Lajme

E mërkure, 12 mars 2003

Përmbajtja:

• Shtajner: UNMIK-u dhe institucionet e Kosovës me qëndrim të përbashkët në bisedime

• Gjilan: Së shpejti faturat e para të tatimit në pronë për vitin 2003

• Program humanitar i ansamblit "Gurra" nga Gjilani në Strasburg për fondin e fëmijëve kosovarë

• Në Paris vdiq Abas Ermenji, njëri nga përfaqësuesti më të lartë të Ballit Kombëtar

• D. Çepell thotë se policia e UNMIK-ut ende nuk ka fakte për ekzistimin e grupeve terroriste në Kosovë

• UPSUP shënoi mbrëmë 22-vjetorin e protestave të studentëve

• Meta dhe Shtajner kanë biseduar me telefon për fillimin e dialogut midis Beogradit dhe Prishtinës

• Mizorisht u vra në qendër të Podujevës Alban Paçarada, 21-vjeçar

• Vdiq kryeministri serb Gjingjiq

• Studentët e Universitetit të Tetovës kërkojnë largimin e Fadil Sulejmanit dhe kthimin e Ramiz Abdylit

• Kryeministri serb, Zoran Gjingjiq është plagosur sot në Beograd

• Gjykata Penale Ndërkombëtare mbajti sesionin e parë

• Misioni i BE-së në Maqedoni do të fillojë deri në fund të këtij muaji

• GNK: Nëse në Shqipëri nuk zgjidhen problemet e thella ekonomike dhe shoqërore ato mund të shndërrohen në probleme politike

• A. Moisiu: Para politikës shqiptare janë tri sfida: reformat zgjedhore, zgjidhja e pronave dhe reformat në drejtësi

• Studentët e UT kërkojnë kthimin urgjent të Ramiz Abdylit në postin e rektorit

• Deputetët shqiptarë në parlamentin maqedonas insistuan që mos anashkalohen viktimat shqiptare në konfliktin e kaluar

• S. Berisha u bëri thirrje forcave politike që më 14 mars të debatojnë rreth ligjit të sistemit zgjedhor

• Ushtarët izraelitë kanë vrarë sot një palestinez të armatosur gjatë përleshjeve

• Deklarata e Ramsfeldit shkaktoi konfuzion në qarqet diplomatike

• Mbetet ende e paqartë nëse dhe kur do të votohet në Këshillin e Sigurimit për rezolutën e re për Irakun

• Shrëder paralajmëroi për konsekuencat e rënda të një lufte të mundshme në Irak

• Ramsfeld e relativizoi shprehjen se SHBA ishin të gatshme për luftë kundër Irakut edhe pa Britaninë

• Fleisher: Shtetet e Bashkuara duan që votimi për rezolutën të bëhet gjatë kësaj jave

• Hiro Ueki: Posedimi nga ana e Irakut të avionëve pa pilotë mund të jetë shkelje e rezolutave të KB-së

• SHBA dhe Britania shqyrtojnë mundësinë e shtyrjes së afatit të 17 marsit për çarmatimin e Irakut

• Pentagoni provon bombën më të fuqishme konvencionale amerikane

• Qiproja do të pranohet në BE

• Në një aksident ajror kanë humbur jetën 11 ushtarë amerikanë

• Një gjeneral indonezian është dënuar me pesë vjet burg për masakrat në Timor

Shtajner: UNMIK-u dhe institucionet e Kosovës me qëndrim të përbashkët në bisedime

 

Prishtinë, 12 mars 2003 - Kryeadminstratori i Kosovës, Mihail Shtajner, tha se UNMIK-u dhe institucionet e Kosovës do të kenë një qëndrim të përbashkët në bisedimet Prishtinë-Beograd.

 

Shtajner në një intervistë ekskluzive dhënë Radios Blue Sky ka demantuar akuzat e Beogradit se transferi i kompetencave tek insitucionet vendore është një provokim për Beogradin, duke mos saktësuar fillimin e këtij dialogu.

"Nuk kam përcaktuar ndonje afat. Mendoj se kjo është një çështje shumë me rëndësi, e paraparë edhe me Rezolutën 1244 dhe nga komuniteti ndërkombëtar.

 

Ajo që është kërkuar unë mënyrë mandatore me Rezolutën 1244 dhe nga KS të KB-së, është që të kemi një Qeveri funksionale, prandaj kjo nuk mund të shihet e as të kuptohet, nga askush, si provokim, përveç nëse ai mendon se edhe Rezoluta 1244 është një provokim", thotë kryeadministratori Shtajner në këtë intervistë.

 

 

Gjilan: Së shpejti faturat e para të tatimit në pronë për vitin 2003

 

Gjilan, 12 mars 2003 - Programi pilot "Tatimi në pronë" për paluajtshmëritë, kryesisht objekte banimi dhe locale afariste,ka hyrë në fazën përfundimtare. Kanë mbetur vetëm edhe pak prona për t'u regjistruar, kryesisht ato objekte që janë ngritur pas vitit 2000 e të cilat nuk janë përfshirë nëpër orto-fotot e përgatitura nga Agjencioni Kadastral I Kosovës dhe, u kanë munguar numrat kadastral.

Me këtë, deri në fund të këtij muaji, regjistrimi i punës në terren përmbyllet. Por, përpunimi i të dhënave dhe përgatitja e faturave, vazhdon të paktën deri në qershor kur pritet të përfundojnë edhe punët finale.

Stafi udhëheqës i programit "Tatimi në pronë", shpreson se qytetarët me ndërgjegje të lartë do t'i përgjigjen edhe këtij obligimi qytetar, sepse nuk synohet dhe nuk punohet për t'u bërë inkasim i detyrueshëm, anipse kjo metodë nuk përjashtohet.

 

 

Program humanitar i ansamblit "Gurra" nga Gjilani në Strasburg për fondin e fëmijëve kosovarë

 

Gjilan, 12 mars 2003 - Ansambli i këngëve dhe valleve "Gurra" nga Gjilani, me qëllim që të ndihmojë shërimin e fëmijëve kosovare që vuajnë nga sëmundjet e zemrës, do të udhëtojë nga mesi i javës së ardhshme për në Francë, ku do të shfaq disa programe humanitare në Strasburg.

 

Bali Sahiti, drejtues i Qendrës për rehabilitimin e fëmijëve dhe familjes në Gjilan thotë se Franca ka marrë përsipër trajtimin mjekësor të 250 fëmijëve kosovarë, të cilët vuajnë nga sëmundjet e zemrës. Përderisa operimi do të bëhet gratis nga mjekët e atjeshëm, shpenzimet e tjera të trajtimit spitalor duhet t`i përballojnë familjet e këtyre fëmijëve.

Në Strasburg janë paraparë të mbahen tri koncerte, ndërsa paralajmërohet edhe dërgimi i shpejtë për shërim të 11 fëmijëve nga Gjilani, të cilët kanë nevojë urgjente për korrekturë në zemër.

 

 

Në Paris vdiq Abas Ermenji, njëri nga përfaqësuesti më të lartë të Ballit Kombëtar

 

Paris, 12 mars 2003 - Në Paris në moshën 90-vjeçare vdiq Abas Ermenji, njëri nga drejtuesit më të lartë të Ballit Kombëtar. Ai u angazhua fillimisht në rezistencën e armatosur ndaj regjimit të ri komunist të vendosur në Shqipëri. Gjatë gjithë periudhës deri në fillim të viteve 90-ta ai ka pasur një aktivitet të zgjeruar politik në gjirin e mërgatës shqiptare.

 

Në vitin 1993 ai shkoi në Shqipëri ku rithemeloi partinë e Ballit Kombëtar, duke u zgjedhur kryetar i saj. Dy herë radhazi ai refuzoi mandatin e deputetit në Parlamentin shqiptar në shenjë proteste ndaj parregullësive në zgjedhje.

 

 

D. Çepell thotë se policia e UNMIK-ut ende nuk ka fakte për ekzistimin e grupeve terroriste në Kosovë

 

Prishtinë, 12 mars 2003 - Zëdhënësi i policisë së UNMIK-ut Derek Çepell deklaroi se ekziston dyshimi që dy personat e arrestuar kohë më parë janë të involvuar në aktivitete terroriste në Kosovë.

  

Ndërkaq, duke u përgjigjur në pyetjen se për çfarë aktivitetesh është fjala dhe se a ekzistojnë grupe terroriste në Kosovë, konkretisht a është duke vepruar Armata Kombëtare Shqiptare në Kosovë, zëdhënësi Çepell tha se policia është ende duke i vazhduar hetimet rreth këtij rasti dhe nuk mund të thuhet se ata përfaqësojnë grupe terroriste.

 

Policia e UNMIK-ut ende nuk ka fakte për ekzistimin e grupeve terroriste, të cilat veprojnë në Kosovë, duke e kuptuar këtu edhe Armatën Kombëtare Shqiptare.

 

 

UPSUP shënoi mbrëmë 22-vjetorin e protestave të studentëve

 

Prishtinë, 12 mars 2003 - Unioni i Pavarur i Studentëve të Universitetit të Prishtinës shënoi mbrëmë 22-vjetorin e protestave të studentëve në prani të disa mijëra studentëve dhe përfaqësuesve të organeve të vetëqeverisjes dhe partive politike. Shënimi i këtij përvjetori u mbajt në qendrën e studentëve "1 Tetori" në Prishtinë.

Të pranishmëve së pari iu drejtuar Gani Morina, kryetar i UPS të UT, i cili ndër të tjera tha se pranvera e vitit 1981 ishte finalizim i mobilizimit të brendshëm dhe aspiratë për vetëvendosje. Në këtë përvjetor foli edhe Abdullah Prapashtica një nga organizatorët e këtyre demonstratave. Më pas u mbajt një program i begatshëm kulturor e artistik.

 

 

Meta dhe Shtajner kanë biseduar me telefon për fillimin e dialogut midis Beogradit dhe Prishtinës

 

Tiranë, 12 mars 2003 - Ministri shqiptar i Punëve të Jashtme Ilir Meta ka zhvilluar dje pasdite një bisedë telefonike me shefin e UNMIK-ut Mihael Shtajner dhe në mënyrë të veçantë për iniciativën e fundit të zotit Shtajner për fillimin e dialogut midis Beogradit dhe Prishtinës, për çështje konkrete bashkëpunimi, si dhe për përfshirjen e Kosovës në proceset integruese evropiane.

Shtajner ka theksuar rëndësinë e fillimit të një dialogu të tillë, si një domosdoshmëri, jo vetëm për zgjidhjen e problemeve që ekzistojnë, por edhe për krijimin e një klime konstruktive dhe dialogu.

Mdërkaq, Ilir Meta është shprehur se fryma e dialogut është kërkesë e zhvillimeve të reja në rajon dhe tregues emancipimi dhe demokratizimi. Ndërtimi i marrëdhënieve direkte dhe konstruktive nëpërmjet dialogut është në interes të zhvillimit dhe stabilitetit të të gjithë rajonit, ka thënë ai.

Gjatë bisedës telefonike Meta dhe Shtajner, kanë biseduar edhe rreth domosdoshmërisë së përfshirjes së Kosovës në proçesin e integrimit evropian të rajonit dhe konkretisht në atë të Stabilizim-Asociimit.

Zoti Meta ka theksuar se statusi aktual i Kosovës nuk duhet të ndikojë për lënien e saj jashtë këtyre proçeseve dhe se Bashkimi Evropian duhet t'i ofrojë të gjithë qytetarëve të Kosovës një perspektivë të qartë evropiane.

Gjatë bisedës telefonike zoti Meta dhe zoti Shtainer kan rënë dakord për fillimin e negociatave së shpejti të Marrëveshjes së Tregtisë së Lirë mes Shqipërisë dhe Kosovës, thuhet në një njoftim të Ministrisë Punëve të Jashtme të Shqipërisë.

 

 

Mizorisht u vra në qendër të Podujevës Alban Paçarada, 21-vjeçar

 

Podujevë, 12 mars 2003 – Mbrëmë rreth orës 19.35 në Podujevë, pas postës së qytetit, u vra mizorisht i riu Alban Paçarada, i lindur më 1982.

Informacionet nga shërbimi i emergjencës në Shtëpinë e shëndetit primar në Podujevë pohojnë se mbrëmë rreth orës 19.45 kanë pranuar një rast vrasjeje. Fjala është për 21 vjeçarin Alban Lutfi Paçarada nga Podujeva që ishte goditur 6 herë dhe si pasojë e kësaj ka vdekur në vend, pohuan në shërbimin e emergjencës.

Policia e UNMIK-ut nuk ka raportuar ende për rastin, kurse një pjestar i SHPK-së njoftoi se dorasi ka ikur dhe se po hetohen motivet dhe shkaqet e këtij akti tragjik.

 

 

Vdiq kryeministri serb Gjingjiq

 

Beograd, 12 mars 2003 - Kryeministri serb Zoran Gjingjiq vdiq në një spital të Beogradit, pas një atentati të kryer sot në mesditë kundër tij para ndërtesës së qeverisë serbe. Rojter citon një zyrtar të Partisë Demokratike të Gjingjiqit të ketë thënë: "Ai ka vdekur".

Gjingjiq ishte qëlluar me dy plumba nga dy atentatorë, të cilët janë arrestuar në vendin e ngjarjes.

 

 

Studentët e Universitetit të Tetovës kërkojnë largimin e Fadil Sulejmanit dhe kthimin e Ramiz Abdylit

 

Tetovë, 12 mars 2003 - Me moton "Marsi i studentëve", Këshilli organizativ i studentëve të Universitetit të Tetovës sot organizoi një protestë në shenjë revolte për shkak të shkarkimit të rektorit të ri të UT, Ramiz Abdyli.

 

Studentët thanë se janë kundër të gjithë atyre që pengojnë procesin i cili çon drejt legalizimit të këtij universiteti. Studentët brohoritën edhe parulla kundër ish-rektorit Fadil Sulejmani dhe u vunë në mbrojtje të universitetit.

Studentët shtruana edhe disa kërkesa që kanë të bëjnë me largimin me çdo kusht të Fadil Sulejmanit nga UT, kthimin e Ramiz Abdylit në krye të universitetit, duke e mbështetur atë në procesin e filluar për zyrtarizimin e Universitetit të Tetovës.

Prorektori Hysni Hoxha tha para studentëve se këtë protestë e kanë organizuar "armiqtë e këtij universiteti".

 

 

Kryeministri serb, Zoran Gjingjiq është plagosur sot në Beograd

 

Beograd, 12 mars 2003 - Kryeministri serb, Zoran Gjingjiq, është qëlluar me armë zjarri dhe është plagosur përballë ndërtesës qeveritare në Beograd, kanë bërë të ditur burimet policore, njofton Rojter.

 

Mediat lokale kanë njoftuar sot se është qëlluar me armë zjarri në oborrin e ndërtesës në Beograd dhe me këtë rast kanë thënë se është plagosur një person, pa dhënë detaje. Gjingjiqi i plagosur është dërguar në spital dhe ende nuk janë dhënë informacione të tjera.

 

 

Gjykata Penale Ndërkombëtare mbajti sesionin e parë

 

Hagë, 12 mars 2003 - Gjykata Penale Ndërkombëtare mbajti sesionin e parë duke shënuar hyrjen në fuqi të Gjykatës së përherëshme botërore për krimet e luftës. Në ceremoninë e mbajtur në Hagë, ku ishte edhe sekretari i përgjithshëm i OKB-së, u betuan 18 gjykatës.

Kryetari i Asamblesë Parlamentare të Këshillit të Evropës, Peter Shajder tha se themelimi i Gjykatës është një mesazh për dikatatorët se do të mbahen përgjegjës për aksionet e tyre.

 

 

Misioni i BE-së në Maqedoni do të fillojë deri në fund të këtij muaji

 

Bruksel, 12 mars 2003 - Në një takim të mbajtur në Bruksel ndërmjet Komitetit Politik të Bashkimit Evropian dhe Këshillit të Përhershëm të NATO-s, ku ishin të pranishëm edhe lordi Xhorxh Robertson dhe përfaqësuesi i lartë i BE-së Havier Solana, parimisht është arritur marrëveshja që Misioni në Maqedoni të fillojë nga ana e BE-së deri në fund të këtij muaji.

Shefi i diplomacisë evropiane, Havier Solana u shpreh optimist se deri në fund të këtij muaji BE do të jetë në gjendje të marrë përsipër Misionin në Maqedoni ku ushtarët e BE-së do ta ruajnë paqen dhe stabilitetin e këtij shteti.

Në anën tjetër, lordi Robertson u tha gazetarëve në Bruksel se detajet e marrëveshjes që autorizon ndryshimin e forcave në Maqedoni pothuajse kanë përfunduar. Ai e vlerësoi takimin e djeshëm si një hap të madh përpara në marrëdhëniet ndërmjet BE-së dhe NATO-s. Marrëveshja do të lejojë BE-në të dërgojë një personel prej 320 vetësh në Maqedoni.

 

 

GNK: Nëse në Shqipëri nuk zgjidhen problemet e thella ekonomike dhe shoqërore ato mund të shndërrohen në probleme politike

 

Nju-Jork, 12 mars 2003 - Grupi Ndërkombëtar i Krizave në raportin e tij më të ri për gjendjen në Shqipëri paralajmëroi se problemet e thella ekonomike dhe shoqërore në këtë vend mund të shndërrohen në probleme politike nëse lihen pa u zgjidhur.

 

Në raport theksohet se ndërsa klima politike është më e qetë dhe në shumicën e vendit është vendosur stabiliteti, pak përparim është bërë në drejtim të reformave institucionale, të cilat vazhdojnë të pengohen nga korrupsioni i thellë dhe nga paaftësia e sektorit publik.

 

Qeveria e Shqipërisë, thuhet në këtë raport, nuk po tregon asnjë shenjë se po e lufton me seriozitet korrupsionin. Koncensusi politik i arritur midis partive po prishet dhe tensionet priten të shtohe me afrimin e zgjedhjeve lokale në tetor të këtij vit.

 

Grupi ndërkombëtar i krizave thekson se qëndrimi gjithnjë e më konfrontues i Qeverisë me shtypin ka bërë që shumica e organeve të shtypit të mbajë një qëndrim proqeveritar.

 

Në Shqipëri, thuhet në këtë raport, shkalla e krimit është ngadalësuar, sistemi i drejtësisë vazhdon të jetë i dobët, papunësia është e lartë, rendimenti i ulët dhe kriza energjetike vazhdon. Varfëria e thellë veçanërisht në pjesën veriore të vendit ka quar në rritjen e emigracionit dhe të trafikut njerëzor.

GNK rekomandon që qeveria të përmbushë angazhimin e saj para opozitës dhe komunitetit ndërkombëtar për reformat zgjedhore, të luftojë më me ashpërsi korrupsionin dhe krimin e organizuar, të heqë dorë nga presioni ndaj shtypit dhe të marrë masa që Shqipëria të përmbushë detyrimet e saj ndërkombëtare për lirinë e të shprehurit.

 

 

A. Moisiu: Para politikës shqiptare janë tri sfida: reformat zgjedhore, zgjidhja e pronave dhe reformat në drejtësi

 

Londër, 12 mars 2003 - Presidenti i Shqipërisë Alfred Moisiu i cili po qëndron në një vizitë zyrtare në Londër ka thënë se tri janë sfidat kryesore para politikës shqiptare në këto momente: reformat zgjedhore, zgjidhja e çështjes së pronave dhe reformat e thella në drejtësi. Ai i bëri këto komente në Institutin Mbretëror të Shërbimeve të Bashkuara për Studimet e Mbrojtjes.

Presidenti Moisiu klimën e tanishme të politikës koncesuale në Shqipëri e vlerësoi më të volitshme dhe shprehu besimin se ajo do të vazhdojë. Ai shtoi se pas një tranzicioni të gjatë e të vështirë forcat politike kanë gjetur gjuhën e përbashkët për t'i zgjidhur problemet kryesore të vendit dhe theksoi se zgjedhja e tij ishte hapi i parë i madh në drejtim të politikës koncesuale dhe stabilitetit e qetësisë në vend si dhe përmërësimi i imazhit të Shqipërisë.

Presidenti i Shqipërisë do të pritet sot nga Mbretëresha Elizabeta e Dytë, kur edhe do të përfundojë vizitën e tij triditëshe në Britani të Madhe.

 

 

Studentët e UT kërkojnë kthimin urgjent të Ramiz Abdylit në postin e rektorit

 

Tetovë, 12 mars 2003 - Studentët e Universitetit të Tetovës janë ngritur në protesta kundër ish-rektorit Fadil Sylejmani. Ata kanë formuar një këshill i cili kërkon largimin e tij nga Universiteti dhe kthimin e rektorit të shkarkura z. Ramiz Abdyli.

 

Përfaqësuesja e Këshillit të Studentëve Mimoza Bajrami thekson se vendimi i Senatit të UT për shkarkimin e rektorit Abdyli është arbitrar dhe i pamatur.

 

Ajo shtoi se Këshillit i Studentëve ka paraqitur tri kërkesa në të cilat përfshihet përkrahja e plotë e rektorit prof. dr. Ramiz Abdylit dhe kthimi urgjent i tij në postin e rektorit. Studentët po ashtu mbështesin fuqishmisht procesin e reformave të ndërmarra nga prof.

 

Abdyli për zyrtarizimin e Universitetit të Tetovës dhe largimin me çdo kusht të ish-rektorit Fadil Sylejmani nga Universiteti i Tetovës, si dhe garniturës së tij.

 

 

Deputetët shqiptarë në parlamentin maqedonas insistuan që mos anashkalohen viktimat shqiptare në konfliktin e kaluar

 

Shkup, 12 mars 2003 - Deputetët e Parlamentit të Maqedonisë zhvilluan dje në Shkup diskutime të ashpra me tone ofenduese rreth projektligjit për të drejta të veçanta të pjesëtarëve dhe të afërmve të viktimave të konfliktit të vitit 2001.

 

Qeveria maqedonase kishte propozuar që në këtë ligj të përfshihen vetëm familijarët maqedonas, ndërsa deputetët shqiptarë insistuan që mos anashkalohen viktimat shqiptarë në atë konflikt.

Deputeti i Bashkimit Demokratik për Integrim Talat Xhaferi ka kërkuar që në këtë ligj të përfshihen edhe viktimat shqiptare. Ai ka theksuar si absurdin më të madh të këtij ligji sipas të cilit nuk mund të fitojë edhe familja Zyberi nga Sllupçani i Likovës e cila ka humbur 7 anëtarë të saj përfshirë këtu edhe një fëmijë.

 

 

S. Berisha u bëri thirrje forcave politike që më 14 mars të debatojnë rreth ligjit të sistemit zgjedhor

 

Tiranë, 12 mars 2003 - Lideri opozitar Sali Berisha ka bërë thirrje që me 14 mars të mbahet një tryezë e rrumbullakët e të githa forcave politike relevante të Shqipërisë me synim debatimin e ligjit të sistemit zgjedhor në në vend. Z. Berisha shfaqi besimin e tij se në këtë tryezë do të marrin pjesë të gjithë faktorët relevantë politik.

 

 

Ushtarët izraelitë kanë vrarë sot një palestinez të armatosur gjatë përleshjeve

 

Jerusalem, 12 mars 2003 – Ushtarët izraelitë kanë vrarë sot (të merkurën) një palestinez të armatosur gjatë përleshjeve me militantët e armatosur afër qytetit Tulkarem të Bregut Perendimor, ka bërë të ditur një zyrtar ushtarak izraelit, njofton Rojter.

 

I armatosuri është vrarë gjatë shkëmbimit të zjarrit me trupat izraelite pas një përpjekjeje të sulmojë në pritë ushtarët në një fushë në fshatin Saida, ka thënë zyrtari në fjalë. Dy të armatosurit e tjerë janë zënë nga forcat izraelite.

 

 

Deklarata e Ramsfeldit shkaktoi konfuzion në qarqet diplomatike

 

Londër, 12 mars 2003 - Me shpalljen e luftës vetëm disa ditë larg, tensionet mes Uashingtonit dhe Londrës kanë filluar të dalin në sipërfaqe. Sekretari amerikan i Mbrojtjes, Donald Ramsfeld shkaktoi konfuzion në qarqet diplomatike kur sygjeroi se Shtetet e Bashkuara kishin një plan alternativ nëse nuk do të ketë një rezolutë të dytë dhe Britania vendos që të mos shkojë në luftë. Por këto vërejtje shkaktuan shok dhe surprizë në Dauning Strit, që është fokusuar në përpjekjet për të siguruar një rezolutë të dytë të Këshillit të Sigurimit.

Sekretari britanik Hun tha për BBC-në se zoti Ramsfeld i ishte referuar një 'mundësie teorike', siç u shpreh ai, që trupat britanike të mos përfshihen në luftë.

Por shtoi se zyrtari i lartë amerikan i ka të gjitha mundësitë të besojë Britania do të kontribuojë ushtarakisht.

 

 

Mbetet ende e paqartë nëse dhe kur do të votohet në Këshillin e Sigurimit për rezolutën e re për Irakun

 

Nju Jork, 12 mars 2003 - Nëse dhe kur do të votohet në Këshillin e Sigurimit të OKB-së për rezolutën e re për Irakun mbetet ende e paqartë. SHBA e refuzojnë zgjatjen e ultimatumit ndaj Irakut pas 17 marsit dhe duan të hedhin për votim deri në fund të javës projektrezolutën e dytë.

 

Në ditën e parë të debatit mbi veprimet e mëtejshme në konfliktin e Irakut shumica e folësve u shpreh kundër luftës. Nga 28 shtete vetëm dy, Kuvajti dhe Australia, e mbështetën kursin e ashpër të SHBA-ës. Ambasadori i Irakut në OKB Mohamed el Duri theksoi gatishmërinë e vendit të tij për çarmatim.

 

 

Shrëder paralajmëroi për konsekuencat e rënda të një lufte të mundshme në Irak

 

Hanover, 12 mars 2003 - Kancelari gjerman Gerhard Shrëder paralajmëroi për konsekuencat e rënda të një lufte të mundshme në Irak. Gjendja përreth Irakut ndikon mbi klimën edhe kështu të ngarkuar të ekonomisë botërore, tha Shrëder gjatë hapjes së panairit më të madh të kompjuterëve në Hanover.

Gjatë një vizite në Sllovaki edhe ministri i Jashtëm gjerman Joshka Fisher u shpreh sërish për vazhdimin e inspektimeve të armëve në Irak. Ai tha se nuk besonte se kishin shterur të gjitha mjetet joushtarake.

 

 

Ramsfeld e relativizoi shprehjen se SHBA ishin të gatshme për luftë kundër Irakut edhe pa Britaninë

 

Uashington, 12 mars 2003 - Ministri amerikan i Mbrojtjes Donald Ramsfeld e relativizoi shprehjen e tij se SHBA ishin të gatshme për luftë kundër Irakut edhe pa aleaten Britaninë e Madhe. Nuk ka dyshime për përfshirjen e rëndësishme të britanikëve, tha Ramsfeld pas kritikës nga ana e Londrës ndaj deklaratës së tij.

 

 

Fleisher: Shtetet e Bashkuara duan që votimi për rezolutën të bëhet gjatë kësaj jave

 

Uashington, 12 mars 2003 - Zëdhënësi i presidentit të Shteteve të Bashkuara, Xhorxh Bush ka thënë se ka pak hapësirë për ca diplomaci për një rezolutë të Këshillit të Sigurimit për çarmatosjen e Irakut.

 

Por zëdhënësi Ari Fleisher tha se Shtetet e Bashkuara duan që votimi për rezolutën të bëhet gjatë kësaj jave duke theksuar se Bush nuk do të mbështesë një zhagitje të afatit të fundit për çarmatosjen e Sadam Husein që do të zgjaste një muaj apo më gjatë.

"Presidenti beson se Iraku është kërcënimi drejtpërdrejtë ndaj Shteteve të Bashkuara si rezultat i posedimit nga ana e tij të armëve për shkatërrim në masë, dhe veçanërisht të armëve kimike apo biologjike", ka thënë zëdhënësi Ari Fleisher.

 

 

Hiro Ueki: Posedimi nga ana e Irakut të avionëve pa pilotë mund të jetë shkelje e rezolutave të KB-së

 

Bagdad, 12 mars 2003 - Zyrtari i Kombeve të Bashkuara, Hiro Ueki ka thënë se posedimi nga ana e Irakut të avionëve pa pilotë mund të jetë shkelje e rezolutave të Kombeve të Bashkuara. Zëdhënësi ka thënë në konferencë për shtypin në Bagdad se Kombet e Bashkuara nuk i dinë aftësitë e avionit pa pilot.

 

"Akoma ka një numër çështjesh të pasqaruara dhe Iraku duhet të paraqesë dokumente plotësuese, prova, sqarime për t,i adresuar dhe përgjigjur këtyre çështjeve," ka thënë zyrtari i OKB-së.

 

 

SHBA dhe Britania shqyrtojnë mundësinë e shtyrjes së afatit të 17 marsit për çarmatimin e Irakut

 

Uashington, 12 mars 2003 - Shtetet e Bashkuara dhe Britania po sugjerojnë se mund të jenë dakord t'i japin Irakut më shumë kohë të çarmatoset, mbas datës 17 mars, afat ky i propozuar në një projektrezolutë të Kombeve të Bashkura.

 

Projektdokumenti rrezikohet të mos miratohet për shkak të vetos së Rusisë dhe Francës, të cilat kundërshtojnë që Iraku të sulmohet ushtarakisht me që nuk pranon të zhdukë armët e shkatërrimit në masë.

Ndërkohë që më shumë se 250 mijë trupa amerikane dhe britanike ndodhen në rajonin e Gjirit Persik, administrata e Presidentit Bush thotë se këtë javë në Këshillin e Sigurimit do të votohet për një projekt-rezolutë, e cila do të jepte në fakt mbështetjen e Kombeve të Bashkuara për një luftë për çarmatosjen e Irakut.

 

 

Pentagoni provon bombën më të fuqishme konvencionale amerikane

 

Uashington, 12 mars 2003 - Pentagoni bëri një provë, me atë që thuhet se është bomba më e fuqishme konvencionale në arsenalin ushtarak amerikan. Bomba e njohur me inicialet MOAB peshon 9 tonë e gjysmë, rreth 3 tonë më shumë se bombat më të mëdha që u përdorën në luftën e Vietnamit në vitet ’60.

 

Prova u krye në poligonin e forcave ushtarake Eglin në shtetin e Floridës. Zhurma nga shpërthimi ishte aq e fuqishme sa zyrtarët i paralajmëruan që më parë banorët aty pranë.

 

 

Qiproja do të pranohet në BE

 

Nikozi, 12 mars 2003 - Qiproja do të pranohet në BE, përkundër dështimit të negociatave mes grekëve dhe turqve për bashkimin e vendit. Këtë ritheksoi një zëdhënës i BE në Bruksel, pas dështimit të përpjekjeve të sekretarit të përgjithëshëm të OKB Kofi Anan për afrimin e pozicioneve të palëve në konflikt.

 

Anan u ka lënë palëve një afat deri me 30 mars për marrjen e vendimit për ribashkimin e vendit. BE ka planifikuar nënshkrimin e marrveshjes për anëtarësimin e Qipros me 16 prill. Greqia dhe Turqia kanë paralajmëruar vazhdimin e angazhimit të tyre për gjetjen e një zgjidhje të pranueshme për të dyja palët.

 

 

Në një aksident ajror kanë humbur jetën 11 ushtarë amerikanë

 

Nju Jork, 12 mars 2003 – Një helikopter ushtarak amerikan i tipit "Black Hawk" ("Petriti i zi") me 13 ushtarë të bordit është rrëzuar gjatë një stërvitjeje rutinore në Fort Drum të shtetit të Nju Jorkut dhe në këtë aksident ajror kanë humbur jetën 11 syresh, njofton Rojter.

 

Zëdhënësi ushtarak, major Daniel Bor, ka thënë se dy ushtarë që e kanë mbijetuar aksidentin janë dërguar në Qendrën mjekësore samaritane afër Uatertaunit, kurse ekipet e shpëtimkërkimit po e vazhdojnë punën e tyre. Gjendja e të lënduarve nuk është zbuluar.

 

 

Një gjeneral indonezian është dënuar me pesë vjet burg për masakrat në Timor

 

Xhakartë, 12 mars 2003 – Një gjeneral indonezian është dënuar me pesë vjet burg, ngase ka dështuar të pengojë masakrat gjatë shkëputjes së Timorit nga Indonezia, më 1999, njofton BBCWorld.

 

Gjykata e Xhakartës e ka dënuar gjeneralin Noer Muis për shkak se nuk i ka ndaluar dy sulme të përgjakshme mbi civilët. Ai është oficeri indonezian me rangun më të lartë që është dënuar. Të pakten 1,000 njerëz qenë vrarë kur policia proindoneziane kishte sulmuar e tërbuar nga votimi i timorasve për shkëputje nga Indonezia.

Copyright©2000-2003 Trepca.net - Të gjitha të  drejtat e rezervuara.