U promovua libri "Ditari i një izolanti" i Kolë Berishës

Prishtinë, 19 mars 2003 - Sot në Bibliotekën Kombëtare dhe Universitare u promovua libri "Ditari i një izolanti" i Kolë Berishës, në të cilin autori paraqet periudhën e arrestimit, të izolimit dhe të torturave të shumë intelektualëve shqiptarë më 1989 nëpër burgjet e Serbisë.   Fillimisht në këtë promovim foli shkrimtari Haxhi Vokshi. Një fjalë rasti për librin të shkruar nga Sabri Hamiti, e lexoi Nimon Alimusaj, në të cilën thuhej se libri nuk është ditar, por është shkrim personal autobiografik i autorit, për të shtuar:   "Këtu dalin pranë e pranë Kujtesa e Dëshmia, të cilat janë po ashtu zhanre të shkrimit autobiografik, por që lënë mundësi të lëvizjes në kohë përtej të tashmes, në të kaluarën apo në të ardhmen, qoftë duke gërmuar në botën personale, qoftë në shoqërinë kolektive".

  

"Libri i përmendur është më afër kujtimeve e dëshmisë, qoftë kur mbështetet në referencialitet, ky referencialitet është personal, duke e pasur më vete karakterin e të besueshmes simbas formulës: Besoni, kjo më ka ngjarë mua. Mirëpo, shkrimi i kohës shkon një hap tutje, të ndodhurën do ta sjellë në nivel të tekstit veridik, të vërtetueshëm, nëpërmjet dokumentash e dëshmisë të shkruara", thuhet në fjalën e Sabri Hamitit.

Ndërkaq historiani, Muhamet Shatri për këtë libër tha se autori lë për breznitë një testament për kujtesën histroike mbi dhunën e terrorin e ushtruar nga ata që sot pretendojnë të rikhehen në Kosovë dhe shtihen si të pafajshëm.

Rreth librit "Ditari i një izolanti" foli edhe shkrimtari Sabit Rrustemi, i cili këtë vepër e quajti "dëshmi rrënqethëse për një periudhë të bujshme të rezistencës sonë".

 

Në këtë libër, që është para së gjithash libër publicistik, libër dëshmi se sa një ditar i rëndomtë i një kohe, kjo periudhë e historisë më të re të Kosovës që ishte thuaja e ngjashme si në Klinë, si në Prishtinë, Gjilan a Mitrovicë, Ferizaj, Pejë a Prizren, shqiptarët ishin para një shpërthimi të madh, para një shpërthimi edhe më masiv se që u shënua në vitin 1981, tha Rrustemi.

 

Ai theksoi se autori, një pjesë të kësaj katrahure mbi izolantët e ka përshkruar në mënyrë besnike dhe të dokumentuar, jo vetëm përmes vetes, po edhe përmes njohjes me shumë të izoluar të tjerë.

Skënder Zogaj tha se ky "Ditar", me mbi 300 faqe, lexohet me një frymë dhe freskët, të rrëmben me formën e shkrimit por edhe me përmbajtjen, rrathët e së cilës hapen dhe përhapen duke u qëndirur me fakte. "Detaje të shumta, të thjeshta por shumë sugjestive, domethënëse dhe kuptimplota. Për ata që e njohin nga afër autorin, jam i bindur se do të pajtohen me mua duke e shquar si vlerë të veçantë në Ditar, identifikimin e jashtëzakonshëm të autorit me veprën e tij", tha Zogaj.

Copyright©2000-2003 Trepca.net - Të gjitha të  drejtat e rezervuara.