Lajme

E premte, 7 mars 2003

Përmbajtja:

• Presidenti Rugova me rastin e 13-vjetorit priti një delegacion të Forumit të Gruas të LDK-së

• Shtajner thotë se çështja Baliq i është kaluar Gjykatës Supreme të Kosovës

• Shtajner ka suspenduar sekretarin e përhershëm në Ministrinë e Shëndetësisë Pleurat Sejdiun

• Shërbimi Dagonor në vitin e kaluar ka mbledhur rreth 370 milionë euro, që përbën rreth 80 për qind të buxhetit të Kosovës

• Në kuadër të manifestimit tradicional "Epopeja e UÇK-së" u mbajtë një akademi përkujtimore

• U bën homazhe para varrit të komandantit legjendar Adem Jashari dhe para varreve të dëshmorëve të tjerë anembanë Kosovës

• Udhëheqja e KK të Prishtinës vuri kurora lulesh në Kompleksin Memorial të Jasharajve në Prekaz

• B. Bukoshi konstaton se faktori politik shqiptar nuk është i përgatitur për bisedime me Beogradin

• Gjilan: Shoqata humanitare "Bereqeti" ndihmon familjet e dëshmorëve

• Udhëheqësit e komunave të Kosovës u takuan me përfaqësuesit e kompanisë "Nokia" në Helsinki të Finlandës

• Investitorë gjermanë vizituan Kuvendin Komunal të Prishtinës

• Gjykata e Qarkut në Prizren konfirmon se procesi gjyqësor ndaj vrasësve të Ukë Bytyqit pritet të fillojë në muajin prill

• Kryetari i Kuvendit Komunal të Prishtinës, përgëzon mësimdhënësit për Ditën e Mësuesit

• KFOR-i instaloi nxehjen qendrore në Qendrën rinore të Podujevës

• Rrjeti televiziv BBC përgatitë dokumentar për maskarën në familjen Bogujevci dhe Duriqi

• Fakulteti Juridik i Universitetit të Minesotës i dhuroi një fond librash Fakultetit Juridik të Prishtinës

• S. Hasellok thotë se dialogu me Beogradin duhet realizuar mbi baza reale

• Karla Del Ponte thotë se gradualisht po mbyllet rrjeti rreth të akuzuarëve për krime lufte i Karaxhiqit dhe Mlladiqit

• Persona të panjohur kanë bërë atentat ndaj dekanit të FSH Ylli Pango duke montuar një granatë në garazhën e tij

• Agjencia Amerikane për Zhvillim Ndërkombëtar i dha Maqedonisë një ndihmë prej 12 milionë dollarësh

• Zëvendëskryeministri i Maqedonisë Musa Xhaferi thotë se BE do të ndihmojë për zbatimin e Marrëveshjes së Ohrit

• Në Kumanovë nëntë gjimnazistë shqiptarë kërkuan ndihmë mjekësoare duke shfaqur simptome helmimi

• Qeveria e Serbisë ka pranuar propozimin e shefit të UNMIK-ut për bisedime në Prishtinë

• Pas një dekade u hap qarkullimi hekurudhor Podgoricë – Shkodër

• U formua Komisioni parlamentaro-qeveritar për ndriçimin e fatit të të zhdukurëve shqiptarë e maqedonas

• Nga orteku i borës në Indi kanë humbur jetën të pakten 17 persona

• Forcat izraelite krijojnë zonë të sigurisë në Rripin verior të Gazës

• Në një fatkeqësi ajrore në Algjeri kanë humbur jetën 102 njerëz

• Pauell: KS i OKB-së dhe bashkësia ndërkombëtare po testohen me Irakun

• Bush: Nëse do të na duhet, ne do të veprojmë pa miratimin e OKB-së

• Kufiri i Kuvajtit "pritet për luftë"

• Aspirina kundër kancerit

Presidenti Rugova me rastin e 13-vjetorit priti një delegacion të Forumit të Gruas të LDK-së

 

		Prishtinë, 7 mars 2003 - Presidenti i Kosovës Ibrahim Rugova me rastin e 13-vjetorit të Forumit të Gruas të LDK-së ka pritur një delegacion të këtij Forumi, të cilit i printe kryetarja e saj Melihate Tërmkolli. Në këtë takim mori pjesë edhe kryetari i Kuvendit të Kosovës, Nexhat Daci. Me këtë rast Presidenti i Kosovës dr. Ibrahim Rugova ndër të tjera tha: "Deputete të Kuvendit të Kosovës, këshilltare, udhëheqëse të institucioneve të Kosovës. Kjo është një ditë e shënaur për Forumin e Gruas të LDK-së, sepse me këtë forum filloi organizimi edhe i forumeve të tjera të partive, grupeve politike në Kosovë". Presidenti Rugova theksoi se LDK-ja është shembull që i dha shans gruas që të jetë në të gjitha strukturat e shtetit tonë, që e ndërtuan dhe që sot bota e njeh si shtet paralel. Për ne ishte shtet, por është edhe një simbolikë, sepse bota e njeh si përvojë të rezistencës dhe luftës së një populli për liri, pavarësi e demokraci. Ai vlerësoi se është bërë avansimi i pozitës e gruas në Kosovë në aspektin institucional. Presidenti i Kosovës theksoi se duhet të bëhet çmos se nëse dëshirohet që të rejat dhe vashat të jenë të përgatitura duhet të krijohen mundësi që të kenë vende pune, të shkollohen dhe të inkuadrohen sa më shpejt në shoqërinë dhe në shtetin e kosovës.

  

Presidenti Rugova me këtë rast falënderoi Forumim e Gruas së LDK-së për punën që ka bërë gjatë 13 vjetëve në organizimin e jetës së gruas në Kosovë.

 

Ai ka shtuar se gruaja duhet ta ketë pozitën e merituar në shoqëri dhe se shqiptarët tradicionalisht gjithmonë i kanë qmuar gratë dhe ajo gjithmonë është konsultuar, ndonëse nuk kemi pasur shtet, por e kemi pasur jetën tonë shtetërore dhe shoqërore, sepse për ndryshe do të ishin zhdukur.

 

Andaj sot gruaja do të jetë pjesë e shtetit dhe institucioneve të kosovës të cilat si edhe deri më tash do të angazhohen për lirinë dhe pavarësisë së Kosovës.

Presidenti Rugova vlerësoi se Kosova gjatë këtyre tri viteve të fundit ka ecur shumë shpejt në zhvillimin e saj dhe gjithnjë e më shumë po integrohet në institucionet ndërkombëtare. Ai ka shtuar se Kosova duhet të integrohet sa më parë në NATO, në BE dhe të ketë miqësi të përhershme në SHBA.

Me këtë rast presidenti Rugova delegacionit të Forumit të Gruas së LDK-së ia ditën ndërkomëbtare të gruas 8 Marsin. Ndërkaq, kryetarja e Forumit të Gruas të LDK-së, Melihate Tërmkolli pasi e falenderoi Presidentin Rugova për këtë këtë pritje, veç tjerash theksoi:

"Forumi i Gruas i LDK, si edhe gjithë LDK-ja, ishte faktor i rëndësishëm në të gjitha proceset politike e kombëtare në Kosovë gjatë gjithë kohës së veprimtarisë së vet. Forumi i Gruas, theksoi znj. Tërmkolli, në vazhdimësi u dëshmua dhe po dëshmohet mekanizëm i fuqishëm i LDK në drejtim të forcimit dhe stabilitetit të institucioneve të Kosovës, të demokratizimit të vendit dhe për njohjen më të shpejtë të Pavarësisë së Kosovës.

Ajo theksoi se avancimi i pozitës së gruas dhe ngritja e saj në nivel të trajtimit institucional e ligjor, forcimi i mëtutjeshëm i rolit të gruas mbrenda LDK, janë objektiva permanente të Forumit të Gruas.
Në këtë shënim të përvjetorit të punës së vet, Forumi i Gruas i LDK shpreh falënderim të thellë për të gjithë ata që ndihmuan dhe po ndihmojnë Kosovën dhe popullin e saj në ndërtimin e demokracisë dhe pavarësisë.

Me këtë rast znj. Forumi i Gruas i LDK ua uron Ditën e Mësuesit të gjithë punëtorëve të arsimit dhe poashtu ua uron të gjitha grave Ditën Ndërkombëtare të Gruas.

Ndërkaq, kryetari i Kuvendit të Kosovës akademik Nexhat Daci theksoi se edhe në vitin 1981, megjithë represionin e madh nga regjimi serb në konviktet e studenetëve, vajzat shqiptare e kanë bartur një barrë të rëndë të këtij aktiviteti në ato rrethana të rënda, andaj që atëherë ekziston një respekt i fuqishëm i gjithë neve për atë çka mund të bëje femra shqiptare. Z. Daci ka nënvizuar se edhe në Parlament gëzon më shumë përkrahje nga deputetet sesa nga deputetët.

 

 

Shtajner thotë se çështja Baliq i është kaluar Gjykatës Supreme të Kosovës

 

Prishtinë, 7 mars 2003 - Shefi i UNMIK-ut Mihael Shtajner tha se Gjykata e Lartë e Kosovës do të vendosë lidhur me vendimin e kryeministrit Bajram Rexhepi për shkarkimin e Numan Baliqit nga detyra e ministrit të shëndetësisë. Z. Shtajner ka thënë se deri me vendimin e Gjykatës, ushtruese e detyrës do të jetë Resmie Mumxhiu, e emëruar në këtë post nga kryeministri Rexhepi.

 

Ai tha se një vendim i tillë nga ana e tij është marrë me qëllim që të ruhet qëndrushmëria edhe funksionimi i institucioneve të Kosovës dhe ka shtuar se vendimi i kryeministrit Rexhepi për shkarkimin e ministrit të shëndetësisë ishte marrë në afekt.

 

Ministri Baliq do të ankohet për këtë vendim në Gjykatën Supreme, tha Shtajner, duke, shpjegur involvimin e tij në këtë rast. Kështu që tash i mbetet Gjykatës Supreme të Kosovës që të vendosë për legalitetin e vendimit të kryeministrit dhe çkado që kjo gjykatë të vendosë do të hyjë në fuqi, do të implementohet, theksoi Shtajner.

 

 

Shtajner ka suspenduar sekretarin e përhershëm në Ministrinë e Shëndetësisë Pleurat Sejdiun

 

Prishtinë, 7 mars 2003 - Kryeadministratori i Kosovës, Mihael Shtajner ka suspenduar nga detyra sekretarin e përhershëm në Ministrinë e Shëndetësisë Pleurat Sejdiun.

 

Shtajner ka thënë se do të marrë një vendim ekzekutiv lidhur me këtë rast. Por, megjithatë edhe për këtë çështje do të vendoset në Gjykatën Supreme të Kosovës.

 

 

Shërbimi Dagonor në vitin e kaluar ka mbledhur rreth 370 milionë euro, që përbën rreth 80 për qind të buxhetit të Kosovës

 

Prishtinë, 7 mars 2003 - Shërbimi Dagonor i Kosovës në vitin e kaluar ka mbledhur rreth 370 milionë euro, shumë kjo që përbën rreth 80 për qind të buxhetit të Kosovës. Shërbimi Doganor i Kosovës në fund të vitit të kaluar ka punësuar 345 punëtorë, prej të cilëve 3 ndërkombëtarë dhe 14 për qind nga pakicat etnike.

Gjatë këtij viti pritet miratimi i Ligjit mbi Doganat. Ligji i ri do të paraqet legjislacionin në përputhje me atë të Bashkimit Evropian, thuhet në një njoftim të Shërbimit Doganor të Kosovës. Këtë vit pritet të paraqiten edhe banderolat për duhan dhe alkool, por do të bëhet edhe kompjuterizimi i dokumentacionit.

 

E gjithë kjo më synim të përfundimit të procedurave, rritjen e të hyrave dhe masat e ashpra për shkelësit e ligjit. Pas miratimit të ligjit të ri të doganave në këtë vit parashihet një numër ekipësh antikontrabandë, por edhe njësi bashkëpunimi dhe hulumtimi.

 

 

Në kuadër të manifestimit tradicional "Epopeja e UÇK-së" u mbajtë një akademi përkujtimore

 

Prishtinë, 7 mars 2003 - Në kuadër të manifestimit tradicional "Epopeja e UÇK-së" në sallën "1 Tetori" në Prishtinë mbrëmë u mbajtë një akademi përkujtimore. Ky manifestim u hap me himnin kombëtar dhe me një minut heshtje në nderim të gjithë dëshmorëve.

Në këtë akademi morën pjesë drejtuesit më të lartë të vendit, përfaqësues nga mbarë hapësira shqiptare dhe qindra qytetarë. Fjalën e rastit e mbajti kryeministri Bajram Rexhepi. Ai veç tjerash, tha se janë dëshmorët ata që e vulosën fitoren mbi armikun dhe se sakrifica e tyre na obligon ta vazhdojmë amanetin e tyre.

Pjesëmarrësve të kësaj akademie iu drejtua edhe këshilltari i presidentit të Shqipërisë, Afrim Krasniqi, i cili përcolli përshëndetjet dhe respektin e presidentit Moisiu për veprën e madhe të komandantit legjendar Adem Jashari.

 

Ai tha se populli i Kosovës është duke bërë hapa të sigurtë në përparimin politik, ekonomik dhe social dhe nënvizoi se tash Kosova ka nevojë për ndërtim të shtetit dhe integrim në Evropë.

Ndërkaq, në emër të familjes Jashari këtë akademi e ka përshëndetur Bekim Jashari. Akademia ka përfunduar me ekzekutimin e disa veprave orkestrale nga Filharmonia e Kosovës.

Kjo akademi u mbajt nën patronatin e kryeministrit të Kosovës Bajram Rexhepi.

 

 

U bën homazhe para varrit të komandantit legjendar Adem Jashari dhe para varreve të dëshmorëve të tjerë anembanë Kosovës

 

Prishtinë, 7 mars 2003 - Në ditën e dëshmorëve eprorë të lartë të TMK-së, personalitete të jetës publike dhe një numër i madh i qytetarëve të Kosovës, kanë bërë homazhe para varrit të komandantit legjendar Adem Jasharit në Prekaz dhe në varrezat e dëshmorëve në gjithë Kosovën.

Në kuadër të manifestimit tashmë tradicional "Epopeja e UÇK-së", një delegacion i SHP të TMK-së dhe Zona e Pestë e TMK-së bënë homazhe edhe pranë varrit të Zahir Pajazitit në fshatin Orllan të Komunës së Podujevës.

 

Homazhe janë bërë edhe tek varri i dëshmorit Hakif Zejnullahu, pastaj pranë varrezave të dëshmorëve në Gllogjan të Deçanit, si dhe në varrezat e dëshmorëve tjerë anembanë Kosovës.

 

 

 

Udhëheqja e KK të Prishtinës vuri kurora lulesh në Kompleksin Memorial të Jasharajve në Prekaz

 

Prishtinë, 7 mars 2003 – Një delegacion i Kuvendit Komunal të Prishtinës i përbërë nga Shefki Gashi, nënkryetar dhe kol. Zaim Berisha, drejtor i Drejtoratit për Mbrojtje Civile dhe Emergjencë në KK të Prishtinës, vizituan dje Kompleksin Memorial të Jasharajve në Prekaz të Skënderajt dhe vunë kurora lulesh, me rastin e pesë vjetorit të rënies së komandantit legjendar të Ushtrisë Çlirimtare të Kosovës, Adem Jasharit dhe të dëshmorëve të tjerë të familjes Jashari.

Pas vënies së kurorës mbi varret e dëshmorëve, delegacioni i Kuvendit Komunal të Prishtinës, në Kullën e Jasharajve u prit edhe nga Rifat Shaban Jashari. Gjatë bisedës, Rifat Jashari e falënderoi delegacionin e KK të Prishtinës për vizitën, e cila kaloi në një atmosferë të përzemërt, njofton Zyra për Informim e KK të Prishtinës.

 

 

 

B. Bukoshi konstaton se faktori politik shqiptar nuk është i përgatitur për bisedime me Beogradin

 

Prishtinë, 7 mars 2003 - Partia e Re e Kosovës në një konferencë për gazetarë ka vlerësuar deklaratën e përbashkët të përfaqësuesve të lartë të institucioneve të Kosovës me kryeadministratorin Shtajner për fillimin e bisedimeve për çështje teknike mes Prishtinës dhe Beogradit.

 

Në këtë takim me gazetarë, kryetari i kësaj partie Bujar Bukoshi ka konstatuar se "bisedimet në këto rrethana janë kompensim i dështimit të klasës politike të Kosovës dhe i mos-suksesit të administrimit ndërkombëtar në Kosovë".

 

Sipas tij faktori politik Qeveria aktuale nuk ka idenë as konceptin si të qeverisin Kosovën. Z. Bukoshi është i mendimit se kryeministri as që është duke ditur se çfarë bën patroni i partisë së tij. Ministrat e tij informohen nga gazetat për fillimin e bisedimeve.

 

Shqiptarët, thotë z. Bukoshi nuk i ka penguar askush, as z. Steiner për tu pregaditur për bisedime, prandej nuk kemi të drejtë që atë ta akuzojmë për mangësitë tona. Mirëpo, ne kemi të drejtë dhe duhet të kërkojmë nga UNMIK-u dhe z. Steiner që ata të qeverisin tërë territorin e Kosovës dhe të mos tolerojnë sistemin paralel të shtetit serb në veriun e Kosovës.

 

 

Gjilan: Shoqata humanitare "Bereqeti" ndihmon familjet e dëshmorëve

 

Gjilan, 7 mars 2003 - Shoqata humanitare "Bereqeti" në Gjilan, për nder të pesëvjetorit të Epopesë së Prekazit dhe luftës për çlirimin e Kosovës ka ndarë sot për të gjitha familjet e dëshmorëve nga një pako ushqimore, përkatësisht nga 12 kilogramë suxhuk.

Një sasi e këtyre ndihmave do t`u shpërndahet edhe familjeve me jetimë dhe të tjerëve, që kanë nevojë më të madhe për to, thotë koordinatori Agim Hyseni.

Duke qenë dorë e ndihmës për skamnorët, "Bereqeti" ka ndihmuar disa herë edhe të zhvendosurit nga Lugina e Preshevës dhe IRJM.

 

 

Udhëheqësit e komunave të Kosovës u takuan me përfaqësuesit e kompanisë "Nokia" në Helsinki të Finlandës

 

Prishtinë, 7 mars 2003 – Kryetari i Kuvendit Komunal të Prishtinës, Ismet Beqiri, si dhe disa kryetarë të tjerë të komunave të Kosovës Faruk Spahija, kryetar i KK të Mitrovicës, Aqif Shehu, kryetar i KK të Gjakovës, Adem Salihaj, kryetar i KK të Ferizajt, Agim Veliu, kryetar i KK të Podujevës e Ali Lajçi, kryetar i KK të Pejës, u takuan sot me z. Mati Peltola dhe Hans Holmberg, përfaqësues të kompanisë së njohur të telefonisë "Nokia" në kryeqytetin e Finlandës në Helsinki.

Gjatë takimit të sotëm, udhëheqësit e pushtetit lokalë dhe përfaqësuesit e kësaj kompanie biseduan lidhur me funksionimin sa më të suksesshëm të sistemit të telefonisë, si dhe me qëllim të këmbimit të përvojave në këtë fushë, sidomos kur dihet se kompania "Nokia" deri tash është e shtrirë në mbi 100 shtete të botës.

Gjatë ditës së sotme, kryetari KK të Prishtinës, Ismet Beqiri dhe kryetarët tjerë të komunave të Kosovës patën një takim edhe me kompaninë e njohur "Jakopori" në Helsinki. Kjo kompani e cila ka të punësuar mbi 5 mijë punëtorë është e përqëndruar kryesisht në tri segmente kryesore: në ekonominë pyjore, në energjetikë, si dhe në ambient e infrastrukturë.

 

 

Investitorë gjermanë vizituan Kuvendin Komunal të Prishtinës

 

Prishtinë, 7 mars 2003 – Një grup investitorësh gjermanë të prirë nga z.Helmut Penc kanë vizituar sot Kuvendin Komunal të Prishtinës dhe u pritën nga nga Sami Hamiti, ushtrues detyre i kryeshefit te Ekzekutivit dhe Shefki Gashi, zëvendëskryetar i KK të Prishtinës.

Mysafirët nga Gjermania kane shfaqur para nikoçirëve interesimin e tyre për investime të ndryshme në qytetin e Prishtinës dhe në Kosovë në fushën e ndërtimtarisë, të planifikimit hapësinor në sferen e rregullimit te hapësirës për parkingje kolektive, pastaj mbledhjen dhe riciklimin e mbeturinave, në hotelieri e fusha të tjera.

Ushtruesi i detyrës së kryeshefit ekzekutiv z. Sami Hamiti, u ka ofruar përkrahje dhe gatishmëri mysafirëve gjermanë për investime në Prishtinë duke pasur parasysh interesin e dyanshëm. Për bashkëpunim është shprehur edhe zevendëskryetari i KK z.Shefki Gashi, duke insistuar që këso përkrahje të afrojnë edhe institucionet qendrore të Kosovës, sidomos në planin e infrastrukturës ligjore.

 

 

Gjykata e Qarkut në Prizren konfirmon se procesi gjyqësor ndaj vrasësve të Ukë Bytyqit pritet të fillojë në muajin prill

 

Therandë, 7 mars 2003 - Burimet e Gjykatës së Qarkut në Prizren kanë bërë të ditur se procesi gjyqësor ndaj vrasësve të ish-kryetarit të Kuvendit Komunal të Therandës, Ukë Bytyqit, pritet të fillojë nga mesi i muajit prill të këtij viti.

Avokati i të arrestuarëve, Rexhep Hasani ka deklaruar se procesi i hetimeve është në përfundim e sipër dhe nga fundi i marsit pritet që lënda t'i përcillet prokurorisë, e cila do të ngrejë aktakuzën.

 

 

Kryetari i Kuvendit Komunal të Prishtinës, përgëzon mësimdhënësit për Ditën e Mësuesit

 

Prishtinë, 7 mars 2003 – Kryetari i Kuvendit Komunal të Prishtinës, Ismet Beqiri me rastin e 7 Marsit - Ditës së Mësuesit ka përgëzuar mësimdhënësit e Komunës së Prishtinës.

 

Në përgëzimin e kryetarit Beqiri, theksohet se mësimdhënësit ishin shtylla e shtetësisë së Kosovës, jo vetëm gjatë dekadës që e lamë pas nën kushtet e regjimit serb. Ai beson për një të ardhme më të ndritur të mësimdhënësve, si dhe në një mbështetje më të theksuar institucionale në fushën e arsimit.

Po ashtu kryetari i KK të Prishtinës, Ismet Beqiri përgëzon edhe nënat, me ç'rast atyre ua uron 8 Marsin – Ditën e Gruas, ka bërë të ditur, Zyra për Informim e KK të Prishtinës.

 

 

KFOR-i instaloi nxehjen qendrore në Qendrën rinore të Podujevës

 

Podujevë, 7 mars 2003 (QIK) – Dy km në verilindje të Podujevës janë gjetur 2 raketa klasike antitank të prodhimit rus të cilat do të shkatërrohen nesër, ka njoftuar Kollarik duke pohuar se ato janë gjetur afër rrugës në fshatin Shtedim. Në pyetjen e gazetarëve se a janë ato raketa që kanë mbetur nga lufta, Kollarik mohoi duke thënë se ato mund të jenë lënë në atë vend kohët e fundit.

Situata e përgjithshme në rajonin e Podujevës është e qetë dhe një situatë e tillë po mbretëron edhe në kufirin e Kosovës me Serbinë, ka theksuar në konferencën e sotme për gazetarë zëvendëskomandanti i Batalionit të Dytë Çeko-Sllovak, oficeri Kollarik.

 

Ai ka theksuar se KFOR-i po vazhdon me patrullimet rutinore dhe operacionet, që kanë për qëllim ruajtjen e sigurisë për të gjithë qytetarët e Podujevës. Shefi i CIMIC-ut, mbitogeri Pavel Mraz, njoftoi se është duke vazhduar ndihma për familjet e varfëra të Podujevës nga kontigjenti i ndihmave humanitare të orgnizatës çeke ADRA.

"Ka përfunduar edhe projekti i instalimit të ngrohjes qendrore në Qendrën Rinore në Podujevë i cili ka kushtuar 5 mijë euro", tha z. Mraz. Ai ka theksuar se KFOR-i çek me rastin e ditës së mësuesit po ndihmon shkollën e mesme teknike "Fan S. Noli" për rregullimin e ambientit dhe se në bashkëpunim me DMPD-në po përgatitë ekspozitën e punimeve dhe të fotografive nga vizita e nxënësve të Podujevës bërë Republikës çeke.

 

 

Rrjeti televiziv BBC përgatitë dokumentar për maskarën në familjen Bogujevci dhe Duriqi

 

Podujevë, 7 mars 2003 (QIK) – Qëllimi i dokumentarit që ne po përgatisim është që të hedhet dritë mbi masakrën e 28 marsit 1999 mbi familjet Bogujevci dhe Duriqi, ka pohuar producenti Paresh Patel i cili bashkë me producentin tjetër Ian Hunter dhe kamermanin Will Edwards për katër ditë bëri gjirime në Podujevë dhe Prishtinë.

 

Z. Patel dhe ekipi i BBC-së ka takuar familjarët e familjes Bogujevci dhe familjarin Enver Duriqi i cili humbi familjen; gruan me katër fëmijët dhe nënën e babain e tij. I njëjti ekip ka bërë gjirime edhe me fëmijët Bogujevci të cilët i shpëtuan masakrës e që gjenden për trajtim shëndetësor në Mançester të Anglisë.

 

Kurse gjatë qëndrimit në Kosovë ky ekip ka takuar edhe disa nga dëshmitarët që mund të hedhin dritë në procesin gjyqësor që pritet të zhvillohet në Serbi.

Prej 3 marsit deri të enjten një ekip i rrjetit televiziv BBC nga Londra qëndroi në Kosovë për të përgatitur një film dokumentar për masakrën në familjet Bogujevci dhe Duriqi, ka njoftuar sot Drejtoria për marrëdhënie me publikun dhe demokratizim e Podujevës.

Do theksuar se me ekipin e BBC-së në Kosovë qëndroi edhe drejtoresha e Fondit për të drejtën humanitare z. Natasha Kandiç.

 

 

Fakulteti Juridik i Universitetit të Minesotës i dhuroi një fond librash Fakultetit Juridik të Prishtinës

 

Prishtinë, 7 mars 2003 - Fakulteti Juridik i Universitetit të Minesotës ka dhuruar më se 500 kilogramë libra për Fakultetin Juridik të Universitetit të Prishtinës. Ky donacion ka rezultuar nga vizita e një delegacioni të Fakultetit Juridik në Shtetet e Bashkuara në tetor të vitit 2000, vizitë kjo e cila qe organizuar nga Zyra e SHBA-ve në Prishtinë.

Në një letër dërguar nga profesorët dhe studentët e Fakultetit Juridik, Z. Tracy Fisher, njëra nga organizatoret e mbledhjes së librave, e cila u takua me delegacionin nga Kosova, thotë: "Shpresojmë se materialet që u kemi dërguar do t’i ndihmojnë fakultetit dhe studentëve të Fakultetit Juridik të Universitetit të Prishtinës që t’i arrijnë më lehtë qëllimet e tyre"

 

 

S. Hasellok thotë se dialogu me Beogradin duhet realizuar mbi baza reale

 

Prishtinë, 7 mars 2003 - Dialogu me Beogradin duhet realizuar mbi baza reale, thotë shefi për informim i Misionit të UNMIK-ut në Prishtinë Sejmon Hasellok. Sipas tij, ky do të jetë një dialog ekspertësh që do të bisedojnë me homologët respektiv në baza të barabarta.

Z. Hasellok i bëri këto prononcime në radion "Evropa e lirë".

Ai ka shtuar se krerët e partive më të mëdha politike në Kosovë kanë mbështetur nismën e kryeadministratorit Shtajner për këtë dialog, përfshirë këtu edhe kryeministrin.

 

Për këtë çështje thotë Haselok tashmë ekziston një koncensus i përgjithshëm, ndonëse është e vërtetë se mbretëron një atmosferë nervoze, veçanërisht pasa asaj çfarë ka ndodhur pas takimit që është zhvilluar në Zvicër vitin e kaluar, thotë Hasellok.

Ai ka shtuar se Misioni i UNMIK-ut do të jetë pjesë përbërëse e delegacionit nga Kosova. Pra delegacioni i Kosovës do të jetë i përbashkët ndërmjet nesh si administratë ndërkombëtare dhe institucioneve të përkohshme.

 

 

Karla Del Ponte thotë se gradualisht po mbyllet rrjeti rreth të akuzuarëve për krime lufte i Karaxhiqit dhe Mlladiqit

 

Bruksel, 7 mars 2003 - Kryeprokurorja e Tribunalit të Hagës Karla Del Ponte ka deklaruar në Bruksel se gradualisht po mbyllet rrjeti rreth të akuzuarëve për krime lufte i Radovan Karaxhiqit dhe Ratko Mlladiqit, duke shtuar se në Serbi dhe Mal të Zi mungon dëshira për kapjen e tyre. Ajo ka theksuar se është në dijeni se ku gjenden të arratisurit më të njohur ndërkombëtar.

 

Ajo ka bërë të ditur se gjenerali i ushtrisë serbe të Bosnjes Ratko Mlladiq gjendet në Serbi, përkatësisht në Beograd, të cilin e ruajnë pjesëtarët e ushtrisë, thotë Karla Del Ponte, duke shtuar se është shumë i lehtë arrestimi i tij nëse ekziston vullneti për këtë.

 

Ajo gjithashtu dha edhe adresën e ish-liderit të serbëve të Bosnjes Radovan Karaxhiqit, i cili sipas saj sillet në relacionin mes Republikës serbe dhe Malit të Zi.

"E dimë se ka qenë dhe ndoshta Karaxhiq ende është në Manastirin Ostrok në Mal të Zi", - deklaroi zonja Del Ponte.

Në takimin me Havier Solanën bëhet e ditur jozyrtarisht se Karla Del Ponte, veç tjerash e ka informuar atë rreth arrestimeve të fundit në Kosovë dhe se Gjykata Ndërkombëtare për Krimet e Luftës vazhdon me hetime për raste të ndryshme të krimeve që kanë ndodhur në Kosovë gjatë periudhës së luftës.

 

 

Persona të panjohur kanë bërë atentat ndaj dekanit të FSH Ylli Pango duke montuar një granatë në garazhën e tij

 

Tiranë, 7 mars 2003 - Atentati i ndodhur në ditën e enjte rreth orës tetë të mëngjesit ndaj dekanit të Fakultetit të Shkencave Ylli Pango, ishte padyshim i organizuar dhe i menduar që më parë, njoftuan masmediat e Tiranës. Granata e vendosur në garazhën e banesës së tij në qytetin "Studenti" të Tiranës ka shpërthyer sapo është hapur dera.

 

Z. Pango duket se e ka evituar valën e drejtepërdrejtë të goditjes, pasi e ka vërejtur granatën vetëm pak çaste para shpërthimit dhe është shtrirë menjëherë në tokë. Si pasojë e këtij shpërthimi z. Pango është plagosur në disa pjesë të trupit dhe është ndihmuar nga fqinjët, të cilët e kanë dërguar në spitalin ushtarak. Mjekët e kësaj qendre spitalore kanë deklaruar se jeta e tij nuk është në rrezik.

Sipas vetë z. Pango ky atentat ka ndodhur si pasojë e shfaqjes së qëndrimeve të tij në opinion dhe deklaratave të ashpra që i ka bërë lidhur me zhvillimet e fundit në këtë vend. Ai është shprehur se ka pasur shpeshherë telefonata kërcëneuse.

Policia tashmë ka filluar hetime lidhur me këtë rast për të zbuluar motivet e këtij atentati.
Për këtë ngjarje kanë reaguar edhe përfaqësuesit e partive kryesore politike në Parlament, duke i bërë thirrje policisë dhe drejtësisë të angazhohen për gjetjen sa më të shpejt të autorëve dhe vënien e tyre para ligjit.

 

 

Agjencia Amerikane për Zhvillim Ndërkombëtar i dha Maqedonisë një ndihmë prej 12 milionë dollarësh

 

Shkup, 7 mars 2003 - Agjencia Amerikane për Zhvillim Ndërkombëtar i dha dje Maqedonisë një ndihmë prej 12 milionë dollarësh, si pjesë e marrëveshjes midis këtij vendi dhe Fondit Monetar Ndërkombëtar. Kjo marrëveshje për këtë ndihmë u nënshkrua ndërmjet ambasadorit amerikan në Shkup, Llorens Batler dhe ministrit të financave të Maqedonisë, Petar Goshev.

Ambasadori Batler tha se ky është një hap jetik për finalizimin e marrëveshjes me Fondin Monentar Ndërkombëtar që Maqedonia e ka nënshkruar para pak javësh. Ai ka theksur se i ka thënë qysh javën e kaluar ministrit Goshev se Shtetet e Bashkuara kanë 12 milionë arsye për ta mbështetur këtë vend të rajonit.

 

Ambasadori Batler bëri me dije se priten edhe katër-pesë milionë dollarë të tjerë brenda një ose dy muajsh ndihmë Maqedonisë nga Shtetet e Bashkuara.

 

 

Zëvendëskryeministri i Maqedonisë Musa Xhaferi thotë se BE do të ndihmojë për zbatimin e Marrëveshjes së Ohrit

 

Shkup, 7 mars 2003 - Zëvendëskryeministri i Maqedonisë, Musa Xhaferi deklaroi se Bashkimi Evropian do të ndihmojë për zbatimin e Marrëveshjes së Ohrit, por ndihma do të mvaret nga nevojat konkrete.

 

Përveç përkrahjes politike dhe marrjes së përgjegjësisë për realizimin e saj një pjesë e ndihmës që ofron bashkësia evropiane është ndihmë materiale për realizimin e dokumentit të Ohrit, citohet të ketë thënë z. Xhaferi.

 

 

Në Kumanovë nëntë gjimnazistë shqiptarë kërkuan ndihmë mjekësoare duke shfaqur simptome helmimi

 

Kumanovë, 7 mars 2003 - Në qytetin e Kumanovës, nëntë gjimnazistë shqiptarë, që i ndjekin mësimet në dy shkollat fillore "Bajram Shabani" dhe "Naim Frashëri" kanë kërkuar ndihmë mjekësore, duke shfaqur simptome të ngjashme me ato që para disa muajsh u quajtën helmime, të cilat deri tash nuk u ndriçuan.

 

Një përgjegjës i shkollës i tha BBC-së se nuk është e qartë nëse fjala është për helmime. Këta gjimnazistë kishin marramendje dhe dhembje në stomak.

 

 

Qeveria e Serbisë ka pranuar propozimin e shefit të UNMIK-ut për bisedime në Prishtinë

 

Beograd, 7 mars 2003 - Qeveria e Serbisë e ka pranuar propozimin e shefit të UNMIK-ut, Mihael Shtajner për bisedime në Prishtinë lidhur me çështjet praktike me interes të dyanshëm. Njoftohet se këtë delegacion do ta udhëheq ministrja për punë sociale Gordana Matkoviq.

 

 

Pas një dekade u hap qarkullimi hekurudhor Podgoricë – Shkodër

 

Podgoricë, 7 mars 2003 - Me hapjen solemne të hekurudhës Podgoricë - Shkodër pas një pauze dhjetëvjeçare sërish është vendosur qarkullimi hekurudhor midis Malit të Zi dhe Shqipërisë, njoftuan mbrëmë burimet në Tiranë dhe në Podgoricë.

 

 

U formua Komisioni parlamentaro-qeveritar për ndriçimin e fatit të të zhdukurëve shqiptarë e maqedonas

 

Shkup, 7 mars 2003 - Për fatin e gjashtë shqiptarëve të zhdukur dhe 13 maqedonasve gjatë konfliktit të vitit 2001 është formuar një komision parlamentaro-qeveritar, i cili më në fund familijarëve të të zhdukurëve do t'ua prezentojnë të vërtetën. Derisa deputetët shqiptarë kanë shprehur gatishmërinë për të bashkëpunuar me këtë komision, ish-ministri i punëve të brendshme Lube Boshkovski kategorikisht ka refuzuar pjesëmarrjen në të.

Këtë komision e ka formuar Këshilli Kombëtar i Sigurisë së Maqedonisë.

 

 

Nga orteku i borës në Indi kanë humbur jetën të pakten 17 persona

 

Nju-Delhi, 7 mars 2003 - Më shumë se 17 ushtarë indianë e humbën jetën nga orteku i borës në shtetin indian Xhamu dhe Kashmir. Kufomat e pesë viktimave janë nxjerrë nga ekipet shpëtimtare, të cilat kanë arritur me helikopterë në vendin e kapluar me ortekun e borës.

Zëdhënësi i trupave të Indisë tregoi se dhjetëra ushtarë kanë shpëtuar. Sipas tij, mbi 30 ushtarë e humbën jetën në orteqet dhe moti i lig me borë në muajin e fundit në rajonin e Himalajeve në Indi

 

 

Forcat izraelite krijojnë zonë të sigurisë në Rripin verior të Gazës

 

Gaza, 7 mars 2003 – Forcat izraelite kanë okupuar sot (të premten) një pjesë të territorit në Rripin verior të Gazës, që sipas një zyrtari të lartë është një vend tejet i përshtatshënm, prej nga palestinezët do të sulmonin me raketa Izraelin jugor, njofton Rojter.

 

Krijimi i kësaj zone të sigurisë, siç e ka quajtur Radioja izraelite, bëhet pas gjakderdhjeve të ditëve të kaluara kur humben jetën 11 palestinezë në sulmet izraelite dhe 15 izralelitë në sulmet vetëvrasëse palestineze.

 

 

Në një fatkeqësi ajrore në Algjeri kanë humbur jetën 102 njerëz

 

Algjer, 7 mars 2003 - Në fatkeqësinë e aeroplanit të Algjerisë që ishte nisur nga qyteti Tamarnaset në shkretëtirë në derjtim të kryeqytetit të vendit, kanë humbur jetën 102 njerëz, kurse vetëm një udhëtar ka mbijetuar me plagë të rënda.

 

 

Pauell: KS i OKB-së dhe bashkësia ndërkombëtare po testohen me Irakun

 

Uashington, 7 mars 2003 - Sekretari amerikan i shtetit, Kolin Pauell ka tërhequr vërejtjen se bashkësia ndërkomëtare po ballafaqohet me një testim kur duhet të merret me Irakun.

 

"Momenti në të cilin u gjendëm tash është moment kritik, kur ne po testohemi dhe kur Këshilli i Sigurimit, Kombet e Bashkuara dhe bashkësia ndërkombëtare po testohet", ka thënë sekretari amerikan i shtetit.

Shtetet e Bashkuara dhe Britania ballafaqohen me kundërshtim të fortë nga Rusia, Kina dhe Franca ndaj çfarëdo rezolute të re për Irakun. Edhe Kina tha se nuk neovijitet rezolutë e re.

 

 

Bush: Nëse do të na duhet, ne do të veprojmë pa miratimin e OKB-së

 

Uashington, 7 mars 2003 - Presidenti Bush thotë se bota është disa ditë larg vendimit lidhur me mënyrën se si do të veprohet me armët e dyshimta irakiane të shkatërrimit në masë. Franca, Rusia dhe Kina duan që inspektimet e armëve nga ana e OKB-së të vazhdojnë.

 

Presidenti Bush kërkon që Këshilli i Sigurimit të vendosë të zbatohen me forcë paralajmërimet e mëparshme për pasoja të rënda, në se Iraku nuk çarmatoset. “ Nëse do të na duhet të veprojmë, ne do të veprojmë dhe në të vërtetë nuk na duhet miratimi i OKB-së për ta bërë një gjë të tillë”, thotë presidenti Bush.

 

 

Kufiri i Kuvajtit "pritet për luftë"

 

Kuvajt, 7 mars 2003 - Në një dokument të brendshëm të Kombeve të Bashkuara, i cili ka rënë në dorë të BBC-së, thuhet se ka pasur një inkursion të paautorizuar të trupave amerikane në zonën e çmilitarizuar mes Irakut dhe Kuvajtit.

 

Vëzhguesit e OKB-së në rajon kishin zbuluar tri të çara të mëdha, secila nga 25 metra, në rrjetin elektrik që ndan këto dy vende. Vëzhguesit thanë se disa minuta më herët, kishin parë disa burra të veshur me rroba civile, të cilët kishin thënë se ishin marinsa amerikanë. Ata u kishin thënë vëzhguesve se kishin leje nga autoritetet kuvajtiane për të vizituar zonën e çmilitarizuar.

 

 

Aspirina kundër kancerit

 

Nju Hampshir, SHBA, 7 mars 2003 - Një ditë pasi shkencëtarët në Itali njoftuan se aspirina mund të ndihmojë në parandalimin e kancerit të gojë dhe grykë, studime amerikane tregojnë se ky medikament mund të ndihmojë shumë në uljen e mundësisë që njerëzit të marrin kancerin e zorrës së trashë, që është shkaku i dytë kryesor në vdekjet nga kanceri në Shtetet e Bashkuara.

 

Shkencëtarët në Nju Hampshir dhe Çikago thonë se studimet e tyre tregojnë se përdorimi i rregullt i aspirinës mund të ulë rrezikun e rritjes së substancave parakanceroze në zorrën e trashë që shpesh çon në kancer në zorrë.

 

Megjithatë, kërkuesit shkencorë paralajmëruan se do të nevojitet më shumë punë për të vlerësuar pasojat e mundshme anësore të përdorimit të aspirinës për një kohë të gjatë.

Copyright©2000-2003 Trepca.net - Të gjitha të  drejtat e rezervuara.