Lajme

E premte, 14 mars 2003

Përmbajtja:

• M. Shtajner: Bisedimet mes Prishtinës dhe Beogradit duhet të shtyhen për shkak të gjendjes së krijuar me vrasjen e Gjingjiqit

• Prizren: Xhemail Mustafa, Ekrem Rexha dhe Ukë Bytyçi postmortum u nderuan me mirënjohjen "Dëshmorët e Demokracisë"

• Kryeparlamentari Daci vizitoi sot Gjakovën

• Presidenti Rugova emëroi tre këshilltarë të rinj

• AER-i ndihmon Prishtinën në infrastrukturë me dy projekte

• Zona kufitare me Serbinë në rajonin e Podujevës po kontrollohet intensivisht nga KFOR-i

• Komandantit të Zonës III të TMK-së dje vetëm i është bastisur shtëpia

• R. Pribe: KE synon që institucionet e Kosovës të jenë më afër standardeve evropiane meqë ardhmëria e Kosovës është në Evropë

• Zyrtarët e policisë së OKB-së thanë se kanë rritur sigurinë në Kosovë pas vrasjes së kryeministrit serb

• Mbrëmë vonë në një apartament përballë UNNMIK-ut në Prishtinë ka shpërthyer një zjarr

• Statusi "Dëshmor i Atdheut" u jipet 444 dëshmorëve dhe ju njoh ky status edhe 14 të rënëve në luftë për çlirimin e Kosovës

• BE diskuton çështje të sigurimit dhe misionin e ardhshëm paqeruajtës

• Nën dyshimin për vrasjen e Gjingjiqit janë arrestuar 56 persona

• Në Beograd kanë qëndruar zyrtarët e lartë evropian, Paten e Solana

• Parlamenti i Shqipërisë miratoi njëzërit dërgimin e një kompanie shqiptare në Gjirin Persik

• Pasaportat e reja të Maqedonisë do të jenë në shqip, maqedonisht dhe anglisht

• Parlamenti shqiptar mban një minutë heshtje për Gjingjiqin - Nano, Berisha dhe Meta vizituan ambasadën serbo-malazeze në Tiranë

• Në det të hapur u shpëtuan 24 emigrantë klandestinë që rrezikoheshin të mbyteshin

• Forcat izraelite kanë vrarë sot të pakten edhe gjashtë palestinezë

• Nga një shperthim në një tren në Indi, humbën jetën 11 veta dhe u lënduan mbi 50 të tjerë

• Autoritetet afgane arrestuan 10 anëtarë të ish-regjimit taliban, të dyshimtë për sulme terroriste

• Këshilli i Sigurimit nuk arriti marrëveshje mbi projektrezolutën për Irakun

• SHBA-të vazhdojnë dislokimet në përgatitje për luftë të mundshme me Irakun

• Shtyhet debati për rezolutën e re për Irakun

• SHBA dërguan bombarduesit B-52 për luftën në Irak

• Anan u bëri thirrje anëtarëve të KS dhe anëtarëve të KB që të gjejnë rrugëzgjidhje për Irakun

• Pauell: Të gjitha opsionet mbesin të hapura

• Vellpen: Franca refuzon "logjikën e ultimatumeve"

• Një inspektor i KB për armatimin ka humbur jetën në një aksident trafiku afër Bagdadit

M. Shtajner: Bisedimet mes Prishtinës dhe Beogradit duhet të shtyhen për shkak të gjendjes së krijuar me vrasjen e Gjingjiqit

 

Prishtinë, 14 mars 2003 - Në Kosovë shefi i UNMIK-ut Mihael Shtajner deklaroi se bisedimet mes Prishtinës dhe Beogradit duhet të shtyhen për një kohë për shkak të gjendjes së krijuar në Serbi pas vrasjes së kryeministrit Zoran Gjingjiq. Ai i bëri këto komente pas takimit me një delegacion të Komisionit Evropian, ekspertë të cilit kanë filluar takimet e para të mekanizmit të BE-së për procesin e stabilizim-asocimit të Kosovës.

 

Z. Shtajner tha se ky takim po mbahet në një periudhë tragjike në Serbi, duke dënuar sërish fuqishëm vrasjen e kryeministrit serb. Kjo vrasje tha ai do të ndikojë edhe në bisedimet e paralajmëruar ndërmjet Prishtinës dhe Beogradit për zgjidhjen e çështjeve teknike të interesit të ndërsjellë.

 

Shtajner tha se qeveria në Beograd tash po përballet me një situatë të re dhe duhet t'i jepet kohë ngase siç dihet atje është shpallur gjendje e jashtëzakonshme. Për këtë arsye, tha ai, duhet pritur me durim zhvillimet e ardhshme atje, kurse institucionet ndërkombëtare dhe vendore në Kosovë duhet të jenë të qeta dhe të vazhdojnë punën në përmbushjen e qëllimeve e tyre.

 

Ai e vlerësoi si shumë të rëndësishëm fillimin e procesit të përfshirjes së Kosovës në procesin e stabilizim-asociimit në BE. Shtajner ka theksuar se fillimi i këtij procesi është një shenjë shumë inkurajuese për Kosovën sepse e vë atë në binarë të duhur, ndërkaq standardet e vëna për Kosovën janë të njëjtat të cilat Komisioni Evropian i ka dhënë për të gjitha vendet e rajonit, tha z. Shtajner.

 

 

Prizren: Xhemail Mustafa, Ekrem Rexha dhe Ukë Bytyçi postmortum u nderuan me mirënjohjen "Dëshmorët e Demokracisë"

 

Prizren, 14 mars 2003 - Në një solemnitet me rastin e 13-vjetorit të themelimit të degës së LDK-së në Prizren, Xhemail Mustafa, Ekrem Rexha dhe Ukë Bytyçi postmortum u nderuan me mirënjohjen "Dëshmorët e Demokracisë". Në këtë manifestim merrnin zyrtarë dhe aktivistë lokalë të LDK-së si dhe anëtarët e famljeve Mustafa, Rexha e Bytyçi.

Kryetari i Asamblesë komunale të Prizrenit Eqrem Kryeziu, duke folur për figurën e Xhemail Mustafës, Ekrem Rexhës dhe Ukë Bytyçit, tha se ata janë tre kalorës të dritës. Z.Kryeziu foli me shumë përkushtim për këta tre ish-veprimtarët dhe theksoi se "ata bënë një punë të madhe për ne. Ne, bashkëpunëtorët e tyre, e kemi vështirë të flasim lirshëm për ta.

 

Ata ishin luftëtarë kundër territ". Ndërkaq për etapën e pasluftës foli nënkryetari i Degës Fadil Kryeziu, i cili tha se LDK-ja në realitetin më të ri iu përkushtua ndërtimit të institucioneve dhe të shtetit të Kosovës, duke e quajtur ndër sfidat e punës në vazhdimësi ndërtimin e demokracisë dhe të pushtetit të popullit.

 

Në rrugëtimin e saj 13-vjeçar LDK-në e kanë goditur edhe në fatkeqësi, duke humbur njerëz që lanë gjurmë të pashlyeshme në historinë e Kosovës dhe të Prizrenit, tha ai.

Mirënjohjet familjeve Mustafa, Drini dhe Bytyçi ua dorëzoi kryetari i Asamblesë komunale Eqrem Kryeziu.

 

 

Kryeparlamentari Daci vizitoi sot Gjakovën

 

Gjakovë, 14 mars 2003 - Kryetari i Kevendit të Kosovës Nexhat Daci qëndroi sot në Gjakovë dhe fillimisht vizitoi Kuvendin komunal, ku nga kryetari Aqif Shehu u njoh me aktivitetet dhe preokupimet e kësaj komune.

Kryeparlamentari Daci tha se nga bashkësia ndërkombëtare në Kosovë kanë ardhur ndihma të mëdha, por të cilat shpesh nuk janë mexhauar si duhet dhe nuk kanë dhënë rezultate të pritura. Prandaj, tha ai, është një kërkesë e tij që përgjegjësitë për zhvillime t'i marrin vendorët. Ai kërkoi që administratorët ndërkombëtarë rajonalë të kryejnë funksionin e këshilldhënies.

Duke folur për lëvizjen e lirë të qytetarëve dhe kapitalit në rajon, zoti Daci tha se nëse në gjashtë muajt e ardhshëm fqinjët e Kosovës nuk e respektojnë këtë parim, atëherë institucionet tona do të veprojnë me recprocitet.

Daci vizitoi edhe disa ndërmarrje prodhuese të Gjakovës në sektorin privat.

 

 

Presidenti Rugova emëroi tre këshilltarë të rinj

 

Prishtinë, 14 mars 2003 - Presidenti i Kosovës, Dr. Ibrahim Rugova, ka emëruar tre këshilltarë të rinj. Z. Halit Muharremi emërohet këshilltar për çështje juridike, z. Berim Ramosaj, këshilltar për çështje ekonomike, ndërsa z. Sali Cacaj, këshilltar për çështje të shoqërisë civile.

Më herët, Presidenti Rugova kishte emëruar z. Skender Hyseni këshilltar të lartë politik, ndërsa z. Muhamet Hamitin këshilltar për informim dhe zëdhënës.

Me këtë po plotësohet ekipi i të emëruarve politikë në Zyrën e Presidentit, ndërsa po vazhdon kompletimi i shërbimit civil në këtë Zyrë.

 

 

AER-i ndihmon Prishtinën në infrastrukturë me dy projekte

 

Prishtinë, 14 mars 2003 – Kryetari i Kuvendit Komunal të Prishtinës, Ismet Beqiri bisedoi me z. Alan Braun, përgjegjës i Departamentit për ujë e ambient të Agjencisë Evropiane për Rindërtim në Prishtinë, të cilin e njoftoi për punët dhe aktivitetet e Komunës së Prishtinës.

 

Zoti Beqiri kërkoi nga Agjencia Evropiane për Rindërtim që komuna e Prishtinës të vazhdojë të ndihmohet nga AER-i, pasi komuna ka një buxhet simbolik dhe nuk mund t'i përballojë shpenzimet në sanimin e infrastrukturës së Prishtinës.

Zoti Bruan tha se AER-i ndodhet në fazën e realizimit të dy projekteve - ndërtimin e deponisë rajonale të mbeturinave në Minierën e Mirashit, si dhe sanimin e deponisë ekzistuese në Prishtinë. Por ai tha se gjatë kryerjes së punimeve kanë hasur në pengesa nga ana e pronarëve të tokave që gjenden përreth deponisë.

 

Fillimi i punëve në ngritjen e deponisë nga AER-i ka nisur para dy vjetësh, por për shkak të kësaj vonese janë detyruar të bëjnë ridisajnimin e punimeve që ka kushtuar 20 mijë euro, ndërkohë që projekti për deponinë e re kushton 500 mijë euro, tha z. Braun.

Kryetari i KK të prishtinës, Ismet Beqiri theksoi se “gjatë javës së ardhshme nga Administrata e Komunës së Prishtinës do të kryehet procedura e pronës në deponinë e Prishtinës, si dhe do të bëhet marrëveshja me pronarët e tokës, në mënyrë që të mos ndërpriten punët për realizimin e këtij projekti.

 

 

Zona kufitare me Serbinë në rajonin e Podujevës po kontrollohet intensivisht nga KFOR-i

 

Podujevë, 14 mars 2003 – Në konferencën e sotme për gazetarë pos KFOR-it çek dhe policisë së UNMIK-ut morën pjesë edhe përfaqësues Brigadës shumëkombëshe dhe të KFOR-it suedez. Majori Kollarik i KFOR-it çek e sllovak tha se pos kontrollimeve rutinore është zhvilluar edhe një operacion i gjerë në Podujevë dhe rrethinë në të cilin kanë marrë pjesë edhe brigadat tjera të MNB(C).

 

Gjatë një kontrolli në Podujevë janë zbuluar 16 mina kundërnjerëzore, eksploziv, 2 revole, rreth 1 mijë plumba municion për kallashnikov, libra të taktikave luftarake, uniforma serbe, rrjeta maskuese, etj., tha majori Kollarik duke njoftuar edhe për gjetjen e një vule të Ministrisë serbe të Mbrojtjes. Mirëpo, majori Kollarik pohoi se përgjithësisht situata është e qetë në rajonin e Podujevës.

Ndërkaq duke u ndërlidhur për aksionin gjithëpërfshirës të KFOR-it komandanti i Batalionit çeko-sllovak koloneli Prohaska tha se qëllimi ishte që t'u tregohet atyre që me veprime kriminale dëshirojnë ta prishin qetësinë dhe sigurinë në komunën e Podujevës se KFOR-i në bazë të Rezolutës 1244 të OKB-së ka për detyrë vendosjen dhe mbajtjen e një mjedisi të sigurtë në Kosovë.

 

Zona kufitare po kontrollohet intensivisht dhe më shumë për shkak të gjendjes së jashtëzakonshme në Serbi, pohoi koloneli Prohaska. Në këtë kuadër KFOR-i çek apelon qytetarët e Podujevës që të kenë kujdes e të mos afrohen afër kufirit dhe as të prejnë dru.

Komandanti i ri i policisë së UNMIK-ut z. Uallas Skullion (Wallace Scullion) njoftoi për rastin e vrasjes së të riut i cili u qëllua në veturë derisa ishte me të dashurën e tij, por kryesi i krimit nuk është zbuluar ende. Ai tha se gjatë aksioneve të KFOR-it janë arrestuar mbi 10 persona disa nga të cilët po mbahen në burgun e Prishtinës.

 

 

Komandantit të Zonës III të TMK-së dje vetëm i është bastisur shtëpia

 

Gjakovë, 14 mars 2003 - Në një njoftim të Zyrës për inforimim të Zonës III të TMK-së thuhet se dje në orët e hershme njësitë e karabinierisë dhe të KFOR-it kanë bastisur shtëpinë e komandantit të Zonës III të TMK-së, gjeneral-brigade Nazmi Brahimajt në Gjakovë.

 

Bastisja ka zgjatur tri orë në praninë e vetë gjeneralit Brahimaj. Pjesëtarët e KFOR-it kanë marrë me vete disa gjësende dhe materiale që mbaheshin në shtëpi, por nuk është gjetur asgjë e jashtëligjshme. Me këtë rast vetëm është konfiskuar një pushke gjuetie me leje.

 

Komandanti Brahimaj ka qëndruar deri në orët e pasdrekës në bazën e KFOR-it në Gjakovë në kërkim të informacionit lidhur me bastisjen dhe në kërkim të kthimit të gjësendeve të marra nga shtëpia e tij. Në këtë njoftim saktësohet se gjenerali Brahimaj nuk është arrestuar, por atij vetëm i është bastisur shtëpia.

 

 

R. Pribe: KE synon që institucionet e Kosovës të jenë më afër standardeve evropiane meqë ardhmëria e Kosovës është në Evropë

 

Prishtinë, 14 mars 2003 - Përfaqësuesit e lartë ndërkombëtarë dhe vendorë në Kosovë kanë zhvilluar dje takimin e parë me ekspertët e Komisionit Evropian mbi përfshirjen e Kosovës në procesin e stabilizim-asociimit.
Pas këtij takimi kryeministri i Kosovës Bajram Rexhepi tha se fillimi i këtij procesi dëshmon që Kosova në bashkëpunim me Komisionin Evropian synon realizimin e kriterieve që kërkohen nga Bashkimi Evropian.

 

Ai shtoi se pavarësisht nga statusi i pazgjidhur Kosova nuk do të mbetet pikë e zezë në mes Evropës, sepse Ballkani Perëndimor është pjesë e Evropës gjeografikisht dhe duhet të jetë edhe pjesë e BE-së. Prandaj pavarësisht nga çështjet statusore që nuk janë të definuara, kjo është një mundësi e mirë e Kosovës që të mos lihet anash dhe e izoluar.

Ndërkaq, Rajnhard Pribe, drejtor për Ballkanin Përendimor në Komisionin Evropian tha se organizata e tij synon që institucionet e Kosovës të jenë më afër standardeve evropiane meqë ardhmëria e Kosovës është në Evropë. Ai nënvizoi se BE nuk dëshiron që Kosova për shkak të çështjeve të pazgjidhura të lërë me një anë procesin e integrimit tha z. Pribe.

Zyrtarët thanë se bisedimet e para kanë përfshirë rolin dhe metodat e punës së këtij mekanizmi si dhe respektimin e kriterieve politike dhe ekonomike të BE-së ku përfshihen parimet themelore të demokracisë: sundimi i ligjit, të drejtat e njeriut dhe të pakicave dhe reformat në ekonominë e tregut.

 

 

Zyrtarët e policisë së OKB-së thanë se kanë rritur sigurinë në Kosovë pas vrasjes së kryeministrit serb

 

Prishtinë, 14 mars 2003 - KFOR-i dhe policia ndërkombëtare në Kosovë kanë rritur shkallën e gatishmërisë dhe të vigjilencës së tyre për të qenë të gatshëm t'u përgjigjen situatave eventuale të bartjes në Kosovë të trazirave që kanë mundur të krijohen në Serbi pas vrasjes së kryeministrit të Serbisë Zoran Gjingjiq. Kështu kanë pohuar zyrtarë të strukturave ndërkombëtare përgjegjëse për sigurinë në Kosovë.

Megjithatë, zyrtarë të KFOR-it dhe të policisë theksojnë se se nuk ka nevojë për përforcim trupash përgjatë kufirit me Serbinë.

Zëdhënësi i policisë së UNMIK-ut Beri Fleçër tha se shkalla e gatishmërisë ishte rritur menjëherë pas njoftimit për vrasjen e kryeministrit Gjingjiq për t'u relaksuar më vonë pas njoftimeve zyrtare nga Beogradi se vrasja kishte të bënte me rrjetet e krimit të organizuar që veprojnë në Serbi.

 

 

Mbrëmë vonë në një apartament përballë UNNMIK-ut në Prishtinë ka shpërthyer një zjarr

 

Prishtinë, 14 mars 2003 - Mbrëmë vonë në një apartament përballë UNNMIK-ut në Prishtinë ka shpërthyer një zjarrë. Zjarrfikësit kanë intervenuar shpejt dhe e kanë lokalizuar atë. Nuk ka të lënduar, por vetëm dëme materiale. Në në kohën kur kishte ndodhur ky zjarr në apartment nuk gjendej askush.

 

Njoftohet se në këtë apartman kishte banuar një shtetas nga Shqipëria. Tash për tash nuk dihen shkaqet e shpërthimit të këtij zjarri. Policia ka dalë në vendin e ngjarjes dhe po i zhvillon hetimet lidhur me këtë rast.

 

 

Statusi "Dëshmor i Atdheut" u jipet 444 dëshmorëve dhe ju njoh ky status edhe 14 të rënëve në luftë për çlirimin e Kosovës

 

Tiranë, 14 mars 2003 - Nën drejtimin e zëvendeskryeministrit Ilir Meta, u mblodh Komisioni Qëndror i Statusit "Dëshmorit të Atdheut".

Në këtë mbledhje u miratua dhënia e Statusit "Dëshmor i Atdheut" 444 dëshmorëve si dhe ju njoh ky status edhe 14 të rënëve ne luftë për çlirimin e Kosovës.

Bazuar në legjislacionin në fuqi, komisioni vendosi që t’u japë këtyre familjeve simbolin “familje te dëshmorit te atdheut” dhe një shperblim prej 5000 lekë të reja në muaj.

Kryetari i Komisionit, Zoti Ilir Meta kërkoi të përshpejtohet puna në mënyrë që dëshmorët e atdheut të marrin statusin që meritojnë dhe familjet e tyre të perfitojnë titullin e lartë të familjes se dëshmorit.

Simboli "Familje e Dëshmorit të Atdheut" përbëhet nga një copë e kuqe me thekë, me përmasa 30 x 50 cm, në të cilën është stamposur në ngjyrë ari përmendorja "Nënë Shqipëri" dhe shkruan anash "Familje e Dëshmorit të Atdheut".

 

 

BE diskuton çështje të sigurimit dhe misionin e ardhshëm paqeruajtës

 

Athinë, 14 mars 2003 - Sot ministrat e Mbrojtjes të Bashkimit Evropian do të mblidhen në Greqi për të diskutuar mbi një numër çështjesh që lidhen me sigurimin, duke përfshirë edhe misionin e parë paqeruajtës në historinë e Bashkimit Evropian.

 

Blloku evropian po përgatitet të zëvendësojë forcën paqeruajtëse të Natos në Maqedoni nga fundi i marsit. Ministrat e Bashkimit Evropian pritet të diskutojnë gjithashtu edhe për zëvendësimin e Forcës Stabilizuese të Natos në Bosnjë-Hercegovinë.

 

Gjendja në Ballkan do të jetë gjithashtu në krye të rendit zyrtar të ditës të takimit, pas vrasjes këtë javë të kryeministrit të Serbisë, Zoran Gjingjiq.

 

 

Nën dyshimin për vrasjen e Gjingjiqit janë arrestuar 56 persona

 

Beograd, 14 mars 2003 - Shefi i policisë së Beogradit Millan Obradoviq ka njoftuar se deri më tash nën dyshimin për vrasjen e kryeministrit serb Zoran Gjingjiq janë arrestuar 56 persona. Ai ka bërë të ditur se 8 prej tyren janë pjesëtarë të grupit të quajtuar "Klani i Zemunit", kurse shumica e tyre për momentin gjenden në arrati.

 

Obradoviq ka thënë se kërkimi i tyre po bëhet intensivisht në mbarë territorin e Serbisë dhe në Mal të Zi. Në këtë paraqitje të parë të policisë nga vrasja e kryeministrit serb, Obradoviq ka thënë se në vrasjen e Gjingjiqit kanë marrë pjesë 3 persona për momentin të panjohur të cilët kanë qenë të veshur kombinizone të kaltra dhe me aplikacione të verdha.

 

Njëri nga ata në dorë ka pasur pushkën me snajper, kurse dy të tjerë kanë pasur pistoleta dhe pas vrasjes janë larguar nga godina prej nga kanë shtënë. Obradoviq vrasjen e ka cilësuar si akt terrorist dhe ka njoftuar se të gjitha strukturat e sigurimit në Serbi e Mal të Zi janë të angazhuara në gjetjen dhe arrestimin e kryesve të këtij akti terrorist.

Ndërkaq, ministri i Punëve të Brendshme të Serbisë Dushan Mihailloviq ka deklaruar se policia do t'i arrestojë të gjithë të dyshuarit për vrasjen e kryeministrit Gjingjiq dhe do ta likuidojë secilin që e rreziston policinë.

Po ashtu është bërë e ditur se në biseda informative janë marrë edhe ish-shefi i Shërbimit të sigurimit të shtetit Jovica Stanishiq dhe komandanti i parë i njësive për operacione speciale të policisë serbe Frenki Simatoviq, të cilat në këto funksione kanë qenë në kohën e sundimit të Millosheviqit.

 

 

Në Beograd kanë qëndruar zyrtarët e lartë evropian, Paten e Solana

 

Beograd, 14 mars 2003 - Në Beograd dje kanë qëndruar zyrtarë të lartë të BE-së Kris Paten e Havier Solana në shenjë të mbështetjes së institucioneve demokratike të Serbisë e Malit të Zi pas vrasjes së kryeministrit Gjingjiq. Ata kanë biseduar me zyrtarë më të lartë të Serbisë dhe të Unionit serbo-malazez.

 

Paten e Solana kanë shprehur tmerrin dhe keqardhje për vrasjen e kryeministrit serb me mesazhin se nuk guxon të lejohet që ky krim makabër ta ngadalësojë përparimin që ka bërë Serbia drejt inkuadrimit në integrimet evropiane.

 

 

Parlamenti i Shqipërisë miratoi njëzërit dërgimin e një kompanie shqiptare në Gjirin Persik

 

Tiranë, 14 mars 2003 - Parlamenti i Shqipërisë miratoi një akt normativ të paraqitur nga Qeveria lidhur me dërgimin e një kompanie shqiptare në Gjirin Persik, si dhe për vënien në dispozicion të hapësirës toksore, ajrore dhe detare.

 

Deputetët e të gjitha forcave politike mbështetën njëzërit dhe deklaruan votat e tyre pro-dokumentit të paraqitur nga Këshilli i Ministrave. Oratorë të ndryshëm në parlament deklaruan se kjo është një shenjë e kontributit të Shqipërisë për paqe në botë dhe në aleancë jo vetëm me NATO-n, por edhe me SHBA-të.

Kryeministri Nano deklaroi në seancë se qeveria shqiptare dhe parlamenti po e marrin këtë vendim në përputhje edhe me ambiciet e Shqipërisë për integrim në strukturat evroatlantike.

Ndërkaq, drejtuesi i opozitës Sali Berisha thekso se kthimi i Shqipërisë përkrah SHBA-ve për një luftë të mundshme në Irak është nderim për atë çka amerikanët kanë bërë dhe po bëjnë për popullin shqiptar, veçanërisht për çlirimin e Kosovës.

 

 

Pasaportat e reja të Maqedonisë do të jenë në shqip, maqedonisht dhe anglisht

 

Shkup, 14 mars 2003 - Kryetari BDI-së Ali Ahmeti, kryeministri Branko Cërvenkovski dhe lideri i Partisë Liberaldemokrate Risto Penov në një takim të veçantë arritën një marrëveshje, që pasaportat e reja të Maqedonisë të jenë në shqip, maqedonisht dhe anglisht, për qytetarët që dëshirojnë t'i kenë këto në këto gjuhë dhe në maqedonisht dhe anglisht për ata që i duan në këto gjuhë.

Seancat në parlament do të zhvillohen në maqedonisht, ndërkohë që do të transmetohen me përkthim në gjuhën shqipe në kanalin e tretë të Televizionit shtetëror të Maqedonisë.

Sipas një komunikate për opinion të dalë pas takimit, theksohet se BDI ka mbështetur emrin kushtetues të Maqedonisë, sovranitetin dhe integritetin e saj, karakterin unitar të shtetit, si dhe simbolet shtetërore, përfshirë këtu edhe flamurin shtetëror.

Të tre udhëheqësit e koalicionit qeveritar në Maqedoni në dokumentin e miratuar thuhet se qeveria e Maqedonisë fton UNMIK-un dhe institucionet e përkohshme të autoriteteve vetëqeverisëse në Kosovë që të pranojnë faktin për mosndryshimin e kufijve ekzistues me çka do të krijoheshin parakushtet për respekt dhe bashkëpunim të ndërsjellë në rajon.

 

 

Parlamenti shqiptar mban një minutë heshtje për Gjingjiqin - Nano, Berisha dhe Meta vizituan ambasadën serbo-malazeze në Tiranë

 

Tiranë, 14 mars 2003 - Kryeministri i Shqipërisë Fatos Nano, kryetari i Partisë Demokratike Sali Berisha dhe ministri i jashtëm Ilir Meta kanë vizituar dje përfaqësinë diplomatike Serbi-Mali i Zi në Tiranë për t'i shprehur ngushëllimet e tyre ambasadorit Kapetanoviq për vrasjen e kryeministrit serb Zoran Gjingjiq. Ata u nënshkruan në librin e zisë që është hapur në këtë ambasadë.

Dje edhe parlamenti i shqiptar nderoi me një minutë heshtje kryeministrin e ndjerë serb Gjingjiq. Ndërkaq mediat e Tiranës njoftojnë gjerësisht për zhvillimet në Beograd pas vrasjes së kryeministrit serb. Kështu në lajmet qendrore mbrëmë TVSH i kushtoi këtyre ngjarjeve 15 minuta.

 

 

Në det të hapur u shpëtuan 24 emigrantë klandestinë që rrezikoheshin të mbyteshin

 

Tiranë, 14 mars 2003 - Policia shqiptare me ndihmën e policisë italiane dhe të një helikopteri të Misionit të NATO-s në Shqipëri arriti të shpëtojë dje pasdite një gomone me 24 emigrantë klandestinë e cila rrezikohej të mbytej në det për shkak të një defekti në motora.

 

Mjeti lundrues që ishte nisur drejt Italisë dhe kishte mbetur i bllokuar në afërsi të derdhjes së lumit Fema në zonën e Fierit. Po dje u kapën në zonën e Vlorës dy gomone të tjera.

 

 

Forcat izraelite kanë vrarë sot të pakten edhe gjashtë palestinezë

 

Xhenin, 14 mars 2003 – Forcat izraelite kanë vrarë sot (të premten) të pakten edhe gjashtë palestinezë të armatosur gjatë një sulmi në vendstrehimet e militantëve palestinezë në kampin e refugjatëve të Xheninit në Bregun Perendimor, ka bërë të ditur një burim ushtarak izraelit, njofton Rojter.

 

Kështu, numri i të vrarëve palestinez në operacionet izraelite në dhe rreth qytetit Xhenin, në 24 orët e fundit është ngritur në 11 sish, thotë ky burim.

 

 

Nga një shperthim në një tren në Indi, humbën jetën 11 veta dhe u lënduan mbi 50 të tjerë

 

Bombaj, 14 mars 2003 – Masat të rrepta sigurimi janë ndërmarrë në gjithë kryeqytetin indian komercial Bombaj pasi nga një shpërthim në një tren udhëtarësh humbën jetën 11 persona dhe u lënduan mbi 50 të tjerë, njofton BBCWorld. Shpërthimi ka ndodhur në një vagon të rezervuar për gra e fëmijë, është shkaktuar me bombë, por ende nuk dihet kush e ka kryer këtë sulm. Ky është sulmi i katërt me bombë në Bombaj në muajt e fundit, ka thënë policia.

 

 

Autoritetet afgane arrestuan 10 anëtarë të ish-regjimit taliban, të dyshimtë për sulme terroriste

 

Kandahar, Afganistan, 14 mars 2003 – Autoritetet afgane kanë deklaruar të premten se kanë arrestuar 10 anëtarë të ish-regjimit taliban, të dyshimtë se kanë organizuar sulme terroriste, njofton Rojter.

 

Policia ka thënë gjithashtu se gjatë operacionit të arrestimeve në një shtëpi në pjesën jugore të qytetit Kandahar ka zënë armë, lëndë shpërthyese, mina tokësore dhe dokumente, ka thënë një ofiicer i lartë policor.

 

 

Këshilli i Sigurimit nuk arriti marrëveshje mbi projektrezolutën për Irakun

 

Nju Jork, 14 mars 2003 - Këshilli i Sigurimit prej 15 anëtarësh nuk mundi të arrijë një marrëveshje lidhur me një propozim britanik, pas disa orë bisedimesh. Në kompromis përfshiheshin 6 kushte specifike që Iraku duhet të plotësonte për të provuar se është duke u çarmatosur.

Diplomatë amerikanë e britanikë thonë se vendet e tyre nuk do të bëjnë thirrje që të hidhet në votë rezoluta e tyre deri të shtunën. Rezoluta e mbështetur nga Shtetet e Bashkuara dhe Britania i jep Irakut afat deri më 17 mars për të provuar se i ka asgjësuar armët e tij të shkatërrimit në masë, përndryshe do të përballet me veprime ushtarake.

 

Por Franca thotë se do t'i vërë veton çdo rezolute që do të përmbante një ultimatum ushtarak. Rusia, Kina dhe Gjermania, mbajnë të njëjtin qendrim.

 

 

SHBA-të vazhdojnë dislokimet në përgatitje për luftë të mundshme me Irakun

 

Uashington, 14 mars 2003 - Shtetet e Bashkuara kanë dislokuar një numër të paraportuar avionësh bombardues të tipit B-2, të pakapshëm nga radarët, në kuadër të përqëndrimit të forcave për një luftë të mundshme kundër Irakut. Avionët e fuqishëm besohet se janë nisur për në Angli dhe në ishullin Diego Garcia në Oqeanin Indian.

 

Analistët thonë se këto avionë do të jenë ndër mjetet e para që do të përdoren në sulmet amerikane për të çarmatosur Irakun. Zyrtarët ushtarakë amerikanë thonë se anije të pajisura me raketa kruz po largohen nga Deti Mesdhe në drejtim të Detit të Kuq për veprime të mundshme kundër Irakut.

 

 

Shtyhet debati për rezolutën e re për Irakun

 

Nju Jork, 14 mars 2003 - Diplomatët në Këshillin e Sigurimit të Kombeve të Bashkuara kanë shtyrë debatin për një propozim të Britanisë për miratimin e një rezolute të re për Irakun.

 

Shtetet e Bashkuara, të cilat kishin këmbëngulur për zhvillimin e debatit dhe votimin në Këshillin e Sigurimit brenda kësaj jave, kanë rënë dakord me kërkesën e Britanisë që negociatat të vazhdojnë edhe gjatë fundjavës, madje edhe javën e ardhshme po të jetë e nevojshme.

 

 

SHBA dërguan bombarduesit B-52 për luftën në Irak

 

Uashington, 14 mars 2003 - Shtetet e Bashkuara filluan të dërgojnë bombarduesit B-52 për luftën e mundshme të prirë nga SHBA-të në Irak. Zëdhënësi i ushtrisë amerikane tha se avionët u nisën nga baza në Misuri, por nuk është e qartë se sa aeroplanë janë nisur. Zyrtarë ushtarak amerikan kanë rrefuzuar të thonë se ku do të bazohen avionët.

 

 

Anan u bëri thirrje anëtarëve të KS dhe anëtarëve të KB që të gjejnë rrugëzgjidhje për Irakun

 

Nju Jork, 14 mars 2003 - Sekretari i përgjithshëm i Kombeve të Bashkuara, Kofi Anan, u bëri thirrje anëtarëve të Këshillit të Sigurimit dhe anëtarëve të tjerë të Kombeve të Bashkuara që të gjejnë rrugën për të dalë nga qorrsokaku dhe të zgjidhin krizën irakiane lidhur me çarmatosjen.

Anan tha se shpreson që ndarjet e thella midis anëtarëve të Këshillit të Sigurimit nuk do të pengojnë Këshillin për t’u marrë me çështjet tjera të vështira.

 

 

Pauell: Të gjitha opsionet mbesin të hapura

 

Uashington, 14 mars 2003 - Sekretari amerikan i Shtetit, Kolin Pauell ka deklaruar se rezoluta e propozuar që autorizon një luftë të prirë nga Shtetet e Bashkuara në Irak mund të mos shkojë për votim në Këshillin e Sigurimit të Kombeve të Bashkuara. Pauell ka thënë se të gjitha opsionet mbesin të hapura derisa anëtarët e Këshillit të Sigurimit punojnë për arritjen e një marrëveshje që nuk do të tërhiqte veto.

 

 

Vellpen: Franca refuzon "logjikën e ultimatumeve"

 

Paris, 14 mars 2003 - Franca tha se ndryshimet e propozuara në projektrezolutën që kërkon autorizim nga Kombet e Bashkuara për çarmatosjen e Irakut me forcë, të bëra nga Britania, nuk adresojnë çështjen kyçe për zgjidhje paqësore të krizës. Ministri i Jashtëm francez, Dominik dë Velpen tha se Franca refuzon "logjikën e ultimatumeve".

 

 

Një inspektor i KB për armatimin ka humbur jetën në një aksident trafiku afër Bagdadit

 

Bagdad, 14 mars 2003 - Zyrtarët irakian njoftuan se një inspektor i Kombeve të Bashkuara për armatimin është vrarë në një aksident trafiku afër Bagdadit kurse një tjetër ka marrë lëndime të rënda. Në komunikatë thuhet se inspektorët ktheheshin me veturën e tyre pasi kishin inspektuar një fabrikë për përpunimin e domateve 50 kilometra në jug të kryeqytetit irakian.

Copyright©2000-2003 Trepca.net - Të gjitha të  drejtat e rezervuara.