Lajme

E mërkure, 19 shkurt 2003

Përmbajtja:

• Shtajner: Jam shumë i kënaqur se institucionet e Kosovës janë përcaktuar për bashkëpunim me Tribunalin e Hagës

• Kryeparlamentari Daci kërkon që procesi kundër Fatmir Limajt të zhvillohet në Kosovë

• Arrestimet e fundit të ish-pjesëtarëve të UÇK-së për AAK-në ishin të papritura

• B.Rexhepi: "Ndjej krenari për zotin Limaj"

• Artanë: Buxheti për vitin 2003 - gjysmë million euro

• Mbrëmë në Prishtinë ndodhi një shpërthim i fortë, por s'ka të lënduar

• Shefi i diplomacisë britanike dhe ministri i mbrojtjes kanë përshëndetur arrestimet në Kosovë

• Mini e ka cilësuar shumë të suksesshëm operacionin e arrestimit ndaj tre shqiptarëve të kërkuar nga Tribunali

• Fatmir Limaj nuk ka pasur rast të dorëzohet vetë

• Arrestohet Fatmir Limaj

• Del Ponte kritikon KFOR-in

• Në Preshevë protestuan 7 mijë shqiptarë kundër arrestimit të shtatë pjesëtarëve të ish-UÇPMB-së

• Kryeprokurorja e Hagës Del Ponte në Shkup

• Ish-futbollisti i Dritës së Gjilanit Emin Ismajli që nga ky sezon do të luajë në Regensburg të Gjermanisë

• Berisha: opozita do të bëjë të gjitha përpjekjet për rrëzimin e qeverisë Nano

• Në Shkup u takuan ministri i Mbrojtjes së Maqedonisë dhe ai i Serbisë dhe Malit të Zi

• Debati i Këshillit të Sigurimit lidhur me politiken e Irakut me ndarje të qarta

• Shrëder kundër një deklarate të re të KS për Irakun

• Siria do të tërheqë një pjesë të trupave nga veriu i Libanit

• Gjykata në Hamburg pritet të shpallë vendimin e parë në procesin që ka të bëjë me sulmet terroriste të 11 shtatorit

• NATO ka aprovuar sot një plan për të dërguar në Turqi pajime mbrojtëse

• Në Venezuelë janë ekzekutuar tre disidentë ushtarakë dhe një vajzë pjesëmarrëse në protestat kundërqeveritare

• Mbi 5 mijë iranianë, përkrahës të forcave opozitare irakiane, kanë hyrë në pjesën veriore të Irakut

• Trupat izraelite gjatë një sulmi në Rripin e Gazës kanë vrarë të pakten 12 palestinezë

• Të paktën tre ushtarë dhe shtatë pjesëtarë të grupit të Abu Sajefit janë vrarë në Filipine

• Nga të ftohtit në SHBA kanë vdekur 44 vetë

• Të pakten 29 kryengritës marksist dhe pjesëtarë të milicisë së djathtë janë vrarë gjatë përleshjeve ndërmjet tyre

• Presidenti Bush tha se nuk do të lejojë që protestat nëpër botë të bllokojnë luftën kundër Irakut

• Turqia paralajmëron se mbështetja e saj për verpimet ushtarake të SHBA në Irak mund të ndryshojë

• SHBA-ja gati për një rezolutë të dytë

• Bler: Shumica e anglezëve do të mbështesin luftën kundër Irakut

• Anan: Iraku doemos duhet të respektojë obligimet dhe të çarmatoset

• Inspektorët kanë vizituar nëntë objekte në Irak në kërkim të armëve

• Iraku rrezikon luftë nëse nuk bashkëpunon plotësisht me KB për t'u çarmatosur

Shtajner: Jam shumë i kënaqur se institucionet e Kosovës janë përcaktuar për bashkëpunim me Tribunalin e Hagës

 

Pragë, 19 shkurt 2003 - "Jam shumë i kënaqur me faktin se institucionet e Kosovës janë përcaktuar në rrugën e duhur, duke thënë se bashkëpunimi me Tribunalin është obligim për secilin.

 

Qeveria, kryeministri dhe kryetari e kanë bërë këtë të qartë dhe gjithashtu jam i kënaqur me faktin se Fatmir Limaj ka dhënë një deklaratë pasi që kishte dëgjuar me aktakuzën, duke e pranuar obligimin për të bashkëpunuarme Tribunalin.

 

Kjo është qasje e duhur dhe dëshmon se ekziston mirëkuptimi në Kosovë se duhet zbatuar obligimet", deklaroi sot në një intervistë dhënë radios "Evropa e lirë", shefi i UNMIK-ut Mihael Shtajner, duke komentuar situatën e krijuar pas aktakuzave të ngritura nga Tribunali Ndërkombëtar i Hagës.

Ndërkaq duke komentuar disa pohime se me këto aktakuza dhe me procese gjyqësore komuniteti ndërkombëtar po rrezikon që të barazojë krimin dhe keqbërësit në mes të serbëve dhe shqiptarëve, Shtajner tha se "kjo është nonsens".

"Ne nuk jemi duke folur për serbët, kosovarët apo shqiptarët. Jemi duke folur për individë dhe për aktakuza individuale, që nuk kanë të bëjnë me një popull të caktuar.

 

Pra, aktakuzat nuk janë ngritur kundër serbëve apo shqiptarëve, por kundër individëve të caktuar dhe mendoj se do të ishte absolutisht gabim po të merrnim guximin që të sfidojmë përmbajtjen e këtyre aktakuzave", tha Shtajner, duke shtuar se roli i tij nuk është që të gjykojë, ngase ky vendim i takon gjyqtarëve... "Kësi lloj spekulimesh do të ketë gjithmonë dhe kjo është e natyrshme. Një dukuri e këtillë ndodh kohë pas kohe në Ballkan", tha ai.

"Me rëndësi është që të kuptohet se individë të caktuar do të kenë mundësinë që të mbrohen, nëse nuk janë fajtorë, gjykatësit do të bëjnë punën e tyre, nëse janë fajtorë, gjykatësisht sërish do të bëjnë punën e tyre. Por, kjo nuk na takon neve", nënvizoi Shtajner.

I pyeteur se a janë të vërteta njoftimet për takimet e tij me kryeministrin serb Gjingjiq, Shtajner tha se ka pasur shumë takime me Gjingjiqin tash e sa vjet me radhë dhe se këtë e ka edhe obligim si përfaqësues i Sekretarit të Përgjithshëm të OKB-së. "Nuk po them se kemi mendime të njejta mbi shumë çështje, larg prej kësaj.

 

Një gjë të këtillë e kam qartësuar përpara Këshillit të Sigurimit të Kombeve të Bashkuara kur e kam bërë të ditur mendimin tim mbi një çështje të caktuar, për çka ai ka një mendim tjetër"(...) "Fakti se ne bisedojmë është normale, por temat që i diskutojme ndonjëherë janë publike, e ndonjëherë nuk janë.

 

Nuk kam arsye që të flas publikisht për diskutimet që kam pasur me Zoran Gjingjiqin... Por, mund të konfirmoj se deri më tash kam zhvilluar shumë bisedime me zotin Gjingjiq", tha Shtajner.

Në vazhdim shefi i UNMIK-ut foli edhe rreth përmbushjeve të standardeve dhe ai në vazhdim mes tjerash tha: "Çështja e fundit që dua të ngris është se askush nuk pret krijimin e një bote ideale në Kosovë, kjo botë duhet të jetë në raport me ambientin.

 

Kjo do të thotë se Kosova nuk mund të matet me përmasat e Zvicrës, Kosova duhet të shihet në kuadër të rajonit. Ajo nuk mund t'i tejkalojë standardet të cilat tashmë ekzistojnë në rajon, ato duhet të maten me përmasat e Ballkanit".

Ndërkaq lidhur me pakënaqësinë me punën dhe politikën e UNMIK-ut, Shtajner tha se kjo "nuk është spektakulare". "Situata ekonomike vazhdon të jetë e rëndë, krimi vazhdon të jetë i pranishëm dhe këto probleme nuk mund t'i zgjidhim brenda natës.

 

Kësisoji njerëzit fillojnë të kërkojnë ata që janë përgjegjës për këtë situatë. Kjo është krejtësisht normale, është një reagim njerëzor", tha mes tejrash në këtë intervistë shefi i UNMIK-ut Mihael Shtajner.

 

 

Kryeparlamentari Daci kërkon që procesi kundër Fatmir Limajt të zhvillohet në Kosovë

 

Prishtinë, 19 shkurt 2003 - "Është përgjegjësi e parlamentit që t'u ofrojë të gjitha garancionet institucioneve ndërkombëtare që janë në Kosovë dhe jashtë Kosovës se jemi të gatshëm t'i marrim përgjegjësitë që personat e dalluar gjatë luftës çlirimtare që është zhvilluar në Kosovë, personat që janë dalluar në organizimin politik, pas çlirimit të Kosovës, se kanë pasur qëndrime korrekte ndaj etnive në Kosovë, ndaj bashkësisë ndërkombëtare dhe ndaj insitucioneve qeverisëse", deklaroi kryetari i Kuvendit të Kosovës Nexhat Daci lidhur me arrestimin e Fatmir Limajt.

Daci theksoi, që pas kalimit të fazës së hetuesisë, parlamenti është i gatshëm që të angazhohet t'i japë të gjitha garancionet e nevojshme që procesi kundër Fatmir Limajt të zhvillohen në Kosovë.

 

 

Arrestimet e fundit të ish-pjesëtarëve të UÇK-së për AAK-në ishin të papritura

 

Prishtinë, 19 shkurt 2003 - Arrestimet e fundit të ish-pjesëtarëve të Ushtrisë Çlirimtare të Kosovës, ndër të cilët edhe arrestimi i Fatmir Limajt, për AAK-në ishin të papritura. Opinioni publik nuk di e as ka ditur për ndonjë krim që ka bërë Ushtria Çlirimtare e Kosovës a ndonjë pjesëtar i saj, thuhet në një komunikatë të AAK-së.

"Ne i besojmë Gjyqit të Hagës, por ne i besojmë edhe luftës së drejtë e çlirimtare të Ushtrisë Çlirimtare të Kosovës e të Fatmir Limajt. Për Aleancën për Ardhmerinë e Kosovës, tendenca për ta gjetur elementin kriminal në luftën e Ushtrisë Çlirimtare të Kosovës është tendencë politike me prapavijë për procesin e tashëm politik.

 

Në Kosovë është zhvilluar një luftë çlirimtare kundër pushtuesit serb dhe nga askush nuk mund të bëhet asnjë relativizim i këtij raporti", thuhet më tutje në këtë komunikatë dhe theksohet se AAK-ja beson se Tribunali i Hagës në fund do ta nxjerrë të vërtetën se UÇK-ja, Fatmir Limaj dhe bashkëluftëtarët e tij kanë bërë vetëm luftë çlirimtare.

 

 

B.Rexhepi: "Ndjej krenari për zotin Limaj"

 

Prishtinë, 19 shkurt 2003 - Kryeministri i Kosovës Bajram Rexhepi tha se deklarata e djeshme e Fatmir Limajt është mesazh i qartë për ndërkomëtarët se nuk ka nevojë për aksione spektakulare.

 

"Ndjej krenari për zotin Limaj dhe për këtë asnjëherë nuk kam dyshuar", theksoi ai, duke shtuar se kjo "tregon tamam karakterin e tij dhe të shumicës së bashkëveprimtarëve të mi", tha Rexhepi.

 

 

Artanë: Buxheti për vitin 2003 - gjysmë million euro

 

Artanë, 19 shkurt 2003 - Në mbledhjen e tij të fundit, Kuvendi Komunal në Artanë (Novobërdë), që ka një përbërje shumetnike, unanimisht ka miratuar buxhetin për vitin 2003, që peshon rreth gjysmë milioni euro.

Këshilltarët komunalë kanë qenë të përkushtuar në diskutimet e tyre dhe kjo ka rezultuar pozitivisht në procesin e miratimit të buxhetit. Ata i bënë apel administratës komunale që shpenzimi i fondeve të bëhet sipas prioriteteve dhe të shmangen diskriminimet me prapavijë etnike.

Kuvendi i Artanës ka nderuar me mirënjohje mjekët dhe personelin mjekësor që mori pjesë në kampet mjekësore të KFOR-it, të organizuara më 15 dhe 29 janar.

 

 

Mbrëmë në Prishtinë ndodhi një shpërthim i fortë, por s'ka të lënduar

 

Prishtinë, 19 shkurt 2003 - Një mjet shpërthyes është hedhur mbrëmë, rreth orës 18.30, në butikun "Monto Bene" në Prishtinë, në lagjen "Dardania" të Prishtinës. Shpërthimi ka shkaktuar vetëm dëme materiale.

 

Në vendin e ngjarjes, menjëherë pas shpërthimit, kanë shkuar forca të mëdha të policisë së UNMIK-ut, të Shërbimit Policor të Kosovës dhe të KFOR-it. Njoftohet se pronari i dyqanit dhe disa dëshmitarë të tjerë janë marrë në polici për të dëshmuar rreth këtij akti. Autoritetet policore nuk dhanë kurrfarë njoftimi lidhur me këtë akt.

 

 

Shefi i diplomacisë britanike dhe ministri i mbrojtjes kanë përshëndetur arrestimet në Kosovë

 

Londër, 19 shkurt 2003 - Shefi i diplomacisë britanike Xhek Strou dhe ministri i mbrojtjes i Britanisë Xhef Hun kanë përshëndetur arrestimet e katër shqiptarëve të Kosovës të bëra sipas urdhërit të Tribunalit të Hagës. Ata kërkuan nga udhëheqësit e Kosovës që t'i mbështesin akuzat e Hagës.

 

Bashkëpunimi i plotë me Gjykatën e Hagës është obligim ndërkombëtar thanë Strou dhe Hunë, lidhur me arrestimet e tre të akuzuarve për rrëmbimin dhe vrasjen e 23 serbëve dhe shqiptarëve të Kosovës në qershor dhe korrik të vitit 1998.

Arrestimet tregojnë se qeveria britanike dhe bashkësia ndërkombëtare nuk i kanë harruar veprat e këqij nga të dyja anët në Kosovë dhe janë të vendosura që personat përgjegjës të nxirren para drejtësisë në Hagë ku do të gjykohen në mënyrë të ndershme, thanë Strou dhe Hun.

 

 

Mini e ka cilësuar shumë të suksesshëm operacionin e arrestimit ndaj tre shqiptarëve të kërkuar nga Tribunali

 

Prishtinë, 19 shkurt 2003 - Komandanti i forcave paqeruajtëse të KFOR-it, gjenerali italian Fabio Mini e ka cilësuar si shumë të suksesshëm operacionin e arrestimit ndaj tre shqiptarëve që janë kërkuar për të parën herë nga Tribunli i Hagës. Ai ka bërë publike një letër të vlerësimeve të tij për arrestimet dhe gadishmërinë e KFOR-it që të që të bashkëpunojë me Tribunalin e Hagës.

"KFOR-i do të vazhdojë të bëjë punën e vet duke kryer mandatin në mënyrë solide dhe të drejtë. NATO do të bashkëpunojë në hetime dhe gjykime të krimeve të luftës, si dhe të shkeljeve të tjera të ligjit ndërkombëtar", është shprehur në këtë letër gjenerali Mini.

 

 

Fatmir Limaj nuk ka pasur rast të dorëzohet vetë

 

Hagë, 19 shkurt 2003 - Nga Haga njoftohet se Fatmir Limaj është arrestuar në Kranj të Sllovenisë. Arrestimi është bërë befas dhe i akuzuari nuk ka pasur rast të dorëzohet vetë, ashtu siç kishte paralajmëruar.

 

Përfaqësuesit e Tribunalit të Hagës kanë thënë se prononcimi i Limajt nuk ka mjaftuar, sepse sipas procedurës ai është dashur të kontaktojë zyrën e Tribunalit në Prishitnë apo në Hagë për të shprehur vullnetin për dorëzim.

 

Zyrtarët e Tribunalit thonë se arrestimi i Fatmir Limajt është bërë dje në orën 17,52 në Kranj, ndërkaq në orën 19.00 Limaj është paraqitur para gjykatës së qarkut.

 

 

Arrestohet Fatmir Limaj

 

Hagë, 19 shkurt 2003 - Deputeti Fatmir Limaj dhe një ndër udhëheqësit e Partisë Demokratike të Kosovës që akuzohet nga Gjykata Ndërkombëtare e Hagës për krime lufte është arrestuar, ka njoftuar zëdhënësja e kësaj gjykate.

Florans Hartman i ka deklaruar BBC-së se Fatmir Limaj, ish-komandanti i lartë i UÇK-së ishte ndaluar, por ajo shtoi se nuk ishte e drejta e saj të tregonte se në ç'vend ishte arrestuar. Sipas BBC-së arrestimi ka ndodhur në Austri, ndërkaq "Zëri i Amerikës" thotë se Fatmir Limaj është arrestuar në Kranjska Gora të Sllovenisë.

Fatmir Limaj është akuzuar bashkë me tre ish-komandantë të UÇK-së, për torturimin dhe vrasjen e serbëve dhe shqiptarëve në vitin 1998. Ndërkaq, tre të arrestuarit tjerë po me këtë akuzë janë transferuar tashmë për në Hagë.

 

Tre shqiptarët e arrestuar Haradin Balaj, Isak Musliu dhe Agim Murtezi, por edhe Fatmir Limaj ish-pjesëtarë të UÇK-së akuzohen nga Tribunali i Hagës se kanë torturuar dhe vrarë të burgosur shqiptarë dhe serbë gjatë kohës së konfliktit në Kosovë.

 

 

Del Ponte kritikon KFOR-in

 

Podgoricë, 19 shkurt 2003 - Kryeprokurorja për krime të luftës në Hagë, Karla del Ponte ka kritikuar forcën paqeruajtëse në Kosovë, KFOR pse ka lejuar Fatmir Limajn që të udhëtojë jashtë Kosovës në një kohë që ndaj tij rëndon aktpadia për krime lufte.

Ndërkohë zoti Fatmir Limaj mediave të Prishtinës u tha se nuk i trembej Gjykatës e Hagës dhe do të dorëzohej atje vullnetarisht, sepse, siç u shpreh ai, ishte krenar për të kaluarën dhe për çdo veprim të ndërmarrë prej tij në të tashmen.

Zoti Limaj u largua nga Kosova të premten në një udhëtim biznesi, megjithë fletarrestin e lëshuar ndaj tij dhe tre ishqiptarëve të tjerë para tre javësh.

 

 

Në Preshevë protestuan 7 mijë shqiptarë kundër arrestimit të shtatë pjesëtarëve të ish-UÇPMB-së

 

Preshevë, 19 shkurt 2003 - Sot në qendër të Preshevës protestuan rreth 7 mijë shqiptarë kundër arrestimit të shtatë pjesëtarëve të ish- UÇPMB-së dhe kërkuan lirimin e tyre. Me këtë rast u brohoritën parulla "Ndal dhunën" dhe "Liri çlirimtarëve".

Në këtë tubim foli kryetari i degës së LBD Orhan Rexhepi, i cili akuzoi regjimin e Beogradit në krye me Nebojsha Çoviqin, se po e vazhdon rrugën e mësuesit të tij Millosheviq për burgosjen e shqiptarëve. Në këtë tubim u paraqitën disa kërkesa: lirimi i menjehershëm i shtatë të arrestuarve, rishikimi i marrëveshjes shqiptaro-serbe dhe formulimi i kërkesave të reja për inicimin e bisedimeve të reja për zgjidhjen e çështjes së shqiptare në luginën e Preshevës, në bazë të rezultateteve të referendumit të vitit 1992. Tubimim kaloi pa incidente.

 

 

Kryeprokurorja e Hagës Del Ponte në Shkup

 

Shkup, 19 shkurt 2003 - Kryeprokurorja e Tribunalit të Hagës Karla del Ponte ka deklaruar sot në Shkup se pesë rastet që nga Maqedonia i janë dorëzuar Tribunalit të Hagës për krime lufte ende po hetohen dhe se fill pas përfundimit të hetimeve rezultatet do të bëhen publike.

 

Del Ponte ka mohuar se ka ardhur për rastet e reja, por nga autoritetet maqedonase ka kërkuar të nxirret ligji për bashkëpunim me Tribunalin e Hagës.

 

 

Ish-futbollisti i Dritës së Gjilanit Emin Ismajli që nga ky sezon do të luajë në Regensburg të Gjermanisë

 

Regensburg, 19 shkurt 2003 - Që nga ky sezon edhe një futbollist kosovar do të luajë në Gjermani. Ky është Emin Ismaili ish-futbollist i Dritës së Gjilanit. Ky futbollist 20 vjeçar nënshkroi kontratën dyvjeçare për skuadrën gjermane "SSV Jahn Regensburg" nga Regensburgu.

Skuadra "SSV Jahn Regensburg", bënë gara në ligën e tretë gjermane dhe momentalisht është në pozitën e parë të klasifikimit dhe pretendon që vitin e ardhshëm të bëjë gara në ligën e dytë Gjermane.

 

 

Berisha: opozita do të bëjë të gjitha përpjekjet për rrëzimin e qeverisë Nano

 

Tiranë, 19 shkurt 2003 - Kryetari i Partisë Demokratike Sali Berisha deklaroi se opozita do të bëjë të gjitha përpjekjet për rrëzimin e qeverisë së kryeministrit Fatos Nano. Deklarata e zotit Berisha u bë në përfundim të seancës parlamentare për ngritjen e një komisioni hetimor ndaj kryetarit të Bashkisë së Tiranës, Edi Rama.

 

 

Në Shkup u takuan ministri i Mbrojtjes së Maqedonisë dhe ai i Serbisë dhe Malit të Zi

 

Shkup, 19 shkurt 2003 - Dje në Shkup u takuan ministri i Mbrojtjes së Maqedonisë Vllado Buçkovski dhe ai i Serbisë dhe Malit të Zi Velimir Radojeviq.

 

Pas këtij takim ministri maqedonas i Mbrojtjes deklaroi se stabiliteti në rajon është i brishtë dhe se është e domosdoshme që për Serbinë jugore, Kosovën dhe Maqedoninë të arrihet një aksion i koordinuar me NATO-n, UNMIK-un dhe KFOR-in.

 

Ndërkaq ministri i Serbisë dhe Malit të Zi Radojeviq citohet të ketë thënë se të gjitha çështjet kontestuese në rajon të zgjidhen me dialog dhe me mjete politike.

 

 

Debati i Këshillit të Sigurimit lidhur me politiken e Irakut me ndarje të qarta

 

Nju Jork, 19 shkurt 2003 - Debati i Këshillit të Sigurimit lidhur me politiken e Irakut ka përtëritur ndarjet e qarta të KB në këtë çështje. Në emër të BE Greqia pretendoi për pozicionim të perbashkët të vendeve të BE në konfliktin e Irakut.

 

Ambasadori grek në KB Adamantios Vasilakis tha se lufta akoma mund të pengohet. Inspektorëve të armatimit këshilli i sigurimit duhet dhënë kohë dhe mjete të nevojshme. Dhuna guxon të jetë vetëm si ' mjet i fundit ' theksoi Vasilakis.

 

Ambasadori i Irakut Mohammed Aldouri në seancen e hapur të komisionit të KB paralajmëroi se një luftë kundër vendit të tij do të lëkundë forcen bindëse të KB.

 

 

Shrëder kundër një deklarate të re të KS për Irakun

 

Uashington, 19 shkurt 2003 - Kancelari gjerman Gerhard Shrëder është shprehur kundër një deklarate të re të Këshillit të Sigurimit për Irakun. Në një intervistë televizive Shreder tha mbrëmë në Berlin se nuk e sheh asnjë shkak për nxjerrjen e ndonjë dokumenti të tillë.

 

Shröder fillimisht shpjegoi pse dha pëlqimin për një dokument të përbashkët të BE ku si mjet i fundit parashikohet dhuna. "Kjo do të thotë se kur ekzistojnë shkaqet shumë të forta, masat që janë ndërmarrë në Afganistan dhe Kosovë mund të përdoren edhe në këtë rast. Por një gjendje e tillë ende nuk ekziston në rastin e Irakut".

 

 

Siria do të tërheqë një pjesë të trupave nga veriu i Libanit

 

Beirut, 19 shkurt 2003 - Këto ditë Siria do të tërheqë një pjesë të trupave të saj nga veriu i Libanit. Burime ushtarake bëjnë të ditur se kjo është pasojë e marrëveshjeve të presidentëve Bashar El Asad dhe Emile Lahud. Për momentin në Liban janë të stacionuar rreth 20.000 ushtarë sirianë.

 

 

Gjykata në Hamburg pritet të shpallë vendimin e parë në procesin që ka të bëjë me sulmet terroriste të 11 shtatorit

 

Hamburg, 19 shkurt 2003 - Gjykata e landit në Hamburg pritet sot të shpallë vendimin e parë në procesin që ka të bëjë me sulmet terroriste të 11 shtatorit të vitit 2001. Mounir El Mutasadek akuzohet për bashkëveprim në vrasjen e 3045 personave dhe bashkim për qëllime terroriste.

 

Aktakuza ka kërkuar dënimin e tij me 15 vjet heqje lirie, ndërkohë që marokani i akuzuar pohonte se nuk dinte asgjë lidhur me planet për sulmet terroriste ndaj Qendrës Tregtare Botërore dhe objektivave tjera në SHBA. Mbrojtësit e tij kanë kërkuar lirimin e të akuzuarit.

 

 

NATO ka aprovuar sot një plan për të dërguar në Turqi pajime mbrojtëse

 

Bruksel, 19 shkurt 2003 – NATO ka aprovuar sot (të merkurën) një plan për të dërguar në Turqi pajime mbrojtëse pas një kompromisi që u arrit pas përçarjeve të aleancës, që u shfaqën lidhur me politikën në Irak, e që është i vetmi vend anëtar i NATO-s në kufi me Irakun, njofton BBCWorld.

 

Aleanca sipas këtij plani do të dërgojë në Turqi aeroplanë radarë Avaks, Patriot dhe bateri kundërraketore.

 

 

Në Venezuelë janë ekzekutuar tre disidentë ushtarakë dhe një vajzë pjesëmarrëse në protestat kundërqeveritare

 

Karakas, 19 shkurt 2003 – Tre disidentë ushtarakë dhe një vajzë pjesëmarrëse në protestat kundër presidentit venezuelan, Hugo Çavez, janë vrarë me ekzekutim pasi ishin kidnapuar, lidhur dhe bërë bashkë, njofton Rojter. Policia ka refuzuar të komentojë hetimet apo të diskutojë për motivet e mundshme.

 

Të katër viktimat kanë marrë pjesë vazhdimisht në protestat mbi 120 ditëshe në Plaza Altamira kundër qeverisë së Çavezit. Ushtarakët e vrarë gjithashtu iu kanë bashkuar thirrjes për rezistencë popullore, të udhëhequr nga gjen. Enrike Medina, kundërshtar i Çavezit.

 

 

Mbi 5 mijë iranianë, përkrahës të forcave opozitare irakiane, kanë hyrë në pjesën veriore të Irakut

 

Londër, 19 shkurt 2003 – Mbi 5 mijë iranianë, përkrahës të forcave opozitare irakiane kanë kaluar kufirin iranian dhe kanë hyrë në pjesën veriore të Irakut me qëllim të sigurimit të kufirit në rast të luftës, bën të ditur Rojer, sipas gazetës "Fajnënshëll Tajms".

 

Duke cituar zyrtarë të lartë iranianë, kjo gazetë londineze thotë se këto trupa me pajime të rënda janë nën komandën e Ajatullah Muhamed Beqir al-Hakim, lider i shquar opozitar shik musliman i Irakut, i cili ka qenë strehuar në Irak që nga viti 1980.

 

 

Trupat izraelite gjatë një sulmi në Rripin e Gazës kanë vrarë të pakten 12 palestinezë

 

Gaza, 19 shkurt 2003 – Trupat izraelite me tanke dhe helikopterë kanë kryer gjatë natës sulme në Rripin e Gazës duke vrarë të pakten 11 palestinezë, kanë bërë të ditur dëshmitarët dhe burimet mjekësore, njofton Rojter në një njoftim të sotëm (e merkurë).

 

Ndërkaq, AFP bën të ditur se në këto sulme janë vrarë të pakten 10 palestinzë, por shton se i 11-të palestinez ka bërë vetëvrasje me një shpërthim, kurse viktima e 12-të është një palestinez i sëmurë mentalisht, që është vrarë gjatë orës policore në qytetin Nablus të Bregut Perendimor.

 

Po kështu sipas burimeve mjekësore njoftohet se gjatë të gjitha këtyre operacioneve janë plagosur gjithsej 27 palestinezë.

 

 

Të paktën tre ushtarë dhe shtatë pjesëtarë të grupit të Abu Sajefit janë vrarë në Filipine

 

Manila, 19 shkurt 2003 - Të paktën tre ushtarë dhe shtatë pjesëtarë të grupit kryengritës musliman të Abu Sajefit janë vrarë sot në përleshjet me forcat qeveritare në jug të Filipineve. Zyrtarët ushtarakë kanë theksuar se lufttimet ende vazhdojnë në xhuglat rreth qytetit Patakula.

 

Ndërkaq gjatë përleshjeve të djeshme janë vrarë katër pjesëtarë të grupit të Abu Sajefit dhe një ushtar qeveritar, njoftojnë agjencitë e lajmeve.

 

 

Nga të ftohtit në SHBA kanë vdekur 44 vetë

 

Uashington, 19 shkurt 2003 - Të paktën 44 vetë kanë vdekur nga përkeqësimi i motit dhe të ftohtit në SHBA. Lartësia e dëborës edhe më tutje po e bllokon trafikun në viset lindore të vendit.

 

 

Të pakten 29 kryengritës marksist dhe pjesëtarë të milicisë së djathtë janë vrarë gjatë përleshjeve ndërmjet tyre

 

Bogota, 19 shkurt 2003 – Të pakten 29 kryengritës marksistë dhe pjesëtarë të milicisë së djathtë janë vrarë gjatë përleshjeve ndërmjet tyre në një zonë të jashtëligjshme të Kolumbisë afër një vendtrajnimi, ku ushtarët specialë amerikanë po trajnojnë trupat vendore, njofton Rojter.

 

Gjen. Morales, një komandant rajonal i armatës, ka deklaruar se luftimet janë zhvilluar afër fshatit Tame, i cili rrethohet me xhungël dhe savana dhe është në një zonë ndërluftuese të disa grupeve rivale të armatosura.

 

 

Presidenti Bush tha se nuk do të lejojë që protestat nëpër botë të bllokojnë luftën kundër Irakut

 

Uashington, 19 shkurt 2003 - Presidenti amerikan Xhorxh Bush tha se nuk do të lejojë që protestat në shkallë botërore ose opozita mes disa vendeve aleate të bllokojnë një luftë të mundshme të udhëhequr nga Shtetet e Bashkuara kundër Irakut.

Presidenti Bush tha se lufta vazhdon të jetë mjeti i fundit. Ai shtoi se Këshilli i Sigurimit të OKB-së duhet të detyrojë respektimin e rezolutave të tij që i kërkojnë Irakut të heqë dorë nga armët e shkatërrimit në masë. Shtëpia e Bardhë thotë se Shtetet e Bashkuara mund të propozojnë këtë javë një rezolutë të re në Këshillin e Sigurimit, e cila do të autorizonte përdorimin e forcës kundër Irakut.

 

 

Turqia paralajmëron se mbështetja e saj për verpimet ushtarake të SHBA në Irak mund të ndryshojë

 

Ankara, 19 shkurt 2003 - Udhëheqësi i partisë turke në pushtet po paralajmëron se mbështetja e Ankarasë për veprimet ushtarake të udhëhequra nga Shtetet e Bashkuara kundër Irakut mund të ndryshojë.

Paralajmërimi i Rexhep Tajip Erdogan bëhet ndërkohë që parlamenti i Turqisë shtyu votimin për të lejuar dislokimin e trupave amerikane në tokën e tij në rast të një lufte kundër Irakut.

Kryeministri turk tha se parlamenti nuk do të votojë derisa Ankaraja zgjidh disa çështje me Shtetet e Bashkuara. Turqia kërkon miliarda dollarë në grante hua të garantuara për të mbrojtur ekonominë e saj nga një luftë e re.

 

 

SHBA-ja gati për një rezolutë të dytë

 

Uashington, 19 shkurt 2003 - Amerikanët thonë se janë gati të pranojnë një rezolutë të dytë të Këshillit të Sigurimit, këtë javë apo javën e ardhshme, megjithë që vazhdojnë të këmbëngulin se ajo nuk është e nevojshme.

Presidenti Bush tha se SHBA-ja po punonte ngushtë me aleatët për rezolutën e re që mund të jetë gati brenda disa ditësh, në të cilën do të autorizohet përdorimi i forcës ndaj Irakut.

Presidenti Bush tha se mbështetja e OKB-së megjithëse e dobishme nuk ishte e nevojshme.

Gjatë një konference për shtyp në Uashington presidenti tha se nuk ishte dakord me të gjithë ata njerëz që nuk e shihnin Sadam Huseinin si një rrezik për paqen.

Bush lavdëroi kryeministrin britanik Bler që u rrezistoi protestave dhe e quajti atë një udhëheqës kurajoz.

 

 

Bler: Shumica e anglezëve do të mbështesin luftën kundër Irakut

 

Londër, 19 shkurt 2003 - Kryeministri britanik, Toni Bler ka deklaruar se beson që shumica e atyre anglezëve, të cilët e kundërshtojnë luftën kundër Irakut, do të ndryshojnë qëndrimin e tyre nëse fillon sulmi, por ka theksuar se nuk po nxitohet të fillohet lufta.

 

"Nuk ka nxitim drejt luftës. Ne kemi pritur 12 vite dhe pastaj shkuam nëpëmjet Kombeve të Bashkuara. Tani kemi tre muaj që i kemi dhënë liderit irakien Saddam Hussein atë që e quajmë shans final", ka thënë kryeministri britanik.

 

 

Anan: Iraku doemos duhet të respektojë obligimet dhe të çarmatoset

 

Romë, 19 shkurt 2003 - Sekretari i përgjithshëm i Kombeve të Bashkuara, Kofi Annan ka deklaruar se lufta nuk është e pashmangshme, por ka theksuar se Iraku doemos duhet të rspektojë obligimet e veta ndaj Këshillit të Sigurimit dhe të çarmatoset.

 

"Të gjithë e ndiejmë se lufta nuk është e pashmangshme dhe duhet të forcojmë përpjekjet tona për të gjetur zgjidhje paqësore, por kjo kërkon gjithashtu që Iraku të përmbushë obligimet e veta dhe kërkesat që i ka vënë Këshilli i Sigurimit", ka thënë Kofi Annan pas bisedimeve me kryeministrin italian.

 

 

Inspektorët kanë vizituar nëntë objekte në Irak në kërkim të armëve

 

Bagdad, 19 shkurt 2003 - Inspektorët e Kombeve të Bashkuara për armatimin kanë vizituar dje nëntë objekte në Irak në kërkim të armëve të shkatërrimit në masë, në mesin e të cilëve edhe tre fabrika për prodhim të raketave.

"Irakianët janë shumë më të frytshëm kësaj here se sa ishin gjatë janarit. Është kjo arësyeja që doktor Blix dhe doktor ElBaradei kanë parë shenja inkurajuese kësaj here dhe shpresojmë se autoritetet irakiene do të bashkëpunojnë edhe më tej me ne", ka deklaruar në Bagdad zëdhënësi i inspektorëve të Kombeve të Bashkuara, Hiro Ueki.

 

 

Iraku rrezikon luftë nëse nuk bashkëpunon plotësisht me KB për t'u çarmatosur

 

Bruksel, 19 shkurt 2003 - Trembëdhjetë kandidatët për Bashkimin Evropian kanë tumirë një deklaratë të BE-së me të cilën tërhiqet vërejtja se Iraku rrezikon luftë nëse nuk bashkëpunon plotësisht me kërkesat e Kombeve të Bashkuara për t'u çarmatosur.

 

Deklarata ishte miratuar në samitin e djeshëm emergjent të BE-së në Bruksel, por 13 vendet thanë në deklaratën e përbashkët se anëtarët dhe aspirantët e BE-së janë të vendosur të saktësojnë qëndrimin e përbashkët dhe të shmangin "linjat e reja të përçarjes".

Copyright©2000-2003 Trepca.net - Të gjitha të  drejtat e rezervuara.