OPINIONE

NË VEND TË PËRGËZIMIT

FAKULTETI I STUDIMEVE ISLAME, VATËR E PASHUAR E DIJES DHE KULTURËS FETARE

15 MARS 2003 / Shkruan: Rexhep Elezaj

 

Me 25 janar 2003 u bën dhjetë vite qëkur në Prishtinë u themelua Fakulteti i Studimeve Islame (FSI). Rrita dhe puna e këtij institucioni të lartë arsimorë islamë gjatë një dekade patjetër na i rikujton kohët e vështira si dhe datat e lavdishme nga historia jonë e vjetër dhe e re. Na rikthenë pashmangshëm në shpalimin e kohës dhe ecjës së saj shtigjeve të vështira nëpër të cilat bashkë me të do të kalojë edhe fati dhe historia e mësimeve fetare islame në Kosovë. Ky përvjetor na rikujton Kosovën deri dje të okupuar egërsisht nga regjimet barbare serbe të cilat për më shumë se një shekull torturuan dhe shkelen të drejtat kombëtare dhe fetare të shqiptarëve me metoda makabre dhe anticivilizuese.

 

Pushtuesit dhe uzurpuesit e tokave shqiptare janë të njohur për qendrimet e tyre fashizoide ndaj elementit fetar tek shqiptarët dhe siç na mëson historia në bazë të përvojës së hidhur të shqiptarëve me regjimet serbe gati gjithmonë ka rezultuar se duke e shprehur urrejtjen kundër shqiptarëve si popull dhe si bartës me shumicë të Besimit Islam, në esencë regjimet serbe kanë manifestuar, para së gjithash, kundërshtitë e tyre ndaj pranisë dhe ekzistimit të kombit shqiptar në trojet e tij etnike, dhe se duke e shprehur shovinizmin hegjemonist-ortodoks ndaj tyre njëkohësisht zbraznin edhe urrejtjet e tyre antiisalme. Pra, gjatë gjithë kohës të sundimit serbë të gjysmës së trojeve etnike shqiptare, duke bërë luftë dhe propagandë të paskrupulltë kundër pranisë islame në jug të Europës, në fakt bënin luftë kundër qenjës kombëtare shqiptare, duke ushtruar dhunë, terror dhe gjenocid të pa parë, në mënyrë që me këtë luftë të dyfishtë kundër shqiptarëve arritën që në qarqet europiane ta paraqesin si luftë të “shenjët” serbe në mbrojtje të Krishterizmit, në emër të së cilës në gjysmën e dytë të shekullit 19-të dëbuan me dhunë nga vatrat e tyre shekullore mbi 600 mijë shqiptarë të Toplicës, Nishit, Pazarit të ri, etj, duke i paraqitur edhe si element të rrezikshëm për Europën dhe kulturën e saj, sidomos në aspektin fetar.

 

Dëshmia më e fortë se regjimet serbe kanë udhëhequr politikë të kriminalizuar kundër elementit islam tek shqiptarët është vetë fakti se vetëm gjatë luftës së fundit në Kosovë (1998/99) dogjën dhe bën rrafsh me tokë mbi 240 xhami shqiptare, vranë mbi 40 imamë të xhamive, etj. Pse ishin kaq ngushtë të lidhura këto dy aspekte në luftën e regjimeve serbe kundër shqiptarëve nuk është vështirë të kuptohet, mbase një gjë këtu nuk duhet hjekur kurrë nga mendja; se duke e ndjerë rrezikun nga shfarosja e tyre kolektive, duke e ndjerë vetën të përbuzur dhe të nënçmuar nga fqinjët e tyre veriorë (serbët) dhe nga ata jugorë (grekët), duke filluar qysh në shekullin 17-të e këndej, por edhe për faktin tjetër se kësaj çmendurie serbe antishqiptare shpesh do t’i dalin në krah qarqe të caktuara përendimore me qëndrimet e saja pro Serbisë dhe pro Greqisë duke e përkrahur faktikisht hegjemonizmin ortodoks serbo-grek, etj, ishin shkaqe të mjaftuara që shqiptarët më shumicë ta përqafojnë Fenë islame. Pra, shumica e shqiptarëve e përqafuan Islamin sepse në të gjetën shpëtimin e tyre kombëtar për t’iu shmangur zhbërjes graduale si komb, andaj shkaqet e cekura më lartë si dhe përkatësia e njëjtë fetare me armiqët gllabërues ishin ndër motivet kryesore që i shtynë ata që ta pranojnë Fenë Islame, duke mos i harruar këtu edhe faktorët tjerë që do ndeshin në filosofinë e re islame mbi njeriun dhe jetën e tij si qenjë fizike dhe shpirtërore më e përsosur, përkatësisht duke kuptuar të vertetën e ekzistimit të Krijuesit të vetëm dhe të Gjithfuqishëm, Zotin xh.sh.

 

I sollëm disa shembuj nga historia për të vënë në dukje se nga u vinin të këqijat shqiptarëve të cilat në vazhdimësi e goditën rëndë qenjën kombëtare dhe fetare të tyre, e që  padyshim burim i të gjithave ishte hegjemonizmi i shfrenuar serb i cili bëri orvatje të panderprera që të zhdukë çdo gjë shqiptare në Ballkan, kështu që bashkë me tmerret që ka përjetuar pjesa e kombit shqiptar në Kosovë me vise gjatë kohës së riokupimit serbë të Kosovës (1945-1999) në aspektin e shtypjes të ndjenjave dhe të drejtave kombëtare, të njëtin fat tragjik e ka pësuar edhe Feja tek shqiptarët, e cila falë disa rrethanave më të favorshme në Europë dhe një politike më liberale pas vitit 1974, do të ndikojë që regjimi komunist ish jugosllav të bëjë disa lëshime të vogla duke lejuar që në Kosovë mësimi fetar islam të ngitet në nivel të shkollimit të mesëm siç ishte Medresja “Alauddin” në Prishtinë, që të hapen xhami të reja nëpër fshatra dhe qytete të Kosovës, por në të cilat imamët edhe më tej nuk guxonin të flisnin asgjë për kombin dhe atdheun e tyre të robëruar, por vetëm për anën shpirtërore të besimtarit, e që siç dihet gjatë kësaj periudhe 50 vjeçare të komunizmit ndjenjat dhe të drejtat fetare të shqiptarëve vazhduan të ndrydheshin me metoda mjaftë perfide dhe diskriminuese.

 

E gjithë kjo, pra, bëhëj për qëllime të caktuara politike si dhe në funksion të luftës kundër popullit shqiptar i cili me shumicë i përkiste konfesionit Islam. Lufta dhe propaganda serbe antishqiptare gjatë dekadave në fjalë e udhhequr nga egocentristët shovinist serbo-ortodoks ndërmirrte çdo masë që ta pengonte përparimin dhe afirmimin e vlerave kulturore të shqiptarëve, duke synuar në të njëjtën kohë rrënimin sa më të madh të kultit fetar islam tek shqiptarët në të cilin shihnin rrezikun permanent, sepse mirëfilli e dinin se ishin pikërisht mësimet fetare islame ato të cilat i kishin frymëzuar shqiptarët që nga koha e Rilindjes së tyre kombëtare se si duhet bërë rrezistencë ndaj pushtuesëve, përkatësisht se si bëhët luftë për çlirimin e atheut të robëruar siç ishte rasti i Kosovës me vise. Në rritjen e vetëdijes kombëtare te shqiptarët e Kosovës qëkur u themelua me 1951 kontribut të pazavndsueshëm ka dhënë edhe Medresja e mesme “Alauddin” në Prishtinë si dhe xhamitë e shumta të cilat, megjithë vështirësitë e mëdha me të cilat ballafaqoheshin gjatë okupimit të dyfishtë serbo-komunist, ia dolën që ta mbijetojnë këtë barbari antishqiptare të pashëmbullt në historinë më të re të tyre.

 

Pas gjitha katrahurave dhe dhunës që përjetojë kultura shqiptare dhe ajo fetare islame e shqiptarëve në Kosovë e ushtruar nga të gjitha regjimet krimenele serbe që nga shekulli 18-të e deri në çlirimin e Kosovës para afër katër viteve, shqiptarët do t’ia dalin që ta mbijetojnë edhe gjenocidin fetar, dhe ate falë punës dhe angazhimit të përkushtuar të të gjithë faktorëve (Bashkësisë Islame, këshillave islame nëpër komuna, etj.) dhe besimtarëve islamë kudo, të cilët për asnjë çast nuk iu nënshtruan dhunës dhe diktatit okupues serbosllav, falë vigjilencës kombëtare dhe fetare të intelektulëve, të profesorëve, hoxhallarëve, studentëve dhe nxënëseve shqiptarë, mundi i të cilëve fatbardhësisht do të kurorizohet mu para 10 viteve me themelimin e Fakultetit për Studime Islame në Prishtinë, pikërisht i lindur në rrethana të okupimit klasik të Kosovës, me hapjen e të cilit më në fund arsimit dhe kulturës fetare islame do t’i hapet edhe një dritare e re e dritës dhe e diturisë pas aq shumë vuajtjeve dhe peripetive, pa funkcionimin e të cilit mësimi dhe edukimi fetar islam në Kosovë do të ngelte i mangët, posaçërisht kur është fjala për emancipimin dhe ngritjen e mëtejme të kulturës dhe vetëdijes fetare, kombëtare tek gjeneratat që do vijnë.

 

Sepse në këtë institucion të lartë arsimor për herë të parë në Kosovë  mësimi dhe edukimi kanë marrë kahjen meritore për të mësuar mbi fenë dhe filosofinë islame dhe në mënyrë të drejtë, të sakët, burimore e frymë bashkëkohore, ku mësimet fetare islame, ajetet (verestët) kur’anore dhe hadithet (thënjët) e profetit Muhamed a.s. të komentohen saktë, kuptimplotë dhe krejtësisht afër kuptimit origjinal që kanë në gjuhën arabe, e jo siç kishte ndodhur gjatë shekujve të mëparshëm kur ndaloheshin të gjitha vlerat fetare islame me masa represive sidomos gjatë gjithë kohës së diktaturës komuniste gjithandej në hapësirat shqiptare.

 

Për fund të themi edhe këtë se pa respektimin e plotë dhe trajtimin e barabartë të feve në shoqërinë e re demokratike shqiptare nuk mund të ketë tolerancë dhe as begatim të mëtejm të vlerave morale dhe civilizuese, por as dialog të suksesshëm në ndërkomunikimin fetar në Kosovë, pa të cilin është i pa imagjinueshëm jetësimi i principeve të shoqërisë civile dhe multikulturore. Prandaj, duke pasur parasysh rrethanat e reja dhe demokratike të krijuara pas luftës në Kosovë, urojmë që FSI në Prishtinë ta çojë mëtej misionin e nisur drejt krijimit të bazave shkencore ku Besimi dhe Feja islame të mos mund të keqinterpretohen më, gjegjësisht të mos mund të paraqitën më qëndrime abuzive dhe nënçmuese ndaj saj, ngase Islamizmi me asgjë nuk e ka dëmtuar kombin shqiptar deri më sot, përkundrazi ate e ka ndihmar në shumë aspekte, para së gjithash e ka mbrojtur nga zhdukja dhe asimilimi kolektiv si dhe shkrirja në kultura të huaja. Ndaj në emër të gjithë asaj që është punuar për të arritur deri këtu, e përgëzojmë këtë institucion të lartë islam në Kosovë si dhe drejtuesit e tij për punën dhe mundin e bërë në ruajtjen dhe kultivimin e më tejm të kulturës shqiptare dhe vlerave të Islamit në Kosovë.

Copyright©2000-2003 Trepca.net - Të gjitha të  drejtat e rezervuara.