Lajme

E marte, 18 shkurt 2003

Përmbajtja:

• Presidenti Rugova priti ministren e Mbrojtjes së Suedisë, zonjën Leni Bjorkland

• Idriz Balaj - Togeri dyshohet edhe për zhdukjen e tre anëtarëve të familjes Krasniqi nga Turjaka e Pejës

• Me urdhër të Tribunalit të Hagës arrestohen Haradin Balaj, Isak Musliu dhe Agim Murtezi

• As në seancën e sotme nuk u bë leximi i aktakuzës

• Gjykimi kundër grupit të Llapit filloi pa praninë e KMDLNJ-së dhe të gazetarëve

• Entoni Adams thotë se të tre të arrestuarit janë dërguar në një vend të sigurtë

• Në Gjykatën e Qarkut në Pejë filloi procesi gjyqësor kundër një serbi për krime ndaj shqiptarëve

• Ishte i rremë alarmi se brenda kafiterisë "Gruvi" janë vendosur dy mjete shpërthyese

• Karla Del Ponte në Beograd

• Qeveria e Maqedonisë shpërthimin që ndodhi në Strugë e cilësoi si akt terrorist

• Rritet numri mbi 130 i të djegurve në Kore

• Forcat izraelite kanë vrarë sot një anëtar të kërkuar të Hamasit

• Në një tren të metros në Kore dyshohet të jenë djegur rreth 100 udhëtarë

• BE-ja i kërkon Irakut të zbatojë rezolutat e OKB-së për çarmatim

• Shiraku kundërshton një rezolutë të re për çarmatimin e Irakut

• Trupat amerikane në Turqi - pasi Uashingtoni dhe Ankaraja të arrijnë marrëveshje

• Robertson gjendet në Bullgari

• Delegacionet izraelite dhe palestineze në Londër takohen me katërshen për Lindjen e Mesme

• Në SHBA kanë humbur jetën 12 vetë si pasojë e motit të keq

Presidenti Rugova priti ministren e Mbrojtjes së Suedisë, zonjën Leni Bjorkland

 

Prishtinë, 18 shkurt 2003 - Presidenti i Kosovës Ibrahim Rugova priti sot ministren e Mbrojtjes së Suedisë, zonjën Leni Bjorkland.   Pas takimit Presidenti Rugova tha se ka biseduar me zonjën ministre për progresin e arritur në Kosovë në të gjitha fushat e jetës, në peiudhën e pasluftës dhe e ka falënderuar Suedinë për angazhimin e saj për Kosovën gjatë luftës dhe pastaj në rindërtimin e vendit, por edhe për prezencën ushtarake, humanitare etj.

 

Poashtu Presidenti Rugova tha se e ka njoftuar zonjën Bjorkland me objektivat e Kosovës në planin ekonomik, atë të privatizimit si dhe lidhur me integrimin e grupeve etnike në shoqërinë e një Kosove që, siç tha Presidenti, insiston të njihet sa më parë, dhe të integruar në BE dhe në NATO.

 

"Ne punojmë në rrugën e përmbushjeve të standardeve ndërkombëtare, sepse Kosova sa më shpejt që të integrohet në Evropë do ta qetësojë rajonin dhe do të ketë një perspektivë më të madhe, si dhe qasje në institucionet financiare ndërkombëtare e diplomatike", tha Presidenti Rugova, duke thënë se ka kërkuar nga zonja ministre që të vazhdojë përkrahja e Suedisë për Kosovën në të gjithë fushat, në planin ekonomik dhe në bashkëpunimin e përgjithshëm.

Ndërkaq, zonja Bjorkland tha se Suedia është e interesuar të mbështesë Kosovën në zhvillimin e saj.

I lutur të kementojë arrestimin e djeshëm të tre shqiptarëve me urdhër të Tribunalit të Hagës, Presidenti Rugova tha se kjo është çështje e drejtësisë.

 

"Ne jemi që të vendoset shteti i së drejtës në Kosovë, pra të gjitha institucionet dhe partitë politike". Arrestimet që kanë ndodhur janë çështje e gjykatës së Hagës dhe Kosova si të gjithë vendet e rajonit do të bashkëpunojë me gjykatën e Hagës. Kjo gjykatë ka ingjerenca të veçanta në të gjitha vendet fqinje, dhe duhet të bashkëpunuar me gjykatën e Hagës.

Të arrestuarit janë vetëm të dyshuar dhe nëse nuk kanë bërë asgjë ata do të lirohen, sepse kjo është drejtësia, theksoi Presidenti Rugova, i cili përgjithësisht gjendjen e sigurisë në Kosovë e vlerësoi të mirë.

 

 

Idriz Balaj - Togeri dyshohet edhe për zhdukjen e tre anëtarëve të familjes Krasniqi nga Turjaka e Pejës

 

Pejë, 18 shkurt 2003 - Të hënën në Gjykatën e qarkut në Pejë është marrë në pyetje Idriz Balaj, i njohur me emrin e luftës "Togeri", i dënuar kohë më parë me 15 burgim, për vrasjen e katër ish-pjesëtarëve të brigadës "Mërgimi", e tani i dyshuar për vrasjen e tre anëtarëve të famljes Krasniqi.

Idriz Balaj tani dyshohet se bashkë me pjesëtarët e tjerë të njësitit special "Shqiponjat e zeza" të ish-UÇK-së, me të cilin komandonte ai, më 4 shkurt të vitit 1999 ka shkuar në fshatin Turjakë të Pejës, ka marrë tre anëtarët e familjes:

 

Gjylshahe Krasniqin (55), Xhevat Krasniqin (20) dhe Valbona Krasniqin (16). Që nga ajo natë nuk dihej për fatin e tyre dhe ata konsideroheshin të zhdukur.

 

Në propozimin për zbatimin e hetimeve shpjegohet se familja Krasniqi dyshohet të ketë bashkëpunuar me regjimin e Serbisë dhe se Balaj ka pasur si motiv këtë fakt për të sulmuar familjen Krasniqi, shkruan shtypi i sotëm.

Avokati i Idriz Balajt thotë se klienti i tij ka deklaruar para gjykatës së kurrë nuk ka vepruar në komunën e Pejës as në fshatin Turjakë.

 

 

Me urdhër të Tribunalit të Hagës arrestohen Haradin Balaj, Isak Musliu dhe Agim Murtezi

 

Bruksel, 18 shkurt 2003 - Pjesëtarët e KFOR-it kanë arrestuar dje tre shqiptarë në bazë të një urdhërarresti të Tribunalit të Hagës. Zyrtarët e NATO-s në Bruksel konfirmuan edhe identitetin e të arrestuarve dhe këta janë:

 

Haradin Bala nga fshati Korraticë e Epërme nga komuna e Gllogocit, i njohur me nofkën "Shala", i lindur më 1957, baba i shtatë fëmijëve, pastaj Isak Musliu me nofkën "Çerçizi" (i arrestuar ditë më parë nga KFOR-i amerikan në Ferizaj) nga Krojmiri i Lipjanit dhe Agim Murtezi me nofkën "Murrizi".

 

Emrat e tyre figurojnë në aktakuzën për krime lufte të ngritur nga Tribunali i Hagës konfirmuan burimet nga selia e NATO-s në Bruksel. Thuhet se operacioni i arrestimeve ka filluar pas konsultimeve me krerët e UNMIK-ut dhe i njëjti ka kaluar pa kurrëfarë pasojash.

Të tre ata akuzohen për veprimtarinë e tyre në kohën kur ishin pjesëtarë të ish-UÇK-së. Sipas aktakuzës bëhet e ditur se këtyre të treve i vihet në barrë aktakuza për keqtrajtim dhe likuidim të civilëve si shqiptarë ashtu edhe serbë në një kamp në Llapushnik gjatë periudhës maj-korrik të vitit 1998.

 

Gjithnjë sipas Aleancës Veriatlantike këta të tre janë transferuar në një lokacion të sigurtë dhe pritet transferimi i tyre në burgun e Tribunalit të Hagës.

 

 

As në seancën e sotme nuk u bë leximi i aktakuzës

 

Prishtinë, 18 shkurt 2003 - As në seancën e sotme nuk u bë leximi i aktakuzës ndaj katër ish-eprorëve të lartë të Zonës operative të Llapit, të UÇK-së: Rrustem Mustafa-Remi, Latif Gashi, Nazif Mehmeti dhe Naim Kadriu.

 

Avokatët e të akuzuarve thanë se kushtet për vazhdimin e procesit gjyqësorë nuk janë të volitshme, për shkak se vendi ku po mbahet gjykimi nuk mjafton as për gjashtë gazetarët që janë caktuar se mund ta ndjekin gjykimin.

 

Seanca e sotme u ndërpre për të vazhduar të enjten, në një ambient tjetër të Pallatit të Sporteve ku do të ketë më shumë hapësirë, thanë avokatët, kërkesat e të cilëve kryesisht janë miratuar.

 

 

Gjykimi kundër grupit të Llapit filloi pa praninë e KMDLNJ-së dhe të gazetarëve

 

Prishtinë, 18 shkurt 2003 - Komandant Rrustem Mustafa - "Remi", Latif Gashi, Nazif Mehmeti dhe Naim Kadriu që të gjitha ish-pjesëtarë të UÇK-së dje dolën para drejtësisë ndërkombëtare për t'u përballur me akuzat për krime lufte ndaj bashkëvendasve të tyre në vitet 1998-1999. Seanca e parë gjyqësore u mbajt në lokalet e Pallatit të Rinisë dhe Sporteve në Prishinë ku ndodhet Departamenti i Drejtësisë nën masa të rrepta sigurie.

Seanca e parë gjyqësore u mbajt pa praninë e gazetarëve. Ndonëse ishte hedhur shorti që këtë gjykim ta përcillnin vetëm gjashtë gazetarë të mediumeve elektronike dhe atyre të shkruara në Kosovë, gazetarët në shenjë revolte e bojkotuan atë.

Pas seancës së parë, avokatët mbrojtës të të akuzuarve njoftuan para gazetarëve për rrjedhën e procesit gjyqësor. Sipas tyre nuk mund të thuhet se është mbajtur seanca e parë gjyqësore për arsye se nuk është lexuar aktakuza. Kryesisht është diskutuar rreth disa ndryshimeve në aktakuzë, tha nëri nga avokatët duke shtuar se mbrojtja do të jetë kolektive sepse fjala është për një aktakuzë të përbashkët dhe një vepër penale të përbashkët për të katërtit.

Sipas të gjitha gjasave vendi i mbajtjes së gjykimit do të transferohet në ndonjë objekt tjetër, sepse trupi gjykues ka aprovuar një kërkesë të mbrojtësve që të ndërrohet vendi i mbajtjes së gjykimit në ndonjë vend tjetër apo të kthehet në Gjykatën e Qarkut atje ku është edhe rendi që të mbahen gjykimet e tilla.

Avokatët thanë se nga gjykata kanë kërkuar që klientët e tyre mbrohen nga liria.

 

 

Entoni Adams thotë se të tre të arrestuarit janë dërguar në një vend të sigurtë

 

Prishtinë, 18 shkurt 2003 - Zëdhënësi i KFOR-it koloneli Entoni Adams duke u mbështetur në një komunikatë nga NATO-ja ka konfirmuar se KFOR-i ka arrestuar tre persona në Kosovë, të cilët besohet të jenë persona të emëruar në aktakuzën e Tribunalit të Hagës për krimet e luftës në ish-Jugosllavi.

 

Ai ka thënë se të tre të arrestuarit janë dërguar në një vend të sigurtë dhe gjatë operacioneve për arrestimin e tyre nuk ka pasur viktima. Koloneli Adams tha se identiteti i të arrestuarve si dhe akuzat formale nuk janë bërë të ditura dhe do të jepen më vonë.

Ndërkohë vetë familja Balaj nga Korrotica ka konfirmuar se njëri prej të arrestuarve është Haradin Balaj. Familjarët kanë thënë se karabinierët italianë dhe forcat speciale të KFOR-it të cilët e kanë arrestuar Haradin Balajn kanë lënë një letër në shtëpi duke thënë se ai është arrestuar nga Tribunali i Hagës.

 

 

Në Gjykatën e Qarkut në Pejë filloi procesi gjyqësor kundër një serbi për krime ndaj shqiptarëve

 

Pejë, 18 shkurt 2003 - Në Gjykatën e Qarkut në Pejë ka filluar një proces gjyqësor kundër serbit Veselin Beshoviq, i cili akuzohet për krime të kryera ndaj shqiptarëve në rajonin e Dukagjinit gjatë kohës së bombardimeve të NATO-s.

Në aktakuzën të cilën e përfaqëson një prokuror ndërkombëtar, i akuzuari Beshoviq thuhet se gjatë prillit dhe majit të vitit 1999 ka kryer vepra penale duke deportuar në mënyrë të dhunshme popullatën shqiptare nga fshatrat Lubeniq, Poklek, Zahaq, Qyshk dhe Pavlan.

I akuzuari Beshoviq fillimisht ka qenë i dënuar me dy vjet burg me kusht për shkak të armëmbajtjes pa leje, ndërkohë që më vonë në procedurën hetuese ndaj tij janë gjetur dëshmi që kanë të bëjnë me dyshimin se ai ka kryer krime lufte gjatë luftës në Kosovë kanë pohuar burime në Gjykatën e Qarkut të Pejës.

 

 

Ishte i rremë alarmi se brenda kafiterisë "Gruvi" janë vendosur dy mjete shpërthyese

 

Prishtinë, 18 shkurt 2003 - Pas një kërcënimi anonim me bombë në Bulevardin Bill Klinton në Prishtinë ishte i bllokuar më tepër se dy orë. Dikush ka telefonuar policinë duke i thënë se brenda kafiterisë "Gruvi" janë vendosur dy mjete shpërthyese, ose dy bomba, theksoi zëdhënësi i policisë së UNMIK-ut për rajonin e Prishtinës.

 

"Ne e rrethuam atë pjesë në të cilën besuam se bomba mund të jetë e vendosur në kafiterinë 'Gruvi'. Mirëpo, më vonë pasi u aktivizuan edhe robotët për deaktivizimin e këtyre mjeteve shpërthyese, u verifikua se ky alarmim ishte i rrejshëm", tha zëdhënësi.

 

 

Karla Del Ponte në Beograd

 

Beograd, 18 shkurt 2003 - Kryeprokurorja e Tribunalit të Hagës për krime lufte në ish Jugosllavi, Karla del Ponte, qëndroi në Beograd ku ka zhvilluar bisedime me shefin e diplomacisë federale Goran Svillanoviq, kryeministrin e Serbisë Zoran Gjingjiq dhe zëvendëskryeministrin Nebojsha Çoviq.

 

Pas takimit Svilanoviq-Ponte i cili ka zgjatur më tepër se një orë, bashkëbiseduesit nuk kanë pranuar të japin asnjë deklaratë për mediat.

Del Ponte në mbrëmje udhëtoi për në Malin e Zi ku do të takohet me kryetarin e Kuvendit Filip Vujanoviq dhe ministrin e punëve të brendshme Milan Filipoviq.

Raundin e saj të vizitës në Ballkan Ponte e përfundon në Shkup ku do të takohet me kryeministrin maqedonas Branko Cërvenkovski.

 

 

Qeveria e Maqedonisë shpërthimin që ndodhi në Strugë e cilësoi si akt terrorist

 

Strugë, 18 shkurt 2003 - Të gjithë partnerët e koalicionit qeveritar në Maqedoni shpërthimin që ndodhi në Gjykatën e Strugës e cilësojnë si akt terrorist, ka thënë zëdhënësi i qeverisë maqedonase Sasho Çollakovski.

 

Ai gjithashtu bëri të ditur se policia ka arrestuar një person, ndërkohë që ka marrë në pyetje katër të dyshuar për sulmin e të premtës. Sipas qeverisë nuk ka informacione që në këtë incident të jetë përfshirë Armata Kombëtare Shqiptare.

Zëdhënësi Çollakovski ka theksuar se eksplozivi i përdorur në Strugë është i njëjtë me atë që u përdor gjatë një shpërthimi në Kumanovë para disa javësh nga i cili një person mbeti i vdekur dhe disa të tjerë u plagosën.

 

 

Rritet numri mbi 130 i të djegurve në Kore

 

Teagu, Kore e Jugut, 18 shkurt 2003 – Sipas njoftimeve më të reja të Rojterit dhe të agjencive të tjera botërore mbi 130 veta kanë vdekur, 130 janë lënduar kurse dhjetëra të tjerë ekziston droja se janë ngujuar sot (të martën) në një tren të metros, që siç dyshohet është sulm zjarrvënie e qëllimshme.

 

Njoftohet se zjarrin e ka vënë një burrë mentalisht jostabil. Thuhet se mbi pesë orë pasi ka shpërthyer flaka, zjarrfikësit me aparatura të frymëmarrjes ende gjurmonin të shpëtuarit në stacionin nëntokësor të qytetit Teagu.

 

 

Forcat izraelite kanë vrarë sot një anëtar të kërkuar të Hamasit

 

Hebron, 18 shkurt 2003 – Forcat izraelite kanë vrarë sot (të martën) një anëtar të kërkuar të Hamasit pasi është përpjkur të rezistojë kundër zënies gjatë një sulmi të armatës në Bregun Perendimor dhe në Rripin e Gazës me qëllim të kapjes së militantëve të dyshimtë, kanë bërë të ditur dëshmitarët palestinezë dhe burimet izraelite, njofton Rojter.

 

Izraelitët, vazhdon njoftimi, kanë vrarë 27-vjeçarin Muhamed Mor në fshatin Jata afër qytetit Hebron të Bregut Perendimor. Ky është incidenti i fundit pas shpërthimit të dhunës të së shtunës, që la të vdekur katër ushtarë izraelitë dhe 11 palestinezë.

 

Dëshmitarët thonë se Mori së pari është qëlluar në këmbë dhe pastaj është vrarë. Burimi ushtarak izraelit ka thënë se Mori ishte një militant i lartë islamik, i cili qe barrikaduar në shtëpinë e tij për të rezistuar kundër arrestrimit të tij. Po ky burim ka thënë se 15 palestinezë në Bregun Perendimor dhe 9 sish në Rripin e Gazës janë arrrestuar për aktivitet të dyshimtë militant.

 

 

Në një tren të metros në Kore dyshohet të jenë djegur rreth 100 udhëtarë

 

Teagu, Kore e Jugut, 18 shkurt 2003 – 25 vetë kanë vdekur, 130 janë lënduar kurse dhjetëra të tjerë ekziston droja se janë ngujuar sot (të martën) në një tren të metros, që siç dyshohet është sulm zjarrvënie e qëllimshme, njofton Rojter.

 

Ndërkaq, sipas informacionit, po të sotëm, të AFP-së në trenin e metros janë gjetur rreth 100 trupa të djegur, vetëm disa orë pasi një burrë mentalisht jostabil ka kryer sulmin e zjarrvënies.

 

Njoftohet gjithashtu se mbi pesë orë pasi ka shpërthyer flaka, zjarrfikësit me aparatura të frymëmarrjes ende gjurmonin të shpëtuarit në stacionin nëntokësor të qytetit Teagu.

 

 

BE-ja i kërkon Irakut të zbatojë rezolutat e OKB-së për çarmatim

 

Bruksel, 18 shkurt 2003 - Udhëheqësit e Bashkimit Evropian i dhanë fund një takimi urgjent të nivelit të lartë mbi krizën e Irakut, duke i kërkuar Bagdadit që të zbatojë rezolutat e Kombeve të Bashkuara për çarmatim dhe duke paralajmëruar se inspektimet e armëve nuk mund të vazhdojnë pafundësisht.

 

Organizata me 15 vende tha gjithashtu se lufta nuk është e pashmangshme dhe arriti në përfundimin se forca duhet të përdoret vetëm si mundësia e fundit.

Deklarata e përbashkët ishte një kompromis, që kishte për qëllim t'i linte të gjithë të kënaqur.

 

Paralajmërimi se inspektimet nuk mund të vazhdojnë pafundësisht do të kënaqë përfaqësuesit e rrugës së ashpër si kryeministri Toni Bler që thotë se Kombet e Bashkuara duhet ta përforcojnë kërkesën e tyre për çarmatimin e Irakut duke kërcënuar me përdorimin e forcës.

 

 

Shiraku kundërshton një rezolutë të re për çarmatimin e Irakut

 

Paris, 18 shkurt 2003 - Presidenti francez, Zhak Shirak, ka deklaruar se vendi i tij kundërshton një rezolutë të re për çarmatimin e Irakut. Deklarata e Shirakut erdhi pas përpjekjeve diplomatike të Shteteve të Bashkuara dhe Britanisë së Madhe për hartimin e një rezolute të dytë, e cila parasheh përdorimin e forcës kundër Bagdatit.

 

 

Trupat amerikane në Turqi - pasi Uashingtoni dhe Ankaraja të arrijnë marrëveshje

 

Ankara, 18 shkurt 2003 - Vendosja e disa mijëra trupave amerikane në Turqi, si pjesë e përgatitjeve për një luftë të mundshme në Irak, do të marrë miratimin e parlamentit turk, vetëm pasi Uashingtoni dhe Ankaraja zyrtare të arrijnë një marrëveshje.

 

Kjo e fundit duhet të saktësojë detajet politike, ushtarake dhe ekonomike të vendosjes së trupave amerikane. Kështu ka bërë të ditur kryeministri turk, Abdulla Gul.

 

 

Robertson gjendet në Bullgari

 

Sofje, 18 shkurt 2003 - Sekretari i Përgjithshëm i NATO-s, Xhorxh Robertson, gjendet në Bullgari, si pjesë e një turneu në vendet që do t'i bashkangjiten Aleancës.

Ministri i jashtëm bullgar informoi kreun e NATO-s mbi përgatitjet e vendit të tij për anëtarësi në këtë organizatë dhe qëndrimin bullgar mbi krizën irakiane.

 

 

Delegacionet izraelite dhe palestineze në Londër takohen me katërshen për Lindjen e Mesme

 

Jerusalem, 18 shkurt 2003 - Delegacionet izraelite dhe palestineze kanë udhëtuar ndaras drejt Londrës, ku do të takohen me katërshen e ndërmjetësve për Lindjen e Mesme.

 

Katërshja përbëhet nga përfaqësuesit e Shteteve të Bashkuara, Bashkimit Evropian, Kombeve të Bashkuara dhe Rusisë. Në qendër të diskutimeve do të jenë reformat brenda Autoritetit palestinez si dhe ndihma ekonomike.

 

 

Në SHBA kanë humbur jetën 12 vetë si pasojë e motit të keq

 

Uashington, 18 shkurt 2003 - Si pasojë e një stuhie të orëve të fundit shtresa e dëborës ka shkuar në 65 centimetra, në pjesën më të madhe në lindje të Shteteve të Bashkuara, përfshirë Uashingtonin, Virxhinian, Merilendin, Pensilvaninë, Nju Xhersin dhe Nju Jorkun. Deri tani janë shënuar 12 viktima si pasojë e motit të keq.

Copyright©2000-2003 Trepca.net - Të gjitha të  drejtat e rezervuara.