Lajme

E mërkure, 5 mars 2003

Përmbajtja:

• Shtajner thotë se lufta ka marrë fund dhe se tani është koha për zgjidhjen e çështjeve teknike me interes të përbashkët

• Rino Harnish përshëndet Deklaratën e përbashkët të udhëheqësve kosovarë

• Kryepalamentari Daci priti këshilltarët e Solanës

• Sot në Prishtinë filloi manifestimi treditor "Epopeja e UÇK-së"

• N. Baliq: Kryeministri Rexhepi nuk ka komptenca të më shkarkojë nga posti i ministrit

• Kryetari i Kuvendit Komunal të Prishtinës viziton Finlandën

• Gjilan: Një patrullë e SHPK-së është sulmuar nga tre serbë

• Zvicra investon edhe 10 milionë euro në rajonin e Gjilanit

• D. Kërstoviq vlerëson pozitivisht nismen e Shtajnerit për fillimin e bisedimeve ndërmjet Beogradit dhe Prishtinës

• Rifilloi dalja e katër gazetave të Shkupit

• Në rrethinën e Kumanovës e humbën jetën dy ushtarë të NATO-s

• Çoviq thotë se të gjitha pikat e z. Shtajner për bisedime janë kushte

• Ivanov: Rusia mund t'i vërë veton një rezolute të Këshillit të Sigurimit

• Trupat izrelite kanë arrestuar 20 palestinezë

• Iraku ka filluar sot të shkatërrojë edhe 9 raketa Al Samound 2

• Nga një shpërthim në Paris është vrarë një person

• Bush: Është lideri irakian "ai që duhet të zgjedhë" nëse do të ketë luftë apo paqe

• SHBA-të kanë urdhëruar edhe 60 mijë trupa të nisen në Gjirin Persik

• Themelohet tribunali ndërkombëtar për krimet e luftës në Çeçeni

• Ramsfeld skeptik për inspektimet

• SHBA paralajmëron Turqinë rreth ndihmave

Shtajner thotë se lufta ka marrë fund dhe se tani është koha për zgjidhjen e çështjeve teknike me interes të përbashkët

 

Prishtinë, 5 mars 2003 - Kryeadministratori i Kosovës Mihael Shtajner tha se bisedimet e drejtpërdrejta ndërmjet Prishtinës dhe Beogradit janë në dobi të të dyja palëve, por edhe të rajonit. Ai theksoi se ende nuk ka marrë përgjigjen zyrtare në ftesën e tij dërguar kryeministrit serb Zoran Gjingjiq dhe zëvendësit të tij Nebojsha Çoviq, duke mos komentuar kërkesat e këtij të fundit të shprehura për shtrirjen e çështjeve tjera për diskutim.

Shtajner tha për "Zërin e Amerikës" se ajo çfarë duhet aktualisht të bëjë Kosova është të sqarojë pozicionin e saj për çështjet që janë brengosëse për qytetarët dhe në interesin e tyre. Të gjitha të tjerat që kanë të bëjnë me përbërjen e delegacionit apo kohës së bisedimeve nuk janë të rëndësishme.

 

Kosova duhet t'i tregojë botës se ajo po shikon jashtë kufijve të saj dhe është në kontakt me të gjithë fqinjët, por bisedimet midis Beogradit dhe Prishtinës duhet të zhvillohen duke i qëndruar besnik parimit për bashkëpunim dhe jo përzierje në punët e brendshme.

Ndërkaq duke folur për zhvillimet e fundit në Mitrovicë, Shtajner tha se situata e atjeshme nuk mund të ndryshohet brenda natës, por shtoi se shtrirja e administratës në veri dhe fillimi i punës së SHPK-së janë hapa të rëndësishëm meqë tash atje janë struktura të ligjshme.

 

 

Rino Harnish përshëndet Deklaratën e përbashkët të udhëheqësve kosovarë

 

Prishtinë, 5 mars 2003 - Rino Harnish, shef i Misionit të Zyrës së SHBA-ve në Prishtinë, ka përshëndetur deklaratën e përbashkët të udhëheqësve kosovarë të bërë me 28 shkurt.

Vetëm para pak më shumë se një viti, thotë z. Harnish në këtë deklaratë, u formua qeveria e parë gjithëkosovare përmes një marrëveshjeje koalicioni e cila i bashkoi partitë politike më kryesore, e cila i obligoi ato që të punojnë së bashku për një të mirë më të madhe të Kosovës dhe popullit të saj.

 

Qeveria e Shteteve të Bashkuara është e kënaqur që këta udhëheqës e kanë riafirmuar atë Marrëveshje dhe, duke bërë kështu, janë obliguar për përparim të mëtutjeshëm drejt standardeve të parashtruara nga PSSP Miheal Shtajner, thotë Harnish.

"Agjenda e sfidave të përshkruara në atë deklaratë të përbashkët" z. Harnish tha, "tregon se udhëheqësia e Kosovës i njeh sfidat e vërteta me të cilat duhet të ballafaqohet në muajt dhe vitet që vijnë.

 

Zhvillimi ekonomik, përforcimi i sundimit të ligjit, luftimi i krimit, dhe ndërtimi i një Kosove shumetnike dhe demokratike, këto janë prioritete për të gjithë ne dhe ne presim nga udhëheqësit e Kosovës që të vazhdojnë të përparojnë në adresimin e këtyrë çështjeve".

"Qeveria ime e përkrah iniciativën e z. Shtajner për t'i hyrë 'bisedimeve teknike' me zyrtarët qeverisës në rajon në mënyrë që të zgjidhen disa nga problemet të cilat ndikojnë në jetët e përditshme të aq shumë njerëzve në Kosovë.

 

Unë i inkurajoj udhëheqësit kosovarë që të marrin pjesë në këto bisedime me sinqeritet, sepse në këtë mënyrë ata mund të zgjidhin shumë çështje", thotë z. Harnish në këtë deklaratë, duke ripërsëritur përkushtimin e popullit dhe qeverisë së Shteteve të Bashkuara për të punuar me udhëheqësit e zgjedhur të Kosovës nga të gjitha bashkësitë etnike për të ndërtuar një Kosovë që është e bashkuar, tolerante dhe demokratike, me një ekonomi përparimtare prej të cilës të gjithë përfitojnë.

 

 

Kryepalamentari Daci priti këshilltarët e Solanës

 

Prishtinë, 5 mars 2003 - Kryetari i Kuvendit ë Kosovës Nexhat daci priti këshilltarët e Përfaqësuesit të lartë të Bashkimit Evropian për Siguri dhe Politikë të Jashtme, Havier Solana, z. Stefan Lenke dhe Akleksandros Yanis.

Kryeparlamentari Daci para tyre prezantoi rrjedhat e përgjithshme në Kosovë dhe i garantoi këshilltarët e Solanës, zotërinjtë, Lenke dhe Yanis, se raportet etnike dhe marrëdhëniet ndërmjet forcave politike nuk janë ashtu të tensionuara, siç shihen ndonjëherë nga Brukseli.

 

Përkundrazi, u shpreh profesor Daci, institucionet e Kosovës, kanë bërë shumë për stabilizimin e gjendjes. Ai madje Kuvendin e Kosovës, me gjithë përbërjen shumë heterogjene etnike dhe partiake, e vlerësoi ndër parlamentet më të qëndrueshme, jovetëm në rajon.

Daci e vlerësoi të pakënaqshme gjendjen ekonomike të Kosovës, dhe ngurrimin për investimin e kapitalit të jashtëm, për shkak të statusit të padefinuar të Kosovës. Ai, ndërkaq, u shpreh se UNMIK-u nuk ka program ekonomik dhe social për Kosovën, ndërkohë që papunsia sa vjen e rritet.

Këshillëtari i Solanës, Lehne, theksoi domosdoshmërinë e kooperimit ndërmjet institucioneve të Kosovës dhe faktorëve ndërkombëtarë, të pranishëm këtu, sepse ndryshe, u shpreh ai, pa bashkëpunim të ndërsjellë, Kosova nuk mund të ketë perspektivë të mirë të zhvillimit.

Për nismën e z.Shtajner për fillimin e dialogut me Beogradin, Kryeparlamentari i Kosovës nuk e quajti problem fillimin e dialogut ndërmjet fqinjeve, por atë se çfarë do të shtrojë udhëheqja serbe, bazar nga dioptria e saj e deritashme.

Këshilllëtarët e z.Solana e vlerësuan pozitivisht faktin që bisedat për çështje praktike për qytetarët do të zhvillohen në prani të përfaqësuesve të UNMIK-ut, thuhet në një njoftim të të Kuvendit të Kosovës.

 

 

Sot në Prishtinë filloi manifestimi treditor "Epopeja e UÇK-së"

 

Prishtinë, 5 mars 2003 - Sot në stadiumin e qytetit në Prishtinë, në praninë e dhjeta mijëra pjesëmarrësve, filloi manifestimi tradicional treditor "Epopeja e UÇK-së", në pesëvjetorin e rënies së komandantit legjendar, Adem Jashari dhe familjes Jashari.

Manifestimi filloi me ekzekutimin e Himnit Kombëtar dhe me ngritjen e Flamurit Kombëtar, kurse në programin ushtarak parakaluan të gjitha kuadratat e zonave të TMK-së dhe njësitë vartëse të tyre.

Në këtë manifestim foli edhe komandanti i TMK-së gjenerali Agim Çeku, pataj kryetari i PDK-së Hashim Thaçi, kurse përshendetën edhe Rifat Jashari, në emër të familjes Jashari dhe kryebashkiaku qytetit të Vlorës, Niko Veizi.

Para pjesëmarrësve u shfaq edhe një program i pasur kulturor e artistik.

Ndërkaq, nesër më 6 mars është Dita e dëshmorëve ku do të bëhen homazhe para varrit të komandantit Adem Jashari dhe varrezave të të gjithë dëshmorëve anembanë Kosovës.

 

Manifestimi përmbyllet më 7 mars me Natën e zjarreve në Prekaz.

 

 

N. Baliq: Kryeministri Rexhepi nuk ka komptenca të më shkarkojë nga posti i ministrit

 

Prishtinë, 5 mars 2003 - Duke komentuar vendimin e kryeministrit të Kosovës Bajram Rexhepi për shkarkimin e tij nga posti i ministrit të Shëndetësisë, Numan Baliq e kundërshtoi fuqishëm këtë vendim.

 

Ai tha se ky eshtë një vendim personal i kryeministrit, ngase ai nuk ka kompetencë ta shkarkojë nga ky post, duke nënvizuar se ministri i Shëndetësisë nuk është zgjedhur sipas procedurës ligjore.

 

"Derisa as vetë kryeministri nuk është zgjedhur me procedurë ligjore, nuk ka të derejtë të më shkarkojë nga ky post", thotë Baliq. Ai shton se prapa vendimit të kryeministrit Rexhepi për shkarkimin e tij nga posti i ministrit të Shëndetësisë qëndrojnë edhe strukturat e PDK-së.

Duke i hedhur poshtë akuzat e kryeministrit Rexhepi, ministri i shëndetësisë Numan Balliq thotë se ai është njeriu, i cili e ka mbajtur qeverinë të tubuar dhe se ai do të paraqitet sot normalisht në vendin e tij të punës, duke shtuar se kurrë nuk do ta pranojë vendimin e kryeministrit Rexhepi, ngase emërimi i tij në postin e ministrit të shëndetësisë është produkt i marrëveshje politike.

 

 

Kryetari i Kuvendit Komunal të Prishtinës viziton Finlandën

 

Prishtinë, 5 mars 2003 - Kryetari i Kuvendit Komunal të Prishtinës, Ismet Beqiri, udhëtoi sot për një vizitë zyrtare në Finlandë, ku do të qëndrojë zyrtarisht për një vizitë treditëshe në kryeqytetin Helsinki.

Gjatë kësasj vizite, zoti Beqiri do të takohet edhe me udhëheqësit e kompanisë së njohur të telefonisë "Nokia", së bashku me përfaqësues të tjerë të institucioneve të Kosovës.

Kryetari i KK të Prishtinës, Ismet Beqiri pritet të takohet edhe me përfaqësues të pushtetit lokal në Helsinki.

 

 

 

Gjilan: Një patrullë e SHPK-së është sulmuar nga tre serbë

 

Gjilan, 5 mars 2003 - Një patrullë e SHPK-së së Gjilanit ndërsa ndodhej në detyrë është sulmuar nga tre serbë, pjesëmarrës të një ahengu, ka bërë të ditur zëdhënësi i policisë së UNMIK-ut, por duke mos dhënë as kohën as vendin se ku ka ndodhur incidenti.

 

Ndërkohë tre të dyshimtit janë arrestuar dhe kundër tyre po zhvillohet procedura hetimore. Zëdhënësi refuzoi të japë identitetin dhe përkatësinë e policëve të sulmuar.

 

 

Zvicra investon edhe 10 milionë euro në rajonin e Gjilanit

 

Gjilan, 5 mars 2003 - Ministri i Ambientit dhe Planifikimit Hapësinor, Ethem Çeku ka vizituar Gjilanin, së bashku me përfaqësuesit e Zyrës zvicerane dhe të drejtorisë për banim "Habitat", ku në një takim me kryetarin e komunës, Lutfi Haziri, kanë diskutuar për vizionin në krijimin e zonave të reja të banimit.

 

Qeveria e Zvicrës dhe donatorë të tjerë janë të interesuar të investojë në Gjilan, të inkurajuar me politikën e këtushme lokale.

Kjo formë e ndërtimit, pos që mbron hapësirën, edhe ashtu të ngushtë për ndërtime individuale dhe pengon ndërtimin e egër, është edhe një mundësi e mirë për tejkalimin e krizës së papunësisë, sepse në këtë mënyrë krijohen edhe kushte për angazhim të fuqisë më të madhe punëtore në këto projekte.

Përfaqësuesja e Zyrës zvicerane në Kosovë tha se zviceranët kanë investuar deri tani disa projekte të elektrikës në rajonin e Gjilanit, ndërsa tani do të investojnë një projekt madhor në sistemin e ujrave, që ka vlerën prej 10 milionë euro.

 

 

D. Kërstoviq vlerëson pozitivisht nismen e Shtajnerit për fillimin e bisedimeve ndërmjet Beogradit dhe Prishtinës

 

Prishtinë, 5 mars 2003 - Kryesuesi i Grupit parlamentar të koalicionit të serbëve "Kthimi" Dragisha Kërstoviq ka vlerësuar pozitivisht nismën e kryeadministratorit të Kosovës Mihael Shtajner për fillimin e bisedimeve ndërmjet Beogradit dhe Prishtinës.

 

Sipas tij në të ardhmen duhet zgjeruar çështjet për të cilat duhet biseduar dhe përveç çështjeve teknike Beogradi dhe Prishtina mund të bisedojnë edhe për gjëra të tjera siç janë: kthimi i të zhvendosurve, çështjet e sigurisë dhe statusi i Kosovës.

Ndërkaq "këshilli nacional serb" kundërshton fuqishëm këtë nismë të kryeadministratorit të Kosovës.

 

 

Rifilloi dalja e katër gazetave të Shkupit

 

Shkup, 5 mars 2003 - Gazetat që shtypen në shtyshkronjën "Nova Makedonija" të Shkupit - "Flaka", "Veçer", "Nova Makedonija" dhe "Birlik" - pas grevës nëntëditore, sot sërish janë në duart e lexuesve.
Me një vendim të Këshillit grevist, këto gazeta nuk janë botuar prej 25 shkurtit.

 

 

Në rrethinën e Kumanovës e humbën jetën dy ushtarë të NATO-s

 

Shkup, 5 mars 2003 - Dy ushtarë të kontingjentit polak të NATO-s, të cilët u plagosën rëndë kur xhipi i tyre dje vonë pasdite ka hasur në një minë, vdiqën gjatë rrugës për në Qendrën urgjente në Shkup, njofton MIA. Me këtë rast rëndë është plagosur edhe përkthyesja e ushtarëve.

 

Dy personat e plagosur civilë nga fshati Sushicë, të cilët gjithashtu ishin në xhip, mbrëmë nga Qendra mjekësore e Kumanovës janë dërguar në Qendrën urgjente në Shkup.

Pjesëtarët e NATO-s, dy personat civilë dhe përkthyesja u plagosën dje pasdite rreth orës 17, kur xhipi me të cilin kanë udhëtuar ka hasur në një minë të vendosur në rrugën ndërmjet fshatrave të Kumanovës, Sopot dhe Sushicë.

 

 

Çoviq thotë se të gjitha pikat e z. Shtajner për bisedime janë kushte

 

Beograd, 5 mars 2003 - Zëvendëskryeministri serb Nebojsha Çoviq, kryesues, duke komentuar ftesën e Shtajnerit për fillimin e bisedimeve ndërmjet Beogradit dhe Prishtinës, citohet të ketë thënë: "Të gjitha pikat e Shtajnerit për bisedime janë kushte. Ne duhet të bisedojmë rreth kthimit, duhet të dëgjojmë se cilat janë garancionet nga ana tjetër.

 

Viti 2003 ka filluar dhe të mos shpenzohet si viti 2002". Pasi rikujtoi nënshkrimin e dokumentit të përbashkët në nëntor të vitit 2001 vlerësoi se viti 2002 u shpall vit i kthimit, por kthimi i të zhvendosurve në Kosovë nuk ndodhi. Andaj, Çoviq është i mendimit se këto çështje duhet të hapen në bisedimet ndërmjet Prishtinës dhe Beogradit.

 

 

Ivanov: Rusia mund t'i vërë veton një rezolute të Këshillit të Sigurimit

 

Londër, 5 mars 2003 - Ministri i Jashtëm rus, Igor Ivanov, tha se vendi i tij mund t'i vërë veton një rezolute të Këshillit të Sigurimit të Kombeve të Bashkuara, që do të autorizonte përdorimin e forcës ushtarake për të çarmatosur Irakun. Ivanov tha se Rusia nuk mund të abstenojë sepse Moska duhet të mbajë një qëndrim të qartë lidhur me krizën e Irakut.

Ivanov i bëri këto komente dje në Londër, ku ai u takua me sekretarin e Jashtëm britanik, Xhek Strou për të diskutuar mbi krizën e Irakut.

 

 

Trupat izrelite kanë arrestuar 20 palestinezë

 

Ramallah, 5 mars 2003 – Trupat izrelite kanë arrestuar sot heret (të merkurën) 20 palestinezë gjithandej në Bregun Perëndimor dhe kanë shkatërruar shtëpinë e një militnti islamik, ka bërë të ditur armata dhe dëshmitarët, njofton Rojter.

 

Shumica e të arrestuarve janë persona të kërkuar nga forcat e sigurimit për dhunën e kryer gjatë kryengritjes palestineze 29-muajshe.

 

Dëshmitarët palestinezë kanë thënë se trupat izraelite kanë depërtuar në qytetet e Bregut Perëndimor, Kelkilia dhe Xheriko si dhe në fshatrat për rreth Betlehemit, me qëllim të kryerjes së arrestimeve.

 

 

Iraku ka filluar sot të shkatërrojë edhe 9 raketa Al Samound 2

 

Bagdad, 5 mars 2003 – Iraku ka filluar sot (të merkurën) të shkatërrojë edhe nëntë raketa të ndaluara Al Samound 2 nën mbikëqyrjen e inspektorëve të Kombeve të Bashkuara për armë, ka bërë të ditur një zyrtar irkian, njofton Rojter.

 

Procesi i shkatërrimit të këtyre raketave ka filluar sot në mengjes. Bagdadi e ka filluar të shtunën e kaluar shkatërrimin e rreth 120 raketave sipas afatit të Kombeve të Bashkuara.

 

 

Nga një shpërthim në Paris është vrarë një person

 

Paris, 5 mars 2003 – Nga një shpërthim në një veturë, që ka ndodhur sot (të merkurën) në Paris, është vrarë personi që ndodhej brenda në veturë, njofton Rojter. Tash për tash nuk janë dhënë ende detaje për kohën e saktë dhe vendin, ku ka ndodhur shpërthimi. Policia ka deklaruar se po i zhvillon hetimet.

 

 

Bush: Është lideri irakian "ai që duhet të zgjedhë" nëse do të ketë luftë apo paqe

 

Uashington, 5 mars 2003 - Presidenti i Shteteve të Bashkuara, Xhorxh Bush ka përsëritur sërish se është lideri irakian, Sadam Husein "ai që duhet të zgjedhë" nëse do të ketë luftë apo paqe. "Është zgjedhja e tij të vendosë nëse do të ketë luftë apo paqe.

 

Është zgjedhja e tij të vendosë nëse do të t'i dëgjojë kërkesat e botës së lirë. Por pa marrë parasysh se cila mund të jetë zgjedhja e tij, për hir të paqes, për hir të lirisë, për hir të sigurisë së popullit tonë, Sadam Husein do të çarmatoset", ka deklaruar presidenti i Shteteve të Bashkuara.

 

 

SHBA-të kanë urdhëruar edhe 60 mijë trupa të nisen në Gjirin Persik

 

Uashington, 5 mars 2003 - Shtetet e Bashkuara njoftuan se i kanë urdhëruar edhe 60 mijë trupa të tjera që të nisen në Gjirin Persik ku gjenden tashmë se 225 mijë ushtarëve në një përqëndrim për luftën e mundëshme kundër Irakut.

 

 

Themelohet tribunali ndërkombëtar për krimet e luftës në Çeçeni

 

Strasbur, 5 mars 2003 - Këshilli i Evropës konsideron të udhëheqë përpjekjet për themelimin e një tribunali ndërkombëtar për krimet e luftës të bëra në Çeçeni.

Në një projektrezolutë ky organ evropian për të drejtat e njeriut thotë se bashkësia ndërkombëtare duhet të mëkëmbë një tribunal sipas modelit të atij të Kombeve të Bashkuara për krimet e luftës në hapësirën e ish Jugosllavisë, që do të gjykonte ata që kanë bërë abuzime të të drejtave të njeriut në Çeçeni.

 

 

Ramsfeld skeptik për inspektimet

 

Londër, 5 mars 2003 - Sekretari amerikan i Mbrojtjes Donald Ramsfeld i ka mohuar pohimet se Uashingtoni është duke vepruar në mënyrë të njëanshme për të imponuar vullnetin e tij në të gjithë botën. Në një intervistë për televizionin BBC, ai tha se Amerika nuk mund të veprojë e vetme për shumë çështje si ajo e përhapjes së armëve bërthamore të shkatërrimit në masë.

 

 

SHBA paralajmëron Turqinë rreth ndihmave

 

Uashington, 5 mars 2003 - Zëdhënësi i Departamentit të Shtetit, Riçard Bauçer, ka lënë të kuptohet se miliarda dollarë ndihmë për Turqinë nuk do të paguhen derisa Turqia të mos i lejojë trupat amerikane të dislokohen në vend.

 

Zoti Bauçer tha se pjesa më e madhe e paketës gjashtë milardë dollarëshe i është ofruar Turqisë si ndihmë për të hequr shpenzimet e trupave dhe nëse ato nuk lejohen të hyjnë në vend as të hollat nuk do të jenë të nevojshme.

Copyright©2000-2003 Trepca.net - Të gjitha të  drejtat e rezervuara.