Lajme

E enjte, 20 shkurt 2003

Përmbajtja:

• Rugova: Ideja për rrugën Durrës-Prishtinë po bëhet projekt që duhet realizuar

• Karla Del Ponte thotë se pasi ka mësuar se Limaj gjendet në Slloveni ka kërkuar nga autoritetet e atjeshme që të arrestohet

• Që nga 1 gushti të gjithë të punësuarit janë të obliguar të paguajnë në skemën e re të kursimeve pensionale

• Shtyhet seanca e sotme plenare dhe kërkohet mbajtja e një seance të jashtëzakonshme të Kuvendit të Kosovës

• Administratori komunal i Podujevës apelon qytetarët t'i tërheqin dokumentet personale

• Ministria sllovene e Drejtësisë thotë se Limaj është arrestuar në bazë të urdhërit të Tribunalit të Hagës

• Avokati Tomë Gashi thotë se nuk është korrekte nga Tribunali që shqiptarët së pari burgosen e pastaj u dorëzohet aktakuza

• Unioni i Pavarur i Studentëve të UP thekson se është i shqetësuar me arrestimet nga Tribunali i Hagës

• Hagë: Tre të akuzuarit u deklaruan para gjykatës se janë të pafajshëm

• Tre të akuzuarit sot pasdite do të paraqiten para trupit gjykues në Hagë

• Tre të arrestuarit në burgun e Hagës u vizituan nga zyrtarë të Tribunalit

• BE i akordoi 5,6 milionë euro plotësuese Maqedonisë

• Pasdite mbahet një takim ndërmjet Cërvenkovskit dhe Ali Ahmetit

• Vendet e Ballkanit duhet të marrin qëndrim më të rreptë ndaj krimit të organizuar

• Ministria e Punëve të Jashtme të Shqipërisë përshëndet vullnetin e Fatmir Limajt për të bashkëpunuar me Gjykatën e Hagës

• Shtatë vetë kanë humbur jetën në një shpërthim zjarri në qytetin belg Mons

• Bush dhe Blair diskutojnë rezolutën e re për Irakun

• Armata filipinase ka vrarë një kryengritës musliman derisa po vendoste një bombë në një treg

• Trupat izraelite kanë vrarë një palestinez të armatosur në një shkëmbim zjarri

• Në një aksident ajror ka humbur jetën komandanti i Forcave Ajrore të Pakistanit dhe 15 persona të tjerë

• Në Iran 302 njerëz vdesin në aksidentin ajror

• Dënohet i akuzuari për sulmet e 11 shtatorit

• Shtëpia e Bardhë thotë se "po të dështojë KS, Bush do të mbështesë me forcë rezolutën 1441

• Anan: Lufta në Irak do të ishte e përfytyrueshme

• Putin dhe Zemin mendojnë se duhet të vazhdojnë inspektimet e Kombeve të Bashkuara në Irak

• Turqia thotë se dëshiron kompensime të garantuara ekonomike për pasojat e luftës ndaj ekonomisë të saj

• Riçard Gephard kandidat për president të SHBA-ve në garat e ardhshme

• Këshilli i Sigurimit ka përfunduar debatin e hapur dyditësh për Irakun

• Tom Rixh ka shpallur "Fushatën e gatishmërisë" nga sulmet terroriste

• Presidenti Bush takohet me Sekretarin e Përgjithshëm të NATO-s, Xhorxh Robertson

• Ramsfeld: Ndërhyrja ushtarake kundër Irakut e mundshme edhe pa përdorimin e bazave në Turqi

Rugova: Ideja për rrugën Durrës-Prishtinë po bëhet projekt që duhet realizuar

 

Prishtinë, 20 shkurt 2003 - Presidenti i Kosovës, Dr. Ibrahim Rugova, mori pjesë sot në hapjen e Konferencës për autostradën Merdar-Prishtinë-Prizren-Vërmicë, pjesë e autostradës Durrës-Kukës-Prishtinë-Merdar, që po mbahet në Hotelin "Grand" në Prishtinë.

Në fjalën që mbajti në hapje të Konferencës së organizuar nga Ministria e Transportit dhe Postë-Telekomunikacionit të Kosovës, Presidenti Rugova tha se kjo konferencë ka rëndësi për sensibilizimin e opinionit kombëtar dhe ndërkombëtar për nevojën për ndërtimin e autostradës.

Ideja tani po bëhet projekt, që duhet të realizohet së shpejti, tha Presidenti i Kosovës.

Dr. Rugova theksoi se kjo rrugë shkon rrugës së vjetër iliro-romake Lissus-Therandë (Prizren)-Vendenis, ndërsa tani siguron lidhje të Kosovës me det, me Italinë, dhe SHBA-të.

Presidenti i Kosovës tha se duhet parë mundësinë e dhënies së kësaj rruge për ndërtim me koncesion ndonjë kompanie apo vendi dhe vlerësoi faktin se të dy qeveritë, e Kosovës dhe e Shqipërisë, e kanë prioritet ndërtimin e autostradës.

 

 

Karla Del Ponte thotë se pasi ka mësuar se Limaj gjendet në Slloveni ka kërkuar nga autoritetet e atjeshme që të arrestohet

 

Prishtinë, 20 shkurt 2003 - Mbrëmë në Aeroportin e Prishtinës papritmas arriti kryeprokurorja e Gjykatës së Hagës, Karla Del Ponte. Ajo me këtë rast u takua me kryeadministratorin e Kosovës Mihael Shtajner. Në takimin Del Ponte- Shtajner temë qendrore ishte arrestimi i deputetit të Kuvendit të Kosovës Fatmir Limaj.

Pas këtij takimi zonja Del Ponte ka deklaruar se një ditë para se të njoftohej nga z. Shtajner për gatishmërinë e Limajt për t'u dorëzuar, meqë e dinte se ai ndodhej në Slloveni, kishte kërkuar nga autoritetet e atjeshme që ta arrestojnë. "Nëse është e vërtetë se ai ka deklaruar se do të dorëzohet vullnetarisht, ne do ta kemi këtë fakt parasysh", tha Del Ponte.

Kryeprokurorja e Gjykatës së Hagës po ashtu ka thënë se z. Limaj do të transferohet në Hagë nga Sllovenia, por pa saktësuar se kur do të ndodhë një gjë e tillë.

Ndërkaq, z. Shtajner tha se i ka shpjeguar zonjës Del Ponte se z. Limaj publikisht ka shprehur gatishmërinë e tij për t'u dorëzuar vulnetarisht me çka ai ka shprehur respektin për detyrimet ndaj Gjykatës. Ai shtoi se njerëzit në Kosovë kanë kuptuar se cilat janë tashmë rregullat e lojës.

Vizita e papritur e zonjës Del Ponte është kushtëzuar nga mosmarrëveshjet që kanë lindur rreth arrestimit dhe gatishmërisë për t'u dorëzuar Fatmir Limaj.

 

 

Që nga 1 gushti të gjithë të punësuarit janë të obliguar të paguajnë në skemën e re të kursimeve pensionale

 

Prishtinë, 20 shkurt 2003 - Prej 1 gushtit të gjithë të punësuarit e Kosovës janë të obliguar të paguajnë në skemën e re të kursimeve pensionale, njoftuan zyrtarët e Trustit të Kursimeve Pensionale të Kosovës.

 

Norma e pagesës është 5 për qind nga paga e të punësuarit dhe 5 për qind kontribut i punëdhënësit për të punësuarit, me mundësi të rritjes nëse për këtë shprehin dëshirën i punësuari apo punëdhënësi.

 

Ky sistem i ri pensioneve u mundëson të punësuarve të kursejnë për të ardhmen e tyre dhe këto mjete do të mund t'i shfrytëzojnë kur ata dalin në pension.

 

 

Shtyhet seanca e sotme plenare dhe kërkohet mbajtja e një seance të jashtëzakonshme të Kuvendit të Kosovës

 

Prishtinë, 20 shkurt 2003 - Seanca e sotme e radhës së Kuvendit të Kosovës nuk u mbajt dhe u shty për një ditë tjetër me kërkesë të grupit parlamentar të PDK-së, për shkak të ngrijes së akuzës ndaj deputetit Fatmir Limaj.

 

Kryeparlamentari Nexhat Daci tha se kjo kërkesë është përkrahur për hir të krijimit dhe ruajtjes së stabilitetit në institucione. Daci përsëriti edhe sot se parlamenti i Kosovës është i përgatitur që institucioneve ndërkombëtare t'u ofrojë të gjitha garancionet për personalitet e shquara që pas procedurave hetimore në Hagë, procedurat e tjera të zhvillohen në Kosovë.

Edhe shefat e dy grupeve parlamentare - të LDK-së dhe AAK-së - kanë përkrahur shtyrjen e seancës së sotme.

Deputeti i PDK-së Hydajet Hyseni tha se arrestimi i shefit të grupir parlamentar të PDK-së Fatmir Limajt, është një goditje e rëndë jo vetëm për PDK-në, por edhe për institucionet e Kosovës. PDK-ja nuk mund të jetë indiferente, tha ai, duke kërkuar të thirret një seancë e jashtëzakonshme e parlamentit.

Ndërkohë PDK-ja ka fillar mbledhjen e nënshkrimeve nga deputetët për mbajtjen e një seance të jashtëzakonshme, në të cilën do të debatohej dhe do të miratohej qëndrimi për vlerat e Luftës çlirimtare në Kosovë dhe për stabilitetin e institucioneve të Kosovës.

 

Ndryshe në rend dite të seancës së sotme ka qenë projektligji për arkivat dhe ai për bibliotekat.

 

 

Administratori komunal i Podujevës apelon qytetarët t'i tërheqin dokumentet personale

 

Podujevë, 20 shkurt 2003 - Një numër i konsiderueshëm i letërnjoftimeve dhe dokumenteve të udhëtimit që gjenden në Qendrën Komunale për Regjistrimin Civil në Podujevë, presin të tërhiqen nga aplikantët, thuhet në njoftimin për media të administratorit komunal Majkëll Verling, i cili ka apeluar qytetarët që t'i tërheqin dokumentet personale sa më shpejt.

Sipas statistikave të fundit të Drejtorisë për administratë të përgjithshme, në qendrën komunale për regjistrim civil presin për t'u tërhequr 1530 pasaporta dhe 930 letërnjoftime. Drejtori i kësaj drejtorie Hamit Shala ka theksuar se Qendra kryesore për Regjistrimin Civil ka vendosur që nëse këto dokumente nuk tërhiqen nga aplikantët deri në mesin e muajit prill, ato do të kthehen.

 

 

Ministria sllovene e Drejtësisë thotë se Limaj është arrestuar në bazë të urdhërit të Tribunalit të Hagës

 

Lubjanë, 20 shkurt 2003 - Hinko Jenull nga Ministria sllovene e Drejtësisë thotë se afati për paraqitjen e kërkesës nga ana e Gjykatës së Hagës për dorëzimin e Fatmir Limajt është 30 ditë.

I pyetur se në bazë të çfarë dokumenteve është arrestuar Fatmir Limaj, Hinko Jenull ka thënë se ai është ndaluar në bazë të urdhërit të Gjykatës Ndërkombëtare të Hagës. Sllovenia këtë urdhër e ka marrë në mënyrë zyrtare dhe është e obliguar ta realizojë sipas ligjit për bashkëpunimin e Sllovenisë me Tribunalin e Hagës.

Duke shpjeguar procedurën e mëtutjeshme, ai tha se Sllovenia duhet të marrë një kërkesë zyrtare për dorëzimin e këtij personi në Gjykatën Ndërkombëtare të Hagës. Për këtë vendos Senati i Gjyqit Suprem të Sllovenisë.

Ndërkaq duke folur rreth qëndrimit të z. Shtajner se është i gatshëm të dërgojë një aeroplan për ta kthyer z. Limaj në Kosovë, z. Jenull theksoi se kjo nuk është e mundur për shkak se ligji slloven është i qartë kur në bazë të kërkesës së Tribunalit të Hagës gjyqtari hetues e merr vendimin për paraburgim, nuk është i mundshëm të merret kurrëfarë vendimi tjetër për t'ia dorëzuar dikujt tjetër. Pra dorëzimi mund t'i bëhet vetëm Gjyqit të Hagës.

 

 

Avokati Tomë Gashi thotë se nuk është korrekte nga Tribunali që shqiptarët së pari burgosen e pastaj u dorëzohet aktakuza

 

Prishtinë, 20 korrik - Duke folur për arrestimet e shqiptarëve të dyshuar nga Tribunali i Hagës, avokati prishtinas Tomë Gashi thotë se nuk është korrekte që shqiptarët së pari burgosen e pastaj u dorëzohet aktakuza.

 

Ai ka theksuar se sidomos tek rasti i Limajt instancat ndërkombëtare sipas tij është dashur që ta njoftojnë atë siç kanë vepruar edhe në disa raste me disa figura politike në Serbi e vende të tjera të ish-Jugosllavisë.

 

 

Unioni i Pavarur i Studentëve të UP thekson se është i shqetësuar me arrestimet nga Tribunali i Hagës

 

Prishtinë, 20 korrik - Unioni i Pavarur i Studentëve të Universitetit të Prishtinës me një komunikatë të veçantë thekson se është i shqetësuar me arrestimet e fundit nga Tribunali i Hagës.

"Në vazhdën e këtyre zhvillimeve ngritja e aktakuzave kundër luftëtarëve të lirisë të montuara gjyqësore dhe aktgjykimet e shpallura me ligjet e një regjimi që terrorizoi popujt e pambrojtur dhe tani së fundi ngritja e aktakuzave nga Tribunali i Hagës gjason me përpjekjet për të barazuar vrasjen me viktimën, si dhe njollosjen e vlerave të luftës sonë çlirimtare", theksohet në komunikatën e Unionit të Pavarur të Studentëve të Universitetit të Prishtinës.

 

 

Hagë: Tre të akuzuarit u deklaruan para gjykatës se janë të pafajshëm

 

Hagë, 20 shkurt 2003 - Para kolegjit të Tribunalit të Hagës sot u paraqitën tre të akuzuarit shqiptarë, Haradin Balaj, Isak Musliu dhe Agim Murtezi, për t'u deklaruar nëse ndiehen fajtorë apo jo për veprat që u vihen në barrë e që kanë të bëjnë me krimet kundër njerëzimit dhe krimet e luftës.

Fillimisht para të akuzuarve u lexua aktakuza që i ngarkon për veprat e kryera gjatë vitit 1998.

Pastaj gjykatësi e pyeti të të akuzuarin e parë Haradin Balajn në të gjitha pikat veç e veç se a është fajtor, i akuzuari Balaj u përgjegj se nuk është fajtor për të gjitha akuzat që i ngarkoheshin.

Edhe i akuzuari i dytë, Isak Musliu, u deklarua se është i pafajshëm për të gjitha akuzat me të cilat ngarkohet.
Gjithashtu edhe Agim Murtezi u shpreh se është i pafajshëm ndaj të gjitha akuzave që i vehen në barrë.

 

 

Tre të akuzuarit sot pasdite do të paraqiten para trupit gjykues në Hagë

 

Bruksel-Hagë, 20 shkurt 2003 - Tre të akuzuarit shqiptarë nga Tribunali i Hagës, Haradin Balaj, Isak Musliu dhe Agim Murtezi do të paraqiten sot pasdite para trupit gjykues për t'u deklaruar nëse ndiehen fajtorë apo jo për veprat që u vihen në barrë e që kanë të bëjnë me krimet kundër njerëzimit dhe krimet e luftës.

 

Ndërkaq i akuzuari tjetër Fatmir Limaj do të bëjë këtë paraqitje më vonë pasi që të bëhet tranferimi i tij në Hagë. Njoftimet nga Sllovenia bëjnë të ditur se arrestimi i Fatmir Limajt është bërë befas dhe i akuzuari nuk ka pasur rast që të dorëzohet vetë ashtu siç kishte paralajmëruar.

 

Zyrtarët e Tribunalit kanë shpjeguar se prononcimi i Limajt në media nuk kanë mjaftuar sepse ky sipas procedurës është dashur që të kontaktojë UNMIK-un apo zyrën e Tribunalit në Prishtinë ose në Hagë në mënyrë që të shprehë vullnetin për dorëzim.

 

Burimet e Tribunalit të Hagës kanë shpjeguar se ata kanë pasur informata se Fatmir Limaj gjendet në Slloveni, porse pas paraqitjes së tij në mediat e Kosovë se është në Austri është paraqitur dyshimi i bazuar se ai qëllimisht tenton të humbë gjurmët me qëllim të arratisjes. Prandaj edhe nga autoritetet sllovene është kërkuar arrestimi i menjëherëshëm edhe nëse ata nuk kanë pasur fletarrest.

Policia sllovene pas arrestimit ia ka dorëzuar gjykatësit hetues në Kranj, i cili ka caktuar paraburgimin prej 30 ditësh për Fatmir Limajn, derisa në ndërkohë të mos kryhet procedura nga Tribunali i Hagës për transferimin e tij në Hagë.

 

 

Tre të arrestuarit në burgun e Hagës u vizituan nga zyrtarë të Tribunalit

 

Hagë, 20 shkurt 2003 - Zëdhënësi i Tribunalit të Hagës ka thënë se tre të arrestuarit shqiptarë nga Kosova të cilët gjenden në burgun e Hagës janë vizituar nga zyrtarë të Tribunalit. Ata me këtë rast janë njoftuar me procedurën e paraqitjes së parë në gjyq si dhe me të drejtat dhe obligimet e tyre.

 

Zëdhënësi ka thënë se atyre u është dhënë edhe një listë me emrat e disa avokatëve, ku ka edhe avokatë nga Kosova e të cilët mund t'i marrin si mbrojtës të tyre potencialë.

 

Zëdhënësi i Tribunalit Kristian Shartie thotë se për paraqitjen e parë të tyre Tribunali do të të caktojë disa avokatë mbrojtës, por të cilët nuk imponohen si mbrojtës të tyre. Ata do të jenë aty vetëm për të siguruar se e tërë procedura shkon në mënyrë të rregullt.

 

 

BE i akordoi 5,6 milionë euro plotësuese Maqedonisë

 

Shkup, 20 shkurt 2003 - Bashkimi Evropian i akordoi 5,6 milionë euro plotësuese Qeverisë së Maqedonisë për zhvillimin e ndërmarrjeve të vogla dhe të mesme.

 

Me nënshkrimin e sotëm të Memorandumit financiar për sigurimin e mjeteve të tjera për linjën mikrokreditore për zhvillimin e ndërmarrjeve të vogla dhe të mesme me Agjencinë Evropiane të Rindërtimit, mjetet që i mori për këtë destinim Qeveria e Maqedonisë arrin një shumë prej 16 milionë eurosh. Programi sendërtohet që nga viti 1998 kur janë akorduar shuma e parë prej 5,1 milionë eurosh.

 

 

Pasdite mbahet një takim ndërmjet Cërvenkovskit dhe Ali Ahmetit

 

Shkup, 20 shkurt 2003 - Kryeministri dhe njëherit lider i LSDM-së, Branko Cërvenkovski, pasdite në selinë e qeverisë do të ketë një takim me kryetarin e Bashkimit Demokratik për Integrim (BDI), Ali Ahmeti, në nivel të partnerëve të koalicionit. Pas takimit pritet që të shpallet një komunikatë, njofton MIA në gjuhën shqipe.

Sipas paralajmërimeve, z.Cërvenkovski dhe Ahmeti, do të bisedojnë për 100 ditët e funksionimit të Qeverisë, gjendjen aktuale ekonomike dhe politike, si dhe për perspektivat e vendit. Njëra ndër temat kryesore të bisedimeve do të jetë Marrëveshja-korniza dhe zbatimi i saj.

Ky është takimi i parë ndërmjet liderit të LSDM-së dhe krytar i Qeverisë Branko Cërvenkovski me njeriun e parë të BDI-së, Ali Ahmeti

 

 

Vendet e Ballkanit duhet të marrin qëndrim më të rreptë ndaj krimit të organizuar

 

Athinë, 20 shkurt 2003 - Greqia si kryesuese e radhës e BE-së thotë se ka ndërmend të vendosë një plan pune i cili do të kërkonte nga Shqipëria, Kroacia, Bosnja, Maqedonia, Serbia dhe Mali i Zi që të marrin qëndrim më të rreptë ndaj krimit të organizuar.

 

Ky plan do të caktonte afate për secilin vend që t'i raportonte Bashkimit Evropian se si planifikon të merret me bandat përgjegjëse për përhapjen e drogës dhe prostitucionit.

 

 

Ministria e Punëve të Jashtme të Shqipërisë përshëndet vullnetin e Fatmir Limajt për të bashkëpunuar me Gjykatën e Hagës

 

Tiranë, 20 shkurt 2003 - Ministria e Jashtme e Shqipërisë shfaqi qëndrimin e saj lidhur me arrestimin e fundit të katër ish-anëtarëve të UÇK-së nga Tribunali i Hagës. Zëdhënësi i kësaj ministrie Agim Neza tha se përshëndet vullnetin e Fatmir Limajt për të bashkëpunuar me Gjykatën Ndërkombëtare.

Ministria e Jashtme e Shqipërisë ka shfaqur bindjen se organet e drejtësisë ndërkombëtare do të zhvillojnë një proces të hapur gjyqësor, hapur, transparent dhe pa kurrëfarë paragjykimi.

 

Proceset gjyqësore në një vijë të veçantë nuk mund të stigmatizojnë luftën dhe vlerat e popullit të Kosovës kundër gjenocidit etnik të Sllobodan Millosheviqit, tha ai.

 

 

Shtatë vetë kanë humbur jetën në një shpërthim zjarri në qytetin belg Mons

 

Bruksel, 20 shkurt 2003 – Shtatë veta kanë humbur jetën, kurse 23 të tjerë janë hospitalizuar pasi gjatë natës (të enjten) ka shpërthyer zjarri në një bllok banesash në Mons, që gjendet në jug të Belgjikës, kanë bërë të ditur zyrtarët vendorë, njofton AFP.

 

I njëjti burim ka njoftuar se katër nga viktimat kanë vdekur në flakë në katin e 12-të të ndërtesës, ndërsa tre të tjerët kanë humbur jetën gjatë panikut duke kërcyer nga dritaret për t’i shpëtuar flakës.

 

 

Bush dhe Blair diskutojnë rezolutën e re për Irakun

 

Londër, 20 shkurt 2003 - Presidenti Bush dhe kryeministri britanik, Toni Bler kanë zhvilluar një bisedë të gjatë rreth përmbatjes së rezolutës së re mbi Irakun që do t'i paraqitet Këshillit të Sigurimit të OKB-së.

 

Dy udhëheqësit kaluan më shumë se gjysmë ore në telefon duke diskutuar përmbajtjen e tekstit të rezolutës.Shtëpia e Bardhë ka thënë se rezoluta e re do t'i prezentohet Këshillit të Sigurimit këto ditë ose javën e ardhshme.

 

Shtetet e Bashkuara dhe Britania do të përpiqen që të bindin së paku nëntë anëtarë të Këshillit të Sigurimit që ta mbështesin atë. Shtetet e Bashkuara pastaj do të sfidojnë ato vende që kanë pushtetin e vetos si Kina, Rusia dhe Franca që të abstenojnë ose të rrezikojnë shkatërrimin e autoritetit të Këshillit të Sigurimit.

 

 

Armata filipinase ka vrarë një kryengritës musliman derisa po vendoste një bombë në një treg

 

Manila, Filipine, 20 shkurt 2003 – Armata filipinase ka deklaruar sot (të enjten) se ka vrarë një kryengritës musliman derisa po vondoste një bombë në një treg përplot me njerëz dhe pasi guerila kishte vrarë 14 fshatarë në një zonë tjetër në jug të ujëdhesës Mindano, njofton Rojter.

 

Po sipas armatës, disa orë pas shpërthimit në tregun e qytetit Kabakan, ka ndodhur edhe një shpërthim tjetër jashtë aeroportit Avang, në zonën e afërme të Mindanaos, ku është vrarë një ushtar dhe janë plagosur gjashtë persona të tjerë.

 

Pas këtij shpërthimi është mbyllur ky aeroport. Fronti islamik për çlirimin e Moros (MILF) ka mohuar involvimin në këto incidente.

 

 

Trupat izraelite kanë vrarë një palestinez të armatosur në një shkëmbim zjarri

 

Gaza, 20 shkurt 2003 – Izraeli ka forcuar të enjten ndalim-qarkullimin e palestinezëve në Rripin e Gazës pasi militantët palestinezë i janë përgjigjur sulmeve të armatës izraelite, të cilat patën pasur për rrjedhojë vrasjen e 11 palestinezëve, duke gjuajtur me raketa afër fermës së kryeministrit izraelit, Ariel Sharon, njofton Rojter.

 

Gjatë dhunës më të re në Bregun Perendimor, trupat izraelite kanë vrarë një palestinez të armatosur në një shkëmbim zjarri në qytetin Tulkarm, ka thënë armata. Krahu i armatosur i Hamasit ka konfirmuar se është vrarë një anëtar i tij në luftimet me ushtarët në qytet.

 

 

Në një aksident ajror ka humbur jetën komandanti i Forcave Ajrore të Pakistanit dhe 15 persona të tjerë

 

Kohat, Pakistan, 20 shkurt 2003 – Komandanti i Forcave Ajrore të Pakistanit, mareshali Mushaf Ali Mir, gruaja e tij dhe 15 persona të tjerë kanë humbur jetën në një aksident ajror kur aeroplani i tyre është rrëzuar sot (të enjten), njofton Rojter.

 

Zëdhënësi i armatës pakistaneze ka thënë se copat e aeroplanit ushtarak, në të cilin ndodhej z. Mir dhe të tjerët, janë gjetur në një zonë kodrinore, 17 mila në lindje të qytetit Kohat në veriperendim të Pakistanit.

 

Ai tha se shkaku i rrëzimit ende nuk dihet. Aeroplani fluturonte nga Islamabadi. Një zëdhënës tjetër ushtarak ka deklaruar se s'ka të shpëtuar nga ky aksident dhe se janë gjetur mbeturinat e aeroplanit.

 

 

Në Iran 302 njerëz vdesin në aksidentin ajror

 

Teheran, 20 shkurt 2003 - Një avion ushtarak iranian me 302 njerëz në bord është rrëzuar në malet në juglindje të Iranit dhe media shtetërore njoftoi se nuk ka asnjë të mbijetuar.Avioni 'Ilushin' po udhëtonte nga Zahedani, pranë kufirit me Pakistanin për në qytetin Kerman, një mijë kilometra larg kryeqytetit Teheran.

 

Përpara se të humbiste kontaktin me kontrollorin e trafikut ajror, piloti ishte ankuar për kohën e keqe. Në rajon ka rënë një dëborë mjaft e dendur.

 

Punëtorët e shpëtimit që kanë mbërritur në vendin e aksidentit janë duke kërkuar në rrënoja.Avioni kishte një ekuipazh prej 18 vetash, kurse pjesa tjetër e pasagjerëve ishin anëtarë të elitës së Gardës që siguroi Revolucionin Islamik pas përmbysjes së Shahut në vitin 1979.

 

 

Dënohet i akuzuari për sulmet e 11 shtatorit

 

Hamburg, 20 shkurt 2003 - Një gjykatë në Gjermani ka gjetur fajtor për përfshirje në sulmet e 11 shtatorit në Amerikë, një shtetas marokien, Munir el Motasadekin. Gjykata e dënoi atë si ndihmës për mbi 3000 akuza për vrasje dhe si anëtar të një grupi terrorist.

 

Gjykata në qytetin gjerman të Hamburgut e dënoi atë me 15 vjet burg, dënimi maksimal për akuzat ndaj tij. Munir el Motasadek, nguli këmbë gjatë gjithë gjyqit se ai ishte i pafajshëm.

 

 

Shtëpia e Bardhë thotë se "po të dështojë KS, Bush do të mbështesë me forcë rezolutën 1441

 

Uashington, 20 shkurt 2003 - Shtëpia e Bardhë thotë se "po të dështojë së vepruari Këshilli i Sigurimit, presidenti i Shteteve të Bashkuara bashkë me koalicionin e të vullnetshmëve do të mbështesë me forcë rezolutën 1441 duke çarmatosur liderin irakian, Sadam Husein".

 

Zëdhënësi Ari Fleiçer tha se "presidenti Bush ka ndërmend të punojë me miqtë dhe aleatët për t'i ofruar Këshillit të Sigurimit një rezolutë gjatë kësaj apo javës së ardhëshme dhe e ka bërë të qartë vazhdimisht se epilogu i preferuar për Kombet e Bashkuara do të ishte të veprojnë".

 

 

Anan: Lufta në Irak do të ishte e përfytyrueshme

 

Romë, 20 shkurt 2003 - Sekretari i përgjithshëm i Kombeve të Bashkuara, Kofi Anan ka deklaruar në Romë se lufta në Irak do të ishte e përfytyrueshme vetëm nëse alternativa do të ishte më e keqe.

 

Annan tha se ai vazhdon të mendojë se lufta mund të shmanget.

 

 

Putin dhe Zemin mendojnë se duhet të vazhdojnë inspektimet e Kombeve të Bashkuara në Irak

 

Moskë, 20 shkurt 2003 - Kremlini thotë se presidenti i Rusisë, Vladimir Putin dhe presidenti i Kinës, Gjiang Zemin gjatë një bisede telefonike kanë qenë të një mendje se duhet të vazhdojnë inspektimet e Kombeve të Bashkuara për armët në Irak.

 

 

Turqia thotë se dëshiron kompensime të garantuara ekonomike për pasojat e luftës ndaj ekonomisë të saj

 

Uashington, 20 shkurt 2003 - Zëdhënësi i Shtëpisë së Bardhë ka thënë se Shtetet e Bashkuara i kanë bërë Ankarasë ofertën finale për të siguruar praninë në bazat e Turqisë për invadim të mundshëm në Irak të prirë nga Shtetet e Bashkuara.

 

Shtetet e Bashkuara i kanë ofruar Turqisë një pako ndihme që përfshinë 6 miliardë dollarë falas dhe 20 miliardë dollarë kredi, por zyrtarët e Ankarasë thanë se akoma nuk janë plotësuar kërkesat e tyre.

 

Turqia thotë se dëshiron kompensime të garantuara ekonomike për pasojat e luftës ndaj ekonomisë të saj të lodhur. Sipas zyrtarëve amerikanë, Ankaraja kërkon asistencë prej 30 miliardë dollarësh.

 

 

Riçard Gephard kandidat për president të SHBA-ve në garat e ardhshme

 

Ushington, 20 shkurt 2003 - Riçard Gephard, ish lider në Kongresin e Shteteve të Bashkuara thotë se do të kërkojë nga Partia Demokrate që ta nominojë për president të vendit në garat e ardhshme, duke e akuzuar presidentin aktual, Bush se po e udhëheqë keq konfrontimin me Irakun dhe ekonominë amerikane.

 

 

Këshilli i Sigurimit ka përfunduar debatin e hapur dyditësh për Irakun

 

Nju Jork, 20 shkurt 2003 - Këshilli i Sigurimit ka përfunduar debatin e hapur dyditësh për Irakun, ku shumica e oratorëve kanë kundërshtuar thirrjet e Shteteve të Bashkuara për çarmatosjen e Irakut me forcë, por të tjerë i kanë bërë thirrje Bagdadit që të bëjë më shumë për të shmangur luftën.

Mbledhja ishte thirrur me kërkesë të të painkuadruarve për t,u bërë të mundur vendeve që nuk kanë karrike në Këshillin e Siguurimit të shfaqin mendimet e tyre.

 

 

Tom Rixh ka shpallur "Fushatën e gatishmërisë" nga sulmet terroriste

 

Uashington, 20 shkurt 2003 - Sekretari i sigurisë vendore, Tom Rixh ka shpallur "Fushatën e gayishmërisë" që ka qëllim mbrojtjen e qytetarëve të Shteteve të Bashkuara nga sulme terroriste biologjike, kimike apo bërthamore. Rixh ka thënë se qëllimi i fushatës është përforcimi i gatishmërisë së amerikanëve kundër sulmi të mundshëm terrorist.

 

 

Presidenti Bush takohet me Sekretarin e Përgjithshëm të NATO-s, Xhorxh Robertson

 

Bruksel, 20 shkurt 2003 - Kur gazetarët dhe kamerat hynë brenda për të parë fillimin e takimit, Presidenti nuk iu përmbajt rutinës së zakonshme, por vlerësoi lart aleancën e NATO-s. "Sot kjo aleancë po e pajis Turqinë që të mbrohet nga një sulm i mundëshëm nga Iraku".

 

Sekretari i Përgjithshëm i NATO-s, Xhorxh Robertson, u përgjegj me një buzëqeshje dhe me një nënkuptim për përpjekjen e anëtareve të NATO-s, Francës, Gjermanisë dhe Belgjikës për të bllokuar ndihmën për Turqinë, e vetmja anëtare e aleancës që ka kufij të përbashkët me Irakun.

 

"Kjo më kujton Vinston Çerçillin, busti i të cilit ndodhet në këtë dhomë, i cili tha këtë shprehje të famshme për Shtetet e Bashkuara: 'Shtetet e Bashkuara duhen besuar se gjithmonë bëjnë atë që duhet pasi kanë provuar çdo alternativë tjetër'.

Shtetet e Bashkuara nuk i kanë kërkuar NATO-s të marrë pjesë zyrtarisht në ndonjë ofensivë ushtarake kundër Irakut. Por administrata e Presidentit Bush e ka bërë të qartë se do t’u kërkojë ndihmë vendeve anëtare dhe ajo i bëri thirrje aleancës që të ndihmojë Turqinë.

 

 

Ramsfeld: Ndërhyrja ushtarake kundër Irakut e mundshme edhe pa përdorimin e bazave në Turqi

 

Uashington, 20 shkurt 2003 - Sekretari amerikan i Mbrojtjes Donald Ramsfeld tha në Pentagon se një sulm kundër Irakut mund të realizohet edhe pa mbështetjen e Turqisë. "Me sa duket, sa më shumë ndihmë që merr një vend, aq më lehtë është.

 

Dhe sa më pak ndihmë që të marrë ai, aq më e vështirë është. Por megjithatë operacioni kundër Irakut është i realizueshëm dhe gjithmonë ka alternativa të tjera". Por zoti Ramsfeld theksoi se Turqia është duke bashkëpunuar në patrullimet ajrore të Shteteve të Bashkuara në zonën e ndalim fluturimeve në veri të Irakut.

 

Ai beson se Turqia më në fund do të bashkëpunojë, në qoftë se shpërthen lufta kundër Irakut.

Copyright©2000-2003 Trepca.net - Të gjitha të  drejtat e rezervuara.