Lajme

E shtune, 8 mars 2003

Përmbajtja:

• Shtajner: "Nuk ka kuptim të flitet për temat të cilat nuk i kam propozuar në letër"

• Krijohet një këshill prej 14 anëtarësh për bartjen e përgjegjësive tek institucionet e Kosovës

• Misioni i UNMIK-ut kundërshton fuqishëm deklaratën e Gjingjiqit për ndarjen e Kosovës ndërmjet dy grupeve etnike

• AKSH thotë se Shaban Bajrami dhe Besim Xhemajli ishin anëtarë të saj

• Opozita kërkon sistem proporcional

• Si u vranë Shaban Bajrami dhe Besim Xhemajli

• Dy shqiptarë të vrarë në kufirin ndërmjet Kosovës dhe Serbisë

• Në Bujanoc është mbajtur konferenca ndërkombëtare e dhuruesve për komunat e Luginës së Preshevës

• Gjingjiq ka shprehur dëshirën që Kosovën ta shoh si federatë e dy pjesëve sipas modelit të Kombeve të Bashkuara për Qipron

• KNKK: Gratë vazhdojnë të bartin pasojat e luftës

• Nga viti i ardhshëm shkollor tekstet për arsimin tetëvjeçar në Shqipëri do të jenë falas

• Ministrat e Kroacisë, Shqipërisë dhe Maqedonisë i koordinojnë përpjekjet për t'iu bashkangjitur NATO-s

• Uashingtoni ka kërkuar nga Shkupi të deklarohet rreth pjesëmarrjes në koalicionin ndërkombëtar kundër Irakut

• Parlamenti i Serbisë dhe Malit të Zi dje e zgjodhi Svetozar Maroviqin president të parë të kësaj bashkësie

• Gjykata e Qarkut në Vranjë ka liruar nga paraburgimi në mungesë faktesh edhe tre shqiptarë

• Presidenti amerikan Bush ka akuzuar presidentin Husein se po zhgenjen inspektoret

• Janë arrestuar djemtë e shefit të organizates terroriste El Kaida, Osama bin Laden

• Inspektorët paraqesin raportin

• Palestinezët e maskuar kanë vrarë dy izraelitë

• Ushtria amerikane ka arrestuar shtatë ekstremistë të dyshimtë në Afganistan

• Shtetet e Bashkuara kanë kërkuar nga Gjermania t'i dëbojë disa diplomatë të Irakut

• Aeroplanët luftarakë amerikanë dhe britanikë e kanë sulmuar një sistem radarësh të Irakut

• SHBA-të, Britania dhe Spanja e kanë propozuar 17 marsin afat të fundit për Irakun  

• Janë vrarë shtatë pjesëtarë të Al Kaidës

• Armata izraelite ka vrarë themeluesin e krahut ushtarak të Hamasit, Ibrahim al-Makadma

Shtajner: "Nuk ka kuptim të flitet për temat të cilat nuk i kam propozuar në letër"

Beograd, 8 mars 2003 - Kryeadministratori i Kosovës Mihael Shtajner konsideron se Beogradi patjetër duhet të bisedojë me Prishtinën për çështjet e interesit të përbashkët në Kosovë.

Shtajner i deklaroi një gazete të Beogradit se bisedimet ndërmjet Beogradit e Prishtinës në nivel ministror duhet të fillojnë së shpejti dhe se në to duhet të marrin pjesë delegacionet ministrore të dy pklëve, përkatësisht të palës së UNMIK-ut dhe përfaqësuesve të qeverisë së përkohshme.

Në lidhje me propozimet e Çoviqit që temat për bisedime të zgjerohen edhe në çështjet e tjera, Shtajner thotë se propozimet konkrete i ka theksuar në letrën dërguar kryeminsirtti serb Gjingjiq, kështu që në ato pret edhe përgjegje.

"Konsideroj se nuk ka kuptim të flitet për temat të cilat nuk i kam propozuar në letër", thotë Shtajner.

 

Krijohet një këshill prej 14 anëtarësh për bartjen e përgjegjësive tek institucionet e Kosovës

 

Prishtinë, 8 mars 2003 - U formua një Këshilli për bartjen e kompetencave nga ndërkombëtarët tek institucionet e Kosovës që do të kryesohet nga shefi i UNMIK-ut Mihael Shtajner dhe nga kryeministri Bajram Rexhepi.

 

Këshilli do të ketë 14 anëtarë: shtatë nga UNMIK-u dhe shtatë nga institucionet e Kosovës, përfshirë këtu edhe përfaqësuesit e pakicave. Ky këshill që përherë të parë do të mblidhet me 26 mars do të diskutojë për procedurat e bartjes së kompetencave dhe për kompletimin e tyre.

"Bartja e më shumë kompetencave te vendorët nuk do të thotë se UNMIK-ut tërhiqet nga të drejtat e rezervuara", tha Shtajner duke përkujtuar të drejtat e pakicave dhe marrëdhëniet me jashtë. Shtajner tha se përgjegjësitë e qeverisë do të shtohen bashkë me kompetencat.

Këtë pajtueshmëri të arritur e ka quajtur moment të rëndësishëm kryeministri i Kosovës Bajram Rexhepi. Ai ka shtuar se këto kompetenca do të transferohen shumë shpejt.

Ndërkaq duke folur për nismen e Shtajnerit, kryeministri Rexhepi ka thënë se Kosova nuk është një vend i izoluar, prandaj bisedimet për zgjidhjen e çështjeve teknike me interesa të dyanëshme janë të domosdoshme.

Z. Shtajner tha se deri në fund të këtij viti institucionet e Kosovës do të kenë më shumë përgjegjësi, ndërkaq tërë procesi i kalimit të tyre do të jetë në pajtim me dokumentët ndërkombëtare.

Por kalimi i përgjegjësive nuk nënkupton heqjen dorë të UNMIK-ut nga kompetencat themelore ku përfshihet siguria, të drejtat e pakicave dhe marrëdhëniet e jashtme.

 

 

Misioni i UNMIK-ut kundërshton fuqishëm deklaratën e Gjingjiqit për ndarjen e Kosovës ndërmjet dy grupeve etnike

 

Prishtinë, 8 mars 2003 - Duke shfaqur qëndrimin e administratës ndërkombëtare lidhur me deklaratën e kryeministrit serb Zoran Gjingjiq, i cili angazhohet për ndarjen e Kosovës ndërmjet dy grupeve etnike, drejtori për Informim i UNMIK-ut, Sajmon Hasellok thotë se Misioni i UNMIK-ut e kundërshton fuqishëm ndarjen e Kosovës. Ai ka shtuar se këto deklarata të Gjingjiqit bien ndesh me përcaktimin e bashkësisë ndërkombëtare.

Sajmon Hasellok i tha BBC-së se kreu i këtij misioni ka qëndrim të prerë se nuk do të ketë ndarje, kantonizim e as shkëputje territoriale të Kosovës.

Duke komentuar qëndrimin e Gjingjiqit se ideja për Kosovën shumëkombëshe është një iluzion, z. Hasellok tha se nuk dëshiron të komentojë se çfarë thonë politikanë të ndryshëm dhe ka shtuar se qëndrimi i UNMIK-ut reflekton koncensusin e bashkësisë ndërkombëtare.

 

 

AKSH thotë se Shaban Bajrami dhe Besim Xhemajli ishin anëtarë të saj

 

Prishtinë, 8 mars 2003 - Në lidhje me vrasjen e djeshme, në vijën kufitare ndërmjet Kosovës me Serbisë, të Shaban Bajramit dhe Besim Xhemajlit nga fshatin Breznicë e Bujanocit, me një komunikatë përmes internetit është paraqitur AKSH, Shtabi i divizionit "Adem Jashari", në të cilën thuhet se të ndjerët ishin anëtarë të AKSH-së.

"Në vendin e quajtur çeshmja e Eminit, heroikisht dhe në krye të detyrës, ranë dy luftëtarët më të denjë të Armatës Kombëtare Shqiptare, Shaban Bajrami dhe Besim Xhemajli.

 

Ne jemi krenarë me veprën tuaj fisnike dhe patriotike në shërbim të kombit shqiptar për të realizuar aspiratat kombëtare, amanetin e dëshmorëve të kombit, me në krye Adem Jasharin dhe gjithë deshmorëve të luftërave të fundit për çlirim dhe ribashkim kombëtar", thuhet mes tjerash në këtë komunikatë, të nënshkruar nga zëdhënësi i Shtabit të divizionit "Adem Jashari" të AKSH-së, kolonel Besfort Karadaku.

 

 

Opozita kërkon sistem proporcional

 

Tiranë, 8 mars 2003 - Opozita në Shqipëri ka bërë thirrje për vendosjen e një sistemi të pastër proporcional për zgjedhjet. Tetë parti parlamentare të opozitës kanë dalë me një deklaratë të përbashkët me anë të së cilës nënvizojnë se sistemi proporcional siguron një përfaqësim më të drejtë dhe qëndrueshmëri politike në vend.

 

Deklarata, që pasoi një tryezë të partive të opozitës, thotë se "kodi i sistemit zgjedhor në Shqipëri duhet të ndërtohet në bazë të kodit të zgjedhjeve të lira që ka hartuar komisioni i Venencias dhe ka miratuar Këshilli i Evropës".

 

 

Si u vranë Shaban Bajrami dhe Besim Xhemajli

 

Bujanoc, 8 mars 2003 - Në një njoftim zyrtar të autoriteteve serbe në Bujanoc thuhet se Shaban Bajrami dhe Besim Xhemajli në lokalitetin e quajtur Çesmja e Eminit, të enjtën në orën 18.10 kishin vendosur 15 kg eksploziv. Prej atij momenti ata janë përcjellë nga policia e Serbisë dhe rasti i është paraqitur KFOR-it dhe policisë së UNMIK-ut.

 

Më tutje në njoftim thuhet se të premtën rreth orës 11.00 Shabani dhe Besimi kishin ardhur në vendin ku e kishin vendosur eksplozivin, e marrin atë dhe e fusin në makinë dhe nisen për në Bujanoc.

 

Patrulla e xhandarmërisë serbe jep shenjë për t'u ndaluar, por ata përpiqen të ikin me makinën mercedes me targa të dyfishta, të Kosovës dhe Vranjës. Xhandarët serbë hapin zjarr dhe i vrasin.

Në këtë njoftim nuk përmendet plagosja e pjesëtarëve të xhandarmërisë serbe.

Të premtën në mbrëmje në linjën kufitare që ndan Kosovën e Serbinë është mbajtur një takim i përbashkët në të cilin përfaqësuesit e KFOR-it dhe të policisë së UNMIK-ut kanë vlerësuar se "forcat e sigurimit të Serbisë dhe Malit të Zi në këtë rast kanë reaguar në mënyrë profesionale", thuhet në këtë njoftim. Gjithashtu thuhet se pjesëtarët e KFOR-it kanë arrestuar Rexhep Bajramin, i cili ka qenë në vendin e incidentit, por me një makinë tjetër ka ikur.

 

 

Dy shqiptarë të vrarë në kufirin ndërmjet Kosovës dhe Serbisë

 

Bujanoc, 8 mars 2003 - Dje pas dite janë vrarë nga xhandarmëia serbe Shaban Bajrami (29) dhe Besim Xhemajli (30) nga fshati Breznicë i Bujanocit. Sipas njoftimeve incidenti ka ndodhur kur dy personat me makinën e tyre kanë kaluar vijën kufitare nga drejtimi i Kosovës dhe kanë hyrë në territorin e Serbisë. Meqë ata nuk kanë ndaluar makinën e tyre, policia ka hapur zjarr.

 

Sipas njoftimeve serbe kinse në makinën me targa të Kosovës janë zbuluar 20 kilogram lëndë shpërthyese të lidhura me një dirigjues në territorin e Kosovës. Jozyrtarisht thuhej se ka pasur edhe shkëmbim zjarri dhe se ishin plagosur tre pjesëtarë të forcave serbe.

 

 

Në Bujanoc është mbajtur konferenca ndërkombëtare e dhuruesve për komunat e Luginës së Preshevës

 

Bujanoc, 8 mars 2003 - Në Bujanoc është mbajtur konferenca ndërkombëtare e dhuruesve për komunat e Luginës së Preshevës, ku morën pjesë mbi 30 përfaqësues të ambasadave të huaja dhe organizatave ndërkombëtare në Beograd.

 

Mjetet financiare në shumën prej mbi pesë milionë euro, që priten të grumbullohen nga ky tubim do të përdorën për zhvillimin ekonomik të komunave Preshevë e Bujanoc dhe Medvegjë.

Duke hapur tubimin e dhuruesve zëvendëkryeministri i Serbisë Nebojsha Çoviq ka thënë se procesi i kthimit të mirëbesimit ndërnacional në këto tri komuna në jug të Serbisë gjatë dy viteve të kaluara ka shënuar rezultate të konsiderueshme.

 

Mirëpo, sipas tij, gjatë tri javëve të fundit ka shenja të ndërlikimit të situatës në përpjekje që të kthehet gjendja e mëparshme. Ai ka shtuar se kinse këtë po e bëjnë disa "elementë radikalë e kriminalë", duke frikësuar policinë shumetnike dhe përfaqësuesit e pushtetit vendor.

Ndërkaq, shefi i Misionit të OSBE-së në Beograd Mauricio Masari ka thënë se gjatë këtij viti prioritet do të jetë integrimi i shqiptarëve në organet gjyqësore, si dhe reforma e arsimit, përfshirë këtu edhe hartimin e programeve dhe teksteve të reja shkollore për shkollat fillore dhe të mesme.

 

Në anën tjetër, përfaqësuesi i Ambasadës amerikane në Beograd Robert Norman ka paralajmëruar se në rajonin e jugut të Serbisë do të investohen 6 milionë dollarë, por pret se do të investohen edhe katër milionë të tjerë.

 

 

Gjingjiq ka shprehur dëshirën që Kosovën ta shoh si federatë e dy pjesëve sipas modelit të Kombeve të Bashkuara për Qipron

 

Beograd, 8 mars 2003 - Kryeministri i Serbisë Zoran Gjingjiq ka thënë se Kosova duhet të ndahet ndërmjet shqiptarëve dhe serbëve. Shtypi i Beogradit transmeton se Zoran Gjingjiq e ka shprehur dëshirën që Kosovën ta shohë si federatë e dy pjesëve, sipas modelit të Kombeve të Bashkuara për Qipron.

 

Ai ka thënë se marrëveshja e tillë do të përfshinte atë që ai e quajti formë të civilizuar të shkëmbimit të popullatës. Sipas tij federeta e Kosovës do të kishte lidhje asimetrike me pjesën tjetër të Serbisë, ndërkohë që shqiptarët dhe serbët e Kosovës të jetonin në etnitete të ndara. Gjingjiq është politikani i parë serb që publikisht e propozon ndarjen e Kosovës.

 

 

KNKK: Gratë vazhdojnë të bartin pasojat e luftës

 

Gjenevë, 8 mars 2003 - Gratë ngujohen gjithnjë e më shume në konflikte të armatosura. Ato vazhdojnë të bartin pasojat e luftës edhe në ato raste kur kjo vuajtje do të mund të evitohej.

 

Me rastin e ditës Ndërkombëtare të Gruas, 8 Marsin, Komiteti Ndërkombëtar i Kryqit të Kuq (KNKK) është duke e theksuar gjendjen e vështirë të grave që ballafaqohen me luftë.

Kudo në botë, KNKK shqyrton sfidat komplekse që lajmërohen atje ku luftërat që tërbojnë dështojnë të bëjnë dallim në mes luftëtarëve dhe civilëve.

Shumë shpesh femrat civile, të cilat nuk marrin pjesë në luftime bëhen caqe të qëllimshme të luftës ose janë në rrezik thjesht për arsye se ndodhen rastësisht aty ku zhvillohen luftime. Dhe kjo ndodh edhe përpos mbrojtjes në të cilën kanë të drejtë në bazë të së drejtës ndërkombëtare humanitare.

KNKK në raportin e tij special të lëshuar "Gratë dhe Lufta", edhe një herë përkujton botën për nevojën që të respektohet mbrojtja në të cilën gratë kanë të drejtë në bazë të së drejtës ndërkombëtare humanitare.

Raporti bën thirrje për respekt më të madh për gratë në kohë të luftës dhe prezanton disa nga iniciativat më të reja të KNKK në këtë temë.

Qasja në rajonet e konfliktit mbetet qenësore. KNKK dhe organizatat e tjera ndërkombëtare mund të ndihmojnë gratë dhe civilët e tjerë që ngujohen në konflikte të armatosura vetëm e vetëm në qoftë se atyre u lejohet mundësia të kenë qasje tek ata që kanë nevojë, thuhet në një komunikatë të KNKK.

 

 

Nga viti i ardhshëm shkollor tekstet për arsimin tetëvjeçar në Shqipëri do të jenë falas

 

Tiranë, 8 mars 2003 - Duke filluar nga viti i ardhshëm shkollor tekstet për arsimin tetëvjeçar në Shqipëri do të jenë falas. Sipas Ministrisë së Arsimit të Shqipërisë dhënia e teksteve falas bëhet për t'u ardhur në ndihmë kryesisht shtresave të varfëra të popullësisë, duke shmangur në këtë mënyrë edhe një pengesë ekonomike për frekuentimin e arsimit të detyrueshëm.

 

Botimi i teksteve shkollore do të përballohet nga buxheti i shtetit dhe falë një kredie të Bankës Botërore.

 

 

Ministrat e Kroacisë, Shqipërisë dhe Maqedonisë i koordinojnë përpjekjet për t'iu bashkangjitur NATO-s

 

Zagreb, 8 mars 2003 - Ministrat e jashtëm të Kroacisë, Maqedonisë dhe Shqipërisë dje janë dakorduar t'i koordinojnë përpjekjet e tyre për t'iu bashkangjitur NATO-s. Takimi i ministrave Tonino Picula, Ilinka Mitreva dhe Ilir Meta u mbajt në kuadër të nismës amerikane për Adriatikun dhe parasheh nënshkrimin e marrëveshjes së partneritetit midis SHBA-ve dhe tri vendeve aspirante në NATO.

 

Në këtë takim ministrat e jashtëm të tri vendeve i dhanë mbështetje të plotë përpjekjeve ndërkombëtare kundër terrorizmit dhe i bën thirrje Irakut, që të heq dorë nga të gjitha armët e shkatërrimit në masë.

 

 

Uashingtoni ka kërkuar nga Shkupi të deklarohet rreth pjesëmarrjes në koalicionin ndërkombëtar kundër Irakut

 

Shkup, 8 mars 2003 - Uashingtoni ka kërkuar nga autoritetet e Maqedonisë të deklarohen rreth pjesëmarrjes në koalicionin ndërklombëtar kundër Irakut. Nga Maqedonia është kërkuar pjesëmarrje e drejtpërdrejtë në koalicionin ndërkombëtar për çarmatimin e mundshëm të Sadam Huseinit, ka bërë të ditur Ambasada e Shteteve të Bashkuara në Shkup.

 

Burimet e Qeverisë maqedonase kanë thënë se ende ekzistojnë dilema rreth pjesëmarrjes së ushtarëve të Maqedonisë në sulmin e mundshëm kundër Irakut.

 

 

Parlamenti i Serbisë dhe Malit të Zi dje e zgjodhi Svetozar Maroviqin president të parë të kësaj bashkësie

 

Podgoricë-Beograd, 8 mars 2003 - Parlamenti i Serbisë dhe Malit të Zi dje e zgjodhi Svetozar Maroviqin nga Mali i Zi president të parë të bashkësisë së re serbo-malazeze. Zgjedhja e tij e shënon fundin e Vojisllav Koshtunicës, i cili ishte në krye të ish-federatës jugosllave.

Sipas kornizës kushtetuese Maroviq do të jetë president i Këshillit të ministrave të bashkësisë shtetërore. Ai do të kryej edhe detyrën e kryeministrit federal.

 

 

Gjykata e Qarkut në Vranjë ka liruar nga paraburgimi në mungesë faktesh edhe tre shqiptarë

 

Vranjë, 8 mars 2003 - Gjykata e Qarkut në Vranjë ka liruar nga paraburgimi në mungesë faktesh edhe tre shqiptarë, të cilët janë arrestuar nën dyshimin se "janë marrë me veprime terroriste". Ndërkaq në paraburgim kanë mbetur edhe tre shqiptarë të tjerë, kanë njoftuar burimet shqiptare në Luginën e Preshevës.

 

 

Presidenti amerikan Bush ka akuzuar presidentin Husein se po zhgenjen inspektoret

 

Uashington, 8 mars 2003 - Presidenti amerikan Xhorxh Bush ka akuzuar presidentin irakian Sadam Huseinin se me vetëdije po zhgenjen inspektorët e Kombeve te Bashkuara per kontrolin e armeve.

 

Ai nuk po çarmatoset. Sipas presidentit amerikan, SHBA-te posedojne informacione te sherbimeve te fshehta ku deshmohet se Iraku vazhdon te fshehë raketa te ndaluara dhe materiale per prodhimin e armeve me për asgjësim masiv.

 

 

Janë arrestuar djemtë e shefit të organizates terroriste El Kaida, Osama bin Laden

 

Islamabad, 8 mars 2003 - Në Juglindje të Avganistanit si duket janë arrestuar djemtë e shefit të organizates terroriste El Kaida, Osama bin Laden. Kështu njoftuan qarqet zyrtare në Pakistan sipas një lajmi të AP-së.

 

 

Inspektorët paraqesin raportin

 

Nju Jork, 8 mars 2003 - Këshilli i Sigurimit të Kombeve të Bashkuara ka debatuar për raportin e kryeinspektorit të armëve të OKB-së, Hans Bliks, për përparimin e çarmatimit të Irakut.

 

Në raportin e tij të tretë para Këshillit të Sigurimit, zoti Bliks tha se Iraku po bashkëpunonte më mirë me inspektorët OKB-së dhe se procesi i inspektimeve kishte dhënë rezultate të rëndësishme drejt çarmatimit.

 

Por zoti Bliks tha se Iraku vazhdonte të shkelte rezolutën e OKB-së dhe do të duheshin muaj të tërë inspektimesh për të vendosur nëse Iraku kishte zbatuar plotësisht kërkesat për t'u çarmatosur.

 

 

Palestinezët e maskuar kanë vrarë dy izraelitë

 

Jerusalem, 8 mars 2003 – Dy izraelitë janë vrarë nga palestinezët e maskuar si hebrait religjioz në një vendbanim në Bregun Perendimor, ndërsa trupat izraelite kanë riokupuar pjesë të Rripit verior të Gazës, duke krijuar kështu frikën për ndonjë konflikt në prak të luftës potenciale në Irak, njofton AFP.

 

Të dy personat e armatosur që kryen sulmin në vendbaniin Kirjat Arba, afër qytetit të ndarë Hebron, janë ndër shtatë palestinezët e vrarë nga trupat izraelite, pasi më parë kishin kryer sulme në kolonitë ebraite në territoret e okupuara.

 

 

Ushtria amerikane ka arrestuar shtatë ekstremistë të dyshimtë në Afganistan

 

Baza e Bagramit, 8 mars 2003 – Ushtria amerikane ka deklaruar se ka arrestuar shtatë ekstremistë të dyshimtë në Afganistan, që besohet të jenë përzier në punimin e bombave, njofton AFP.

 

Koloneli Roxher King, zëdhënës kryesor i forcave aleate në Afganistan, ka thënë se të arrestuarit janë kapur nga forcat speciale amerikane në provincën Helmand, që shtrihet nga qendra e Afganistanit në drejtim të kufirit jugor me provincën e Baluçistanit të Pakistanit.

 

 

Shtetet e Bashkuara kanë kërkuar nga Gjermania t'i dëbojë disa diplomatë të Irakut

 

Berlin, 8 mars 2003 - Ministria e Jashtme gjermane tha se Shtetet e Bashkuara kanë kërkuar nga Qeveria e Gjermanisë t'i dëbojë disa diplomatë të Irakut. Agjencitë e citojnë një zyrtar të ministrisë së jashtme të ketë thënë se Qeveria gjermane e shqyrton kërkesën, por ai nuk e ka saktësuar numrin e diplomatëve.

 

 

Aeroplanët luftarakë amerikanë dhe britanikë e kanë sulmuar një sistem radarësh të Irakut

 

Kuvajt, 8 mars 2003 - Aeroplanët luftarakë amerikanë dhe britanikë e kanë sulmuar një sistem radarësh të Irakut në jug të vendit. Komanda ushtarake e Shteteve të Bashkuara tha se pas dyfishimit të patrullimeve mbi zonën e ndalim-fluturimeve, vëzhgimet tani bëhen me mbi 500 aeroplanë në ditë.

 

 

SHBA-të, Britania dhe Spanja e kanë propozuar 17 marsin afat të fundit për Irakun

 

Nju Jork, 8 mars 2003 - Shtetet e Bashkuara, Britania dhe Spanja e kanë propozuar 17 marsin si afat të fundit që Iraku plotësisht t'u bindet inspektimeve të Kombeve të Bashkuara.

 

Tre vendet e kanë futur këtë datë në projekt rezolutën, e cila i deklaron luftë Irakut nëse Bagdadi i shkel obligimet për çarmatimin dhe implikon autorizimin e përdorimit të forcës ushtarake.  

  

  

Janë vrarë shtatë pjesëtarë të Al Kaidës

 

Islamabad, 8 mars 2003 - Njoftohet se sot janë vrarë shtatë pjesëtarë të Al Kaidës ndërsa tetë të tjerë janë plagosur, duke përfshirë edhe dy djemtë e Osama bin Ladenit, në një operacion në Afganistan jo larg në kufirin me Pakistanin.

 

Zyrtarët amerikanë për luftë kundër terrorizmit kanë mohuar konstatimin për arrestimin e dy djemve të Bin Ladenit.

 

Zëdhënësi i ushtrisë amerikane në bazën e Bagramit, koloneli Roxher King, nuk ka mundur të konfirmojë se janë arrestuar dy djemtë e Bin Ladenit.

 

Edhe komandanti afgan në Rabat Haxhi Eid Mohamed ka përgënjeshtruar lajmin për arrestimin.

 

 

Armata izraelite ka vrarë themeluesin e krahut ushtarak të Hamasit, Ibrahim al-Makadma

 

Gaza, 8 mars 2003 – Armata izraelite ka vrarë sot (të shtunën) në Rripin e Gazës komandantin e lartë dhe njëherësh themeluesin e krahut ushtarak të Hamasit, Ibrahim al-Makadma, 51- vjeçar dhe tre militantë të tjerë me një godtitje rakete nga helikopteri të automobilit të tyre dhe kështu janë hakmarrë ndaj këtij grupi islamik militant, njofton Rojter.

 

Gjatë këtij sulmi janë plagosur gjithashtu edhe 10 fëmijë shkolle. Në këtë sulm kanë marrë pjesë katër helikopterë izraelitë.

Autoriteti palestionez e ka dënuar fuqishëm këtë vrasje dhe ka thënë se Izraeli do të mbajë përgjegjësi për konsekuencat. Makadma është militanti më i lartë palestinez, i vrarë nga Izraeli që kur ka filluar kryengritja palestineze në vitin 2000.

Copyright©2000-2003 Trepca.net - Të gjitha të  drejtat e rezervuara.