Lajme

E mërkure, 19 mars 2003

Përmbajtja:

• Shtajner thotë se lufta e mundshme në Irak nuk do të ketë ndikime në Kosovë

• Të hënën mbrëma nga persona të panjohur është vrarë Azem Ahmeti nga Prekazi i Epërm i Skënderajt

• Qeveria thotë se nga shtylla e parë e UNMIK-ut është njoftuar se nuk ka pjesëtarë të forcave serbe në Kosovë

• Diskutohet lidhur me luftën jetësore të aktivistes dhe fitueses së Çmimit Nobel për Paqe, Xhejn Adams

• Policia e UNMIK-ut dhe KFOR-i mohojnë se ekziston xhandarmëria serbe në veri të Kosovës

• Gjysma e Prishtinës sot ka mbetur pa ujë të pijshëm

• Kryetari i Komunës së Prishtinës priti përfaqësuesit e KMDLNJ-së

• Forcat paqeruajtëse nuk kanë ndërmarrë masa shtesë për sigurinë në Kosovë

• Ushtarët amerikanë në kuadër të KFOR-it janë plotësisht të përkushtuar për situatën në Kosovë

• Grupet e minoriteteve joserbe në parlamentin e Kosovës do të veprojnë me emrin "Grupi parlamentar i bashkësive tjera"

• Delegacioni i UNECO-s konstatoi se në Kosovë ka shumë monumente që duhet të kenë përkujdesje

• Shpërthimet e bombave në Maqedoni nuk kanë kurrfarë prapavije politike

• Në Serbi është ndaluar puna e tri mediave për shkak të mosrespektimit të gjendjes së jashtëzakonshme

• Parlamenti i Serbisë zgjodhi për kryeministër Zoran Zhivkoviq

• Me 31 mars NATO i jep fund misionit të saj paqeruajtës në Maqedoni

• Sulmet amerikane mund të fillojnë para skadimit të ultimatumit

• Shkencëtarët në Hong Kong kanë zbuluar shkaktarin e formës së ashpër të pneumonisë misterioze

• Parlamenti irakian ka hedhur poshtë ultimatumin amerikan

• Ushtarët italianë dhe amerikanë në dy baza në Afganistan kanë qenë në shenjestër të sulmeve

• Kuba ka arrestuar dhjetëra disidentë, që kanë qenë në kontakt me përfaqësuesit amerikanë në Havanë

• Afrohet ora e luftës në Irak

• Parlamenti britanik voton pro luftës

• SHBA shtojnë masat mbrojtëse brenda vendit kundër sulmeve të mundshme terroriste

• 45 vende pëkrah SHBA-ve në luftë

• Kurdët të gatshëm të vendosin 70.000 vetë nën komandën amerikane

• Pavarësisht prej kontradiktave për luftën në Irak Evropa duhet të shohë drejt së ardhmes

• SHBA: Nuk ka kurrfarë shenje se lideri irakian do të largohet nga vendi

• Udhëheqia e Irakut e hodhi poshtë ultimatumin e presidentit të Shteteve të Bashkuara

• Vendet arabe shpresojnë të shmangin aksionin ushtarak kundër Irakut

• Putin ka riafirmuar kundërvënien ndaj një lufte me Irakun

• CDU-ja u distancua nga kriticizmi qeveritar kundër Presidentit amerikan ndaj Irakut

Shtajner thotë se lufta e mundshme në Irak nuk do të ketë ndikime në Kosovë

 

Shtërpcë, 19 mars 2003 - Policia e UNMIK-ut transferoi autoritetin e komandës në Stacionin policor të Shtërpcës nën përgjegjësi të Shërbimit Policor të Kosovës, ka thënë zëdhënësi i policisë ndërkombëtare në Prishtinë, Derek Çepell.

 

Në ceremoninë e ndërrimit të përgjegjësisë së këtij stacioni policor, mori pjesë edhe kryeadministratori i Kosovës, Mihael Shtajner, i cili pati një takim me udhëheqjen komunale të Shterpcës.

 

Ai ka vizituar me këtë rast Vitinë e Poshtme ku me ndihmën e organizatës IRC dhe të UNMIK-ut, janë rindërtuar 55 shtëpi për kthimin e shqiptarëve.

Shtajner me këtë rast ka theksuar se lufta e mundshme në Irak nuk do të ketë ndikime në Kosovë, nëse dyfishohet angazhimi i institucioneve vendore dhe ndërkombëtare për të krijuar një situatë më stabile në vend.

"Nëse ne punojmë së bashku dhe nëse të gjithë ata që janë dërguar këtu në Kosovë nga OKB-ja së bashku me përfaqësuesit e zgjedhur nga populli bëjnë punën e tyre si duhet dhe nuk harrojnë që duhet të punojnë në interes të popullatës, atëherë unë mendoj se nuk do të kemi vështirësi për situatën që po vjen e që mund të jetë e rëndë për tërë botën", tha z. Shtajner. Ai shtoi se ndonëse bota ka përqëndruar vëmendjen në krizën irakiane, proceset pozitive në Kosovë nuk bën të ndalen dhe këtë e dinë mirë kosovarët.

 

 

Të hënën mbrëma nga persona të panjohur është vrarë Azem Ahmeti nga Prekazi i Epërm i Skënderajt

 

Skënderaj, 19 mars 2003 - Të hënën mbrëma nga persona të panjohur është vrarë Azem Ahmeti - "Begu" (1951) nga Prekazi i Epërm i Skënderajt. Azem Ahmeti është baba i gjashtë fëmijëve, nipi i trimit të njohur të kësaj ane Ahmet Delisë dhe aktivist i dalluar i LDK-së.

 

Akti mizor ka ndodhur në aksin rrugor Mitrovicë-Skënderaj ndërsa i ndjeri po kthehej në shtëpi me veturë. Vrasësit e kanë qëlluar nga prita me një breshëri plumbash duke e lënë të vdekur në vend Azemin. Kjo vrasje ka shkaktuar indinjatë të thellë në komunën e Skënderajt. Familjarët thonë se i ndjeri Azem nuk ka pasur të keqe me askënd dhe ka qenë i respektuar nga të gjithë.

Me rastin e vrasjes së Azem Ahmetit, kryetar i Aktivit të LDK-së në Prekaz të Epërm, Kryesia e degës së LDK-së në Skënderaj ka lëshuar një komunikatë dhe e dënon ashpër këtë vrasje. Në këtë reagim thuhet se me këtë akt është vrarë familaj e Ahmet Delisë dhe rezistenca e saj 100 vjeçare, ëshë vrarë shpirti nacionalist shqiptar.

 

Kjo vrasje dhe vrasjet e tjera janë vrasje të lirisë, demokracisë dhe pavarësisë së Kosovës, thuhet në këtë reagim të Kryesisë së LDK-së dhe kërkoohet nga organet përkatëse që vrasësit të kapen dhe të nxirren para drejtësisë.

 

 

Qeveria thotë se nga shtylla e parë e UNMIK-ut është njoftuar se nuk ka pjesëtarë të forcave serbe në Kosovë

 

Prishtinë, 19 mars 2003 - Qeveria e Kosovës në mbledhjen e sotme ka diskutuar për transferimin e kompetencave, kontratën ndërmjet postës dhe një qytetari privat për një objekt me qira dhe nismat për disa projektligje. Pas mbledhjes, kryeministri Bajram Rexhepi tha se është me rëndësi që për kompetencat mes UNMIK-ut dhe përfaqësuesve të qeverisë më 26 mars të bëhen përgatitjet sa më të mira.

Ndërkaq duke komentuar spekulimet për praninë e xhandarmërisë serbe në Kosovë, z. Reshepi tha se nga shtylla e parë e UNMIK-ut është njoftuar se nuk ka pjesëtarë të forcave serbe në Kosovë.
Në mbledhje është diskutuar edhe për konkratën mes PTK-s dhe një qytetari për një objekt me qira.

 

Kryeministri tha se Qeveria ka reaguar me herët, por tash në mënyrë zyrtare, për kontratën mes postës dhe disa pronarëve për një objekt për një shumë prej 5,7 milionë euro për 20 vjet.

 

Ai tha se ka informata se edhe pronësia e objektit është e padefinuar, pastaj çështja e lejes etj. "Kemi reaguar në Agjencioni Kosovar të Mirëbesimit dhe kjo kontratë me siguri do të anulohet. Mirëpo nuk mjaft vetëm kjo por duhet të fillojë edhe procedura për ata që e kanë bërë këtë", tha Rexhepi.

Prëveç projektligjit për pesticidet që mund të procedohet në Parlament, Qeveria ka aprovuar edhe disa nisma të tjera, si pakon e ligjeve kundër diskriminimit, projektligjin për statusin e dëshmorëve, invalidëve, veteranëve të luftës çlirimtare dhe familjeve të dëshmorëve, si edhe projektligjin për komisionin e pavarur të mediave.

 

 

Diskutohet lidhur me luftën jetësore të aktivistes dhe fitueses së Çmimit Nobel për Paqe, Xhejn Adams

 

Prishtinë, 19 mars 2003 - Zyra e SHBA-ve dhe Biblioteka Kombëtare e Kosovës vazhdojnë shënimin njëmujor të muajit të historisë së grave të enjten, më 20 mars, në orën 18.00, në auditoriumin e Bibliotekës Kombëtare, me diskutimin (në anglisht) për aktivisten e komunitetit dhe fituesen e Çmimit Nobel për Paqe, Xhejn Adams.

 

Zyrtarja politike në Zyrën e SHBA-ve Eugenia Sidereas do të diskutojë lidhur me luftën jetësore të znj. Adams për sigurimin e të drejtave njerëzore dhe civile për gratë, emigrantët dhe për të varfërit. Biseda është e hapur për publikun.

Në fund të shekullit 19 dhe në fillim të shekullit 20, znj. Adams ka ndihmuar që të definohet aktivizmi dhe vullnetarizmi amerikan me punën e saj në emër të njerëzve ndryshëm.

 

Për shembull, ajo ka lobuar për legjislacionin (dhe kjo u arrit) që garantonte kushte më të sigurta në vendin e punës për punëtorët në fabrika, ka luftuar për të drejtën e votës për gratë dhe ka organizuar mësimin e gjuhës angleze dhe trajnimin për qeverinë dhe procesin demokratik për emigrantët e rinj në Çikago.

 

 

Policia e UNMIK-ut dhe KFOR-i mohojnë se ekziston xhandarmëria serbe në veri të Kosovës

 

Mitrovivcë, Prishtinë, 19 mars 2003 - Në lidhje me deklaratat në shtypin e Kosovës se në veri të Kosovës patrullojnë forcat speciale të xhandarmërisë serbe, qëllimi i të cilave është ndarja e Kosovës, zëdhënësi i policisë së UNMIK-ut Beri Fleçër ka deklaruar se informacionet e tilla janë vetëm spekulime.

 

Sipas Fleçërit, këto informacione dalin nga fakti se forcat speciale të policisë polake të cilat patrullojnë në pjesën veriore kanë uniformat dhe emblemat gati të njëjta me ato serbe. Por gjithë ajo për të cilin ka shkruar shtypi nuk është e vërtetë, thotë Fleçer.

Ndërkaq, zëdhënësi i policisë së UMNMIK-ut në Mitrovicë Soxhi Idovu ka thënë për mediat lokale se janë duke u zhvilluar hetimet nëse ekziston apo jo xhandarmëria serbe në veri të Kosovës. Policia, thotë ai, ka vizituar disa nga lokalitete, ku mendohet të jenë të stacionuara këto forca serbe, mirëpo deri më tash nuk ka gjetur fakte.

Gjithashtu edhe komandanti i Brigadës verilindje të KFOR-it Mishel Klajn ka mohuar ekzistimin e xhandarmërië serbe në veri të Kosovës. Sa ekziston AKSH aq mund të ekzistojë edhe xhandarmëria serbe në veri të Mitrovicës, është shpehur ai.

 

 

Gjysma e Prishtinës sot ka mbetur pa ujë të pijshëm

 

Prishtinë, 19 mars 2003 - Pothuajse se gjysma e Prishtinës sot ka mbetur pa ujë të pijshëm. Kjo ardhur si pasojë e rënies së sistemit energjetik në furnizimin e stacioneve të pompave të ujësjellësit. Ekipet e "Batllavës" po bëjnë përpjekje maksimale për sanimin e gjendjes. Pritet që furnizimi i këtyre lagjeve me ujë të bëhet në orët e pasaditës.

 

 

Kryetari i Komunës së Prishtinës priti përfaqësuesit e KMDLNJ-së

 

Prishtinë, 19 mars 2003 – Kryetari i Kuvendit Komunal të Prishtinës, Ismet Beqiri priti sot Behxhet Shalën, drejtor Ekzekutiv dhe Ibrahim Makollin, udhëheqës i Projektit për Monitorim në Këshillin për Mbrojtjen e të Drejtave dhe Lirive të Njeriut (KMDLNJ).

Ibrahim Makolli, udhëheqës i Projektit për Monitorim në KMDLNJ tha se këto ditë ka paraparë takime pune me kryetarët e komunave të Kosovës në lidhje me monitorimin e punës të pushtetit lokal, kurse projekti për monitorim është përkrahur nga NDI-ja dhe është financuar nga OSBE-ja, tha ai.

 

Makolli tha se KMDLNJ ka interesim të përcjellë punën e Asamblesë Komunale të Prishtinës, pastaj drejtoratet, Komitetin për Politikë e Financa, por edhe Administratën e Përgjithshme. Po ashtu KMDLNJ është e interesuar që të monitorojë edhe në zgjedhjen e zyrtarëve komunalë dhe të verifikojë se ka apo nuk ka shkelje të rregulloreve, pastaj në monitorimin e ndarjes së tenderëve se a respektohet procedura.

Kryetari i Komunës së Prishtinës, Ismet Beqiri u tha përfaqësuesve të KMDLNJ-së se udhëheqja komunale e mirëpret monitorimin e tyre. "Ju do të keni qasje, aty ku do të shprehni interesimin tuaj që të monitoroni pa ndonjë pengesë, por së pari kërkoj nga ju një projekt, në mënyrë që kjo të bëhet me marrëveshje nga udhëheqja e Komunës së Prishtinës, me qëllim që punëtorët e KMDLNJ-së të mos kenë pengesa gjatë monitorimit", tha z.Beqiri.

 

 

Forcat paqeruajtëse nuk kanë ndërmarrë masa shtesë për sigurinë në Kosovë

 

Prishtinë, 19 mars 2003 - Zyrtarë të forcave paqeruajtëse në Kosovë thanë se nuk kanë ndërmarrë kurrëfarë masash shtesë për sigurinë në Kosovë, pasi nuk parashikojnë ndonjë rrezik të bartjes së pasojave në vendin tonë nga lufta e mundshme në Irak. Këto komente i bëri dje zëdhënësi i KFOR-it pas paralajmërimeve amerikane për fillimin e mundshëm të luftës në Irak.

"Trupat e KFOR-it në Kosovë janë për të vendosur një ambient të qetë dhe të sigurtë për të gjithë qytetarët e Kosovës. Ky është fokusi ynë. Ndërkaq sa i përket luftës në Irak, atje është një front tjetër, një komandë tjetër dhe nuk mendoj se do të ketë ndonjë përfshirje direkte të Kosovës në këtë situatë", tha zëdhënësi i KFOR-it.

 

 

Ushtarët amerikanë në kuadër të KFOR-it janë plotësisht të përkushtuar për situatën në Kosovë

 

Prishtinë, 19 mars 2003 - Zëdhënësi i forcave amerikane në Kosovë që kontrollojnë Sektorin Lindor me më shumë se 4000 ushtarë, kapiteni Majk Bush thekson se ushtarët amerikanë në kuadër të KFOR-it janë plotësisht të përkushtuar për situatën në Kosovë.

 

Ai ka shtuar se shkalla e gatishmërisë vlerësohet dhe përcaktohet në varësi nga situata momentale. Bush thotë se çfarëdo mase e sigurisë nga forcat amerikane në Kosovë vendoset në baza ditore, javore dhe mujore.

 

 

Grupet e minoriteteve joserbe në parlamentin e Kosovës do të veprojnë me emrin "Grupi parlamentar i bashkësive tjera"

 

Prishtinë, 19 mars 2003 - Grupet e minoriteteve joserbe në parlamentin e Kosovës prej dje do të veprojnë me emrin "Grupi parlamentar i bashkësive tjera". Zëdhënësi i këtij grupi Sadik Idrizi nga koalicioni "Vatan", tha se qëllimi i funksionimit të këtij grupi është mbrojtja më e mirë e interesave të minoriteteve në Parlamentin e Kosovës.

"Besojmë se në të ardhmen do të ngrisim zërin për mbrojtjen e përfaqësuesve të përkatësive etnike joshqiptare e joserbe, do të angazhohemi për arritjen e kompromiseve në Parlamentin e Kosovës, si dhe për zgjidhjen e problemeve në Kosovë", tha ndër të tjera deputeti Idrizi. Gjatë këtij viti kryetar i këtij grupi do të jetë deputeti Faik Marolli.

Ndërkaq, për formimin e këtij grupi dje është njoftuar zyrtarisht edhe kryeparlamentari Nexhat Daci.

 

 

Delegacioni i UNECO-s konstatoi se në Kosovë ka shumë monumente që duhet të kenë përkujdesje

 

Prishtinë, 19 mars 2003 - Delegacioni i UNESCO-s, që merret me trashëgiminë kulturore pas përfundimit të djeshëm të vizitës së tij disaditëshe në Kosovë, ka vlerësuar se vetëdijësimi për vlerën e trashëgimisë kulturore është një ndër objektivat kryesore.

 

Ky delegacion po ashtu ka theksuar se në Kosovë ka shumë monumente të periudhave të ndryshme, duke filluar prej kohës së gurit e deri në kohën e sundimit osman, që duhet të kenë përkujdesje më të madhe.

Kryesuesi i delegacionit të UNESCO-s, Horst Godike ka theksuar se kjo organizatë do të bashkëpunojë me UNMIK-un dhe me Ministrinë e Kukturës për shtimin e përkushtimit për ruajtjen e monumenteve që kanë vlerë të shumëfishtë.

 

 

Shpërthimet e bombave në Maqedoni nuk kanë kurrfarë prapavije politike

 

Shkup, 19 mars 2003 - Bashkësia ndërkombëtare posaçërisht është shprehur e kënaqur me progresin e arritur javën e kaluar në zbatimin e Marrëveshjes së Ohrit, për arsye se u morën vendime shumë të rëndësishme, siç ishte rasti për pasaportën, deklaroi sot zëdhënësja e Bashkimit Evropian mnë Shkup, Irena Gjyzellova.

Ky hap i rëndësishëm, tha ajo, pasqyron frymën e Marrëveshjes për një Maqedoni shumetnike dhe unitare. Gjithashtu ajo përshëndeti edhe debatin që e filloi Qeveria e Maqedonisë lidhur me përfaqësimin e drejtë të bashkësive etnike në administratën publike. Gjyzellova theksoi se NATO-ja dhe BE-ja i kanë shqyrtuar të gjitha çështjet rreth aranzhmanit për marrjen e misionit në Maqedoni, më 31 mars 2003.

Ndërkaq zëdhënësi i OSBE-së Volfgan Greven, për gjoja ridestinimin e mjeteve për stërvitjen e 600 policëve shqiptarë, tha se ata nuk kanë të dhëna për këtë rast, porse përfaqësuesit e tyre janë duke bërë hetime në këtë drejtim.

Zëdhënësit e NATO-s, të OSBE-së dhe të BE-së thanë se kishin qëndrim të njëjtë se incidentet e fundit me shpërthimin e bombave në Maqedoni nuk kanë kurrfarë prapavije politike dhe nuk paraqesin paralajmërim për "ofensivë pranverore", por bëhet fjalë për veprime kriminale të veçanta, njofton MIA në gjuhën shqipe.

 

 

Në Serbi është ndaluar puna e tri mediave për shkak të mosrespektimit të gjendjes së jashtëzakonshme

 

Beograd, 19 mars 2003 - Ministria e Kulturës e Serbisë ka ndaluar botimin e gazetës së përditshme "Nacional", të përjavshmen "Identiteti" dhe punën e Radio televizionit "Marsh" të Valevës, si dhe shpërndarjen e gazetës malazeze "Dan" në Serbi.

Ministri i Kulturës Branisllav Leçiq ka shpjeguar se ndalimi është bërë për shkak të mosrespektimit të urdhërit të masave gjatë gjendjes së jashtëzakonshme.

 

"Shkaqet për ndalimin e mediave të tilla qëndron para së gjithash në faktin çfarë dhe si kanë shkruar, por edhe disa të dhënave që i takojnë hetimeve, kush janë themeluesit e tyre, dhe sa lidhje të afërta kanë pasur me veprën kriminale të vrasjes së kryeministrit", ka thënë Leçiq. Dy mediat e para janë gjobitur edhe me të holla, sikurse edhe shpërndarësi i gazetave "Shtampa komerc".

 

 

Parlamenti i Serbisë zgjodhi për kryeministër Zoran Zhivkoviq

 

Beograd, 19 mars 2003 - Parlamenti i Serbisë zgjodhi dje kryeministër Zoran Zhivkoviqin, ish-ministër federal i policisë dhe nënkryetar i Partisë Demokratike, kryetar i së cilës ishte kryeministri i vrarë Zoran Gjingjiq.

 

Ndërkaq, nënkryetar i qeverisë u zgjodh Çedomir Jovanoviq, shefi aktual i grupit të deputetëve të koalicionit qeveritar DOS. Kryeministri i ri Zhivkoviq premtoi paar parlamentit se qeveria e Serbisë do ta vazhdojë programin e para dy vjetëve kur ajo u formua me në krye Zoran Gjingjiqin.

 

Kjo nuk është qeveri e re, por kjo është gjendje e jashtëzakonshme qeveri, e cila u shkaktua nga dhuna dhe ne vazhdojmë atë që kemi filluar para dy vjetëve, u shpreh Zhivkoviq, duke prezentuar programin e tij para deputetëve të Parlamentit.

 

Si prioritete të qeverisë luftën kundër kriminalitetit, kushtetutën e re të Serbisë, stabilitetin politik dhe forcimin e bashkësisë Serbi-Mali i Zi, si dhe vazhdimin e aktivitetit diplomatik e politik për zgjidhjen e çështjes së Kosovës.

Pro kësaj qeverie votuan 128 deputetë, kurs 100 votuan kundër dhe tre absstenuan. Kundër votuan partitë opozitare të parlamentit, duke shprehur bindjen se Serbia duhet të ketë një qeveri tjetër.

 

 

Me 31 mars NATO i jep fund misionit të saj paqeruajtës në Maqedoni

 

Bruksel, 19 mars 2003 - Me 31 mars NATO i jep fund misionit të saj paqeruajtës në Maqedoni. Këtë vendim e bëri të njohur sekretari i përgjithshëm i Aleancës Veriatlantike lordi Robertson. Por ai tha po ashtu se NATO do të vazhdojë të mbetet e pranishme atje pavarësisht se do të jenë forcat evropiane që do të përkujdesen tani për ruajtjen e misionit të paqes mnë Maqedoni.

 

Aleanca Veriatlantike do të mbajë në Shkup dy të dërguar të saj të posaçëm: një përfaqësues civil dhe një ushtarak. Ky i fundit do të bashkërendojë veprimet me komandantin francez të trupave evropiane në terren.

 

Njëkohësisht do të jetë zëvendëskomandanti i përgjithshëm i NATO-s, gjenerali gjerman Fajt, i cili në selia sektori ushtarak i NATO-s në Belgjikë do të komandojë operacionet e trupave evropiane në Maqedoni.

 

 

Sulmet amerikane mund të fillojnë para skadimit të ultimatumit

 

Uashington, 19 mars 2003 - Zyrtarët amerikanë refuzojnë që të përjashtojnë mundësinë se veprimet ushtarake kundër Irakut mund të fillojnë para skadimit të ultimatumit 48 orësh, ( e enjte, 0.1 sipas Grenuiçit) që presidenti Bush i dha Sadam Huseinit për të lëshuar vendin.

Zyrtarët thonë se Shtëpia e Bardhë nuk e ndien vehten të obliguar që të pres deri në skadim të tij pasi Sadam Huseini e ka refuzuar atë. Ndërkohë, forcat e koalicionit nën udhëheqjen amerikane që ndodhen në Gji janë të gatshme për aksion ndërsa ato tokësore po kalojnë shkretëtirën e Kuvajtit për t'u vendosur në pozicionet për të filluar pushtimin.

Zëvendëskomandanti i forcave amerikane, John Keane, ka thënë se sulmet e para ajrore mund të pasohen shumë shpejt nga trupat tokësore.

 

 

Shkencëtarët në Hong Kong kanë zbuluar shkaktarin e formës së ashpër të pneumonisë misterioze

 

Hong Kong, 19 mars 2003 – Shkencëtarët në Hong Kong kanë thënë se kanë zbuluar shkaktarin e formës së ashpër të pneumonisë, e cila mori shumë viktima në mbarë botën, njofton BBCWorld. Skencëtarët kanë identifikuar sëmundjen misterioze të organeve të frymëmarrjes si virus nga familja paramyxoviridae.

 

Në njoftim thuhet se zbulimi ka treguar gjithashtu se trajtimi i pacientëve të deritashëm ka qenë i drejtë. Organizata Botërore e Shëndetësisë ka thënë se deri tash janë shënuar 219 raste me këtë virus, 123 syresh në Hong Kong. Vetëm në Azi dhe në Kanada deri tash kanë vdekur të pakten 10 njerëz prej kësaj sëmundjeje.

 

 

Parlamenti irakian ka hedhur poshtë ultimatumin amerikan

 

Bagdad, 19 mars 2003 - Parlamenti irakian në mbledhjen e sotme ka hedhur poshtë ultimatumin amerikan drejtuar të martën presidentit Sadam Husein dhe ka shprehur besnikërinë e plotë për liderin e vet.

 

Shkuarja në ekzil në afat prej 48 orësh që Sadamit dhe bijve të tij u ka ofruar Uashingtoni si mundësi e fundit që të shmanget lufta, "nuk do të ndodhë kurrë", ka thënë shprehimisht kryetari i parlamentit itrakian Sadun Hamadi, duke shtuar se Iraku nuk është vendi që pranon diktatin amerikan.

 

 

Ushtarët italianë dhe amerikanë në dy baza në Afganistan kanë qenë në shenjestër të sulmeve

 

Bagram, 19 mars 2003 - Ushtarët italianë dhe amerikanë në dy baza në Afganistan kanë qenë në shenjestër disa orë pas deklaratës së presidentit amerikan Bush se është në prag një sulm kundër Irakut, kanë theksuar sot zyrtarët.

 

Nuk ka konfirmim se sulmet e djeshme, në të cilat një ushtar i huaj është plagosur, ka lidhje me luftën në pritje në Irak, ka deklaruar zëdhënësi i forcave amerikane, kapiteni Alen Kremer.

 

 

Kuba ka arrestuar dhjetëra disidentë, që kanë qenë në kontakt me përfaqësuesit amerikanë në Havanë

 

Havanë, 19 mars 2003 – Qeveria komuniste e Kubës ka thënë se ka arrestuar dhjetëra disidentë, të cilët kanë qenë në kontakt me përfaqësuesit amerikanë në Havanë, njofton BBCWorld. Në një deklaratë të lexuar në televizionin shtetëror, zyrtarët kubanezë kanë akuzuar përfaqësuesin amerikan, Xhejms Kason, për, siç thuhet, "aktivitete subversive".

 

 

Afrohet ora e luftës në Irak

 

Uashington, 19 mars 2003 - Ndërsa afrohet skadimi i ultimatumit amerikan prej 48 orësh që presidenti irakian Sadam Husein të largohet, po shtohen përgatitjet për një sulm ushtarak.

 

Presidenti Bush ka thënë se Shtetet e Bashkuara dhe aleatët e Amerikës do ta çarmatosin Irakun, edhe nëse Sadam Huseini largohet nga vendi. Këtë mesazh e përçoi edhe zëdhënësi i Shtëpisë së Bardhë, Ari Fleisher.

 

Ndërkohë, forcat e koalicionit po zënë pozicione lufte në shkretëtirën kuvajtiane, në pritje të marrjes së urdhërit për të hyrë në Irak. Anijet dhe avionët amerikanë po transmetojnë vazhdimisht mesazhe për trupat irakiane se si të dorëzohen.

 

 

Parlamenti britanik voton pro luftës

 

Londër, 19 mars 2003 - Parlamenti britanik ka votuar në favor të pjesëmarrjes së trupave britanike në një luftë të mundshme kundër Irakut. Mocioni i qeverisë për përdorimin e të gjitha mjeteve të nevojshme për çarmatosjen e Irakut u mbështet nga shumica e deputetëve, ndërkohë që një mocion i paraqitur nga kundërshtarët e luftës brenda Partisë Laburiste nuk mori numrin e mjaftueshëm të votave.

 

Duke folur me një ton të prerë, kryeministri Bler u tha deputetëve se ishte koha për të vepruar me kurajo. "Nuk është koha që të hezitojmë. Është koha që parlamenti, jo thjesht qeveria apo unë si kryeministër, të marr rol udhëheqës dhe të tregoj se do të mbroj gjithçka që ne mendojmë se është e drejtë.

 

Le të tregojmë se jemi të gatshëm të ndeshemi me tiranitë, diktaturat dhe terroristët që rrezikojnë jetën tonë, dhe se në këtë moment vendimtar ne kemi kurajon të bëjmë atë që duhet", tha kryeministri Bler në debatin e mbrëmshëm në parlamentin britanik.

 

 

SHBA shtojnë masat mbrojtëse brenda vendit kundër sulmeve të mundshme terroriste

 

Uashington, 19 mars 2003 - Shtetet e Bashkuara po shtojnë masat mbrojtëse brenda vendit kundër sulmeve të mundshme terroriste ndërsa lufta me Irakun pritet të fillojë së shpejti. Sekretari amerikan i Mbrojtes Kombëtare, Tom Rixh, tha dje se do të shtohen masat e sigurimit në kufijtë e vendit, si dhe në portet dhe aeroportet.

 

Autoritetet kanë shtuar masat e sigurimit edhe për furnizimet ushqimore të vendit dhe kanë vendosur përkohësisht kufizime për fluturimet mbi Uashington, Nju Jork dhe qytete të tjera amerikane.

 

Qeveria e ka ngritur nivelin e rrezikut me të cilin përballet vendi nga sulme të mundshme terroriste, nga Kodi i Verdhë në Kodin Portokalli, që nënkupton një rrezik shumë të lartë. Pas Kodit Portokalli, kodi më i lartë i rrezikut është ai i Kuq.

 

 

45 vende pëkrah SHBA-ve në luftë

 

Uashington, 19 mars 2003 - Sipas të dhënave të ministrit amerikan të punëve të jashtme Kolin Pauell 45 vende e mbështesin goditjen amerikane ndaj Irakut. 30 syresh janë pozicionuar hapur për pozicionin amerikan dhe bëjnë pjesë në "Koalicionin e të gatshmëve", kurse 15 vende të tjera i përkrahin SHBA në prapaskenë.

 

 

Kurdët të gatshëm të vendosin 70.000 vetë nën komandën amerikane

 

Ankara, 19 mars 2003 - Kurdët e Irakut duan t'i vendosin trupat e tyre nën komandën amerikane. Kështu deklaroi emisari i posaçëm amerikan për opozitën irakiane Zalmai Khalizad në Ankara, pas takimeve me krerët e Bashkimit patriotik të Kurdistanit Xhalal Talabani dhe me Nexhrivan Barsanin të Partisë demokratike të Kurdistanit.

 

Khalizadi tha se kurdët e Irakut janë të gatshëm t'u bashkohen trupave amerikane në rast se ato marshojnë në Irak. Flitet për rreth 70.000 kurdë që janë të gatshëm të luftojnë përkrah amerikanëve.

 

 

Pavarësisht prej kontradiktave për luftën në Irak Evropa duhet të shohë drejt së ardhmes

 

Berlin, 19 mars 2003 - Joshka Fisher e dënoi luftën që pritet të fillojë në Irak dhe u bëri thirrje shteteve të BE që megjithë dallimet dhe diferencat që kanë në lidhje me këtë çështje të shohin drejt së ardhmes.

 

Programi ynë i përbashkët dhe planet për Evropën duhet të thellohen më tej, u shpreh Fischer.

 

 

SHBA: Nuk ka kurrfarë shenje se lideri irakian do të largohet nga vendi

 

Uashington, 19 mars 2003 - Shtetet e Bashkuara thonë se nuk ka kurrfarë shenje se lideri irakian Sadam Husein do të largohet nga vendi dhe të shkojë në ekzil, sikurse kishte kërkuar presidenti i Shteteve të Bashkuara, Xhorxh Bush.

 

 

Udhëheqia e Irakut e hodhi poshtë ultimatumin e presidentit të Shteteve të Bashkuara

 

Bagdad, 19 mars 2003 - Udhëheqia e Irakut e refuzoi dje ultimatumin e presidentit të Shteteve të Bashkuara, Xhorxh Bush drejtuar liderit Irakian, Sadam Husein që të largohet nga vendi deri nesër apo të ballafaqohet me sulm të prirë nga Shtetet e Bashkuara.

 

"Është zoti Bush ai që duhet të shkojë në egzil sepse zoti Bush po e rrezikonë mbarë botën", ka thënë në konferencë për shtypin ministri i Jashtëm irakian, Naxhi Sabri.

 

 

Vendet arabe shpresojnë të shmangin aksionin ushtarak kundër Irakut

 

Kajro, 19 mars 2003 - Sekretari i përgjithshëm i Ligës Arabe, Amir Musa tha se vendet anëtare shpresojnë të shmangin aksionin ushtarak kundër Irakut dhe nuk do të heqin dorë nga diplomacia deri në çastin e fundit.

 

"Ne nuk duhet të heqim dorë nga angazhimet diplomatike deri në minutën e fundit dhe shpresojmë se mund të shmangim aksionin ushtarak me përpjekjet kolektive të vendeve arabe dhe vendeve tjera që janë të interesuara për zhvillime paqësore lidhur me çështjen irakiane sa sa për luftë", ka thënë Amir Musa.

 

 

Putin ka riafirmuar kundërvënien ndaj një lufte me Irakun

 

Moskë, 19 mars 2003 - Presidenti rus, Vladimir Putin ka riafirmuar kundërvënien e tij një lufte me Irakun në një bisedë telefonike që ka patur dje me presidentin e Shteteve të Bashkuara, Xhorxh Bush. Ministri i jashtëm rus, Igor Ivanov tha se një luftë e prirë nga Shtetet e Bashkuara në Irak do të ketë "pasoja serioze negative".

 

 

CDU-ja u distancua nga kriticizmi qeveritar kundër Presidentit amerikan ndaj Irakut

 

Berlin, 19 mars 2003 - Partia kryesore opozitare gjermane, CDU-ja u distancua nga kriticizmi qeveritar kundër qëndrimit të Presidentit amerikan ndaj Irakut dhe tha se mbështet ultimatumin që Xhorxh Bush i vuri liderit irakian, Sadam Husein. Para dite kancelari gjerman Gerhard Shrëder përsëriti kundërvënien e tij ndaj një sulmi të prirë nga Shtetet e Bashkuara kundër Irakut.

Copyright©2000-2003 Trepca.net - Të gjitha të  drejtat e rezervuara.