Lajme

E marte, 25 shkurt 2003

Përmbajtja:

• Rugova e Shtajner biseduan sot për funksionimin e të gjitha institucioneve të Kosovës

• Zyra amerikane në Prishtinë mbështet Tribunalin e Hagës

• Mitrovicë: Serbët kanë formuar "kuvendin themelues të bashkësisë së komunave dhe lokaliteteve serbe të Kosovës"

• Më 27 shkurt mbahet seanca e rregullt e Kuvendit të Kosovës

• Në pjesën veriore të Mitrovicës i është vënë zjarri një makine të policisë së UNMIK-ut

• Policia e UNMIK-ut ka raportuar për rastin e tretë të fenomenit të maskave në Podujevë

• Shtajner hedh poshtë pohimet e Beogradit për ekzistimin e veprimtarive të paligjshme në kufijtë e Kosovës

• P. Fieski thotë se Kosova do ta ketë përkrahjen e OSBE-së për krijimin e shoqërisë demokratike

• AAK mbështet paqen, sigurinë dhe stabilitetin e mëtutjeshëm në rajon

• Policia konfirmoi se në Gjykatën e Qarkut alarmi ishte i rremë

• Në Londër botohet gazeta e përjavshme "Albanian Mail"

• BE ka mbështetur aktivitetin e Tribunalit të Hagës për arrestimin e katër shqiptarëve

• Hetuesit e Gjyaktës së Hagës kanë marrë në pyetje një bashkëpunëtor të ngushtë të Tugjmanit

• Vazhdon greva në "Nova Makedonija" të Shkupit

• Xhaferi: PDSH dënon veprimet që janë jashtë opsionit politik

• Klima politike është acaruar ndjeshëm në Shqipëri pas përplasjes së fundit në parlament

• Instituti Amerikan për Paqe ka ftuar kryetarin e BDI-së në Maqedoni Ali Ahmeti për një vizitë në Uashington

• Për shkak të një greve, për herë të parë pas 60 vjetësh, nuk dolën të përditshmet që botohen në "Nova Makedonija" në Shkup

• AKSH e ka marrë përgjegjësinë për shpërthimin e fundit në afërsi të Bujanocit

• Çoviq akuzon Shtajnerin se "vetëm premton dhe asgjë nuk po bën"

• Bush priti shefin e administratës së Kremlinit, Voloshin

• Në Vietnam ka filluar një gjykim kundër një bande prej 155 të akuzuarëve për vrasje

• Frenks: Ende nuk jam njoftuar nëse Presidenti Bush do ta përdorë forcën kundër Irakut

• Nga shpërthimet në dy restorane universitare në Pekin janë lënduar nëntë persona

• Në një aksident ajror kanë humbur jetën katër ushtarë amerikanë

• Sekretari Pauell paralajmëron Korenë e Veriut

• Thellohen përçarjet për Irakun

• SHBA dhe Britania e madhe i kanë dhënë KB dy javë kohë për të vendosur lidhur me rezoluten e re për Irakun

• Gjermania, Franca dhe Rusia kundër

• Qeveria amerikane ka paraqitur një rezolutë të re mbi Irakun në Këshillin e Sigurimit

• Qeveria turke ka miratuar vendosjen e trupave amerikane në Turqi

• Bliks thotë se nuk do të ketë bisedime shtesë me Irakun

• Autoritetet kuvajtiane kanë arrestuar tre qytetarë që planifikonin sulme kundër trupave amerikane

• Nga termeti i djeshëm në Kinë kanë vdekur së paku 260 njerëz

Rugova e Shtajner biseduan sot për funksionimin e të gjitha institucioneve të Kosovës

 

Prishtinë, 25 shkurt 2003 - Presidenti i Kosovës Ibrahim Rugova priti sot në rezidencën e tij, kryeadministratorin e Kosovës Mihael Shtajner dhe bisedoi për situatën aktuale poltike e të sigurisë dhe për çështjet ekonomike. Pas takimit, Presidenti Rugova deklaroi para mediave se me Përfaqësuesin Special të OKB-së kanë biseduar për gjendjen aktuale në Kosovë, për situatën e sigurisë, të cilën e vlerësoi gjithnjë e më e mirë, dhe për progresin e përgjithshëm.   Gjithashtu Presidenti tha se kanë biseduar për objektivat imediate siç janë: zhvillimi ekonomik, privatizimi, vende të reja të punës, integrimi i grupeve etnike në shoqërinë e Kosovës.

  

Edhe në këtë drejtim, tha ai, ka progres, por duhet punuar edhe më tutje.

"Gjithsesi biseduam edhe për funksionimin e mirë të të gjitha institucioneve të Kosovës, dhe ne do të punojmë që këto të jenë sa më funksionale, që t'i përgjigjen kërkesave të qytetarëve të Kosovës.

 

Po ashtu biseduam për vendosjen e rendit dhe të ligjit publik në Kosovë, që është me mjaft rëndësi për të gjithë qytetarët e Kosovës", tha Presidenti Rugova, i cili me këtë rast falenderoi zotin Shtajner për bisedë të hapur dhe produktive.

 

Nga ana e tij, zoti Shtajner tha se në këtë takim është diskutuar për prioritetet në Kosovë, që kanë të bëjnë me rrafshin ekonomik. "Ne kemi nevojë për më shumë punë, na nevojitet ta shtyjmë para privatizimin. Unë shpresoj se do të kemi disa suksese këtu", tha Shtajner.

 

Po ashtu ai tha se është biseduar "për luftën efektive kundër krimit dhe për vizionin tonë të përbashkët për një Kosovë multietnike".

"Ne u dakorduam për nevojën e forcimit të institucioneve tona. Unë e njoftova zotin President për pikëpamjet e takimit të Ministrave të Punëve të Jashtme të Bashkimit Evropian, që janë në një linjë me ato të Këshillit të Sigurimit, që e ka deklaruar para dy javësh për të mbështetur politikën tonë të përbashkët këtu", tha shefi i UNMIK-ut dhe përkujtoi se të martën e ardhshme është përvjetori i mbërritjes së tij në Kosovë dhe marrëveshjes për krijimin e institucioneve të Kosovës.

 

"Unë e ftova Presidentin në festimin e kësaj ngjarjeje një vit më pas, bashkë me të gjithë ata që kanë qenë pjesë e ndërtimit të këtyre institucioneve, dhe në këtë drejtim unë dhe Presidenti u dakorduam plotësisht që të kemi një forcim të institucioneve dhe më shumë progres për Kosovën në këtë vit që përfshin edhe bartjen e graduale dhe hap pas hapi të funksioneve dhe përgjegjësive që unë synoj t'i transferoj tek institucionet e ndryshme të Kosovës, si Qeveria, Parlamenti dhe Presidenti", theksoi në fund të deklaratës së tij Mihael Shtajner.

 

 

Zyra amerikane në Prishtinë mbështet Tribunalin e Hagës

 

Prishtinë, 25 shkurt 2003 - Në një komunikatë të bërë lidhur me arrestimin e katër ish-anëtarëve të UÇK-së, Zyra amerikane në Prishtinë thekson se mbështet Tribunalin e Hagës dhe mirëpret deklaratat e njërit nga të arrestuarit Fatmir Limaj, i cili kërkoi nga njerëzit që të bashkëpunojnë me procesin gjyqësor.

 

Zyra amerikane shpreson se qytetarët e Kosovës do t'i shprehin qëndrimet e tyre në mënyrë paqësore. Procesi ligjor thuhet se u jep të akuzuarve mundësinë që të dëgjohen të gjitha provat kundër tyre dhe të mbrohen në gjyq në mënyrë të hapur dhe të drejtë.

 

Në komunikatën e saj Zyra amerikane u bën thirrje njerëzve në Kosovë që të mos lejojnë që paditë e ngritura nga Gjykata e Hagës të zhvendosin vëmendjen nga çështjet serioze me të cilat përballet Kosova, siç janë rindërtimi i infrastrukturës, ndërtimi i një shoqërie civile, krijimi e vendeve të punës dhe të një ekonomie të shëndoshë.

 

 

Mitrovicë: Serbët kanë formuar "kuvendin themelues të bashkësisë së komunave dhe lokaliteteve serbe të Kosovës"

 

Mitrovicë, 25 shkurt 2003 - Në pjesën veriore të Mitrovicës sot serbët kanë formuar "kuvendin themelues të bashkësisë së komunave dhe lokaliteteve serbe të Kosovës" dhe kanë miratuar një deklaratë "për sovranitetin dhe inegritetin territorial të Serbisë dhe bashkësisë shtetërore të Serbisë dhe Malit të Zi mbi Kosovën".

Kryetar i bashkësisë së komunave dhe lokaliteteve serbe të Kosovës është zgjedhur Marko Jakshiq.
Në deklaratën e miratuar thuhet se bashkësia shtetërore e Serbsië dhe e Malit të Zi, e veçanërisht Serbia, si anëtare e saj, disponon me sovranitetin e pashembur, me integritetin e pandashëm territorial në kuadër të kufijve të njohur ndërkombëtarisht.

 

Gjithashtu thuhet se në rast të përpjekjes së vendosjes së një shteti tjetër shqiptar në Ballkan apo të Kosovës së pavarur, bashkësia e komunave dhe e lokaliteteve serbe të Kosovës do t'i bëjë thirrje qeverisë së Serbisë dhe organeve të tjera shtetërore për vendosjen e sovranitetit veprues në rajonet ku populli serb jeton prej kohësh.

Anëtarët e këtij kuvendi angazhohen mes tjerash edhe për kthimin e ushtrisë dhe policisë serbe në Kosovë, si dhe të shpërbërjes së TMK-së.

 

 

Më 27 shkurt mbahet seanca e rregullt e Kuvendit të Kosovës

 

Prishtinë, 25 shkurt 2003 - Kryesia e Kuvendit të Kosovës në takimin e rregullt shqyrtoi kërkesën e Grupit Parlamentar të PDK-së për një seancë të jashtëzakonshme për një qendrim unik për vlerat e Luftës Çlirimtare në Kosovë por çështja mbeti të diskutohet ende.

Lidhur me rekomandimin e Komisionit për Buxhet dhe të atij për Financa dhe Ekonomi rreth financimit të partive politike, kryesia vendosi që kjo çështje të rregullojhet me ligj të veçantë.

Kryesia e Kuvendit të Kosovës vendosi që seanca e 27 shkurtit të jetë e rregullt dhe në te të shqyrtohen Projektligji për Bibliotekat në Kosovë dhe Projektligji për Lëndën Arkivore dhe Arkivat.

Kryesia debatoi gjatë për kërkesën e grupit Parlamentar të PDK-së për një Seancë të Jashtëzakonshme për një qendrim unik për vlerat e Luftës Çlirimtare në Kosovë, por nuk u arrit pajtimi që kjo çështje të shtrohet në seancën e ardhshme dhe në ndonjë seancë të jashtëzakonshme.

 

Çështja mbeti të diskutohet dhe të vendoset më vonë.

Po sot kryesia shqyrtoi rekomandimin e Komisionit për Buxhet dhe të atij për Financa dhe Ekonomi rreth financimit të partive politike. Vlerësim i anëtarëve të kryesisë ishte që kjo çështje duhet të të rregullohet me ligj të veçantë, thuhet në një njoftim të Kuvendit të Kosovës.

 

 

Në pjesën veriore të Mitrovicës i është vënë zjarri një makine të policisë së UNMIK-ut

 

Mitrovicë, 25 shkurt 2003 - Sot në mëngjes, në pjesën veriore të Mitrovicës, të dominuar nga serbët, persona të panjohur, pasi kanë thyer një makinë të policisë së UNMIK-ut kanë vjedhë një jelek antiplumb dhe disa gjësende të tjera.

 

Pastaj ata i vunë zjarrin makinës. Pjesëtarët e policisë pas i vërejtën zjarrin, thirrën në ndihmë zjarrfikësit të cilët e shuan zjarrin, njoftoi zëdhënësi i policisë së UNMIK-ut Soxhi Idovu.

 

 

Policia e UNMIK-ut ka raportuar për rastin e tretë të fenomenit të maskave në Podujevë

 

Podujevë, 25 shkurt 2003 - Pasi ishte njoftuar se katër persona janë parë duke mbushur armët në një veturë në një rrugë të Podujevës, policia ka reaguar duke iu afruar dhe me atë rast ka dëgjuar 6 të shtëna, njoftoi policia e UNMIK-ut e rajonit të Prishtinës. Pas kontrollit gjithpërfshirës në atë vend janë gjetur gjashtë gëzhojat e plumbave të shkrepur si dhe menjëherë është bllokuar lokali në të cilin dyshohej të ishin të dyshimitit.

 

Me këtë rast policia ka kontrolluar 16 persona që gjendeshin në restoran të cilët u arrestuan, duke përfshirë dy individë që penguan policinë dhe dy të tjerë që deklaruan se vetura ishte e tyre. Gjatë kontrollimit të lokalit policia ka gjetur një revole në oxhak të restoranit.

Ndërkaq në një informatë të cilën e kanë paraqitur në polici dy qytetarë thuhet se ata kanë takuar 4 njerëz të armatosur e me maska në pyjet rreth fshatit Gllamnik. Policia ka reaguar menjëherë, por nuk ka ka mundur t'i gjejë të dyshimtit e maskuar. Do theksuar se ky është rasti i tretë i raportuar brenda një muaji rreth paraqitjes së njerëzve të armatosur e me maska në rajonin e Podujevës.(B.T.)

 

 

Shtajner hedh poshtë pohimet e Beogradit për ekzistimin e veprimtarive të paligjshme në kufijtë e Kosovës

 

Prishtinë, 25 shkurt 2003 - Kryeadministratori i Kosovës Mihael Shtajner tha dje në Prishtinë se nuk ka të dhëna rreth veprimtarive të paligjshme në kufijtë e Kosovës me vendet fqinje. Shtajner i bëri këto komente pas incidentit në Luginën e Preshevës, ku një pjesëtar i forcave speciale serbe kishte humbur jetën, duke shtuar se autoritetet serbe nuk kanë ofruar asnjë dëshmi për pohimet e tyre për lëvizjet e personave të armatosur në të dy anët e kufirit.

Shefi i UNNIK-ut ka thënë se për një gjë të tillë nuk ka argumente as policia serbe dhe as ajo e UNMIK-ut.

Shtajner hedhi poshtë idenë për krijirmin e bashkësisë së komunave serbe në Kosovë, apo krijimin e një shteti të vogël brenda saj, duke nënvizuar se është pa kurrëfarë vlere ligjore dhe është në kundërshtim me Rezolutën 1244 të KS të OKB-së dhe me Kornizën Kushtetuese të Kosovës.

 

Në këtë kuadër ai tha se e tillë është edhe ideja e kryeministrit serb Zoran Gjingjiq për krijimin e një shteti të vogël serb brenda Kosovës, nëse nuk lejohet kthimi i forcave serbe. Shtajner theksoi se është qëndrim edhe i KS të OKB-së që Kosova nuk mund të instrumentalizohet për qëllime të politikës së brendshme të Serbisë.

Ndërkaq, duke shfaqur qëndrimin e tij lidhur me arrestimet e katër ish-pjesëtarëve të UÇK-së ka thënë se kjo ka ndodhur siç është dashur të ndodhte dhe se kjo nuk mund të ndodhë për çdo vend në Ballkan.

 

 

P. Fieski thotë se Kosova do ta ketë përkrahjen e OSBE-së për krijimin e shoqërisë demokratike

 

Prishtinë, 25 shkurt 2003 - Shefi i Misionit të OSBE-së në Kosovë Paskal Fieski ua dorëzoi tekstin e parë të titulluar: "Për një rend publik evropian", kryetarit të Gjykatës Supreme të Kosovës Rexhep Haxhimusës, prokurorit publik të Kosovës Mustafë Shalës dhe kryetari të Odës së Avokatëve të Kosovës Lirie Osmanit.

Me këtë rast Rexhep Haxhimusa tha se ky është një moment i veçantë ku gjyqësia e Kosovës po bën hapa të sigurtë për zhvillimin e një shoqërie demokratike. Ai foli edhe për multietnicitetin e gjyqësorit dhe përkundër problemeve me të cilat po përballet gjyqësia e Kosovës për ndërtimin e kuadrit profesional si dhe përmirësimin e kushteve të punës.

 

Në kohë të fundit është bërë një lëvizje shumë pozitive sepse janë emëruar disa gjyqtarë dhe prokurorë të nacionalitetit serb, tha ai dhe shfaqi besimin se ata do të angazhohen në ndërtimin e sistemit ku sundon ligji.

Ndërkaq, ambasadori Fieski gjatë dorëzimit të këtij libri tha se Kosova do ta ketë përkrahjen e OSBE-së për krijimin e shoqërisë demokratike. "Shpresojmë se Kosova do të ecë drejt rrjedhave evropiane. Njëra nga aspektet e shkuarjes në drejtim të këtyre rrjedhave evropiane është edhe aplikimi i konventave dhe standardeve ndërkombëtare nga ana e gjykatave të Kosovës", tha Fieski.

 

 

AAK mbështet paqen, sigurinë dhe stabilitetin e mëtutjeshëm në rajon

 

Prishtinë, 25 shkurt 2003 - Kryesia e AAK-së e konsideron jetike çështjen e paqes, sigurisë dhe stabilitetit të mëtejmë në rajon. Pasi ka diskutuar rreth temës së mësipërme dhe zhvillimeve politike nëpër të cilat po kalon Kosova, në konkluzionet e saj për opinionin, kryesia e AAK-së aktakuzën kundër Fatmir Limajt dhe bashkëluftëtarëve të tij e konsideron si të ngritur mbi shpifjet e elementëve promillosheviqianë në Kosovë.

 

Në një kominikatë të kësaj partie thuhet se AAK, duke ndjerë përgjegjësinë e vet, angazhohet që përmes Grupit të saj Parlamentar, institucionalisht të veprohet në Parlamentin e Kosovës dhe përmes përfaqësuesve të saj në Qeverinë e Kosovës.

AAK e mbështet nxjerrjen e një dokumenti zyrtar për njohjen institucionale të vlerave të luftës në kuadër të UÇK-së, dhe shpreson që kjo të hasë në përkrahje të shumicës së deputetëve në Parlamentin e Kosovës. Për këtë duhet të angazhohet shefi i Grupit Parlamentar të AAK-së;
AAK angazhohet përmes shefit të Grupit Parlamentar në vazhdimin e punës për shpalljen e Kosovës shtet sovran dhe të pavarur;

AAK angazhohet për ndryshimin e Kornizës Kushtetuese, për të cilën çështje të formohet grupi i ekspertëve dhe kërkon kalim sa më të shpejtë dhe më të plotë të kompetencave nga ndërkombëtarët te Qeveria e Kosovës;

AAK ndan shqetësimin e vet me protestuesit, duke i mbështetur protestat dhe njëkohësisht u bën thirrje qytetarëve të Kosovës që në këto protesta të përmbahen nga veprimet e dhunshme dhe të jenë të qetë e dinjitozë;

AAK mbështetë paqen, sigurinë dhe stabilitetin e mëtutjeshëm në rajon, - thuhet në fund të komunikatës.

 

 

Policia konfirmoi se në Gjykatën e Qarkut alarmi ishte i rremë

 

Prishtinë, 25 shkurt 2003 - Pas një paralajmërimi anonim se në Gjykatën e Qarkut në Prishtinë është vendosur një masë shpëthyese, forca të mëdha të policisë ndërkombëtare dhe të KFOR-i kanë kontrolluar të gjitha veturat e parkuara afër gjykatës.

 

Pas disa orësh kontrolli policia konfirmoi se nuk kanë gjetur kurrëfarë ekslozivi dhe se alarmi ishte i rremë. U bë e ditur se nga policia është arrestuar një person i cili sipas tyre nuk ka respektuar rregullat e policisë dhe ka tentuar që me dhunë të futet në ndërtesën e Gjykatës së Qarkut. Mirëpo, policia thotë se kjo nuk ka të bëjë asgjë me alarmin e rremë.

 

 

Në Londër botohet gazeta e përjavshme "Albanian Mail"

 

Londër, 25 shkurt 2003 - Këto ditë në Londër u botua numri i parë i gazetës "Albanian Mail". Kjo gazetë në gjuhën shqipe do të jetë e përjavshme informative, sociale, kulturore dhe do të ketë 12 faqe.

Objektivi kryesor i gazetës do të jetë informimi i saktë dhe korrekt, pa asnjë ngjyrim politik apo partiak, i ngjarjeve që ndodhin në jetën e emigrantëve në Britaninë e Madhe.

Një vend të vaçantë në këtë numër të parë zenë përshendetjet që i dërgohen stafit të gazetës nga personalitete të ndryshme shqiptare e angleze.

 

 

BE ka mbështetur aktivitetin e Tribunalit të Hagës për arrestimin e katër shqiptarëve

 

Bruksel, 25 shkurt 2003 - Bashkimi Evropian ka mbështetur aktivitetin e Tribunalit të Hagës për arrestimin e katër shqiptarëve ish-pjesëtar të UÇK-së, duke precizuar se kjo dëshmon se bashkësia ndërkombëtare do të respektojë ligjin dhe të drejtën për Ballkanin.

 

Kështu u tha në fund të takimit të rregullt të ministrave të jashtëm të Bashkimit Evropian, dhe iu bë thirrje politikanëve kosovarë që të vazhdojnë të përkrahin Tribunalin e Hagës, duke iu qasur me seriozitet bashkëpunimit të plotë me Gjykatën Ndërkombëtare për Krime Lufte. Në pjesën për Ballkanin iu kushtua mjaft kohë edhe Kosovës në aspektin që ka të bëjë me Serbinë.

 

Ministrat e BE-së siguruan popullin e Kosovës se ndryshimet kushtetuese që ndodhën në relacionin Serbi - Mali i Zi në asnjë rast nuk ndikojnë në çështjen e Kosovës dhe se në Kosovë do të vazhdojë të jetë valide vetëm Rezoluta 1244, e cila, siç thuhet në dokument, është gjithashtu edhe bazë për politikën evropiane ndaj Kosovës.

Ministrat e BE-së kërkuan fillimin e bisedimeve ndërmjet Prishtinës e Beogradit, sidomos në çështjet praktike. Gjithashtu nga të dyja palët Këshilli i BE-së kërkon që të mos ndërmerren hapa të njëanshëm që nuk do të ishin kompatibil me Rezolutën 1244 dhe të cilët do të mund të rrezikonin normalizimin e situatës jo vetëm në Kosovë, por edhe në tërë rajonin.

 

 

Hetuesit e Gjyaktës së Hagës kanë marrë në pyetje një bashkëpunëtor të ngushtë të Tugjmanit

 

Zagreb, 25 shkurt 2003 - Hetuesit e Gjyaktës së Hagës kanë marrë dje në pyetje, Hërvoje Shariniqin, një nga bashkëpunëtorët më të ngushtë të ish-presidentit kroat, Franjo Tugjman. Shariniq ka deklaruar se është pyetur mbi ngjarjet lidhur me luftërat e viteve 1990, bisedimet e tij me Millosheviqin, por jo në cilësinë e të dyshuarit.

 

 

Vazhdon greva në "Nova Makedonija" të Shkupit

 

Shkup, 25 shkurt - Për shkak të grevës së përgjithshme të të punësuarve në ndërmarrjen gazetare botuese "Nova Makedonija", gazetat e përditshme "Veçer", "Flaka" dhe "Birlik", të Shkupit, as sot nuk dolën nga shtypi.

Nga Shkupi njoftohet se gazetarët dhe personeli tjetër i ndërmarrjes "Nova Makedonija" sot u tubuan para Qeverisë, duke kërkuar pagesën e pesë rrogave të mbetura, si dhe një takim me kryeministrin Branko Cërvenkovski.

 

 

Xhaferi: PDSH dënon veprimet që janë jashtë opsionit politik

 

Shkup, 25 shkurt 2003 - Partia Demokratike Shqiptare (PDSH) dënon të gjitha veprimet të cilat janë jashtë opsionit politik dhe gjithnjë ka qenë e përcaktuar vetëm për opsion politik, ka deklaruar lideri i kësaj partie Arbën Xhaferi, duke i komentuar aktet e paradokohshme të dhunës në Strugë dhe më parë në Kumanovë.
Për mundësinë e një "ofensive pranverore", Xhaferi ka thënë se kompetentët e hedhin poshtë një mundësi të tillë.

 

 

Klima politike është acaruar ndjeshëm në Shqipëri pas përplasjes së fundit në parlament

 

Tiranë, 25 shkurt 2003 - Në Shqipëri klima politike është acaruar ndjeshëm pas përplasjes së fundit të hënën mbrëma në parlament për çështjen e komisionit hetimor ndaj kryetarit të Bashkisë së Tiranës, Edi Rama.

 

Ndërhyrja e presidentit të republikës, Alfred Mosiu, nuk arriti të zbuste tensionet, madje socialistët e kundërshtuan hapur atë, duke folur për tejkalim të kompetencave të kreut të shtetit. Por po mbrëmë presidenca sqaroi se qëllimi i deklaratës së kreut të shtetit kishte qënë shmangja e një konflikti të hapur, pozitë-opozitë, me pasoja për të ardhmen e reformave të vend.

 

 

Instituti Amerikan për Paqe ka ftuar kryetarin e BDI-së në Maqedoni Ali Ahmeti për një vizitë në Uashington

 

Shkup, 25 shkurt 2003 - Instituti Amerikan i Paqes ka ftuar kryetarin e Bashkimit Demokratik për Integrim në Maqedoni Ali Ahmeti për një vizitë në Uashington, përkatësisht që të marrë pjesë në një konferencë atje që do të mbahet nga mesi i muajit mars. Është bërë e ditur se z. Ahmeti ka paraqitur kërkesë për marrjen e vizës në Ambasadën amerikane në Shkup për të udhëtuar në SHBA.

 

Ermira Mehmeti, zëdhënëse e BDI-së konfirmoi për "Zërin e Amerikës" se kryetari i kësaj partie Ali Ahmeti ka pranuar ftesën nga z. Daniel Server i Institutit Amerikan për Paqe dhe se ka bërë kërkesë për vizë në Ambasadën amerikane në Shkup. Konferenca ka për temë perspektivat e Maqedonisë.

Ambasadori amerikan në Shkup, Lorens Batler, para pak javësh ka thënë se z. Ahmeti po angazhohet për paqe në Maqedoni dhe se ka bërë një punë konstruktive pas konfliktit në këtë vend. Ambasadori Batler pati theksuar se Administrata e presidentit Bush mund t'i rishqyrtojë vendimet e saj që një person në listën e zezë nëse i plotëson kushtet të fshihet nga ajo.

 

 

Për shkak të një greve, për herë të parë pas 60 vjetësh, nuk dolën të përditshmet që botohen në "Nova Makedonija" në Shkup

 

Shkup, 25 shkurt 2003 - Për herë të parë pas 60 vjetësh dje nuk dolën të përditshmet që botohen në shtëpinë gazetare botuese "Nova Makedonija" në Shkup. Të punësuarit në gazetat dhe revistat e kësaj shtëpie bëjnë grevë për shkak të gjendjes së vështirë ekonomike, që ka përfshirë organizatën e tyre. Ata kërkojnë t'u paguhen rrogat për pesë muajt e fundit. Në kudër të kësaj shtëpie del edhe e përditshmja në gjuhën shqipe "Flaka".

 

 

AKSH e ka marrë përgjegjësinë për shpërthimin e fundit në afërsi të Bujanocit

 

Bujanoc, 25 shkurt 2003 - Formacioni i armatosur Armata Kombëtare Shqiptare me një kumtesë për opinion të botuar në internet ka marrë përgjegjësinë për shpërthimin e pardjeshëm, të një mine në afërsi të Bujanocit në luginën e Preshevës, ku humbi jetën një pjesëtar i policisë serbe, kurse dy të tjerë ishin plagosur.

 

AKSH thotë se këtë aksion e ka kryer njësiti gueril i kësaj armate i cili vepron në kuadër të divizionit "Adem Jashari" në territorin e Kosovës.

 

Në këtë komunikatë theksohet se aksioni është kryer me sukses kundër pjesëtarëve kriminelë të xhandarmërisë në fshatin Muhoc të Bujanocit dhe armikut i janë shkaktuar dëme në njerëz dhe në pajisje luftarake, kurse aksionin e ka udhëhequr komandant Korabi i cili ka marrë përgjegjësinë për këtë sulm në të cilin siç thuhet janë vrarë shumë pjesëtarë të policisë serbe.

 

 

Çoviq akuzon Shtajnerin se "vetëm premton dhe asgjë nuk po bën"

 

Beograd, 24 shkurt 2003 - Zëvendëskryeministri serb Nebojsha Çoviq i hedhi poshtë deklaratat e shefit të UNMIK-ut Shtajner se "autoritetet serbe nuk i kanë afruar të dhëna për ekzistimin e grupeve terroriste në Kosovë.

 

Ai ka thënë se Shtajner nuk po e flet të vërtetën, sepse në bisedën e djeshme gjenerali Gjurgjeviq ia ka transmetuar z. Kadi të gjitha përmbajtjet e letrave dhe dokumentave tjera të dërguara më parë UNMIK-ut.

 

Çoviq ka shtuar se nëse UNMIK nuk e ka të qartë do të marrë dokumente edhe më të qarta, duke shtuar se kjo çështje nuk duhet politizuar. Ai e ka akuzuar shefin e UNMIK-ut Shtajner se prej ardhjes së tij në funksion vetëm po premton dhe asgjë nuk po bën.

 

 

Bush priti shefin e administratës së Kremlinit, Voloshin

 

Uashington, 25 shkurt 2003 - Presidenti i SHBA-ve Xhorxh Bush dhe shefi i administratës së Kremlinit Aleksandar Voloshin kanë shkëmbyer mendime për situatën rreth Irakut në dritën e projekt rezolutës së dytë që SHBA-të dhe Britania e kanë paraqitur në Këshillin e Sigurimit të OKB-së, ka deklaruar sot përfaqësuesi i Shtëpisë së Bardhë Ari Flajsher.

 

Duke mos dhënë detajet për vetë rrjedhën e bisedës, Flajsher ka thënë se Voloshin vizitën në Uashington e ka filluar me takimin e djeshëm me këshilltaren e Bushit për siguri kombëtare Kondiliza Rajs, të cilit i është bashkuar edhe Presidenti amerikan.

 

 

Në Vietnam ka filluar një gjykim kundër një bande prej 155 të akuzuarëve për vrasje

 

Ho Shi Min, 25 shkurt 2003– Vietnami komunist ka filluar të martën një gjykim të 155 gangsterëve, me qëllim të sigurimit të investitorëve se qeveria përnjëmend do të luftojë krimin, njofton Rojter. Qindra njerëz janë mbledhur jashtë gjykatës për të ndjekur këtë gjykim.

 

Prokurorët kanë akuzuar ish-ushtarin 55-vjeçar, Truong Van Kam, të ketë udhëhequr për 15 vjet një bandë, e cila ka kryer vrasje, është marrë me bixhoz, emigrim ilegal dhe mitosje. Ndër të akuzuarit, kryesisht meshkuj, është edhe ish-nënministri për sigurim publik, Bui Kuok.

 

Nëse trupi gjykues, i përbërë prej dy gjykatësve dhe tre civilëve të zgjedhur nga Partia Komuniste, i shpall fajtorë të akuzuarit, 19 syresh mund të dënohen me vdekje. Ky gjykim pritet të zgjasë 55 ditë dhe përcillet nga rreth 100 gazetarë.

 

 

Frenks: Ende nuk jam njoftuar nëse Presidenti Bush do ta përdorë forcën kundër Irakut

 

Londër, 25 shkurt 2003 - Komandanti i komandës qendrore amerikane, gjenerali Tomi Frenks, ka deklaruar sot se sekretari amerikan i Mbrojtjes Donald Ramsfeld ende nuk e ka njoftuar nëse presidenti Bush ka vendosur të përdorë forcën kundër Irakut.

"Për mua kjo do të thotë se ende ka shumë pjesë të mozaikut që mund të lëvizin në mënyra të ndryshme. Në interesin tim është që ato pjesë t'i lëviz ashtu që ato të na përgjigjen neve. Fjala është për krijimin e kushteve të voltishme", ka thënë Frenks në Londër ku sot do të takohet me kryeministrin britanik, Toni Bler.

 

 

Nga shpërthimet në dy restorane universitare në Pekin janë lënduar nëntë persona

 

Pekin, 25 shkurt 2003 – Shpërthimet kanë tronditur sot (të martën) dy universitete në Pekin, ku janë lënduar nëntë persona, njofton AFP. Njoftohet gjithashtu se të dy shpërthimet kanë ndodhur në restoranet universitare, ku kanë qenë një numër i konsiderueshëm klientësh.

 

 

Në një aksident ajror kanë humbur jetën katër ushtarë amerikanë

 

Kuvajt, 25 shkurt 2003 – Të katër pjesëtarët e ekuipazhit të helikopterit amerikan "Blackhawk" kanë humbur jetën sot heret (të martën) në një aksident ajror gjatë stërvitjes, dhe me atë rast helikopteri i tyre është rrëzuar mbi shkretëtirën e Kuvajtit, njofton UPI.

 

Helikopteri ka pasur bazën në kampin rreth 30 mila në veriperendim të qytetit Kuvajt dhe operacionet e natës janë zhvilluar afër bazës, kanë bërë të ditur burimet ushtarake. Identiteti i ushtarëve të vdekur nuk është dhënë ende. Hetimet e këtij aksidenti vazhdojnë, thuhet në fund të këtij njoftimi.

 

 

Sekretari Pauell paralajmëron Korenë e Veriut

 

Uashington, 25 shkurt 2003 - Sekretari amerikan i Shtetit Kolin Pauell iu drejtua Koresë së Veriut me një paralajmërim të prerë për të hequr dorë nga çdo plan për prodhimin e armëve bërthamore. Pauell shkoi në Korenë e Jugut pas bisedimeve me udhëheqësit kryesorë kinezë në Pekin. Para se të nisej për në Korenë e Jugut, shefi i diplomacisë amerikane tha se Uashingtoni beson se Koreja e Veriut ka aktualisht një sasi të mjaftueshme lëndësh bërthamore për një ose dy bomba.

 

Ai tha se çdo hap i mëtejshëm i Penianit në këtë drejtim do të konsiderohej si shumë serioz. Pas takimit me presidentin kinez Gjiang Zë Min dhe nënpresidentin Hu Gjintao, Pauell tha se mendon që Pekini është i gatshëm të luajë një rol konstruktiv në zgjidhjen e krizës mbi programin bërthamor të Koresë së Veriut.

 

 

Thellohen përçarjet për Irakun

 

Nju Jork, 25 shkurt 2003 - Perspektiva e një lufte të mundshme ndaj Irakut po thellon përçarjen mes vendeve perëndimore. Projektrezoluta e re e paraqitur para Këshillit të Sigurimit të Kombeve të Bashkuara nga Britania, Amerika dhe Spanja, është pritur me kundërpropozime nga Franca, Gjermania dhe Rusia.

 

 

SHBA dhe Britania e madhe i kanë dhënë KB dy javë kohë për të vendosur lidhur me rezoluten e re për Irakun

 

Bruksel, 25 shkurt 2003 - SHBA dhe Britania e madhe i kanë dhënë KB dy javë kohë për të vendosur lidhur me rezoluten e re për Irakun, në të cilën të dyja vendet presin mbështetje për sulm ushtarak kundër vendit arab, ka deklaruar në Bruksel ministri i jashtëm britanik Xhek Strou. Rezoluta e re do të jetë shansi i fundit për çarmatimin e presidentit irakian Sadam Husein, ka thënë ai.

 

 

Gjermania, Franca dhe Rusia kundër

 

Nju Jork, 25 shkurt - Gjermania Franca dhe Rusia kanë paraqitur në KS propozime të reja për carmatosjen e Irakut. Këtë bëri të ditur presidenti i Francës Zhak Shirak pas takimit të tij në Berlin me kancelarin Gerhard Shrëder.

 

Me këto propozime parashikohet forcimi i misionit të inspektorëve ndërkombëtar në Irak. Gjermania dhe Franca kanë kundërshtuar propozimet amerikane dhe britanike për nxjerrjen e një rezolute të re për Irakun. Shrëder tha se një rezolutë e re në këtë moment nuk është e nevojshme, duke shtuar se Iraku mund të çarmatoset edhe me mjete paqësore.

 

 

Qeveria amerikane ka paraqitur një rezolutë të re mbi Irakun në Këshillin e Sigurimit

 

Uashington, 25 shkurt 2003 - Qeveria amerikane ka paraqitur dje një rezolutë të re mbi Irakun në Këshillin e Sigurimit. Rezoluta e re amerikano-britanike do nënvizojë faktin se Iraku ka shkelur marrëveshjen për çarmatim.

 

"Është momenti që Kombet e Bashkuara të vendosin, dhe ne shpresojmë se do të jenë të suksesshme, për të dëshmuar se do të mbeten një organizëm i rëndësishëm në përballjen me kërcënimet e shekullit të 21-të.

 

Por pavarësisht, në një mënyrë apo në një tjetër, Sadam Hyseini do të çarmatoset për mbrojtjen e paqes dhe për sigurinë e popullit amerikan", ka deklaruar lidhur me rezolutën në fjalë Presidenti amerikan.

 

 

Qeveria turke ka miratuar vendosjen e trupave amerikane në Turqi

 

Ankara, 25 shkurt 2003 - Qeveria turke ka miratuar vendosjen e trupave amerikane në këtë vend, si pjesë e përgatitjeve për një luftë të mundshme me Irakun. Pritet që sot parlamenti të votojë këtë vendim. Ky hap ka ardhur pas javësh bisedimesh, mbi ndihmën ekonomike, si pasojë e humbjeve që mund të shkaktojë një luftë. Uashingtoni i ka ofruar Ankarasë 5 miliard dollarë si ndihmë dhe 10 miliardë në formë kredish.

 

 

Bliks thotë se nuk do të ketë bisedime shtesë me Irakun

 

Nju Jork, 25 shkurt 2003 - Shefi i inspektorëve të Kombeve të Bashkuara, Hans Bliks, ka thënë se nuk do të ketë bisedime shtesë me Irakun lidhur me prishjen e raketave të tipit Al Samud 2, të cilat ishin për distanca më të largëta se ato që lejon OKB-ja.

 

"Ne presim që ata të pranojnë çfarë u kemi thënë mbi shkatërrimin e raketave. Ata kanë bërë të njëjtën gjë në të shkuarën dhe ne kemi kërkuar ashtu si dhe inspektorët parardhës", ka thënë Bliks.

 

 

Autoritetet kuvajtiane kanë arrestuar tre qytetarë që planifikonin sulme kundër trupave amerikane

 

Kuvajt, 25 shkurt 2003 - Autoritetet kuvajtiane kanë arrestuar tre qytetarë kuvajtianë që planifikonin sulme kundër trupave amerikane të vendosura në këtë vend. Njëherësh të tre personave u janë gjetur armë dhe municione.

 

 

Nga termeti i djeshëm në Kinë kanë vdekur së paku 260 njerëz

 

Peking, 25 shkurt 2003 - Së paku 260 njerëz kanë vdekur dhe mbi 4000 të tjerë janë plagosur si pasojë e një tërmeti të fuqishëm në veriperëndim të Kinës, njoftojnë burimet zyrtare vendase.

Copyright©2000-2003 Trepca.net - Të gjitha të  drejtat e rezervuara.