E premte, 28 shkurt 2003

28.02.2003 - Trepca.net

Lajme

E premte, 28 shkurt 2003

Përmbajtja:

Presidenti Rugova merr falënderim nga Papa Gjon Pali II
KMDLNJ: Përmirësim i gjendjes së të drejtave e lirive të njeriut gjatë vitit 2002
Shtajner ka ftuar në darkë drejtuesit e institucioneve dhe liderët politikë të Kosovës
Ekstradimi i Fatmir Limajt në Hagë mund të bëhet shumë shpejt
Uiliam Nesh: "Ende është heret për fillimin e bisedimeve për statusin e Kosovës".
Tribunali i Hagës ka caktuar për sot një seancë të jashtëzakonshme për rastin e Agim Murtezit
Gjykata e Hagës ka dënuar me 11 vjet heqje lirie ish-udhëheqësen serbe të Bosnjes e Hercegovinës Bilijana Pllavshiq
Piter Fejt: "Gjendja e sigurisë në Maqedoni në përgjithësi është e qëndrueshme"
Svillanoviq ka biseduar me zyrtarët më të lartë maqedonas
Gjingjiq kërkon federalizimin e Kosovës
Një i armatosur ka vrarë tre policë dhe ka plagosur edhe 7 të tjerë afër konsullatës amerikane në Karaçi
Dy policë të vrarë dhe dy të plagosur afër konsullatës amerikane në Karaçi
Putin dhe Bush janë dakorduar të punojnë për gjetjen e një zgjidhjeje për krizën irakiane
Bush: Çfarëdo plani irakian për asgjësimin e raketave të ndaluara është pjesë e një "fushate mashtrimi"
Pauell: Udhëheqësit arabë duhet t'i bëjnë presion Sadam Huseinit
Aznar ka biseduar me Papa Gjon Palin dhe Berluskonin lidhur me krizen në Irak
Gjermania thotë se nuk do të dërgojë ndihmë të mëtejshme në Turqi
SHBA: Fituesi i projektit të Kullave Binjake

Presidenti Rugova merr falënderim nga Papa Gjon Pali II

Prishtinë, 28 shkurt - Sekretari i Shtetit të Vatikanit, Kardinali Sodomo, i ka dërguar Presidentit të Kosovës, Dr. Ibrahim Rugovës, një letër falënderimi në emër të Papës Gjon Pali II-të.

Në letër thuhet:
"Shenjtëria e Tij, Papa Gjon Pali II-të, më ka kërkuar me kënaqësi t'ju falënderoj për mesazhin e urimeve dhe të përshëndetjeve që Ju ia keni dërguar për Kërshëndella.
Në këtë vit të ri, ai lutet që të gjithë popujt të punojnë bashkërisht për të ndërtuar një kulturë të paqes, të mbështetur në të vërtetën, drejtësinë dhe respektin e të drejtave dhe dinjitetit të çdo personi.
Shenjtëria e Tij lutet për një mbushulli bekimesh hyjnore për Ju dhe për popullin e Kosovës", thuhet në letrën e Sekretarit të Shtetit të Vatikanit dërguar Presidentit Rugova.


KMDLNJ: Përmirësim i gjendjes së të drejtave e lirive të njeriut gjatë vitit 2002

Prishtinë, 28 shkurt - Këshilli për Mbrojtjen e të Drejtave dhe Lirive të Njeriut (KMDLJ) me seli në Prishtinë, publikoi një raport për gjendjen e të drejtave dhe lirive të njeriut në Kosovë gjatë vitit 2002. Në raport thuhet se gjendja e të drejtave e lirive të njeriut gjatë këtij viti në Kosovë ka ardhur duke u përmirësuar.

Po ashtum thuhet se enklavizimi dhe getoizimi i disa lokaliteteve e rajoneve të tëra kanë lënë rrugën hapur për privimin e minoriteteve nga disa të drejta themelore. Në raportin e KMDLNJ-së thuhet se gjendjen e kanë rënduar edhe rastet e delikuencës ordinare, mosefikasiteti i organeve të pushtetit e të shërbimeve publike, si edhe korrupsioni dhe deformitete të tjera që e përcjellin zhvillimin e shoqërisë kosovare të dalë nga lufta dhe robëria shumëvjeçare.
KMDLNJ vlerëson se papunësia e madhe dhe varfëria, moszgjidhja e çështjes së pensioneve të vjetra e të reja, mbyllja e një numri jo të vogël të vendeve të punës në institucionet shtetërore e shoqërore, moskthimi në punë i një numri të punëtorëve të përjashtuar nga regjimi i Beogradit gjatë njëzet vjetëve të fundit, shfaqja e rasteve të dhuns në familje, të korrupsionit, të prostitucionit, të trafikimit të njerëzve (sidomos të femrave për prostitucion) etj. kanë krijuar shumë raste sociale që prekin drejtprdrejt edhe në të drejtat themelore të qytetarëve.


Shtajner ka ftuar në darkë drejtuesit e institucioneve dhe liderët politikë të Kosovës

Prishtinë, 28 shkurt - Kryeadministratori i Kosovës, Mihail Shtajner, ka ftuar sonte për darkë drejtuesit e institucioneve dhe liderët e forcave më të mëdha politike të Kosovës. Në këtë mënyrë Shtajner dëshiron të shënojë njëvjetorin e marrëveshjes së arritur për formimin e Qeverisë së Kosovës.
Procesi për formimin e qeverisë kishte filluar që para ardhjes së Shtajnerit në krye të misionit të përkohshëm të OKB-së në Kosovë, por marrëveshja ishte arritur pak pas ardhjes së tij në këtë post.


Ekstradimi i Fatmir Limajt në Hagë mund të bëhet shumë shpejt

Hagë - Lubjanë, 28 shkurt - Zyrtarët e Tribunalit të Hagës thonë se janë duke punuar me autoritetet e Sllovenisë rreth modaliteteve të transferimit të Fatmir Limajt në Hagë. Ata thonë se transferimi mund të bëhet shumë shpejt, pasi nuk ka kurrëfarë pengesash ligjore. Sipas ligjeve sllovene, ekstradimi mund të bëhet më së largu 15 ditë prej marrjes së vendimit të Gjykatës Supreme.


Uiliam Nesh: "Ende është heret për fillimin e bisedimeve për statusin e Kosovës".

Uashington, 28 shkurt - Ish-administratori rajonal i Mitrovicës, gjenerali amerikan në pension Uilliam Nesh, tash anëtar i Këshillit amerikan për Marrëdhënie me Jashtë, i deklaroi "Zërit të Amerikës" se disa ekstremistë serbë në rajonin e Mitrovicës e kanë bërë të vështirë bashkëpunimin me OKB-në. Por, ai tha se edhe Qeveria e Kosovës duhet të të bëjë më shumë për të ndihmuar banorët serbë në gjithë Kosovën.
Z. Nesh tha se është shumë i shqetësaur me zhvillimet e fundit në veri të Kosovës. Ai tha se është në interes të popullsisë serbe në veri të Kosovës që të bashkëpunojë me administratën e UNMIK-ut, me NATO-n dhe me policinë ndërkombëtare. Po, theksoi se në rajon ka disa ekstremistë që e kanë bërë të vështirë bashkëpunimin që prej qershorit të vitit 1999.
"Ata duhet ta kuptojnë realitetin dhe të punojnë për të ndihmuar popullsinë e jo ambiciet e tyre politike", tha Uilliam Nesh.
Ish-administratori rajonal i Mitrovicës tha se çdo ide për ndarjen e Kosovës do të krijonte një mjedis politik që do të çonte në shtimin e akteve të dhunës, por do të shkaktonte edhe krijimin e njësive administrative që nuk do të ishin në gjendje të mbijetonin. Ai shtoi se ende është heret për të filluar bisedimet për statusin përfundimtar të Kosovës.
Sipas z. Nesh, Prishtina dhe Beogradi duhet të fillojnë bisedimet e drejtëpërdrejta për aspektet teknike që duhet zgjidhur pavarësisht nga statusi përfundimtar i Kosovës.


Tribunali i Hagës ka caktuar për sot një seancë të jashtëzakonshme për rastin e Agim Murtezit

Hagë, 28 shkurt - Tribunali i Hagës ka caktuar për sot mbajtjen e një seance të jashtëzakonshme për rastin e Agim Murtezit.

Ndonëse në njoftimin e Tribunalit të Hagës nuk saktësohet se cilat janë arsyet për mbajtjen e seancës së jashtëzakonshme, besohet se në seancë do të shqyrtohet deklarata e Murtezit se ai nuk është personi të cilit i referohet aktakuza dhe se ai është akuzuar e arrestuar gabimisht.
Avokatët e Agim Murtezit kanë kërkuar që klienti i tyre të lirohet sa më parë që të jetë e mundur. Deklaratat e Murtezit dhe ]ështja e identitetit të tij duhet të konfirmohen nga prokuroria e Tribunalit të Hagës.


Gjykata e Hagës ka dënuar me 11 vjet heqje lirie ish-udhëheqësen serbe të Bosnjes e Hercegovinës Bilijana Pllavshiq

Hagë, 28 shkurt - Gjykata e Hagës ka dënuar me 11 vjet heqje lirie ish-presidenten e serbëve të Bosnjes Bilijana Pllavshiq, të akuzuar për krime kundër njerëzimit. Pllavshiq kishte pranuar se ishte fajtore për dëbimin dhe vrasjen e boshnjakëve e kroatëve në Bonje e Hercegovinë gjatë viteve 1991-1992. Dënimin e saj e shpalli gjykatësi Riçard Nej.

Në muajin dhejtor të vitit të kaluar Pllavshiq kishte pranuar fajësinë për krime kundër njerëzimit, si shkëmbim për pranimin e njerës prej akuzave ku prokurorët i hoqën shtatë akuza të tjera të saj, duke përfshirë edhe atë për gjenocid, duke konstatuar se ajo është grua e moshuar.


Piter Fejt: "Gjendja e sigurisë në Maqedoni në përgjithësi është e qëndrueshme"

Shkup, 28 shkurt - Zëvendësdrejtori i Zyrës për Menaxhimin e Krizave në Bashkimin Evropian, Piter Fejt, ka deklaruar dje në Shkup se gjendja e sigurisë në Maqedoni, në përgjithësi, është e qëndrueshme, me gjithë incidentët e vogla.
Z. Fejt i cili kryeson një delegacion të BE-së, kishte takime me autoritetet më të larta shtetërore dhe me liderët politikë. Në këto takime u bisedua rreth përgatitjeve për zëvendësimin e trupave të NATO-s me ato të Bashkimit Evropian. Ndërrimi i këtyre trupave pritet të bëhet rreth gjysmës së muajit mars.


Svillanoviq ka biseduar me zyrtarët më të lartë maqedonas

Shkup, 28 shkurt - Ministri i jashtëm i Serbisë dhe Malit të Zi Goran Svillanoviq ka biseduar në Shkup me zyrtarët më të lartë maqedonas lidhur me bashkëpunimin midis dy vendeve në fushën e tregtisë dhe në luftën kundër krimit të organizuar.
Ministrja e jashtme maqedonase, Ilinka Mitreva, ka deklaruar se çështje kryesore të diskutimeve kanë qenë gjendja e sigurisë në rajon, hapja e pikave të reja kufitare dhe rritja e bashkëpunimit në fusha të ndryshme. Ajo ka thënë se në takim është biseduar edhe për përpjekjet e përbashkëta të të dy vendeve për integrim në strukturat evro-atlantike.


Gjingjiq kërkon federalizimin e Kosovës

Beograd, 28 shkurt - Kryeministri i Serbisë, Zoran Gjingjiq, ka deklaruar se e përkrah federalizimin e Kosovës në dy bashkësi etnike, në atë serbe dhe shqiptare, me të drejta të barabarta. Ai ka thënë se Serbia është e gatshme të pranojë një Kosovë të tillë me një status, i cili është më i madh se autonomia, por më i vogël se një bashkësi federale, siç është Serbia e Mali i Zi.
Gjingjiq thënë se çështja e statusit të Kosovës duhet të arrihet në baza të një marrëveshje ndërkombëtare dhe se bashkësia ndërkombëtare duhet të ndërpresë zbatimin e standardeve të dyfishta në Kosovë.
Edhe kësaj radhe ka shprehur mendimin e tij se në Kosovë duhet të kthehen 1.000 pjesëtarë të ushtrisë dhe të policisë serbe, sepse, sipas tij, "këtë e parasheh edhe rezoluta e po atij Këshilli të Sigurimi, i cili kërkon nga ne, serbët, të bashkëpunojmë me Gjykatën e Hagës".


Një i armatosur ka vrarë tre policë dhe ka plagosur edhe 7 të tjerë afër konsullatës amerikane në Karaçi

Karaçi, 28 shkurt – Sipas informacioneve më të reja të AFP-së personi i armatosur që ka hapur sot (të premten) zjarr afër konsullatës amerikane në qytetin pakistanez Karaçi ka vrarë tre policë roje, kurse ka plagosur edhe 7 të tjerë. Ky incident ka ndodhur përkundër masave të rrepta të sigurimit rreth konsullatës. Njoftohet gjithashtu se sulmuesi është arrestuar nga policia vendore.


Dy policë të vrarë dhe dy të plagosur afër konsullatës amerikane në Karaçi

Karaçi, 28 shkurt – Një person i armatosur ka hapur sot (të premten) zjarr afër konsullatës amerikane në qytetin pakistanez Karaçi. Sipas informacioneve të para, në këtë sulm janë vrarë dy policë dhe janë plagosur edhe dy të tjerë.
BBC World njofton se ky incident ka ndodhur përkundër masave të rrepta të sigurimit rreth konsullatës amerikane në Karaçi.


Putin dhe Bush janë dakorduar të punojnë për gjetjen e një zgjidhjeje për krizën irakiane

Moskë, 28 shkurt - Presidenti i Rusisë, Vladimir Putin, dhe presidenti i Shteteve të Bashkuara, Xhorxh Bush, kanë biseduar dje me telefon lidhur mre ktizën e Irakut. Sipas Moskës zyrtare, ata janë dakorduar të punojnë në drejtim të gjetjes së një zgjidhjeje që do të merrte parasysh "interesat e bashkësisë ndërkombëtare".
"Gjatë një diskutimi lidhur me Irakun, dy palët kanë shfaqur synimin të përshpejtojnë punën në kuadrin e Këshillit të Sigurimit të Kombeve të Bashkuara me qëllim të hartimit të një plani aksional që do të merrte parasysh interesat e bashkësisë botërore", thuhet në komunikatën e Kremlinit.

Në komunikatë thuhet se biseda ishte bërë me kërkesë të Uashingtonit.


Bush: Çfarëdo plani irakian për asgjësimin e raketave të ndaluara është pjesë e një "fushate mashtrimi"

Uashington, 28 ashkurt - Presidenti i Shteteve të Bashkuara, Xhorxh Bush, ka deklaruar se çfarëdo plani irakian për të asgjësuar raketat e ndaluara është pjesë e një "fushate mashtrimi" dhe i ka bërë thirrje Bagdadit që të çarmatoset plotësisht.
"Raketat janë vetëm maja e bregut të akullt. E vetmja çështje që ka në dorë është çarmatosja komplete, të cilën ai e refuzon", ka thënë presidenti amerikan.


Pauell: Udhëheqësit arabë duhet t'i bëjnë presion Sadam Huseinit

Uashington, 28 shkurt - Në një bisedë telefonike me sekretarin e përgjithshëm të Ligës Arabe, Amer Musa, Sekretari i Shtetit amerikan, Kolin Pauell, ka thënë se në takimin e nivelit të lartë të fundjavës në Egjipt duhet të kërkohet që Sadam Huseini të veprojë me përpikmëri në bazë të kërkesave të inspektorëve.
"Unë do t'i inkurajoja ata që t'i bëjnë një paralajmërim të fortë Sadam Husseinit për të respektuar kërkesat e inspektorëve", ka thënë Pauell.
Ai ka thënë gjithashtu se do të ishte në interesin e Sadam Huesinit të lagohej nga pushteti dhe t'i hapte rrugë një udhëheqjeje të përgjegjëshme që do ta merrte pushtetin në Bagdat.


Aznar ka biseduar me Papa Gjon Palin dhe Berluskonin lidhur me krizen në Irak

Romë, 28 shkurt - Kryeministri i Spanjës, Hose Mari Aznar, ka biseduar në Romë me Papa Gjon Palin II dhe me kryeministrin italian, Silvio Berluskoni, lidhur me krizën në Irak.
Vatikani bëri të ditur se Papa Gjon Pali II ka theksuar se të gjithë pjesëmarësit duhet t'i përmbahen të drejtës ndërkombëtare.
Vatikani e ka quajtur si krim kundër paqes luftën në Irak pa pajtimin e Kombeve të Bashkuara.


Gjermania thotë se nuk do të dërgojë ndihmë të mëtejshme në Turqi

Berlin, 28 shkurt - Gjermania thotë se nuk do të dërgojë ndihmë të mëtejshme në Turqi, megjithë kërkesën nga aleati në NATO për pajisje për t'iu kundërvënë kërcënimeve që do të paraqiteshin nga një luftë eventuale në Irak.


SHBA: Fituesi i projektit të Kullave Binjake