Lajme

E enjte, 6 mars 2003

Përmbajtja:

• Presidenti Rugova thotë se shkarkimi i ministrit Baliq është vendim i ngutshëm dhe arbitrar

• Përfaqësuesit e koalicionit "Vatan" kanë realizuar një takim me autoritetet e UNMIK-ut lidhur me shkarkimin e ministrit Baliq

• Fatmir Limaj ka hedhur poshtë akuzat për krime kundër njerëzimit në seancën e parë të Tribunalit të Hagës

• Deputetët serbë kërkuan nga Shtajneri të shpallë të pavlefshme Deklaratën e Kuvendit të Kosovës

• H. Solana nismën e Shtajnerit për fillimin e bisedimeve shqiptaro-serbe e konsideron konstruktive

• Shtyhet seanca e Kuvendit të Kosovës

• Një delegacion i LDK-së bisedoi në Dyseldorf me sektretarin e Shtetit dhe zëvendësministrin e Brendshëm

• Në Tiranë vdiq Reiz Malile

• Maqedonia dhe Shqipëria fillojnë serinë e stërvitjeve të përbashkëta ushtarake

• Xhefri: Shqipërisë i mbetet të bëjë ende shumë për të drejtat e njeriut

• Ilir Meta përshëndeti nismën e Shtajnerit për fillimin e dialogut mes Prishtinës dhe Beogradit

• Ish-të përndjekurit politikë në Shqipëri kërkojnë kompensimin e viteve të burgut në kohën e regjimit stalinist

• Nostalgjikët komunistë të Tiranës shënuan 50-vjetorin e vdekjes së Stalinit!

• NATO-ja po zhvillon hetimet lidhur me shpërthimin ku humbën jetën dy ushtarë polakë

• Osama bin Laden është gjallë dhe jeton në rajonin ndërmjet Pakistanit dhe Afganistanit

• Shtetet e Bashkuara kanë dëbuar dy anëtarë të të misionit irakian në Kombet e Bashkuara

• Nga një shpërthim bombe në Kolumbi kanë humbur jetën të pakten shtatë persona

• Forcat izraelite kanë vrarë sot 11 palestinezë në shenjë hakmarrjeje

• Nga një shpërthim vetëvrasës në Haifa të Izraelit janë vrarë të paktën 15 njerëz

• Liderët e vendeve islamike deklaruan "refuzimin total" ndaj çfarëdo sulmi kundër Irakut

• Armata e Turqisë mbështet mocionin e Qeverisë të refuzuar nga Parlamenti

• Franca, Rusia dhe Gjermania nuk do të pranojnë një rezolutë të re të Këshillit të Sigurimit

• Pauell: Iraku vazhdon të fshehë dhe prodhojë armë të ndaluara

Presidenti Rugova thotë se shkarkimi i ministrit Baliq është vendim i ngutshëm dhe arbitrar

 

Prishtinë, 6 mars 2003 - Presidenti i Kosovës Ibrahim Rugova vendimin për shkarkimin e ministrit të Shëndetësisë së Kosovës Numan Baliq, nga ana e kryeministrit Bajram Rexhepi e ka vlerësuar të ngutshëm dhe arbitrar. Ai kërkon që ky vendim të rishqyrtohet nga kryeministri dhe nga kryeadministratori i Kosovës Mihael Shtajner.

Presidenti Rugova është përcaktuar që të ruhet stabiliteti i Qeverisë dhe i institucioneve tjera të Kosovës, në mënyrë që të sigurohet funksionimi demokratik i tyre, - thuhet në një komunikatë të lëshuar nga Presidenca e Kosovës.

 

 

Përfaqësuesit e koalicionit "Vatan" kanë realizuar një takim me autoritetet e UNMIK-ut lidhur me shkarkimin e ministrit Baliq

 

Prishtinë, 6 mars 2003 - Lidhur me shkarkimin e ministrit të Shëndetësisë së Kosovës, Numan Baliq, dje me ftesë të kryeadministratorit Shtajner përfaqësues të koaliciionit "Vatan" kanë realizuar një takim me autoritetet e UNMIK-ut.

 

Megjithatë, këto biseda nuk kanë rezoltuar me ndonjë vendim konkret.

 

Një nga drejtuesit e delegacionit të "Vatanit" tha se në takimin me autoritetet e UNMIK-ut është biseduar lidhur me disa çështje kontestuese brenda ministrisë së shëndetësisë, por megjithatë nuk është arritur ndonjë vendim konkret.

 

 

Fatmir Limaj ka hedhur poshtë akuzat për krime kundër njerëzimit në seancën e parë të Tribunalit të Hagës

 

Hagë, 6 mars 2003 - Në paraqitjen e tij të parë në Gjykatën Ndërkombëtare për Krimet e Luftës në Hagë, i akuzuari Fatmir Limaj tha se ndihet absolutisht i pafajshëm për nëntë pikat e aktakuzës.

 

Ai u akuzua nga Tribunali i Hagës për vrasje dhe për torturim të të burgosurëve shqiptarë dhe serbë në kampin e Llapushnikut të Gllogocit në vitin 1998 në fillim të konfliktit me serbët.

 

Në aktpadinë e parë kundër pjesëtarëve të UÇK-së, prokuroria e Tribunalit të Hagës e ngarkon Fatmir Limajn se si komandant së bashku me dy gardianë të burgut ka ekzekutuar 11 të burgosur, pasi forcat serbe kishin marrë kontrollin përreth burgut. Dy persona të tjerë janë deklaruar në gjyq se nuk ndihen fajtorë.

I akuzuari Limaj do të mbahet edhe mëtutje në paraburgim, ndërsa shpallja e vazhdimit të procesit do të bëhet brenda 120 ditëve.

Ndërkaq, në një raport të emetuar mbrëmë në BBC thuhej se prokurorët po kryejnë edhe hetime të tjera ndaj pjesëtarëve të ish-UÇK-së dhe pritet të ngriten padi të reja nga Tribunali i Hagës.

 

 

Deputetët serbë kërkuan nga Shtajneri të shpallë të pavlefshme Deklaratën e Kuvendit të Kosovës

 

Prishtinë, 6 mars 2003 - Në takimin me kreun e UNMIK-ut, Mihael Shtajner deputetët e koalicionit "Kthimi" kanë bërë vërejtje për punën e Kuvendit të Kosovës, si dhe kanë kërkuar nga administrata ndërkombëtare në Kosovë të punojë më shumë për kthimin e serbëve të zhvendosur nga Kosova.

 

Ata kanë përkrahur nismën e shefit të UNMIK-ut për fillimin e dialogut mes Prishtinës dhe Beogradit për çështje praktike. Deputetët serbë kanë kërkuar nga kreu i UNMIK-ut që të shpallë të pavlefshëm miratimin e Deklaratës së Kuvendit të Kosovës me të cilën kërkohet që deputeti Fatmir Limaj, i akuzuar nga Haga të mbrohet në liri.

Pas takimit me dyer të mbyllura Shtajner nuk u prononcua për gazetarët.

 

 

H. Solana nismën e Shtajnerit për fillimin e bisedimeve shqiptaro-serbe e konsideron konstruktive

 

Bruksel, 6 mars 2003 - Fillimi sa më i shpejt i bisedimeve ndërmjet Prishtinës dhe Beogradit ishte njëra nga çështjet, që shefi i diplomacisë evropiane, Havier Solana trajtoi dje me ministrin e jashtëm të bashkësisë serbo-malazeze, Goran Svillanoviq. Solana nismën e kryeadministratorit Shtajner për fillimin e bisedimeve shqiptaro-serbe e konsideroi si shumë të sinqertë dhe konstruktive.

 

 

Shtyhet seanca e Kuvendit të Kosovës

 

Prishtinë, 6 mars 2003 - Pas disa diskutimeve rreth rendit të ditës, u shty seanca e sotme e Kuvendit të Kosovës. Në filllim të seancës grupi parlamentar i AAK-së kërkoi që në rend dite të futet rezoluta për njohjen e luftës shekullore të qytetarëve të Kosovës për liri dhe pavarësi.

 

Ky propozim nuk u miratua ndonëse në parim ishte mbështetur edhe nga grupet e tjera parlamentare.

Pas një pushimi të gjatë kryeparlamentari Daci njoftoi deputetët se seanca e sotme shtyhet për javën e ardhshme.

Ndryshe sipas rendit të ditës në këtë seancë kryeministri Bajram Rexhepi është dashur të bëjë një ekspoze për punën njëvjeçare të qeverisë së tij.

 

 

Një delegacion i LDK-së bisedoi në Dyseldorf me sektretarin e Shtetit dhe zëvendësministrin e Brendshëm

 

Dyseldorf, 6 mars 2003 - Një delegacion i LDK-së, i përbërë nga Hafiz Gagica, kryetar i Kolegjiumit të Degëve të LDK-së në Perëndim, Qazim Bajgoraliu, kryetar i Nëndegës së LDK-së për Landin Nordrhein-Ëestphalen dhe Arsim Rexhepi, anëtar i Kryesisë, u takua dje pasdite në Dyseldorf me sektretarin e Shtetit dhe zëvendësministrin e Brendshëm, Vofgang Riotte dhe me përgjegjësen për çështje të të huajve pranë kësaj Ministrie zonjën Helga Blok.

 

Në takim mirrte pjesë edhe z. Peter Roshenbah, ish-deputet në Bundestagun gjerman dhe mik i dëshmuar i shqiptarëve.

Në fillim të takimit z. Gagica falënderoi Qeverinë e Landit NRË për ndihmesën e madhe që NRË i ka bërë dhe po i bën Kosovës dhe e ftoi z. Riotte që me një delegacion nga ky Land të vizitojë Kosovën.

Në këtë takim u fol për problemet e mëdha të mërgatës shqiptare në Landin NRË dhe sidomos për çështjen e trajtimit që autoritetet gjermane i bëjnë dokumentit të udhëtimit të lëshuar nga UNMIK-u.

 

Gjithashtu me këtë rats u përcoll kërkesa e mijëra mërgimtarëve nga Kosova, që të mos ketë seleksionime në pranimin e këtij dokumenti dhe që ata të mos detyrohen të shkojnë në përfaqësi të shteteve tjera për t'u pajisur me dokumentacion udhëtimi.

Qazim Bajgoraliu i dorëzoi z. Riotte një peticion të nënshkruar nga mijëra mërgimtarë nga Kosova, përmes të të cilit u kërkohet institucioneve gjermane që të pranojnë pa asnjë rezervë dokumentin e udhëtimit të UNMIK-ut.

Lidhur me çështjen e pasaportave, z. Riotte njoftoi se kishte një urdhëresë nga Qeveria Federale me anë të së cilës rregullohej kjo çështje. Për të gjithë ata, që kishin qëndrim të pakufizuar në Gjermani, komunat ishin të detyruara që vizën ta bartin në Dokumentin e UNMIK-ut, ndërsa për të gjithë të tjerët kjo gjë ishte e pamundur, për arsye të natyrës së vizës.

Thelb i kësaj problematike ishte çështja e deklarimit të UNMIK-ut për pranimin e të gjithë atyre, që në rast nevoje do të duhej të ktheheshin në Kosovë, dhe për këtë arsye u propozua që kjo çështje të bisedohej në Berlin dhe në Prishtinë.

 

 

Në Tiranë vdiq Reiz Malile

 

Tiranë, 6 mars 2003 - Sot në orën e hershme të mëngjesit në Tiranë vdiq Reiz Malile (1924), ish-ministër i Punëve të Jashtme të Shqipërisë. Në një njoftim të Ministrisë së Punëve të Jashtme thuhet se "Reiz Malile do të mbetet përjetë në kujtesën e kolegëve të tij si një njeri i dashur, intelektual dhe diplomat i shquar". "Diplomacia shqiptare humbi një ndër përfaqësuesit më të shquar të saj".

Reiz Malile ka qenë ministër i Punëve të Jashtme i Shqipërisë në periudhën 1982-1991.

 

 

Maqedonia dhe Shqipëria fillojnë serinë e stërvitjeve të përbashkëta ushtarake

 

Shkup, 6 mars 2003 - Maqedonia dhe Shqipëria janë marrë vesh që të fillojnë serinë e stërvitjeve të përbashkëta ushtarake me qëllim të mbështetjes së sigurisë në rajonin që shihet si një nga rrugët e mëdha të trafikut me njerëz dhe droga ilegale.

 

Ministri maqedonas i Mbrojtjes, Vllado Buçkovski dhe gjenerali shqiptar, Luan Hoxha janë dakorduar që stërvitjet e para të tilla të mbahen në qendrën ushtruese të Krivollakut në Maqedoni deri nga fundi i marsit.

 

 

Xhefri: Shqipërisë i mbetet të bëjë ende shumë për të drejtat e njeriut

 

Tiranë, 6 mars 2003 - Ambasadori amerikan në Tiranë, Xhejms Xhefri, deklaroi dje se Shqipërisë i mbetet të bëjë ende shumë për të drejtat e njeriut, megjithë progresin e arritur. Këto komente ambasadori amerikan i bëri gjatë një fjalimi në Fakultetin e Shkencave Sociale.

 

Ambasadori amerikan theksoi se korrupsioni po e dëmton shoqërinë shqiptare në shumë mënyra. Ky fenomen tha ai, është një sulm edhe ndaj të drejtave të njeriu.

 

 

Ilir Meta përshëndeti nismën e Shtajnerit për fillimin e dialogut mes Prishtinës dhe Beogradit

 

Tiranë, 6 mars 2003 - Ministri i jashtëm shqiptar, Ilir Meta përshëndeti nismën e kryeadministratorit të Kosovës, Mihael Shtajner për fillimin e dialogut mes Prishtinës dhe Beogradit për çështje teknike. Duke folur përpara Komisionit të Jashtëm të Kuvendit të Shqipërisë Meta tha se këto bisedime do të mundësojnë trajtimin e një sërë problemesh konkrete me interes reciprok për të dyja palët.

 

Ministri i jashtëm i Shqipërisë i vlerësoi si të nivelit më të lartë marrëdhëniet midis Tiranës dhe Prishtinës, ndërkaq tha se rritja e marrëdhënieve ekonomike Shqipëri - Kosovë është rruga më e sigurt për zhvillimin e rajonit.

Ai ka shtuar se brenda pranverës Shqipëria dhe Kosova do të arrijnë të nënshkruajnë marrëveshjen e tregtisë së lirë mes tyre, që sipas tij do t'u jepte zgjidhje disa çështjeve që parqiten në marrëdhëniet ekonomike mes dy vendeve.

 

 

Ish-të përndjekurit politikë në Shqipëri kërkojnë kompensimin e viteve të burgut në kohën e regjimit stalinist

 

Tiranë, 6 mars 2003 - Ish-të përndjekurit politikë në Shqipëri protestuan dje përpara selisë së Qeverisë shqiptare, duke kërkuar kompensimin e viteve të tyre të burgut gjatë kohës së regjimit stalinist të Tiranës dhe të internimeve në kampet e punës, kopje e gulageve staliniste.

Nuk është hera e parë, që ata protestojnë për këto gjëra dhe presidenti i Shqipërisë ka ndërhyrë pranë Qeverisë shqiptare që ligji për kompensimin e të përndjekurëve politikë të përgatitej nga qeveria brenda muajit shkurt. Meqë kjo kërkesë e tyre nuk u realizua ish të përndjekurit, shumica në moshë të thyer protestuan sërish dje para selisë të qeverisë shqiptare.

 

 

Nostalgjikët komunistë të Tiranës shënuan 50-vjetorin e vdekjes së Stalinit!

 

Tiranë, 6 mars 2003 - Në Sheshin "Skënderbeu" në Tiranë dje pasdite disa dhjetra komunistë shqiptarë kujtuan 50-vjetorin e vdekjes së Stalinit, busti i të cilit zotëroi për disa dekada këtë shesh të Shqipërisë. Ata mbanin në duar portretet e Stalinit dhe klasikëve të tjerë të komunizmit.

 

Mes parullave të tjera grupi i nostalgjikëve të komunizmit mbante parulla kundër luftës në Irak, duke shënuar kështu të parën protestë publike në kryeqytetin shqiptar për përgatitjet e kësaj lufte. Nostalgjikët, shumica në moshë të thyer u prijnë krerët e Partisë Komuniste të Shqipërisë, që kanë udhëheqës të tyre shpirtëror ish-diktorin komunist të Shqipërisë Enver Hoxha.

 

 

NATO-ja po zhvillon hetimet lidhur me shpërthimin ku humbën jetën dy ushtarë polakë

 

Shkup, 6 mars 2003 - NATO-ja dhe autoritetet maqedonase po zhvillojnë hetime paralele lidhur me një shpërthim eksplozivi, ku humbën jetën dy ushtarë polakë të NATO-s dhe u plagosën dy civilë.

Zëdhënësi i NATO-s në Shkup, majori amerikan Krejg Retklif thotë se ende nuk dihet se çfarë ka qenë pajisja e cila shpërtheu pardje pasdite në rrugën midis dy fshatrave të Kumanovës - Sopot dhe Sushicë, ndërkohë që një patrullë e NATO-s ishte në një lëvizje rutinore. Megjithatë z. Retklif theksoi se bëhet fjalë për një aksident fatkeq dhe se ende nuk dihen hollësitë për motivet e këtij shpërthimi.

 

 

Osama bin Laden është gjallë dhe jeton në rajonin ndërmjet Pakistanit dhe Afganistanit

 

Islamabad, 6 mars 2003 - Osama bin Laden është gjallë, me shëndet të mirë dhe jeton në rajonin ndërmjet Pakistanit dhe Afganistanit, u ka deklaruar lideri i dyshimtë nr.3 i Al-Kaidës, Khalid Sheik Muhamed, hetuesve të tij pasi është zënë javën e kaluar, kanë bërë të ditur sot (të enjten) zyrtarët hetimorë pakistanez, njofton Rojter.

 

Ai gjithashtu ka thënë gjatë marrjes në pyetje se ishte takuar me Bin Ladenin në javët e fundit, me ndihmën e ndërmjetësve, duke përdorur rrjetin e komplikuar të thirrjeve telefonike. Takimi ka ndodhur në provincën jugperendimore të Pakistanit, në Baluçistan, në malet përgjatë kufirit me Afganistanin.

 

 

Shtetet e Bashkuara kanë dëbuar dy anëtarë të të misionit irakian në Kombet e Bashkuara

 

Uashington, 6 mars 2003 – Shtetet e Bashkuara kanë dëbuar dy anëtarë të të misionit irakian në Kombet e Bashkuara për shkak të aktiviteteve, që konsiderohen të "dëmshme" për sigurinë e SHBA-ve dhe kanë kërkuar edhe nga vendet e tjera të ndërmarrin aksione të ngjashme, ka bërë të ditur Departmenti i Shtetit, njofton Rojter.

 

Në njoftim saktësohet se ambasadori i Irakut në Kombet e Bashkuara, Mohamed Aldouri, ka thënë se të dy zyrtarët e dëbuar në të vërtetë kanë qenë roje sigurimi, ndonëse ata kishin titullin "atashe".

 

 

Nga një shpërthim bombe në Kolumbi kanë humbur jetën të pakten shtatë persona

 

Bogota, 6 mars 2003 – Nga një shpërthim bombe në Qendrën tregtare në qytetin Kukuta, që gjendet në pjesën verilindore të Kolumbisë, kanë humbur jetën të pakten shtatë persona dhe janë plagosur edhe mbi 60 të tjerë, njofton BBCWorld. Për këtë shpërthim, policia e ka fajësuar kryengritësit e krahut të majtë.

 

 

Forcat izraelite kanë vrarë sot 11 palestinezë në shenjë hakmarrjeje

 

Xhebalia, Rripi i Gazës, 6 mars 2003 – Forcat izraelite kanë vrarë sot (të enjten) të pakten 11 palestinezë gjatë një sulmi të madh me tanke në Rripin e Gazës në shenjë hakmarrjeje pas sulmit palestinez vetëvrasës në Izrael kur u vranë 15 izraelitë, njofton Rojter.

 

Po kështu, njoftohet se gjatë këtij opercioni pesëorësh ushtarak izraelit në kampin e refugjatëve palestinez në Xhebalia janë plagosur edhe rreth 10 palestinezë të tjerë.

 

 

Nga një shpërthim vetëvrasës në Haifa të Izraelit janë vrarë të paktën 15 njerëz

 

Jerusalem, 6 mars 2003 - Policia izraelite njofton se të paktën 15 njerëz janë vrarë, kurse mbi 40 janë plagosur nga një shpërthim i dyshuar vetëvrasës me bombë në një autobus në portin verior Haifa të Izraelit.

 

"Populli i Izraelit u gjend sërish viktimë e kësaj fushate terroriste botërore, fushatë e cila u ndërmor kundër nesh para 28 muajsh nga Autoriteti Palestinez dhe lideri i tij Jaser Arafat" tha zëdhënësi i qeverisë izraelite, Ranan Gisin. Deri tash askush nuk mori përgjegjësinë për sulmin.

 

 

Liderët e vendeve islamike deklaruan "refuzimin total" ndaj çfarëdo sulmi kundër Irakut

 

Doha, 6 mars 2003 - Liderët e vendeve islamike deklaruan sot "rrefuzimin total" ndaj çfarëdo sulmi të prirë nga Shtetet e Bahkuara kundër Irakut, pas takimit në Katar të Orrganizatës së Konferencës të Vendeve Islamike.

 

Deklarata e miratuar u bën thirrje vendeve islamike të përmbahen nga pjesmarrja në çfarëdo aksioni ushtarak që do të vinte në shënjestër sigurinë dhe integritetin territorial të Irakut apo të cilitdo vend mysliman. Deklarata thotë se kriza irakiane duhet të zgjidhet me mjete paqësore "në kontekstin e Kombeve të Bashkuara".

 

 

Armata e Turqisë mbështet mocionin e Qeverisë të refuzuar nga Parlamenti

 

Ankara, 6 mars 2003 - Kryeshefi i Shtatmadhorisë së Armatës së Turqisë, gjenerali Hilmi Ozkok tha se ushtria e mbshtet mocionin e Qeverisë, të refuzuar nga Parlamenti, për lejimin e Trupave amerikane që të vendoseshin në territorin turk. "Të rrinim jashtë apo i ndihmonim ata dhe të marrim pjesë në proces.

 

Këto dy opcione të aksionit u=t studijuan sistemetikisht dhe në koordinim me organizatat publike. Është e qartë se ne do të pësojmë të njejtin dëm nëse nuk marrim pjesë në luftë, por nuk do të shohim kurrëfarë kompenzimesh për dëmet pas luftës", ka thënë gjenerali turk.Ai tha se lufta e mundshme kundër Irakut do të "shkurtohej" nëse do të hapej fronti i dytë ushtarak nga Turqia.

 

 

Franca, Rusia dhe Gjermania nuk do të pranojnë një rezolutë të re të Këshillit të Sigurimit

 

Uashington, 6 mars 2003 - Megjithë deklaratat e Francës, Gjermanisë dhe Rusisë se do ta bllokojnë një rezolutë të Kombeve të Bashkuara që do të krijonte terren për ndërhyrje ushtarake kundër Irakut, Presidenti Bush beson se projektrezoluta do të miratohet në Këshillin e Sigurimit.

 

Zëdhënësi i Shtëpisë së Bardhë Ari Fleisher nuk i vuri rëndësi kërcënimit të ministrave të jashtëm të Francës, Gjermanisë dhe Rusisë, duke thënë se qëndrimi i këtyre vendeve nuk është e thënë të pasqyrohet patjetër në votimin që do të zhvillohet në Këshillin e Sigurimit në lidhje rezolutën e re mbi Irakun.

 

"Edhe në të kaluarën, zyrtarë të ndryshëm kanë bërë deklarata të ngjashme, prandaj jam i mendimit se përfundimisht do ta mësojmë qëndrimin e vendeve të ndryshme, pikërisht në momentin e votimit në Këshillin e Sigurimit të Kombeve të Bashkuara", tha zëdhënësi.

 

 

Pauell: Iraku vazhdon të fshehë dhe prodhojë armë të ndaluara

 

Uashington, 6 mars 2003 - Sekretari amerikan i Shtetit Kolin Pauell tha se presidenti irakian Sadam Husein nuk ka marrë ndonjë vendim strategjik ose politik për të hequr dorë nga armët e shkatërrimit në masë siç kërkojnë rezolutat e Kombeve të Bashkuara.

 

Sekretari Pauell tha të mërkurën se Iraku vazhdon të ketë dhe të fshehë armë të ndaluara i fshehur ato.=dhe vazhdon prodhimin e tyre, duke bërë përpjekje aktive për t’i fshehur ato.

Copyright©2000-2003 Trepca.net - Të gjitha të  drejtat e rezervuara.