Lajme

E shtune, 15 mars 2003

Përmbajtja:

• F. Mini thotë se forcat e KFOR-it nuk do të lejojnë asnjë forcë jashtë Kosovës të përfshihet në çështjet e sigurisë

• Ish-komandanti i ZO të Llapit Rrustem Mustafa - Remi e mohoi në tërësi aktakuzën, duke e quajtur atë të turpshme

• OJQ suedeze “Erikshjelpen” ndërton 10 shtëpi në komunën e Podujevës

• Është nënshkruar një protokoll bashkëpunimi ndërmjet Bashkisë së Korçës dhe Komunës së Mitrovicës

• Një delegacion i komunës Fredrikstad nga Norvegjia ka arritur në Mitrovicë

• Një delegacion i UNESCO-së ka vizituar monumentet kulturore e historike në Prizren

• Nano shpreh bindjen në miqësinë e mëtejshëm ndërmjet Tiranës dhe Beogradit

• Shtypi britanik shkruan se e vërteta për vrasjen e Gjingjiqit është më e komplikuar

• PDSH marrëveshjen mes liderëve të koalicionit qeveritar për përdorimin e gjuhës shqipe e cilëson të papranueshme

• Për vrasjen e kryeministrit serb Gjingjiq janë arrestuar 136 vetë

• Marrëveshja e sigurisë ndërmjet NATO-s dhe BE-së e hapë rrugën që BE-ja ta fillojë misionin e saj të parë ushtarak në Maqedoni

• Bush: Shteti palestinez duhet të jetë i reformuar, paqësor dhe demokratik

• Bush do të takohet të dielën me Blerin dhe Aznarin

• Solana: Bashkimi Evropian është i përçarë rreth çështjes së Irakut

• Kryeministri i ri palestinez mund të ftohet në Shtëpinë e Bardhë për një takim me presidentin Bush

• Erdogan është kryeministër i ri i Turqisë

• Plani i paqes për Lindjen e Mesme nga presidenti Bush ka patur jehonë pozitive

• Kongresi popullor në Kinë ka zgjedhur kryetarin e partisë Hu Jintao president të vendit

• Shrëder ka kërkuar nga qytetarët gjermanë të përgatiten për kohë të vështira

• Negociatat për Irakun në Kombet e Bashkuara nuk kanë ecur përpara

• Qeveria irakiane i ka dorëzuar KB-së një raport mbi mbetjet e rezervave të armëve biologjike e kimike

F. Mini thotë se forcat e KFOR-it nuk do të lejojnë asnjë forcë jashtë Kosovës të përfshihet në çështjet e sigurisë

 

Prishtinë, 15 mars 2003 - Komandanti i forcave të KFOR-it në Kosovë, gjenerali italian Fabio Mini, në një ligjeratë për studentët e Universitetit të Prishtinës dje ka deklaruar se KFOR-i do të jetë gjithmonë i gatshëm për të garantuar një siguri maksimale për qytetarët e Kosovës dhe se nuk do të lejohet asnjë forcë jashtë kufijve të saj që të përzihet në këtë çështje.

 

Ai ka nënvizuar se krijimi i një mjedisi të sigurtë, parandalimi i krimit dhe integrimi i Kosovës në Evropë, si dhe bashkëpunimi me organet e policisë dhe forcave paqeruajtëse, janë synimet për të cilat duhet angazhuar të gjithë në Kosovë për një të ardhme më të mirë të saj.

Gjenerali Mini tha se KFOR-i është i gatshëm që të ndërhyjë për të treguar maksimumin e sigurisë në Kosovë, e cila është bazë për krijimin e paqes, qëndrushmërisë dhe demokracisë.

Ndërkaq, duke folur për të ardhmen e Kosovës z. Mini tha se statusi i vërtetë i saj është inkuadrimi në Bashkimin Evropian, por për këtë është e domosdoshme më parë përmbushja e standardeve të caktuara nga shefi i UNMIK-ut.

 

Sipas gjeneralit Mini realizimi i këtyre standardeve duhet të bëhet hap pas hapi që nënkupton krijimin e institucioneve efikase të cilat do të ofrojnë kushte më të mira për të gjithë qytetarët pa dallim. Ai shprehu besimin e tij se me një angazhim të të gjithëve në Kosovë suksesi në realizimin e këtyre synimeve nuk do të mungojë.

Duke u përgjigjur në shqetësimet e studentëve për siç u tha në mosndriçimin e disa krimeve më të rënda në Kosovë, gjeneral Mini pohoi se në këto çështje në paraqet problem mungesa e dëshmitarëve.

 

Ai po ashtu hodhi poshtë ekzistimin e përpjekjeve për barazimin e krimeve të forcave serbe dhe të luftës së UÇK-së, ndërkaq arrestimet e disa pjesëtarëve të kësaj ushtrie tha se nuk kanë të bëjnë me organizatën që ata u kanë takuar apo u takojnë dhe se fjalën e fundit për këtë çështje do ta japë drejtësia.

 

 

Ish-komandanti i ZO të Llapit Rrustem Mustafa - Remi e mohoi në tërësi aktakuzën, duke e quajtur atë të turpshme

 

Prishtinë, 15 mars 2003 - Ish-komandanti i Zonës Operative të Llapit Rrustem Mustafa - "Remi" ka filluar ta paraqesë mbrojtjen e tij në procesin gjyqësor që po mbahet në Prishtinë. I akuzuari Mustafa e mohoi në tërësi aktakuzën duke e quajtur atë të turpshme.

 

Ai ka thënë se është krenar për kontributin e tij modest dhënë luftës dhe popullit tim për liri. Lufta jonë ishte çlirimtare ku të gjithë shqiptarët dhe qytetarët tjerë të Kosovës dhanë kontributin e tyre secili në mënyrë të vet. Rrustem Mustafa kategorikisht mohoi aktakuzën duke thënë se këtë akuzë nuk mund ta pranojë as ai e as forcat e armatosura që i komandonte. Këtë nuk do ta pranojnë as qytetarët e Kosovës.

 

 

OJQ suedeze “Erikshjelpen” ndërton 10 shtëpi në komunën e Podujevës

 

Podujevë, 15 mars 2003 – Në takimin që zv. kryetari i komunës së Podujevës z. Agim Kikaj pati me drejtorin e projekteve për Kosovën të organizatës joqeveritare suedeze “Erikshjelpen” z. Anders Lindgren u konfirmua ndërtimi i 10 shtëpive të shkatërruara nga lufta, pesë prej të cilave janë dedikuar minoriteteve.
"Mbi 7500 shtëpi të evdientuara të kategorive të ndryshme kanë qenë të shkatërruara gjatë luftës në komunën tonë, kurse në listat që presin për ndërtim janë edhe 1408 shtëpi", ka theksuar z.Kikaj i cili udhëheqë Komitetin për strehim.

z. Anders Lindgren ka njoftuar se implementimin e programit të ndërtimit të 10 shtëpive do ta bëjë “Team Kosova” përmes së cilës kjo OJQ suedeze ka ndihmuar edhe më parë popullatën e Podujevës.

 

 

Është nënshkruar një protokoll bashkëpunimi ndërmjet Bashkisë së Korçës dhe Komunës së Mitrovicës

 

Mitrovicë, 15 mars 2003 - Kryetari i Kundit të Komunës, z. Faruk Spahija, është kthyer nga vizita zyrtare në Shqipëri, ku për tri ditë ka qenë mysafir i Bashkisë të qytetit të Korçës.

Gjatë qëndrimit në Korçë, kryetari Spahija është takur me Prefektin e Korçës, Paqësor Zeneli dhe kryetarin e Qarkut të Korçës Dr. Fehmi Xhema, si dhe ka vizituar institucionet më të rëndësishme kulturo-historike e të tjera të Korçës dhe fshatin Boboshticë, vendlindjen e Viktor Jeftimiut.

Më 12 mars, kryetari i Kuvendit të Komunës së Mitrovicës, z. Faruk Spahija dhe kryetari i Bashkisë së Korçës z. Gjergj Duro, kanë nënshkruar një Protokoll Bashkëpunmimi midis Bashkisë së Korçës dhe Kuvendit të Komunës të Mitrovicës.

Me protokoll është paraparë një bashkëpunim i ngushtë në fushën e arsimit, kulturës, artit dhe sportit, ku është për të thkesuar binjakëzimi midis shkollave të të dyja qyteteve, organizimi i ekspozitave, oragnizimi i koncerteve të ansambleve dhe prezantimi i teatrove të qytetit, prezantimi reciprok i librave të autorëve të Korçës e të Mitrovicës etj.

Me protokollin e nënshkruar parashihet edhe dërgimi i nga dy specilaistëve nga fusha e urbanistikës dhe tatimit-taksave për qëndrim dyditor në të dyja qytetet, realizimi i pilot-projekteve në fushën e ndërtimit dhe ngrohjes, nënshkrimi i protokolleve midis departamenteve të tregtisë, vizitat e ndërsjella të tregtarëve, hapja e panairve në të dyja qytetet etj.

 

 

Një delegacion i komunës Fredrikstad nga Norvegjia ka arritur në Mitrovicë

 

Mitrovicë, 15 mars 2003 - Në kuadër të bashkëpunimit midis dy komunave, të filluar vitin e kaluar, një delegacion i komunës Fredrikstad nga Norvegjia, ka arritur në Mitrovicë, si mysafir i Kuvendit të Komunës dhe shkollës fillore "Ismail Qemajli".

Kryetari i delegacionit nga Fredrikstadi z. Ole Haabeth dhe drejtori i shkollës fillore të këtij qyteti "Kjolberg School" bashkë me disa arsimtarë të kësaj shkolle, katër studentë të Fakultetit të Edukimit dhe dy gazetarë nga Fredrikstadi do të qëndrojnë në Mitrovicë deri më 18 mars, kurse anëtarët tjerë të delegacionit do të qëndrojnë deri më datën 26 të këtij muaji.

Gjatë qëndrimit në qytetin e Mitrovicës, delegacioni i mysafirëve nga Norvegjia do të takohet me udhëheqëjen komunale, si dhe do të vizitojë monumentet kulturo-historike të komunës e të rajonit, Ministrinë e Arsimit në Prishtinë dhe do të qëndrojë dy ditë në Fakultetin e Edukimit në Prishtinë.

Poashtu, për mysafirët nga Norvegjia do të oragnizohen kontakte pune me arsimtarët ku do të këmbehen përvoja nga fusha e arsimit dhe edukimit.

 

 

Një delegacion i UNESCO-së ka vizituar monumentet kulturore e historike në Prizren

 

Prizren, 15 mars 2003 - Një delegacion i OKB-së për edukim, shkencë dhe kulturë - UNESCO, që ndodhet në Kosovë, ka vizituar dje Prizrenin. Gjatë qëndrimit në këtë qytet të lashtë historik shqiptar ky delegacion ka vizituar disa nga monumentet kulturore e historike, sikurse Shtëpinë e Lidhjes Shqiptare, kalanë e vjetër, disa objekte fetare të besimit islam dhe ortodokse.

"Qëllimi i vizitës së Prizrenit është njohja më për së afërmi e disa prej monumenteve kulturore historike të rëndësishme jo vetëm për qytetarët e Prizrenit, por për të gjithë neve", tha kryesuesi i delegacionit të UNESCO-s. Ai shtoi se për këtë organizatë ndërkombëtare është shumë e vlefshme ruajtja e monumenteve kulturore e historike, sikurse janë edhe këto në Prizren.

 

 

Nano shpreh bindjen në miqësinë e mëtejshëm ndërmjet Tiranës dhe Beogradit

 

Beograd, 15 mars 2003 - Kryeministri shqiptar Fatos Nano, ka arritur sot në Beograd për të marrë pjesë në varrimin e kryeministrit serb Zoran Gjingjiq. Nano ka shprehur pikëllmin e thellë për vrasjen e Gjingjiqit dhe ka shfaqur bindjen në miqësinë dhe partneritetin e mëtejshëm ndërmjet Tiranës dhe Beogradit.

 

"Kemi humbur mikun, partnerin e madh në procesin e ndërtimit të miqësisë dhe partneritetit të ri të Shqipërisë dhe bashkësisë së shtetit të Serbisë e Malit të Zi, si dhe në ndërtimin e Ballkanit të ri", ka theksuar Nano pas bisedës me presidentin e Serbisë dhe Malit të Zi, Svetozar Maroviq.

 

 

Shtypi britanik shkruan se e vërteta për vrasjen e Gjingjiqit është më e komplikuar

 

Londër, 15 mars 2003 - Duke transmetuar komunikatën e qeverisë serbe në të cilën Milorad Lukoviq - Legija dhe klani i tij akuzohet për krijimin e kaosit, anarkisë dhe frikës, ministrat sikur provuan të akuzojnë Lukoviqin për të gjitha të ligat në Serbi, shkruan gazeta londineze "Fajnenshëll tajms".

 

Sipas gazetës, e vërteta është pak më e komplikuar dhe Lukoviq nuk do të mund të forcohej me vite po të mos kishte gëzuar mbështetjen e ish-presidentit jugosllav Millosheviq, apo tash së voni edhe të zotit Gjingjiq. "Fajnenshëll tajms" shkruan se Gjingjiq ka shpresuar se një ditë kur të vendoset rendi i ri do të mund të përballet të paktën me disa nga figurat e mbrapshta të regjimit të kaluar. Por e mposhtën forcat të cilat ishin kundër tij, përfundon kjo gazetë.

Ndërkaq, gazeta tjetër londineze "Gardian" shkruan se përkundër lavdatave nga Perëndimi, pak njerëz do ta ankojnë Gjingjiqin në Serbi. Ende nuk është e qartë, shkruan "Gardian", se kush ka shkrepur plumbat që vranë Gjingjiqin. Me siguri fjala është për operacionin e grupeve të nëndheshme dhe se lidhjet me kriminalitetin i janë hakmarrë, shkruan në një koment të vetin "Gardian".

 

 

PDSH marrëveshjen mes liderëve të koalicionit qeveritar për përdorimin e gjuhës shqipe e cilëson të papranueshme

 

Shkup, 15 mars 2003 - Partia Demokratike Shqiptare në Maqedoni marrëveshjen mes partive qeveritare për çështjen e përdorimit të gjuhës shqipe në pasaporta dhe në parlament e cilëson se është jashtë frymës së Marrëveshjes Kornizë të Ohrit dhe papranueshme. Sipas PDSH-së për çështje të rëndësishme në vend do të duhej të merrej parasysh edhe mendimi i subjekteve të tjera.

Demush Bajrami, zëdhënës i PDSH-së, i tha BBC-së se përdorimi i gjuhës shqipe në parlament këmbehet me një aplikim gjysmak të gjuhës shqipe në pasaporta dhe kjo filozofi, sipas tij, përkujton praktikën e njohur të këmbimit të robërve të luftës në kushte lufte.

 

Ai shtoi se marrëveshja mes tre liderëve të koalicionit qeveritar në Maqedoni bën shmangie nga teksti burimor i Marrëveshjes së Ohrit.

Në anën tjetër për Bashkimin Evropian marrëveshja e arritur mes tre liderëve të koalicionit qeveritar në Maqedoni është "shenjë vizuele për zbatimin Marrëveshjes së Ohrit".

 

 

Për vrasjen e kryeministrit serb Gjingjiq janë arrestuar 136 vetë

 

Beograd, 15 mars 2003 - Qeveria e Serbisë ka njoftuar se në intervalin prej të enjtës deri të premtën gjatë hetimeve me rastin e vrasjes së kryeministrit serb Zoran Gjingjiq janë ndaluar 136 persona.

 

Një nga të ndaluarit ka kërkuar statusin e dëshmitarit të mbrojtur dhe ndodhet në procedurën e dhënies së deklaratës para prokurorisë speciale. Prej 136 të ndaluarve për 125 vetë është caktuar paraburgimi prej 30 ditësh.

 

Ndërkaq prej vendosjes së gjendjes së jashtëzakonshme 181 persona ndodhen në paraburgim. Te të arrestuarit është gjetur një sasi e armëve dhe drogë si dhe disa vetura të vjedhura. Te të arrestuarit është gjetur edhe material që dëshmon ekzistimin e organizatës kriminale.

 

 

Marrëveshja e sigurisë ndërmjet NATO-s dhe BE-së e hapë rrugën që BE-ja ta fillojë misionin e saj të parë ushtarak në Maqedoni

 

Athinë, 15 mars 2003 - Nënshkrimi i djeshëm i marrëveshjes së sigurisë ndërmjet NATO-s dhe BE-së në Athinë e hapë rrugën që BE-ja ta fillojë operacionin e saj të parë ushtarak në Ballkan.

 

Në këtë kuadër zëdhënësi i NATO-së Mark Lejti ka thënë se sipas planeve zëvendësimi i forcave të NATO-s me ato të BE-së në misionin në Maqedoni do të bëhet aty kah fundi i muajit mars ose në fillim të prillit.

Misioni i BE-së në Maqedoni do të jetë misioni ushtarak i Evropës nën flamurin e përbashkët të BE-së dhe promovim i politikës së saj aktive të sigurisë.

 

 

Bush: Shteti palestinez duhet të jetë i reformuar, paqësor dhe demokratik

 

Uashington, 15 mars 2003 - Presidenti i Shteteve të Bashkuara Xhorxh Bush tha se plani paqësor për Lindjen e Mesme do të bëhet publik menjëherë pasi palestinezët ta konfirmojnë zgjedhjen e kryeministrit të tyre.

 

"Shteti palestinez duhet të jetë i reformuar, paqësor dhe demokratik, dhe përgjithmonë të heqë dorë nga terrori", tha Bush. "Qeveria e Izraelit, pas zbrapsjes së terrorit dhe përmirësimit të sigurisë, duhet të ndërmarrë hapa konkretë në mbështetjen e një shteti të qëndrueshëm palestinez", tha presidenti i Shteteve të Bashkuara.

 

Bush tha se për asnjërën palë nuk mund të ketë paqe në Lindjen e Mesme, përderisa nuk ka liri për të dyja palët.

 

 

Bush do të takohet të dielën me Blerin dhe Aznarin

 

Uashington, 15 mars 2003 - Presidenti i Shteteve të Bashkuara Xhorxh Bush do të takohet të dielën me kryeministrin e Britanisë Toni Bler dhe kryeministrin e Spanjës Hoze Maria Aznar, për të diskutuar krizën rreth Irakut. "Është një përgjegjësi që i përcjell anëtarët e Këshillit të Sigurimit, qofshin të përhershëm apo të zgjedhur, dhe ne do të vazhdojmë të diskutojmë për këtë përgjegjësi", tha Këshilltarja për Siguri e presidentit amerikan, Kondoliza Raijs.

 

 

Solana: Bashkimi Evropian është i përçarë rreth çështjes së Irakut

 

Lubjanë, 15 mars 2003 - Shefi i Politikës së Jashtme të Bashkimit Evropian Havier Solana tha se vendet e unionit nuk mund të kenë ndonjë ndikim të madh në rezolutën mbi Irakun. Pas bisedimeve me kryeministrin e Sllovenisë Anton Rop, Solana pranoi se Bashkimi Evropian edhe vetë është i përçarë rreth çështjes së Irakut.

 

 

Kryeministri i ri palestinez mund të ftohet në Shtëpinë e Bardhë për një takim me presidentin Bush

 

Uashington, 15 mars 2003 – Kryeministri i ri palestinez, sapo të japë betimin, mund të ftohet në Shtëpinë e Bardhë për një takim me presidentin Bush, me qëllim që administrata të përshpejtojë Planin për paqe në Lindjen e Mesme dhe për shtetin palestinez, njofton AP.

 

"Mendoj se nuk do të ketë gjë më mirë se kur të vijë koha të vlerësohet që kryeministri palestinez të vizitojë Shtëpinë e Bardhë", ka thënë Kondoliza Rajs.

 

Pas konfirmimit të emrimit të Mahmud Abasit, i njohur si Abu Mazen, kryeministër, Bushi planifikon t'ua prezentojë Izraelit dhe palestinezve projektplanin për paqe.

 

 

Erdogan është kryeministër i ri i Turqisë

 

Ankara, 15 mars 2003 - Rexhep Taxhip Erdogan prej dje është kryeministër i ri i Turqisë, kurse programin e qeverisë do t'ia paraqesë parlamentit javën që vjen. Erdogan e merr drejtimin e qeverisë në mesin e presioneve të Shteteve të Bashkuara që Turqia të lejojë shfrytëzimin e hapësirës së saj ajrore për aeroplanët amerikanë, që mund të përdoren në rast të luftës kundër Irakut.

 

 

Plani i paqes për Lindjen e Mesme nga presidenti Bush ka patur jehonë pozitive

 

Uashington, 15 mars 2003 - Plani i paqes për Lindjen e Mesme i paralajmëruar nga presidenti i SHBA Xhorxh Bush ka patur jehonë pozitive. Kryeministri britanik Toni Bler e ka cilësuar planin e presidentit Bush "një hap të madh përpara".

 

Tani, është shprehur Bler në Londër, është e rëndësishme të tregojmë se vëmendja ndaj situatës në Lindjen e Afërme është e njëjtë me atë ndaj situatës në Irak në Irak.

Edhe Sekretari i përgjithshëm i Kombeve të Bashkuara Kofi Anan e ka përshëndetur planin për paqe të lajmëruar nga SHBA. Rusia dhe Franca janë shprehur gjithashtu pozitivisht mbi këtë iniciativë. Qeveria autonome palsetineze ka reaguar ndërkohë e përmbajtur dhe ka shprehur rezerva nga këtij plani.

 

 

Kongresi popullor në Kinë ka zgjedhur kryetarin e partisë Hu Jintao president të vendit

 

Pekin, 15 mars 2003 - Kongresi popullor në Kinë ka zgjedhur kryetarin e partisë Hu Jintao president të vendit. Ai do të pasojë në këtë post presidentin Xhiang Zemin i cili në takimin plenar në Pekin u rizgjodh nga të 3000 të deleguarit për pesë vjet të tjerë kryetar i komisionit ushtarak shtetëror.

 

Në këtë mënyrë megjithë ndryshimin e brezave në drejtimin e shtetit dhe partisë 76-vjeçari Xhiang Zemin do vazhdojë të këtë influencë të konsiderueshme si komandant i përgjithshëm i forcave të armatosura.

 

 

Shrëder ka kërkuar nga qytetarët gjermanë të përgatiten për kohë të vështira

 

Berlin, 15 mars 2003 - Kancelari gjerman Shrëder ka paralajmëruar edhe shkurtime disa miliardëshe në rrjetin e shërbimeve sociale. Në një deklaratë të re qeveritare Shrëder i paraqiti parlamentit konceptin e një reforme të gjerë me të cilën synon të nxjerrë nga kriza ekonomike Gjermaninë.

 

Ndryshimet në komponenten sociale të shtetit janë të domosdoshme ka theksuar Shrëder. Programi i reformave parashikon shkurtimin e kohës ndihmës sociale për të papunët dhe reduktimin e ndihmës për të papunët në nivelin e ndihmës sociale.

 

 

Negociatat për Irakun në Kombet e Bashkuara nuk kanë ecur përpara

 

Nju Jork, 15 mars 2003 - Situata është e bllokuar është shprehur në Nju Jork presidenti i radhës i Këshillit të Sigurimit ambasadori i Guinesë pranë Kombeve të Bashkuara Mamadi Traore. Një tjetër takim i Këshillit të Sigurimit për çështjen e Irakut nuk është caktuar ende.

 

Delegacioni kilian u përpoq të zhbllokonte situatën me anë të një propozimi të ri. Ky propozim parashikonte dhënien presidentit irakian Sadam Husein të një afati prej tre javësh për të përmbushur një katalog kërkesash konkrete për çarmatim por nuk përmbante dhënien e mandatit për luftë në rast mospërmbushjeje. SHBA e refuzuan në tërësi këtë projekt.

 

 

Qeveria irakiane i ka dorëzuar KB-së një raport mbi mbetjet e rezervave të armëve biologjike e kimike

 

Nju Jork, 15 mars 2003 - Qeveria irakiane i ka dorëzuar Kombeve të Bashkuara një raport mbi mbetjet e rezervave të mëparshme të gazit të nervave VX, dhe ka njoftuar dorëzimin e një bilanci mbi virusin e antraksit.

 

Shefi i kontrollorëve të armëve Hans Bliks ka konfirmuar marrjen e një raporti prej 25 faqesh i cili është duke u shqyrtuar. Më parë Iraku në mënyrë të përsëritur kishte deklaruar shkatërrimin e të gjitha armëve të tij biologjike e kimike të ndaluara në vitin 1991.

Copyright©2000-2003 Trepca.net - Të gjitha të  drejtat e rezervuara.