Lajme

E mërkure, 26 shkurt 2003

Përmbajtja:

• Qeveria e Kosovës kundërshtoi themelimin e bashkësisë së komunave serbe

• M. Shtajner: "Çfarëdo veprimi monoetnik është i pavlefshëm"

• Në Prishtinë u mbajt një protestë gjithëpopullore kundër arrestimit të ish-pjesëtaravë të UÇK-së

• Gjykata Supreme e Sllovenisë vendos sot rreth kërkesës për ektradimin e Fatmir Limajt në Hagë

• AKM-ja miratoi politikat operuese për procesin e privatizimit

• Mbrojtësi i Agim Murtezit thekson se klenti i tij nuk ka të bëjë asgjë me aktakuzën e Hagës

• FMN shqyrton sot marrëveshjen me qeverinë e Shqipërisë

• Policia italiane sekuestroi 1 ton marihuanë që vinte nga Shqipëria

• Shkup: Një takim i zyrtarëve të lartë të LSDM-së dhe BDI-së

• Parlamenti i Shqipërisë hedh poshtë idenë e Gjingjiqit për krijimin e mini-shteteve serbe në Kosovë

• Igor Ivanov shkoi në Kinë

• Strou: Britania nuk ka marrë ende vendim për aksion ushtarak

• Llavrov: Memorandumi mbi Irakun - mbështetje për inspektorët

• Algjeri: 12 viktima të një sulmi terrorist

• Bliks: Bagdadi u ka dhënë dokumenta të reja inspektorëve të armëve

• Presidenti Bush është skeptik për dokumentet e reja

• Iraku nuk pranon se ka armë të ndaluara të shkatërrimit në masë

• Xhorxh Bush shpreson se KS i OKB-së do ta miratojë rezolutën e re

• Bler tha se Irakut mund t'i jepet edhe një shans

• Shirak e Shrëder përsërisin qëndrimin e tyre lidhur me Irakun

• Bolton: Nuk ka ndryshime ne pozicionin e Rusisë ndaj rezolutës së re

• Qeveria turke i kërkon parlamentit autorizimin e vendosjes së trupave amerikane në Turqi

• Kurdët kërkojnë paralndalimin e trupave turke nëpër territoret e tyre

• Pauell: Politika amerikane ndaj Phenianit nuk ka ndryshuar

• Parlamenti britanik debaton rreth strategjisë për Irakun

• Rumsfeld i shqetësuar rreth armëve të Irakut

• Kofi Anan qëndron sot në Qipro

• Në Uashington mbahet një konferencë mbi luftën globale kundër trafikut të femrave

Qeveria e Kosovës kundërshtoi themelimin e bashkësisë së komunave serbe

 

Prishtinë, 26 shkurt 2003 - Qeveria e Kososvës kundërshtoi sot ashpër themelimin e të ashtuquajturit "kuvend i bashkësisë së komunave dhe lokaliteteve serbe të Kosovës".

 

Pas mbledhjes së qeverisë, kryeministri Bajram Rexhepi e përshëndeti qëndrimin e shprehur dje nga kryeadministratori Mihail Shtajner dhe kërkoi nga UNMIK-u që të ndërmarrë veprime konkrete.

Me këtë rast, z. Rexhepi u bëri thirrje qytetarëve të Kosovës që gjatë protestave që po mbahen këto ditë të jenë të përmbajtur e të mos konfrontohen me forcat ndërkombëtare.

Në mbledhjen e sotme të qeverisë u shqyrtuan edhe mundësitë për realizimin e projektit për ndërtimin e autostradës Prishtinë-Durrës.

 

 

M. Shtajner: "Çfarëdo veprimi monoetnik është i pavlefshëm"

 

Prishtinë, 26 shkurt 2003 - Zyrtarët e UNMIK-ut përsëritën qëndrimin e tyre se konstituimi i kuvendit të shtatë komunave serbe në veri të Mitrovicës është në kundërshtim me Rezolutën 1244. Në këtë kontekst, shefi i UNMIK-ut, Mihael Shtajner ka thënë dje në Mitrovicë se administrata e tij nuk përkrah ndarjen e Kosovës apo çkado tjetër që shkon në këtë drejtim.

Këto komente Shtajner i ka bërë vetëm disa orë pasi "këshilli nacional i serbëve" e ka konstituar "asamblenë e bashkësisë së komunave serbe" në veri të Kosovës. Deklaratat e përfaqësuesve të serbëve ai i ka cilësuar si akte të vetizolimit, të cilat nuk mund të kenë kurrëfarë peshe ligjore për Kosovën.

Shtajner ka përsëritur qëndrimin e UNMIK-ut se ende nuk ka ardhur koha për zgjidhjen e statusit përfundimtar të Kosovës, duke shtuar se as Beogradi e as Prishtina nuk mund ta prejudikojnë përfundimin ende të hapur të statusit të Kosovës. Ai ka thënë se të vetmet institucione të pranueshme për bashkësinë ndërkombëtare në Kosovë janë ato të dala nga votat e qytetarëve në zgjedhjet e ligjshme.

Në një takim me gazetarë, në pjesën jugore të Mitrovicës, Shtajner ka deklaruar se qëndrimet e shprehura të përfaqësuesve serbë nuk kanë kurrëfarë vlere ligjore. Ai ka theksuar se aktet që janë në kundërshtim me konceptin e shumetnicitetit janë të papranueshëm për bashkësinë ndërkombëtare.

 

 

Në Prishtinë u mbajt një protestë gjithëpopullore kundër arrestimit të ish-pjesëtaravë të UÇK-së

 

Prishtinë, 26 shkurt 2003 - Qindra mijëra qytetarë nga anë të ndryshme të Kosovës protestuan sot para Fakultetit Filologjik në Prishtinë kundër arrestimit të deputetit Fatmir Limaj e tre ish-pjesëtarëve të tjerë të UÇK-së, pas akuzave të Tribunalit të Hagës. Parulla kryesore e protestuesve ishte "Liri për çlirimtarët" Këshilli Organizativ i protestës drejtoi 6 kërkesa në adresë të bashkësisë ndërkombëtare, administratës ndërkombëtare në Kosovë dhe institucioneve të Kosovës.

 

Kërkesa kryesore iu drejtua mekanizmave më relevantë ndërkombëtarë, nga të cilët kërkohet njohja e menjëhershme e pavarësisë së Kosovës dhe përcaktimi i nxitësit e fajtorit të luftës gjenocidale në Kosovë.

 

Ndërkaq, nga Kuvendi i Kosovës u kërkua të mbrojë vlerat e luftës çlirimtare të UÇK-së, duke miratuar një ligj të veçantë që këtë luftë do ta vlerësojë ashtu çfarë ishte - si luftë për liri e pavarësi.

Kërkesat e Këshillit Organizativ të Protestës së sotme në Prishtinë drejtuar faktorit ndërkombëtar dhe institucioneve të Kosovës:

 

1. Të njihet pa asnjë kusht dhe pa asnjë shtyrje Pavarësia e Kosovës;

2. Të përcaktohet fajtori i luftës gjenociadale në Kosovë;

3. Të përcaktohet dhe të sigurohet integriteti territorial i Kosovës;

4. Të pranohet me ligj të veçantë në Parlamentin e Kosovës lufta e Ushtrisë Çlirimtare të Kosovës si luftë për liri e pavarësi;

5. Të mbrohen me ligje të veçanta të gjitha vlerat e luftës së UÇK-së;

6. Të njihen dhe të mbrohen me ligj të veçantë dëshmorët, familjarët e dëshmorëve, invalidët dhe veteranët e luftës së UÇK-së.

Në emër të Këshillit Organizativ protestuesve iu drejtua kryetari i Shoqatës së Veteranëve të Luftës, Sadik Halitjaha. Ndër të tjera, ai theksoi se aktakuza e Tribunalit të Hagës ndaj z. Limaj dhe tre ish-pjesëtarëve të tjerë të UÇK-së është ngritur mbi akuza të rrejshme dhe me prapavi politike.

Ai theksoi se në këtë mënyrë u jepet mbështetje përpjekjeve serbe për inkrimiminimin e luftës çlirimtare të shqiptarëve dhe për barazimin e saj me krimet serbe në Kosovë.

Pas shpërndarjes, një pjesë e protestuesve defiloi rrugës "Nënë Tereza" deri te Teatri Kombëtar dhe rrugës Ramiz Sadiku. Defilimi i protestuesve u përcoll nga forca të shtuara të policisë së UNMIK-ut dhe të Shërbimit Policor të Kosovës. Prtotesta kaloi e qetë e pa incidente.

 

 

Gjykata Supreme e Sllovenisë vendos sot rreth kërkesës për ektradimin e Fatmir Limajt në Hagë

 

Lubjanë, 26 shkurt 2003 - Gjykata Supreme e Sllovenisë ka kumtuar se gjatë ditës së sotme do të vendoset rreth kërkesës për ekstradimin e Fatmir Limajt në Tribunalin e Hagës. Në njoftim precizohet se vendimi përfundimtar nënshkruhet nga ministri i drejtësisë, pasi të ketë dëgjuar vlerësimet e Gjykatës Supreme.

Afati për ankesë ndaj këtij vendimi është 48 orë. Mirëpo, zyrtarët sllovenë pohojnë se ankesa eventuale nuk e pengon zbatimin e menjëhershëm të vendimit, përkatësisht dorëzimin e Fatmir Limajt autoriteteve të Tribunalit të Hagës.

 

 

AKM-ja miratoi politikat operuese për procesin e privatizimit

 

Prishtinë, 26 shkurt 2003 - Bordi i drejtorëve të AKM-së miratoi në mënyrë unanime politikat operuese për procesin e privatizimit në Kosovë. Në fazën e parë të procesit të privatizimit do të përfshihen 6 ndërmarrje shoqërore: "Lepenci", "Ringov", "Energoinvesti", "Montazhi i Kosovës", "Termosistemi" dhe "Përparimi".

Kryetari i bordit të drejtorëvë të AKM-së, Andy Berpark, tha se kjo është një lëvizje shumë e rëndësishme për zhvillimin ekonomik të Kosovës. Ai nënvizoi se privatizimi nuk krijon vende pune për secilin, por është rrugë për investime të reja, për më shumë punë dhe për standard më të lartë.

Ministri i Tregtisë e Industrisë, Ali Jakupi, deklaroi se me fillimin e privatizimit eliminohet pronësia socialiste dhe bëhet inkuadrimi i ekonomisë kosovare në rrjedhat e ekonomisë së tregut.

Brenda 20 ditësh pritet të miratohet edhe rregullorja mbi pronësinë e tokës, gjë që do të kompletojë kushtet për fillimin e privatizimit.

 

 

Mbrojtësi i Agim Murtezit thekson se klenti i tij nuk ka të bëjë asgjë me aktakuzën e Hagës

 

Hagë, 26 shkurt 2003 - Agim Murtezi, i arrestuar me urdhër të Tribunalit të Hagës me akuzën për krime lufte, ka thënë se ai nuk është personi të cilit i referohet aktakuza. Këtë deklaratë e transmetoi avokati i tij, Filip Burgo.

Burgo bëri të ditur se kolegji gjyqësor dhe prokuroria tashmë janë informuar me këtë pohim të Agim Murtezit. Mirëpo, fjala është për çështje të ndieshme, prandaj janë të nevojshme hetimet e mëtutjeshme për konfirmimin e këtyre pohimeve.

Avokati kanadez hezitoi të japë më shumë detaje rreth hetimeve, duke pohuar se mund të dëmtohet procedura e hetuesisë. Mirëpo, ai vërtetoi se prioritet kryesor është veprimi sa më i shpejtë, në mënyrë që Agim Murtezi të lirohet nga aktakuza.

"Agim Murtezi beson në punën e Tribunalit e Hagës, por vazhdimi i qëndrimit të tij në paraburgim e kërcënon seriozisht të drejtën e tij fundamentale", tha mbrojtësi Burgo.

Dy të akuzuarit tjerë, Isak Musliu dhe Haradin Balaj, pritet të deklarojnë me shkrim se nuk e njohin Agim Murtezin.

 

 

FMN shqyrton sot marrëveshjen me qeverinë e Shqipërisë

 

Tiranë, 26 shkurt 2003 - Fondi Monetar Ndërkombëtar pritet të shqyrtojë sot marrëveshjen me Shqipërinë, pas një shtyrjeje njëmujore.

Bordi Ekzekutiv i Drejtorëve ka parashikuar të diskutojë rreth dosjes së Shqipërisë dhe programit ekonomik të qeverisë. Ministria e Financave thotë se me miratimin e kësaj marrëveshjeje pritet që për Shqipërinë të bëhet edhe disbursimi i një shume prej rreth 5 milionë dollarësh, të parashikuar në marrëveshjen fillestare të nënshkruar vitin e kaluar.

Miratimi i kësaj marrëveshjeje ishte parashikuar të bëhej më 29 janar, por ai u shty për shkak se Tirana nuk e kishte plotësuar një prej kërkesave kryesore të Fondit Monetar Ndërkombëtar - mbylljen e dyqaneve pa taksa në pikat tokësore të kalimit të kufirit.

 

 

Policia italiane sekuestroi 1 ton marihuanë që vinte nga Shqipëria

 

Leçe, 26 shkurt 2003 - Agjentët e policisë kufitare të Otrantos kanë sekuestruar sot në mëngjes, në një plazh, një ton marihuanë, e transportuar me një gomone që vinte nga Shqipëria. Afrimi i gomones drejt brigjeve të Italisë është diktuar nga skuadra e policisë së trafiqeve të paligjshme.

 

Patrullat tokësore i janë afruar vendit të zbarkimit dhe kanë ndërhyrë menjëherë, pasi skafistët e kanë nxjerrë drogën. Skafistët i kanë shpëtuar policisë, duke u kthyer sërish me gomonen në det.

 

 

Shkup: Një takim i zyrtarëve të lartë të LSDM-së dhe BDI-së

 

Shkup, 26 shkurt 2003 - Mbrëmë në Shkup janë takuar zyrtarët e lartë të dy partive kryesore në qeverinë e Maqedonisë - Lidhjes Socialdemokrate dhe Bashkimit Demokratik për Integrim - për të gjetur zgjidhje mbi çështjet e hapura siç janë: pasaporta dhe përdorimi i gjuhës shqipe në parlament.

Takimi ka qenë i mbyllur dhe askush nuk është prononcuar rreth qëndrimit të këtyre dy partive lidhur me këto çështje.

 

 

Parlamenti i Shqipërisë hedh poshtë idenë e Gjingjiqit për krijimin e mini-shteteve serbe në Kosovë

 

Tiranë, 26 shkurt 2003 - Deputetët e Parlamentit të Shqipërisë thanë se tezës për krijimin e mini-shteteve serbe në Kosovë nuk i beson as vetë autori i saj, kryeministri i Serbisë, Zoran Gjingjiq. Sipas deputetëve, sindromi Millosheviqian nuk është larguar ende nga skena politike e Serbisë.

Deputeti i Partisë Demokrate Reformatore, Qazim Sefi, tha se Zoran Gjingjiqi si duket është në vijim të përpjekjeve të Serbisë së kohës së Millosheviqit për ta mbajtur me çdo kusht Kosovën.

 

Ai nënvizoi se ky është një mesazh i qartë për Evropën dhe Shtetet e Bashkuara të Amerikës.

Ndërkaq deputeti Shpëtim Roçi tha se serbët duhet t'i kërkojnë falje popullit të Kosovës, ndërsa ideja për mini-shtete është një çmenduri. Ai nënvizoi se nëse në rastin e Millosheviqit pati një bombardim fizik, duket se në politikën serbe ka nevojë për një bombardim mjekësor.

Ish-ministri i jashtëm shqiptar, Arian Starova, tha se Gjingjiqi është i detyruar të ruajë një lloj nacionalizmi në një mjedis me shumë dimensione konservatore. Ai shtoi se në këto kushte Gjingjiqi nuk mund të dalë shumë i moderuar.

 

 

Igor Ivanov shkoi në Kinë

 

Moskë, 26 shkurt 2003 - Ministri i Jashtëm rus, Igor Ivanov, udhëtoi sot për në Pekin. Zëdhënësi i ministrisë, Aleksandar Jakovenko, ka deklaruar se në takimet e Ivanovit me zyrtarë të lartë kinezë do të bisedohet rreth problemit të Irakut dhe problemit të Koresë Veriore, por edhe marrëdhëniet bilaterale midis Kinës e Rusisë.

Jakovenko ka thënë se Rusia dhe Kina "konsiderojnë se është e nevojshme të bëhen përpjekje maksimale për zgjidhjen e krizës irakiene, në mënyrë që të evitohet skenari luftarak për zgjidhjen e kësaj krize".

 

 

Strou: Britania nuk ka marrë ende vendim për aksion ushtarak

 

Londër, 26 shkurt 2003 - Shefi i diplomacisë britanike, Xhek Strou, ka deklaruar se Britania e Madhe nuk ka marrë ende vendim për fillimin e operacionit ushtarak në Irak. Por, ai ka tërhequr vërejtjen se kjo nuk do të thotë se Britania nuk do ta bëjë këtë, në qoftë se në KS të OKB-së nuk miratohet projekti i rezolutës së re, të paraqitur nga SHBA-të, Britania dhe Spanja.

Strou ka tërhequr vërejtjen gjithashtu se autoriteti i OKB-së do të bie nëse anëtarët e KS hedhin poshtë kërkesat për përdorimin e aksioneve të nëvojshme për çarmatosjen e Irakut.

 

 

Llavrov: Memorandumi mbi Irakun - mbështetje për inspektorët

 

Moskë, 26 shkurt 2003 - Përfaqësuesi i Rusisë në OKB, Sergej Llavrov, ka deklaruar se memorandumi që e kanë paraqitur në KS të OKB-së Franca, Rusia dhe Gjermania kërkon forcimin e regjimit të inspektimit të armëve në Irak.

Llavrov ka thënë se ky dokument është vazhdimësi i insistimit të këtyre tri vendeve për mbështetjen e punës së inspektortëve në Irak.

 

 

Algjeri: 12 viktima të një sulmi terrorist

 

Algjer, 26 shkurt 2003 - Dymbëdhjetë vetë janë vrarë dhe gjashtë të tjerë janë plagosur mbrëmë, në një sulm afër qytetit Tipaz, 70 kilometra në perëndim të kreyeqytetit Algjer. Policia algjeriane thotë se beson se ky sulm është kryer nga terroristët islamistë.

 

 

Bliks: Bagdadi u ka dhënë dokumenta të reja inspektorëve të armëve

 

Nju Jork, 26 shkurt 2003 - Kryeinspektori i armëve të OKB-së, Hans Bliks, tha se Bagdadi ka dhënë dokumenta të reja dhe kjo është një shenjë e re e një bashkëpunimi më të mirë të Irakut.
Bliks u tha gazetarëve se Iraku ua ka dorëzuar inspektorëve të armëve një seri letrash, të cilat mund të hedhin dritë mbi disa prej programeve kimike dhe biologjike të Bagdadit.

Sipas z. Bliks, disa prej këtyre dokumentave përmbajnë elementë pozitivë të cilat duhen shqyrtuar më tej. Por, se çfarë janë këto elementë mund të mësohet me saktësi të shtunën, kur inspektorët e armëve pritet të dorëzojnë raportin tjetër në Këshillin e Sigurimit të OKB-së.

 

 

Presidenti Bush është skeptik për dokumentet e reja

 

Uashington, 26 shkurt 2003 - Njoftimi për dorëzimin e dokumenteve të reja nga ana e Bagdatit u prit me skepticizëm nga ana e presidentit amerikan, Xhorxh Bush.

Bush u tha gazetarëve se ai nuk ka parë asgjë që tregon se udhëheqësi irakian, Sadam Husein, ka vendosur ta ndryshojë kursin e veprimit.

"Mendoj se ai do të përpiqet ta mashtrojë botën edhe një herë", tha presidenti Bush.

 

 

Iraku nuk pranon se ka armë të ndaluara të shkatërrimit në masë

 

Bagdat, 26 shkurt 2003 - Presidenti irakian, Sadam Husein, hodhi poshtë pretendimet e inspektorëve të armëve se raketat irakiane me rreze të shkurtër veprimi, Al-Samoud-2, mund të fluturojnë mbi 150 kilometra.

Në një intervistë dhënë rrjetit televiziv amerikan, CBS, Sadam Husein la të kuptohet se ai mund ta hedhë poshtë kërkesën e einspektorëve të armëve për shkatërrimin e këtyre raketave.

 

 

Xhorxh Bush shpreson se KS i OKB-së do ta miratojë rezolutën e re

 

Uashington, 26 shkurt 2003 - Presidenti i Shteteve të Bashkuara të Amerikës, Xhorxh Bush, shpreson se Këshilli i Sigurimit të Kombeve të Bashkuara do ta miratojë rezolutën e dytë, e cila do të kërkojë çaramatosjen e Irakut.

Bush tha se Rezoluta 1441 e miratuar njëzëri në nëntor të vitit të kaluar është e mjaftueshme për të bërë presion ushtarak që Sadam Huseini të spastrohet nga armët e tij për zhdukje në masë.

"Sigurisht që do të donim votim pozitiv për rezolutën e dytë që ia paraqitëm Këshillit të Sigurimit bashkë me Britaninë dhe me Spanjën", tha Bush.

 

 

Bler tha se Irakut mund t'i jepet edhe një shans

 

Londër, 26 shkurt 2003 - Kryeministri britanik Toni Bler tha se Irakut mund t'i jepet edhe një shans që të ]armatroset vullnetarisht.

Ai deklaroi se rezoluta e paraqitur në Këshillin e Sigurimit nga Shtetet e Bashkuara të Amerikës, Britania dhe Spanja nuk do te vihet menjëherë në votim, me qëllim që Sadamit t'i jepet edhe një shansë që të çarmatoset vullnetarisht.

Toni Bler deklaroi se Iraku ka dështuar të përfitojë nga shansi që i dha Rezoluta 1441.

 

 

Shirak e Shrëder përsërisin qëndrimin e tyre lidhur me Irakun

 

Berlin, 26 shkurt 2003 - Presidenti i Francës, Zhak Shirak, dhe kancelari gjerman, Gerhard Shrëder, gjatë bisedimeve të mbrëmëshme në Berlin kanë përsëritur qëndrimin e tyre për çarmatosjen e Irakut nga armët e tij të supozuara për zhdukje me mjete paqësore.

"Lufta gjithmonë është zgjidhja më e keqe. Ajo është gjithmonë dështim e tragjedi. Duhet bërë çdo gjë për ta shmangur", ka thënë presidenti francez.

 

 

Bolton: Nuk ka ndryshime ne pozicionin e Rusisë ndaj rezolutës së re

 

Uahington, 26 shkurt 2003 - Nënsekretari amerikan i shtetit, Xhon Bolton, tha se nuk arriti ta bindë Rusinë që ta mbështesë rezolutën e re për Irakun në Këshillin e Sigurimit.

Bolton tha se nuk ka vërejtur kurrëfarë ndyrshimi në pozicionin e Rusisë, por shtoi se ky takim nuk ishte i pari as i fundit në diskutimet diplomatike.

 

 

Qeveria turke i kërkon parlamentit autorizimin e vendosjes së trupave amerikane në Turqi

 

Ankara, 26 shkurt 2003 - Qeveria e Turqisë ka kërkuar zyrtarisht nga Parlamenti që të autorizojë vendosjen e trupave dhe aeroplanëve të Shteteve të Bashkuara në këtë vend.

Qeveria është dakorduar t'ia drejtojë kërkesën Parlamentit pas përfundimit të negociatave me zyrtarët amerikanë për një ndihmë financiale prej disa miliardë dollarësh në shkëmbim të lejimit të vendosjes së trupave.

 

 

Kurdët kërkojnë paralndalimin e trupave turke nëpër territoret e tyre

 

Bagdat, 26 shkurt 2003 - Parlamenti i kurdëve të Irakut ka kërkuar nga Shtetet e Bashkuara që të parandalojë trupat turke të kalojnë nëpër territorin e tyre, në rast të shpërthimit të luftës në Irak.

Parlamenti i kurdëve është mbledhur në pjesën veriore të vendit, e cila kontrollohet nga kurdët.

Zyrtarët kurdë thanë se gjatë natës së kaluar ka ndodhur një shpërthim në një burim nafte afër qytetit Kirkuk, në veri të Irakut, dhe një burim është ndezur. Zyrtarët e Bagdadit thanë se zjarri ishte shkaktuar nga një aksident.

 

 

Pauell: Politika amerikane ndaj Phenianit nuk ka ndryshuar

 

Seul, 26 shkurt 2003 - Sekretari amerikan i shtetit, Kolin Pauell, ka deklaruar se Shtetet e Bashkuara nuk kanë plane për invadimin e Koresë Veriore dhe nuk kanë shpallur ndonjë ndryshim në politikën ndaj regjimit në Phenian.

Pauell ka thënë se problemet dhe gabimet i kanë veri-koreanët dhe, si rrjedhojë, populli i Koresë Veriore po cfilitet.

 

 

Parlamenti britanik debaton rreth strategjisë për Irakun

 

Londër, 26 shkurt 2003 - Parlamenti britanik do të diskutojë sot rreth strategjisë së kryeministrit Toni Bler për Irakun. Në partinë e tij, Bler po përballet me kritika të shumta për shkak të gatishmërisë që ka treguar për përdorimin e forcës për çarmatosjen e Irakut.

 

 

Rumsfeld i shqetësuar rreth armëve të Irakut

 

Uashington, 26 shkurt 2003 - Sekretari amerikan i mbrojtjes, Donald Ramsfeld, tha se aftësitë që kanë armët kimike dhe biologjike të Irakut janë ndoshta më të rrezikshme se ç'ishin gjatë luftës së Gjirit, në vitin 1991. Ai tha se një nga shqetësimet e tij më të mëdha, në rast të një konflikti, është se Iraku mund t'i përdorë këto armë.

Ramsfeld tha se të gjitha përpjekjet diplomatike për çarmatosjen e Irakut kanë dështuar disa herë.

"Sot diskutohet për mundësinë e një rezolute të dytë, si thuhet. Në fakt ajo është rezoluta e 18-të dhe jo e dyta", tha sekretari amerikan i mbrojtjes.

 

 

Kofi Anan qëndron sot në Qipro

 

Athinë, 26 shkurt 2003 - Sekretari i përgjithshëm i Kombeve të Bashkuara, Kofi Anan, do të qëndrojë sot në Qipro, në përpjekje që t'i jepet fund ndarjes së këtij ishulli.

Në prag të kësaj vizite, nga Athina, Anan u ka bërë thirrje grekëve dhe turqve që ta shfrytëzojnë rastin dhe t'i japin fund ndarjes 29 vjeçare të vendit.

"Shpresoj se më 30 mars do të arrijmë një marrëveshje për t'u dhënë mundësi të dyja komuniteteve që të hyjnë tok në Bashkimin Evropian, ka thënë Anan.

 

 

Në Uashington mbahet një konferencë mbi luftën globale kundër trafikut të femrave

 

Uashington, 26 shkurt 2003 - Departamenti amerikan i Shtetit, në bashkëpunim me disa organizata joqeveritare, organizon këto ditë në Uashington një konferencë ndërkombëtare për strategjinë mbi luftën globale të trafikut të vajzave dhe grave. Në këtë konferencë do të marrë pjesë edhe një delegacion nga Shqipëria.

Ministri për koordinimin e reformave në Shqipëri, Blendi Klosi, deklaroi se, me gjithë përparimet e bëra, trafiku i qenieve njerëzore në këtë vend vazhdon të jetë një fenomen mjaft i përhapur.

Copyright©2000-2003 Trepca.net - Të gjitha të  drejtat e rezervuara.