E hëne, 24 shkurt 2003


	24.02.2003 - Trepca.net
	Lajme
	E hëne, 24 shkurt 2003


	Përmbajtja: Sipas një analize të KFOR-it, në Kosovë kanë ndodhur 28 vrasje të rënda, prej tyre 20 që kanë të bëjnë me LDK-në Nënshkruhet marrëveshja për krijimin e Arkivit elektronik të Kuvendit të Kosovës Në Prizren dhe Drenas sot u protestua kundër arrestimit të katër ish-pjesëtarëve të UÇK-së UNDP do të realizojë një projekt prej 100 mijë dollarësh në sheshin "Nënë Tereze" në Prishtinë Mungesa e gjykatësve rrezikon autoritetin e gjykatës komunale në Gjilan, thotë kryetari i saj Shtutgart: LDK-ja që nga themelimi si synim bazë e ka patur pavarësinë e Kosovës Asnjë institucion i Kosovës nuk interesohet rreth refugjatëve tanë në Norvegji Shtajner kërkoi që bashkësia ndërkombëtare të mos zhvendosë vëmendjen nga Kosova UNMIK-u kundërshtoi propozimet e Gjingjiqit për një mini-shtet serb në veri të Kosovës Avokatët e Kosovës do t'i dorëzojë Tribunalit të Hagës me emrat e avokatëve për të mbrojtur katër të akuzuarit shqiptarë Autostrada Prishtinë - Kukës - Durrës mund të ndërtohet brenda tre vjetësh Avokati i popullit do t'u afrojë qytetarëve mundësinë për t'i ushtruar ankesat e tyre nëpërmjet linjës telefonike Rizah Sheqiri u nderua me çmimin vjetor për kulturë Shesheli ka arritur në qendrën për paraburgim të Hagës Vënia në jetë e marrëveshjes së Ohrit është porosia e kryesore e zyrtarëve më të lartë të BE-së për Maqedoninë Në një aksident trafiku një afërsi të Selanikut kanë vdekur 14 persona Në policinë e Maqedonisë deri në fund të vitit 2004 duhet të punësohen 1500 policë shqiptarë Në Muhoc të Bujanocit ka humbur jetën një polic serb N.Bigman tha se NATO nuk ka ndeshur në ndonjë pjesëtar të AKSH-së Vaksina e Aids-it me sukses të kufizuar Në një aksident ajror kanë humbur jetën një ministër afgan dhe 7 persona të tjerë zyrtarë Nga një termet i fuqishëm në Kinën veriperendimore kanë humbur jetën të pakten 242 veta Bler ka zhvilluar një bisedë urgjente telefonike me Putinin Pauell kërkon mbështetjen e Kinës Dhjetë të vdekur në Rripin e Gazës Vriten nëntë shiitë në Pakistan Pauell thotë se Iraku është fajtor sepse ka dështuar të spastrohet nga armët Iraku s'ka armë për zhdukje në masë dhe do t'u nënshtrohet kërkesave të KB-së, thonë zyrtarët irakianë Papa Gjon Pali i dytë ka dënuar "terrorizmin dhe logjikën e luftës" Anan vizitoi Turqinë që të ndihmojë në negociatat për riunifikimin e Qipros Së paku 9 persona janë vrarë në territoret palestineze në një ofensivë të re të Izraelit Qindra polakë dhe çeçenë protestuan në Poloni kundër akisoneve ushtarake ruse në Çeçeni
	Sipas një analize të KFOR-it, në Kosovë kanë ndodhur 28 vrasje të rënda, prej tyre 20 që kanë të bëjnë me LDK-në Prishtinë, 24 shkurt 2003 - Sipas një analize interne të KFOR-it, në Kosovën e pasluftës, kanë ndodhur 28 vrasje të rënda, të cilat mund të kenë ngjyrime dhe pasoja politike. Prej këtyre 28 vrasjeve, 20 personalitete kanë pasur lidhje me LDK-në, shkruan gazeta "Zëri" në numrin e sotëm, e cila boton një analizë të KFOR-it për shkallën e sigurisë në Kosovë. Nënshkruhet marrëveshja për krijimin e Arkivit elektronik të Kuvendit të Kosovës Prishtinë, 24 shkurt 2003 - Sot në Kuvendin e Kosovës, nga kryetari Nexhat Daci dhe shefi i Zyrës së UNDP-së në Prishtinë, Robert Piper, u nënshkrua marrëveshja për krijimin e Arkivit elektronik të Kuvendit të Kosovës. Projekti i cili mundëson qasje shumë të shpejtë në dokumentacionion e Kuvendit, por edhe ruajtjen e mirë të tij, do të kushtojë 1.1 milion dollarë. Përveç nga Programi për Zhvillim i OKB-së (UNDP), ky projekt do të mbështetet edhe nga Unioni Interparlamentar dhe nga Norvegjia. Në Prizren dhe Drenas sot u protestua kundër arrestimit të katër ish-pjesëtarëve të UÇK-së Prizren, 24 shkurt 2003 - Në Prizren sot u protestua kundër arrestimit të katër ish-pjesëtarëve të UÇK-së nga Tribunali i Hagës, duke mbajtur në duar pankarta të ndryshme. Oratorët thanë se nuk janë tubuar për t'u mbrojtur por për të treguar dinjitetin se të gjithë janë me Fatmir Limajn. Ata thanë se shpresojnë në drejtësi dhe në gjykatë se nuk burgosen çlirimtarët të cilët luftuan për lirinë e popullit të vet. Akuza kundër Limajt është që kosovarët të dorëzohen në prehrin e Serbisë, tha një tjetër folës. Në këtë protestë morën pjesë me mijëra qytetarë. Një protestë e madhe sot u mbajt edhe në Drenas, me pjesëmarrjen e mijëra qytetarëve, ku u protestua kundër arrestimit të ish-pjesëtarëve të UÇK-së dhe deputetit Fatmir Limaj. Në këtë protestë u kërkua nga parlamenti që të nxjerrë një rezolutë për njohjen e vlerave të UÇK-së, çlirimrarët e arrestuar të lirohen dhe të mbrohen në liri, Parlamenti, Qeveria e Kosovës dhe Presidenca të ngrisin çështjen e imunitetit të njerëzve të luftës dhe të punës së institucioneve të Kosovës dhe parlamenti të mos fillojë nga puna derisa të mos lirohen çlirimtarët. UNDP do të realizojë një projekt prej 100 mijë dollarësh në sheshin "Nënë Tereze" në Prishtinë Prishtinë, 24 shkurt 2003 – Robert Piper, përgjegjës dhe Xhenifer Slotin, analiste e Programit për Zhvillim të Kombeve të Bashkuara (UNDP) me seli në Prishtinë, vizituan sot kryetarin e Kuvendit Komunal të Prishtinës, z. Ismet Beqiri. Në këtë takim z. Piper njoftoi për projektet dhe programet e UNDP-së si dhe rreth implementimit të projektit të quajtur "Zbukurimi i qyteteve", ku deri tash është punuar në disa shtete të Evropës Juglindore. Ai tha se këto ditë nga Qeveria italiane kanë siguruar 100 mijë dollarë dhe këto para janë planifikuar të investohen në sheshin "Nënë Tereze" në Prishtinë. Nga kjo shumë 80 mijë dollarë do të investohen në suvatimin e ndërtesave përgjatë rrugës "Nënës Tereze" në Prishtinë, ndërsa 20 mijë dollarët e mbetur do të investohen në rrugët e këtij Sheshi në Prishtinë, tha Robert Piper, përfaqësues i UNDP-së. Kryetari i KK të Prishtinës, Ismet Beqiri pasi e falënderoi z. Piper për angazhimet e tij në implementimin e këtij projekti, tha se Prishtina si kryeqytet i Kosovës duhet të prijë për së mbari dhe njëkohësisht duhet dhe do të jetë model i qeverisjes së pushtetit lokal në Kosovë. Gjatë takimit u vendos për takime të rregullta midis udhëheqjes së KK të Prishtinës dhe përfaqësuesve të UNDP-së deri në realizimin e projektit, ndërsa të dyja palët u dakorduan që projekt "Zbukurimi i qytetit" të realizohet brenda gjashtë muajsh. Mungesa e gjykatësve rrezikon autoritetin e gjykatës komunale në Gjilan, thotë kryetari i saj Gjilan, 24 shkurt 2003 - Shefqet Xhelili, kryetar i gjykatës komunale në Gjilan është i shqetësuar se institucioni i drejtësisë që udhëheq ai rrezikohet ta humbë dukshëm autoritetin te qytetarët, për shkak të zgjatjes së procedurave dhe seancave të mbyllura. Këto ndodhin shkaku i numrit të pamjaftueshëm të gjykatësve dhe mungesës së sallave për shqyrtim publik të rasteve, tha ai. Në njërën anë, z.Xhelili është i kënaqur nga numri i lëndëve, sepse kjo shpreh besimin e palëve në institucione, ndërsa në anën tjetër druan se qytetarët mund t`i shmangen rrugës ligjore të zgjidhjes së problemeve, në të ardhmen, nëse procedurat zgjaten më tepër se sa duhet. Për tri vjet nuk është pranuar asnjë gjykatës, përderisa numri i lëndëve është rritur dukshëm. Gjykata nuk e ka as referentin për ekzekutimin e lëndëve. "Është e pamundur që një gjykatës t`i zotërojë deri në 800 lëndë brenda një viti", thotë kryetari i gjyqit komunal në Gjilan, Shefqet Xhelili. Gjykimet e mbyllura - janë brenga tjetër e z. Xhelili, sepse ato cenojnë parimin e publicitetit. Për shkak të mungesës së gjykatoreve, seancat nuk mund të jenë publike, në të shumtën e rasteve, sepse të akuzuarit, ndonjëherë duhet t`i fusim edhe në zyrën e kryetarit, përderisa të gjitha shqyrtimet duhet të mbahen në zyra të gjykatës. Sipas një analize të KFOR-it, në Kosovë kanë ndodhur 28 vrasje të rënda, prej tyre 20 që kanë të bëjnë me LDK-në Prishtinë, 24 shkurt 2003 - Sipas një analize interne të KFOR-it, në Kosovën e pasluftës, kanë ndodhur 28 vrasje të rënda, të cilat mund të kenë ngjyrime dhe pasoja politike. Prej këtyre 28 vrasjeve, 20 personalitete kanë pasur lidhje me LDK-në, shkruan gazeta "Zëri" në numrin e sotëm, e cila boton një analizë të KFOR-it për shkallën e sigurisë në Kosovë. Shtutgart: LDK-ja që nga themelimi si synim bazë e ka patur pavarësinë e Kosovës Shtutgart, 24 shkurt 2003 - Dega e Lidhjes Demokratike të Kosovës për Gjermani, gjatë uikendit të kaluar, ka organizuar katër tubime me anëtarët dhe simpatizantët e saj, e ku merrin pjesë edhe dy anëtarët e Kryesisë qendrore të LDK-së dhe deputetë të Parlamentit të Kosovës, Nimon Alimusaj dhe Agim Krasniqi. Këto tubime u ndoqën me interesim të madh nga ana e bashkatdhetarët tanë. Këto tubime u mbajtën në Offenbach (afër Frankfurtit), në Hannover, në Kircheim/Teck (afër Shtutgartit) dhe në Wuppertal. Të shtunën, para këtyre tubimeve u zhvillua një bisedë e dy mysafirëve nga Prishtina me një pjesë të kryesisë së Degës së LDK-së në Gjermani. Duke folur për historikun e LDK-së, Nimon Alimusaj e Agim Krasniqi, theksuan se përpjekjet e shqiptarëve për pavarësi janë në vazhdimësi dhe me dekada të tëra. Ndërkaq për rezultatet e këtyre përpjekjeve të shqiptarëve në dekadën e fundit të shekullit të kaluar merita të veçanta ka LDK-ja, me dr.Ibrahim Rugovën në krye. LDK-ja që nga themelimi i saj si subjekt politik i shqiptarëve të Kosovës si synim bazë e ka patur pavarësinë e Kosovës. LDK-ja ishte ajo që u tha Uashingtonit e Bonit se Kosova nuk është pjesë e Serbisë, dhe këtë ia tha troç edhe Beogradit, duke e internacionalizuar kështu çështjen e Kosovës deri në instancat më të larta të politikës botërore. Duke folur edhe për aktivitetin e degëve të LDK-së jashtë, Alimusaj dhe Krasniqi theksuan se Dega në Gjermani ishte ajo e cila arriti që në protestat e Bonit të tubojë edhe mbi 100 mijë shqiptarë. Kohëve të fundit hetohet një rënie e aktivitetit, porse siç u pa edhe në këto tubime, anëtarësia është e gatshme të vazhdojë aktivitetin e vet, por edhe udhëheqësit e zgjedhur të tyre duhet të angazhohen më tepër që të shfyrëtëzojnë më mirë këtë potencial, njofton Shërbimi për informim i Degës së LDK-së në Gjermani. Asnjë institucion i Kosovës nuk interesohet rreth refugjatëve tanë në Norvegji Oslo, 24 shkurt 2003 - Publikimi i informacionit gjatë ditëve të fundit se, Qeveria dhe policia norvegjeze, i detyrojnë shqiptarët nga Kosova që të pajisen me pashaporta serbe, e nxiti bashkëpunëtorin tonë në Oslo, Osman Disha, që të bëjë hulumtimin e kësaj çështjeje. Në bisedë me shërbimet informative pranë Departamentit Juridik dhe të Drejtorisë për migracion, këta të fundit, konfirmuan një vendim të tillë. Megjithë faktin se de fakto dhe de jure nuk ekziston më shteti me emrin Jugosllavi, zyrtarët për informata thanë se ky qëndrim më i ri vlen vetëm për ata azilkërkues nga Kosova, të cilët kanë marrë lejeqëndrim në Norvegji për shkaqe humanitare, kurse nuk vlen për ata të cilët kanë fituar të drejtën e azilit politik. Në pyetjen nëse janë të njoftuar se me Kosovën tashmë qeveris misioni i Kombeve të Bashkuara si dhe institucionet shtetërore të Kosovës, e asnjë administratë tjetër dhe se shqiptarët pothuajse të gjithë tashmë janë të pajisur me pasaportat e UNMIK-ut, morëm përgjigjen e qartë dhe pak ca të papritur se, kosovarët me rastin e ardhjes së tyre këtu në Norvegji, ata po dorëzojnë pasaportat e Jugosllavisë apo Serbisë. Poashtu në Departamentin për të huaj të Norvegjisë, tërthorazi na bënë me dije se, për këtë çështje, deri më tani, pos mediave kosovare, asnjë institucion tjetër i Kosovës nuk ka reaguar në asnjë formë, qoftë verbale apo zyrtare. Shtajner kërkoi që bashkësia ndërkombëtare të mos zhvendosë vëmendjen nga Kosova Lajpcig, 24 shkurt 2003 - Kryeadministratori i Kosovës Mihael Shtajner po qëndron në një vizitë në Gjermani ku deklaroi se në Hagë duhet të shkojnë të gjithë të akuzuarit për krime lufte. Në ligjëratën të cilën e mbajti në Lajpcig tha se populli i Kosovës e di mirë se cili është shkaku i krijimit të Tribunalit të Hagës dhe për këtë arsye e respekton atë. Shtajner kërkoi që bashkësia ndërkombëtare të mos zhvendosë vëmendjen nga Kosova dhe zhvillimet në Ballkan, sepse paqja atje do të thotë paqe për gjithë Evropën. Njëherësh ai kritikoi ndryshimin e pozicioneve të kryeministrit Zoran Gjingjiq se kërkesat e tij janë për zgjidhjen sa më të shpejtë të statusit të Kosovës. UNMIK-u kundërshtoi propozimet e Gjingjiqit për një mini-shtet serb në veri të Kosovës Prishtinë, 24 shkurt 2003 - Administrata e UNMIK-ut në Kosovë kundërshtoi edhe zyrtarisht propozimet e Gjingjiqit për krijimin e një mini-shteti serb në veri të Kosovës. Zëdhënësi i UNMIK-ut Sejmon Hasellok deklaroi se idetë e hedhura nga Gjingjiqi për krijimin e një etniteti serb në këtë pjesë të Kosovës janë plotësisht të absurde dhe në kundërshtim me përcaktimet e bashkësisë ndërkombëtare. Ai theksoi se këto ide të Gjingjiqit janë në kundërshtim me Rezolutën 1244 dhe përcaktimin për një Kosovë multietnike. Avokatët e Kosovës do t'i dorëzojë Tribunalit të Hagës me emrat e avokatëve për të mbrojtur katër të akuzuarit shqiptarë Prishtinë, 24 shkurt 2003 - Dhoma e Avokatëve të Kosovës do t'i dorëzojë Tribunalit të Hagës një listë me emrat e avokatëve kosovarë që janë shprehur të gatshëm të mbrojnë katër shqiptarët e akuzuar për krime lufte. Përfaqësuesi i Odës së Avokatëve të Kosovës, Destan Rukiqi thotë se kjo çështje ka mbetur të diskutohet në Zyrën e Tribunalit të Hagës në Prishtinë për të gjetur mënyrën se si të realizohet kjo procedurë. Lidhur me aktivitetet e këtij asociacioni në këtë drejtim Rukiqi ka theksuar se Oda e Avokatëve të Kosovës, përkatësisht Këshilli Ezekutiv i Odës më 22 shkurt ka mbajtur një mbledhje të jashtëzakonshme në të cilën ka biseduar se si të organizohet Oda e Avokatëve të Kosovës që t'u ofrojë një listë të avokatëve të cilët do të jenë në nivel për t'iu ofruar mbrojtjen profesionale katër të akuzuarve shqiptarë. Autostrada Prishtinë - Kukës - Durrës mund të ndërtohet brenda tre vjetësh Prishtinë, 24 shkurt 2003 - Autostrada Prishtinë - Kukës - Durrës mund të ndërtohet brenda tre vjetësh, thotë drejtoresha e Drejtorisë së Rrugëve të Kosovës Kaqusha Jashari. Ajo thekson se për këtë nevojitet angazhimi më i madh i institucioneve të Kosovës në radhë të parë i Qeverisë së Kosovës. Zonja Jashari thotë se kjo autostradë e kualitetit të lartë vlerësohet se mund të ndërtohet vetëm me koncesion, por edhe për këtë mënyrë të ndërtimit nevojitet përkrahje e institucioneve. Ndërtimi i autostradës në pjesën kosovare nuk do të zgjasë shumë nëse arrihet vendimi që të fillohet ndërtimin me koncesion, thot zonja Jashari dhe shton se nëse fillon ndërtimin sivjet atëherë me siguri për dy tri vjet pesë firma mund ta kryejnë atë, por edhe të hyjë në funksion. Avokati i popullit do t'u afrojë qytetarëve mundësinë për t'i ushtruar ankesat e tyre nëpërmjet linjës telefonike Prishtinë, 24 shkurt 2003 - Institucioni i avoaktit të popullit të Kosovës, që nga një marsi u afron qytetarëve një mundësi më shumë për t'i ushtruar ankesat e tyre në këtë institucion nëpërmjet linjës së posaçme telefonike. Çdo ditë punë pranë këtij telefoni do të jetë një avokat nga institucioni i ombudspersonit i cili do t'i përgjigjet rasteve që paraqiten. Gjatë uikiendit telefoni do t'i regjistrojë të gjitha porositë, ashtu që personat e paraqitur do të kontaktohen nga avokati e popullit. Ky numër do të jetë në përdorim nga 1 marsi i këtij viti, thotë ombudspersoni Marek Antoni Novicki. Rizah Sheqiri u nderua me çmimin vjetor për kulturë Stokholm, 24 shkurt 2003 - Rizah Sheqirit, poetit dhe shkrimtarit tonë me banim në Karlskrona të Suedisë, i është dhënë çmimi vjetor për kulturë për vitin 2002 nga Komuna e Karlskronës. Kjo mirënjohje ka një vlerë të veçantë kur kihet parasysh fakti se Karlskrona është qytet i mirënjohur për trashëgimi të pasur kulturore, trashgimia e të cilit është e nën mbrojtjen e UNESKO-s. Rizah Sheqiri, krijuesi ynë i mirënjohur, autor i 30 veprave për fëmijë e të rritur në prozë, poezi, dramaturgji, kritikë letrare, studime, publicistikë, e i përkthyer edhe në gjuhë të ndryshme të botës si në atë angleze, gjermane, suedeze etj. Vetëm gjatë vitit 2002 Rizah Sheqiri u prezentua edhe me gjashtë libra që mbajnë firmën e tij. Rizah Sheqiri përndryshe është anëtar i Shoqatës së Shkrimtarëve të Suedisë dhe është mjaft aktiv në jetën e veprimtarinë kulturore në Suedi. Shesheli ka arritur në qendrën për paraburgim të Hagës Hagë, 24 shkurt 2003 – Ultranacionalisti serb, i dyshimtë për krime lufte, Vojsllav Sheshel, po mbahet në Qendrën për paraburgim afër Hagës pasi është dorëzuar sot (të hënën) në Tribunalin e Kombeve të Bashkuara për krime të luftës, njofton AFP. "Shesheli ka arritur në Qendrën për paraburgim", ka deklaruar zëdhënësi i tribunalit, Kristian Shartie. Vënia në jetë e marrëveshjes së Ohrit është porosia e kryesore e zyrtarëve më të lartë të BE-së për Maqedoninë Bruksel, 24 shkurt 2003 - Linka Mitreva, ministre e Jashtme e Maqedonisë sot në Bruksel zhvilloi takime me shefin e diplomacisë greke Jorgos Papandreu, kryetar i radhës së BE-së, me shefin e politikës së Jashtme të BE-së Havier Solana dhe me komisionerin përgjegjës për marrëdhënie me Jashtë, Kris Paten. Gjatë këtyre bisedimeve është folur për zhvillimet e përgjithshme në rajon si dhe perspektiva e integrimi të vendeve të Evropës Juglindore në Bashkimin Evropian. Ministri i jashtëm grek Papandreu theksoi se BE-ja mbështet plotësisht politikën e UNMIk-ut në Kosovë, e njohur si standardet para statusit. Integrimi vendeve ballkanike në BE kërkon angazhimet e dyanshme, si nga ana e BE-së, për të nxitur dhe pëkrahur reformat në këto vende, por poashtu ky integrim kërkon impenjim dhe përmbushje të kushteve edhe kritereve edhe nga ana e vendeve ballkanike, tha Papandreu, para se të pohonte se të gjitha vendet e Ballkanit po ecin në drejtimin e duhur. Ilinka Mitreva njoftoi se deri në fund të vitit vendi i saj do të paraqesë kërkesë zyrtare për t'u njohur si kandidat për a anëtarësim në BE. Vënia në jetë dhe plotësisht e marrëveshjes së Ohrit do të ishte njëra nga porositë e kryesore të zyrtarëve të lartë të BE-së - Papandreu, Solana dhe Paten që i përcollën zonjës Mitreva. Në një aksident trafiku një afërsi të Selanikut kanë vdekur 14 persona Selanik, 24 shkurt 2003 - Në Greqi ka ndodhur një aksident trafiku në afërsi të Selanikut ku kanë vdekur 14 persona në mesin e të cilëve edhe dy të mitur shqiptarë. Autobusi i linjës Selanik - Athinë u rrëzua nga një urë me lartësi 15 metra. Mes të shpëtuarve ka edhe dy shtetas shqiptarë. Shumica dërrmuese e udhëtarëve ishin në moshë të re, studentë dhe ushtarë që shkonin për fundjavë në familjet e tyre. Figura ndoshta më tragjike e këtij aksidenti është një nënë 32 vjeçare nga Shqipëria e cila po kurohet në gjendje të rëndë, ndërkaq vajza e saj tetëvjeçare ka humbur jetën në rrugën për në spital dhe është identifikuar nga familijarët. Ndërkaq fëmija tjetër i saj është voglushi tre vjeçar që rezulton i zhdukur. Vlerësohet se trupin e tij e kanë marrë me vete ujërat e rrëmbyera të lumit. Në policinë e Maqedonisë deri në fund të vitit 2004 duhet të punësohen 1500 policë shqiptarë Shkup, 24 shkurt 2003 - Në policinë e Maqedonisë deri në fund të vitit 2004 duhet të punësohen 1500 policë shqiptarë. Vetëm këtë vit do të trajnohen 500 policë shqiptarë. Përfaqësimi proporcional i shqiptarëve në polici parashikohet edhe në Marrëveshjen e Ohrit, ka deklaruar për mediat e jashtme zëvendësministri i brendshëm i Maqedonisë Fatmir Dehari. Në Muhoc të Bujanocit ka humbur jetën një polic serb Bujanoc, 24 shkurt 2003 - Një polic nga radhët e njësiteve speciale në Serbi është vrarë, kurse dy të tjerë janë plagosur, kur automjeti i tyre ka shkelur në një minë të vendosur në rrugën Muhoc - Breznicë në Komunën e Bujanocit. Zëvendëskryeministri serb Nebojsha Çoviq deklaroi se përgjegjës për këtë shpërthim, siç spekuloi, janë Shefket Musliu, Besim Tahiri dhe Lirim Jakupi. Çoviq tha se prej UNMIK-ut dhe policisë ndërkombëtare në Kosovë pret arrestimin e këtyre tre personave dhe dorëzimin e tyre në duar të organeve të Serbisë. Ndryshe UNMIK-u do të jetë bashkëfajtor për këto akte terroriste, krimin e organizuar dhe dhunën, ka thënë Çoviq. N.Bigman tha se NATO nuk ka ndeshur në ndonjë pjesëtar të AKSH-së Shkup, 24 shkurt 2003 - Amabasadori i NATO-s në Shkup, Nikollas Bigman, deklaroi se Aleanca do t'i rezistojë në mënyrë aktive ideve që përmbajnë ideologji pë krijimin e shteteve të mëdha. Bigman tha se NATO deri tani nuk ka ndeshur në ndonjë pjesëtar të AKSH-së. Sipas tij kjo organizatë vepron vetëm në internet. Bigman theksoi se Maqedonia duhet të jetë e pakompromis në luftën kundër krimit të organizuar dhe korrupsionit nëse dëshiron anëtarësim në NATO. Ambasadori i NATO-s tha se ende ka banda të armatosura që bredhin andej këtej, ka edhe të shtëna të ndryshme, por nuk ka pasur diçka me përmasa të mëdha gjatë vitit. Bigman 100 ditët e qeverisë së re maqedonase i vlerësoi të suksesshme sepse, sipas tij, ka arritur sukses në luftë kundër krimit të organizuar. Ai lavdëroi punën e ministrit të brendshëm Kostov dhe zëvendësit të tij Dehari kundër krimit dhe korrupsionit. Vaksina e Aids-it me sukses të kufizuar Uashington, 24 shkurt 2003 – Vaksina e parë e Aids-it, që pritet të testohet në njerëz nuk mbron gjithë njerëzit, por mund të mbrojë vetëm të zinjtë dhe aziatët, ka bërë të ditur kompania bioteknike amerikane "VaxGen". Kjo kompani njofton gjithashtu se ka përfunduar studimin trevjeçar, në të cilin kanë marrë pjesë pesëmijë vullnetarë. Ky është kërkimi i parë për vaksinën e mundshme në njerëz kundër virusit vdekjeprurës, i cili vetëm vjet ka mbytur mbi tre milionë njerëz në botë. Rezultatet fillestare kanë treguar se vaksina në fjalë redukton përqindjen e infektimit me HIV në 3.8 për qind, thuhet në njoftimin e kësaj kompanie. "Shkencëtarët besojnë ende se vaksina për Aids është e mundshme", ka thënë Dr Seth Berkli, president i Iniciativës ndërkombëtare për vaksinën Aids. Në një aksident ajror kanë humbur jetën një ministër afgan dhe 7 persona të tjerë zyrtarë Karaçi, 24 shkurt 2003 – Një aeroplan, me të cilin udhëtonin një ministër afgan dhe 7 persona të tjerë zyrtarë është rrëzuar sot (të hënën) në detin e Pakistanit dhe drohet se të gjithë kanë humbur jetën, kanë bërë të ditur burimet e marinës pakistaneze, njofton Rojter. Njoftohet se mbeturinat e aeroplanit janë gjetur rreth 30 mila nautike nga porti i qytetit Karaçi. "Ne kemi zbuluar katër trupa të pa jetë. Nuk mund të konfirmoj identitetin e tyre. Kërkimi për të tjerët po vazhdon", ka deklaruar zëdhënësi i marinës pakistaneze. Në aeroplan ishte ministri afgan për petroleum, Muhamed Muhamedi, i cili gjatë uikendit zhvilloi bisedime në Pakistan për një projekt gazsjellës, që do të lidhte Turkmenistanin dhe Pakistanin nëpërmjet Afganistanit. Skaku më i mundshëm i aksidentit sipas njoftimeve të zyrtarëve është gabimi i pilotit për shkak të dukshmërisë së vogël. Nga një termet i fuqishëm në Kinën veriperendimore kanë humbur jetën të pakten 242 veta Peking, 24 shkurt 2003 – Të pakten 242 veta kanë humbur jetën dhe mbi njëmij të tjerë janë lënduar nga një tërmet i fuqishëm, që ka goditur sot (të hënën) Kinën veriperendimore, njofton AFP. Dridhja e fuqishme është shtrirë rreth qytetit Xhiashi në pjesën perendimore të rajonit Xinjiang. Bler ka zhvilluar një bisedë urgjente telefonike me Putinin Londër, 24 shkurt 2003 - Kryeministri britanik, Toni Bler ka zhvilluar një bisedë urgjente telefonike me presidentin rus, Vladimir Putin, si pjesë e ofensivës më të re diplomatike rreth Irakut që po intensifikohet. Nuk dihet se për çfarë u fol mes z. Bler dhe z. Putin. Ndërkohë, një i dërguar i posaçëm rus, ish-ministri i Jashtëm, Primakov ndodhet në Bagdad për t'i dorëzuar një mesazh Sadam Huseinit. Pauell kërkon mbështetjen e Kinës Pekin, 24 shkurt 2003 - Sekretari amerikan i Shtetit, Kolin Pauell ka mbërritur në Kinë në ndalesën e dytë të turnesë të tij në Azinë Lindore.Ai takohet me presidentin kinez, Xhiang Zemin dhe ministrin e Jashtëm për bisedime. Tema qëndrore e këtyre bisedimeve pritet të jetë çështja e Irakut dhe tensionet e vazhdueshme mes Shteteve të Bashkuara dhe Koresë së Veriut rreth programit bërthamor të vendit komunist. Kina, ashtu si Koreja e Jugut, do që Uashingtoni të pranojë kërkesën e Koresë së Veriut për bisedime direkte me Uashingtonin. Dhjetë të vdekur në Rripin e Gazës Gaza, 24 shkurt 2003 - Dhjetë të vdekur dhe më shumë se 20 të plagosur është bilanci i aksioneve të fundit izraelite kundër palestinezëve në Rripin e Gazës, respektivisht në qytetin Beit Hanun. Ndër të vdekurit është edhe një ushtarë izraelit. Vriten nëntë shiitë në Pakistan Karaçi, 24 shkurt 2003 - Si pasojë e një sulmi në qytetin pakistanez Karaçi janë vrarë nëntë muslimanë shitë. Sulmuesit kanë hapur zjarre me pistoleta dhe armë të tjera kundër një grupi shiitësh që gjendeshin para një xhamie. Deri tani nuk dihet asgjë për sulmuesit dhe motivet e tyre. Policia ka urdhëruar forcimin e kontrollit të xhamive. Pauell thotë se Iraku është fajtor sepse ka dështuar të spastrohet nga armët Uashington, 24 shkurt 2003 - Sekretari amerikan i Shtetit, Kolin Pauell ka deklaruar se Iraku është "qartas" fajtor sepse ka dështuar të spastrohet nga armët e tij për zhdukje në masë dhe ka thënë se është arritur ajo pikë kur duhet të zbatohen "pasojat serioze" në pajtim me rezolutat e Këshillit të Sigurimit. "Është koha të ndërmerret aksion. Provat kanë qenë të qarta. Ata janë fajtorë. Edhe rezoluta 1441 thotë se ata janë fajtorë, mbasi aty është përcaktuar se po të mos nënshtrohen dhe bashkëpunojnë tani, atëherë do të përballen me pasoja serioze. Po e arrijmë atë pikë kur pasojat serioze duhet të zbatohen", ka thënë sekretari amerikan i Shtetit gjatë vizitës në Tokio. Iraku s'ka armë për zhdukje në masë dhe do t'u nënshtrohet kërkesave të KB-së, thonë zyrtarët irakianë Bagdad, 24 shkurt 2003 - Zyrtari kryesor irakian për ndërlidhje me inspektorët e Kombeve të Bashkuara për armatimin, gjenerali Hosam Mohamad Amin thotë se Iraku është spastruar nga armët e tij për zhdukje në masë. "Të gjitha këto aktivitete dhe operacionet e inspektimit konfirmojnë se Iraku është i spastruar nga armët për zhdukje në masë, dëshmojnë kredibilitetin e deklaratës së tij dhe përgënjeshtrojnë pretendimet Amerikane se Iraku akoma posedon armë për zhdukje në masë", ka thënë Amin. Zyrtari tjetër irakien, Sad Kasim Hamoudi ka thënë se Iraku do tu nënshtrohet kërkesave të Kombeve të Bashkuara për asgjësimin e raketave Samud 2, nëse inspektorët vërtetojnë se ato janë në kundërshtim me rezolutat e Kombeve të Bashkuara. Papa Gjon Pali i dytë ka dënuar "terrorizmin dhe logjikën e luftës" Pragë, 24 shkurt 2003 - Në disa qytete anembanë botës kishte sërish protesta kundër luftës së mundëshme në Irak dhe për zgjidhje paqësore të krizës. Në Romë, Papa Gjon Pali i dytë ka dënuar "terrorizmin dhe logjikën e luftës". Në Bagdad, besimatrët e krishterë gjatë lutjeve në kishat e qytetit kanë kërkuar që kriza irakiane të zgjidhet pa luftë. Qytetarë nga Perëndimi që kundërshtojnë luftën kanë ndezur 50 mijë qirinj tradicionalë në tempullin budist në Katmandu të Nepalit. Anan vizitoi Turqinë që të ndihmojë në negociatat për riunifikimin e Qipros Stamboll, 24 shkurt 2003 - Sekretari i përgjithshëm i Kombeve të Bashkuara, Kofi Anan ndodhet në Turqi që të ndihmojë në negociatat për riunifikimin e Qipros dhe shfaqi optimizëm se mund të arrihet marrveshje për këte çështje. "Kemi arritur kulmin e përpjekjeve në rrugën për zgjidhjen e problemit të Qipros dhe ky është moment vendimtar. E dij se të gjithë jemi të preokupuar me Irakun, por nuk duhet lejuar që kjo të na heqë dore këte moment vendimtar", ka thënë Kofi Annan i cili është autor i planit për ribashkimin ishullit të ndarë. Së paku 9 persona janë vrarë në territoret palestineze në një ofensivë të re të Izraelit Gaza, 24 shkurt 2003 - Së paku 9 persona, 8 palestinezë dhe një ushtar izraelit janë vrarë në territoret palestineze derisa Izraeli ka ndërmarrë një ofensivë të re kundër militantëve të dyshuar në Rripin e Gazës. Të mbështetur nga 20 tanke dhe helikopterë sulmues trupat kishin hyrën në qytetin palestinez Beit Hanoun në Rripin e Gazës. Zyrtari i lartë palestinez, Saeb Erekat tha se "për këtë shkallëzim e mbajmë plotësisht përgjegjës Izraelin". Qindra polakë dhe çeçenë protestuan në Poloni kundër akisoneve ushtarake ruse në Çeçeni Varshavë, 24 shkurt 2003 - Qindra polakë dhe çeçenë protestuan në tre qytete të Polonisë dhe kërkuan ndërprerjen e akisoneve vijuese ushtarake ruse në republikën kryengritëse të Çeçenisë. Protestuesit, shumica refugjatë çeçenë, mbanin një transparent të gjerë ku shkruante: "Mjaft më gjenocid në Çeçeni".

	Copyright©2000-2003 Trepca.net - Të gjitha të drejtat e rezervuara.