Reagim i Degës së LDK të Gjilanit

Një fushatë e padenjë e TV "MENI-t" kundër Degës së LDK-së dhe strukturave udhëheqëse komunale në Gjilan

Gjilan, 18 shkurt 2003 - Meqenëse në veprimtarinë e deritashme 13 vjeçare të LDK të Gjilanit nuk e kemi praktikuar dhe dëshiruar që t'ju reagojmë mediave elektronike, qofshin ato lokale dhe qendrore si dhe mediave të shkruara në nivel të Kosovës po, përkundrazi me ta kemi bashkëpunuar dhe ruajtur relacionet edhe kur na kanë kritikuar pa të drejtë dhe, e kemi respektuar gjithherë edhe mendimin ndryshe (dhe për këtë kemi një mal argumentesh), ju zotërinj të TV MEN-it na keni detyruar t'jua tërheqim vëmendjen tonë në këto çështje:

1. Si Degë e LDK-së, edhe kur kemi qenë ngushtë dhe e kemi pasur gjithnjë vështirë veprimtarinë e përditshme politike, në kohën e paraluftës, nuk ju kemi shmangur transparencës dhe komunikimit me publikun dhe opinionin e gjerë.

Të njejtën gjë e kemi bërë edhe në periudhën e pasluftës e vazhdojmë për ta bërë edhe më tutje, pikërisht pse tash frymojmë dhe veprojmë më shlirë.

Andaj, akuzat që janë lëshuar mga media juaj, në këta tre muajt e fundit, kanë qenë fund e krye të pabaza, qofshin përmes të ftuarve tuaj, qoftë përmes ndonjë komenti a ankete dhe spekulim rrugësh e kafiterish.
Sidomos, pas disa mendimeve të ndryshme që çuan edhe në krijimin e fraksionit brenda kryesisë së Degës, lidhur me udhëheqjen komunale.

Ju keni qenë tepër të njëanshëm, madje edhe tendencioz dhe në shërbim të Padronit Tuaj që është anëtar i Kryesisë së Degës nga maji i vitit 1998-të dhe më së paku në funksion të një mediumi të pavarur.

Ne kemi toleruar deri tash dhe, nuk ju kemi denoncuar as përmes opinionit publik, duke pritur se do ta ndalni këtë fushatë dhe, natyrisht nuk ju kemi denoncuar as në mekanizmat që tash për tash mbrojnë një kodeks të informimit publik.

Por, kjo nuk do të thotë që të vazhdojmë së injoruari dhe heshturi ndaj akuzave të pabaza, pavarësisht a lansohen prej jush apo prej të ftuarve tuaj. Kryesorja nga shtëpia e juaj informative në mënyrën më të vrazhdë dhe tendencioze po portretohet Dega e LDK-së në Gjilan dhe një pjesë e konsideruar e udhëheqjes së komunës që nuk mendojnë dhe veprojnë si Padroni i Juaj që është po në këto struktura.

2. Gjithashtu, si Degë e LDK-së,ne ju kemi dhënë përkrahje që nga themelimi, kemi bashkëpunuar madje edhe përmes formave të reklamës e marketingut dhe, asnjëherë nuk ju kemi imponuar ndonjë çështje në politikën tuaj redaktuese, pavarësisht se në opinion që nga fillimi i krijua një bindje e gabuar se do të jeni në shërbim tonin.

Ju, duke dashur për ta demantuar këtë opinion negativ, jo njëherë, por shpeshherë edhe na keni shkelur e dëmtuar, veçmas gjatë fushatave parazgjedhore si dhe rreth ndonjë informate a prononcimi që e kemi bërë si Degë.

Ne, megjithatë nuk e kemi cënuar asnëherë pavarësinë e punës dhe veprimtarisë suaj.
Kemi qenë Dega e vetme që i ka dënuar dhe gjykuar disa sulme të dyshimta dhe të paidentifikuara deri më tash kundër TV MEN-it, sepse e kemi ditur dhe kuptuar çka do të thotë të jesh i sulmuar, sidomos nga persona enigmatikë.

3. Edhe në rastin e manifestimit të disa pakënaqësive brenda subjektit tonë, sidomos pas zgjedhjeve të dyta lokale, ne nuk kemi qenë të mbyllur, as i kemi fshehur tendencat dhe interesat e akëcilit "grup politik" brenda LDK-së.

Por, keni qenë ju që e morët rolin e një prokurori medial, një gjykatori publik dhe një dezinformuesi gjithashtu publik, gjithnjë në funksion të shërbimit të verbër ndaj Padronit Tuaj, i cili ka qenë për këto vite figura më e privilegjuar në komunë, veçanërisht nga fusha e afarizmit privat, anipse ka pasur edhe të tjerë dhe ende janë që më shumë se Padroni juaj e kanë ndihmuar LDK-në.

Kjo, ka qenë edhe arsyeja e vetme që kohëve të fundit mund të jenë refuzuar do ftesa "rrugësh" për të ardhur mysafir në shtëpinë tuaj mediale dhe nga ajo shtëpi për t'i denoncuar ata që më së shumti i kanë mbështetur dhe përkrahur denoncuesit.

Vetëm shikoni galerinë e këtyre denoncuesve që kanë "vizituar" këtë shtëpi tuajën mediale dhe, fare lehtë mund të bindeni se kanë qenë njerëzit më të privilegjuar. Dhe, akoma janë. Asnjërit nuk i mungon asgjë përkundër mllefeve që i ka adresuar kundër shumicës së kryesisë së Degës dhe Degës së LDK në përgjithësi që nuk mendon si ata.

4. Pastaj, besoj që edhe ajo shtëpi juaja mediale i ka do rregulla që ju mëtoni për t'u zbatuar. Nëse ato nuk zbatohen, besoj që nuk e leni pa marrë masa. Vetëm shikoni sa gazetarë janë larguar prej kësaj shtëpie.
Edhe në LDK ekziston një statut i partisë i cili duhet të respektohet dhe, nëse nuk respektohet, natyrisht që pason sanksionimi i përgjegjësisë.

 

Nga personazhet tuaja të gjalla keni mundur të kërkoni (nëse jo nga ne që realisht përfaqësojmë shumicën dërmuese) një kopje të statutit dhe të shihni nenet 49 dhe 50-të.

Pse kemi qenë tolerues si parti, edhe tolerues thuaja ekstrem, nuk do të thotë që s'dimë dhe s'mundemi për të vënë rend në parti.

5. Rreth përfoljeve nga shtëpia juaj mediale për gjoja manipulimet në Kuvendin e katërt zgjedhor të LDK të Gjilanit, ju themi se ka qenë Kuvendi më transparent dhe më i rregullt që është mbajtur në ndonjë Degë të LDK-së në Kosovë.

Pse ju tash i merrni nën mbrojtje ata që realisht nuk fituan besimin e delegatëve, është çështje juaja. Tekefundit, të pakënaqurit dikush duhet t'i ngushëllojë.

Edhe në rastin kur nuk arritën për t'i realizuar disa synime puçiste qoftë në udhëheqjen komunale, qoftë edhe në vetë Degën e LDK-së, ju mund ta merrni të drejtën për t'i mbrojtur interesat e tyre dhe për t'ju bërë avokatllëk.

6. Na akuzoni edhe për shumë gjëra në nivelin komunal. Aq shumë gjëra sa nuk mund tash as t'i përmendim. Po, pse nuk na akuzoni edhe për faktin se si komunë më së shumti e kemi favorizuar TV MEN-in. Dhe, për këtë ekzistojnë dëshmitë.

 

Poashtu, pse nuk na akuzoni edhe për Padronin Tuaj, firma e të cilit gjithashtu ka qenë më e privilegjuara në komunë dhe, dihet prej kujt dhe pse është favorizuar.

7. A e dini, e sigurisht që e dini, se është e vetmja firma MEN në Gjilan që asnjëherë në këto vite të pasluftës nuk i ka përmbushur obligimet komunale. E padroni i saj qe dy mandate është këshilltar komunal i propozuar dhe i zgjedhur nga LDK-ja.

Nuk po flasim edhe për shumë e shumë obligime të tjera të pakryera, që ju mirëfilli i dini.
Nëse kërkoni transparencë nga të tjerët, bëhuni edhe vetë pak transparentë.

8. Tek ana e familjarizmit dhe e mbrojtjes së interesave. Pikërisht ata që kanë sfiluar nëpër shtëpinë tuaj mediale më së shumti i kanë mbjellë këto rrënjë të liga në shoqërinë tonë. Mund të ofrohen dëshmi me bollëk për këtë, jo vetëm për nga mbiemri por edhe për nga ilakaja.

9. Tek dëmi ndaj shoqërisë. Më së shumti ju takon pikërisht këtyre njerëzve që shtëpia juaj i ka marrë nën mbrojtje sepse janë në shërbim (si ju) edhe Ata të Padronit Tuaj.

Edhe për këto, thotë populli, nëse është hangër pitja, tepsia ka mbetur.

Andaj, intenca jonë ka qenë dhe mbetet që shtëpia juaj, të jetë vërtetë një shtëpi mediale në shërbim të qytetarëve se sa të disa individëve që për interesa të ngushta personale e grupore janë në gjendje për ta shkatërruar një investim më shumë se 13 vjeçar.

Të jeni të bindur se nuk do ta arrijnë këtë. As edhe me ndihmën tuaj.

Duke besuar se do t'i shërbeni një ditë vërtetë informimit publik, ju përshëndesim.

P.S
Këtë reagim sipas rregullave të informimit publik, të vëna nga OSBE është dashur ta emitojë mbrëmë TV MEN-i. Ata vetëm kanë lajmëruar se e kanë pranuar një reagim dhe asgjë më shumë pos një ftese që në cilësinë e të akuzuarit të marrim pjesë në një nga emisionet e tyre. Megjithatë është dashur ta emitojnë reagimin. Andaj, ne për hirë të informimit publik, po ua dërgojmë tash edhe juve dhe masmediave të tjera për publikim.

Sabit Rrustemi, zëdhënës i Degës së LDK-së në Gjilan.

Copyright©2000-2003 Trepca.net - Të gjitha të  drejtat e rezervuara.