Lajme

E shtune, 22 shkurt 2003

Përmbajtja:

• Shtajner thotë se nuk mund të ndërhyjë në Tribunalin e Hagës për të kërkuar që Limaj të mbrohet në liri

• B. Rexhepi u tha studentëve se nëse NATO-ja fillon t'i gjykojë aleatët e vetë, atëherë ajo do ta devalvonte vetveten

• Kryetari i Kuvendit të Kosovës priti shefin e Misionit për Decentralizim Karlo Civileti          

• Rita Zysmut: Popullsisë së Kosovës duhet t'i ofrohet një e ardhme e sigurt

• Drejtor i UNHCR-it për Evropë arrin nesër për vizitë triditore në Kosovë

• Gjingjiq: Beogradi do të mbështesë formimin e një shteti të vogël serb në Kosovë...

• Akademia e Kosovës dhe Akademia e Shqipërisë nënshkruan marrëveshjen për bashkëpunim

• Anëtarët e Kryesisë së LDK-së do të marrin pjesë në tubimet me anëtarët dhe simpatizantë të kësaj partie në Gjermani

• KKSHA-ja organizon Seminar Karriere per studentët shqiptarë dhe shqiptaro-amerikanë

• Në Podujevë, Vushtrri dhe Skënderaj edhe dje u kërkua lirimi i të arrestuarve nga gjykata e Hagës

• Tetë sekretarët e ministrive të Qeverisë së Kosovës udhëtojnë në Romë të Italisë

• Surroi thotë se nuk ka rregull e rend në trajtimin e qytetarëve në Koosvë

• Ali Ahmeti thotë se AKSH-ja është luftë psikologjike dhe nuk sheh ndonjë rrezik prej saj

• Bliks i ka dërguar një ultimatum Irakut të fillojë shkatërrimin e armëve deri më një mars

• Pauell ka arritur në Japoni dhe ky është fillimi i një turneu të tij në tri vende të Azisë

• R. Prodi: Vendet që duan të përfshihen në BE sigurinë ta trajtojnë me SHBA-të

• Britania dhe Franca kanë një plan të përbashkët për misionin paqeruajtës në Bosnjë

• Edi Rama i mirëpret hetimet nga prokuroria

• BE-ja më 15 mars pritet të marrë nga NATO-ja misionin paqësor në Maqedoni

• Takim i Ministrave të Mbrojtjes dhe të Punëve të Brendshme të Maqedonisë dhe të Shqipërisë

• Iraku ka ofruar mundësinë për të hapur dialog me Shtetet e Bashkuara

• Turqia dhe Shtetet e Bashkuara janë afër një marrëveshjeje

• Bler ka biseduar në Romë me homologun e tij, Berluskoni

• Një shpërthim zjarri ka përfshirë një rafineri nafte në Nju Jork

• Numri i viktimave në ujdhesën Roud ka arritur në 96

• Pauell: Uashingtoni do të vendoste një administratë ushtarake në Irak

• Vendet e painkuadruara kundër luftës në Irak

• Udhëheqja palestineze për heqje dorë nga dhuna kundër Izraelit

Shtajner thotë se nuk mund të ndërhyjë në Tribunalin e Hagës për të kërkuar që Limaj të mbrohet në liri

 

Prishtinë, 22 shkurt 2003 - Kryeadministratori i Kosovës Mihael Shtajner deklaroi se nuk mund të ndërhyjë në Tribunalin e Hagës për të kërkuar që shefi i Grupit parlamentar të Partisë Demokratike të Kosovës Fatmir Limaj të kthehet në Kosovë dhe të mbrohet në liri.

 

Këtë deklaratë shefi i UNMIK-ut Mihael Shtajner e bëri dje pas takimit të djeshëm që zhvilloi me kryetarin e Partisë Demokratike të Kosovës Hashim Thaçi.

 

 

B. Rexhepi u tha studentëve se nëse NATO-ja fillon t'i gjykojë aleatët e vetë, atëherë ajo do ta devalvonte vetveten

 

Prishtinë, 22 shkurt 2003 - Kryeministri i Kosovës, Bajram Rexhepi pati një takim të veçantë me përfaqësuesit e Unionit të Pavarur të Studentëve të Universitetin e Kosovës.

 

Ai tha me këtë rast se nëse vazhdohet me fushatën e arrestimeve të ish-pjesëtarëve të UÇK-së mund të dëmtohet rëndë procesi politik në Kosovë. Vazhdimi i arrestimeve mund të bëhet shkak edhe për rrëzimin e Qeverisë së tij dhe këtë duhet ta ketë parasysh edhe faktori ndërkombëtarë, ka thënë Rexhepi.

I pyetur nga studentët se si i komenton arrestimet e fundit nga Gjykata e Hagës dhe intervenimi i NATO-s në Kosovë a do të thotë një dështim i tyre, kryeministri thotë:

 

"Sikur të shkohet nga ajo dhe ta denigrojë e devalvojë luftën e UÇK-së do të jetë dështim edhe i NATO-s për arsye se mu për shkak të pastërtisë së luftës e cila i ka respektuar edhe konventat, të drejtat e njeriut dhe ka bërë në luftë çlirimtare, ka qenë ajo që e ka pru NATO-n ta ndihmojë Kosovën dhe bashkërisht të çlirohemi.

 

Sikur tash të fillojë t'i gjykojë të gjithë ata aleatë e vetë, atëherë NATO-ja do ta devalvonte edhe vetveten dhe këtu NATO-ja duhet të mendojë shumë mirë për këtë".

 

 

Kryetari i Kuvendit të Kosovës priti shefin e Misionit për Decentralizim Karlo Civileti

 

Prishtinë, 22 shkurt 2003 - Kryetari i Kuvendit të Kosovës Nexhat Daci priti shefin e Misionit për Decentralizim Karlo Civilieti. Temë e takimit të Dacit me shefin e Misionit për decentralizim Karlo Civileti ishte projekti për decentralizimin e pushtetit në Kosovë, të cilin synon ta realizojë Komisioni Evropian.

 

Civileti u shpreh se përvoja e tyre do ta ndihmojë do ta ndihmojë në suksesin e këtij procesi. Ai shtoi se realitetit kosovar do t'i ofrohen përvojat e Këshillit të Evropës.

 

Në këtë drejtim do të bashkëpunojmë me të gjitha nivelet e pushtetit në Kosovë, sidomos me pushtetet lokale.

Ndërkaq, kryeparlamentari Daci krahas mbështetjes parimore për këtë proces ngriti çështjen e rrezikut se decentralizimi do të shfrytëzohet për krijimin e territoreve të pastra etnike dhe vazhdimin e enklavizimit të Kosovës.

Daci dje priti edhe shefin e Misionit të SHBA-ve në Kosovë Rino Harnish. Pas takimit me kryeparlamentarin Daci, Harnish u shpreh në favor të dorëzimit të kompetencave dhe përgjegjësive më të mëdha tek vendorët në sferat ekonomike.

 

Duke e përshëndetur vetëdorëzimin e Fatmir Limajt tha ase Tribunali i Hagës është një institucion ndërkombëtar dhe respektimi i tij do të ndihmojë në forcimin e rendit dhe ligjit në Kosovë.

 

 

Rita Zysmut: Popullsisë së Kosovës duhet t'i ofrohet një e ardhme e sigurt

 

Vjenë, 22 shkurt 2003 - Nënkryetarja e Asamblesë Parlamentare të OSBE-së Rita Zysmut, në një debat të zhvilluar në Vjenë, ka kritikuar politikën e UNMIK-ut në Kosovë. Ajo ka thënë: "Nuk mund të tolerohet sjellja që përpara fakteve të pamohueshme të insistosh se Kosova është pjesë e Serbisë.

 

E kuptoj të dërguarin e Sekretarit të Përgjithshëm të OKB-së në Kosovë për të respektuar rezolutën e Kombeve të Bashkuara, por nuk duhet harruar se popullsisë së Kosovës duhet t'i ofrohet një e ardhme e sigurt", ka theksuar nënkryetatarja e Asamblesë Parlamentare të OSBE-së.

 

 

Drejtor i UNHCR-it për Evropë arrin nesër për vizitë triditore në Kosovë

 

Prishtinë 22, shkurt 2003 - Raymond Hall, drejtor i UNHCR-it për Evropë arrin nesër, më 23 shkurt, për vizitë triditore në Kosovë. Vizita e parë e z. Hall në regjion ka për qëllim njohjen dhe vendosjen e kontakteve me përfaqësues të organizatave ndërkombëtare dhe autoriteteve lokale, e po ashtu njohjen e realitetit të përditshëm në terren.

Po ashtu drejtor i UNHCR-it do të ketë një sërë takimesh me zyrtarë të lartë të hënën dhe të martën, si me kryeministrin Bajram Rexhepi, zëvendëskryeadministratorin Çarlls Brajshou dhe me zyrtarë të tjerë.

Vizita do të përfshijë edhe udhëtime terreni në rajonin e Prishtinës për të parë se cila është gjendja e serbëve të Kosovës; në Gjilan për të takuar të kthyerit romë dhe shqiptarë, ndërsa në rajonin e Mitrovicës, z. Hall, do të vizitojë familjet e zhvendosura ashkali, të cilët kohët e fundit janë kthyer në Vushtrri.

 

 

Gjingjiq: Beogradi do të mbështesë formimin e një shteti të vogël serb në Kosovë...

 

Londër, 22 shkurt 2003 - Kryeministri serb Zoran Gjingjiq ka deklaruar se Beogradi do të mbështesë formimin e një shteti të vogël serb në Kosovë nëse Perëndimi pengon kthimin e forcave serbe në Kosovë, e të cilat do të siguronin kthimin e serbëve atje.

 

Gjingjiq në një intervistë për gazetën britanike "Tajms" ka akuzuar institucionet ndërkombëtare në Kosovë se po krijojnë një shtet plotësisht të pavarur të Kosovës.

 

"Propozimi im është që serbëve të Kosovës t'u jipen të drejtat kushtetuese dhe mjetet institucionale për mbrojtjen e interesave të tyre". "Hapi i parë do të ishte që serbët të njihen si kroatët në Federatën e Bosnjës e Hercegovinës", duke shtuar se serbë në Kosova ka 18 për qind.

 

 

Akademia e Kosovës dhe Akademia e Shqipërisë nënshkruan marrëveshjen për bashkëpunim

 

Prishtinë, 22 shkurt 2003 - Akademia e Shkencave dhe Arteve të Kosovës dhe Akademia e Shkencave e Shqipërisë nënshkruan dje në Prishtinë një marrëveshje për bashkëpunim kërkimor shkencor ndërmjet dy akademive.

 

Protokolli i këtij bashkëpunimi u nënshkrua nga dy nënkryetarët e këtyre institucioneve Besim Bokshi për Kosovën dhe Luan Omari për Shqipërinë.

 

 

Anëtarët e Kryesisë së LDK-së do të marrin pjesë në tubimet me anëtarët dhe simpatizantë të kësaj partie në Gjermani

 

Shtutgart, 22 shkurt 2003 - Nimon Alimusaj e Agim Krasniqi, anëtarë të Kryesisë qendrore të LDK-së ndodhen në Gjermani. Në bazë të programit të punës së Degës së LDK-së në Gjermani gjatë këtij uikendi janë paraparë të mbahen tubime me anëtarësi dhe simpatizantë të kësaj partie.

 

Dje (e shtunë) në Frankfurt u mbajt mbledhja e kryesisë së Degës së LDK-së si dhe dy tubime tjera me anëtarësinë e gjerë, njëri në Frankfurt e tjetri në Hannover, në të cilat morën pjesë edhe Nimon Alimusaj e Agim Krasniqi, anëtarë të Kryesisë së LDK-së dhe deputetë të Parlamentit të Kosovës.

 

Mysafirët nga Kosova sot do të marrin pjesë në tubimet me anëtarë e simpatizantë të LDK-së në Wuppertal (ora 12) dhe Kircheim/Teck (ora 13).

 

 

KKSHA-ja organizon Seminar Karriere per studentët shqiptarë dhe shqiptaro-amerikanë

 

Uashington, 22 shkurt 2003 - Këshilli Kombëtar Shqiptaro-Amerikan (KKSHA) do të organizojë një seminar karriere për studentët shqiptarë dhe shqiptaro-amerikanë për t'u dhënë atyre informacione mbi mundësitë e ndryshme për punësim dhe shkollim pasuniversitar gjatë kësaj periudhe ekonomike tepër të vështirë, u bë e ditur në një njoftim për shtyp që kjo organizatë publikoi kohët e fundit.

Seminari i karrierës, i pari i këtij lloji në komunitetin shqiptaro-amerikan, do t'u ofrojë pjesëmarrësve mundësi bashkëbisedimi dhe diskutimi të drejtpërdrejtë me profesionistë të shquar nga fusha të ndryshme dhe studentë të sapodiplomuar që kanë arritur të përmbushin me sukses qëllimet e tyre të punësimit.

Seminari do të mbahet më 7 mars 2003 në ndërtesën "Vertical" të kolegjit "Baruch", që ndodhet ne adresen One Baruch Way/55 Lexington në Manhattan. Pjesëmarrja në seminar eshte falas per selin që është student në universitet apo shkolla pasuniversitare, apo sapo është diplomuar.

 

Ata qe duan te marrin pjese ose te mesojne me teper mbi seminarin e karrieres duhet te konfirmojne pjesmarrjen duke kontaktuar menjehere zyren e KKSHA-se ne New York ne tel: 212-239-6807, ose e-mail: altin@naac.org.

 

 

Në Podujevë, Vushtrri dhe Skënderaj edhe dje u kërkua lirimi i të arrestuarve nga gjykata e Hagës

 

Vushtrri, 22 shkurt 2003 - Në disa qendra të Kosovës janë mbajtur dje sërish protesta kundër arrestimeve të ish-luftëtarëve të UÇK-së. Mijëra qytetarë kanë protestuar në Vushtrri. Protestuesit mbanin në duar parulla në të cilat thuhej: "UÇK-ja nuk është kriminale", "Mos i kriminalizoni çlirimtarët", "Beogradi urdhëron - UNMIK-u ekzekuton".

 

Oratorët i kanë cilësuar arrestimet me prapavijë politike. Madje në grup i protestuesve në shenjë revolte për arrestimin e Fatmir Limajt dhe të bashkëluftëtarëve të tij nga Tribunali i Hagës, protestuesit në Vushtrri bllokuan dje magjistralën Prishtinë - Mitrovicë për rreth 30 minuta.

 

Ky grup nuk i ka përfillur urdhërat e organizatorëve dhe ka gjuajtur me gurë një veturë të policisë së UNMIK-ut, duke ia thyer dritaret. Forcat e rendit i kanë shtuar masat e sigurisë, ndërkaq protesta përfundoi në mënyrë të qetë.

Një protestë e ngjashme është mbajtur edhe në Skënderaj dhe Podujevë. Në të gjitha këto protesta u kërkua nga Tribunali i Hagës që të lirohen të akuzuarit për krime lufte dhe të mbrohen vlerat e UÇK-së.
Protestuesit në Podujevë paralajmëruan një protestë tjetër të premtën e ardhshme.

 

 

Tetë sekretarët e ministrive të Qeverisë së Kosovës udhëtojnë në Romë të Italisë

 

Prishtinë, 22 shkurt 2003 - Sekretari i Zyrës së kryeministrit së bashku me tetë sekretarët e ministrive të tjera të Qeverisë së Kosovës sot do të udhëtojnë në Romë të Italisë, ku do të marrin pjesë në një seminar pesë ditësh që ka për qëllim rrijtjen e aftësive të menaxhmentit.

 

 

Surroi thotë se nuk ka rregull e rend në trajtimin e qytetarëve në Koosvë

 

Prishtinë, 22 shkurt 2003 - Botuesi i gazetës "Koha ditore" Veton Surroi tha për BBC-në se arrestimet e fundit në Kosovë si dhe ai i Fatmir Limajt, me urdhër të Gjykatës Ndërkombëtare të Hagës, provojnë se nuk ka rregull e rend në trajtimin e qytetarëve.

 

 

Ali Ahmeti thotë se AKSH-ja është luftë psikologjike dhe nuk sheh ndonjë rrezik prej saj

 

Shkup, 22 shkurt 2003 - Kryetari i PDI-së Ali Ahmeti tha se jetësimi i Marrëveshjes së Ohrit është bazë për stabilitetin e Maqedonisë. Duke iu përgjigjur një pyetjeje nëse sheh rrezik për koalicionin qeveritar nga një organizatë e quajtur Armata Kombëtare Shqiptare, z. Ahmeti tha se kjo është luftë psikologjike dhe se nuk sheh ndonjë lloj rreziku prej saj.

 

Ai e vlerësoi takimin me kryeministrin Branko Cërvenkovski, ku është biseduar për zbatimin e Marrëveshjes së Paqes dhe mbarëvajtjen e koalicionit qeveritar. Po kështu është shprehur mbështetje e qartë për luftën kundër krimit të organizuar dhe korrupsionit. Z. Ahmeti nuk dha ndonjë hollësi për këtë takim të parë publik në mes tij dhe kryeministrit Cërvenkovski.

 

 

Bliks i ka dërguar një ultimatum Irakut të fillojë shkatërrimin e armëve deri më një mars

 

Nju Jork, 22 shkurt 2003 – Në një kohë që Uashingtoni ka shpallur se mbi 200 mijë trupa janë të gatshëm në vend që të godasin Bagdadin, kryeinspektori i Kombeve të Bashkuara për armë, Hans Bliks, i ka dërguar një ultimatum Irakut, me të cilin urdhëron atë të fillojë shkatërrimin e armëve të ndaluara deri më një mars, njofton AFP.

 

Irakut iu dha një javë afat për të provuar vullnetin e mirë për të përmbushur kërkesat e Kombeve të Bashkuara për çarmatim dhe konsiderohet se është një test vendimtar për të vërtetuar pohimet e burimeve diplomatike në Bagdad se "Iraku është i gatshëm t'u përgjigjet të gjitha kërkesave të Bliksit".

 

 

Pauell ka arritur në Japoni dhe ky është fillimi i një turneu të tij në tri vende të Azisë

 

Tokio, 22 shkurt 2003 – Sekretari amerikan i Shtetit, Kolin Pauell, ka arritur në Japoni dhe ky është fillimi i një turneu të tij në tri vende të Azisë, gjatë të cilit pritet të dominojnë tensionet e vazhdueshme ndërmjet SHBA-ve dhe Koresë së Veriut, njofton BBCWorld.

 

Gjatë kësaj vizite, Pauell pritet të shpallë vazhdimin e ndihmave ushqimore për këtë shtet të varfër komunist. Dërgesat ushqimore qenë ndalur tre muaj më parë për shkak të punës së fabrikës bërthamore në Penian.

 

Z. Pauell do të zhvillojë bisedime me liderët e Japoniasë, Kinës dhe Koresë së Jugut, të cilat pritet të përqendrohen në kundërshtimin e Uashingtonit të programeve të armëve të Koresë së Veriut dhe të Irakut.

 

 

R. Prodi: Vendet që duan të përfshihen në BE sigurinë ta trajtojnë me SHBA-të

 

Shkup, 22 shkurt 2003 - Komesioneri i Bashkimit Evropian Romano Prodi ka tërhequr vëmendjen se vendet që duan të përfshihen në Bashkimin Evropian, nuk mund të ndajnë të njëjten ekonomi me BE-në dhe problemet e sigurisë t'i trajtojnë me Shtetet e Bashkuara. "Ne jemi ata të së njëjtës zonë: bashkimi është bashkim, ashtu si familja është familje", ka thënë Prodi.

Ai i bëri këto deklarata gjatë vizitës së djeshme në Shkup. Prodi i është referuar letrës së dhjetë vendeve të Evropës Lindore që kanë shprehur mbështetjen e tyre për qëndrimin e Uashingtonit ndaj Bagdadit.

 

 

Britania dhe Franca kanë një plan të përbashkët për misionin paqeruajtës në Bosnjë

 

Bruksel, 22 shkurt 2003 - Britania dhe Franca do të sjellin për diskutim në Bashkimin Evropian një plan të përbashkët për të marrë përsipër drejtimin e misionit paqeruajtës në Bosnjë.

 

Plani do të paraqitet nga shefat e diplomcisë britanike dhe franceze, përkatësisht Xhek Strou dhe Domenik dë Vilpen, edhe si shenjë se pavarësisht dallimeve mbi Irakun, nuk mungon bashkëpunimi franko-britanik në shumë fusha.

 

 

Edi Rama i mirëpret hetimet nga prokuroria

 

 

Uashington, 22 shkurt 2003 - Kryetari i Bashkisë së Tiranës, Edi Rama tha se prokuroria bën mirë që kontrollon aktivitetin e tij, por la të kuptohej se nuk ka vjedhur kurrë gjatë punës së tij.

 

Në një intervistë për "Zërin e Amerikës", zoti Rama foli për debatet që po zhvillohen dhe tha se është kundër ngritjes së një komisioni parlamentar për të kontrolluar punën e tij.

 

 

BE-ja më 15 mars pritet të marrë nga NATO-ja misionin paqësor në Maqedoni

 

Bruksel, 22 shkurt 2003 - Bashkimi Evropian planifikon që më 15 mars të këtij viti ta marrë nga NATO-ja misionin paqësor në Maqedoni, bëri të ditur në Bruksel përfaqësuesi grek në BE, Aristidis Agatoklis. Sipas tij, për momentin nuk ekzistojnë pengesa, për shkak të të cilave misioni mund të shtyhet.

 

Ndërkaq, zëdhënësi i NATO-s në Bruksel, ka theksuar se tani për tani nuk është arritur marrëveshje për datën konkrete të ndërmarrjes së misionit, por se përgatitjet për këtë po zhvillohen sipas planit.

 

 

Takim i Ministrave të Mbrojtjes dhe të Punëve të Brendshme të Maqedonisë dhe të Shqipërisë

 

Shkup, 22 shkurt 2003 - Ministri i Mbrojtjes i Maqedonisë, Vllado Buçkovski, sot në Pogradec do të takohet me homolugun e tij shqiptar Pandeli Majko. Njëkohësisht, ministri i Punëve të Brendshme, Hari Kostov, sot në Ohër do të realizojë takim me kolegun e tij shqiptar.

Në takim, mes tjerash, do të bisedohet për informatat për involvim të shtetasve të huaj në AKSH, përkatësisht në strukturat e Frontit për bashkimin kombëtar të shqiptarëve.

Siç është paralajmëruar, nesër pasdite në Pogradec do të mbahet takim i përbashkët i ministrave të Mbrojtjes dhe Punëve të Brendshme të Maqedonisë dhe Shqipërisë.

 

 

Iraku ka ofruar mundësinë për të hapur dialog me Shtetet e Bashkuara

 

Bagdad, 22 shkurt 2003 - Iraku ka ofruar mundësinë për të hapur dialog me Shtetet e Bashkuara dhe është i gatshëm të fillojë marrëdhëniet ekonomike.

 

Për këtë është kërkuar që Uashingtoni të heqë dorë nga "ndërhyrjet në punët e brendshme". Kjo është bërë e ditur dje nga zëvendëspresidenti irakian, Taha Jasin Ramadan.

 

 

Turqia dhe Shtetet e Bashkuara janë afër një marrëveshjeje

 

Ankara, 22 shkurt 2003 - Turqia dhe Shtetet e Bashkuara janë fare pranë një marrëveshjeje për vendosjen e trupave amerikane në Turqi, si pjesë e përgatitjeve për një luftë të mundshme në Irak. Kjo është deklaruar nga ministri i jashtëm turk, Jasir Jakis.

 

Turqia kërkon garanci financiare me shkrim nga Shtetet e Bashkuara, për të përballuar humbjet ekonomike të shkaktuara nga një luftë në Irak, vend fqinj me Turqinë.

 

 

Bler ka biseduar në Romë me homologun e tij, Berluskoni

 

Romë, 22 shkurt 2003 - Kryeministri britanik, Toni Bler, ka diskutuar në Romë me homologun e tij italian, Silvio Berluskoni, krizën në Irak. Bler tha se lufta në Irak është moralisht e justifikueshme. "Nëse i lihen Sadam Hyseinit armët e tij kimike, biologjike e bërthamore, atëherë lidhja mes tyre dhe terrorizmit botëror është shumë e dukshme.

 

Dhe sa i përket popullit të Irakut, nëse i lini atje këto armë, mund të merrni me mend se cfarë mizerje, vdekje dhe represioni, ai është në gjendje të ushtrojë mbi ta", tha Bler.

Ndërsa homologu i tij italian, Silvio Berluskoni, duke folur për terrorizmin nënvizoi se "shërbimet tona sekrete kanë njoftuar se ka shumë gjasa që Al-Kaida po përgatit një sulm tjetër, shumë më të tmerrshëm se ato të 11 shtatorit".

 

 

Një shpërthim zjarri ka përfshirë një rafineri nafte në Nju Jork

 

Nju Jork, 22 shkurt 2003 - Një shpërthim zjarri ka përfshirë një rafineri nafte në Staten Island, në Nju Jork. Nuk dihen ende arsyet e qarta të zjarrit, megjithatë është përjashtuar mundësia e një atentati terrorist. ExxonMobil, kompania së cilës i përkiste rafineria në fjalë, ka njoftuar se 2 vetë mungojnë dhe një punonjës është plagosur.

 

 

Numri i viktimave në ujdhesën Roud ka arritur në 96

 

Roud, 22 shkurt 2003 - Numri i viktimave ka arritur në 96, ndërsa i të lënduarve në mbi 200, si pasojë e zjarrit të mbrëmshëm në një lokal nate në ujëdhesën Roud në Shtetet e Bashkuara.

 

 

Pauell: Uashingtoni do të vendoste një administratë ushtarake në Irak

 

Uashington, 22 shkurt 2003 - Sekretari amerikan i Shtetit, Kolin Pauell, tha se Shtetet e Bashkuara kanë në plan të vendosin një administratë ushtarake në Irak, nëse Sadam Huseini përmbyset nga pushteti.

 

Ai tha se roli i komandantit ushtarak do të ishte të garantojë sigurinë e vendit pas veprimeve ushtarake, të mbrojë popullit irakian dhe të mbikëqyrë shpërndarjen e ndihmës humanitare.

 

Mirëpo, ai theksoi se pushteti do t'i kalohej një udhëheqjeje të re civile irakiane sa më shpejt që të ishte e mundur. Ai hodhi poshtë kritikat se Shtetet e Bashkuara kërkojnë ta pushtojnë Irakun, duke vënë në dukje se Amerika nuk ka pushtuar Kuvajtin dhe as Afganistanin pas veprimeve ushtarake në këto vende.

 

Zoti Pauell tha se një fushatë ushtarake kundër Irakut dhe përmbysja e Sadam Huseinit nga pushteti do të kishin pasoja pozitive për popullin irakian.

 

 

Vendet e painkuadruara kundër luftës në Irak

 

Kuala Lampur, 22 shkurt 2003 - Vendet e painkuadruara përmes një projekt vendimi janë deklaruar kundër luftes në Irak. Duhet të shfrytëzohen të gjitha mjetet për zgjidhjen paqesore të konfliktit në projektin e përgatitur nga diplomatët e 114 vendeve anëtare.

 

Projektin do ta konfirmojë nesër ministria e jashtme kurse të hënën, do të dekretohet në konferencen e vendeve të painkuadruara.

 

 

Udhëheqja palestineze për heqje dorë nga dhuna kundër Izraelit

 

Moskë, 22 shkurt 2003 - Udhëheqja palestineze ka për apel për heqje dorë për një vit të tërë nga dhuna e armëve në luften kundër Izraelit. Përfaqësuesi i presidentit palestinez Jaser Arafat, Mahmud Abas, tha në Moskë se aktualisht do të zbatohen të gjitha mjetet veprimet luftarake. Kësaj do t'i ndihmonte plani paqesor i ndërmjetësuesve të Kuartetit SHBA, Rusisë, BE dhe KB.

Copyright©2000-2003 Trepca.net - Të gjitha të  drejtat e rezervuara.