Lajme

E marte, 11 mars 2003

Përmbajtja:

• Presidenti Rugova priti ministrin suedez për Bashkëpunim, Zhvillim dhe Politikë të Azilit, Jan 0.Karlson

• Bush beson se kur populli i Kosovës kërkon të falendërohet për ndaljen e spastrimit etnik nuk mund t'i falenderohet KS-së

• Shtajner dhe Karlson nënshkruan një marrëveshje për sigurinë, ekonominë dhe multietnicitetin në Kosovë

• Oda Ekonomike e Sllovenisë hapi sot zyrën e saj në Kosovë

• Forumi i Rinisë së LDK-së me një mbledhje solemne kremtoi 13-vjetorin e themelimit

• Pasnesër Kryeministri paraqet raportin në mbledhjen e radhës së Kuvendit të Kosovës

• Myftiu Rexhep Boja vizitoi Gjilanin

• Forumi i Rinisë së LDK-së sot me një mbledhje solemne shënon 13-vjetorin e themelimit

• KFOR-i ia dorëzon policisë së UNMIK-ut dy të arrestuarit lidhur me incidentin e 7 marsit

• Donatorët e huaj janë shprehur të gatshëm ta ndihmojnë Kosovën me projekte zhvillimore

• Një njësit i TMK-së udhëtoi për një trajnim dhjetëditorë në Afrikë të Jugut

• Procesi i bisedimeve Prishtinë-Beograd mbetet i bllokuar në pritje të ftesës zyrtare nga Qeveria e Serbisë

• Në veri të Mitrovicë është dhënë në përdorim trafostacioni për furnizim me energji elektrike

• Prokurorët ndërkombëtarë ngritën padi ndaj 35-vjeçarit Feriz Deliu nën akuzën për terrorizëm

• Transferimi i kompetencave përfundimisht çon drejt pavarësisë së Kosovës, thotë këshilltari i kryeministrit të Serbisë

• Shqipëri: Parlamenti arrin një marrëveshje për ngritjen e komisionit hetimor

• Denis Mekshej në takimin me presidentin Moisiu marrëdhëniet e Britanisë me Shqipërinë i vlerësoi si shumë të mira

• Miqunoviq thotë se kushti kryesor për dialog mes Beogradit dhe Prishtinës është kthimi i rreth 200 mijë serbëve në Kosovë

• Çoviq thotë se transferimi i pushtetit në duart e Qeverisë së Kosovës çon në krijimin e shtetit të pavarur

• Shrëder bisedon me Putinin për krizën irakiane

• Shefi i diplomacisë franceze viziton tre shtete afrikane

• Zbulohen bomba kimike në Irak

• Në Frankfurt dënohen katër persona për terrorizëm

• Dështojnë bisedimet për ribashkimin e Qipros

• Shirak deklaroi se Franca do të votojë kundër projektrezolutës amerikane-britanike në Kombet e Bashkuara

• Një palestinez i armatosur ka vrarë një ushtar izraelit dhe ka plagosur pesë të tjerë

• Ministri saudit: Tregu botëror nuk do të ndiejë mungesë të naftës në rast të luftës në Irak

• Një person i armatosur ka qëlluar me armë zjarri dy helikopterë qeveritarë dhe ka vrarë të pesë personat e bordit

• Bush ka biseduar me disa liderë në përpjekje për të siguruar mbështetjen ndaj rezolutës

• Strou: Është fjala për autoritetin e ardhshëm të Kombeve të Bashkuara

• Pesë diplomatë të Irakut janë dëbuar nga Bukureshti

• Britanikët sjellin propozime të reja në Nju Jork

• Paralajmërimi i Ananit

Presidenti Rugova priti ministrin suedez për Bashkëpunim, Zhvillim dhe Politikë të Azilit, Jan 0.Karlson

 

Prishtinë, 11 mars 2003 - Presidenti i Kosovës, Ibrahim Rugova, priti sot ministrin suedez për Bashkëpunim, Zhvillim dhe Politikë të Azilit, zotin Jan 0.Karlson, të cilin e shoqëronin zyrtarë të lartë të Ministrisë së Punëve të Jashtme të këtij vendi. Presidenti Rugova tha pas takimit se me ministrin suedez ka biseduar për gjendjen në Kosovë, për progresin që është bërë sidomos në planin e sigurisë e të stabilitetit dhe të zhvillimit.

 

Presidenti i Kosovës theksoi se ministrin Karlson e ka njohur me objektivat e institucioneve për zhvillimin ekonomik, për integrimin e grupeve etnike dhe për atë që ai instiston, sikur dhe institucionet, që Kosova të njihet sa më parë dhe të integrohet në Bashkimin Evropian, në NATO dhe të jetë në miqësi me SHBA-të.

   

Presidenti i Kosovës me këtë rast falënderoi ministrin Karlson për gjithë atë që ka bërë Suedia për Kosovën dhe tash që është mjaft prezente me kontigjentin e saj ushtarak, pastaj në planin administrativ dhe humanitar, duke shtuar se pret edhe në të ardhmen një bashkëpunim në planin e zhvillimit, në atë ekonomik e miqësor me Suedinë, theksoi në fund Presidenti Rugova. "U takova me presidentin Rugova që të rikonfirmoj angazhimin dhe këmbëngulësinë e Qeverise së Suedisë për të mbetur partner në zhvillimin e bashkëpunimit, për të pasur siguri dhe stabilitet në Kosovë”, tha zoti Karlson.

   

Kjo ishte vizita e parë e ministrit të Suedisë për Zhvillim, Migrim dhe Çështje të Azilit, Jan Karlson në Kosovë.

 

 

Bush beson se kur populli i Kosovës kërkon të falendërohet për ndaljen e spastrimit etnik nuk mund t'i falenderohet KS-së

 

Uashington, 11 mars 2003 - Votimi kundër rezolutës për intervenimin në Irak do të ishte më tepër se një dëshprim, tha zëdhënësi i Shtëpisë së Bardhë Ari Fleisher. Ai shtoi se presidenti Bush do të ishte shumë i dëshpruar nëse Rusia merr qëndrim kundër Rezolutës mbi Irakun.

 

Kjo do të ishte kthim prapa jo vetëm për çarmatosjen e Sadam Huseinit, por edhe për paqen dhe lirinë e popullit të Irakut, tha Fleisher për të shtuar: "Presidenti Bush beson se kur populli i Kosovës kërkon të falendërohet për ndaljen e spastrimit etnik, ata nuk mund t'i falenderohen KS të OKB-së", tha zëdhënësi Fleisher.

  

  

Shtajner dhe Karlson nënshkruan një marrëveshje për sigurinë, ekonominë dhe multietnicitetin në Kosovë

 

Prishtinë, 11 mars 2003 - Mihael Shtajne në emër të UNMIK-ut dhe Jan Karlson në emër të Qeverisë së Suedisë, nënshkruan sot në Prishtinë një marrëveshje bashkëpunimi në fushën e sigurisë, në atë ekonomike dhe në ndërtimin e multietnicitetit në Kosovë.

Ministri i Suedisë për Zhvillim, Migrim dhe Çështje të Azilit, Jan Karlson tha se është shumë e rëndësishme që Bashkimi Evropian dhe vendet e tjera mbështesin angazhimin e tyre në Kosovë në mënyrë që të përfundojë me sukses procesi i nisur.

"Ne nënshkruam një marrëveshje mes UNMIK-ut dhe Qeverisë së Suedisë në pikat kryesore të bashkëpunimit tonë. Kjo domethënë se do të vazhdojmë të jemi të angazhuar aktivisht në sigurinë e rajonit, zhvillimin ekonomik dhe në ndërtimin e vendbanimeve të minoriteteve për të vendosur shumëkombësinë në Kosovë", tha zoti Karlson, i cili mbështeti politikën e UNMIK-ut dhe të kryeadministratorit Shtajner për përmbushjen e standardeve para statusit dhe që të përmirësohen kushtet e jetës si dhe të krijohet një shoqëri funksionale demokratike e bazuar në ligjin e së drejtës.

 

 

Oda Ekonomike e Sllovenisë hapi sot zyrën e saj në Kosovë

 

Prishtinë, 11 mars 2003 - Sllovenia sot hapi në Prishtinë zyrën e saj të Odës Ekonomike, e cila do të punojë për shtimin e bashkëpunimit ekonomik midis dy vendeve. Në këtë mënyrë Kosova do të jetë në qendër të vëmendjes së biznesit slloven, u tha në një konferencë të rreth 60 afaristëve e zyrtarëve sllovenë me afaristë e qeveritarë të Kosovës, që u mbajt sot në Prishtinë.

Biznesmenët sllovenë kanë krijuar tregun e tyre në Kosovë, pasi një pjesë e madhe e mallrave të importuara në Kosovë vijnë nga Sllovenia. Afaristët dhe zyrtarët sllovenë kanë ardhur në Prishtinë për të parë mundësitë e investimeve në Kosovë si edhe për të marrë pjesë në procesin eventual të privatizimit. Në këtë kuadër, përfaqësuesit e Agjencisë Kosovare të Mirëbesimit dhe ata të Euro Info Qendrës i informuan afaristët sllovenë për mundësitë e investimeve në Kosovë.

Zyra e Odës Ekonomike të Sllovenisë në Kosovë është e katërta zyrë e këtij lloji që ka hapur Sllovenia në rajon.

 

 

Forumi i Rinisë së LDK-së me një mbledhje solemne kremtoi 13-vjetorin e themelimit

 

		Prishtinë, 11 mars 2003 - Me një mbledhje solemne, sot në Teatrin Kombëtar të Prishtinës, Forumi i Rinisë së LDK-së kremtoi 13-vjetorin e themelimit. Duke folur në këtë mbledhje Presidenti i Kosovës, Ibrahim Rugova, tha se në këtë përvjetor "e kujtojmë me krenari punën e këtij Forumi, njëra ndër organizatat e para rinore në Kosovë, që shërbeu si shembull për organizatat e tjera rinore të partive politike".   Ky Forum, tha Presidenti, ka qenë fuqia kryesore e LDK-së dhe ka punuar edhe në vitet e çlirimit, pavarësisë dhe demokracisë së Kosovës të cilën e gëzojmë sot. Forumi i Rinisë do të jetë mjaft aktiv brenda LDK-së në zgjedhjet që do të mbahen këtë vit, me një integrim e një pjesëmarrje më të madhe të të rinjve brenda LDK-së në shoqërinë dhe në shtetin e Kosovës, tha ai. "Objektivat tona kryesore dhe të të gjitha institucioneve janë zhvillimi ekonomik, privatizimi, që do të krijojë më shumë kushte për vende të reja të punës. Edhe pse në fillim do të jetë restriktiv në të ardhmen do të jetë më aktiv dhe duhet bërë çmos të krijojmë vende të punës për të rinjtë që të krijojnë familje, të vazhdojnë jetën në Kosovë", tha Presidenti Rugova.

 

Të rinjtë janë mjaft aktivë në këtë plan dhe gjenerata më e vjetër duhet t'ua hapë dyert asaj për pjesëmarrje dhe aktivitete në shoqërinë dhe në shtetin e Kosovës, pra në një Kosovë të pavarur dhe demokratike e paqësore, dhe të integruar në Bashkimin Evropian, në NATO dhe në miqësi të përhershme me SHBA-të, tha mes tjerash në fjalën e tij Presidenti Rugova, duke premtuar përkrahjen e tij për gjithë të rinjtë e Kosovës.

Ndërkaq, kryetari i Forumit të Rinisë së LDK-së Lulzim Zeneli tha në fjalën e tij se sot e 13 vjet më parë, në rrethanë krejt të ndryshme, u themelua Forumi i Rinisë së LDK-së, si organizata e parë rinore politike në këto hapësira, që si synim të vetin kishte organizimin e rinisë së Kosovës në të gjitha nivelet.

"Dhe tani, nga ky tubim themi me mburrje se në këto vite të veprimtarisë së vet aktive, Forumi i Rinisë ia ka arritur qëllimit të tij. Me një fjalë, synimet tona ne i bëmë realitet. Rinia jonë sot është më e avancuar, më aktive, është pjesë e pandashme e të gjitha proceseve që ndodhin rreth nesh dhe për ne", tha Zeneli.

Forumi i Rinisë së LDK-së përballoi me sukses të gjitah sfidat e mundshme, tha Lulzim Zeneli, dhe shtoi se të rinjtë e LDK-së për një periudhë fare të shkurtër ishin bartësit e organizimit të fushatave zgjedhore të LDK-së dhe ishin promotorë e inicues dhe bartës në të gjitha këto procese.

 

"Ne kemi punuar, punojmë dhe do të vazhdojmë edhe në të ardhmen që të rinjtë e LDK-së të kenë pozicionin edhe me të avancuar brenda vetë LDK-së dhe në të gjitha institucionet qeverisëse të vendit, tha Zeeneli, dhe theksoi se të rinjtë kanë përkrahjen e pakursyer e në vazhdimësi të Presidentit Rugova për avancimin e brezit të ri".

Lulzim Zeneli në vazhdim foli për zgjedhjet e radhës që do t'i mbajë Forumi i Rinisë së LDK-së, në të cilat, siç tha, do të fuqizohet edhe më tej në të gjitha sferat e organizimit dhe të veprimit.

 

 

Pasnesër Kryeministri paraqet raportin në mbledhjen e radhës së Kuvendit të Kosovës

 

Prishtinë, 11 mars 2003 - Seanca e ardhshme e Kuvednit të Kosovës që do të mbahet të enjten, do të zhvillohet me të njëjtin rend dite me të cilin ishte paraparë të mbahej edhe javën e kaluar. Pritet që kësaj radhe të paraqitet raporti i kryeministrit Bajram Rexhepi për punën njëvjeçare të Qeverisë së Kosovës.

Anëtari i kryesisë së Parlamentit, Hydajet Hyseni tha se kryeministri Rexhepi sipas të gjitha gjasave të enjten do të raportojë para deputetëve. Ndërkohë, sipas tij, ende nuk është e sigurtë nëse në mbledhjen e ardhshme të Kuvendit të Kosovës do të debatohet rreth bisedimeve të paralajmëruara midis Prishtinës dhe Beogradit për çështje formale.

 

 

Myftiu Rexhep Boja vizitoi Gjilanin

 

Gjilan, 11 mars 2003 - Kryetari i Bashkësisë Islame të Kosovës, myftiu Rexhep Boja me bashkëpunëtorë po qëndron sot në Gjilan ku bisedoi edhe me kryetarin e komunës, Lutfi Haziri rreth çështjeve të përbashkëta. Rexhep Boja i ka vlerësuar të mira raportet e bashkësisë islame me komunat dhe institucionet tjera të Kosovës.

Bashkësia Islame aktualisht po ballafaqohet me mungesën e faltoreve, meqë një numër të tyre i shkatërroi lufta, ndërsa në komunën e Gjilanit, xhamitë kanë pësuar dëmtime edhe nga tërmeti i vitit të kaluar, tha z. Boja, duke kërkuar nga z. Haziri ndihmën e mundshme të komunës në pjesën e saj të punës rreth projektit për rindërtimin e xhamisë së madhe në qytet.

"Ne mund të presim për një kohë, por kam frikë se koha nuk na pret neve për ta rindërtuar këtë xhami, sepse donatorët që sot jenë këtu, nesër mund të mos jenë", theksoi Rexhep Boja.

Lutfi Haziri tha se ekspertët e Fakultetit Teknik në Prishtinë janë duke e punuar projektin për ridizajnimin e qendrës së qytetit dhe vendi i xhamisë së madhe do të jetë aty ku ndodhet tani, ndërsa projekti i bashkësisë islame do t`i nënshtrohet konkurrencës me projektet e tjera në tenderin që do të shpallet. Trualli është i garantuar, xhamia do të ndërtohet, por sipas një infrastrukture të pranueshme për të gjithë, pa lejuar në emër të saj veprimtari biznesi.

 

 

Forumi i Rinisë së LDK-së sot me një mbledhje solemne shënon 13-vjetorin e themelimit

 

Prishtinë, 11 mars 2003 - Me rastin e 13-vjetorit të themelimit të Forumit të Rinisë të LDK-së, Kryesia e kësaj organizate rinore sot organizon një mbledhje solemne.

Mbledhja mbahet në Teatrin Kombëtar në Prishtinë në orën 12:00, ku do të marrë pjesë edhe Presidenti i Kosovës, Ibrahim Rugova. Gjithashtu janë ftuar edhe përfaqësuesit e institucioneve vendore dhe ndërkombëtare.

 

 

KFOR-i ia dorëzon policisë së UNMIK-ut dy të arrestuarit lidhur me incidentin e 7 marsit

 

Gjilan, 11 mars 2003 - Dy të baraburgosurit nga KFOR-i, Fatmir Lakna dhe Asllan Bajrami, i janë dorëzuar policisë së UNMIK-ut. Këtë e ka bërë të ditur Nik Bush, kapiten në kampin ushtarak amerikan në Bondstill.

 

Fatmir Lakna ishte paraburgosur në fshatin Kranidell, të komunës së Dardanës për armëmbajtje pa leje. Ndërkaq i arrestuari tjetër Asllan Bajrami ishte ndaluar në një pikë kontrolli në Miresh (ish-Dobërçani) të Gjilanit dhe ishte paraburgosur nën dyshimin e përfshirjes së mundshme në incidentin që ndodhi më 7 mars në gjatë vijës kufitare mes Kosovës e Serbisë.

 

 

Donatorët e huaj janë shprehur të gatshëm ta ndihmojnë Kosovën me projekte zhvillimore

 

Prishtinë, 11 mars 2003 - Në Prishtinë nën organizimin e Ministrisë së Ambientit dhe Planifikimit Hapësinor po mbahet një konferencë me donatorët e huaj. Në ditën e parë përfaqësuesit e disa organizatave qeveritare dhe joqeveritare, treguan ku dhe në çfarë mënyre kanë investuar tash tre vjet në Kosovë.

 

Ata thanë se kanë ndihmuar shumë edhe sektorët e bujqësisë, që ishin të përfshirë në kuadër të programit të tyre për rindërtim. Kështu HABITAT-i deri tash i ka realizuar tri programe: i pari ka pasur të bëjë me regjistrimin e pronave, të cilat u janë marrë shqiptarëve me ligjet diskriminuese serbe, programi i dytë është lidhur me mbledhjen e shënimeve mbi patundshmëritë, ndërkaq programi i tretë ka pasur të bëjë me asistencën nëpër komuna.

Donatorët e huaj janë shprehur të gatshëm ta ndihmojnë Kosovën me projekte zhvillimore edhe në të ardhmen. Ata nënvizuan se që nga përfundimi i luftës edhe 30 mijë familje nuk e kanë të zgjedhur problemin e strehimit. Në Kosovë gjatë konfliktit ishinë rrënuar tërësisht rreth 120 mijë shtëpi.
Konferenca vazhdon punimet edhe gjatë ditës së sotme.

 

 

Një njësit i TMK-së udhëtoi për një trajnim dhjetëditorë në Afrikë të Jugut

 

Prishtinë, 11 mars 2003 - Një njësit i TMK-së prej 27 anëtarësh të Zonës së Tretë të TMK-së udhëtoi për një trajnim dhjetditorë në Afrikë të Jugut. Sipas pjesëmarrësve të TMK-së zhvillimi i operacioneve për reagime të shpejta në terrenet e Afrikës së Jugut do t'u mundësojë atyre përvetësimin e përvojave të reja për detyrat që i presin Trupat Mbrojtëse të Kosovës në të ardhmen.

 

 

Procesi i bisedimeve Prishtinë-Beograd mbetet i bllokuar në pritje të ftesës zyrtare nga Qeveria e Serbisë

 

Prishtinë, 11 mars 2003 - Zyrtarë të UNMIK-ut thonë se procesi lidhur me fillimin e bisedimeve për çështje teknike mes Prishtinës dhe Beogradit mbetet i bllokuar në pritje të ftesës zyrtare nga Qeveria e Serbisë. Zëdhënësi i UNMIK-ut Xhorxhi Kakuk rikujtoi se letra për këto bisedime i është dërguar shefit të Qeverisë së Serbisë një javë më parë dhe deri më tash ata nuk kanë kthyer përgjigje zyrtare rreth ofertës për dialog. "Ne aktulisht po presim për një përgjigjje të tillë që më pas të krijojmë delegacionin e Kosovës", tha zëdhënësi Kakuk. Ai shtoi se zyrtarisht as Qeveria e Kosovës nuk e ka konfirmuar pjesëmarrjen në këto bisedime. Madje as ekipi negociator nuk është caktuar ende.

 

 

Në veri të Mitrovicë është dhënë në përdorim trafostacioni për furnizim me energji elektrike

 

Mitrovicë, 11 mars 2003 - Në pjesën veriore të Mitrovicë është dhënë në përdorim trafostacioni për furnizimin e banorëve me energji elektrike, i cili është financuar nga Qeveria Japoneze dhe është ndihmuar nga Programi për Zhvillim i OKB-së.

 

Ambasadori i Japopnisë në Beograd Joshiki Mine dhe shefi i UNMIK-ut Mihael Shtajner në përurimin e këtij trafostacioni theksuan se me lëshimin në punë të këtij trafostacioni do të përmirësohet furnizimi me energji elektrike në këtë rajon.

Ambasadori japonez tha se çdo herë që vjen në Koosvë sheh përmirësime dhe shtoi se është shumë i kënaqur me përfundimin e këtij projekti.

Sipas zyrtarëve të UNDP-së dy trafostacione të tilla një në Mitrovicën jugore dhe një tjetër në Skënderaj do të hapen së shpejti. Ndërkohë që në veri të Mitrovicës është inaugurua ky trafostacion serbët në këtë pjesë të qyetetit pohojnë se nuk e paguajnë energjinë elektrike.

 

 

Prokurorët ndërkombëtarë ngritën padi ndaj 35-vjeçarit Feriz Deliu nën akuzën për terrorizëm

 

Prishtinë, 11 mars 2003 - Prokurorët ndërkombëtarë ngritën padi ndaj një shqiptari të Kosovës nën akuzën për terrorizëm dhe armëmbajtje pa leje. Zëdhënësi i UNNIK-ut tha dje se 35-vjeçari Feriz Deliu përballet me akuzën për planifikime dhe përgatitje e sulmeve terroriste.

 

Paqeruajtësit e NATO-s arrestuan z. Deliu në pjesën veriore të Kosovës në muajin janar të këtij viti. Ai tha se z. Deliu do të dalë në gjyq në muajin tjetër së bashku me dy shqiptarë të tjerë të Kosovës të akuzuar për terrorizëm dhe rekrutimin e anëtarëve të grupit terrorist.

 

 

Transferimi i kompetencave përfundimisht çon drejt pavarësisë së Kosovës, thotë këshilltari i kryeministrit të Serbisë

 

Beograd, 11 mars 2003 - Këshilltari i kryeministrit të Serbisë, Branko Radujko, ka konfirmuar se mund të bëhet shtyrja e bisedimeve ndërmjet Beogradit e Prishtinës, meqenëse shefi i UNMIK-ut Mihael Shtajner ka publikuar planin për transferimin e kompetencave tek institucionet e përkohshme vetëqeverisëse të Kosovës.

 

"Tani çështja është shumë hipokrite. Në një anë jemi ftuar për bisedime për temat, e nga ana tjetër miratohet plani për transferimin e kompetencave, i cili është katastrofik për Serbinë dhe bashkësinë serbe në Kosovë", thotë Radujko.

 

"Transferimi i kompetencave përfundimisht çon drejt pavarësisë së Kosovës, e kjo për shtetin e Serbisë është absolutisht e papranueshme dhe nëse ndodh, ajo do të insistojë në reagimin e Këshillit të Sigurimit", thotë këshilltari i kryeministrit të Serbisë.

 

 

Shqipëri: Parlamenti arrin një marrëveshje për ngritjen e komisionit hetimor

 

Tiranë, 11 mars 2003 - Socialistët dhe opozita gjetën mbrëmë një marrëveshje për ngritjen e komisionit hetimor. Parlamenti votoi në favor të hetimit ndaj përdorimit të fondeve në Ministrinë e Kulturës, në Bashkinë e Tiranës dhe zbatimin e ligjshmërisë në zhvillimin urbanistik për kryeqytetin nga viti 1992 deri në vitin 2002.

 

Komisioni do të ketë 11 anëtarë dhe kohëzgjatja e tij do të jetë tre muaj. Vendimi u mor pas disa seancash përplasjesh të ashpra, veçanërisht mes kryetarit demokrat Sali Berisha dhe kryeministrit Fato Nano.

 

 

Denis Mekshej në takimin me presidentin Moisiu marrëdhëniet e Britanisë me Shqipërinë i vlerësoi si shumë të mira

 

Londër, 11 mars 2003 - Presidenti i Shqipërisë, Alfred Moisiu i cili ndodhet në një vizitë triditëshe në Britani të Madhe pati një takim me ministrin e Ministrisë së Jashtme britanike, Denis Mekshejn. Njoftohet se në këtë takim janë diskutur tri çështje kryesore: ajo e Irakut, çështja e investimeve ekonomike dhe nevoja për zhvillimin e turizmit, si dhe e treta dëshira e Shqipërisë, të cilën, sipas z. Mekshejn, Britania e Madhe e mbështet për anëtarësimin në BE dhe në NATO.

 

Zëvendësministri i Jashtëm britanik i deklaroi BBC-së se Londra e mirëpret mbështetjen shumë të qartë të qeverisë shqiptare për çështjen e Irakut për një rezolutë të qartë të OPKB-së dhe që Sadam Huseini të zbatojë këtë rezolutë.

 

Z. Mekshej i cilësoi marrëdhëniet e Shqipërisë me Britaninë e Madhe si shumë të mira. Ai shtoi se hapja e negociatave për marrëveshjen e stabilizim - asociimit mes Bashkimit Evropian dhe Shqipërisë është një hap i mirë i parë.

Mekshej i bëri thirrje Shqipërisë që të vazhdojë me ritmin e reformave në vend. Ai tha gjithashtu se Britania e mirëpret përkushtimin e Shqipërisë për të luftuar krimin e organizuar dhe pret me padurim rezultate konkrete.

Po dje presidenti Moisiu u takua edhe me sekretarin britanik të Mbrojtjes Xhef Hun. Në këtë takim u diskutuan çështjet dypalëshe dhe ato të mbrojtjes.

Presidenti Alfred Moisiu po qëndron në Londër me ftesë të mbretëreshës Elizabeta e Dytë, e cila të mërkurën ka rezervuar një pritje për të.

 

 

Miqunoviq thotë se kushti kryesor për dialog mes Beogradit dhe Prishtinës është kthimi i rreth 200 mijë serbëve në Kosovë

 

Beograd, 11 mars 2003 - Kryetari i Parlamentit të Serbisë dhe Malit të Zi Dragolub Miqunoviq deklaroi se kushti kryesor për dialog mes Beogradit dhe Prishtinës është kthimi i rreth 200 mijë serbëve të zhvendosur në Serbi.

 

Pas takimit në Beograd me shefin e Misionit amerikan të OSBE-së Shtefan Minikes Miqunoviq tha se dialogu ka për synim parandalimin e çfarëdo lloj konflikti dhe vendosjen e bashkëpunimit edhe më të ngushtë me UNMIK-un, KFOR-in dhe OSBE-në.

 

 

Çoviq thotë se transferimi i pushtetit në duart e Qeverisë së Kosovës çon në krijimin e shtetit të pavarur

 

Beograd, 11 mars 2003 - Zëvendëskryeministri serb Nebojsha Çoviq deklaroi se transferimi i pushtetit në duart e Qeverisë së Kosovës kinse është një provokim shumë i rrezikshëm që për pasojë mund të ketë destabilizimin e rajonit.

 

Sipas tij mënyra e transferimit të piushtetit çon në konkluzion se po krijohet shteti i pavarur i Kosovës dhe një sistem krejt tjetër nga ai i Serbisë dhe Malit të Zi, theksoi Çoviq, duke shtuar se ky është një provokim i hapur kryeadministratorit Mihael Shtajner, i cili sipas Çoviqit do të largohet nga Kosova në kohën e pushimeve verore.

 

 

Shrëder bisedon me Putinin për krizën irakiane

 

Berlin, 11 mars 2003 - Kancelari federal gjerman Gerhard Shrëder u konsultua me presidentin rus Vladimir Putin për veprimet e mëtejshme në krizën e Irakut. Zëdhënësi i qeverisë Bela Anda njoftoi se në një bisedë telefonike të dy burrëshetasit kanë rënë dakord që të vazhdohet edhe më tej me inspektimet e armëve në Irak.

Rusia tashmë ka thënë se do të votojë kundër në Këshillin e igurimit për një ndërhyrje ushtarake kudnër Irakut.

 

 

Shefi i diplomacisë franceze viziton tre shtete afrikane

 

Luanda, 11 mars 2003 - Për të diskutuar rreth Rezolutës së re për Irakun në Këshillin e Sigurimit, shefi i diplomacisë franceze Dominik dë Vilpen ka mbërritur në Angolë. Në agjendën e vizitës së tij është paraparë edhe një takim me presidentin Hoze Eduardo dos Santos.

 

Përfundimisht Dë Vilpen do të udhëtojë edhe për në Kamerun dhe Guine, dy shtete tjera afrikane anëtare të Këshillit të Sigurimit. Të tri këto shtete nuk kanë marrë ende qëndrim të qartë sa i përket një rezolute tjetër për Irakun dhe po vizitohen pandërprerë nga kundërshtarët dhe ithtarët e një Rezolute të dytë.

 

 

Zbulohen bomba kimike në Irak

 

Uashington, 11 mars 2003 - Sipas një njoftimi të shtypit inspektorët e Kombeve të Bashkuara për armatimin kanë zbuluar në Irak raketa dhe bomba të dedikuara për përhapjen e mjeteve luftarake kimike dhe biologjike.

 

Duke u thirrur në burime qeveritare në Uashington gazeta "Nju Jork tajms" shkruan se udhëheqja irakiane fillimisht ka pohuar se bëhet fjalë për bomba konvencionale. Megjithatë më vonë ajo ka pranuar se është fjala për përdorimin e tyre si armë kimike.

 

 

Në Frankfurt dënohen katër persona për terrorizëm

 

Frankfurt, 11 mars 2003 - Në procesin gjyqësor të Frankfurtit, i njohur ndryshe edhe si procesi kundër terrorizmit, janë dënuar katër të akuzuarit me prejardhje nga Algjeria. Gjykata e lartë e landit në Frankfurt dënoi ata prej 10 deri në 12 vjet heqje lirie nën akuzën se në dhjetor të vitit 2000 kanë përgaditur një sulm në Strasburg.

 

Megjithatë nuk është arritur të dëshmohet një lidhje e tyre me rrjetin terrorist të El Kaidës. I akuzuari Aerobi Beandali është dënuar me dhjetë vjet burgim, Salim Boukhari me 12, Fuad Sabour me 11 vjet e gjashtë muaj dhe Lamine Maroni, i cili ka heshtur gjatë gjithë procesit është dënuar me 11 vjet heqje lirie.

 

 

Dështojnë bisedimet për ribashkimin e Qipros

 

Hagë, 11 mars 2003 - Presidenti greko-qipriot Tasos Papadopulos ka sqaruar se kanë dështuar bisedimet me qipriotët turk për ribashkimin e ishullit të ndarë të Qipros. Kjo u deklarua nga ai në mëngjesin e ditës së sotme pas bisedimeve maratonike që u zhvilluan në Hagë me ndërmjetësimin e Kombeve të Bashkuara.

 

 

Shirak deklaroi se Franca do të votojë kundër projektrezolutës amerikane-britanike në Kombet e Bashkuara

 

Paris, 11 mars 2003 - Presidenti francez Zhak Shirak deklaroi se Franca gjithsesi do të votojë kundër projektrezolutës amerikane-britanike në Kombet e Bashkuara, e cila i hap dyert luftës kundër Irakut.

"Qëndrimi im është që Franca, pa marrë parasysh rrethanat, do të votojë kundër, për shkak se është e bindur se në këtë moment nuk ka nevojë që me luftë të realizohet qëllimi që e kemi vënë - e ky është çarmatimi i Irakut", tha Shirak.

Në një intervistë për televizionin francez, presidenti Shirak mbrëmë shprehu bindjen se këtë do ta bëjë edhe Rusia e Kina.

Moska tashmë një bindje të tillë të Shirakut e ka konfirmuar.

 

 

Një palestinez i armatosur ka vrarë një ushtar izraelit dhe ka plagosur pesë të tjerë

 

Hebron, 11 mars 2003 – Gjatë një shkëmbimi të ashpër zjarri me trupat izraelite, një palestinez i armatosur ka vrarë një ushtar izraelit dhe ka plagosur pesë të tjerë gjatë një sulmi të armatosur në Bregun Perendimor, njofton Rojter.

 

Tensionet janë ngritur lart në zonën e Hebronit qëkur palestinezët e maskuar si hebraikë religjiozë patën infiltruar në koloninë Kirjat Arba, ku patën vrarë një burrë dhe gruan e tij kurse pastaj edhe ata qenë vrarë nga ushtarët izraelitë.

 

 

Ministri saudit: Tregu botëror nuk do të ndiejë mungesë të naftës në rast të luftës në Irak

 

Vjenë, 11 mars 2003 - Ministri saudit i naftës Ali al-Naimi ka deklaruar sot (të martën) se vendi i tij ka kapacietet prodhimi rezervë dhe ka premtuar se tregu botëror nuk do të ndiejë mungesë të naftës në rast të luftës në Irak, njofton Rojter.

 

Por Naimi, duke iu referuar kuotave nëse shpërthen lufta, ka thënë në takimin e sotëm (të së martës) se nuk sheh arsye të pezullohen kufizimet e prodhimit të OPEC-ut, ngase, siç ka thënë ai, pa kuota mund të krijohet "kaos".

 

 

Një person i armatosur ka qëlluar me armë zjarri dy helikopterë qeveritarë dhe ka vrarë të pesë personat e bordit

 

Meksiko, 11 mars 2003 – Derisa po sperkatnin të mbjellat ilegale të opiumit në shtetin Guerrero, një person i armatosur ka qëlluar me armë zjarri dy helikopterë qeveritarë dhe kështu ka vrarë të pesë personat e bordit. Prokurori vendor për krime të drogës ka thënë se po zhvillohen hetimet në vendngjarje.

 

 

Bush ka biseduar me disa liderë në përpjekje për të siguruar mbështetjen ndaj rezolutës

 

Uashington, 11 mars 2003 - Presidenti i Shteteve të Bashkuara Xhorxh Bush ka biseduar me telefon me disa liderë të huaj, në përpjekje për të siguruar mbështetjen ndaj rezolutës, e cila do ta sanksiononte luftën kundër Irakut.

Ndërkohë sekretari i Shtetit Kolin Pauell bisedoi në Uashington me Fransoa Fall, ministrin e jashtëm të Guinesë, njërit nga tre vendet afrikane anëtare të Këshillit të Sigurimit. "Mendoj se të gjithë jemi të përkushtuar për gjetjen e zgjidhjes paqësore, por zgjidhje që do ta përfshinte çarmatimin e Irakut nga armët e shkatërrimit në masë", tha Pauell.

 

 

Strou: Është fjala për autoritetin e ardhshëm të Kombeve të Bashkuara

 

Londër, 11 mars 2003 - Nuk bëhet fjalë vetëm për ardhmërinë e Lindjes së Mesme, por për autoritetin e ardhshëm të Kombeve të Bashkuara, tha sekretari i jashtëm Xhekk Strou në fjalimin në parlamentin britanik kushtuar zhvillimeve rreth Irakut.

"Plotësisht besoj që inspektorët punojnë dhe se u duhet më shumë kohë. Por Saddam Husseini është mjeshtër për të fituar kohë", tha Straë, duke shtuar se zgjidhja e vetme paqësore do të ishte që lideri i Irakut të largohet nga vendi.

 

 

Pesë diplomatë të Irakut janë dëbuar nga Bukureshti

 

Bukuresht, 11 mars 2003 - Pesë diplomatë të Irakut janë dëbuar nga Bukureshti për shkak "aktiviteteve të papajtueshme me statusin e tyre", tha Ministria e Jashtme e Rumanisë. Rumania është një nga 10 vendet e Evropës Lindore që e mbështetën qëndrimin e Shteteve të Bashkuara ndaj Irakut. Në qytetin Konstanca në brigjet e Detit të Zi, aktualisht janë përqëndruar rreth 4 mijë trupa amerikane.

 

 

Britanikët sjellin propozime të reja në Nju Jork

 

Nju Jork, 11 mars 2003 - Diplomatët britanikë në Kombet e Bashkuara kanë bërë propozime të reja, në përpjekje për të fituar mbështetje për rezolutën që i kërkon Irakut të çarmatoset deri të hënën e ardhshme. Britania e Madhe po sygjeron një sërë provash që Bagdadi duhet të japë deri në kohën e caktuar si afat i fundit që të provojë se është duke bashkëpunuar.

 

 

Paralajmërimi i Ananit

 

Hagë, 11 mars 2003 - Shtetet e Bashkuara e kanë refuzuar paralajmërimin e Sekretarit të Përgjithshëm, Kofi Anan se një luftë pa mbështetjen e OKB-së do të thotë thyerje të rregullores së organizmit ndërkombëtar. Duke folur në Hagë, ku po zhvilloheshin bisedime për bashkimin e Qipros, zoti Anan tha se legjitimiteti i luftës pa mbështetjen e Këshillit të Sigurimit do të ishte i dëmshëm.

Copyright©2000-2003 Trepca.net - Të gjitha të  drejtat e rezervuara.