Lajme

E premte, 21 shkurt 2003

Përmbajtja:

• Shtajner thotë se Kosova po shkon drejt "autonomisë thelbësore"

• Gjilani shfuqizon vendimin për inkasimin e tatimit në pronë për vitin 2002

• Nuk mjafton vetëm një endërr e mirë për t`u bërë dikush kryeshef, thotë Lutfi Haziri

• Majkëll Verlling emërohet administrator në Prizren

• Një delegacion i Degës së LDK-së në Gjermani bisedoi me deputetët gjermanë

• Në Kosovë do të kremtohet 125-vjetori i Lidhjes Shqiptare të Prizrenit

• Gjilan: Vdiq "plaku i flamurit", Bajram Ymeri

• Gjilan: Komiteti për banim miratoi rregulloren për mbikëqyrjen dhe mirëmbajtjen e banesave

• "Grupi i Llapit" akuzohet për rrëmbimin, torturimin dhe vrasjen e 6 shqiptarëve gjatë '98-'99

• Në Malishevë dhe Deçan kanë protestuar mijëra qytetarë

• Ivanoviq ka parlajmëruar për të martën formimin e kuvendit tw bashkësive të komunave serbe në Kosovë

• Vula e dyllit e Skërnderbeut, e cila ndodhet në Danimarkë, do të ekspozohet në Tiranë

• Romano Prodi foli në parlamentin e Maqedonisë

• Ilir Meta do të vizitojë Turqinë

• Një vizitë e mundshme e deputeteve shqiptare të Kosovës në Beograd - model i hapjes së dialogut

• Ndërmjetësues i KB ndërmjet Maqedonisë dhe Greqisë arrin në Shkup

• Buxheti i Maqedonisë për këtë vit do të jetë për 9,6 për qind më i vogël

• Cërvenkovski dhe Ahmeti u shprehën për implementimin e tërësishëm të Marrëveshjes kornizë të Ohrit

• Komuniteti ndërkombëtar, i shqetësuar për situatën e tensionuar në Luginën e Preshevës

• Amerika shtyn afatin për ndihmën serbe

• Numri i viktimave në klubin e natës në ujëdhesën Roud ka arritur në 39 të vdekur dhe mbi 165 të lënduar

• Mbesin të hapura edhe disa pika negociatash mes Ankarasë e Uashingtonit

• Paris: Përdorimi i dhunës guxon të jetë vetëm mjeti i fundit

• U bëhet thirrje palestinezëve dhe izraelitëve për një armëpushim të menjëhershëm dhe të qëndrueshëm

• Nga një zjarr në një klub nate kanë humbur jetën të pakten 10 vetë

• Bush: Besimi në vetpërmbajtjen e Sadam Huseinit nuk është alternativë

• Amerika pret vendimin e Turqisë

• Al-Baradai viziton Iranin

• Ivanov thotë se ndaj inspektorëve të KB-ve po bëhen presione që të largohen nga Iraku

• Në SHBA janë akuzuar 8 persona për mbështetje të një grupi terrorist palestinez

Shtajner thotë se Kosova po shkon drejt "autonomisë thelbësore"

 

Beograd, 21 shkurt - "Kosova po shkon atje ku do të duhej të shkonte. Kjo domethënë drejt autonomisë thelbësore, e me qëllim të vendosjes së autonomisë thelbësore nevojitet që të kemi institucionet", deklaroi kryeadministratori i Kosovës Mihael Shtajner për një radio të Beogradit.

 

"Atyre institucioneve u nevojitet që të marrin sa më shumë kompetenca, por kjo nuk është pavarësia", thotë Shtajner dhe thekson se kjo është e paraparë me rezolutën 1244 dhe se ky është mandati i tij.

 

 

Gjilani shfuqizon vendimin për inkasimin e tatimit në pronë për vitin 2002

 

Gjilan, 21 shkurt - Komiteti për politikë dhe financa në Gjilan, në mbledhjen e fundit, që e ka kryesuar Xhemajl Hyseni, zëvendëskryetar i komunës, ka shfuqizuar vendimin e mëhershëm për inkasimin të pjesërishëm të tatimit në pronë, për vitin 2002.

Ministria e Ekonomisë dhe Financave ia kishte tërhequr vëmendjen komunës së Gjilanit se faturimi i pjesërishëm i tatimit në pronë, është joligjor dhe në fakt cenon parimet bazë të legjislacionit tatimor, i cili kërkon implementimin e plotë dhe të drejtë të taksës së detyruar.

Z. Hyseni, duke e paraqitur në Komitetin për politikë dhe financa propozimin për shfuqizimin e këtij vendimi, ka sqaruar se sugjerimet e Ministrisë së Ekonomisë dhe Financave janë që në Gjilan të fillohet me inkasimin e tatimit në pronë, nga viti 2003 dhe në këtë proces të përfshihen të gjithë qytetarët.

Një sugjerim të njëjtë për anulim të rekomandimit të mëparshëm të Komitetit për politikë dhe financa e kishte shprehur edhe stafi udhëheqësi i tatmit në pronë, duke kërkuar një mobilizim më të madh rreth grumbullimit të tatimit për vitin 2003, meqenëse Gjilani ishte goditur në vitin 2002 nga fatkeqësia e natyrës, e cila la pasoja të mëdha në infrastrukturë.

 

 

Nuk mjafton vetëm një endërr e mirë për t`u bërë dikush kryeshef, thotë Lutfi Haziri

 

Gjilan, 21 shkurt - Edhe pas rizgjedhjes së z. Enver Muja për kryshef të komunës, në Gjilan vazhdojnë komentet për dhe kundër procesit të emërimit të tij nga Kuvendi komunal, në këtë post, për të cilin kishin konkurruar edhe pesë kandidatë të tjerë.

 

Kryetari i komunës, Lutfi Haziri, në një koment që bëri sot para gazetarëve, rreth kësaj çështjeje, tha se nuk mjafton vetëm një ëndërr e mirë e dikujt që të bëhet kryeshef. Nuk mund të bëhet dikush kryeshef vetëm pse ka dëshirë, ose vetëm pse ka parë endërr se mund të bëhet dhe as nuk mund të bëhet në këtë mënyrë dikush tjetër kreator i politikës në Gjilan, nëse nuk është mandatuar nga vota, ka thënë Lutfi Haziri.

Ai i ka komentuar para gazetarëve edhe paralajmërimet për ndërhyrje të Serbisë në rrjetin energjetik të Kosovës, në rajonin e Gjilanit dhe ka thënë se kjo nuk do të lejohet në asnjë mënyrë në Gjilan. "Ne do të bëjmë çmos që t`i pengojmë këto tendenca të distribucionit të Serbisë", ishte kategorik Haziri.

Në lidhje me këtë problem, i cili mund ta sjellë Gjilanin në një pozitë kundërshtimi më të ashpër, nëse nuk pengohet nga strukturat ndërkombëtare, administratori Bob Simons tha se zyrtarët e UNMIK-ut kishin biseduar me përgjegjësit e distribucionit të Serbisë dhe ata kishin mohuar t`iu kenë bërë apel serbëve lokalë në Kosovë për të mos i paguar faturat e rrymës, përderisa ka sqaruar se ekziston një marrëveshje për mirëmbajtje të rrjetit.

 

 

Majkëll Verlling emërohet administrator në Prizren

 

Podujevë, 21 shkurt – "Në konsultim me administratorin rajonal të Prishtinës z. Zhan Ginar jam caktuar në detyrë të re – administrator për komunën e Prizrenit", njoftoi sot z. Majkëll Verling i cili tash 2 vjet e gjysmë kreu detyrën e administratorit të UNMIK-ut në Podujevë.

 

Për z. Verling Podujeva do të mbetet pjesë e jetës së tij për shkak të përmirësimit të situatës, problemeve që i zgjodhëm dhe sukeseve të arritura, tha ai. Një ndër të arriturat më të mëdha gjatë mandatit të tij z. Verling përmend funksionimin e plotë të komunës.

 

"Ne bashkërisht kemi arritur të bëjmë atë që ka lejuar gjendja financiare edhe pse ka për t'u bërë shumë në të ardhmen", deklaroi Verling duke pohuar se kjo do të arrihet me vullnetin e mirë të njerëzve dhe përpjekjet e përbashkëta.

Verling njoftoi se administrator i ri i komunës së Podujevës do të jetë zëvendësi i tij, pakistanezi Shahzad Khan Bangash.

 

 

Një delegacion i Degës së LDK-së në Gjermani bisedoi me deputetët gjermanë

 

Berlin, 21 shkurt - Një delegacion i Degës së LDK-së në Gjermani, me ftesë të deputetes Ute Zapf, zhvilloi një takim me deputetët gjermanë: Ursula Mogg, Detlef Dzembritzki, ish-deputeti dhe miku i shqiptaräve Peter Reuschenbach, Slaveia Köpke, Barbaros Kayalar, Frank Schauff, Harald Berwanger, Martin Weiss, Reinhold Sohns, përfaqësues të Komisionit për politikë të jashtme në Bundestagun gjerman.

 

Delegacinin e LDK-së e kryesonte Hafiz Gagica, kryetar i Kolegjiumit të degëve dhe anëtar i këshillit të përgjithshëm të LDK-së, i shoqëruar nga Nezir Fejza dhe Teki Tema, anëtarë të kryesisë së Degës.

Z.Gagica fillimisht bëri një përshkrim të shkurtë të historikut dhjetëvjeçar që përjetuan shqiptarët nën represion dhe apartheidin millosheviqian dhe luftën e cila solli pasoja të mëdha në njerëz dhe infrastrukturë, si dhe njoftoi se mbi 3500 shqiptarë edhe pas tre vjet e gjysmë pas luftës ende nuk janë gjetur.
Megjithatë Kosova në këto tri vjet e gjysmë lirie me ndihmën e bashkësisë ndërkombëtare ka ndërtuar dhe rindërtuar vendin. Poashtu Kosova ka pasur tri palë zgjedhje të lira e demokratike dhe ka krijuar institucionet e saja, tha Gagica.

 

Ai shtoi se Kosova është përcaktuar për zhvillimin e demokracisë dhe kërkon njohjen e pavarësisë së saj, sepse një Kosovë e pavarur do të qetësonte fqinjët dhe rajonin. Gjithashtu ai tha se janë bërë përparime të mëdha edhe në integrimin e minoritetve në shoqërinë kosovare, dhe tani ka lëvizje të lira të qytetarëve.

 

Serbët kryesisht janë integruar në të gjitha institucionet e Kosovës, por fatkeqësisht ata në të shumtën e rasteve po instrumentalizohen nga politika e Serbisë, e cila për interesa të ngushta politike vazhdon t'i keqpërdorë serbët e Kosovës. Por, tha Gagica, problem në vete është pjesa veriore e Mitrovicës, të cilën ekstremistët serbë, të nxitur nga Beogradi, po e mbajnë situatën e tensionuar.

Gagica në vazhdim ftoi që një delegacion i Parlamentit gjerman të vizitojnë Kosovën dhe për së afërmi të njihen me realititin e krijuar në Kosovë. Njëkohësisht Gagica tha se me interes të veçantë do të ishte që të ftohen përfaqësuesit e institucioneve kosovare në Gjermani.

Pastaj nga të pranishmit u shtruan shumë pyetje me interes lidhur me situatën aktuale në Kosovë, në të cilat u përgjegj Hafiz Gagica, i cili kërkoi që të nxiten investitorët gjermanë për investuar në Kosovë dhe falënderoi qeverinë gjermane për fillimin e dhënies së vizave për qytetarët e Kosovës.

 

 

Në Kosovë do të kremtohet 125-vjetori i Lidhjes Shqiptare të Prizrenit

 

Prishtinë, 21 shkurt - Me rastin e 125-vjetorit të Lidhjes Shqiptare të Prizrenit, në muajin qershor do të mbahen manifestime të shumta në Kosovë, për nder të këtij jubileu të një nga ngjarjet më të rëndësishme të historisë shqiptare.

 

Kremtimi i këtij përvjetori do të mbahet nën patronazhin e Presidentit të Kosovës Ibrahim Rugova, bëri të ditur ministri i kulturës Behxhet Brajshori, i cili njoftoi se tashmë është formuar Këshilli prej 12 anëtarësh për kremtimin e këtij përvjetori.

 

Për nder të këtij përvjetori do të mbahet një manifestim qendror mbarëkombëtar, një konferenecë shkencore dhe maniffestime të ndryshme kulturore. Manifestimet kryesore do të mbahen në Prishtinë dhe në Prizren.

 

 

Gjilan: Vdiq "plaku i flamurit", Bajram Ymeri

 

Gjilan, 21 shkurt - Pas një sëmundje të gjatë, në Gjilan vdiq në moshën 82-vjeçare Bajram Ymeri nga Llovca, i njohur në popull si "plaku i flamurit".

Tërë jetën e tij, Bajrami nuk u nda nga rruga e rezistencës për liri e pavarësi, duke qenë gjithnjë atje ku sfidohej dhuna dhe terrori i pushtetit serb kundër popullit shqiptar të Kosovës, bashkë me flamurin shqiptar, pa të cilin nuk e bëri asnjë hap, herë duke e bartur lart në supe e ndonjëherë duke u mbështjellur me të.

 

Xha Bajrami, ose axha Balë, siç e quanin të gjithë, ishte dhe do të mbetet në kujtesën e gjilanasve për energjinë pozitive që reflektoi nëpër debate e tubime si dhe për qëndresën e madhe, me të cilën e përballoi dhembjen familjare e kolektive, që ia solli tmerri i luftës së vitit 1999 në Kosovë.

Mjaftonte të ndihej një zë i arsyeshëm kundër dhunës, në cilindo pjesë të Kosovës dhe "plaku rinor", pa hezitim do t`i gjendej përkrahë menjëherë.

Kaptinë e veçantë e jetës së tij, ishte dashuria për librin, shkollën dhe shoqërimi me të rinjtë. (I.M.)

 

 

Gjilan: Komiteti për banim miratoi rregulloren për mbikëqyrjen dhe mirëmbajtjen e banesave

 

Gjilan, 21 shkurt - Komiteti për banim i Kuvendit të komunës në Gjilan ka miratuar një rregullore për mirëmbajtjen e ndërtesave komunale, përkatësisht të banesave, lokaleve dhe garazhave.

Rregullorja parasheh mënyrën e qeverisjes së këtyre objekteve dhe shpenzimet e mirëmbajtjes.

Administratori komunal, Bob Symons theksoi se kjo rregullore është e një rëndësie të veçantë, sepse dëshmon se, më në fund, Sektori i Banimit është themeluar dhe funksionon si duhet dhe se çështja e banimit është me rëndësi të veçantë për komunën dhe për qytetarët e Gjilanit. (I.M.)

 

 

"Grupi i Llapit" akuzohet për rrëmbimin, torturimin dhe vrasjen e 6 shqiptarëve gjatë '98-'99

 

Prishtinë, 21 shkurt - Rrustem Mustafa - Remi, Latif Gashi, Nazif Mehmeti dhe Naim Kadriu, pjesëtarë të të ashtuquajturit "Grupi i Llapit", të gjithë ish-pjesëtarë të Ushtrisë Çlirimtare të Kosovës, akuzohen se kanë kryer vrasje gjatë periudhës së vitit 1998-1999, kanë mbajtur dhe torturuar në mënyrë të paligjshme disa persona të tjerë. Të akuzuarit kanë mohuar aktakuzën, ndërkohë që njëri prej tyre, Latif Gashi, ka thënë se tërë ky proces gjyqësor është i montuar.

Aktakuza e ngritur nga Prokurori Ndërkombëtar Geri Mekuik, ish-pjesëtarët e UÇK-së, përveç rrëmbimit, mbajtjes së paligjshme dhe torturave, i ngarkon edhe me vrasje. Sipas aktakuzës, nga 12 gushti i vitit 1998 deri më 12 qershor të vitit 1999 komanda e UÇK-së e Zonës Operative të Llapit në 5 qendra paraburgimi në Bajgorë, Llapashticë, Majac, Koliq dhe Potok kanë mbajtur në mënyrë të paligjshme, torturuar dhe në disa raste edhe vrarë, në ose rreth këtyre qendrave, civilë shqiptarë.

Aktakuza i ngarkon për vrasjen e gjashtë shqiptarëve: Sadik Berishës, Drita Bunjakut, Agim Musliut, Alush Kastartit, Idriz Sfarçës dhe Ethem Jasharit.

Të akuzuarit kanë mohuar në tërësi aktakuzën. Ata në fazën e hetuesisë kanë thënë se ka pasur raste të paraburgimit. Por, ata persona janë trajtuar mirë dhe asnjëri nuk është vrarë. Viktimat, sipas tyre, janë vrarë nga forcat serbe pas lirimit të tyre nga biseda informative nëpër qendrat e paraburgimit.

Latif Gashi e ka quajtur tërë procesin gjyqësor të montuar, që sipas tij ka për qëllim diskreditimin personal, të familjes së tij dhe luftës çlirimtare të UÇK-së. Ai këtë e arsyeton me faktin se mbi shumë dëshmitarë është bërë presion që të thonë të pavërteta për vetë Gashin dhe kolegët e tij. Aktakuza, sipas Gashit, është e pabazë, e përgjithësuar dhe pa fakte dhe si të tillë e hedh poshtë.

 

 

Në Malishevë dhe Deçan kanë protestuar mijëra qytetarë

 

Malishevë, Deçan 21 shkurt - Në Malishevë dhe Deçan, dje mijëra qytetarë kanë protestuar kundër arrestimit të Fatmir Limajt. Në protestat që janë mbajtur në vendlindjen e tij në Malishevë kanë marrë pjesë më se 7000 qytetarë duke mbajtur pankarta me mbishkrimet, "Liri për çlirimtarët" dhe duke brohoritur "UÇK, UÇK". Protestuesit e kanë bërë të qartë se të akuzuarin e Gjykatës së Hagës ata e konsiderojnë si hero të luftës.

 

 

Ivanoviq ka parlajmëruar për të martën formimin e kuvendit tw bashkësive të komunave serbe në Kosovë

 

Mitrovicë, 21 shkurt - Deputeti i Kuvendit të Kosovës, Oliver Ivanoviq ka parlajmëruar për ditën e martë një tubim të asaj që ai e quan kuvend i bashkësive të komunave serbe në Kosovë, ku përveç tjerëve do të ftoheshin edhe përfaqësues të bashkësisë ndërkombëtare dhe do të miratohej një deklaratë me të cilën do të hidhej poshtë deklarata e shqiptarëve për pavarësinë e Kosovës.

 

"Do të vëmë në dukje se çdo tentativë për rrënimin e sovranitetit dhe integritetit të shtetit mund të përfundojë vetëm me të drejtën legjitime për ta mbrojtur shtetin tonë", ka thënë Oliver Ivanoviqi.

 

 

Vula e dyllit e Skërnderbeut, e cila ndodhet në Danimarkë, do të ekspozohet në Tiranë

 

Tiranë, 21 shkurt - Vula e dyllit e Heroit Kombëtar Gjergj Kastrioti Skërnderbeu, e cila ndodhet në Muzeun Kombëtar të Danimarkës, me interesimin e Ministrisë së Punëve të Jashtme të Shqipërisë do të ekspozohet së shpejti në Muzeun kombëtar në Tiranë, si dhe në Muzeun Gjergj Kastrioti në Krujë.

Një vendim i tillë vjen pas takimit të zhvilluar mga ambasadori shqiptar në Danimarkë, Qemal Minxhozi me Kuratorin e Muzeut Kombëtar të Danimarkës, Peate Penz.

Kjo vulë është në gjendje shumë të mirë dhe të gjitha inicialet ishin shumë të qarta. Sipas z. Peate Pentz, vula mendohet të jetë derdhur në Gadishullin Italik, pasi kualiteti i derdhjes është shumë i lartë dhe i avancuar për t’u krijuar në vende të tjera të Evropës.

 

 

Romano Prodi foli në parlamentin e Maqedonisë

 

Shkup, 21 shkurt - Në Bashkimin Evropian nuk ekzistojnë probleme politike lidhur me ratifikimin e Marrëveshjes për stabilizim dhe asociim të Maqedonisë në BE, këtu bëhet fjalë për ngadalësim në procedurat parlamentare", deklaroi sot kryetari i Komisionit Evropian Romano Prodi, në fjalimin e tij në Parlamentin e Maqedonisë.

 

Prodi theksoi se me Marrëveshjen kornizë Maqedonia "me guxim ua ktheu shpinën konflikteve ndërkombëtare, ekstremizmit dhe nacionalizmit".

Dokumenti, sipas tij, është premtim për qetësim dhe stabilitet, por edhe shembull i rëndësishëm për atë se si bëhen kompromise për të mirën e të gjithëve.

Po sot Romano Prodi u shpall Profesor Nderi i shkencave ekonomike në Universitetin e Shkupit.

 

 

Ilir Meta do të vizitojë Turqinë

 

Tiranë, 21 shkurt - Me ftesë të ministrit të Punëve të Jashtme të Turqisë, Jashar Jakësh, ministri i Punëve të Jashtme, Ilir Meta, do të kryejë një vizitë zyrtare në Ankara, në datat 25-27 shkurt.
Gjatë kësaj vizite Ilir Meta do të pritet në takime të veçanta edhe nga Presidenti turk Ahmet Nexhdet Sezer dhe Kryeministri Abdullah Gyl.

Takimet do të përqëndrohen në vlerësimin e deritanishëm të marrëdhënieve mjaft të mira të bashkëpunimit dypalësh si edhe në gjetjen e rrugëve të reja për forcimin dhe zgjerimin e këtij bashkëpunimi në të gjitha fushat.

Kjo vizitë do të paraprijë dhe përgatisë vizitën zyrtare të Presidentit të Republikës, z. Alfred Moisiu, në Turqi, të planifikuar për më 13-14 mars.

 

 

Një vizitë e mundshme e deputeteve shqiptare të Kosovës në Beograd - model i hapjes së dialogut

 

Vjenë, 21 shkurt - Në një takim të shefave të delegacioneve serbe e gjermane në mbledhjen e asamblesë parlamentare të OSBE-së në Vjenë, Dragolub Miqunoviq e Rita Zysmuth, kanë rënë dakord se bashkëpunimi parlamentar do të ishte një nga modelet e hapjes së dialogut ndërmjet Beogradit e Prishtinës dhe të vendosjes së kontaktit serbo-shqiptar.

 

Hapi i parë do të ishte vizita e delegacionit të deputeteve shqiptare në Kuvendin e Kosovës në Beograd dhe një takim me deputetet e parlamentit federal serbo-malazez.

 

 

Ndërmjetësues i KB ndërmjet Maqedonisë dhe Greqisë arrin në Shkup

 

Shkup, 21 shkurt - Në Maqedoni sot arrin Metju Nimic, ndërmjetësues i Kombeve të Bashkuara në kontestin me emrin ndërmjet Maqedonisë dhe Greqisë.

Diplomati amerikan nesër do të ketë takim të përbashkët me presidentin Boris Trajkovski, me kryeministrin Branko Cërvenkovski dhe me shefen e diplomacisë së Maqedonisë, Ilinka Mitreva.

 

 

Buxheti i Maqedonisë për këtë vit do të jetë për 9,6 për qind më i vogël

 

Shkup, 21 shkurt - Buxehti i Republikës së Maqedonisë për këtë vit, do të jetë 67 miliardë denarë, që është për 9,6 për qind më i vogël në krahasim me vitin e kaluar.

Buxheti i këtillë i miratuar, i cili është harmonizuar me Fondin Monetar Ndërkombëtar do të parashtrohet në Kuvendin e Republikës së Maqedonisë gjatë disa ditëve të ardhshme bashkë me shumë ligje të tjera, të cilat zakonisht shkojnë bashkë në pako me buxhetin.

Deputetët do t'i shqyrtojnë edhe ndryshimet e Ligjit për Tatimin e Vlerës së Shtuar, i cili ka të bëjë me ndryshimet e shkallës, përkatësisht zvogëlimin e shkallës themelore prej 19 në 18 për qind dhe transferimin e një pjese më të madhe të prodhimeve nga pesë për qind në 18 për qind.

 

 

Cërvenkovski dhe Ahmeti u shprehën për implementimin e tërësishëm të Marrëveshjes kornizë të Ohrit

 

Shkup, 21 shkurt - Kryetari i Qeverisë së Maqedonisë dhe njëherit lider i LSDM-së Branko Cërvenkovski dje pasdite u takua me kryetarin e Bashkimit Demokratik për Integrim, Ali Ahmeti.
  

Në këtë takim është biseduar për funksionimin e Qeverisë së koalicionit në 100 ditët e para, si dhe për situatën aktuale politike, të sigurisë dhe ekonomike në vend.

Njëqind ditët e para nga funksionimi i Qeverisë së koalicionit edhe krahas situatës së trashëguar të vështirë ekonomike dhe të sigurisë në vend, janë vlerësuar si të suksesshme. Me këtë rast, u konstatua se bashkëpunimi rrjedh në nivel të kënaqshëm, ndërsa transferi i pushtetit në pjesën më të madhe ka përfunduar me sukses.

 
Cërvenkovski dhe Ahmeti e konfirmuan edhe vullneti fuqishëm i shprehur për implementimin e tërësishëm të Marrëveshjes kornizë.

Partnerët e koalicionit u pajtuan që gjatë periudhës së ardhshme, Qeveria t'i vazhdojë reformat dhe të përkushtojë vëmendje të posaçme në krijimin e klimës së volitshme për rritje të ekonomisë.
 

Gjatë takimit është shprehur "dënimi pa rezerv për çdo lloj të dhunës, pa dallim të prapavijës politike ose kriminele ose për çfarëdo aktivitete që çojnë në drejtim të destabilizimit të vendit", thuhet në një komunikatë nga ky takim.

 
Në takimin e tyre të parë, dy liderët e konfirmuan edhe përcaktimin e fuqishëm të përbashkët se interes prioritar dhe strategjik i Maqedonisë është bashkëpunimi dhe anëtarësimi në NATO dhe inkuadrimi në Bashkimin Evropian.

 

 

Komuniteti ndërkombëtar, i shqetësuar për situatën e tensionuar në Luginën e Preshevës

 

Beograd, 21 shkurt - Përfaqësues të misionit vëzhgues të Bashkimit Evropian, të OSBE-së dhe të NATO-s në vizituan të enjtën Beogradin në përpjekje për të qetësuar situatën e tensionuar në Luginën e Preshevës, të krijuar pas arrestimit të shtatë pjesëtarëve të ish- Ushtrisë Çlirimtare të Preshevës, Medvegjës dhe Bujaneci, të cilët janë akuzuar nga zyrtarët serbë për terrorizëm.

 

Ata biseduan me përfaqësuesit politikë të shqiptarëve dhe të serbëve dhe me shefin e trupit bashkërendues të shtetit për jugun e Serbisë, Nebojsha Çoviq.

Shefi i Misionit të OSBE-së në Beograd, Mauricio Masari në një konferencë për gazetarë, deklaroi se bashkësia ndërkombëtare dhe OSBE-ja do të bëjnë çmos për të frenuar krimin e organizuar dhe dhunën të cilat mund ta çregullojnë procesin paqësor në rajonin e Luginës së Preshevës.

Ai vuri në dukje se kriminaliteti do të sanksionohet kurse përparësitë e Kosovës këtë vit janë lufta kundër tregtimit ilegal të armëve, drogës dhe njerëzve. Sipas tij, OSBE-ja është e përkushtuar që para se gjithash të ndihmojë ekonomikisht rajonin e jugut të Serbisë.

Kryetari i trupit bashkërendues për jugun e Serbisë, Nebojsha Çoviq u ka thënë gazetarëve se kriminaliteti i organizuar që ka sjellë shkallëzimin e dhunës gjatë dhjetë ditëve të shkuara, është produkt i kohëve të kaluara. "Ne kemi program plotësisht konkret për integrimin e bashkësisë kombëtare shqiptare në të gjitha strukturat e shtetit të Serbisë", tha Çoviq pas takimeve.

 

Ndërkaq prefekti i Bujanocit, Nagip Arifi në konferencën e përbashkët për shtyp deklaroi se më 3 mars në Bujanoc do të mbahet konferenca ndërkombëtare e dhuruesve për Luginën e Preshevës.

 

 

Amerika shtyn afatin për ndihmën serbe

 

Uashington, 21 shkurt - Shtetet e Bashkuara kanë shtyrë datën që kishin caktuar për të vendosur nëse Serbia dhe Mali i Zi kanë bashkëpunuar sa duhet me krimet e luftës që të përfitojnë ndihmë amerikane.

 

Një zyrtar i Uashingtonit tha se data është shtyrë nga fundi marsit në mes të qershorit. Amerika kërkon që Serbia të dorëzojë disa të dyshimtë kryesorë për krime lufte pranë Gjykatës në Hagë, përfshi këtu dhe komndatin e forcave serbe të Bosnjës Ratko Mladiç.

 

 

Numri i viktimave në klubin e natës në ujëdhesën Roud ka arritur në 39 të vdekur dhe mbi 165 të lënduar

 

Uest Uaruik, 21 shkurt – Sipas njoftimeve më të reja të agjencive botërore të lajmeve numri i viktimave në klubin e natës në ujëdhesën Roud, ku gjatë një kopncerti të një rok grupi kishte shpërthyer zjarri herët në mëngjes (të premten), ka arritur në të pakten 39 të vdekur dhe mbi 165 të lënduar, shumë syresh në gjendje kritike. Njoftohet se të lënduarit janë trajtuar në spitalet e ujëdhesës.

 

 

Mbesin të hapura edhe disa pika negociatash mes Ankarasë e Uashingtonit

 

Ankara/Uashington, 21 shkurt - Në kuadër të bisedimeve për stacionimin e trupave amerikane në Turqi as gjatë kësaj jave nuk mund të llogaritet me një vendim të parlamentit në Ankara. Shefi i diplomacisë turke Jasar Jakis tha se vazhdojnë të mbesin të hapura edhe disa pika negociatash.

 

Turqia ka prezantuar qëndrimin e saj dhe pret nga ana e saj përgjigjen e Shteteve të Bashkuara të Amerikës. Kryeministri Abdullah Gyl ka paralajmëruar se do të prononcohet sot lidhur me zhvillimet e fundit sa i përket negociatave me Shtetet e Bashkuara të Amerikës rreth kësaj çështje.

 

 

Paris: Përdorimi i dhunës guxon të jetë vetëm mjeti i fundit

 

Paris, 21 shkurt - Franca ka siguruar mbështetjen e shteteve afrikane për kursin e saj në politikën e Irakut. Përdorimi i dhunës guxon të jetë vetëm mjeti i fundit, thuhet në deklaratën e përbashkët të 53 shteteve të aprovuar në fund të punimeve të takimit të nivelit të lartë francezo-afrikan.

 

Ekziston një alternativë për luftën. Vendet afrikane e mbështesin iniciativën franceze për vazhdimin dhe forcimin e misionit të inspektorëve të armatimit në Irak. Njëkohësisht i bëhet thirrje Iraku që menjëherë dhe pa kushte të bashkëpunoj me inspektorët e Kombeve të Bashkuara për armatimin.

 

 

U bëhet thirrje palestinezëve dhe izraelitëve për një armëpushim të menjëhershëm dhe të qëndrueshëm

 

Londër, 21 shkurt - Kombet e Bashkuara, Shtetet e Bashkuara të Amerikës, Rusia dhe Bashkimi Evropian i kanë bërë thirrje palestinezëve dhe izraelitëve për një armëpushim të menjëhershëm dhe të qëndrueshëm.

 

Përfaqësues të të ashtuquajturit kuarteti i Lindjes së Mesme gjatë një takimi në Londër apeluan tek palestinezët që të ndërprejnë sulmet terroriste. Poashtu ata shfaqën shqetësimin e tyre për aksionet e fundit ushtarake izraelite të kryera gjatë ditëve të fundit. Në takim është shqyrtuar edhe plani amerikan për formimin e një shteti palestinez.

 

 

Nga një zjarr në një klub nate kanë humbur jetën të pakten 10 vetë

 

Uest Uaruik, 21 shkurt – Në një zjarr që ka shpërthyer në një klub nate në ujëdhesën Roud gjatë një shfaqjeje të një rok grupi kanë humbur jetën të pakten disa prej pjesëmarrësve, kurse janë lënduar rreth 100 të tjerë, ka bërë të ditur policia sot (të premten), njofton Rojter.

 

"Unë vërtet mendoj se është tragjedi e madhe dhe numri i të vdekurve është i madh, që mund të jetë deri në 50 viktima, por që momentalisht nuk mund ta përcaktoj", ka thënë një zyrtar vendor.

 

Njoftohet se një nga këngëtarët është zhdukur. Shkaku i këtij zjarri ende nuk dihet. Qindra zjarrfikës po marrin pjesë në shuarjen e zjarrit. Policia ka thënë se të lënduarit janë dërgua të pakten në dy spitale të ujëdhësës Roud.

 

 

Bush: Besimi në vetpërmbajtjen e Sadam Huseinit nuk është alternativë

 

Uashington, 21 shkurt - Presidenti amerikan Bush vazhdon trysninë ndaj komunitetit ndërkombëtar për qëndrim të vendosur në OKB ndaj çarmatimit të Irakut.

 

Gjatë një vizite në Atlanta të shtetit Xhorxhia, presidenti tha se bota nuk mund t'i besojë udhëheqësit irakian se ai do të përmbushë kërkesat për çarmatim.

Një zyrtar i lartë i Shtëpisë së Bardhë tha se rezoluta e re do t’i paraqitet Këshillit të Sigurimit javën e ardhshme. Ai tha se pritet që ajo të deklarojë se Iraku ka kryer shkelje materiale të rezolutës për çarmatim që u miratua nëntorin e kaluar.

Ka mundësi që formulimi dhe momenti i paraqitjes së kësaj rezolute të lidhet me përpjekjet për të fituar mbështetjen e aleatëve të lëkundur.

 

 

Amerika pret vendimin e Turqisë

 

Uashington, 21 shkurt - Sekretari amerikan i Mbrojtjes, Donald Ramsfeld, ka thënë se tani Amerika është gati për luftë nëse jep urdhër presidenti Bush. Ai tha në televizionin amerikan se ushtria është e përgatitur dhe ka mundësitë dhe strategjinë që të shkojë në luftë.

 

Z. Ramsfeld nuk e konfirmoi numrin e trupave në rajonin e Gjirit po tha se janë shumë dhe se një koalicion i disa vendeve po ashtu do ta ndihmojë Amerikën.

Ka patur shumë spekulime se trupat ushtarake nën drejtimin amerikan janë përgatitur për të kryer një sulm brenda disa javësh.

 

 

Al-Baradai viziton Iranin

 

Teheran, 21 shkurt - Shefi i Agjencisë Ndërkombëtare të Energjisë Atomike, Mohamed Al-Baradai, viziton të premten Iranin në krye të një ekipi inspektorësh, për të bërë një vlerësim të programit bërthamor të këtij vendi.

Teherani thotë se programi i tij bërthamor përdoret vetëm për prodhimin e energjisë, mirëpo Shtetet e Bashkuara kanë shprehur shqetësim se disa objekte bërthamore mund të përdoren për prodhim armësh.

Shqetësimi i Uashingtonit është përforcuar nga deklarata e krerëve të një grupi opozitar iranian në mërgim, se Irani ka fshehur disa pajisje që përdoren për qëllime ushtarake.

 

 

Ivanov thotë se ndaj inspektorëve të KB-ve po bëhen presione që të largohen nga Iraku

 

Moskë, 21 shkurt - Ministri i Jashtëm rus, Igor Ivanov thotë se ndaj inspektorëve të Kombeve të Bashkuara për armatimin po bëhen presione që të largohen nga Iraku apo të publikojnë raporte që do të paraqisnin bazë për përdorimin e forcës për çarmatosjen e Irakut, por nuk thotë se kush përpiqet të ndikojë tek ata.

 

"Sipas informatave që kemi, inspektorët ndërkombëtar të armatimit janë vënë nën presion të fortë të largohen nga Iraku, siç ndodhi në 1998-tën, apo t'i paraqesin Këshillit të Sigurimit vlerësime që mund të shfrytëzohen si justifikim për operacione ushtarake kundër Irakut", ka thënë ministri i rus.

 

 

Në SHBA janë akuzuar 8 persona për mbështetje të një grupi terrorist palestinez

 

Uashington, 21 shkurt - Autoritetet e Shteteve të Bashkuara thonë se 8 persona janë akuzuar për mbështetje të një grupi terrorist palestrinez që fajsohet për vdekjen e më se 100 njerëzve në Izrael dhe në territoret e okupuara.

 

Sipas aktakuzës, të dyshuarit janë anëtarë të Xhihadit Islamik palestinez, i përfshirë në listën e Stejt Departmentit si organizatë terroriste. Në mesin e të dyshuarve është edhe Sami Amin Al-Arian, profesor palestinez në Univerzitetin e Floridës.

Copyright©2000-2003 Trepca.net - Të gjitha të  drejtat e rezervuara.