Së paku dy shpërthime të fuqishme u dëgjuan ndërsa avionët fluturonin sipër. Amerikanët thonë se kanë gjuajtur 1000 raketa kruz mbi Irak dhe se avionët e tyre kanë kryer qindra misione bombardimi. Qyteti verior i Mosulit gjithashtu u bombardua ndërkohë që shpërthime u dëgjuan edhe në veri në Kirkuk.


Iraku thotë se plagosen mbi 200 vetë

Bagdad, 22 mars 2003 - Autoritetet irakiane thonë se gjatë bombardimeve të fundit mbi Bagdad të forcave ameriakne dhe britanike, janë plagosur 207 civilë. Ministri irakian i Informimit, Mohamed Al-Sahaf tha se shumica e të plagosurve janë gra dhe fëmijë.


Përplasen dy helikopterë britanikë

Londër, 22 mars 2003 - Shtatë aviatorë britanikë kanë humbur jetën në ditën e tretë të sulmit të forcave amerikano-britanike mbi Irakun. Incidenti tragjik ndodhi kur dy helikopterë të Flotës Mbretërore britanike u përplasën mbi Gjirin Persik.

Të shtatët ishin pjesëtarë të ekuipazhit të dy helikopterëve.Incidenti ndodhi në hapësirën ajrore mbi ujërat ndërkombëtare. Ushtarakë britanikë në Katar thanë se ai nuk ndodhi si rezultat i veprimeve të forcave kundërshtare. Zyrtarët thanë se edhe në këtë rast, flitej për një aksident, sikur edhe në rastin e së enjtës.


Komandantë dhe ushtarë irakianë dorëzohen

Bagdad, 22 mars 2003 - Numri i të dorëzuarve nga ushtria irakiane po rritet. Zyrtarë amerikanë të mbrojtjes thonë se komandantë të lartë të Divizionit 51 irakian janë dorëzuar. Së bashku me ta edhe vetë divizioni. Se sa është numri i këtyre trupave nuk është e qartë pasi burime të mbrojtjes thonë se shumë në këtë njësi dezertuan dhe ata shtojnë se dorëzimi i tyre vazhdon.
Por nga ana tjetër ka patur edhe rezistencë të fortë nga forcat irakaine.


Dy ushtarë amerikanë janë vrarë gjatë luftimeve në Irak

Uashington, 22 mars 2003 - Dy ushtarë amerikanë janë vrarë gjatë luftimeve në Irak, bëjnë të ditur burimet ushtarake amerikane. Ndërkaq, presidenti amerikan Bush i ka shprehur ngushëllime familjeve të ushtarëve të vrarë si pasojë e një aksidenti ajror të një helikoperi ushtarak amerikan. Aksidenti në fjalë, që ndodhi gjatë orëve të para të ditës në Kuvajt, ku humbën jetën 8 ushtarë britanikë dhe 4 amerikanë, është i treti në dy ditët e fundit.


Regjimi i Sadam Huseinit është histori

Uashington, 22 mars 2003 - Sekretari amerikan i mbrojtjes, Donald Ramsfeld ka thënë se shkalla e sulmeve kishte si qëllim t'i tregonte irakianëve se Sadam Huseini kishte mbaruar dhe se regjimi i tij ishte histori. Zoti Ramsfeld tha se ai nuk e dinte nëse udhëheqësi irakian ishte ende gjallë, por struktura e tij komanduese po dështonte.


Turqia ka hapur hapësirën e saj ajrore për fluturimet ushtarake të trupave amerikane

Ankara, 22 mars 2003 - Turqia ka hapur hapësirën e saj ajrore për fluturimet ushtarake të trupave amerikane, ka deklaruar ministri turk i mbrojtjes. Ministri turk i Mbrojtjes, Vecdi Gonul, ka pohuar se vazhdojnë diskutimet me Uashingtonin për lejimin e trupave turke në veri të Irakut.