Lajme

E shtune, 1 mars 2003

Përmbajtja:

• Mihail Shtajner premtoi se do t'ia kalojë Qeverisë së Kosovës të gjithë përgjegjësitë e lejuara me dokumentet në fuqi
• Agim Murtezi u kthye në shtëpi
• Gjykata e Hagës dha urdhër për lirimin e menjëhershëm të Agim Murtezit në mungesë të provave
• Institucionet vendore e ndërkombëtare kundërshtojnë ashpër propozimin e Gjingjiqit për federalizimin e Kosovës
• Ilir Meta kritikoi ashpër veprimet e serbëve në Kosovë
• Çivilieti: Decentralizimi i pushtetit në Kosovë nuk duhet të nënkuptohet si ndarje apo si kantonizim
• Trajkovski e Ahmeti biseduan për zbatimin e Marrëveshjes së Ohrit dhe për sigurinë
• Krikimi i organizuar sfidë për pushtetin në Shqipëri
• Sot në Egjipt filloi samiti i Ligës Arabe
• Iraku ka pranuar në parim të asgjësojë raketat e tipit "El Samud 2"
• Shtëpia e Bardhë: Premtimi i Irakut për shkatërrimin e raketave është mashtrim
• Franca e Gjermania mirëpritën premtimin e Irakut për shkatërrimin e raketave
• Aeroplanët amerikanë kanë bombarduar disa pozicione ushtarake të forcave irakiane
• SHBA-të vendosin sanksione ndaj tri organizatave çeçene që kanë lidhje me Al-Kaidën
• Sadam Hysein ka pasuri në vlerë 2 miliard dollarë
• Bler dhe Aznar: Të rifillojnë procesi i krijimit të një shteti të vërtetë palestinez
• Anan: Deri më 10 mars udhëheqësit e Qipros do të deklarohen rreth planit për ribashkimin e ishullit

Mihail Shtajner premtoi se do t'ia kalojë Qeverisë së Kosovës të gjithë përgjegjësitë e lejuara me dokumentet në fuqi

 

Prishtinë, 1 mars 2003 - Kryeadministratori i Kosovës, Mihail Shtajner, ka organizuar mbrëmë një darkë me rastin e njëvjetorit të marrëveshjes për ndërtimin e institucioneve të Kosovës.

 

Në darkë kanë marrë pjesë Presidenti i Kosovës Ibrahim Rugova, kryetari i Kuvendit Nexhat Daci, kryeministri Bajram Rexhepi dhe kryetari i PDK-së Hashim Thaçi.

 

Kryetari i AAK-së, Ramush Haradinaj, nuk ka marrë pjesë në takim, për shkak të, siç ka thënë, vonesave që lidhen me institucinalizimin më të shpejtë të jetës shtetërore në Kosovë dhe për shkak të krijimit të komunave serbe në veri të Kosovës.

 

Mihail Shtajner njoftohet të ketë thënë se gjatë këtij viti do t'ia kalojë Qeverisë së Kosovës të gjitha përgjegjësitë që lejohen me dokumentet në fuqi, ndërsa do të mbajë për vete marrëdhëniet e jashtme, çështjet e sigurisë dhe kthimin e personave të zhvendosur në Kosovë.

 

 

Agim Murtezi u kthye në shtëpi

Prishtinë, 1 mars 2003 - Agim Murtezi, i cili u lirua dje nga aktakuza e Tribunalit të Hagës, i kthye mbrëmë vonë në shtëpi.

Pas kthimit, z. Murtezi deklaroi se arrestimi dhe ngritja e aktakuzës për krime lufte kishin qenë një goditje e rëndë për të dhe për familjen e tij, ndonëse të gjithë ishin të bindur se ai nuk kishte bërë asgjë të dënueshme.

 

Me këtë rast, ai shprehu habinë që Prokuroria e Trobunalit të Hagës mund të bëjë gabime të tilla pas hetimeve të gjata.

Z. Murtezi paralajmëroi se do të kërkojë dëmshpërblim për arrestimin, mbajtjen në paraburgim dhe ngritjen e aktakuzës nga Truibunali i Hagës.

 

Anëtarët e familjes z. Murtezi thanë se arrestimi dhe aktakuza kanë qenë një goditje e rëndë për të gjithë familjarët.

Agim Murtezi ishte arrestuar më 17 shkurt. Një ditë më vonë ai ishte transferuar në Hagë.

 

 

Gjykata e Hagës dha urdhër për lirimin e menjëhershëm të Agim Murtezit në mungesë të provave

 

Hagë, 1 mars 2003 - Dje, në një seancë të veçantë, Gjykata e Hagës konstatoi gabimin e bërë rreth identifikimit të Agim Murtezit, i cili u arrestua me akuza për krime lufte në Kosovë.

Në arsyetimin e kërkesës për për tërheqjen e aktakuzës dhe për lirimin e menjëhërshëm të Agim Murtezit, përfaqësuesi i prokurorisë së Tribunalit të Hagës, Andi Kelli, deklaroi se në bazë të bisedave me z. Murtezi dhe në bazë të hetimeve shtesë, të bëra në Kosovë dhe në Hagë, prokuroria mendon se nuk ka dëshmi të mjaftueshme për akuzën ndaj z. Murtezi.

Avokati nga Kanda, Shtefan Burgo, kërkoi të tërhiqet e tërë aktakuza dhe z. Murtezi të shpallet plotësisht i pafajshëm, pasi ai nuk ka kurrëfarë lidhje me asgjë që referohet në aktakuzë.

Lirimin e z. Murtezi e kanë ndihmuar edhe dy të akuzuarit tjerë shqiptarë, Haradin Balaj e Isak Musliu, të cilët kanë dhënë deklarata se nuk e kanë njohur kurrë Agim Murtezin.

 

Duke shpallur vendimin për lirim, gjykatësi Lida Çund, i kërkoi falje Agim Murtezit, duke i uruar rrugë të mbarë për në Kosovë dhe bashkim me familjen.

Ndëkaq, prokuroria nuk e pa të nevojshme të kërkojë falje, edhepse gabimi është bërë nga ana e saj dhe jo nga gjykata. Përfaqësuesi i prokurorisë është arsyetuar se ka ekzistuar një person me nofkën "Murrizi", i cili ka kryer krime, por dëshmitarët e kanë njohur vetëm me pseudonim dhe jo me emër.

Menjëherë pas lirimit të z. Murtezi, mbrojtësi i tij deklaroi se mund të kërkojë dëmshpërblim nga OKB-ja për z. Murtezi, i cili është mbajtur dhjetë ditë në njësinë e burgut të Tribunalit të Hagës.

 

 

Institucionet vendore e ndërkombëtare kundërshtojnë ashpër propozimin e Gjingjiqit për federalizimin e Kosovës

 

Prishtinë, 1 mars 2003 - Propozimi i kryeministrit serb, Zoran Gjingjiq për federalizimin e Kosovës në dy bashkësi etnike: në atë shqiptare dhe në atë serbe, është kundërshtuar ashpër nga institucionet vendore dhe ndërkombëtare në Kosovë.

 

Zyrtarët ndërkombëtarë kanë përsëritur qëndrimin se për statusin e Kosovës vendos vetëm Këshilli i Sigurimit, ndërsa ata vendorë kanë thënë se kjo është një tendencë tjetër serbe për ta penguar procesin e pavarësisë së Kosovës.

Ramush Tahiri, këshilltar i kryetarit të Kuvendit të Kosovës, ka deklaruar se deklarata e Gjingjiqit është një politikë e vjetër e Serbisë. Ai ka thënë se Serbia synon që të gjithë serbët të jetojnë në një shtet dhe, në këtë kuadër, janë edhe tendencat për ndarjen e pjesës veriore të Kosovës dhe bashkimin e saj me Serbinë.

Zëdhënësi i UNMIK-ut, Xhorxhi Kakuk, ka deklaruar se nuk dëshiron ta komentojë deklaratën e kryeministrit të Serbisë, por ka përsëritur qëndrimin e kryeadministratorit Shtajner.

Në fillim të javës, Shtajner ka bërë të thënë se propozimet dhe deklaratat për statusin e Kosovës që vijnë nga Beogradi kohët e fundit nuk kanë kurrëfarë vlere ligjore. Po ashtu, ai ka deklaruar se as Beogradi dhe as Prishtina nuk mund ta përcaktojnë statusin përfundimtar të Kosovës.

 

 

Ilir Meta kritikoi ashpër veprimet e serbëve në Kosovë

 

Tiranë, 1 mars 2003 - Ministri i jashtëm i Shqipërisë, Ilir Meta, kritioi ashpër veprimet e fundit të serbëve në Kosovë. Në një konferencë me gazetarë, z. Meta i vlerësoi se këto veprime nxisin procese dezintegruese dhe destabilizuese.

Me këtë rast, z. Meta kërkoi nga zyrtarët e Serbisë që të ndikojnë tek serbët e Kosovës për të marrë pjesë në institucionet e përbashkëta me shqiptarët.

 

 

Çivilieti: Decentralizimi i pushtetit në Kosovë nuk duhet të nënkuptohet si ndarje apo si kantonizim

 

Prishtinë, 1 mars 2003 - Shefi i Misionit të Këshillit të Evropës në Kosovë, Ambasadori Karlo Çivilieti, tha se decentralizimi i pushtetit në Kosovë nuk duhet të nënkuptohet si monoetnicitet, si ndarje apo si kantonizim.

 

Ai tha se bashkësitë etnike duhet ta kuptojnë se izolimi në baza të caktuara territoriale nuk do t'i përmbushë interesat e tyre, ngase kjo do të arrihet vetëm nëse ato marrin pjesë në institucionet e vetëqeverisjes.

Ambasadori Çivilieti pohoi se misioni i tij ka për qëllim gjetjen e një modeli të përshtatshëm për decentralizim, i cili do të shtonte efikasitetin e punës së pushtetit lokal, do të siguronte shërbime më të mira për qytetarët dhe rritjen e shkallës së demokracisë dhe të vetëqeverisjes.

 

 

Trajkovski e Ahmeti biseduan për zbatimin e Marrëveshjes së Ohrit dhe për sigurinë

 

Shkup, 1 mars 2003 - Presidenti i Maqedonisë, Boris Trajkovski dhe kryetari i Bashkimit Demokratik për Integrim Ali Ahmeti u takuan dje, për herë të parë, për të diskutuar për situatën dhe zhvillimet aktuale në këtë vend.

Sipas burimeve nga Bashkimi Demokratik për Integrim, në takim është diskutuar për zbatimin e Marrëveshjes Kornizë të Ohrit, për shtimin e numrit të shqiptarëve në ushtri e në polici dhe për gjendjen e sigurisë në Maqedoni.

 

 

Krikimi i organizuar sfidë për pushtetin në Shqipëri

 

Tiranë, 1 mars 2003 - Prokurori shetëror do t'ia paraqesë javën e ardhshme parlamentit një raport për krimin e organizuar në Shqipëri. Në raport thuhet se krimi i organizuar po e sfidon shtetin.

Muajve të fundit në Shqipëri janë sekuestruar 71.7 kilogram heroinë, mbi 13.700 kilogram marihuanë dhe pajisje për paketimin e saj. Të gjithë sektorët pranojnë se këto rezultate janë shumë të vogla në krahasim me gjendjen reale.

Kryeprokurori është ankuar edhe për personelin e vogël të strukturave antidrogë. Ai ka thënë se kjo është e pajustifikueshme në një kohë kur sasitë e drogës të sekuestruara në Itali, që hyn në këtë vend nëpërmjet Shqipërisë, kalon pesëmbëdhjetëfishin e sekuestrimeve të bëra nga policia shqiptare.

 

 

Sot në Egjipt filloi samiti i Ligës Arabe

 

Sharm El Sheik, 1 mars 2003 – Liderët arabë filluan sot (të shtunën) në Egjipt samitin e Ligës Arabe, në përpjekje për të shuar përçarjet dhe për të arritur një politikë unike lidhur me çështjen e Irakut. Kjo do të shtonte shpresat për parapengimin e luftës së udhëhequr nga SHBA-të në këtë rajon jostabil, njofton Rojter.

Ky samit njëditor do të përpiqet të gjejë zgjidhje paqësore të krizës irakiene.

"Ne përsërisim kundërshtimin tonë ndaj luftës kundër Irakut, Kuvajtit ose të çdo shteti arab, duke e vështruar si kërcënim kundër kombit arab në përgjithësi", tha presidenti libanez, Emil Lahud, në fjalimin e tij në Samit.

 

 

Iraku ka pranuar në parim të asgjësojë raketat e tipit "El Samud 2"

 

Nju Jork, 1 mars 2003 - Iraku ka pranuar në parim të asgjësojë raketat e tipit "El Samud 2". Siç ka njoftuar kryeinspektori për armatim ne Irak, Hans Bliks, me përfaqësuesit e qeverisë irakiene po zhvillohen bisedime për hollësitë e shkatërrimit të këtyre armëve.

 

Bliks ka kërkuar nga Bagdadi asgjësimi i raketave "El Samud 2" të fillojë deri të shtunën (sot).

 

 

Shtëpia e Bardhë: Premtimi i Irakut për shkatërrimin e raketave është mashtrim

 

Uashington, 1 mars 2003 - Shtëpia e Bardhë e cilësoi si mashtrim ofertën e Irakut për të shkatërruar raketat "Al-Samud 2". Ndërkohë, në Nju Jork, kryeinspektori i Kombeve të Bashkuara për armët, Hans Bliks, e karakterizoi premtimin e Irakut si zhvillim shumë të rëndësishëm në procesin e çarmatimit.

 

 

Franca e Gjermania mirëpritën premtimin e Irakut për shkatërrimin e raketave

 

Paris, 1 mars 2003 - Franca dhe Gjermania i cilësuan si hap të rëndësishëm drejt çarmatimit njoftimet se Iraku ka premtuar të asgjësojë raketat "Al-Samud-2".

 

Të dy vendet thanë se trysnia diplomatike mbi qeverinë e Bagdadit duhet të vazhdojë dhe u bënë thirrje Shteteve të Bashkuara që të ndalojnë përpjekjet për ta detyruar Irakun të çarmatoset.

 

 

Aeroplanët amerikanë kanë bombarduar disa pozicione ushtarake të forcave irakiane

 

Uashington, 1 mars 2003 - Aeroplanët luftarakë kane bombarduar disa pozicionet ushtarake të telekomunikimit të forcave irakiane në veri të Irakut, bëjnë të ditur forcat amerikane.

 

 

SHBA-të vendosin sanksione ndaj tri organizatave çeçene që kanë lidhje me Al-Kaidën

 

Uashington, 1 mars 2003 - Departamenti amerikan i Shtetit vendosi sanksione ndaj tri organizatave çeçene që kanë lidhje me rrjetin terrorist të Al-Kaidës dhe me Osama bin Ladenin.

Zëdhënësi i Departamentit të Shtetit, Riçard Bauçer, ka nënvizuar se këto masa nuk do ndikojnë në politikën e Uashingtonit ndaj Çeçenisë.

"Mbetet qëndrimi ynë se konflikti në Çeçeni nuk mund të zgjidhet ushtarakisht, por kërkon një zgjidhje politike", ka thënë, Bauçer.

 

 

Sadam Hysein ka pasuri në vlerë 2 miliard dollarë

 

Uashington, 1 mars 2003 - Revista amerikane "Forbes" në numrin special të marsit, me titull "Mbretërit, mbretëreshat dhe diktatorët" që u kushtohet njerëzve më të pasur në botë, shkruan se presidenti iraken Sadam Hysein ka pasuri me vlerë prej 2 miliardë dollarësh.

 

Ndërkaq, vlera e pasurisë së udhëheqësit palestinez, Jaser Arafat, arrin në 300 milionë dollarë.

Sipas kësaj reviste, Rusia ka tani 17 miliarderë, nga 7 që kishte vitin e kaluar.

 

 

Bler dhe Aznar: Të rifillojnë procesi i krijimit të një shteti të vërtetë palestinez

 

Madrid, 1 mars 2003 - Kryeministri britanik, Toni Bler, dhe homologu i tij spanjol, Hose Maria Aznar, kanë deklaruar se duan të rifillojnë procesin e paqes në Lindjen e Mesme, me qëllim të krijimit të një shteti të vërtetë palestinez.

Bler ka thënë se zgjidhja më e ndershme është ekzistenca e dy shteteve – Izraelit, të cilit nuk i vihet në pikëpyetje siguria dhe një shteti të besueshëm palestinez - që do të jetojnë bri njëri-tjetrit.

 

 

Anan: Deri më 10 mars udhëheqësit e Qipros do të deklarohen rreth planit për ribashkimin e ishullit

 

Nju Jork, 1 mars 2003 - Sekretari i Përgjithshëm i Kombeve të Bashkuara, Kofi Anan, ka deklaruar se udhëheqësit grekë dhe turq të Qipros kanë rënë dakort që, deri në 10 mars, të vendosin mbi nënshkrimin apo jo të planit për ribashkimin e ishullit.

Plani në fjalë, i paraqitur nga Kombet e Bashkuara, parasheh një federatë të lirshme të dy bashkësive etnike, me disa institucione të përbashkëta.

Copyright©2000-2003 Trepca.net - Të gjitha të  drejtat e rezervuara.