Lajme

E marte, 4 mars 2003

Përmbajtja:

• Presidenti Rugova priti sot kryetarin e BDI-së, Ali Ahmeti

• Presidenti Rugova priti sot një delegacion të Këshillit të Evropës

• Të enjtën para deputetëve do të paraqitet një ekspoze për punën njëvjeçare të Qeverisë së Kosovës

• Presidenti Rugova vendos ta dekorojë Adem Jasharin me dekoratën më të lartë të Kosovës

• Kryeministri Rexhepi shkarkon ministrin e Shëndetësisë Baliq

• Ali Ahmeti është takuar me shefin e UNMIK-ut Shtajner

• Me granatë dore sulmohet një shtëpi në veri të Mitrivicës

• R.Harnish: Kosova është në qendër të interesimit për krijimin e një Evrope stabile

• Nesër fillon manifestimi treditor "Epopeja e UÇK-së"

• Shtajner thotë se bisedimet për çështje teknike ndërmjet Prishtinës dhe Beogradit mund të fillojnë javën e ardhshme

• BE ka përshëndetur iniciativën e Shtajnerit për fillimin e dialogut mes Prishtinës dhe Beogradit

• Statistika e UNHCR-it flasin për 200 mijë persona të zhvendosur nga Kosova

• Fatmir Limaj është transferuar në njësinë e paraburgimit të Tribunalit të Hagës

• Prokurorët kërkuan nga Tribunali i Hagës që të zgjatet afati për gjykimin e Millosheviqit

• Në Prishtinë filloi manifestimi "Java e Dodonës"

• Në Kroaci është arrestuar ish-ministri i Maqedonisë Besnik Fetai

• Shkup: Bëhet thirrje për zbardhjen e rastit të "Vreshtave të Rashtakut"

• Çoviq thotë se temat e theksuara nga Shtajneri për bisedime ndërmjet Prishtinës dhe Beogradit janë cinike!

• Sllovakia dhe Shqipëria shprehën vullnetin për bashkëpunimin dypalësh në procesin e integrimit evropian

• Policia maqedonase gjatë fundjavës së kaluar ka kontrolluar mbi 500 lokale nate për të penguar dhunën e shtuar

• Nga një shërthim bombe në Filipine kanë humbur jetën të pakten 17 persona

• Tre fëmijë kanë shpëtuar pas përplasjes së aeroplanit në malet e Masaçusetsit

• Është arrestuar edhe një i dyshuar për sulmet mbi Qendrën Tregtare Botërore dhe në Pentagon

• Është arrestuar edhe një i dyshuar për sulmet mbi Qendrën Tregtare Botërore dhe në Pentagon

• Xhons: Refuzimi i Turqisë nuk do t'i prishë planet për Irakun

• Papandreu: Iraku ende ka gjasa të holla për t'iu shmangur luftës

• Robertson: Roli i aleancës në krizën e Irakut mbetet i kufizuar në mbrojtjen e Turqisë

• Bush e ka falënderuar Musharafin për kapjen e terroristit të Al Kaidës

• Fleisher: Sadam Huseini nuk do të lihet në pushtet në rast se fillon lufta

• Uashingtoni thotë se Turqia nuk do të marrë pjesën më të madhe të një pakete ndihmash ekonomike

• Nato: Këshillime mbi riorganizimin e sistemit të bazave të aleancës

Presidenti Rugova priti sot kryetarin e BDI-së, Ali Ahmeti

 

Prishtinë, 4 mars 2003 - Presidenti i Kosovës Ibrahim Rugova priti sot zotin Ali Ahmeti, kryetar i Bashkimit Demokratik për Integrim, parti kjo më e madhe e shqiptarëve në Maqedoni. Presidenti Rugova shprehu kënaqësinë që priti Ali Ahmetin, kryetarin e BDI-së, e cila parti pas zgjedhjeve të fundit parlamentare në Maqedoni merr pjesë në Parlament, në Qeveri dhe strukturat e tjera shtetërore.

 

Prishtinë, 4 mars 2003 - Presidenti i Kosovës Ibrahim Rugova priti sot zotin Ali Ahmeti, kryetar i Bashkimit Demokratik për Integrim, parti kjo më e madhe e shqiptarëve në Maqedoni.

Presidenti Rugova shprehu kënaqësinë që priti Ali Ahmetin, kryetarin e BDI-së, e cila parti pas zgjedhjeve të fundit parlamentare në Maqedoni merr pjesë në Parlament, në Qeveri dhe strukturat e tjera shtetërore.

 

Gjithashtu ai tha se do të ketë një bashkëpunim të ngushtë në mes të BDI-së e institucioneve të Kosovës, por do të ketë edhe bashkëpunim e marrëdhënie fqinjësore ndërmjet institucioneve të Maqedonisë dhe institucioneve të Kosovës.

Në këtë takim është folur për progresin e arritur në Kosovë, me objektivat që ka për zhvillimin ekonomik, privatizimin.

Presidenti Rugova vlerësoi me këtë rast se në Maqedoni është vendosur një bazë e mirë në bazë të Marrëveshjes së Ohrit dhe se për këtë e ka njoftuar zoti Ahmeti për angazhimin që BDI-ja dhe shqiptarët në Maqedoni të marrin sa më shumë pjesë në strukturat shtetërore, ekonomike të vendit.

"Zotin Kryetar e njoftova me për së afërmi lidhur me Marrëveshjen e Ohrit, lidhur me procesin që po zhvillohet në Maqedoni, veçmas u dakorduam që ky bashkëpunim duhet të intesifikohet edhe më shumë për arsye se është në të mirë të dy vendeve tona, në të gjitha drejtimet - kulturore, ekonomike, një bashkëpunim politik ndërpartiak dhe mendojmë që kjo të realizohet në një të ardhme sa më të afërme", tha Ali Ahmeti pas takimit me presidentin Rugova, duke shprehur dëshirën që Presidenti i Kosovës të jetë mysafir në Maqedoni.

 

Zoti Ahmeti për vizitën e tij theksoi se gjithë kjo veprimtari shkon në favor të popujve fqinjë, duke shtuar se në këtë takim është biseduar për shumë çështje, të cilat premtoi se të jetësohen dhe materializohen edhe në praktikë.

 

 

Presidenti Rugova priti sot një delegacion të Këshillit të Evropës

 

Prishtinë, 4 mars 2003 - Presidenti i Kosovës Ibrahim Rugova priti sot një delegacion të Këshillit të Evropës, të kryesuar nga Karlo Çivileti.   Në këtë takim është biseduar për reformat e pushtetit lokal në Kosovë, i cili duhet të jetë më funksional, më afër qytetarëve dhe që të ketë besim më të madh të qytetarëve.   Presidenti Rugova tha se ky është një proces që duhet filluar, por i cili edhe do të zgjasë, sepse edhe në vendet më të mëdha ky është proces që zgjat.

 

Prishtinë, 4 mars 2003 - Presidenti i Kosovës Ibrahim Rugova priti sot një delegacion të Këshillit të Evropës, të kryesuar nga Karlo Çivileti. Në këtë takim është biseduar për reformat e pushtetit lokal në Kosovë, i cili duhet të jetë më funksional, më afër qytetarëve dhe që të ketë besim më të madh të qytetarëve.

Presidenti Rugova tha se ky është një proces që duhet filluar, por i cili edhe do të zgjasë, sepse edhe në vendet më të mëdha ky është proces që zgjat.

 

Ai shprehu qëndrimin se duhet të ketë një reformë, për të pasur më shumë kompetenca për pushtetin lokal, nëse mund të quhet edhe decentralizim, kurse njësitë e pushtetit komunal të jenë më funksionale, tha presidenti Rugova dhe felenderoi zotin Çivileti dhe anëtarët e delegacionit, të cilët në këtë drejtim do të ndihmojnë me sugjerimet e tyre, me përvojën e Këshillit të Evropës dhe të vendeve Evropiane.

Ndërkaq kryesuesi i delegacionit, zoti Çivileti tha se si kryesues i këtij misioni të Këshillit të Evropës përpiqet të kontribuojë me konceptin evropian për reformimin e pushtetit vetëqeverisës lokal dhe administratës lokale.

"Ne jemi në fillim të misionit tonë dhe në këtë fazë ne jemi duke bërë kontakte, në mbledhjen e të dhënave dhe marrjen e mendimeve, dhe natyrisht ishte kënaqësi që takimin e parë ta bëjmë me Presidentin Rugova", tha zoti Çivileti.

 

Ai shtoi se duhet pranuar gjendjen reale brenda komunave të Kosovës dhe dihet se reformimi është një proces mjaft i komplikuar, dhe do të bëhet çmos që të marren parasysh rrethanat e posaçme të Kosovës, tha zoti Çivileti.

 

 

Të enjtën para deputetëve do të paraqitet një ekspoze për punën njëvjeçare të Qeverisë së Kosovës

 

Prishtinë, 4 mars 2003 - Kryesia e Kuvendit të Kosovës, në mbledhjen e saj të rregullt, të kryesuar nga Nexhat Daci, kryetar, përcaktoi rendin e punës për Seancën parlamentare të 6 marsit dhe shqyrtoi një varg kërkesash të grupeve dhe të komisioneve parlamentare.

Në mbledhjen e Kryesisë së Kuvendit u tha se para deputetëve, me një ekspoze për punën njëvjeçare të Qeverisë së Kosovës, do të paraqitet kryeministri, Bajram Rexhepi.

Kryesia vendosi që ta nxjerrë për shqyrton të dytë Projektligjin për Likuidimin dhe oeganizimin e personave juridikë në bankrotim.

Në këtë mbledhje nuk u arrit pajtimi që të nxirret në seancën parlamentare kërkesa e grupit Parlamentar të AAK-së për të miratuar Rrezolutën e mirënjohjes për luftën shekullore të qytetarëve të Kosovës për liri dhe pavarësi.

 

 

Presidenti Rugova vendos ta dekorojë Adem Jasharin me dekoratën më të lartë të Kosovës

 

Prishtinë, 4 mars 2003 - Me rastin e pesëvjetorit të rënies së Adem Jasharit, heroit të Kosovës, dhe flijimit të Familjes Jashari, Presidenti i Kosovës Ibrahim Rugova ka vendosur që Adem Jasharin ta dekorojë me dekoratën më të lartë të Kosovës, për të cilën gjë po punohet në Zyrën e Presidentit.

Ceremonia e dekorimit do të bëhet pasi të jenë kryer përgatitjet meritore për një akt të tillë mirënjohjeje dhe nderimi, - thuhet në një njoftim të Zyrës së Presidentit të Kosovës.

 

 

Kryeministri Rexhepi shkarkon ministrin e Shëndetësisë Baliq

 

Prishtinë, 4 mars 2003 - Ministri i Shëndetësisë Numan Baliq zëvendësohet në këtë post nga zonja Resmie Mumxhiu, dhe ajo cajktohet në detyrën e ministrit të shëndetësisë në Qeverinë e Kosovës që nga data 5 mars 2003, - deklaroi sot kryeministri i Kosovës Bajram Rexhepi.

Ministri Baliq gjatë kryerjes së detyrës së tij në postin e ninistrit të Shëndetësisë ka çuar deri te një gjendje tejet e rëndë në shëndetësinë e Kosovës, tha Rexhepi.

Kryeministri akuzoi Baliqin se me veprimet e tij të përditshme në mënyrë të vazhdueshme ka shkelur rregulloret e ligjet në fuqi. Sjellja e Baliqit është karakterizuar me mungesë të respektit për dispozitat ligjore dhe ka sfiduar autoritetin e kryeministrit, tha Bajram Rexhepi, duke shtuar se Baliq ka pasur tendenca për ta përçarë qeverinë e Kosovës dhe ka synuar bllokimin e punës së qeverisë.

 

 

Ali Ahmeti është takuar me shefin e UNMIK-ut Shtajner

 

Prishtinë, 4 mars 2003 - Shefi i UNMIK-ut Mihael Shtajner priti sot kryetarin e Bashkimit Demokratik për Intergrim (BDI), Ali Ahmeti.

Në këtë takim është biseduar për nromalizimin e marrëdhënieve ndërmjet Maqedonisë dhe Kosovës, deklaroi për media zoti Ahmeti.

 

Ai tha se është biseduar për çështje konkrete siç është lëvizja e lirë e njerëzve, çështjet e ndryshme që kanë të bëjnë me qytetarët siç janë taksat me të cilat ngarkohen ata, lëvizjet për transport ekonomik, çështja e njohjes së diplomave të studentëve nga Maqedonia që kanë kryer Universitetin e Kosovës. Lidhur me këtë çështje, tha ai, duhet të bëhet një marrëveshje bilaterale, duke shtuar se e gëzon fakti se kjo çështje është në kompetencë edhe të Ministrisë së Arsimit të Kosovës.

Ahmeti tha se me Shtajnerin kishte biseduar edhe lidhur me çështjen e sigurisë e veçanërisht për një stabilitet të qëndrueshëm në rajon që është e vetmja rrugë që çon në BE dhe në strukturat e NATO-s. Ahmeti është takuar edhe me kryetarin e PDK-së Hashim Thaçi.

 

 

Me granatë dore sulmohet një shtëpi në veri të Mitrivicës

 

Mitrovicë, 4 mars 2003 - Mbrëmë më lagjen e Boshnjakëve në veri të Mitrovicës në shtëpinë e një shqiptari është hedhur një granatë dore. Nga shpërthimi nuk ka pësuar askush, por janë shkaktuar vetëm dëme materiale. Policia po i zhvillon hetimet, por njoftohet se nuk është arrestuar askush lidhur me këtë sulm.
Dy net më parë një granatë ishte hedhur në stacionin e policisë së UNMIK-ut.

 

 

R.Harnish: Kosova është në qendër të interesimit për krijimin e një Evrope stabile

 

Pragë, 4 mars 2003 - "Ideja për formimin e 'Bashkësisë së Komunave Serbe' është propozim i Këshillave Kombëtarë Serbë, disa prej të cilave paraqesin anën radikale të qytetarëve serbë në Kosovë", tha Rino Harnish, shef i Misionit amerikan në Prishtinë.

 

Në një intervistë dhënë radios "Evropa e lirë" Harnish tha se një ide e këtillë nuk e ndihmon zhvillimin e Kosovës dhe është e bazuar në njëkombësi dhe qartazi është pengesë për përparimin në këtë rajon.

Ndërkaq duke komentuar kërkesën serbe për kthimin e forcave të Ushtrisë Jugosllave dhe policisë serbe në Kosovë, z.Harnish tha se komuniteti ndërkombëtar ka kërkuar nga KFOR-i që të përgjigjet për një ambient të sigurtë në Kosovë, dhe KFOR-i vazhdon të kryejë këtë funksion në mënyrë shumë të mirë. Nuk ka ardhur koha që të flitet për kthimin e forcave serbe në Kosovë, tha ai.

Lidhur me prononcimet e kryeministrit serb Zoran Gjingjiq me opsione të ndryshme për Kosovën, z.Harnish vlerësoi se se këto prononcime janë shumë destabilizuese.

"Në fakt, propozimet e këtilla janë të disenjuara që të thellojnë edhe më shumë dallimet në mes të reformuesve dhe nacionalistëve në tërë Ballkanin. Nuk është koha që të adresohet çështja e statusit përfundimtar.

 

Qeveria e Shteteve të Bashkuara të Amerikës është e sigurtë se koha ka ardhur që të gjithë në Kosovë të përqëndrohen në përmbushjen e standardeve të përcaktuara. Prandaj, mendojmë se propozimet e zotit Gjingjiq mbi federalizimin apo ndarjen janë të gabueshme dhe të paraqitura në mënyrë joadekuate për diskutimet mbi statusin e Kosovës", nënvizoi Harnish.

Zoti Harnish në vazhdim tha se Qeveria e Shteteve të Bashkuara përkrah shumë idenë e fillimit të bisedimeve teknike në mes të Prishtinës dhe Beogradit. Sipas tij, palët në këto diskutime do të përqëndroheshin në çështje të caktuara prej të cilave do të përfitonin të dyja anët që ndahen nga një kufi administrativ.

 

Çështjet si ajo e njohjes së dokumenteve të UNMIK-ut, ajo e targave të veturave të regjistruara në Kosovë, mund të ketë bashkëpunim rreth luftës kundër krimit, rreth furnizimit me energji elektrike dhe ka shumë çështje të tjera për të cilat do të mund të bisedohej, por të cilat asnjëherë nuk do të preknin statusin e Kosovës, tha Harnish.

I pyetur se deri në ç'masë UNMIK-u duhet të transferojë kompetencat tek autoritetet vendore, Harnish tha se ankesat e udhëheqësve se nuk kanë përgjegjësi dhe autoritet për të realizuar standardet më duken të zbehura. "Dhe unë do të sfidoja çdo lider i cili do të thoshte se institucionet e përkohshme kosovare nuk kanë autoritet. Ato kanë autoritet dhe duhet ta ushtrojnë atë", tha ai.

"Përfaqësuesi i Posacëm i Sekretarit të Përgjithshëm ka premtuar se viti 2003 do të jetë vit i transferimit të përgjegjësive shtesë tek institucionet e përkohshme. Unë shpresoj se këto institucione janë të gatshme, kanë vullnet dhe mundësi që marrin përsipër disa nga cështjet e mëdha ekonomike, pushteti mbi të cilat do t'u transferohet atyre", theksoi Harnish dhe shtoi se "u takon institucioneve të përkohshme që të hartojnë një program solid mbi objektivat që ata duan të realizojnë këtë vit".

Lidhur me procesin e kthimit të serbëve të zhvendosur, Harnish tha se kjo çështje duhet të zgjidhet në partneritet ndërmjet bashkësisë ndërkombëtare dhe bashkësisë që pranon të zhvendosurit, e cila në Kosovë është e përbërë prej shqiptarëve. "Bashkësia ndërkombëtare mund të sjellë ide, para dhe projekte të organizatave joqeveritare.

 

Vetë Qeveria ime është përkushtuar mbi këtë cështje me 5 milionë e 500 mijë dollarë që i kemi sjellë vitin e kaluar për procesin e kthimit, ndërsa këtë vit kjo shumë ka arritur në 8 milionë dollarë", theksoi Harnish.

Pyetjes se kosovarët kanë frikë se SHBA-të do ta zvogëlojnë praninë amerikane në Kosovë dhe sa është e arsyeshme kjo frikë, Harnish iu përgjegj: "Pavarësisht nga zhvillimet e fundit, Shtetet e Bashkuara janë të angazhuara me prani ushtarake në Kosovë.

 

Ngjashëm me këtë, në kohën kur po mundohemi që të ndihmojnë rindërtimin e Afganistanit, rindërtimin e Irakut, Kongresi ka ndarë gati 100 milionë dollarë ndihmë për Kosovën. Duke marrë parasysh se Kosova ka vetëm dy milionë banorë, kjo ndihmë është e madhe.

 

Dhe së fundi, mund të shihni interesimin e Kongresit dhe degëve ekzekutive mbi çështjen e stabilitetit në Ballkan, kjo cështje diskutohet në NATO, në Bashkimin Evropian.

 

Prandaj, nuk mendoj se ekziston rreziku që Kosova të largohet thënë figurativisht nga radari. Unë mendoj se është pikërisht në qendër të interesimit për krijimin e një Evrope stabile", tha mes tjerash në këtë intervistë Rino Harnish.

 

 

Nesër fillon manifestimi treditor "Epopeja e UÇK-së"

 

Prishtinë, 4 mars 2003 - Nesër fillon manifestimi tradicional përkujtimor "Epopeja e UÇK-së", i cili sivjet mbahet nën patronazhin e kryeministrit Bajram Rexhepi, kurse organizatorë janë Trupat Mbrojtëse të Kosovës.
Manifestimi për epopenë e UÇK-së dhe 5-vjetorin e rënies së komandantit legjendar Adem Jashari mbahet prej 5 deri më 7 mars. Këshilli Organizues i manifestimit, sipas kolonel Arif Muçolli, pret një pjesëmarrje masive e qytetarëve të Kosovës dhe të trojeve tjera shqiptare.

Më 6 mars TMK-ja do të bëjë homazhe te varrezat e dëshmorëve si dhe do të vizitojnë familjet e tyre, Po këtë ditë, në orët e mbrëmjes, në sallën e sporteve "1 Tetori" në Prishtinë do të mbahet një akademi përkujtimore.

 

 

Shtajner thotë se bisedimet për çështje teknike ndërmjet Prishtinës dhe Beogradit mund të fillojnë javën e ardhshme

 

Prishtinë, 4 mars 2003 - Shefi i UNMIK-ut Mihael Shtajner tha se bisedimet e para të drejtpërdrejta ndërmjet Prishtinës dhe Beogradit për çështje teknike me interes të përbashkët mund të fillojnë qysh javën e ardhshme.

 

Shtajner këtë e bëri të ditur në një takim me gazetarët, duke thënë se kryeministrit të Serbisë Zoran Gjingjiq dhe zëvendësit të tij Nebojsha Çoviq u ka dërguar një letër nëpërmjet së cilës ka kërkuar prej tyre që të dërgojë një delegacion ministror në Prishtinë për të biseduar me përfaqësuesit e Misionit të UNMIK-ut dhe institucioneve të Kosovës për çështje teknike.

Z. Shtajner ka tha se i ka propozuar shtatë pika të diskutimeve ku do të përfshiheshin energjia elektrike, tregtia, bashkëpunimi në transport, njohja e tabelave të veturave, njohja e dokumentave, pasaportave, letërnjoftimeve dhe patentë-shoferëve, detyrimet sociale dhe kthimi i të dhënave kadastrale.

 

Mirëpo, Shtajner ka përjashtuar mundësinë që në këto bisedime të diskutohet për statusin politik të Kosovës dhe shtoi se bisedimet e tilla do të zhvillohen kur të vie koha dhe se për këtë nuk e ka mandatin e KS për këtë çështje.

 

 

BE ka përshëndetur iniciativën e Shtajnerit për fillimin e dialogut mes Prishtinës dhe Beogradit

 

Bruksel, 4 mars 2003 - Bashkimi Evropian e ka përshëndetur iniciativën e kryeadministratorit Shtajner për fillimin e dialogut mes Prishtinës dhe Beogradit, duke rikujtuar se BE-ja qëndron fuqishëm pranë kësaj iniciative dhe se kjo ishte edhe kërkesë e Këshillit të Ministrave një javë më parë.

 

"Çështjet që janë propozuar për bisedime janë mu ato çështje të cilat janë të rëndësishme për jetën e kosovarëve", thotë Kristina Galak, zëdhënëse e Solanës. Ajo ka shtuar se të gjitha palët e involvuara duhet pozitivisht t'i përgjigjen kësaj ftese, duke shpjeguar se kjo është mënyra më e mirë që të preken çështjet me interes për Prishtinën dhe Beogradin.

Nisma e bisedave në relacionin Prishtinë-Beograd ka ngarkuar menjëherë agjendën e BE-së.

 

 

Statistika e UNHCR-it flasin për 200 mijë persona të zhvendosur nga Kosova

 

Prishtinë, 4 mars 2003 - Statistika e Komesariatit të Lartë për Refugjatë të OKB-së (UNHCR) flasin për 200 mijë persona të zhvendosur nga Kosova, përfshirë këtu serbët, romët, boshnjakët dhe ashkalinjt. Nga ky numër i përgjithshëm 180 mijë janë serbë, që aktualisht ndodhen në Serbi.

 

Shefi i Zyrës së UNHCR-it në Kosovë Uolter Irvin u shpreh se së shpejti do të fillojë kthimi vullnetar i të zhvendosurëve në Kosovë. Sipas tij situata aktuale në Kosovë ka filluar të përmirësohet dhe se kthimi i të zhvendosurëve do të bëhet gradualisht.

Përfaqësuesit e UNMIK-ut dhe ata të UNHCR-së theksuan se pas përfundimit të konfliktit në Kosovë janë kthyer mbi 3500 serbë. Ata i bën këto komente gjatë promovimit të një udhëzuesi për kthim të qëndrueshëm synimi i të cilit është të këshillojë dhe bashkërëndojë punën e të gjitha organizatave qeveritare e joqeveritare, të cilat merren me projekte të kthimit.

 

Po ashtu u theksua se për realizimin e procesit të kthimit gjatë vitit 2003 janë ndarë 37 milionë euro.

 

 

Fatmir Limaj është transferuar në njësinë e paraburgimit të Tribunalit të Hagës

 

Hagë, 4 mars 2003 - Tribunali Penal Ndërkombëtar për ish-Jugosllavi (TPNJ) konfirmoi se Fatmir Limaj është transferuar nga Sllovenia për në njësinë e paraburgimit të TPNJ-së të marten, më 4 mars 2003.

 

Në mënyrë që të akuzuarit t'i lejohet deklarimi ndaj akuzave, është caktuar seanca e paraqitjes së parë e cila do të mbahet të mërkurën, më 5 mars, në ora 15:30, para gjykatësit Liu.

Fatmir Limaj është akuzuar më 27 janar 2003.

 

Aktakuza e ngarkon atë me 4 pika për krime kundër njerëzimit dhe me 5 pika për shkelje të ligjeve dhe zakoneve të luftës që thuhet se janë bërë më 1998 në kampin burg të Ushtrisë Çlirimtare të Kosovës (UÇK) në Llapushnik që gjendet në komunën e Gllogocit, në Kosovë, thuhet në një njoftim të Tribunalit të Hagës.

 

 

Prokurorët kërkuan nga Tribunali i Hagës që të zgjatet afati për gjykimin e Millosheviqit

 

Hagë, 4 mars 2003 - Prokurorët kërkuan nga Tribunali i Hagës që të zgjatet afati për gjykimin e ish-presidentit jugosllav Sllobodan Millosheviq.

 

Prokurori Xhebri Najs tha se prokurorisë i duhen edhe 200 ditë për të paraqitur akuzat kundër Millosheviqit, i cili akuzohet për krimet e luftës gjatë konfliktit në Kosovë, Bosnje dhe Kroaci. Në gjykimin që filloi më 12 shkurt të vitit të kaluar deri më tash janë mbajtur 160 seanca.

 

 

Në Prishtinë filloi manifestimi "Java e Dodonës"

 

Prishtinë, 4 mars 2003 - Në Prishtinë filloi manifestimi "Java e Dodonës", manifestim ku që organizohet me rastin e 10-vjetorit të themelimit të këtij teatri, i cili nisi me një ekspozitë me 130 fotografi dokumentare nga puna 10-vjeçare e teatrit dhe galerisë Dodona.

"Kjo retrospektivë tregon se teatri Dodona nuk ishte vetëm përpjekje për të mbijetuar në kohën e egër, mirëpo ishte një lëvizje e rezistencës artistike”, tha më këtë rast shkrimtari Eqrem Basha.

 

Ndërsa aktori Xhevdet Doda duke folur për punën 10-vjeçare të ekzistencës së këtij teatri tha se janë realizuar dramat e mbi 15 autorëve shqiptarë dhe shfaqjet e tyre i kanë realizuar mbi 15 regjisorë, ndërsa mbi 100 aktorë kanë luajtur nga një deri në 30 shfaqje.

 

 

Në Kroaci është arrestuar ish-ministri i Maqedonisë Besnik Fetai

 

Shkup, 4 mars 2003 - Ministri i mëparshëm i Ekonomisë, Besnik Fetai, për të cilin ishte shpallur urdhërarresti ndërkombëtar dje është zbuluar nga autoritetet kroate gjatë kontrollimit të një veture të udhëtarëve në kufirin me Bosnjë e Hercegovinën.

Ndërkohë po bëhen kontrollime dhe po përgatiten dokumentet për një arrest ekstradues, njoftohet në Ministrinë e Punëve të Brendshme të Maqedonisë.

Ndryshe Fetai nga autoritetet e Shkupit akuzohet për abuzimin e detyrës zyrtare.

 

 

Shkup: Bëhet thirrje për zbardhjen e rastit të "Vreshtave të Rashtakut"

 

Shkup, 4 mars 2003 - Fondacioni Instituti Shoqëria e Hapur - Maqedoni (FISHHM) dhe Grupi Ndërkombëtar i Krizës (GNK) i kanë bërë thirrje Qeverisë së Maqedonisë që të zbardhë rastin e "Vreshtave të Rashtakut" dhe t'i bëjë publike rezultatet e hetimeve.

Drejtori ekzekutiv i FISHHM-së Vladimir Millçin ka theksuar se "ky rast bën thirrje te ndërgjegja e të gjitha qytetarëve të Maqedonisë, pa dallim përkatësie etnike apo religjionit", ndërkaq drejtori i GNK-së Eduard Xhozef thotë se qytetarët e Maqedonisë kanë të drejtë ta dinë të vërtetën për atë se ç'ndodhi në "Vreshtat e Rashtakut" para një viti.

Në një komunikatë të përbashkët, Milçin e Xhozef u bënë thirrje të gjitha organizatave për mbrojtjen e të drejtave të njeriut dhe misioneve në Maqedoni të inkuadrohen në zbardhjen e këtij rasti, që të kuptohet se çfarë ndodhi me të vërtetë në lokalitetin "Vreshtat e Rashtakut" kur u vranë gjashtë pakistanezë dhe një indian.

 

 

Çoviq thotë se temat e theksuara nga Shtajneri për bisedime ndërmjet Prishtinës dhe Beogradit janë cinike!

 

Beograd, 4 shkurt - Zëvendëskryeministri serb, Nebojsha Çoviq lidhur me ftesën për bisedime me përfaqësuesit e UNMIK-ut dhe të institucioneve të përkohshme të Kosovës. Ai citohet të ketë thënë se se "temat e theksuara nga ana e z. Shtajner duken cinike", ngase sipas tij ka probleme më urgjente se ato që i përmend Shtajneri.

 

Natyrisht se duhet të bisedohet për një varg çështjes teknike, por së pari duhet të flitet për kthimin e një numri më të madh të njerëzve të zhvendosur, për lirinë dhe sigurinë e tyre në Kosovë, por edhe për çështjen e decentralizimit, thotë Çoviq. Sipas tij duhet të bisedohet lidhur me marrëveshjen për Mitrovicën e veriut, e cila nuk është zbatuar.

 

 

Sllovakia dhe Shqipëria shprehën vullnetin për bashkëpunimin dypalësh në procesin e integrimit evropian

 

Tiranë, 4 mars 2003 - Sllovakia dhe Shqipëria shprehën vullnetin e tyre të përbashkët për zgjerimin e bashkëpunimit dypalësh në procesin e integrimit evropian. Ky mesazh vjen pas vizitës zyrtare të Ministrisë të Shtetit për Integrim Sokol Nako në Sllovaki me ftesën e ministrit të punëve të jashtme të Republikës sllovake Eduard Kuka.

 

 

Policia maqedonase gjatë fundjavës së kaluar ka kontrolluar mbi 500 lokale nate për të penguar dhunën e shtuar

 

Shkup, 4 mars 2003 - Policia maqedonase gjatë fundjavës së kaluar ka kontrolluar mbi 500 lokale nate dhe hotele dhe se është konstatuar se në disa prej tyre nuk zbatohet ligji as ai për orarin e punës dhe as ai për shërbimin e alkoolit. Aksioni i fundit i policisë u bë pasi në këtë vend janë shtuar rastet e dhunës nga të rinjtë.

Zëdhënësja e Ministrisë maqedonase të punëve të brendshme Mirijana Kortevska thotë se për t'u arritur qëllimi i vërtetë është e domosdoshme që në këto aksione të përfshihen edhe ministritë tjera si ajo e drejtësisë, arsimit, transportit që të pengohet dhuna e shtuar në mesin e të rinjëve në këtë vend.

 

 

Nga një shërthim bombe në Filipine kanë humbur jetën të pakten 17 persona

 

Manila, 4 mars 2003 – Të pakten 17 persona kanë humbur jetën dhe 100 të tjerë janë plagosur, 20 syresh rëndë, nga një shërthim bombe në aeroportin e qytetit Davao të Filipineve, njofton Rojter. Zyra e presidentes e ka dënuar fuqishëm këtë shpërthim bombe si akt terrorist, i cili, siç thuhet, nuk do të kalojë pa u ndëshkuar.

 

Po kështu njoftohet se fill pas shpërthimit në aeroportin e Davaos, nga një sulm me granatë janë plagosur dy persona në qytetin e afërm Tagum, ka bërë të ditur policia e rajonit, i cili me dekada po përballet me kryengritje muslimane.

 

 

Tre fëmijë kanë shpëtuar pas përplasjes së aeroplanit në malet e Masaçusetsit

 

Boston, 4 mars 2003 – Tre fëmijë të vegjël, të moshës 2, 5 dhe 10-vjeçare kanë shpëtuar mrekullisht pas përplasjes së aeroplanit në malet e Masaçusetsit, ndërsa nëna dhe dy vëllezërit e tyre kanë humbur jetën, njofton Rojter.

 

Ata pastaj kanë përballuar edhe acarin e madh gjatë natës para se të shpëtoheshin. Ndërkaq, babai i tyre, Ron Ferris, që po pilotonte aeroplanin dhe po kthente familjen e vet nga pushimet, ndonëse mbijetoi fatkeqësinë, ka vdekur të nesërmen nga hipotermia e rëndë në Qendrën Mjekësore në Nju Jork pasi ishte transferuar atje me helikopter.

 

 

Është arrestuar edhe një i dyshuar për sulmet mbi Qendrën Tregtare Botërore dhe në Pentagon

 

Uashington, 4 mars 2003 – Zyrtarët amerikanë kanë deklaruar se është zënë dhe është arrestuar edhe një tjetër aktivist i lartë i Al Kaidës, i cili dyshohet të ketë financuar sulmet në Qendrën Tregtare Botërore dhe në Pentagon, njofton AP.

 

Ky i arrestuar është Mohamed Omar Abdel Rahman, që është biri i sheikut të verbër egjiptian, i akuzuar për inspirimin e bombardimit të Qendrës Tregtare Botërore më 1993. Abdel Rahman është zënë para disa javësh në Kueta të Pakistanit, kanë thënë zyrtarët me kusht anonimiteti.

 

Zyrtarët pakistanez kanë sugjeruar se arrestimi i tij ka ndihmuar në kapjen e Khalid Sheik Mohamedit, ndonëse burimet amerikane e kundërshtojnë këtë dhe thonë se Mohamedi është zbuluar në një mënyrë tjetër.

 

 

Është arrestuar edhe një i dyshuar për sulmet mbi Qendrën Tregtare Botërore dhe në Pentagon

 

Uashington, 4 mars 2003 – Zyrtarët amerikanë kanë deklaruar se është zënë dhe është arrestuar edhe një tjetër aktivist i lartë i Al Kaidës, i cili dyshohet të ketë financuar sulmet në Qendrën Tregtare Botërore dhe në Pentagon, njofton AP.

 

Ky i arrestuar është Mohamed Omar Abdel Rahman, që është biri i sheikut të verbër egjiptian, i akuzuar për inspirimin e bombardimit të Qendrës Tregtare Botërore më 1993.

 

Abdel Rahman është zënë para disa javësh në Kueta të Pakistanit, kanë thënë zyrtarët me kusht anonimiteti. Zyrtarët pakistanez kanë sugjeruar se arrestimi i tij ka ndihmuar në kapjen e Khalid Sheik Mohamedit, ndonëse burimet amerikane e kundërshtojnë këtë dhe thonë se Mohamedi është zbuluar në një mënyrë tjetër.

 

 

Xhons: Refuzimi i Turqisë nuk do t'i prishë planet për Irakun

 

Shtutgart, 4 mars 2003 - Kryekomandanti i forcave amerikane në Evropë, gjenerali Xhejms Xhons, tha se refuzimi i Turqisë për moslejimin e vendosjes së 62 mijë trupave amerikane në territorin e Turqisë, nuk do t'i prishë planet ushtarake për Irakun.

 

"Dëshira jonë ka qenë të formojmë frontin verior, dhe ky mbetet qëllimi ynë. Nuk ishte e një rëndësie kritike, por mendoj se ishte pjesë e rëndësishme", tha Xhons, për të shtuar se kreu i Komandës Qendrore amerikane, gjenerali Tomi Franks i shqyrton edhe opcionet tjera.

 

 

Papandreu: Iraku ende ka gjasa të holla për t'iu shmangur luftës

 

Doha, 4 mars 2003 - Takimi i zyrtarëve të Gjirit përfundoi dje pa nënshkrimin e propozimit të Emirateve të Bashkuara, që i bën thirrje për largim presidentit të Irakut Sadam Husein. Ministri i jashtëm i Greqisë Papandreu, i cili në Doha e kryesonte delegacionin e Bashkimit Evropian, tha se Iraku ende ka gjasa të holla për t'iu shmangur luftës.

"Ende ka një mundësi që Sadam Huseini ta bëjë hapin dramatik për t'iu bindur rezolutave të Kombeve të Bashkuara për çarmatimin", tha Papandreu.

 

 

Robertson: Roli i aleancës në krizën e Irakut mbetet i kufizuar në mbrojtjen e Turqisë

 

Bukuresht, 4 mars 2003 - Sekretari i përgjithshëm i NATO-s Xhorxh Robertson tha se roli i Aleancës në krizën e Irakut mbetet i kufizuar në mbrojtjen e Turqisë si vend anëtar.

Gjatë një vizite në Rumani, Robertson tha se aktualisht nga NATO-ja janë kërkuar vetëm masat specifike për mbrojtjen e Turqisë.

 

 

Bush e ka falënderuar Musharafin për kapjen e terroristit të Al Kaidës

 

Ushington, 4 mars 2003 - Presidenti i Shteteve të Bashkuara Xhorxh Bush i është falënderuar presidentit të Pakistanit Pervez Musharaf për kapjen e terroristit të dyshuar të Al Kaidës.Khalid Sheikh Mohammed, i dyshuar për orkestrimin e sulmeve terroriste të 11 shtatorit, u arrestua të shtunën në Pakistan.

 

Sheikh Mohammed konsiderohet të jetë numri 3. i rrjetit terrorist Al Kaida, pas Osama bin Ladenit dhe zëvendësit të tij nga Egjipti, Ajman Zavahiri, ndërsa gjendej në listën e 22 terroristëve më të kërkuar të Amerikës.

 

 

Fleisher: Sadam Huseini nuk do të lihet në pushtet në rast se fillon lufta

 

Uashington, 4 mars 2003 - Administrata e presidentit Bush thotë se udhëheqësi irakian Sadam Husein do të përmbyset nga pushteti në qoftë se Shtetet e Bashkuara vendosin të ndërmarrin një sulm ushtarak për të çarmatosur Bagdadin.

 

Zëdhënësi i Shtëpisë së Bardhë, Ari Fleisher, tha të hënën se presidenti Sadam Husein nuk do të lihet në pushtet në rast se fillon lufta. Por ai e la të hapur mundësinë që udhëheqësi irakian mund ta mbajë postin e tij në qoftë se Iraku çarmatoset plotësisht.

 

 

Uashingtoni thotë se Turqia nuk do të marrë pjesën më të madhe të një pakete ndihmash ekonomike

 

Uashington, 4 mars 2003 - Administrata e presidentit Bush tha se Turqia nuk duhet të presë të marrë pjesën më të madhe të një pakete ndihmash ekonomike shumë miliarda dollarëshe pasi parlamenti hodhi poshtë kërkesën e Uashingtonit për dislokimin e trupave amerikane në tokën turke.

 

 

Nato: Këshillime mbi riorganizimin e sistemit të bazave të aleancës

 

Shtutgart, 4 mars 2003 - Kryekomandanti i forcave aleate në Evropë tha se vendet anëtare të Natos po zhvillojnë këshillime intensive mbi riorganizimin e sistemit të bazave të aleancës. Gjenerali amerikan, Xhejms Xhons, u tha gazetarëve në Shtutgart të Gjermanisë, se propozimet përfshijnë pakësimin e pranisë së madhe ushtarake amerikane në Gjermani dhe në pjesë të tjera të Evropës Perëndimore, në favor të krjimit të një rrjeti më të vogël bazash.

Gjenerali nuk përmendi në mënyrë specifike zonat e instalimeve të reja, por pranoi se vendet anëtare të aleancës po shqyrtojnë zona në Evropën lindore. Gjenerali Xhons tha se planet për pakësimin e pranisë ushtarake në Gjermani janë në një mënyrë të lidhura me kundërshtimet e forta të këtij vendi ndaj një lufte të mundshme të udhëhequr nga Shtetet e Bashkuara kundër Irakut.

Copyright©2000-2003 Trepca.net - Të gjitha të  drejtat e rezervuara.