Lajme

E hëne, 10 mars 2003

Përmbajtja:

• Presidenti Rugova priti sot një delegacion të Senatit italian

• Anna Lindh dhe Jan O Karlsson vizitojnë Ballkanin Perëndimor dhe Kosovën

• Një delegacion i Paktit të Stabilitetit vizitoi sot Gjilanin

• Forumi i Rinisë së LDK-së nesër shënon 13-vjetorin e themelimit

• OSBE-së dhe UNHCR-i vlerësojnë përmirësimin e kushteve të minoriteteve që janë bërë në Kosovë

• Prishtinë: Vriten dy policë ndërkombëtarë të njësisë speciale dhe disa të tjerë plagosen

• R.Tahiri: Koncepti i Gjingjiqit për ndarjen e Kosovës është ide nacionaliste serbe

• Një delegacion i Komisionit Evropian vjen në Prishtinë për të krijuar një mekanizëm të ri Kosovë – BE

• U gjend dhe u varros trupi i Sherif Kuçicës nga fshati Marinë i Skënderajt

• S. Hasellok thotë se ende nuk dihet data se kur do të fillojnë bisedimet ndërmjet Prishtinës dhe Beogradit

• Në fshatin Breznicë të Bujanocit u zhvillua ceremonia mortore e varrimit të Besim Xhemajlit dhe Shaban Bajramit

• Buçkovski thotë se situata e sigurisë në Maqedoni është e brishtë

• Policia shqiptare ktheu prapa përfaqësuesin politik të Armatës Kombëtare Shqiptare

• Qeveria shqiptare dërgon një kompani komando të përgjedhur të ushtrisë shqiptare në Irak

• Kryetari i BDSH-së akuzon qeveritarët serbë për moszgjidhjen e problemeve të shumta në Luginën e Preshevës

• Në një vizitë triditore në Londër ndodhet presidenti i Shqipërisë Alfred Moisiu

• Senati i Universitetit të Tetovës ka shkarkuar nga posti rektorin Ramiz Abdyli

• Madridi thekson Kosovën si presedan për sulmin eventual kundër Irakut

• Parlamenti palestinez ka miratuar emërimin e kryeministrit të parë

• Shrëder mbështet propozimin francez për votim personal në Këshillin e Sigurimit

• El Baradei: Koreja e Veriut një kërcënim më i madh për paqen në botë

• Iraku ka marrë nga kryeinspektori Bliks një katalog me pyetje për programet e tij të armëve

• Ministrja britanike Kler Short paralajmëroi se do të japë dorëheqje

• Forcat e armatosura amerikane kanë filluar ngritjen e një pikëmbështetjeje të re në Turqi

• Në referendumin në Maltë shumica e elektoratit votoi për anëtarësimin në BE

• Koreja e Veriut kreu përsëri prova me një raketë me rreze të shkurtër veprimi

• SHBA-të hedhin poshtë nismën e Francës

• Ka të dhëna se forcat kryengitëse në Bregun e Fildishtë kanë vrarë mbi 200 civilë muslimanë

• Pauell: Ekzistojnë gjasa të mëdha që SHBA të marrin vota të mjaftueshme në KS për rezolutën

• El Baradei: Inspektorëve u nevojiten edhe dy muaj të përcaktojnë nëse Iraku ka program sekret për armë

• SHBA do të mbajnë bisedime direkte me Korenë Veriore lidhur me angazhimet bërthamore

• Bush: Ndaj Irakut do të përdoret forca nëse ai nuk çarmatoset plotësisht dhe pa kushte

• SHBA vazhdojnë përqëndrimin e trupave në Turqi

Presidenti Rugova priti sot një delegacion të Senatit italian

 

Prishtinë, 10 mars 2003 - Presidenti i Kosovës Ibrahim Rugova priti sot një delegacion të Senatit italian të kryesuar nga Enriko Pianeta, kryetar i Komisionit për të drejtat e njeriut. Në këtë takim u bisedua për shumë çështje. Presidenti Rugova falenderoi Italinë për ndihmat që ka dhënë për Kosovën para luftës, gjatë dhe pas luftës si dhe për prezencën ushtarake dhe administrative dhe humanitare në Kosovë.

 

Poashtu zoti Rugova foli për progresin e arritur në Kosovë në planin e sigurisë dhe për objektivat e qeverisë për zhvillimin ekonomik, privatizim dhe çështjet e tjera, si dhe për integrimin e grupeve etnike në shoqërinë kosovare.

 

Presidenti tha se ai insiston që të ketë një Kosovë të pavarur, të integruar në BE, NATO dhe në miqësi të përhershme me SHBA-të. Kosova me Italinë, tha Presidenti Rugova, do të ketë një miqësi të përhershme dhe një kooperim shumë më të afërt, më të fortë ekonomik, kulturor, por edhe në të gjitha fushat e tjera, duke insistuar që sa më shpejtë të ndërtohet rruga Prishtinë-Durrës që Kosovën do ta lidhte më shpejt me Italinë.

Ndërka kryesuesi i delegaconit të Senatit italaian, zoti Enriko Pianeta tha se është shumë i kënaqur me gjithë atë që ka bërë presidenti Rugova dhe me arritjet që janë bërë deri tash në Kosovë.

"Jemi këtu për t'u njohur me realitetin në Kosovë dhe me problemet e tjera. Kemi biseduar edhe për transferimin e kompetencave nga ndërkombëtarët te vendorët që është mjaft me rëndësi dhe që do ta çonte më shpejt Kosovën përpara", tha senatori italian.

Ai shprehu besimin se kapaciteti dhe gjithë fuqia e kosovarëve është për të ecur përpara.

Zoti Pianeta tha se gjatë bisedës me presidentin Rugova kishte vërejtur rëndësinë që institucionet e Kosovës u kanë dhënë minoriteteve, duke shtuar se ai beson që në këtë drejtim do të ketë përparime edhe më të mëdha.

"Gjithashtu kemi biseduar edhe për zhvillimin ekonomik dhe besoj se me kapacitetin që posedojnë kosovarët do të kenë një zhvillim më të shpejtë ekonomik", tha ai. "Rrugën që ka zgjedhur z. Rugova për integrimin e Kosovës në BE dhe për minoritetet është shumë e drejtë dhe besoj se kjo rrugë do ta shpiejë Kosovën shumë shpejt në këtë drejtim", u shpreh kryesuesi i delegacionit të Senatit italian.

 

 

Anna Lindh dhe Jan O Karlsson vizitojnë Ballkanin Perëndimor dhe Kosovën

 

Stokholm, 10 mars 2003 - Ministrja suedeze e Punëve të Jashtme, Anna Lindh dhe ministri i Donacioneve dhe i Çështjeve të Migrimit Jan O Karlsson vizitojnë Ballkanin Perëndimor. Gjatë vizitës dyditëshe Anna Lindh do të vizitojë Kroacinë dhe Maqedoninë, ndërkaq Jan O Karlsson Bosnjën e Hercegovinën dhe Kosovën, si dhe Serbinë dhe Malin e Zi.

Përveç temave në dritën e zgjerimit të Bashkimit Evropian, vend të posaçëm do të zënë çështjet e migrimit, të bashkëpunimit rajonal në fushë të ekonomisë dhe të të drejtave të njeriut si dhe bashkëpunimi me Tribunalin e Hagës, por edhe disa çështje të ndërsjella si në sferën e tregtisë dhe të donacioneve.

Siç dihet në Suedi edhe më tutje arrin një numër i madh azilkërkuesish nga Bosnja e Hercegovina dhe Kosova prandaj me qeveritë përkatëse të këtyre vendeve do të bisedohet edhe për çështje të azilit dhe të riatdhesimit.

Sipas axhendës, ministri Jan O Karlsson do të mbajë një konferencë shtypi më 11 mars, bën të ditur Ministria e Punëve të Jashtme e Suedisë.

 

 

Një delegacion i Paktit të Stabilitetit vizitoi sot Gjilanin

 

Gjilan, 10 mars 2003 - Një delegacion i Paktit të Stabilitetit - Verena Knaus, Frank Shvarc dhe Kristof Vesling - kanë qëndruar sot në Gjilan dhe në një takim dy orësh me udhëheqjen komunale, janë njoftuar për progresin e arritur si dhe synimet zhvillimore për të ardhmen.

Kryetari i komunës, Lutfi Haziri, zëvendëskryetari Xhemajl Hyseni, kryeshefi ekzekutiv Enver Muja si dhe drejtuesit e drejtorive i kanë njoftuar përfaqësuesit e Paktit të Stabilitetit me gjendjen e përgjithshme zhvillimore në komunë dhe, sipas interesimeve, edhe nëpër sektore të veçanta, si në arsim, ekonomi, bujqësi, infrastrukturë, punësi e të tjera.

Ekonomia nuk ka arritur të riaktivizohet në shkallën e dikurshme dhe derisa ajo ndodhet përpara një procesi të privatizmit, komuna ballafaqohet me një numër të madh të të papunëve, u tha në takim. Aktualisht llogaritet të jenë të paangazhaur askund rreth 40 mijë qytetarë të aftë për punë. Në sektorin privat të biznesit janë përfshirë rreth 8 mijë punëtorë, kryesisht nga qyteti.

 

Agrokultura nuk punëson më shumë se 270 punëtorë, ndërkaq që llogaritet se rreth 15 mijë banorë të komunës merren me bujqësi sa për plotësimin e nevojave familjare. Deri tani kanë munguar investimet në këtë sektor, pos donacioneve për sanimin e gjendjes emergjente të pasluftës.

Ekspertët e Paktit të Stabilitetit janë interesuar edhe gjendjen e tashme të ndërmarrjeve shoqërore dhe ish-të punësuarit nëpër to dhe kanë tërhequr vëmendjen se një numër i tyre nuk do të mund të riaktivizohen ashtu siç kanë qenë më parë, sepse investitorët do të ofrohen me programe të tjera.

Përkundër investimeve të deritashme, infrastruktura e përgjithshme në komunën e Gjilanit ka nevojë për projekte të reja.

 

Për këtë vit komuna ka paraparë të inesvtojë 620 mijë euro në infrastrukturë, ndërsa vetëm 100 mijë janë destinuar për rehabilitimin e rrugëve. Projektet e mëdha do të financohen nga donatorët e jashtëm, sipas prioriteteve që janë përcaktuar me planin zhvillimor të komunës, ndërsa edhe komuna do të marrë pjesë me një përqindje më të vogël.

 

 

Forumi i Rinisë së LDK-së nesër shënon 13-vjetorin e themelimit

 

Prishtinë, 10 mars 2003 - Me rastin e 13-vjetorit të themelimit të Forumit të Rinisë të LDK-së, Kryesia e kësaj organizate rinore nesër, më 11 mars, organizon një mbledhje solemne.

Mbledhja mbahet në Teatrin Kombëtar në Prishtinë në orën 12:00, ku do të marrë pjesë edhe Presidenti i Kosovës, Ibrahim Rugova. Gjithashtu janë ftuar edhe përfaqësuesit e institucioneve vendore dhe ndërkombëtare.

 

 

AAK: Kontaktet në nivel institucional të bëhen në bazë të platformës së aprovuar nga Parlamenti i Kosovës

 

Prishtinë, 10 mars 2003 - Në një deklaratë të lëshuar sot nga Kryesia e Aleancës për Ardhmerinë e Kosovës (AAK), thuhet se kjo parti e konsideron të dobishëm zhvillimin e kontakteve me vendet fqinje dhe ato të rajonit, duke synuar edhe vendosjen e marrëdhënieve reciproke.

Mirëpo, AAK thotë se kontakti me Serbinë është çështje me rëndësi dhe kërkon trajtim serioz dhe përgatitje serioze, kurdo që të vijë koha për këto kontakte gjithsesi duhet të jenë të ndërmjetësuara nga Shtetet e Bashkuara të Amerikës.

Në këtë deklaratë gjithashtu thuhet se institucionet e Kosovës (Qeveria) me iniciativën e vet mund të përgatisin platformën, planin dhe ekipin e duhur dhe mund të zhvillojnë kontakte në nivel institucional në bazë të planit dhe platformës së aprovuar nga Parlamenti i Kosovës.

Për hir të rëndësisë së këtyre kontakteve, theksohet më tutje në deklaratë, e gjithë kjo nuk bëhet me improvizime dhe në darka, por në institucione të zgjedhura në mënyrë demokratike dhe përmes procedurave të rregullta të punës. Nxitimet në këtë drejtim dhe improvizimet çfarë kanë ndodhur këto ditë, AAK i konsideron të padobishme dhe nuk i mbështet, thuhet në fund të kësaj deklarate.

 

 

OSBE-së dhe UNHCR-i vlerësojnë përmirësimin e kushteve të minoriteteve që janë bërë në Kosovë

 

Prishitnë, 10 mars 2003 - Misoni i OSBE-së dhe UNHCR-i në një raport vlerësojnë përmirësimin e kushteve të minoriteteve që janë bërë në Kosovë, por se edhe më tutje duhet bërë më shumë në këtë drejtim.

 

Kreu i OSBE-së Paskal Fieski tha se konkluzionet e këtij raporti janë të qarta: ka përmirësime në të gjitha fushat por ende duhet të përmirësohet gjendja e sigurisë dhe e lirisë së minoriteteve, tha ai.

 

Institucionet e përkohshme të Kosovës kanë një rol kryesor në mbrojtjen e minoriteteve nga diskrirminimi, tha ai. Ato duhet aktivisht të jenë të përfshira dhe të jenë përgjegjëse për dinamikën e kthimit dhe të dërgojnë sinjale të qarta të tolerancës së komuniteteve të tyre.

Ndërkaq, Uolter Irvin, shef i UNHCR-it, tha se dialogu ndërmjet komuniteteve, ndërtimi i mirëbesimit dhe përfshirja e autoriteteve lokale përaqesin elementet kryesore për përmirësimin e kushteve të minoriteteve në Kosovë dhe garantojnë procesin e kthimit të tyre. Zoti Irvin theksoi se sfida kryesore për kthimin e minoriteteve është siguria dhe liria e lëvizjeve të tyre.

 

 

Prishtinë: Vriten dy policë ndërkombëtarë të njësisë speciale dhe disa të tjerë plagosen

 

Prishtinë, 10 mars 2003 - Dy policë ndërkombëtarëtë, pjesëtarë të njësisë sepciale, janë vrarë dhe disa të tjerë janë plagosur mbrëmë në Prishtinë gjatë një zënke ndërmjet veti, ka bërë të ditur përfaqësuesi i UNMIK-ut Andrea Anjeli.

 

Ky incident i rëndë ka ndodhur në kampin e policisë së UNMIK-ut, kurse motivet thuhet të jenë personale, thotë Anjeli, duke mos njoftuar identitetin e tyre as përkatësinë kombëtare. Ndërkohë që janë duke u zhvilluar hetimet lidhur me këtë incident, UNMIK-u paralajmëroi se do të do të dalë me një komunikatë të veçantë.

 

 

R.Tahiri: Koncepti i Gjingjiqit për ndarjen e Kosovës është ide nacionaliste serbe

 

Prishtinë, 10 mars 2003 - Duke komentuar angazhimin e kryeministrit serb Zoran Gjingjiq për federalizimin e Kosovës, këshilltari i kryeparlamentarit Daci, Ramush Tahiri, tha se idetë e kryeministrit serb duken më shumë se reagim ndaj proceseve pozitive që po shënohen në Kosovë, prandaj ai edhe ofron propozimet e mëhershme serbe për ndarjen e Kosovës në baza etnike.

"Ky është një koncept thjesht i bazuar në idetë nacionaliste serbe të mëhershme që kërkon krijimin e shtetit serb kudo që janë serbët dhe që nuk ka të bëjë agjë me deklarimin reformist, apo demokratik të pushtetit të Serbisë", i deklaroi "Zërit të Amerikës" z. Tahiri.

 

Ai nënvizoi se po të përdorej një koncept i tillë në Kosovë, jo vetëm që do të shkaktonte konflikte të përgjakshme, por do të destabilizonte gjithë rajonin, ngase ky koncept do të rikthente edhe njëherë trajtimin e çështjes si në Maqedoni, ashtu edhe në Bosnje e Hercegovinë dhe në Malin e Zi.

 

 

Një delegacion i Komisionit Evropian vjen në Prishtinë për të krijuar një mekanizëm të ri Kosovë – BE

 

Prishtinë, 10 mars 2003 - Përfaqësuesit e qeverive të Sllovenisë, Kroacisë, Shqipërisë dhe Maqedonisë u pajtuan që të vazhdojë procesi i kontakteve me intgeres të përbashkët me konferencën e ardhshme në Kroaci. Ata i bënë këto prononcime gjatë përfundimit të një konference të në Prishtinë.

 

Ata i diskutuan përvojat dhe të arriturat e tyre e deritanishme. Vendet pjesëmarrëse në këtë konferencë kanë harmonizuar apo janë në proces të harmonizimit të qindra ligjeve gjë që tregon se edhe për Kosovën ka mjaft punë për t'u bërë.

 

Kryetari i Institutit të Kosovës për Integrime Evroatlantike Blerim Reka thotë se kontakti i parë ku do të diskuton këtë çështje me Unionin Evropian do të ndodhë me 13 mars, ku një delegacion i Komisioni Evropian nga Brukseli do të jetë në Qeverinë e Kosovës dhe do të fillojë bisedat për të ashtuquajtur mekanizëm të ri Kosovë - Bashkimi Evropian. Ai shfaqi shpresën se ku do të jetë fillimi i mbarë për kyçjen e Kosovës gradualisht në Bashkimin Evropian.

 

 

U gjend dhe u varros trupi i Sherif Kuçicës nga fshati Marinë i Skënderajt

 

Skënderaj, 10 mars 2003 - U gjend dhe dje u varros në vendlindjen e tij në Marinë të Skënderajt trupi i Sherif Kuçicës 19 vjeçar, i vrarë nga forcat serbe në vitin 1999.

 

Atë e kishin marrë me vete forcat serbe dhe e kishin ekzekutuar, ndërka trupi i tij ishte varrosur si i paidentifikuar nga fshatarët e fshatit Dobërdolan të Rahovecit. Identifikimi i kufomës së Sherifit u bë nga familijarët e tij në saje të disa rrobave të gjetura.

Edhe vëllai i të ndjeri Sherifi konsiderohet i zhdukur.

 

 

S. Hasellok thotë se ende nuk dihet data se kur do të fillojnë bisedimet ndërmjet Prishtinës dhe Beogradit

 

Prishtinë, 10 mars 2003 - Drejtori për Informim i UNMIK-ut në Prishtinë Sajmon Hasellok ka deklaruar se ende nuk dihet data se kur do të fillojnë bisedimet ndërmjet Prishtinës dhe Beogradit lidhur me çështjet teknike në interes të dyanshëm. Megjithëse burime të paidentifikuara nga UNMIK-u më herët kishin informuar se bisedimet do të fillonin të premtën e ardhshme.

"Unë nuk po them se nuk do të ketë bisedime të premtën, mirëpo them se kjo çështje as që është diskutuar pasi ende jemi në pritje të konfirmimit të përbërjes së delegacioneve dhe të rendit të ditës së diskutimeve", citohet të ketë thënë Hasellok.

Përderisa pala serbe ka caktuar ministren Gordana Matkoviq për kryesuese të delegacionit që do të marrë pjesë në bisedime, përfaqësuesit e institucioneve të Kosovës ende nuk kanë informuar për përbërjen e delegacionit kosovar.

 

 

Në fshatin Breznicë të Bujanocit u zhvillua ceremonia mortore e varrimit të Besim Xhemajlit dhe Shaban Bajramit

 

Bujanoc, 10 mars 2003 - Sot në fshatin Breznicë të Bujanocit u zhvillua ceremonia mortore e varrimit të Besim Xhemajlit dhe Shaban Bajramit, të cilët u vranë nga forcat serbe më 7 mars në pikën kufitare ndërmjet Kosovës dhe Serbisë.

 

Në praninë e mijëra qytetarëve mbi varret e tyre u mbajtën disa fjalime mortore. Mes tjerëve foli edhe kryetari i LPD Jonuz Musliu, si dhe u lexua një telegram i AKSH-së, e cila të ndjerët i konsideron pjesëtarë të saj.

 

 

Buçkovski thotë se situata e sigurisë në Maqedoni është e brishtë

 

Shkup, 10 mars 2003 - Në Ohër ka filluar konferenca me temën "Lufta e re dhe konflikti në shekullin 21". Duke folur këtë konferencë, ministri maqedonas i Mbrojtjes, Vllado Buçkovski, ka thënë se "pa ruajtjen e paqes dhe sigurisë, nuk mund të bëhet fjalë as për zhvillim ekonomik, as për prosperitet, as për zgjidhje të problemeve ekonomike dhe sociale që e kërcënojnë sigurinë e qytetarëve të Republikës së Maqedonisë".

Buçkovski ka thënë se pas disa incidenteve të fundit situata e sigurisë në Maqedoni është e brishtë, duke mos përjashtuar mundësinë e provokimeve dhe të incidenteve të caktuara.

 

Gjithashtu Buçkovski ka shtuar se "grupe të caktuara të armatosura, të cilat deklarohen si AKSH, nuk kanë përkrahje nga popullata shqiptare në Maqedoni dhe momentalisht nuk kanë forcë reale për ndërmarrjen e aktiviteteve më të gjera eventuale të armatosura", njofton MIA në gjuhën shqipe.

 

 

Policia shqiptare ktheu prapa përfaqësuesin politik të Armatës Kombëtare Shqiptare

 

Tiranë, 10 mars 2003 - Mbrëmë vonë policia shqiptare nuk i ka lejuar të hyjë në territorin e saj përfaqësuesit politik të Armatës Kombëtare Shqiptare (AKSH), Gafur Adilit.

Gafur Adili, i cili ka shtetësinë zvicerane, është kthyer në Zvicër nga policia shqiptare pas mbërritjes në aeroportin ndërkombëtar në Tiranë.

Policia shqiptare thotë se një vendim i tillë ka të bëjë me aktivitetet e Gafur Adilit, e që janë në kundërshtim me politikën e Shqipërisë, e cila kundërshton çdo veprimtari që ka për qëllim nxitjen e destabilitetit.

 

 

Qeveria shqiptare dërgon një kompani komando të përgjedhur të ushtrisë shqiptare në Irak

 

Tiranë, 10 mars 2003 - Shqipëria do të dërgojë trupa në Gjirin Persik që t'i bashkohet çfarëdo lufte të prirë nga Shtetet e Bashkuara kundër Irakut dhe ka vënë në disponim hapësirën e saj ajërore, rrugët dhe ujërat detare për të shfrytëzuar nga forcat që përgatiten për atë luftë të mundshme. Këtë vendim e mori Qeveria shqiptare në një mbledhje të jashtzakonshme.

Trupat shqiptare do të jenë nën komandën e ushtrisë amerikane në Florida. Propozimi kishte ardhur kohë më parë nga Ministria e Mbrojtjes. Me këtë vendim autorizohet pjesëmarrja e një kompanie komando të trupave të përgjedhura të ushtrisë shqiptare në rajonin e Gjirit Persik në mbështetje të plotë me angazhimet e shtetit shqiptar në luftën kundër terrorizmit global.

 

 

Kryetari i BDSH-së akuzon qeveritarët serbë për moszgjidhjen e problemeve të shumta në Luginën e Preshevës

 

Preshevë, 10 mars 2003 - Kryetari i Partisë për Bashkim Demokratik Shqiptar, Zeqirja Fazliu akuzon qeveritarët serbë për mosgatishmëri për zgjidhjen e problemeve të shumta në Luginën e Preshevës.

 

Ai vlerësoi se gjendja e sigurisë në këtë periudhë të fundit në Luginë të Preshevës, në veçanti në zonën e dikurshme të sigurisë tokësore është e keqësuar dhe jo e sigurt.

 

Ai ka shtuar se regjimi serb ende nuk ka hequr dorë nga doktrinat e hershme të cilat ka filluar t'i aplikojë me inskenime të ndryshme dhe me paralajmërime se ato do të ngjajnë dhe të njëjtat i shfrytëzon si mbulesë për t'i bastisur shqiptarët në vend e pa vend.

 

 

Në një vizitë triditore në Londër ndodhet presidenti i Shqipërisë Alfred Moisiu

 

Londër, 10 mars 2003 - Me ftesën e lartmadhërisë së saj mbretëreshës Elizabeta e Dytë dje ka arritur në një vizitë triditore në Londër presidenti i Shqipërisë Alfred Moisiu.

"Zhvillimi i deritashëm në fushën politike midis Shqopërisë dhe Britanisë së Madhe ka krijuar terrenin për një perspektivë të qartë dhe realiste për çuarjen e tyre përpara", ka deklaruar ambasadori shqiptar në Londër Kastriot Robo.

 

Vizita e presidentit Moisiu është një vizitë e rëndësishme, e një rëndësie historike, pasi kontaktet që presidenti Moisiu do t'i ketë në Londër janë shumëplanëshe, tha ai.

 

Moisiu do të ketë një takim me lartëmadhërinë e saj Mbretëreshën Elizabeta e Dytë dhe një sër takimesh politike, përfshirë këtu sekretarin e shtetit për politikën e jashtme, sekretarin e mbrojtjes, sekretarin e brendshëm dhe do të mbajë një ligjeratë në Institutin Mbretëror Britanik për Çështje të Politikës së Jashtme.

 

 

Senati i Universitetit të Tetovës ka shkarkuar nga posti rektorin Ramiz Abdyli

 

Tetovë, 10 mars 2003 - Senati i Universitetit të Tetovës që ende trajtohet nga autoritetet e Shkupit të jashtëligjshëm ka bërë të ditur se në një mbledhje të jashtëzakonshme ka shkarkuar nga posti rektorin Ramiz Abdyli.

 

Ai ishte emëruar në këtë post në dhjetor të vitit të shkuar dhe për ushtruese të detyrës emëroi Nexhmedin Bejadinin, prorektor i deritashëm. Është thënë se rektori Abdyli është shkarkuar për moskryerjen e obligimeve dhe për shkelje të rëndë të statutut të UT-së.

Vlerësohet se shkarkimi i tij është pasojë e një zënke midis tij dhe ish-rektorit, Fadil Sylejmani.

Ky shkarkim ndodhi vetëm një ditë më vonë kur rektori i UT Ramiz Abdyli opinionit publik në këtë vend në saje të një komunikate ka njoftuar se kryetari i Bordit i bën obstruksione në punën e tij dhe e pengon zhvillimin normal të procesit edukativo-mësimor.

 

 

Madridi thekson Kosovën si presedan për sulmin eventual kundër Irakut

 

Madrid, 10 mars 2003 - Shefja e diplomacisë spanjolle Ana Palasio sot ka folur për presedanin dhe legjimitetin e ndërhyrjes në Kosovë më 1999, përkundër kundërshtimit të Rusisë, për të bërë një paralele me mundësinë që Franca të bëjë veto në Këshillin e Sigurimit të OKB-së në rezolotën e re për Irakun që e kanë propozuar SHBA-të, Britania e Madhe dhe Spanja.

Në atë kohë "kundërshtoi Rusia. Ne vepruam dhe u kuptua se ekziston legjimiteti i bashëksisë ndërkombëtare", për ndërhyrje në Kosovë, ka deklaruar Ana Palasio për një televizion spanjoll lidhur me qëndrimin e Spanjës në rastin e Francës që të bëjë veto

 

 

Parlamenti palestinez ka miratuar emërimin e kryeministrit të parë

 

Ramalla, 10 mars 2003 - Këshilli ligjvënës palestinez (parlamenti) në një mbledhje të sotme në Ramalla të Bregut Perëndimor ka miratuar emërimin e kryeministrit të parë palestinez me shucinë dërmuese të votave - 64 pro, 3 kundër dhe katër abstenime - gjë që e konsideron një hap historik në kuadër të reformave të administratës palestineze.

Mirëpo, ky organ duhet të definojë rolin e kryeministrit dhe të miratojë emërimin e Mahmud Abasit (67), të njohur si Abu Mazena, përndryshe zëvendës i liderit palestinez Jasar Arafat. Pikërisht Arafati e ka emëruar Abasin për kryeministër dhe pret që deputetët ta miratojnë këtë, duke marrë parasysh se shumicën në parlament e përbëjnë anëtarët e organizatës së Arafatit, Al Fatah.

 

 

Shrëder mbështet propozimin francez për votim personal në Këshillin e Sigurimit

 

Berlin, 10 mars 2003 - Kancelari gjerman Gerhard Shrëder e mbështet propozimin francez për votim personal të krerëve të shteteve dhe qeverive mbi rezolutën e dytë për Irakun në Këshillin e Sigurimit të Kombeve të Bashkuara.

 

Siç tha një zëdhënës i qeverisë kancelari e siguroi për këtë presidentin francez Zhak Shirak. Më tej u tha se gjatë një telefonate të dy politikanët kishin ritheksuar se do tu jepnin më shumë kohë kontrollorëve për armët e Irakut.

Qeveria amerikane e hodhi poshtë propozimin. Këshilltarja për sigurinë kombëtare Kondoliza Rajs tha se fjala është për një përpjekje për vetinskenim.

 

 

El Baradei: Koreja e Veriut një kërcënim më i madh për paqen në botë

 

Uashington, 10 mars 2003 - Kreu i Zyrës Ndërkombëtare për Energjinë Bërthamore Mohamed el Baradei sheh te Koreja e Veriut një kërcënim më të madh për paqen në botë sesa tek Iraku. Ky vend nuk duhet nënvlerësuar, tha Baradei. Dihet që Koreja e Veriut është në gjendje të prodhojë plutonium për armët bërthamore. Ndërkaq vazhdojnë përpjekjet diplomatike lidhur me programin bërthamor të Koresë së Veriut.

 

 

Iraku ka marrë nga kryeinspektori Bliks një katalog me pyetje për programet e tij të armëve

 

Bagdad, 10 mars 2003 - Iraku ka marrë nga kryeinspektori i OKB-së për armët Hans Bliks një katalog me pyetje për programet e tij të armëve. Oficeri përgjegjës irakian i ndërlidhjes për bashkëpunimin me OKB-në Hosam Mohamed Amin deklaroi se vendi i tij po përpiqet të përmbushë të gjitha detyrimet dhe tu përgjigjet pyetjeve. Sipas tij nga 100 raketat Samud 2 ndërkaq janë shkatërruar 46.

 

Nuk është planifikuar ndonjë iniciativë e re për çarmatosjen. Se kur mund të jetë gati raporti për shkatërrimin e gazit nervor dhe të antraksit nuk mund të thuhet tani për tani, theksoi Amin. Ai i akuzoi SHBA-ës se kishin vendosur tashmë për të hyrë në luftë.

 

 

Ministrja britanike Kler Short paralajmëroi se do të japë dorëheqje

 

Londër, 10 mars 2003 - Ministrja britanike e Ndihmës për Zhvillimin Kler Short paralajmëroi se do të japë dorëheqjen në rast se kryeministri Toni Bler do të marrë pjesë në luftën kundër Irakut pa miratimin e Kombeve të Bashkuara. Short tha se nuk do ta duronte shkeljen e të drejtës ndërkombëtare.

 

Ajo është anëtarja e parë e kabinetit që kërcënon me dorëheqje për shkak të politikës së kryeministrit Blair ndaj Irakut.

 

 

Forcat e armatosura amerikane kanë filluar ngritjen e një pikëmbështetjeje të re në Turqi

 

Stamboll, 10 mars 2003 - Forcat e armatosura amerikane kanë filluar me ngritjen e një pikëmbështetjeje të re në Turqi afër kufirit me Irakun. Qendra do të shërbejë si bazë logjistike për 62.000 ushtarë amerikanë në rast se parlamenti turk do ta miratojë stacionimin.

 

Baza në Kiziltepe, e miratuar para dy muajsh nga Turqia, ndodhet rreth 160 kilometra larg kufirit. Një aeroport civil ndodhet pak kilometra larg bazës së re dhe po aty afër kalon edhe rruga kryesore drejt kufirit irakian.

 

 

Në referendumin në Maltë shumica e elektoratit votoi për anëtarësimin në BE

 

Valeta, 10 mars 2003 - Referendumi i parë për zgjerimin e Bashkimit Evropian pas një viti rezultoi pro zgjerimit. Në referendumin në Maltë shumica prej 54 për qind të elektoratit votoi për anëtarësimin e ishullit mesdhetar në maj 2004.

 

Siç bëri të ditur komisioni zgjedhor në zgjedhje morrën pjesë 91 për qind e 300.000 banorëve me të drejtë vote. - Presidenti i Komisionit Evropian Romano Prodi dhe kancelari gjerman Gerhard Schröder e përshëndetën votimin.

 

 

Koreja e Veriut kreu përsëri prova me një raketë me rreze të shkurtër veprimi

 

Seul/Penjan, 10 mars 2003 - Koreja e Veriut kreu përsëri prova me një raketë me rreze të shkurtër veprimi. Sipas të dhënave koreanojugore raketa fluturoi rreth 110 kilometra dhe ra në detin midis gadishullit korean dhe Japonisë. Prova nuk ishte diçka e papritur.

 

SHBA patën paralajmëruar trafikun detar në këtë zonë detare. Në një deklaratë të Ministrisë së Jashtme në Tokio thuhet se Japonia nuk sheh kërcënim të drejtpërdrejtë nga lëshimi i raketës.

 

 

SHBA-të hedhin poshtë nismën e Francës

 

Uashington, 10 mars 2003 - SHBA-të hedhin poshtë nismën e Francës që Këshilli i Sigurimit, në nivel të shefave të shteteve apo të qeverive, të shqyrtojë krizën e shkaktuar për shkak të moszbatimit irakian të rezolutës 1441. Në vend të "qëndrimeve të njohura të përsëritura", nesër (apo më së voni të mërkurën) mund të pritet votimi i 17 marsit si ultimatum për Sadam Huseinin.

 

 

Ka të dhëna se forcat kryengitëse në Bregun e Fildishtë kanë vrarë mbi 200 civilë muslimanë

 

Bangolo, Bregu i Fildishtë, 10 mars 2003 - Trupat franceze në Bregun e Fildishtë kanë deklaruar se kanë gjetur mjaft të dhëna për vrasje të shumta në qytetin Bangolo, njofton BBCWorld. Zëdhënësi i armatës franceze, Filip Perret ka thënë se të dhënat e dhunës janë shumë të dukshme dhe kanë ndikuar qartë në shumë njerëz.

 

Por, ai s'ka mundur të konfirmojë deklaratën e forcave kryengitëse të zonës se janë vrarë mbi 200 civilë muslimanë. Këto informacione për dhunën në fjalë rrezikojnë marrëveshjen e arritur të shtunën ndërmjet qeverisë dhe kryengritësve.

 

Komandanti i kryengritësve Ousman Kaulibali ka thënë se viktimat janë kryesisht të huaj dhe të Bregut të Fildishtë, nga veriu kryesisht musliman.

 

 

Pauell: Ekzistojnë gjasa të mëdha që SHBA të marrin vota të mjaftueshme në KS për rezolutën

 

Uashington, 10 mars 2003 - Sekretari amerikan i Shtetit, Kolin Pauell tha dje se ekzistojnë gjasa të mëdha që Shtetet e Bashkuara të marrin vota të mjaftueshme në Këshillin e Sigurimit për kalimin e një rezolute që do të hapte rrugën dhe autorizonte për një luftë në Irak.

 

"Medoj se po bëjmë progres me 10 anëtarët jo të përhershëm të Këshillit të Sigurimit, por sikurse e dini, Franca ka marrë një pozicion të fortë që të kundërshtojë çfarëdo rezolute. Ndonëse nuk e kanë përdorur fjalën veto, ata vërtet po sinjalizojnë këte", ka thënë sekretari amerikan i Shtetit.

 

 

El Baradei: Inspektorëve u nevojiten edhe dy muaj të përcaktojnë nëse Iraku ka program sekret për armë

 

Nju Jork, 10 mars 2003 - Drejtuesi i Agjencisë së Kombeve të Bashkuara për Mbikëqyrje Bërthamore, Mohamed el Baradei tha se inspektorëve të tij do t'u nevojiten edhe dy muaj që të përcaktojnë plotësisht nëse Iraku ka program sekret për armë bërthamore.

 

 

SHBA do të mbajnë bisedime direkte me Korenë Veriore lidhur me angazhimet bërthamore

 

Uashington, 10 mars 2003 - Sekretari amerikan i shtetit, Kolin Pauell ka deklaruar se Shtetet e Bashkuara eventualisht do të mbajnë bisedime direkte me Korenë Veriore lidhur me angazhimet bërthamore të atij vendi, por në bisedimet do të duhej të përfshihen edhe anëtarë të tjerë nga rajoni.

 

Korea Veriore akuzoi dje Shtetet e Bashkuara se komplotojnë sulm bërthamor kundër saj dhe kritikoi vendimin e fundit të Uashingtonit për dërgimin e bombarduesve me rreze të gjatë veprimi në ishullin Guam.

 

 

Bush: Ndaj Irakut do të përdoret forca nëse ai nuk çarmatoset plotësisht dhe pa kushte

 

Uashington, 10 mars 2003 - Në fjalimin javor në radio presidenti Bush tha se njerëzit kudo në botë luten për paqe. Por ai tha se paqja do të sigurohet vetëm kur terroristët të humbasin një përkrahës dhe mbrojtës të pasur dhe kur Sadam Huseini të çarmatoset plotësisht dhe përfundimisht.

"Ne nuk mund të presim për të parë se çfarë mund të bëjnë terroristët apo shtetet terroriste me armët e tyre të shkatërrimit në masë. Ne jemi të vendosur t'u kundërvihemi kërcënimeve kudo që të shfaqen.

 

Dhe si mjet të fundit ne duhet të jemi të gatshëm të përdorim forcën ushtarake. Ne jemi duke bërë të gjitha përpjekjet e mundshme për të shmangur luftën në Irak. Por në se nuk çarmatoset në mënyrë paqësore, Sadam Huseini do të çarmatoset me forcë", tha Bush.

 

 

SHBA vazhdojnë përqëndrimin e trupave në Turqi

 

Anakara, 10 mars 2003 - SHBA po vazhdojnë përgatitjet ushtarake dhe përqëndimin e trupave për një luftë të mundshme në Irak. Pavarësisht prej jo-së së parlamentit turk për stacionimin e ushtarëve të mëtejshëm amerikanë në teritorin e Turqisë, ushtria amerikane po e shton numrin e tyre në vend, njofton stacioni televiziv turk TNV. Në TV u treguan pamje se si anijet amerikane po shkarkojnë në portin Iskenderun pajisje ushtarake.

 

Presidenti i parlamentit turk Bylent Ariniç tha se është i irrituar në lidhje me përgatitjet ushtarake të SHBA-ve. Ambasada amerikane në Ankara tha se njësitë amerikanë që zbarkuan në Turqi nuk janë pjesë e kontigjentit të luftës. Edhe ushtria turke nga ana e saj po përforcon përgatitjet për luftën dhe dislokoi një numër takesh në kufirin me Irakun.

Copyright©2000-2003 Trepca.net - Të gjitha të  drejtat e rezervuara.