E enjte, 13 mars 2003

13.03.2003 - Trepca.net

Lajme

E enjte, 13 mars 2003

Përmbajtja:

Presidenti Rugova priti ambasadorin e SHBA-ve në OSBE në Vjenë, Stefan M. Minikes
Presidenti Rugova priti mbrëmë raportuesin special për të drejtat e Njeriut të OKB-së, Kutiliero
Pensionistët e Kosovës kërkojnë te zgjidhet drejt statusi i tyre
Operacioni i KFOR-it në rajonin e Podujevës zbulon sasi të mëdha armatimi e municioni
Banorët e fshatit Bradash të Podujevës kanë grumbulluar afro 100 mijë euro për asfaltimin e rrugës
Deputetët miratuan një ligj, kurse kryeministri paraqiti ekspozenë për punën e qeverisë
Arrestohet komandanti i Zonës III TMK-së, gjeneral brigade Nazmi Brahimaj
Masë paraburgimit prej një muaji për Rasim Bajramin
Shtajner e ka cilësuar vrasjen e kryeministrit serb si sulm kundër procesit demokratik në Serbi
N. Daci: Kryeministri serb Gjingjiq ishte një emblemë e fillimit të proceseve demokratike në Serbi
Qeveria e Kosovës e ka dënuar vrasjen e kryeministrit serb duke e cilësuar atë si akt qyqar
Qeveria e Kosovës themeloi Këshillin për Transferimin e Kompetencave
Shefi i Zyrës gjermane tha se asnjë aeroplan i JAT-it të mos sjellë më refugjatët nga Gjermania në Kosovë
Në procesin gjyqësor kundër Millosheviqit në Hagë ka dëshmuar për masakrën në Reçak patologja finlandeze Helena Ranta
Përgjegjës për vrasjen e Gjingjiqit janë 23 persona, natën e kaluar janë arrestuar tre
Mbretëresha e Britanisë preti presidentin Moisiu
Policia ka arretuar së paku tre persona nën dyshimin se kanë bërë atentat në kryeministrin Gjingjiq
U lirua nga arresti Asllan Bajrami, i cili së bashku me vëllain e tij ishte paraburgosur nga KFOR-i
Policia greke bllokoi në pikën kufitare të Kakakvijes mbi 15 kilogram heroinë dhe 10 kilogram kokainë
Dy persona janë vrarë dhe 25 të tjerë janë plagosur në një shpërthim bombe në Kashmir
Të pakten 23 pjesëtarë të stafit mjekësor në Hong Kong po vuajnë simptomet e një forme të ashpër të pneumonisë
Dy izraelitë janë vrarë sot afër qytetit Hebron të Bregut Perendimor
Shrëder dhe Bler diskutojnë për krizën në Irak
Këshilli i Sigurimit nuk bie dakord për çështjen e Irakut
Turqia çon në gjykatën e apelit çështjen e Ocalanit
Shili kritikon qëndrimin e SHBA ndaj terroristëve
Njoftime për prova atomike koreanoveriore
Ushtria izraelite arrestoi 18 palestinezë
Forcat aleate kanë vrarë pesë afganë në luftimet në një luginë të përshtatshme për pusi
Rindërtimi i Irakut pas luftës pritet të kushtojë 20 miliardë dollarë
SHBA: Kohës për diplomaci "po i afrohet fundi"
Britania ka sugjeruar një varg provash që duhet të përmbushë Iraku
Kris Paten: BE-ja nuk do të ishte e disponuar të marrë pjesë në rindërtimin e Irakut
Ligjvënësit e Shteteve të Bashkuara kanë filluar të hakmerren kundër Francës

Presidenti Rugova priti ambasadorin e SHBA-ve në OSBE në Vjenë, Stefan M. Minikes


Përkundër rrugës së standardeve që janë vendosur në Kosovë me bashkësinë ndërkombëtare, njohja e pavarësisë së Kosovës do ta qetësonte rajonin, do të krijonte mundësi ekonomike, ndërkaq një Kosovë e integruar në Bashkimin Evropian, në NATO, e në miqësi të përhershme me Shtetet e Bashkuara të Amerikës do ta qetësonte rajonin, tha Presidenti Rugova.

Ai falenderoi ambasadorin Minikes për këtë vizitë, për mesazhet që solli, për nivelin e udhëheqjes dhe të integrimit të shoqërisë kosovare nga përvoja e tij e pasur jetësore. Gjishashtu Presidenti falenderoi SHBA-të për gjithë ato që kanë bërë para luftës, gjatë luftës dhe tash në rindërtimin e Kosovës.
Ambasadori Minikes tha se në këtë takim bashkëbiseduesit ishin fokusuar në ato çështje që janë të rëndësishme, siç i theksoi edhe Presidenti, dhe ai nuk ka çka të shtojë diçka më tepër. "Qëllimi i vizitës sime është që të shoh se si OSBE-ja do t'i realizojë objektivat që Presidenti sapo i përmendi, dhe ne do të vazhdojmë të bashkëpunojmë në partnership në mes të OSBE-së dhe perspektivës amerikane", tha zoti Menikes.

Ai shprehu kënaqësi që sheh këtu disa nga miqtë e shumtë të SHBA-ve në Kosovë. "Dhe ne padyshim do të vazhdojmë bashkëpunimin tonë të ndërsjellë për të krijuar një jetë më të mirë për qytetarët e Kosovës", tha ambasadori amerikan.


Presidenti Rugova priti mbrëmë raportuesin special për të drejtat e Njeriut të OKB-së, Kutiliero

Prishtinë, 13 mars 2003 - Presidenti i Kosovës Ibrahim Rugova priti mbrëmë raportuesin special për të drejtat e Njeriut të OKB-së, Hoze Kutiliero, me të cilin bisedoir për gjendjen e të drejtave të njeriut në Kosovë. Presidenti Rugova përgjithësisht gjendjen e sigurisë e vlerësoi si gjithnjë e më të mirë dhe se në këtë drejtim po punohet për përmirësimin e saj të vazhdueshëm.
Presidenti tha se një progres i caktuar është arritur edhe në fushën e të drejtave të njeriut dhe se me këto çështje merret Obduspersoni i Kosovës dhe KMDLNJ, por edhe institucionet do të kujdesen që të mos ketë shkelje të të drejtave të njeriut.
Gjithashtu, tha Presidenti, pikësynim i institucioneve të Kosovës është zhvillimi i ekonomik, privatizimi dhe krijimi i vendeve të reja të punës dhe integrimi i grupeve etnike në shoqërinë e Kosovës, gjë që në këtë drejtim është arritur përparim. Por në këtë drejtim, tha ai, do të ndihmonte më shumë njohja e pavarësisë së Kosovës.
Kutiliero tha se me Presidentin ka diskutar çështjet që janë me rëndësi për punën e tij, sepse ai përcjell zhvillimet rreth situatësë së të drejtave të njeriut. Kutiliero u shpreh se në këtë drejtim ka disa përmirësime, por ka gjëra të cilat duhet të bëhen edhe më tutje.


Pensionistët e Kosovës kërkojnë te zgjidhet drejt statusi i tyre

Gjilan, 13 mars 2003 - Lutfi Haziri, kryetar i Asociacionit të Komunave të Kosovës dhe kryetar i komunës së Gjilanit ka pritur sot në Gjilan një delegacion të pensionsitëve të Kosovës, të prirë nga z. Fazli Kajtazi, kryetar i Sindikatës së Pavarur të pensionistëve dhe invalidëve të punës dhe në një bisedë me ta, është njoftuar për pozitën e vështirë me të cilën po përballohet kjo kategori e shoqërisë kosovare.
Statusi i pensionistëve, sot nuk ekziston në Kosovë, sepse skema e tashme pensionale, sado që është imponuar si model i avancuar nga shtetet e jashtme, ajo parashehë pensione prej 28, përkatësisht 35 euro, thanë këta pensionistë.
Z. Kajtazi dhe bashkëpunëtorët e tij sindikalë kërkuan ndihmën e kryetarit të AKK-së, z. Lutfi Haziri, që së bashku me kryetarët e komunave tjera, të bëjnë presion në institucione për ta kthyer statusin e pensionistëve kosovarë, ngase tani, nga 100 mijë pensionistë sa ka Kosova, as 70 për qind të tyre nuk e gëzojnë këtë të drejtë elementare.


Operacioni i KFOR-it në rajonin e Podujevës zbulon sasi të mëdha armatimi e municioni

Podujevë, 13 mars 2003 – Operacioni i Brigadës Shumëkombëshe të Qendrës MNB(C) i cili filloi dje në mëngjes në rajonin e komunës së Podujevës ka për qëllim sekuestrimin e armëve ilegale e kontrabandës si dhe ndalimin e ekstremistëve kriminalë, ka pohuar njoftimi i KFOR-it i shpërndarë në gjithë qytetin.

Lidhur me operacionin gjithëpërfshirës të KFOR-it, policia regjionale e UNMIK-ut në Prishtinë sot ka bërë publike rezultatet e operacioneve të djeshme.

Sipas njoftimit të policisë vetëm në një rast në Podujevë KFOR-i ka gjetur: 16 mina të tipit PMA – 2TNT, 8 mjete të paeksploduara të tipit MRUT, 6 fitila të granatave antitank, 2 fitila të bombave të dorës, 4 mbajtëse revolesh, 1 maskë kundër gazit, 2 veshje ushtarake, 1 helmetë, 7 fitila elektrikë, 19 rrathë municion, 4 telefona celularë, etj.

Dy persona janë arrestuar pas këtij kontrolli, ka njoftuar policia regjionale e UNMIK-ut e Prishtinës. Në një rast tjetër në Podujevë janë zbuluar 610 rrathë municion dhe 295 rrathë tjerë, gjithë kjo sasi e kalibrit 7.62 mm.
Ndërkaq në fshatin Sekiraçë polica ka kontrolluar 2 shtëpi ku janë gjetur nga një revole dhe shumë rrathë municioni. Municion KFOR-i ka gjetur edhe në Shajkofc.
KFOR-i ka kërkuar nga popullata përkrahje për aksionin i cili tregon angazhimin e vazhdueshëm në mbështetje të rendit dhe ligjit.


Banorët e fshatit Bradash të Podujevës kanë grumbulluar afro 100 mijë euro për asfaltimin e rrugës

Podujevë, 13 mars 2003 – Aksioni për grumbullimin e mjeteve për asfaltimin e rrugës së Bradashit i cili ka filluar vitin e kaluar është kah përfundimi, njoftoi sot kryetari i Komitetit të fshatit z. Avni Maloku.

Ai pohoi se për asfaltimin e kësaj rruge të gjatë 3.65 km, 270 familje kanë grumbulluar deri më tani 95.600 euro nga 115 mijë sa duhet të participojë komuniteti.
Për asfaltimin e rrugës nevojiten 330-360 mijë euro, kurse realizimi i projektit do të bëhet në bashkëpunim me komunën e cila duhet të sigurojë pjesën tjetër të mjeteve.
Ndërkaq drejtori i drejtorisë për urbanizëm z. Hami Jaha pohoi se këtë vit pritet që pos rrugës Podujevë – Shajkofc të asfaltohen edhe rruga e Bradashit, rruga Tërrnavë – Halabak, ajo Majac – Lupç dhe rruga Kërpimeh – Reçicë që llogariten investime kapitale në rajonin e komunës së Podujevës.


Deputetët miratuan një ligj, kurse kryeministri paraqiti ekspozenë për punën e qeverisë

Prishtinë, 13 mars 2003 - Deputetët e Kuvendit të Kosovës në seancën e sotme nen për nen mirutuan ligjin për likuidim dhe organizimin e personave juridikë në falimentim. Në këtë seancë, kryeministri i Kosovës Bajram Rexhepi paraqiti ekspezenë për punën njëvjeçare të qeverisë së tij. Ndryshe deputetët serbë nuk morën pjesë në këtë mbledhje.
Kryeministri tha se qeveria ka pasur një vit të suksesshëm, duke theksuar si një ndër sukseset kryesore konsolidimin e qeverisë, krijimin e një klime të sigurt për të gjithë qyetarët e Kosovës, përfaqësimin e Kosovës në Paktin e Stabilitetit, hapjen e zyrave të Bankës Botërore dhe të Fondit Monetar Nndërkombëtar e të tjera.

Megjthëkëtë, tha ai, gjatë këtij viti ka pasur edhe probleme të shumta, por, tha ai, është arritur sukses sidomos në krijimin e një baze të fuqishme ligjore e cila rregullon aspektet e ndryshme të jetës në Kosovë. Sipas Rexhepit, edhe ky vit do të jetë një vit me sfida dhe probleme, porse qeveria do ta dijë që t'ia dalë.

Duke folur për prioritetet kryesore ai përmendi zhvillimin ekonomik, transferimin e më shumë kompetencave nga UNMIK-u tek instucionet e Kosovës. Ai tha se qeveria pretendon që të marrë edhe ato kompetenca në drejtësi, energjetikë por edhe në ato që deri më tash ishin e drejtë e rezervuar për kreun e UNMIK-ut si janë politika e jashtme, siguria etj.
Pas ekzpozesë së kryeministrit nuk u zhvillua debat, meqenëse ai ishte i zënë.


Arrestohet komandanti i Zonës III TMK-së, gjeneral brigade Nazmi Brahimaj

Gjakovë, 13 mars 2003 - Komandanti i Zonës III TMK-së, gjeneral brigade Nazmi Brahimaj, është arrestuar në orët e sotme të mëngjesit. Kjo u bë e ditur gjatë një proteste të sotme në Deçan. Brahimajn e kanë arrestuar trupat ndërkombëtare të rendit dhe fillimisht e kanë dërguar në polici e më vonë në kazermën e KFOR-it italian në Gjakovë, ku po mbahet. Motivet e arrestimit nuk janë bërë të ditura ende.


Masë paraburgimit prej një muaji për Rasim Bajramin

Gjilan, 13 mars 2003 - Gjykata e qarkut në Gjilan i ka shqiptuar masën e paraburgimit prej një muaji Rasim Bajramit, nga fshati Breznicë e Bujanocit, ndryshe baba i Shaban Bajramit të vrarë më 7 mars nga forcat serbe në vijën kufitare Kosovë - Serbi.

Avokati mbrojtës Abdulaziz Sadiku tha se klienti i tij, Rasimi, dyshohet të ketë qenë i imlikuar në incidentin që ndodhi në 7 mars, por ai dyshohet edhe për disa vepra të tjera.


Shtajner e ka cilësuar vrasjen e kryeministrit serb si sulm kundër procesit demokratik në Serbi

Prishtinë, 13 mars 2003 - "Jam thellë i tronditur me lajmin për vrasjen e kryeministrit të Serbisë Zoran Gjingjiq", ka deklaruar shefi i UNMIK-ut Mihael Shtajner. Duke e dënuar këtë sulm ai e ka cilësuar atë edhe si sulm kundër procesit demokratik në Serbi. Shtajner ka thënë se ky ishte një akt brutal kundër një kryetari të qeverisë të zgjedhur në mënyrë demokratike.

Shtajner ka thënë se është shokuar me këtë lajm dhe e ka ngushëlluar familjen e të ndjerit Gjingjiq, qeverinë dhe qytetarët serbë në këtë kohë, që ai e quan të vështirë për ta, duke shtuar se ai ka njohur dhe ka punuar me Gjingjiqin gjatë dhjetë vjetshit të kaluar dhe, siç tha, e çmonte shumë, thuhet në një letër të Shtajnerit.
Vrasja e Gjingjiqit bëri që të anulohen të gjitha veprimtaritë politike të administratës ndërkombëtare në Kosovë.


N. Daci: Kryeministri serb Gjingjiq ishte një emblemë e fillimit të proceseve demokratike në Serbi

Prishtinë, 13 mars 2003 - Kryetari i Parlamentit të Kosovës Nexhat Daci, duke dënuar vrasjen e kryeministrit të Serbisë, ka deklaruar se Zoran Gjingjiq ishte "një emblemë e fillimit të proceseve demokratike në Serbi, në një mjedis në të cilin me decenie është kultivuar urrejtja, ndoshta do të thoja deri në fashizëm".

Prandaj kjo vrasje, sipas kryeparlamentarit Daci, do t'i dëmtojë proceset demokratike në tërë rajonin, në veçanti në fqinjësi.
"Ne u frikësoheshim gjithmonë rrjedhave në fqinjësi të Kosovës që në demokracinë e brishtë që po zhvillohet në rajon do të lënë fërkema të pashlyeshme dhe fatkeqësisht dje u vërtetuan ato paramendime të rrjedhave negative në Serbi", ka thënë kryeparlamentari Daci.


Qeveria e Kosovës e ka dënuar vrasjen e kryeministrit serb duke e cilësuar atë si akt qyqar

Prishtinë, 13 mars 2003 - Qeveria e Kosovës e ka dënuar vrasjen e kryeministrit serb Zoran Gjingjiq. Në një prononcim theksohet se Qeveria e Kosovës e mori me keqardhje të thellë lajmin e vrasjes së kryeministrit të Serbisë Zoran Gjingjiqin dhe e dënon këtë akt qyqar.

Qeveria e Kosovës konsideron se aktet e tilla të krimit janë tepër të rrezikshme jo vetëm për ato shtete ku ato ndodhin, por bartin pasoja për tërë rajonin. Qeveria e Kosovës i shpreh ngushëllime familjes Gjingjiq.


Qeveria e Kosovës themeloi Këshillin për Transferimin e Kompetencave

Prishtinë, 13 mars 2003 - Qeveria e Kosovës themeloi Këshillin për Transferimin e Kompetencave nga ndërkombëtarët tek institucionet vendore.

Anëtarët e këtij Këshilli janë kryeministri Bajram Rexhepi, ministri i Tregtisë dhe Industrisë Ali Jakupi, ministri i Ekonomisë dhe Financave Ali Sadriu, ministri i Transportit dhe Telekomunikacionit Zef Morina, ministri i Shërbimeve Publike Jakup Krasniqi dhe ushtruesja e detyrës së ministrit të Shëndetësisë Resmie Mumxhiu.
Ndërkohë, ministri serb i Bujqësisë, Pylltarisë dhe Zhvillimit Rural, Goran Bogdanoviq nuk ka pranuar të jetë anëtar i këtij Këshilli.
Kryeministri Bajram Rexhepi ka thënë se pret që administrata e UNMIK-ut të pajtohet që deri në fund të këtij viti qeveria e tij t'i ketë edhe disa ministri, të cilat ajo sot nuk i ka, duke përfshirë këtu edhe qasjen në ato fusha të cilat aktualisht janë e drejtë e rezervuar e shefit të UNMIK-ut.


Shefi i Zyrës gjermane tha se asnjë aeroplan i JAT-it të mos sjellë më refugjatët nga Gjermania në Kosovë

Prishtinë, 13 mars 2003 - Një avion i JAT-it dje ka sjellë nga Gjermania në aeroportin e Prishtinës një numër të shqiptarëve, të cilët nuk kanë pasur dokumente qëndrimi në Gjermani. Kryeministri Rexhepi ka kërkuar nga Qeveria gjermane nëpërmjet përfaqësuesit në Prishtinë, Peter Rondorf që të mos vazhdohet më me çështje të tilla, sepse politikisht është në dëm dhe në favor të tensionimit të situatës.
Ndërkaq, shefi i Zyrës gjermane Petar Rondorf është pajtuar me kërkesën e kryeministrit Rexhepi. "Unë e sigurova kryeministrin se zyra ime do t'i raportojë qeverisë gjermane për këtë rast dhe të do të përkujdesemi që asnjë aeroplan i JAT-it të mos sjellë më refugjatë kosovarë këtu.

Mirëpo, ne jemi të pajtimit se do të ketë kthim të kosovarëve nga Gjermania në Kosovë", ka thënë shefi i zyrës gjermane. Ai ka shtuar se kthimi i refugjatëve shqiptarë në aeroportin e Prishtinës me aeroplan të JAT-it nuk mund të jetë vendim i Qeverisë gjermane, por vendim i landit të Baden Vyrtenbergut dhe këto shqetësime do t'ia përcjellë qeverisë së tij dhe rastet e tilla nuk do të përsëritën më.


Në procesin gjyqësor kundër Millosheviqit në Hagë ka dëshmuar për masakrën në Reçak patologja finlandeze Helena Ranta

Hagë, 13 mars 2003 - Në procesin gjyqësor kundër Millosheviqit në Hagë është paraqitur dje patologja Helena Ranta, e cila ka dëshmuar për masakrën që ka ndodhur në Reçak. Ajo kësaj radhe ka deklaruar se në fshatin Reçak ka ndodhur masakra e forcave serbe ndaj popullatës civile shqiptare. Viktimat janë vrarë në vendin ku janë gjetur kufomat një ditë më vonë.

Nuk ka asnjë provë e cila do të dëshmonte se rasti ka qenë i inskenuar, deklaroi Helena Ranta. Duke folur për testin e parafinës në bazë të së cilit ekspertët serbë atë botë kishin konstatuar prezencën e barutit në duar të viktimave, patologja finlandeze deklaroi se për eskpertët evropianë ky test është krejtësisht i tejkaluar dhe nuk është qind për qind i saktë.

"Askush nga ekipi im nuk ka marrë pjesë në ekspertizën që e kanë bërë serbët, ndërsa ky test i parafinës në Evropë nuk përdoret qe 40 vjet", tha zonja Ranta. Në testet që i ka bërë ajo dhe ekipi i saj nuk janë gjetur gjurmët e barotit, risiguroi Renta Gjykatën e Hagës dhe përmendi se në tokë, në vendin ku janë gjetur viktimat, janë zbuluar edhe gëzhojat e plumbave së bashku me copëzat e rrobave, gjë që dëshmon se shqiptarët janë vrarë në vendin ku janë gjetur.


Përgjegjës për vrasjen e Gjingjiqit janë 23 persona, natën e kaluar janë arrestuar tre

Beograd, 13 mars 2003 - Zëvendëskryeministri serb Zharko Koraqi thotë se në një aksion të policisë gjatë natës së kaluar janë arrestuar disa persona nga lista e qeverisë, të dyshuar për vrasjen e kryeministrit Gjingjiq. Disa nga organizatorët e atentatit ndaj Gjingjiqit tashmë ndodhen në arrati, tha Koraq, duke shtuar se policia ka forcë që të përballet me kriminalitetin.
Koraq gjitashtu thotë se Milorad Lukovac i quajtur Legia, ish-komandant i njësive speciale "Beretat e kuqe", dhe Dushan Spasojeviq, të cilët janë të dyshuarit kryesorë për vrasjen e kryeministrit Gjingjiq ndodhen në arrati. Koraq thotë se qeveria i ka shpallur luftë këtij grupi i cili ka gazetën e vet, njerëzit në gjykatë...
Sipas një njoftimi tjetër të Qeverisë së Serbisë përgjegjës për vrasjen e kryeministrit janë gjithsej 23 persona dhe i ka bërë të ditur emrat e tyre.


Mbretëresha e Britanisë preti presidentin Moisiu


Kjo është vizita e parë e një presidenti shqiptar në Britaninë e Madhe i ftuar nga Mbretëresha Elizabet. Megjithatë, kjo është hera e dytë që Madhëria e Saj pret në audiencë një president shqiptar. Ishte ish-presidenti Sali Berisha, i cili vizitoi Britainë e Madhe në vitin 1994 me ftesë të kryeministrit të atëhershëm konservator Xhon Mejxhor, që u prit edhe nga Mbretëresha Elizabet.


Policia ka arretuar së paku tre persona nën dyshimin se kanë bërë atentat në kryeministrin Gjingjiq

Beograd, 13 mars 2003 - Sipas njoftimeve jozyrtare nga Beogradi, policia ka arrestuar së paku tre persona të cilët dyshohet se janë pjesëmarrës në atentatin kundër kryeministrit serb Zoran Gjingjiq, i cili nga plagët e marra vdiq në një spital të Beogradit.
Me propozimin e Qeverisë serbe, ushtruesja e detyrës së presidentit të Serbisë Natasha Miqiq pas vrasjes së kryeministrit serb, mbrëmë ka shpallur gjendjen e jashtëzakonshme në Serbi. Qeveria thotë se me vrasjen e kryeministrit janë rrezikuar siguria e Serbisë, liritë dhe të drejtat e njeriut dhe qytetarëve dhe puna e organeve të shtetit.
Qeveria ka shpallur tri ditë zie në vend prej 13 deri më 15 mars. Të gjitha fluturimet jashtë aeroportit të Beogradit thuhet se janë anuluar dhe policia ka vendosur postblloqe në rrugët kryesore, por nëpër disa pika janë vërejtur edhe ushtarë në gjendje gatishmërie.
Mbrëmë është mbajtur edhe mbledhja e Këshillit të lartë të mbrojtjes të Unionit serbo-malazez.


U lirua nga arresti Asllan Bajrami, i cili së bashku me vëllain e tij ishte paraburgosur nga KFOR-i

Bujanoc, 13 mars 2003 - Autoritetet serbe kanë liruar nga arresti Asllan Bajramin nga fshati Breznicë e Bujanocit, i arrestuar së bashku me vëllain e tij nga KFOR-i pas incidentit më 7 mars kur në vijën kufitare Kosovë - Serbi u vranë nga forcat serbe i vëllai i tij Shabani dhe Besim Xhemaili.

Policia në Gjilan tha se Asllani është liruar pas paraqitjes para gjykatës, ndërkohë që babai i tij Rasimi vazhdon të mbahet në paraburgim.


Policia greke bllokoi në pikën kufitare të Kakakvijes mbi 15 kilogram heroinë dhe 10 kilogram kokainë

Kakavijë, 13 mars 2003 - Policia greke bllokoi dje në pikën kufitare të Kakakvijes mbi 15 kilogram heroinë dhe rreth 10 kilogram kokainë. Kjo është sasia më e madhe deri më tash e llojeve të forta të drogës, e cila është bllokuar në këtë vendkalim kufitar në tri vitet e fundit.

Sipas burimeve policore greke sasia e drogës u zbulua gjatë orëve të pasditës në një autoveturë, pronë e një shtetasi shqiptar. Me këtë rast u arrestua shoferi i autoveturës. Burimet e policisë greke konfirmuan se ai është shtetas shqiptar. Ndërkaq policia shqiptare ende nuk e ka konfirmuar këtë lajm.


Dy persona janë vrarë dhe 25 të tjerë janë plagosur në një shpërthim bombe në Kashmir

Xhamu, 13 mars 2003 – Dy persona janë vrarë dhe 25 të tjerë janë plagosur kur një bombë ka shpërthyer sot (të enjten) në një autobus në Kashmirin indian, gjë që ka shkaktuar protesta me kërkesa për mbrojtje nga dhuna seperatiste, ka bërë të ditur policia, njofton Rojter.

Shpërthimi ka ndodhur në qytetin Raxhouri, në vriperendim të kryeqytetit dimëror të shtetit Xhamu të Himalajeve.


Të pakten 23 pjesëtarë të stafit mjekësor në Hong Kong po vuajnë simptomet e një forme të ashpër të pneumonisë

Hong Kong, 13 mars 2003 – Të pakten 23 pjesëtarë të stafit mjekësor në spitalet e Hong Kongut po vuajnë simptomet e një forme të ashpër të pneumonisë (të ftohur) kur shpërtheu në kohë të fundit një sëmundje misterioze, e cila bëri që Organizata Botërore e Shëndetësisë të lëshojë një vërejtje të përgjithshme, njofton AFP.

Të 23 të sëmurët janë pjesëtarë të stafit të spitalit "Princi i Uellsit" dhe dy syresh janë në gjendje kritike, ka deklaruar zëdhënësja e spitalit ditën e enjte.


Dy izraelitë janë vrarë sot afër qytetit Hebron të Bregut Perendimor

Hebron, 13 mars 2003 – Dy izraelitë janë vrarë sot (të enjten) afër qytetit Hebron të Bregut Perendimor, ka bërë të ditur Radioja izraelite, e cila ka shtuar se është e mundshme se janë vrarë gabimisht nga ushtarët izraelitë, njofton Rojter.

Ndërkaq, ushtria s'e ka komentuar incidentin. Radioja ka thënë gjithashtu se të dy izraelitët kanë qenë duke udhëtuar me automobil, i cili është goditur me breshëri plumbash nga ajri dhe armata po bën hetimet për mundësinë që ushtarët të kenë bërë "gabim operacional" dhe kanë shtënë në ta.

Por, radioja ka thënë edhe se është e mundshme gjithashtu që palestinezët e armatosur, të maskuar si ushtarë t'i kenë vrarë të dy izraelitët.


Shrëder dhe Bler diskutojnë për krizën në Irak

Londër, 13 mars 2003 - Në Londër janë takuar kryeministri Bler dhe kancelari gjerman Shrëder për të diskutuar mbi çështjen e Irakut. Para takimit Shrëder bëri edhe një herë të qartë, se vazhdon të shpresojë për zgjidhje paqësore.

Megjithë pozicionet e ndryshme për çështjen e Irakut marrëdhëniet ndërmjet Gjermanisë dhe Britanisë së madhe vazhdojnë të jenë të mira, tha Shrëder.


Këshilli i Sigurimit nuk bie dakord për çështjen e Irakut

Nju Jork, 13 mars 2003 - Këshilli i Sigurimit nuk po arrin kompromis për një rezolutë të re ndaj Irakut. Për herë të parë krijohet një disbalancë ndermjet SHBA dhe Britanisë së Madhe.

Ambasadorët e të dy vendeve në OKB kanë për herë të parë qëndrime krejtësisht kontradiktore, përsa i përket ultimatumit ndaj Bagdadit. SHBA nuk heqin dorë që Bagdadi deri më 17 mars të plotësojë kushtet e çarmatimit të OKB-së.

Ambasadori i SHBA në OKB, Xhon Negroponte, tha se mund bëhet një shtyrje fare e vogël. Propozimi i modifikuar i Britanisë së Madhe që Irakut t'i jepet një afat për çarmatim deri në javen e fundit të marsit u kundershtua nga SHBA.

Rusia dhe Franca kërcënojnë me veto, nëse do të votohet për një rezolute, e cila të legjitimote sulmin ushtarak. Diskutimet në Këshillin e Sigurimit do të vazhdojnë sot.


Turqia çon në gjykatën e apelit çështjen e Ocalanit

Ankara, 13 mars 2003 - Qeveria turke ka çuar në gjykatën e apelit vendimin e gjykatës evropiane për të drejtat e njeriut në çështjen e të udhëheqësit të kurdeve Abdullah Oçalan. Ministria e jashtme në Ankara bëri të ditur se e konsideron të gabuara disa vendime të gjykatesve të Strasburit.

Gjykata kishte vlerësuar se procesi kunder shefit të partisë së ndaluar punëtore kurde, PKK, pra gjykatës së sigurisë shtetërore turke nuk ka qenë i rregullt. Oçalan në vitin 1999 u dënua me vdekje për separatizëm dhe tradhëti të lartë. Pas heqjes së dënimit me vdekje në Turqi dënimi në vitin 2002 u kthye në dënim të përjetshëm.


Shili kritikon qëndrimin e SHBA ndaj terroristëve

Berlin, 13 mars 2003 - Ministri i Brendshem gjerman, Oto Shili, ka kritikuar qëndrimin e SHBA ndaj terroristeve të arrestuar. SHBA e kanë zgjidhur problemin në mënyrë pragmatike, duke i dërguar të burgosurit në një territor të lirë juridikisht, i tha Shili gazetës hamburgase "Di Cajt".

Por kjo nuk mund të përballohet vazhdimisht. Sepse ka vështirësi të mëdha ligjore, të cilat duhen zgjidhur. Shili tha se të burgosurve pas një farë kohe u duhet dhënë statusi i të fajësurit në proces penal.


Njoftime për prova atomike koreanoveriore

Tokio, 13 mars 2003 - Koreja e Veriut përgatitet për një tjetër provë atomike njoftojnë gazetat japoneze. Të hënën Pheniani hodhi një raketë në detin japonez. Prova të këtij lloji cënojnë marrëveshjet ndërkombëtare.

Vëzhguesit mendojnë, se udhëheqja në Penian do të ushtrojë kështu presion në konfliktin atomik me SHBA. Koreja e Veriut kërkon nga SHBA bisedime direkte në konfliktin për programin e tij atomik dhe një pakt mossulmimi.


Ushtria izraelite arrestoi 18 palestinezë

Jerusalem, 13 mars 2003 - Ushtarë izraelitë kanë arrestuar 18 palestinezë gjatë kontrolleve të reja në Jordanin Perëndimor. Sipas një zëdhënësi të ushtrisë nder të arrestuarit gjenden dhe 2 ekstremistë të "Frontit për Çlirimin e Palestinës", të cilët kishin planifikuar një sulm ndaj një kolonie habraike.

Shumica e arrestimeve ndodhën në një fshat pranë Tulkaremit, ku të merkurën në një shkëmbim zjarri u vra një ushtar izraelit.


Forcat aleate kanë vrarë pesë afganë në luftimet në një luginë të përshtatshme për pusi

Bagram, 13 mars 2003 – Forcat aleate të udhëhequra nga amerikanët kanë vrarë pesë afganë në luftimet në një luginë të përshtatshme për pusi në Afganistanin lindor, kanë bërë të ditur sot (të enjten) burimet ushtarake amerikane, njofton Rojter.

Një konvoj i vogël i koalicionit ishte duke kaluar një shteg malor nga Gardezi në Kost, vendpërqendrim i dikurshëm i talibanëve afër Pakistanit, kur u sulmua me zjarr pushkomitralozi nga të dy anët e rrugës, ka thënë zëdhënësi ushtarak amerikan, Roxher King. Njoftohet gjithashtu se janë zënë edhe dy të armatosur të tjerë, kurse nga ana amerikane s’ka pasur viktima.


Rindërtimi i Irakut pas luftës pritet të kushtojë 20 miliardë dollarë

Uashington, 13 mars 2003 - Një grup ekspertësh joqeveritarë amerikanë thonë se rindërtimi i Irakut pas një lufte të mundshme mund t'u kushtojë taksapaguesve rreth 20 miliard dollarë në vit për një periudhë disavjeçare.

Në raportin e këtij Grupi thuhet se rindërtimi i Irakut do të kërkojë një angazhim të jashtëzakonshëm burimesh financiare dhe njerëzore amerikane. Aty i bëhet thirrje Presidentit Bush që të shpallë publikisht koston e propozuar të rindërtimit dhe të kërkojë miratim nga Kongresi.


SHBA: Kohës për diplomaci "po i afrohet fundi"

Uashington, 13 mars 2003 - Shtetet e Bashkuara thanë dje se kohës për diplomaci "po i afrohet fundi", kurse pyetja e vetme që do të mbetet është ajo nëse lideri irakian Sadam Husein u çarmatos.

Duke diskutuar manovrimet diplomatike në Kombet e Bashkuara lidhur me Irakun, zëdhënësi i Shtëpisë së Bardhë, Ari Fleisher deklaroi në konferencë për shtypin në Uashington: "Në të vërtetë ndodhemi në etapën e fundit të diplomacisë dhe në këte fazë finale presidenti po vete edhe një ekstra milje.

Kësaj ekstra milje do t'i vijë fundi dhe kohës për diplomaci do t'i vijë fundi. Pyetja e vetme që do të mbesë është, a u çarmatos vallë Sadam Husein", ka thënë zëdhënësi i Shtëpisë së Bardhë.


Britania ka sugjeruar një varg provash që duhet të përmbushë Iraku

Londër, 13 mars 2003 - Britania ka sugjeruar një varg provash që duhet të përmbushë Iraku për një kohë të caktuar për të dëshmuar bashkëpunimin e plotë me inspektimet e armatimit nga Kombet e Bashkuara dhe për evitimin e çarmatosjes me forcë.

Ndër provat është propozuar një deklaratë publike nga Sadam Husein ku do të pranonte se posedon dhe fsheh armë për shkatërrim në masë dhe tash duhet t'i dorëzojë. "Derisa ai të jetë i gatshëm t'ia thotë këto arabisht vetë popullit të tij, ne do të mendojmë se është një tjetër lojë apo truk", ka thënë sekertari i Jashtëm britanik, Xhek Strou.


Kris Paten: BE-ja nuk do të ishte e disponuar të marrë pjesë në rindërtimin e Irakut

Strasbur, 13 mars 2003 - Komisioneri i Bashkimit Evropian për marrëdhënie të jashtme, Kris Paten tha në Parlamentin Evropian se BE-ja ndoshta nuk do të ishte e disponuar të marrë pjesë në rindërtimin e Irakut, nëse çfarëdo aksioni ushtarak ndërmerret pa autorizimin e Kombeve të Bashkuara.

"Do të jetë shumë e vështirë, në çfarëdo rrethanash, të ndërmerren programe të reja ndihme në Irak dhe në fqinjësinë e tij, por për BE-në do të jetë edhe më e vështirë të bashkëpunojë plotësishtë dhe në shkallë të gjërë në proceset afatgjate për rindërtim, nëse ndodhit shpërthejnë pa mbulesë adekuate të Kombeve të Bashkuara dhe nëse vendet anëtare të Bashkësisë Evropiane mbesin të përçara", ka thënë Paten.


Ligjvënësit e Shteteve të Bashkuara kanë filluar të hakmerren kundër Francës

Uashington, 13 mars 2003 - Ligjvënësit e Shteteve të Bashkuara kanë filluar të hakmerren kundër Francës për shkak të kundërshtimit nga ana e saj të një lufte kundër Irakut, duke zëvendësuar emrin e ushqimit të njohur si "French fries" me "freedom fries" në kafeteritë e Dhomës së Përfaqësuesve.

Ligjvënësit e kanë nxjerrë jashtë menusë së tyre edhe ushqimin që përdoret për mëngjes të quajtur "French toast" duke e zëvendësuar atë me "freedom toast". Kongresmeni Bob Nei e ka quajtur aksionin si hap "të vogël por simbolik" për të treguar "pakënaqësinë e fortë" të shumë ligjvënësve me Francën për shkak të refuzimit të Parisit që të mbështesë një luftë të prirë nga Shtetet e Bashkuara kundër Irakut.