Lajme

E premte, 21 mars 2003

Përmbajtja:

• Partitë politike dhe institucionet e Kosovës mbështesin fuqishëm SHBA-të në luftën kundër Irakut

• Senatorët dhe kongresistët amerikanë falenderojnë shqiptarët për përkrahjen që po i japin popullit amerikan

• BIK: Për një trajtim adekuat të vlerave tona fetare

• Ombudspersoni i shkruan ministrit të Tregtisë lidhur me regjistrimin e biznesit

• Në Prishtinë u mbajt një manifestim në shenjë përkrahjeje ndaj SHBA-ve dhe aleatëve

• Gjilani kundërshton politikën e ndarjes së buxhetit për komunitete

• KFOR-i çek e sllovak apelon qytetarët që të mos lëvizin rreth vijës kufitare

• Në disa komuna të Kosovës arsimtarët kanë filluar nënshkrimin e peticionit për një grevë

• Familjarët e të zhdukurve e katër komunave të Kosovës shkuan në Rahovec për t'i identifikuar rrobat e kufomave të të zhdukurëve

• Shtajner u tha studentëve të Prishtinës se proceset pozitive në Kosovë nuk mund të ndalen

• Spastrime në sistemin gjyqësor të Serbisë - shkarkohet edhe prokurori republikan i Serbisë

• Ardhmëria e Ballkanit Perëndimor është në Bashkimin Evropian

• Zëvendësprokurori i arrestuar serb ka pranuar se ka qenë në listën e pagave të klanit kriminal të Zemunit

• Partitë shqiptare në Maqedoni mbështesin fuqishëm ndërhyrjen e SHBA-ve kundër Irakut

• Autoritetet serbe dy diplomatëve irakianë në Beograd u kanë urdhëruar të largohen nga ky vend

• Këshilli i Mbrojtjes serbo-malazeze shkarkoi nga detyra shefin e kundërzbulimit

• Marinsave amerikanë sot u janë dorëzuar 250 ushtarë irakianë

• Zyrtarët irakianë kanë konfirmuar se raketat amerikane kanë goditur shtëpinë e Hyseinit në Bagdad

• Është qëlluar një aeroplan i aleatëve nga forcat irakiane

• Është vrarë ushtari i parë amerikan në luftimet në Irak

• Marinsat amerikanë sot ngritën flamurin e SHBA-ve në portin irakian Um Kasër

• Policia në San Francisko ka arrestuar 1,025 protestues në demonstratat kundër luftës

• Komandosët britanikë pushtuan stabilimentet e naftës në siujdhesën Fav

• Në helikpterin e rrëzuar kanë vdekur 8 ushtarë britanikë dhe 4 amerikanë

• Trupat tokësore amerikane të papenguara marshojnë drejt Bagdadit

• Shpërthime në Basra dhe Mosul

• Një helikopter amerikan është rrëzuar në Kuvajt, vriten të 16 ushtarët amerikanë dhe britanikë

• Kongresi: Mbështetje për trupat amerikane

• Londër: Bler bën thirrje për bashkim

• Parlamenti i Turqisë u ka vënë në dispozicion SHBA-ve hapësirën ajrore

• Ramsfeld: Ditët e Sadam Huseinit janë të numëruara

• Anan: SHBA dhe forcat irakiane të bëjnë ç'është e mundur për të mbrojtur civilët gjatë luftimeve

• Shtetet e Bashkuara kanë mbyllur ambasadën në Maqedoni dhe në disa vende të tjera

• Forcat aleate përparojnë brenda Irakut

• BE premton ndihmë për Irakun

• Iraku: Sulmi atentat ndaj Saddamit

Partitë politike dhe institucionet e Kosovës mbështesin fuqishëm SHBA-të në luftën kundër Irakut

 

Kosova mbështet fuqishëm luftën e SHBA-ve në Irak. Foto: AP -Visar Kryeziu

Prishtinë, 21 mars 2003 - Fillimi i luftës në Irak po përcillet me interesim të jashtëzakonshëm edhe në Kosovë, ku përfaqësuesit e insititucioneve, partive politike dhe shoqatave të saj vazhdojnë të mbështesin fuqishëm Shtetet e Bashkura të Amerikës.   Presidenti, Rugova, kryeministri Rexhepi dhe kryeparlamentari i Daci përkrahën luftën e SHBA-ve dhe aleatëve të saj kundër diktatorit irakian duke theksuar se ajo ka ngjashmëri të mëdha me luftën e para katër vjetëve në Kosovë.   Edhe atëherë edhe tashti, thonë ata qëllimi ka qenë shpëtimi i një populli dhe përmbysja e një regjimi diktatorial.

 

Në anën tjetër, mjetet elektronike të informimit vazhdimisht po përcjellin pamje kryesisht të stacioneve televizive amerikane.

 

Përfaqësuesit e jetës politike dhe shtetërore të Kosovës, duke bërë një krahasim me ish-shefin e regjimit serb Sllobodan Millosheviq pohojnë se lufta e Shteteve të Bashkuara të Amerikës dhe forcave të koalicionit është e ligjshme, meqë sundimtarët e tillë, si Sadam Hueseini, nuk njohin gjuhë tjetër, veç asaj të forcës.

 

Prandaj, sipas tyre, kjo luftë është në shërbim të paqes, sikurse që ishte ajo në Kosovë e drejtuar nga Shtetet e Bashkuara të Amerikës.

 

 

Senatorët dhe kongresistët amerikanë falenderojnë shqiptarët për përkrahjen që po i japin popullit amerikan

 

Uashington, 21 mars 2003 - Mbrëmë në Uashington u mbajt një takim i përbashkët ndërmjet senatorëve e kongresistëve amerikanë me përfaqësuesit e Këshillit Kombëtar Shqiptaro-amerikan. Në një raport të transmetuar në "Zërin e Amerikës" citohet drejtori ekzekutiv i Këshillit Kombëtar Shqiptaro-Amerikan Martin Vulaj të ketë thënë se dita e Kongresit këtë vit, ishte një ditë krenarie për shqiptarët.

 

Ai ka theksuar se përfaqësuesit e Senatit dhe të Kongresit amerikan në vazhdimësi e kanë vlerësuar pozitivisht pozicionin e shqiptarëve dhe mbështetjen e tyre të fuqishme dhënë SHBA-ve në aksionet ushtarake kundër Irakut.

 

Z. Vulaj ka shtuar se senatorët dhe kongresistë amerikanë kanë falendëruar shqiptarët e Shqipërisë, të Kosovës dhe të Maqedonisë për deklaratat dhe për ndihmën ushtarake e shpirtërore, përkatësisht për përkrahjen që shqiptarët i kanë dhënë në këto momente të vështira popullit amerikan, që do të thotë se shqiptarët në këtë mënyrë po ia kthejnë borxhin Amerikës, e cila a bërë shumë për ta gjatë viteve të kaluara.

 

 

Në Prishtinë u mbajt një manifestim në shenjë përkrahjeje ndaj SHBA-ve dhe aleatëve

 

Prishtinë, 21 mars 2003 - Në qendër të Prishtinës sot u mbajt një manifestim publik në shenjë përkrahjeje ndaj SHBA-ve dhe aleatëve të tyre në ndërhyrjen ushtarake kundër Irakut, manifestim ky i organizuar nga shoqatat e dala nga lufta, BSPK dhe UPSUP.

Me këtë rast u përkujtua ndihma e pakursyer e SHBA-ve dhe aleatëve katër vjet më parë kundër soldateskës së regjimit të Millosheviqit në Kosovë. Ndërkaq lufta e SHBA-ve dhe e aleatëve në Irak u quajt luftë e drejtë për lirinë dhe paqen në botë. Nga ky manifestim iu dërgua një letër përkrahjeje presidentit amerikan Xhorxh Bush.

 

  

BIK: Për një trajtim adekuat të vlerave tona fetare

 

Prishtinë, 21 mars 2003 - "Jemi dëshmitarë se ditëve të fundit është bërë një politizim rreth disa çështjeve, të cilat kanë të bëjnë me disa bashkësive tona tradicionale, si rezultat i mostrajtimit të barbartë të tyre nga institucionet tona dhe ato ndërkombëtare, gjë që mund të ketë pasoja për shoqërinë tonë në të ardhmen", thuhet në një komunikatë për opinion të Bashkësisë Islame të Kosovës (BIK).

"Këto ditë në Kosovë qëndroi një delegacion i UNESCO-s, i cili e vlerësoi lart trashëgiminë tonë kulturore, gjë që na bënë të krenohemi.

 

Mirëpo, në të njejtën kohë nuk mund të mos shprehim indinjatën tonë të thellë se programi i delegacionit në fjalë ishte i përqëndruar kryesisht në vizitën e objekteve fetare ortodokse serbe e shumë pak ishin përfshirë objektet fetare islame si dhe ato të trashëgimisë sonë të lashtë kombëtare", thuhet më tutje në këtë komunikatë dhe theksohet:

"Ne me plot përgjegjësi kemi njoftuar opinionin se gjatë agresionit të fundit serb në Kosovë nga forcat policore, ushtarake e paramilitare me paramendim dhe planifikim u dogjën, u granatuan dhe u rrënuan 218 objekte islame, shumë prej të cilave me vlera të mëdha arkitektonike, si dhe monumente me rendësi kombëtare.

 

Kjo të jep të kuptosh se delegacioni i UNESCO-s sikur kishte ardhur i porositur për të mos thënë i kurdisur nga pala serbe për t'i bërë një vizitë kishave dhe manastireve serbe në Kosovë".

"Delegacioni i UNESCO-s nuk e pa të udhës që së paku një takim të tillë bënte edhe me dy liderët tjerë fetarë, atë të Bashkësisë Islame të Kosovës dhe atë të Ipeshkvisë Katolike të Kosovës, për t'u informuar hollësisht për gjendjen e objekteve fetare që kanë vlerë monumenti, dhe me vështirësitë me të cilat po ballafaqohen për rindërtimin e tyre, si rezultat i barbarisë dhe etnocidit serb ndaj monumenteve të kulturës materiale siç është xhamia e Hadumit në Gjakovë, një objekt me vlera të rralla arkitektonike dhe kulturore.

 

Të tilla objekte me vlera të mëdha monumentale janë edhe ato në Pejë, Prishtinë, Prizren e gjetiu, e të cilat vazhdojnë të jenë të shkatërruara", thuhet mes tjerash në këtë komunikatë të Bashkësisë Islame të Kosovës.

 

 

Ombudspersoni i shkruan ministrit të Tregtisë lidhur me regjistrimin e biznesit

 

Prishtinë, 21 mars 2003 - Ombudspersoni i ka dërguar një letër ministrit të Tregtisë dhe Industrisë, në të cilën shpreh brengat e tij lidhur me faktin që njësitë për regjistrimin e biznesit në mbarë Kosovën duket të kenë regjistruar si biznese personat që janë prezentuar si notarë dhe avokatë.

Në letrën e tij, Ombudsersoni thekson që nuk ka ligj mbi notarët dhe që si rrjedhim askush në Kosovë nuk do të duhej të regjistrohej si biznes në bazë të deklaratës që ai apo ajo është notar.

 

Ombudspersoni gjithashtu thekson që njësitë për regjistrimin e biznesit kanë regjistruar si biznese individët të cilët ose nuk kanë qenë të licencuar ta praktikojnë ligjin, ose kanë qenë të larguar nga praktikimi i ligjit për shkak të sjelljes së keqe profesionale.

Në shtetet demokratike evropiane, si notarët ashtu edhe juristët bëjnë pjesë në pozitat e besimit publik. Avokatët luajnë një rol të rëndësishëm në administrimin e drejtësisë, duke shërbyer si ndërmjetësues mes individëve dhe gjykatave, thekson në letrën e tij Novicki.

 

 

Gjilani kundërshton politikën e ndarjes së buxhetit për komunitete

 

Gjilan, 21 mars 2003 - Rregullorja 2002/23 i obligon komunat e Kosovës që për pakicat të ndajnë 22.1 për qind të buxhetit. Komiteti për Politikë dhe Financa i Kuvendit të komunës së Gjilanit e ka diskutuar në takimin e tij të fundit këtë rregullore dhe ka shprehur mospajtimin e vet, të cilin e ka bazuar në disa faktorë realë. Imponimi i parametrave që nuk korrespondojnë me gjendjen faktike, nuk i kontribuon procesit të integrimit të komuniteteve në shoqërinë kosovare, e cila po dëshmohet e vendosur për të ndërtuar një jetë më të mirë për të gjithë qytetarët e saj.

Zijadin Maliqi, drejtor i buxhetit dhe financave në Gjilan thotë se obligimi për ndarje të 22.1 për qind të mjeteve, për komunitete, është jo vetëm i pajustifikueshëm për këtë komunë, por në të njëjtën kohë dhe demotivon liderët në përpjekjet e tyre për të inkurajuar barazinë dhe mirëqenien e përgjithshme.

 

Ai garanton se do të ketë investime në të gjitha lokalitetet e komunës, pa dallim nëse atje jetojnë shqiptarët, serbët, turqit, romët apo të tjerë.

Duke iu referuar të dhënave statistikore të njësisë në Gjilan, komunitetet përbëjnë 16-17 për qind të numrit të përgjithshëm të banorëve, ndërsa numri i nxënësve, në këtë krahasim shifror me popullatën shumicë, përbën 10 për qind. As statistikat e fundit zyrtare të vitit 1981, nuk provojnë një përqindje kaq të lartë të komuniteteve në komunën e Gjilanit.

Nëse një ndarje e këtillë e buxhetit është e pashmangshme tani për tani, komuna mund të pajtohet që përqindja e mjeteve të jetë deri në 17 për qind, por jo më e lartë, sepse statistikat nuk provojnë të jetojë një përqindje kaq e lartë e komuniteteve në Gjilan.

Shumica e anëtarëve të Komitetit për Politikë dhe Financa e kritikuan politikën imponuese të ndarjes së mjeteve nga buxheti, ndërsa për shkallën e detyrimit 22.1 për qind, për komunitete, ata thanë se nuk ka bazë në gjendjen reale. Ata u dakorduan që, përmes një procesi të rregullt, të adresojnë një kërkesë për rishqyrtimin e kësaj rregullore, mbi baza të argumenteve që do të ofrohen.

 

 

KFOR-i çek e sllovak apelon qytetarët që të mos lëvizin rreth vijës kufitare

 

Podujevë, 21 mars 2003 – "Situata në territorin tonë është e qetë dhe ne kemi vazhduar me operacionet dhe patrullat rutinore", tha në konferencën e sotme për gazetarë zëdhënësi i Batalionit të Dytë Çeko-Sllovak majori Aleksandër Kollarik.

Ai njoftoi se në afërsi të vijës kufitare Kosovë-Serbi KFOR-i ka ndaluar 4 shqiptarë të cilët kishin një pushkë automatike dhe 2 karikatorë të mbushur plot. Sipas të gjitha gjasave ata kishin qëllim prerjen ilegale të drunjëve dhe kjo ndodhi përkundër apelit të komandantit që qytetarët të mos i afrohen vijës kufitare, pohoi majori Kollarik i cili tha se katër personat i janë dorëzuar policisë së UNMIK-ut.

 

Majori Kollarik njoftoi për një granatë 84 mm e cila është gjetur në Dobërdol të cilën ekipi i EOD-së çeke e ka zabrazur dhe për dy bomba dore të gjetura në afërsi të kampit çeko-sllovak në Shajkofc.

Në pyetjen e gazetarëve se a ka pasur lëvizje në KFOR pas fillimit të luftës në Irak z. Lofler tha se po por nuk mund të komentojë dhe shtoi: pavarësisht luftës në Irak KFOR-i do të kryejë detyrat si më parë në Kosovë.

Në bazë të informacioneve të policisë regjionale të UNMIK-ut në Prishtinë, gjatë javës ka pasur një kërcënim nga katër persona me automatikë AK-47 që kanë hyrë në një kafe bar dhe kanë urdhëruar pronarin ta mbyllë lokalin.

 

Në një pikë kontrolluese të policisë dhe KFOR-it në një veturë është gjetur sprej truprojash, në Llaushë KFOR-i ka dorëzuar 4 shqiptarë me një pushkë, 2 karikatorë dhe 50 rrathë municion, ndërkaq në fshatin Livadicë policia ka zbuluar 2 bomba dore që ishin lënë në një vend për një kohë të gjatë, njoftoi policia rajonale e UNMIK-ut e Prishtinës.

  

 

Në disa komuna të Kosovës arsimtarët kanë filluar nënshkrimin e peticionit për një grevë

 

Prishtinë, 21 mars 2003 - Burimet e SBASHK-ut bëjnë të ditur se në disa komuna të Kosovës arsimtarët kanë filluar nënshkrimin e peticionit për fillimin e një greve të përgjithshme, nëse brenda një kohe të shkurtër nuk rriten pagat e tyre.

 

Si kërkesë kryesore arsimtarët do të kenë rritjen e pagave nga një janari e këtij viti dhe ato të nivelizohen me pagat e shërbimeve të tjera publike, ose duhet të vazhdohet me pagesa e 44 euro, që është bërë vetëm për katër muaj, si masë për ndërprerjen e grevës së tetorit të vitit të kaluar.

 

 

Familjarët e të zhdukurve e katër komunave të Kosovës shkuan në Rahovec për t'i identifikuar rrobat e kufomave të të zhdukurëve

 

Rahovec, 21 mars 2003 - Familijarët e të zhdukurve nga Komuna e Vushtrrisë, Mitrovicës, Drenasit dhe Skënderajt kanë shkuar dje nënë Rahovec për të identifikuar rrobat e kufomave të gjetura në varrezat masive në këto pjesë të Kosovës.

"Ishin ekspozuar në Rahovec rrobat dhe gjësendet tjera të gjetura në këto zona meqë supozohet të jenë rrobat e të zhdukurëve", thotë Sabit Kadriu përfaqësues i Organizatës për Hulumtimin e Personave të Zhdukur.

 

Ai ka theksuar se vetëm nga Komuna e Vushtrrisë janë 74 persona të zhdukur më 22 maj për të cilët ende nuk dihet dhe deri më tash nuk është arritur që t'u bihet në gjurmë këtyre të zhdukurëve. Z. Kadriu tha se nuk është i kënaqur me rezultatet e deritanishme lidhur me identifikimin e personave të zhdukur.

 

 

Shtajner u tha studentëve të Prishtinës se proceset pozitive në Kosovë nuk mund të ndalen

 

Prishtinë, 21 mars 2003 - Kryeadministratori i Kosovës Mihael Shtajner në një debat me studentët e Fakultetit Juridik të Universitetit të Prishtinës ka theksuar se proceset pozitive në Kosovë nuk mund të ndalen dhe këtë e di mirë populli i Kosovës.

"Mendoj se njerëzit në Kosovë kanë kuptuar se posaçërisht në situata që nuk është e lehtë në tërë globin ne duhet të dyfishojmë punën tonë që ta bëjmë Kosovën vend më të mirë", ka thënë Shtajner. Ai ka paraqitur edhe qëndrimin e tij rreth bisedimeve të mundshme ndërmjet Prishtinës dhe Beogradit për çështje praktike, si dhe për kthimin e serbëve të zhvendosur në Kosovë.

 

Ata që janë larguar nga vendi kanë të drejtë të kthehen nëpër shtëpitë e tyre, duke shtuar se ky ka qenë parimi që NATO në vitin 1999 ka bërë që të intervenojë në Kosovë.

Kryeadministratori i Kosovës pastaj ka theksuar se standardet janë elemente që i duhen shoqërisë për të funksionuar, kurse në përmbushjen e këtyre standardeve në një masë të duhur do të përmirësohen kushtet jetësore, si dhe do të krijohen kushte për sigurimin e vendeve të lira të punës.

 

Shtajner pastaj ka theksuar se me përmbushjen e këtyre standardeve do të ndalet edhe krimi i organizuar, ndërkaq përgjegjëse për përmbushjen e këtyre standardeve janë institucionet vendore, duke u bazuar në kompetencat e tyre, tha ai.

 

 

Spastrime në sistemin gjyqësor të Serbisë - shkarkohet edhe prokurori republikan i Serbisë

 

Beograd, 21 mars 2003 - Ushtruesja e detyrës së presidentit të Serbisë Natasha Miqiq ka pezulluar nga puna prokurorin republikan të Serbisë Sinisha Simiq dhe në vend të tij është emëruar Gjorgje Ostojiq. Ditë më parë është arrestuar zëvendësprokurori republikan Milan Sarajliq, për shkak të lidhjeve me klanin kriminal të Zemunit.

Gjithashtu njoftohet se ushtrues i detyrës së kryetarit të Gjykatës Supreme të Serbisë është emëruar Sonja Bërkiq, pasi më herët ishte shkarkuar nga kjo detyrë kryetarja e kësaj gjykate Leposava Karamarkoviq dhe disa gjyqtarë të tjerë.

Deri më tash në gjykatat e ndryshme të Serbisë janë pezulluar nga puna mbi 30 gjyqtarë të ndryshëm.
Këto spastrime në sistemin gjyqësor të Serbisë janë bërë si pasojë e vrasjes së kryeministrit serb Zoran Gjingjiq.

 

 

Ardhmëria e Ballkanit Perëndimor është në Bashkimin Evropian

 

Bruksel, 21 mars 2003 - Në përfundimet për Ballkanin Perëndimor, të miratuara të premtën në takimin e anëtarëve të Bashkimit Evropian në Bruksel, theksohet se ardhmëria e Ballkanit Perëndimor është në BE.

Liderët e BE-së kanë premtuar se mbështesin plotësisht përpjekjet e vendeve të Ballkanit Perëndimor për forcimin e demokracisë, stabilitetit dhe zhvillimit ekonomik.

 

Duke përkujtuar se prej 1 janarit të këtij viti BE-ja ka marrë kontrollin e misionit policor në B e H, kurse prej 31 marsit merr për edhe misionin ushtarak në Maqedoni, Këshilli i Evropës thotë se kjo është "dëshmi e angazhimit tonë të plotë në rajon".

 

Në fund të përfundimeve thuhet se Ballkani Perëndimor mbetet prioritet për BE-në, kurse liderët e pesëmbëdhjeteëshes kanë theksuar se në takimin e ardhshëm të BE-së më 21 qershor në Selanik do të prezentojnë "etapën e re të përbashkët në forcimin e marrëdhënieve ndërmjet BE-së dhe vendeve të këtij rajoni".

 

 

Zëvendësprokurori i arrestuar serb ka pranuar se ka qenë në listën e pagave të klanit kriminal të Zemunit

 

Beograd, 21 mars 2003 - Zëvendësprokurori publik republikan i Serbisë Milan Sarajliq gjatë hetimeve që janë duke u zhvilluar kundër tij ka pranuar se ka qenë në listën e pagave të Dushan Spasojeviqit i quajtur "Shiptar".

 

Në një komunikatë të Qeverisë së Serbisë, thuhet se Sarajliq e ka pranuar edhe që tek udhëheqësi i klanit kriminal të Zemunit, Milorad Lukoviq i quajtur Legia, "ka shkuar për instruksione". Sarajliq ka pranuar se nga një milion euro të planifikuara i ka marrë 150.000 euro për informacionin për vendbanimin e dëshmitarit të mbrojtur.

 

Sarajliq policisë i ka thënë se detyra e tij ka qenë që t'i pengojë të gjitha hetimet të cilat janë zhvilluar prej 5 tetorit - vrasjen e gazetarit Sllavko Quruvisë, krimin në Magjistralen e Ibrit, vrasjen e zv/ministrit të Punëve të Brendshme Radovan Stojçiq Baxhës, vrasjen e drejtorit të JAT-it Zhika Petroviqit dhe të dhjetra vrasjeve tjera.

Më në fund, Sarajliq e ka pranuar se "Klani i Zemunit" i ka premtuar një shumë të madhe të hollash nëse do të bëhet prokuror special por edhe nëse jo, do ta marrë kompensimi në të holla për çdo informacion që e jep nga puna e prokurorisë.

 

 

Partitë shqiptare në Maqedoni mbështesin fuqishëm ndërhyrjen e SHBA-ve kundër Irakut

 

Shkup, 21 mars 2003 - Të gjitha partitë shqiptare në Maqedoni e mbështesin fuqishëm ndërhyrjen e Shteteve të Bashkuara të Amerikës dhe aleatëve të saj kundër Irakut për të çarmatosur diktatorin Sadam Hueseinin.

Bashkimi Demokratik për Integrim nëpërmjet nënkryetares Teuta Arifi shprehu qëndrimin duke thënë se SHBA-të janë partnerë strategjikë të Maqedonisë dhe qëndrimet e partisë së saj mbetën në këtë vijë për ndërtimin e marrëdhënieve të hapura me Shtetet të Bashkuara, duke pasur parasysh paqen dhe interesat globale.

Ndërkaq, Partia Demokratike Shqiptare thotë se ajo e kishte këshilluar me kohë qeverinë në Shkup që të mbështesë SHBA-të në një luftë eventuale kundër Sadam Huseinit. Zëdhënësi i kësaj partie Demush Bajrami thotë se thirrjet e SHBA-ve drejtuar regjimit të Sadamit nuk prodhuan efekte që t'i shmanget një konflikti luftarak. Edhe partitë tjera mbështesin ndërhyrjen kundër Irakut.

 

Por, qeveria e Branko Cërvenkovski ende nuk ka reaguar pas fillimit të luftës në Irak, ndonëse është i njohur qëndrimi i saj mbështetës për aleatët kundër diktatorit Husein.

 

 

Autoritetet serbe dy diplomatëve irakianë në Beograd u kanë urdhëruar të largohen nga ky vend

 

Beograd, 21 mars 2003 - Autoritetet serbe dy diplomatëve irakianë të akredituar në Beograd u kanë dhënë një afat prej 42 orësh që së bashku me familjet e tyre të braktisin këtë vend.

 

 

Këshilli i Mbrojtjes serbo-malazeze shkarkoi nga detyra shefin e kundërzbulimit

 

Beograd, 21 mars 2003 - Me vendimin e Këshillit të Mbrojtjes serbo-malazeze është shkarkuar nga detyra gjenerali Aca Tomiq, shef i shërbimti të kundërzbulimit (KOS). Ai ishte i afërt me ish-presidentin jugosllav Vojisllav Koshtunica, i cili me krijimin e Unionit Serbi - Mali i Zi mbeti pa këtë post.

 

 

Marinsave amerikanë sot u janë dorëzuar 250 ushtarë irakianë

 

Gjiri, 21 mars 2003 - Marinsave amerikanë nën komandën britanike sot u janë dorëzuar 250 ushtarë irakianë gjatë depërtimit në portin më të madh jugor Um Kasër, bëri të ditur komandanti britanik, koloneli Stiv Koks. Sipas Rojterit ushtarët irakianë u dorëzuan në mesditë.

 

Marinsat amerikanë kanë pushtuar portin e ri Um Kasër e tani kanë larg vetëm një kilometër për shtie në dorë portin e vjetër dhe në këtë mënyrë praktikisht do të kontrolljnë daljen në det të Irakut.

 

 

Zyrtarët irakianë kanë konfirmuar se raketat amerikane kanë goditur shtëpinë e Hyseinit në Bagdad

 

Bagdad, 21 mars 2003 – Zyrtarë të lartë irakianë kanë konfirmuar sot se raketat amerikane kanë goditur në Bagdad shtëpinë e presidentit Sadam Hysein, familja e të cilit ka shpëtuar e pa dëmtuar, por kanë mohuar se zona kufitare Um Kasër ka rënë dhe është pushtuar nga forcat britaniko-amerikane apo se ushtarët irakianë janë dorëzuar, njofton UPI.

 

 

Është qëlluar një aeroplan i aleatëve nga forcat irakiane

 

Bagdad, 21 mars 2003 - Një aeroplan luftarak i aleatëve, amerikan ose britanik, është qëlluar nga forcat irakiane, gjatë fluturimit me një skuadrilje që sulmonte në territorin irakian, njofton AFP, duke iu referuar agjencisë zyrtare irakiane të lajmeve, INA.

 

 

Është vrarë ushtari i parë amerikan në luftimet në Irak

 

Uashington, 21 mars 2003 – Një marins amerikan është vrarë në Irak, njofton AP. Ky është ushtari i parë i vrarë në luftimet në Irak, ka deklaruar sot (të premten) një zyrtar amerikan i Mbrojtjes.

 

Ushtari i vrarë ishte duke lëvizur në tokë, ku forcat irakiane kanë sulmuar, ka thënë kol. Nil Pekam, zëdhënës ushtarak britanik në Kuvajt. Ai pastaj ka shtuar se s'ka informacione më të hollësishme.

 

Ky incident ka ndodhur disa orë pasi kanë humbur jetën tetë ushtarë britanikë dhe katër ushtarë amerikanë me rastin e rrëzimit të helikopterit amerikan, për të cilin zëdhënësi ushtarak britanik ka thënë se ka qenë një aksident.

 

 

Marinsat amerikanë sot ngritën flamurin e SHBA-ve në portin irakian Um Kasër

 

Kuvajt, 21 mars 2003 - Marinsat amerikanë sot ngritën flamurin e SHBA-ve në portin irakian Um Kasër ku hasën në një rezistencë të dobët, njofton Rojter.

Gjithashtu njoftohet se me këtë rast marinsave ameikanë u janë dorëzuar 30 ushtarë irakianë, duke valvitur flamurin e bardhë në shenjë dorëzimi.

Në konvojin që e shoqëronin marinsat, SHBA-të kanë ndërmend që këtë port në jug të Irakut ta përdorin si qendër për ndihmat humanitare në Irak. Depërtimin e forcave amerikane në këtë port e ndihmoi artileria britanike nga kufiri me Kuvajtin, e cila theu rezistencën irakiane dhe mundësoi hyrjen e marinsave në atë port.

 

 

Policia në San Francisko ka arrestuar 1,025 protestues në demonstratat kundër luftës

 

San Francisko, 21 mars 2003 – Policia në San Francisko ka arrestuar 1,025 protestues gjatë dhunës në demonstratat kundër luftës, njofton BBCWorld. Protestuesit kanë bllokuar rrugët e qytetit Oakland, ndërsa grupe të vogla janë përleshur me policinë dhe kanë hudhur copa.

 

Dhjetëra mijëra njerëz iu kanë bashkuar demonstratave në mbarë SHBA-të. "Kjo nuk është një ditë e zakonshme", ka thënë Xhejson Mark, protestues në San francisko. "Amerika është ndryshe sot", ka shtuar ai. Demonstratat kundër luftës e kanë bllokuar gjithashtu edhe Nju Jorkun.

 

Ndërkaq, qindra protestues janë tubuar edhe në Uashington. Qindra studentë të Universitetit të Harvardit, kanë dalë nga klasat dhe të pakten 1,500 sish kanë marrë pjesë në protesta.

Protesta të mëdha ka pasur dje edhe në mbarë botën, në disa vende ato kanë qenë të dhunshme, sidomos në Belgjikë, Egjipt, Spanjë, Indi dhe Zvicër.

 

 

Komandosët britanikë pushtuan stabilimentet e naftës në siujdhesën Fav

 

Gjiri Persik, 21 mars 2003 - Komandantët britanikë kanë konfirmuar sot se një sulm nga deti në Irakun e jugut gjatë natës ka qenë i suksesshëm dhe se marinsat gjatë natës kanë pushtuar stabilimentet kryesore të naftës në siujdhesën Fav, njofton Rojter.

Komandosët e marinës britanike sulmuan këtë siujdhesë nga toka dhe deti me ndihmën e helikopterëve për për të pushtuar terminalet kryesore të naftësjellësit irakian.

 

 

Në helikpterin e rrëzuar kanë vdekur 8 ushtarë britanikë dhe 4 amerikanë

 

Kuvajt, 21 mars 2003 - Zyrtarisht është korrigjuar numri i të aksidentuarve në helikopterin amerikan dhe thuhet se 8 ushtarë britanikë dhe 4 amerikanë kanë vdekur me rastin e rrëzimit të helikopterit gjatë natës në jug të Irakut, njoftoi zëdhënësi i armatës britanike në Kuvajt.

 

Paraprakisht ishte njoftuar se në helikopterin e rrëzuar ndodheshin 12 ushtarë britanikë dhe katër amerikanë.

 

 

Trupat tokësore amerikane të papenguara marshojnë drejt Bagdadit

 

Bagdad 21 mars 2003 - Me mijëra tanke dhe transporterë amerikanë, të përcjellë me pjesët e divizionit të tretë të këmbësorisë dhe të divizionit të shtatë të SHBA-ve, në ditën e dytë të ndërhyrjes ushtarake kundër Irakut po depërtojnë nëpër shkretëtirën irakiane drejt Bagdadit, duke mos hasur në kurrfarë rezistence, njofton televizioni amerikan CNN.

Njoftohet se rreth 10.000 transporterë dhe tanke po lëvizin me shpejtësi 40 km në orë.

 

 

Shpërthime në Basra dhe Mosul

 

Kuvajt, 21 mars 2003 - Dëshmitarë okularë flasin për shpërthime brenda apo në afërsi të dy qyteteve irakinae, ndërkohë që forcat e koalicionit vazhdojnë avancimin në jug të Irakut.

Forcat amerikane dhe britanike filluan të vërshonin në Irak nga kufiri verior i Kuvajtit dje, duke iu drejtuar dy qyteteve porte, Umm Qasr dhe qendrës së dytë më të madhe urbane të vendit, Basra.
Sipas lajmeve të para të ditës së sotme, shpërthime pati në qytetin Basra dhe në qytetin verior të vendit, Mosul, pas goditjeve me raketa dje në kryeqytetin e vendit, Bagdad.

Zyrtarët amerikanë po vlerësojnë dëmet e shkaktuara nga sulmi që u krye para agimit kundër një kompleksi qeveritar në Bagdad, ku mendohej se ndodheshin anëtarë të udhëheqjes irakiane.

 

Iraku këmbëngul se raketat goditën ndërtesa të boshatisura. Kryqi i Kuq Ndërkombëtar thotë se një civil u vra dhe 14 të tjerë u plagosën në këtë sulm.

 

 

Një helikopter amerikan është rrëzuar në Kuvajt, vriten të 16 ushtarët amerikanë dhe britanikë

 

Kuvajt, 21 mars 2003 - Zyrtarët ushtarakë amerikanë kanë konfirmuar se një helikopter i marinës amerikane është rrëzuar në Kuvajt, duke vrarë të 16 ushtarët amerikanë dhe britanikë në bord. Helikopteri u rëzua në afërsi të kufirit me Irakun. Hetimet për incidentin kanë filluar, por zyrtarët ushtarakë thonë se ky nuk ishte rezultat i zjarrit të armikut në rajon.

 

 

Kongresi: Mbështetje për trupat amerikane

 

Uashington, 21 mars 2003 - Ligjvënësit demokratë në Kongresin e Shteteve të Bashkuara, të cilët kanë kritikuar politikën e administratës së presidentit Bush ndaj Irakut, janë bashkuar tani për të shprehur mbështetjen e tyre për trupat amerikane që marrin pjesë në operacionin ushtarak për çarmatosjen e Irakut. Senati pritet të miratojë një rezolutë, e cila do të shprehë mbështetjen për trupat.

Udhëheqësi i demokratëve në senat, Tom Deshëll, i cili shkatoi zemërimin e ligjvënësve republikanë, me kritikat e tij ndaj dështimit të përpjekjeve diplomatike të presidentit Bush për çështjen e Irakut, ofroi mbështetje të patundur për trupat amerikane të përfshira në misionin për çarmatosjen e Irakut.

 

 

Londër: Bler bën thirrje për bashkim

 

Londër, 21 mars 2003 - Kryeministri britanik, Toni Bler ka mbajtur një fjalim para kombit për të thënë se trupat britanike kanë filluar luftën në Irak.

Ai tha se ai e kuptonte se ideja e sulmit ushtarak ka krijuar ndarje të thella, por ai ishte i bindur se populli britanik do të bashkohej në lutjet dhe mendimet për forcat e veta të armatosura. Ai gjithashtu vuri në dukje kërcënimet që vijnë nga terroristët në gjithë botën dhe armët që ata duan të gjejnë.

"Nëse terroristët i marrin këto armë që tani prodhohen dhe tregtohen në gjithë botën, dëmet që mund të shkaktojnë do të kenë ndikim mbi ekonominë tonë, sigurinë, paqen në botë, do të jenë përtej imagjinatës tonë", tha Bler.

 

 

Parlamenti i Turqisë u ka vënë në dispozicion SHBA-ve hapësirën ajrore

 

Ankara, 21 mars 2003 - Parlamenti i Turqisë ka vendosur në një seancë urgjente që t'i vërë në dispozicion Shteteve të Bashkuara të Amerikës përdorimin e territorit dhe hapësirës ajërore të Turqisë për nevojat e qarkullimit të avionëve dhe transportit të trupave të angazhuara në aksionet ushtarake në luftën kundër Irakut.

 

Asambleja kombëtare vendosi kështu t'i japë dritën e gjelbër kërkesës së qeverisë në të cilën parashikohet edhe dërgimi i trupave turke në veri të Irakut. Megjithatë mandati i Parlamentit të Turqisë do të ketë një afat gjashtëmujor dhe në të nuk parashikohet shfrytëzimi i bazave të mbrojtjes kundërajrore të Turqisë.

 

 

Ramsfeld: Ditët e Sadam Huseinit janë të numëruara

 

Uashington, 21 mars 2003 - Sekretari amerikan i Mbrojtjes, Donald Ramsfeld tha se ditët e Sadam Huseinit janë të numëruara tash kur forcat e Shteteve të Bashkuara dhe Britanike kanë filluar sulmin kundër Irakut.

 

Ramsfeld tha në konferencë për shtypin në Pentagon se forcat irakiane nuk duhet të ndjekin urdhërat për përdorim të armëve kimike apo biologjike. "Ata që ndjekin urdhëra për të bërë krime do të gjenden dhe do të ndëshkohen.

 

Krimet e luftës do të gjykohen dhe nuk do të ketë pardon të thuhet: vetëm ndoqa urdhërat", ka tërhequr vërejtjen sekretari amerikan i Mbrojtjes.

 

Donald Rumsfeld gjithashtu u ka brërë thirrje forcave irakiane të mos u rezistojnë forcave amerikane dhe britanika që invadojnë Irakun.

 

 

Anan: SHBA dhe forcat irakiane të bëjnë ç'është e mundur për të mbrojtur civilët gjatë luftimeve

 

Nju Jork, 21 mars 2003 - Sekretari i përgjithëshëm i Kombeve të Bashkuara, Kofi Anan u ka bërë thirrje si koalicionit të prirë nga Shtetet e Bashkuara ashtu edhe forcave irakiane që të bëjnë ç’është e mundur për të mbrojtur civilët gjatë luftimeve.

"Ndoshta po të kishim ngulmuar pak më gjatë, Iraku tash mund të ishte çarmatosur paqësisht, ose, nëse jo, bota mund të ndërmerrte aksion për të zgjidhur këte problem me vendim kolektiv, duke e pajisur me legjitimitet më të madh, dhe rrjedhimisht, me mbështetje më të gjërë se që është rasti tash", ka thënë Kofi Anan.

 

 

Shtetet e Bashkuara kanë mbyllur ambasadën në Maqedoni dhe në disa vende të tjera

 

Uashington, 21 mars 2003 - Departamenti amerikan i Shtetit thotë se Shtetet e Bashkuara dje kanë mbyllur ambasadën e vet në Maqedoni për shkak të atyre që i quan kërcënime të besueshme kundër interesave amerikane.

 

Bëhet e ditur se Ambasada amerikane ka pezulluar shërbimet konsullare, përfshirë këtu edhe kërkesat për viza. Mirëpo, shërbimet urgjente për shtetasit amerikanë do të vazhdojnë.

Zyrtarët e Shteteve të Bashkuara thanë se janë mbyllur gjithashtu ambasadat amerikane në Alma Ata, Buenos Aires, Kajro, Karakas, Damask, Kabul, Oslo, Pretori, Najrobi dhe Riad.

 

 

Forcat aleate përparojnë brenda Irakut

 

Kuvajt, 21 mars 2003 - Forcat amerikane po përparojnë në Irak në sulmin e parë të madh në luftën për të rrëzuar presidentin irakian Sadam Husein.

Të paktën tre divizione amerikane po sulmojnë nga Kuvajti: njësitë pararojë thuhet se janë rreth 50 km në brendësi të territorit irakian.

Korrespondentët që po udhëtojnë së bashku me to thonë se kolona të gjata tankesh, makinash të blinduara, komionësh dhe artilerie po gjarpërojnë nëpër shkretëtirë - disa prej tyre po u drejtohen fushave naftëmbajtëse të Irakut

 

 

BE premton ndihmë për Irakun

 

Bruksel, 21 mars 2003 - Udhëheqësit e BE-së kanë lëshuar një deklaratë për Irakun e cila premton ndihmë të menjëhershme humanitare dhe thekson rolin qëndror të Kombeve të Bashkuara gjatë dhe pas krizes.

Por samiti i Brukselit i cili vazhdon edhe sot, u mbizotërua nga një mosmarrëveshje tjetër mes Francës dhe Britanisë së Madhe.

Nga të dyja palët ekziston një rrezik i madh.

Por BE po përpiqet ta hedh vështrimin përpara. Në kushtet kur sapo ka filluar konfliki, ajo është përballë një sfide të re, kështu që ka premtim të ri për përkrahje të rolit të OKB-së si dhe ndihmë humanitare.

Disa vende përfshi Francën nuk dëshirojnë të paguajnë për dëmet e shkaktuara nga konflikti të cilin ato e cilësojnë të paligjshme.

 

 

Iraku: Sulmi atentat ndaj Saddamit

 

Bagdad, 21 mars 2003 - Ministri irakian i infomacionit, Mohhamed al-Sahaf tha se gjatë sulmeve të para amerikane janë goditur godina e doganave dhe nje ndërtesë radiotelevizioni, por se pëpjekja për të vrarë Sadan Huseinin ka dështuar.