Lajme

E enjte, 27 shkurt 2003

Përmbajtja:

• Presidenti Rugova priti presidentin e rajonit të Venetos

• Kuvendi i Kosovës bën thirrje që Fatmir Limajt t'i lejohet të mbrohet në liri

• Nexhat Daci priti senatorin francez Michel Charasse

• Kryeministri Rexhepi priti shefin e misionit të NATO-s në Maqedoni

• Rino Harnish vizitoi "Riinvestin"

• Gjykata Supreme e Sllovenisë aprovoi ekstradimin e Fatmir Limajt në Tribunalin e Hagës

• BE: Formimi i "bashkësisë së komunave serbe" i dëmshëm për staibilitetin e Kosovës

• Shtajner: Ata që kanë vizion ndarjen e Kosovës nuk mund të jenë partnerë të UNMIK-ut

• Svillanoviq: Beogradi nuk qëndron pas formimit të "bashkësisë së komunave serbe" në veri të Kosovës

• Harnish: Kosova është një tërësi tokësore dhe e tillë do të mbetet

• AER do të investojë sivjet në Kosovë 46 milionë euro

• Personeli i UNMIK-ut udhëzohet të reduktojë lëvizjet në pjesën veriore të Mitrovicës

• Hartman mohon se prokuroria disponon me aktakuza të reja për krime lufte të një grupi të ri të shqiptarëve të Kosovës në Hagë

• Sezer: "Turqia do të mbështesë plotësisht anëtarësimin e Shqipërisë në NATO"

• Goran Svillanoviq qëndron sot në Shkup

• Fejt e Buçkovski biseduan për misionin e BE-së në Maqedoni

• Kroacia bllokoi 40 milionë dollarë të ish-RFJ

• Sot në Tiranë takohen përfaqësuesit e ministrive të jashtme të Shqipërisë, Maqedonisë e Kroacisë

• U nis për në Afganistan kontigjenti i dytë i komandove speciale

• NATO, BE dhe OSBE nuk shohin rrezik për destabilizimin e Maqedonisë nga grupe të armatosura

• Cërvenkovski e Ali Ahmeti biseduan për përdorimin e gjuhës shqipe në parlament dhe për dokumentet personale

• KS i OKB-së shqyrton sot projekt-rezolutën për Irakun

• Kofi Anan ndodhet në Qipro për të realizuar planin për ribashkim

• Bush: Iraku është dyfish i rrezikshëm, si për Lindjen e Mesme, ashtu edhe për Amerikën

• Shtetet e Bashkuara nuk kanë dëshirë të qeverisin Irakun

• Bliks: Iraku nuk ka marrë ndonjë vendim konkret për t'u çarmatosur

• Bush paraqet vizionin për Irakun e pasluftës

• Turqia mbylli kufijt me Irakun

• Reporterët pa kufij: Iraku është ndër 10 vendet pa liri shtypi

• Sadam Husein thotë se s'ka ndërmend as të shkojë në egzil

• Koreja e Veriut riaktivizon reaktorin kryesor bërthamor

• Karzai: SHBA duhet të mbesin pranë Afganistanit

• Kryengritësit kanë ekzekutuar të paktën 52 policë dhe 8 djem të tyre në Bregun e Fildishtë

• NASA e ka gjetur një video kasetë nga mbeturinat e anijes kosmike "Kolumbia"

Presidenti Rugova priti presidentin e rajonit të Venetos

 

Prishtinë, 27 shkurt 2003 - Presidenti i Kosovës Ibrahim Rugova priti në rezidencën e tij presidentin e rajonit Veneto të Italisë, Gjankarlo Galan. Gjatë takimit u bisedua për situatën dhe zhvillimet aktuale në Kosovë si edhe për objektivat zhvillimore të Kosovës. "Presidentin e Venetos e informova me progresin që kemi bërë në Kosovë, si dhe me objektivat tona që kanë të bëjnë me zhvillimin ekonomik, me investimet e huaja si dhe me hapjen e vendeve të reja të punës", deklaroi pas takimit presidenti Rugova.

  

Ai bëri të ditur se në takim është biseduar edhe rreth bashkëpunimit midis Kosovës dhe rajonit të Venetos.

Edhe me këtë rast, Presidenti Rugova theksoi kërkesën për njohjen e pavarësisë së Kosovës, duke shtuar se kjo do t'i mundësonte Kosovës qasje në institucionet ndërkombëtare financiare dhe integrimein e saj në Evropë.

I pyetur rreth deklaratës për pavarësinë e Kosovës, të inicuar në Kuvendin e Kosovës, Presidenti Rugova përkujtoi se pavarësia e Kosovës është shpallur në vitin 1991, e pastaj shtoi:

"Ne mund të bëjmë një deklaratë për njohjen formale të pavarësisë.

 

Kjo deklaratë është diçka që është marrë në konsiderim, por, gjithsesi, kjo duhet të bëhet në bashkëpunim me bashkësinë ndërkombëtare - me Shtetet e Bashkuara të Amerikës, Bashkimin Evropian, dhe Organizatën e Kombeve të Bashkuara.

"Unë dëshiroj që Kosova të njihet sa më shpejt si shtet. Një palë negociate i kemi përfunduar, tash është një epokë e re për Kosovën", theksoi presidenti Rugova.

Presidenti i rajonit të Venetos, Gjakarlo Galan, tha se kjo vizitë realizohet në kuadrin e bashkëpunimit të mirë midis Kosovës dhe Italisë. Ai theksoi ndihmat financiare që ka dhënë Italia në Kosovë.

"Kemi dëshirë të krijojmë diçka me rëndësi që ndihmon stabilitetin e Kosovës", deklaroi z. Galan.

Ai tha se Italia dëshiron të ndihmojë krijimin e standardeve ndërkombëtare në Kosovë, në mënyrë që ajo të jetë më afër Bashkimit Evropian. Në këtë kontekst ai tha se rajoni i Venetos ofron aftësim profesional 6 mujor ose njëvjeçar për disa studentë të rinj kosovarë.

Z. Galan foli edhe për investimet italiane në Kosovë.

"Në momentin që Kosova do të jetë stabile dhe e sigurtë invesitorët italianë do të marrin pjesë me investime e tyre këtu, sidomos ata të Venetos.

 

 

Kuvendi i Kosovës bën thirrje që Fatmir Limajt t'i lejohet të mbrohet në liri

 

Prtishtinë, 27 shkurt 2003 - Kuvendi i Kosovës miratoi sot një deklaratë, përmes së cilës i bën thirrje Tribunalit të Hagës që deputetit Fatmir Limajt t'i mundësohet të mbrohet në liri.

Në deklaratë kundërshtohet barazimi i qëndresës dhe luftës çlirimtare në Kosovë me luftën shfarosëse kundër Kosovës dhe popullit të saj. Në deklaratë thuhet:

"Kuvendi i Kosovës konfirmon përcaktimin për njohjen e jurisdiksionit të Gjykatës Ndërkombëtare për krime të luftës në ish-Jugosllavi dhe për bashkëpunim institucional, të ndërsjellë dhe të rregullar me ligj të Kosovës me këtë Gjykatë;

Kuvendi i Kosovës apelon te Gjykata Ndërkombëtare të Hagës që deputetit Fatmir Limaj, i cili ka shprehur me kohë dhe publikisht gatishmërinë për t'u paraqitur vullnetarisht në Hagë, të trajtohet si i vetëparaqitur dhe t'i mundësohet mbrojtja në liri;

Kuvendi i Kosovës kundërshton përpjekjet për politizimin dhe etnicizimin e drejtësisë, si dhe barazimin e qëndresës dhe luftës çlirimtare në Kosovë me luftën shfarosëse kundër Kosovës dhe popullit të saj;"

Deklarata u miratua me propozimin e grupit parlamentar të PDK-së dhe me mbështetjen e grupeve parlamentare të LDK-së, AAK-së dhe atij të minioriteteve joserbe. Deputetët e koalicionit serb "Kthimi" e braktisën seancën, në shenjë revolte.

Kuvendi i Kosovës miratoi sot edhe një deklaratë me të cilën shpallet i pavlefshëm formimi i "Bashkësisë së komunave serbe në veri të Kosovës".

Në seancën e sotme të Kuvendit u miratuan në parim Projektligji për Bibliotekat dhe Projetkligji për Lëndët Arkivore e Arkivat.

Kuvendi miratoi vendimin që Sabri Hamiti ta zëvendësojë përkohësisht në Kryesinë e Kuvendit anëtarin e kësaj kryesie Fatmir Sejdiun.

 

 

Nexhat Daci priti senatorin francez Michel Charasse

 

Prishtinë, 27 shkurt 2003 - Kryetari i Kuvendit të Kosovës, Nexhat Daci, priti anëtarin e Senatit të Francës, Michel Charasse, cili shoqërohej nga shefi i Zyrës franceeze në Prishtinë, Bernard Garancher dhe zyrtarë të tjerë francezë. Në takim u bisedua për mundësitë e thellimit të bashkëpunimit midis Kosovës e Francës, sidomos për bashkëpunimin e dy parlamenteve.

Z. Daci e njeftoi senatorin francez me punën e Kuvendit të Kosovës, duke theksuar përpjekjet që legjistlacioni i Kosovës të jetë kompatibil me atë të vendeve evroperëndimore.

Senatori Charasse shprehu gatishmërinë e Senatit të Fra

 

 

Kryeministri Rexhepi priti shefin e misionit të NATO-s në Maqedoni

 

Prishtinë, 27 shkurt 2003 - Kryeministri i Kosovës, Bajram Rexhepi, priti sot shefin e Misionit të NATO së në Maqedoni, z. Bighegham. Në takim u bisedua lidhur me situatën aktuale në Kosovë dhe në rajon, me theks të veçantë në zhvillimet që kanë të bëjnë me marrëdhëniet midis Kosovës e Maqedonisë.

Duke folur për situatën e shkaktuar pas arrestimit të deputetit Fatmnir Limaj dhe tre ish-pjesëtarëve tjerë të UÇK-së, z. Rexhepi tha se arrestimi dhe dërgimi i tyre në Tribunalin e Hagës ka nxjerrë në pah mungesën e bashkëpunimit midis këtij institucioni ndërkombëtar dhe institucioneve të Kosovës.

Duke folur për marrëdhëniet midis Kosovës e Maqedonisë, të dy palët theksuan nevojën për angazhime më të mëdha për të ngritur nivelin e këtyre marrëdhënieve midis dy vendeve. Avancimi i këtyre marëdhënieve u vlerësua si hap i domosdoshëm jo vetëm për sigurinë në rajon, por edhe për zhvillimin ekonomik të dy vendeve.

 

 

Rino Harnish vizitoi "Riinvestin"

 

Prishtinë, 27 shkurt 2003 - Shefi i Misionit amerikan në Kosovë, Rino Harnish, vizitoi sot Institutin për Hulumtime Zhvillimore "Riinvest". Pas takimit me udhëheqës të këtij instituti, z. Harnish deklaroi se bashkëpunimi midis Qeverisë së Kosovës dhe komunitetit të biznesit mund të forcojë pozitën e ekonomisë së Kosovës.

"Institucionet duhet të shfrytëzojnë idetë e "Riinvestit" dhe të komuniteti i biznesit", theksoi z. Harnish.

Ai tha se komuniteti i biznesit në Kosovë ballafaqohet me vështirësi të ndryshme dhe shtoi se nga instituti "Riinvest" mund të dalin edhe propozime të ndryshme të favorshme për ekonominë e Kosovës.

Shefi i Misionit amerikan në Kosovë, Rino Harnish, deklaroi se qeveria amerikane do të vazhdojë mbeshtetjen për Institutin për Hulumtime Zhvillimore "Riinvest".

Ndërkaq, drejtori i "Riinvestit", Muhamet Mustafa, bëri të ditur se gjatë këtij viti është paraparë të bëhen hulumtime të ndryshme për ekonominë e Kosovës.

 

 

Gjykata Supreme e Sllovenisë aprovoi ekstradimin e Fatmir Limajt në Tribunalin e Hagës

 

Lubjanë, 26 shkurt 2003 - Gjykata Supreme e Sllovenisë e ka aprovuar kërkesën për ekstradimin e Fatmir Limajt në Tribunalin e Hagës.

Zëdhënësi i gjykatës, Franc Stanovnik, ka deklaruar se Ministria e Drejtësisë do ta aranzhojë ekstradimin e z. Limaj me zyrtarët e OKB-së. Ai ka thënë se rasti mund të zgjidhet deri kah fundi i javës.

 

 

BE: Formimi i "bashkësisë së komunave serbe" i dëmshëm për staibilitetin e Kosovës

 

Bruksel, 27 shkurt 2003 - Bashkimi Evropian ka reaguar ndaj formimit të "bashkësisë së komunave serbe në veri të Kosovës". BE vlerëson se ky është një veprim të njëanshëm që bie ndesh me Rezolutën 1244 të KS të OKB-së që mund të ketë ndikime negative për stabilitetin e Kosovës, por edhe mbarë rajonit.
Kristina Galak, zëdhënëse e shefit të diplomacisë evropiane, Havier Solana, ka deklaruar se BE nuk do të përkrahë asnjëherë vendimet e njëanshme të cilësdo palë.

Ajo ka theksuar se ky vendim i serbëve u mor vetëm një ditë pasi Këshilli i Ministrave u bëri thirrje të dyja palëve në Kosovë që të përmbahen nga vendimet e njëanshme.

 

 

Shtajner: Ata që kanë vizion ndarjen e Kosovës nuk mund të jenë partnerë të UNMIK-ut

 

Prishtinë, 27 shkurt 2003 - Kryeadministratori i Kosovës, Mihael Shtajner, ka pritur mbrëmë vonë tre drejtues të koalicionit serb "Kthimi", Dragisha Kërstoviq, Gojko Saviq dhe Oliver Ivanoviq.

Zëdhënësi i UNMIK-ut, Xhorxhi Kakuk, ka bërë të ditur se z. Shtajner ka bërë të qartë qëndrimin e UNMIK-ut lidhur me organizimin e ri të serbëve.

 

Ai ka thënë se z. Shtajner u ka thënë serbëve se ata që kanë vizion ndarjen e Kosovës, siç është rasti me bashkësinë e komunave serbe, nuk mund të jenë partnerë të UNMIK-ut. Shtajner i ka cilësuar jolegjitime organizimet e tilla.

 

 

Svillanoviq: Beogradi nuk qëndron pas formimit të "bashkësisë së komunave serbe" në veri të Kosovës

 

Bruksel, 27 shkurt 2003 - Ministri i jashtëm serb, Goran Svillanoviq, dhe zëvendëskryeministri Nabojsha Çoviq, kandë kanë deklaruar dje në Bruksel se Beogradi nuk qëndron pas formimit të "bashkësisë së komunave serbe" në veri të Kosovës.

Pas takimit me sekretarin e përgjithshëm të NATO-s, Xhorxh Robertson, shefi i diplomacisë serbe ka thënë se NATO ka përsëritur mbështetjen e plotë për zbatimin e Marrëveshjes së Dejtonit dhe për bashkëpunimin e mëtejmë lidhur me çështjen e Kosovës.

 

 

Harnish: Kosova është një tërësi tokësore dhe e tillë do të mbetet

 

Prishtinë, 27 shkurt 2003 - "Kosova është një tërësi tokësore dhe si e tillë do të mbetet, nën kontrollin e tërësishëm të udhëhequr nga Kombet e Bashkuara". Kështu deklaroi dje, pas takimit me kryeministrin Bajram Rexhepi, shefi i Zyrës amerikane në Prishtinë, Rino Harnish, duke komentuar vendimin e serbëve të veriut të Kosovës për "bashkimin e komunave serbe".

Pas këtij takimi u bë e ditur se puna e Tribunalit të Hagës në Kosovë dhe kalimi i kompetencave nga UNMIK-u tek institucionet vendore kanë qenë temat kryesore të bisedimeve.

Z. Harnish ka kërkuar nga Qeveria e Kosovës një angazhim më të madh për realizimin e prioriteteve të përcaktuara për vitin 2003. Ai ka theksuar se pret me padurim që në fjalimet e ardhshme të kryeministrit të dëgjojë për sa më shumë progres, sidomos në fushën e ekonomisë dhe privatizimit.

 

 

AER do të investojë sivjet në Kosovë 46 milionë euro

 

Bruksel, 27 shkurt 2003 - Agjencioni Evropian për Rindërtim do të investojë sivjet 316 milionë euro në vendet e Ballkanit. Pjesa më e madhe e këture mjeteve, 220 milionë euro, do të ndahen për Serbinë, kurse në Kosovë do të investohen 46 milionë euro.

 

 

Personeli i UNMIK-ut udhëzohet të reduktojë lëvizjet në pjesën veriore të Mitrovicës

 

Mitrovicë, 27 shkurt 2003 - Personeli ndërkombëtar i UNMIK-ut është udhëzuar të reduktojë lëvizjet me automjete të UNMIK-ut në pjesën veriore të Mitrovicës. Kjo ka ndodhur vetëm një ditë pas formimit të "bashkësisë së komunave serbe të Kosovës". Atë ditë në pjesën veriore të këtij qyteti është djegur një automjet i policisë ndërkombëtare.

 

 

Hartman mohon se prokuroria disponon me aktakuza të reja për krime lufte të një grupi të ri të shqiptarëve të Kosovës në Hagë

 

Hagë, 27 shkurt 2003 - Zëdhënësja e Tribunalit të Hagës, Florens Hartman, ka mohuar se prokuroria ka të gatshme aktakuza të reja ndaj shqiptarëve në Kosovë.

Duke komentuar një deklaratë të komandantit të KFOR-it, gjeneralit Fabio Mini, dhënë gazetës italiane "Korierra dela sera", se ka aktakuza të reja për një grup të shqiptarëve, Hartman ka thënë se në këtë moment nuk ka ndonjë aktakuzë tjetër kundër shqiptarëve të Kosovës për krime lufte. Por, ajo ka pohuar se janë duke vazhduar hetimet edhe për disa raste të tjera.

Hartman ka thënë se momenti kur do të ngriten aktakuza të reja do të varet nga dëshmitë.

 

 

Sezer: "Turqia do të mbështesë plotësisht anëtarësimin e Shqipërisë në NATO"

 

Ankara, 27 shkurt 2003 - "Turqia do të japë gjithë mbështetjen e saj për anëtarësimin e Shqipërisë në NATO", deklaroi dje në Ankara Presidenti i Turqisë, Ahmet Nexhdet Sezer, gjatë takimit me Ilir Metën, zëvendëskryeministër e ministër i Punëve të Jashtme të Shqipërisë.

"Stabiliteti i Shqipërisë dhe zhvillimi i saj tregojnë se ajo është është në rrugën e integrimit të plotë euroatlantik", tha z. Sezer.

Ndërkaq, z.Meta tha se "Shqipëria e vlerëson si bazë për integrimin në NATO dhe në Bashkimin Europian, integrimin rajonal".

Presidenti Sezer dhe z. Meta, shprehën gatishmërinë e plotë të qeverive të të dy vendeve për të forcuar bashkëpunimin në fushën ekonomike e tregtare. Ata paralajmëruan se së shpejti do të nënshkruhet marrëveshja e Tregtisë së Lirë midis dy vendeve.

 

 

Goran Svillanoviq qëndron sot në Shkup

 

Shkup, 27 shkurt 2003 - Sot për vizitë njëditore pune në Maqedoni arrin ministri i Punëve të Jashtme i Serbisë e Malit të Zi, Goran Svillanoviq, i cili është edhe kryesues i Procesit për bashkëpunim të Evropës Juglindore.

Si njoftohet, Svillanoviq do të takohet me ministren e Punëve të Jashtme të Maqedonisë, Ilinka Mitreva, me presidentin Boris Trajkovski, kryeministrin Branko Cërvenkovski dhe kryetarin e Kuvendit, Nikolla Popovski.

 

 

Fejt e Buçkovski biseduan për misionin e BE-së në Maqedoni

 

Shkup, 27 shkurt 2003 - Përfaqësuesi i Bashkimit Evropian në Maqedoni, Piter Fejt, dhe ministri maqedonas i Mbrojtjes, Vllado Buçkovski, biseduan sot në Shkup rreth zëvendësimit të misionit të NATO-s me misionin e Bashkimit Evropian. Në takim u tha se së shpejti pritet të bëhet kompletimi i marrëveshjeve bilaterale mes BE-së dhe Maqedonisë lidhur me këtë mision.

Ministri Buçkovski deklaroi në takim se situata e sigurisë në Maqedoni është stabile dhe kjo paraqet bazë të mirë për fillimin e misionit të Bashkimit Evropian.

Piter Fejt takohet sot edhe me presidentin Boris Trajkovski.

 

 

Kroacia bllokoi 40 milionë dollarë të ish-RFJ

 

Zagreb/Nju-Jork, 27 shkurt 2003 - Kroacia ka bllokuar këtë javë 40 milionë dollarë të deponuara nga ish-RFJ në tri banka të Nju-Jorkut. Këtë e kanë konfirmuar autotritetet e Kroacisë në Nju-Jork dhe në Zagreb. Mediat serbe njoftojnë se qeveria e Kroacisë ka bërë të ditur se bllokimi do të zgjasë derisa të arrihet marrëveshja për suksesion.

Këto mjete janë bllokuar në momentin e fundit, sepse sot ka hyrë në fuqi vendimi i SHBA-ve për zhbllokimin e një pjese të mjeteve financiare të ish-RFJ-së nga institucionet amerikane.

 

 

Sot në Tiranë takohen përfaqësuesit e ministrive të jashtme të Shqipërisë, Maqedonisë e Kroacisë

 

Tiranë, 27 shkurt 2003 - Në Tiranë sot mbahet takim i sekretarëve shtetërorë të ministrive të Punëve të Jashtme të Shqipërisë, Maqedonisë dhe Kroacisë. Ky takim mbahet në kuadrin e bashkëpunimit trepalësh në procesin për integrim në NATO.

Përfaqësuesit e delegacioneve nga Maqedonia e Kroacia do të takohen me zëvendësministrin e Punëve të Jashtme të Shqipërisë, Luan Hajdaraga.

 

 

U nis për në Afganistan kontigjenti i dytë i komandove speciale

 

Tiranë, 27 shkurt 2003 - Kontigjenti i dytë i misionarëve shqiptarë të paqes në Afganistan, 23 efektiva të Batalionit Special Komando, u nisën dje, në përmbushje të misionit 6-mujor paqeruajtës në Afganistan, në kuadër të ISAF-it.

 

Nisja e tyre u shoqërua me një ceremoni në Aeroportin e Tiranës "Nënë Tereza", ku merrnin pjesë kryeministri Fatos Nano, ministri i Mbrojtjes, Pandeli Majko, shefi i Shtabit të Përgjithshëm të Forcave të Armatosura, gjeneralmajor Pëllumb Qazimi, përfaqësues diplomatikë, ambasadori turk në Tiranë, Murat Oguz, ushtarakë të lartë të FA-sw, familjarë, etj.

"Ju jeni pararojë e përpjekjeve tona për t'u bërë anëtarë të Aleancës Atlantike", tha Nano.

Ai vlerësoi suksesin e kontigjentit të parë paqeruajtës shqiptarë, të cilët u kthyen dje në atdhe.

 

 

NATO, BE dhe OSBE nuk shohin rrezik për destabilizimin e Maqedonisë nga grupe të armatosura

 

Shkup, 27 shkurt 2003 - Zyrtarët ndërkombëtarë në Shkup kanë përsëritur se nuk ekziston rreziku për destabilizimin e Maqedonisë nga grupe të armatosura, edhepse gjendja në në rajonet veriperëndimore të këtij vendi është ende e brishtë.

Zëdhënësit e NATO-s, BE-së dhe OSBE-së, në një konferencë të përbashkët shtypi, kanë deklaruar se duhet të bëhet e qartë se nuk do të këtë ndonjë ofensivë pranverore. Ata kanë thënë se grupet e armatosura janë të vogla.

Zëdhënësi i OSBE-së tha se këto gruoe nuk gëzojnë asnjë mbështetje nga popullata vendëse dhe nga strukturat politike.

Duke folur për incidentet e fundit, zëdhënësja e BE-së Irena Gjuzellova, ka thënë se ato janë akte të izoluara dhune. Por, ajo ka theksuar se komuniteti ndërkombëtar i është vigjilent dhe do të reagojë shpejt kundër çdo lloj dhune.

 

 

Cërvenkovski e Ali Ahmeti biseduan për përdorimin e gjuhës shqipe në parlament dhe për dokumentet personale

 

Shkup, 27 shkurt 2003 - Liderët e dy partive kryesore të koalicionit qeveritar në Maqedoni, Branko Cërvenkovski dhe Ali Ahmeti, në takimin e tyre të parë, kanë biseduar për përdorimin e gjuhës shqipe në parlament e në administratën shtetërore si dhe për zgjidhjen e kontestit për dokumentet personale.

Nënkryetari i BDI-së, Agron Buxhaku, pjesëmarrës në këtë takim, ka deklaruar se këto parti vazhdojnë t'i harmonizojnë qëndrimet e tyre rreth përdorimit të gjuhës shqipe. BDI thotë se në ballinën e pasaportës duhet të shkruhet edhe në gjuhën shqipe, ndërkaq LSDM-ja ka propozuar që kjo të bëhet në faqen e tretë.

 

 

KS i OKB-së shqyrton sot projekt-rezolutën për Irakun

 

Nju-Jork, 27 shkurt 2003 - Këshilli i Sigurimit i OKB-së do ta shqyrtojë sot Rezolutën e propozuar nga SHBA-të e Britania e Madhe për Irakun. Kjo rezolutë parashikon edhe përdorimin e forcës për të detyruar ]armatosjen e Irakut nga armçt e shkatërrimit në masë.

 

Për miratimin e rezolutës janë të nevojshme nëntë vota, në qoftë se nuk voton kundër asnjëri nga anëtarët e përhershëm të Këshillit të Sigurimit: SHBA, Rusia, Kina, Britania e Madhe dhe Franca.

Nga ana tjetër, Franca, Gjermania dhe Rusia kanë parashtruar një memorandum për çarmatim paqësor të Irakut, përmes të inspektimeve. Ky memorandum kuk është paraparë të votohet, sepse ai nuk ka karakter të detyrueshëm.

 

 

Kofi Anan ndodhet në Qipro për të realizuar planin për ribashkim

 

Nikozi, 27 shkurt 2003 - Sekeretari i përgjithshëm i Kombeve të Bashkuara, Kofi Anan, ndodhet në Qipro për të bindur liderët e të dy komuniteteve, atij grek dhe turk, që ta përkrahin planin e tij për ribashkimin e ishullit të ndarë.

"Erdha në Qipro që t'u them se gjithë bashkësia ndërkombëtare shpreson se zgjidhja aq e pritur është afër doresh. Besoj fuqimisht se oferta e paraqitur në tryezë është fer dhe e balancuar dhe se zgjidhja do t'i sillte përfitime të mëdha të dyja palëve", ka thënë Anan.

 

 

Bush: Iraku është dyfish i rrezikshëm, si për Lindjen e Mesme, ashtu edhe për Amerikën

 

Uashington, 27 shkurt 2003 - Presidenti i Shteteve të Bashkuara, Xhorxh Bush, ka thënë se Iraku është dyfish i rrezikshëm, si për Lindjen e Mesme, ashtu edhe për Amerikën, sepse Sadam Huseini ka si armë ashtu edhe lidhje me grupe terroriste për të shkaktuar tronditje të tmerrshme në të dy rajonet.

"Rreziku nga Iraku është se Sadam Huseini mund të godasw në fqinjësi dhe rreziku me Irakun qëndron aty se ai ka pasur vullnetin dhe kapacitetet që të ushtrojë organizata të tipit të al Kaidës dhe t'i furnizojë ato me pajisje për të lënduar Amerikën. Bota ka pritur gjatë kohë që Sadam Huseini të çarmatoset", ka thënë presidenti i Shtetetve të Bashkuara.

 

 

Shtetet e Bashkuara nuk kanë dëshirë të qeverisin Irakun

 

Salahadin, Irak, 27 shkurt 2003 - I deleguari special i Shteteve të Bashkuara, Zylmay Khalilzad, ka thënë në mbledhjen e grupeve opozitare irakiane që ka filluar në veri të Irakut të kontrolluar nga kurdët, se Shtetet e Bashkuara nuk kanë dëshirë të qeverisin Irakun.

Khalizad ka thënë se populli irakian duhet të qeverisë punët e veta sa më shpejt që është e mundur, por nuk ka dhënë ndonjë ide se kur mund të ndodhë kjo.

Grupet opozitare irakiane u mblodhën të diskutojnë për përbërjen e qeverisë irakiane, nëse dëbohet nga pushteti presidenti Sadam Husein.

 

 

Bliks: Iraku nuk ka marrë ndonjë vendim konkret për t'u çarmatosur

 

Bagdat, 27 shkurt 2003 - Kryeinspektori i OKB-së për armët, Hans Bliks, tha se Iraku ende nuk ka filluar të bashkëpunojë plotësisht me inspektorët.

Zoti Bliks e bëri këtë koment tri ditë para se të raportojë në Këshillin e Sigurimit mbi bashkëpunimin irakian. Ai u tha gazetarëve në selinë e Kombeve të Bashkuara në Nju Jork se mendon që Iraku po bën përpjekje më të mëdha për të sqaruar çështjet rreth programeve të armëve. Mirëpo, ai theksoi se nuk ka të dhëna se Iraku ka marrë ndonjë vendim konkret për t’u çarmatosur.

 

 

Bush paraqet vizionin për Irakun e pasluftës

 

Uashington, 27 shkurt 2003 - Presidenti amerikan Xhorxh Bush ka paraqitur vizionin e tij për Irakun e pasluftës, duke thënë se ai ë sheh atë si një komb që mund të sherbejë si shembull i lirisë për Lindjen e Mesme.

Zoti Bush tha se çdo e ardhme e zgjedhur nga populli irakian do të ishte më e mirë se sa të jetojë nën tmerrin e regjimit të Sadam Huseinit. Ai tha se Iraku i ka të gjitha mundësitë për të shkuar drejt demokracisë dhe lirisë, ashtu siç kanë bërë edhe kombe të tjera në vështirësi në të kaluarën.

 

 

Turqia mbylli kufijt me Irakun

 

Ankara, 27 shkurt 2003 - Turqia mbylli kufijt me Irakun dhe e evakuoi personelin e ambasadës së saj në Bagdat ndërkohë që parlamenti i vendit po përgatitet të votojë lidhur me kërkesën për dislokimin e trupave amerikane në territorin e saj.

Ministri i jashtëm i Turqisë, Jashar Jakis, tha se urdhëri për evakuimin e gjithë personelit të ambasadës, përfshirë edhe ambasadorin Osman Paksut, u dha me qëllim që të parandalohen veprime eventuale të pakontrolluara, pasi parlamenti të marrë vendimin lidhur me kërkesën amerikane.

 

 

Reporterët pa kufij: Iraku është ndër 10 vendet pa liri shtypi

 

Berlin, 27 shkurt 2003 - Sipas organizatës "Reporterët pa kufij", Iraku hyn në mesin e 10 vendeve të botës ku nuk ka liri shtypi. Kjo organizatë thotë se shtypi dhe mediat elektronike në Irak janë nën kontroll të ashpër dhe përdoren për qëllime propagandistike.

"Reporterët pa kufij" thotë se popullata e Irakut vështirë se mund të depërtojë në burimet e lira informative, kurse liria e lëvizjes së gazetarëve të huaj në Irak është e kufizuar shumë ashpër.

 

 

Sadam Husein thotë se s'ka ndërmend as të shkojë në egzil

 

Bagdad, 27 shkurt 2003 - Presidenti irakian, Sadam Husein ka thënë se ai nuk e ka ndërmend as të shkojë në egzil dhe as t'ua vë zjarrin fushave të naftës në Irak, në rast të aksionit ushtarak kundër vendit të tij, por është i gatshëm të "vdesë" në Irak.

Ai ka mohuar çfarëdo lidhjeje me organizatën terroriste al Kaida.

 

 

Koreja e Veriut riaktivizon reaktorin kryesor bërthamor

 

Phenian, 27 shkurt 2003 - Shtetet e Bashkuara thonë se Koreja e Veriut ka riaktivizuar reaktorin e saj kryesor bërthamor në Yongbyon, 9 vjet pasi ai ishte i mbyllur. Ky hap shton tensionet midis Koresë së Veriut me SHBA-të.

 

Pheniani kërkon mbajtjen e bisedimeve të drejtpërdrejta dhe nënshkrimin e një traktati të mossulmimit, kurse Uashingtoni dëshiron që së pari Koreja e Veriut të heqë dorë nga programi i saj për armët bërthamore.

 

 

Karzai: SHBA duhet të mbesin pranë Afganistanit

 

Uashington, 27 shkurt 2003 - Presidenti afgan, Hamid Krazai, ka deklaruar para komitetit për Marrëdhënie të Jashtme të Senatit Amerikan se Afganistani mund të bëhet sërish parajsë për terroristë.

Karzai ka thënë se në Afganistan ka pasur përparim të madh qëkur koalicioni i prirë nga Shtete e Bashkuara largoi nga pushteti talibanët dhe mysafirët e tyre të al-Kaidas, por akoma duhet kaluar rrugë e gjatë për t'u rimëkëmbur.

Hamid Karzai ka thënë se Shtetet e Bashkuara duhet të mbesin pranë zotimeve ndaj Afganistanit për ta bërë të sigurtë se terrorizmi është mposhtur.

 

 

Kryengritësit kanë ekzekutuar të paktën 52 policë dhe 8 djem të tyre në Bregun e Fildishtë

 

Abixhan , 27 shkurt 2003 – Fraksioni kryesor kryengritës në Bregun e Fildishtë ka ekzekutuar të paktën 52 policë dhe 8 djem të tyre, në rajonin Bouake, të kontrolluar prej tyre, bëri të ditur Amnesty International, sot (të enjten), njofton Rojter.

Në një raport të kësaj organizate për mizoritë në këtë vend të Afrikës perëndimore thuhet disa të shpëtuar, që kishin qenë planifikiar të vriteshin, kanë thënë se viktimat ishin të moshës 18 deri në 24-vjeçare.

 

Rreth 60 policë dhe 50 fëmijë të tyre kishin qenë gjithsej nën arrest. Kryengritësit kishin hapur zjarr në të arrestuarit dhe kështu i kishin vrarë apo i kishin plagosur. Disa nga të mbijetuarit ishin detyruar të hapin varret e t'i varrosnin ciktimat.

 

 

NASA e ka gjetur një video kasetë nga mbeturinat e anijes kosmike "Kolumbia"

 

Hjuston, 27 shkurt 2003 - Agjencia Amerikane e Gjithësisë, NASA, njofton se ka gjetur një video kasetë nga mbeturinat e anijes kosmike "Kolumbia".

NASA thotë se videokaseta nuk ofron diçka me vlerë të veçantë për hetimet, por sjell disa fotografi për çastet e fundit të 7 kosmonautëve të saj, para se anija të shkatërrohet.

Copyright©2000-2003 Trepca.net - Të gjitha të  drejtat e rezervuara.