Lajme

E premte, 14 shkurt 2003

Përmbajtja:

• Presidenti Rugova mori çmimin "Shën Valentini" dhe u shpall Qytetar Nderi i qytetit Terni afër Romës

• Kryeministri Rexhepi ndryshoi qëndrimin e mëhershëm dhe tash thotë se mbështet fuqishëm deklaratën e pavarësisë së Kosovës

• BBC: Asambleja nuk ka autoritet që të shpallë pavarësinë e Kosovës

• Shtajner viziton Prizrenin

• Megjithë protestat që po mbahen situata e sigurisë në rajonin e Podujevës është e qetë

• Gjilan: Mjetet për renovimin e infrastrukturës publike presin tenderët

• Çmimi tradicional "Hasan Prishtina" i jipet familjes Jashari

• Ndihma e Tirolit për Podujevën do të vazhdojë konkretisht dhe në fusha të caktuara

• Testi i ADN-së identifikoi personat që konsideroheshin të zhdukur Xhevahir Gashin dhe Brahim Poterën

• Deputetja Trajkoviq thotë se deputetët e Kosovës përfundimisht kanë shpallur pavarësinë e Kosovës

• Nënshkruhet direktiva për aplikimin e parapagimit për RTK-në nëpërmjet faturave të KEK-ut

• Forcat e KFOR-it dhe policia e UNMIK-ut kanë konfiskuar në Zveçan një sasi armësh dhe municioni

• Forcat suedeze për herë të parë nën flamurin e BE-së në Maqedoni

• L.Hajdaraga: "Çdo zgjidhje në kundërshtim me rezolutën 1244 nuk i shërben proceseve të ngritjes së shoqërisë demokratike shumetnike në Kosovë"

• Fillojnë negociatat e Shqipërisë me Bashkimin Evropian

• Batler thotë se ata që kërcënojnë Maqedoninë rrezikojnë të gjenden në listën e zezë të presidentit Bush

• OSBE-ja ka tërhequr vëmendjen për tensionet e reja në Luginën e Preshevës

• Bashkimi Evropian ka shprehur brengosjen e thellë për shkak ngjarjeve në Luginën e Preshevës

• Në Shkup ka filluar trajnimi i 300 policëve nga të cilët 200 janë shqiptarë

• OKB-së i mungojnë paratë për të shmangur krizën humanitare në rast të një lufte në Irak

• Dhoma e Landeve diskuton sot sërish ligjin e emigracionit

• Robertson hedh poshtë kritikat për punën e tij

• J.Fisher: Inspektorëve të armatimit të OKB-së t'u jepet kohë e mjaftueshme

• Presidenti Bush ka shtuar presionin ndaj OKB-së

• Arafati do të emërojë kryeministrin, i nxitur nga ndërmjetësuesit ndërkombëtarë paqësorë

• Të pakten 23 të vdekur dhe rreth 100 të plagosur në protestat dyditëshe në Bolivi

• Policia britanike ka arrestuar edhe katër persona në një operacion kundër të terroristëve të dyshuar

• Bler u ka dërguar një letër liderëve të Bashkimit Evropian

• Policia britanike ka arrestuar një person nga Venezuela në aeroportin Gatvick të Londrës

• Presidenti Bush i bën thirje OKB-së të përmbushë përgjegjësitë e saj

• Qëllimi amerikan do të ishte të kalohet me shpejtësi nga udhëheqja ushtarake në një udhëheqje civile në Irak

• Këshilli i Sigurimit pret raportin për Irakun

Presidenti Rugova mori çmimin "Shën Valentini" dhe u shpall Qytetar Nderi i qytetit Terni afër Romës

 

Terni/Romë, 14 shkurt 2003 - Presidenti i Kosovës Ibrahim Rugova, i cili po qëndron për një vizitë disaditëshe në Itali, mori dje (e enjte) titullin Qytetar Nderi i qytetit të Ternit, që e ndan bashkia e këtij qyteti afër Romës, si dhe çmimin "Shën Valentini", që e ndan fondacioni po me këtë emër, sipas shenjtorit që simbolizon paqen dhe dashurinë. Udhëhequr nga zotërinjtë Paolo Rafaello, kryebashkiak i Ternit, dhe imzot Vinçenco Palja (Paglia), ipeshkv i Ipeshkvisë së Ternit, të dy ceremonitë solemne u mbajtën në sallën e mbledhjeve të Këshillit të Komunës së Ternit, në prani të autoriteteve të qytetit.

 

Në fjalët e tyre, zotërinjtë Rafaello dhe Palja përvijuan aktivitetin politik të Presidentit Rugova gjatë dhe pas periudhës së atij që njihet botërisht si shtet paralel në Kosovë, duke vlerësuar rezistencën e udhëhequr nga "militanti politik demokratik", tashti "President i Kosovës së lirë", siç e quajti Rugovën kryetari i Ternit.

Imzot Palja solli në kujtesë edhe momente kritike të gjendjes në Kosovë në gjysmën e dytë të viteve nëntëdhjetë dhe të kontakteve që ka pasur me Presidentin Rugova dhe realitetin e shoqërisë së vendit tonë gjatë okupimit serb.

Presidenti Ibrahim Rugova e quajti nder për vete dhe për popullin e Kosovës marrjen e çmimit "Shën Valentin", që jepet prej shumë vjetësh. Shpërblimin e kanë marrë, ndër të tjera, personalitete të tilla si Nëna Tereze dhe Mihail Gorbaçov.

Ndër aktivitetet e ditës para dhe pas ceremonive të ndarjes së nderimeve për Rugovën, Presidenti i Kosovës pati të enjten paradite një debat të hapur me nxënës e studentë të Ternit, i cili u përcoll edhe nga mediat, ndërsa për nder të tij u organizua një koncert me muzikë klasike në komunitetin parokial të Santa Maria Regina-s në qytet.

Presidenti Rugova u takua të mërkurën mbrëma në Romë me kryeministrin e Italisë, z. Silvio Berluskoni.

 

 

Kryeministri Rexhepi ndryshoi qëndrimin e mëhershëm dhe tash thotë se mbështet fuqishëm deklaratën e pavarësisë së Kosovës

 

Prishtinë, 14 shkurt 2003 - Kryeministri i Kosovës Bajram Rexhepi në një intervistë për BBC-në ka deklaruar se e mbështet fuqishëm deklaratën e pavarësisë së Kosovës dhe se për këtë, siç tha, ka punuar gjithë jetën.

I pyetur pse ka ndryshuar qëndrimin e tij të mëhershëm kur pati thënë se nuk është tani koha e miratimit të deklaratës së pavarësisë, kryeministri Rexhepi u përgjigj:

 

"Që të mos ketë dilema edhe unë e përkrah plotësisht deklarimin për pavarësi ose shpalljen e pavarësisë për arsye se edhe jetën time ia kam kushtuar këtij procesi dhe jam i gatshëm edhe mëtutje të jap kontributin.

 

Mirëpo, qëllimi ka qenë që ne të kemi një koncensus dhe ta vlerësojmë momentin e duhur kur duhet të bëhet shpallja e pavarësisë".

Ndërkaq, duke komentuar reagimet e mëparshme rreth deklaratës së tij, se nuk është koha tash për shpalljen e pavarësisë së Kosovës, kryeministri Rexhepi tha: "Duhet të dallojnë edhe gazetarët çka është nganjëherë manovrim politik, edhe qëndrim edhe vendim politik.

 

Në momente të caktuara nuk ka politikë rigjide. Nga një herë duhet ndonjë prononcim i tillë si formë e një presioni që të mos na ndodhë diçka që është e papranueshme për Kosovën".

 

 

BBC: Asambleja nuk ka autoritet që të shpallë pavarësinë e Kosovës

 

Londër, 14 shkurt 2003 - Duke komentuar nismën e 42 deputetëve të Kosovës që përmes një deklarate për shpalljen e pavarësisë dhe nëse ata kanë tëë drejtë për këtë, analisti i BBC Gabriel Partosh thotë:

 

"Moralisht dhe politikisht, ata kanë të drejtë, për arsyen e thjeshtë se sipas çdo treguesi të mundshëm, shumica e shqiptarëve të Kosovës, e mbështesin pavarësinë dhe nëse beson në vetëvendosje, kjo çështje duhet parë". Por, sipas analistit të BBC ka dhe çështje të tjera: kushtetuese, ligjore dhe aspekte të tjera politike.

"Asambleja nuk ka autoritet që të shpallë pavarësinë e Kosovës, por edhe nëse do ta bënte këtë, kjo do të bllokohej nga përfaqësuesi i OKB-së, Z. Shtajner dhe nga ky këndvështrim, do të qe më shumë një veprim politik sesa një lëvizje politike me baza", thotë analisti Partosh.

 

 

Shtajner viziton Prizrenin

 

Prizren 14 shkurt 2003 - Shefi i UNMIK-ut Mihael Shtajner po e viziton sot Prizrenin dhe fillimisht ka vizituar një fabrikë të dyerve dhe dritareve, ku është njoftuar për rrjedhën e zhvillimit të saj. Shtajner u shpreh i kënaqur me fabrikën që vizitoi, duke shtuar se duhet të zhvillohet procesi i privatizimit.

Shtajner refuzoi të prononcohet rreth Deklaratës për pavarësinë e Kosovës e cila dje hyri në procedurë te rregullt në Kuvendit të Kosovës, duke thënë se kishte ardhur për vizitë një objekti ekonomik dhe jo të bëjë politikë.

 

Shtajner vizitoi edhe Gjykatën e qarkut në Prizren si dhe Shkollën e Mesme të Muzikës.

 

 

Megjithë protestat që po mbahen situata e sigurisë në rajonin e Podujevës është e qetë

 

Podujevë, 14 shkurt 2003 - "Mendoj se protestat që po mbahen sot dhe ato të para një jave ishin të qeta dhe nuk e rrezikojnë gjendjen e përgjithshme të sigurisë", tha në konferencën e sotme për media komandanti i Batalionit çeko-sllovak nënkoloneli Prohaska i cili pohoi se situatë e qetë është edhe në rajonin kufitar Kosovë-Serbi.

"Ne kemi ardhur në Kosovë për të ndërprerë konfliktin mes shqiptarëve dhe serbëve dhe jemi në bazë të Rezolutës 1244 dhe jo për t'i rregulluar marrëdhëniet mes shqiptarëve", ka deklaruar nënkoloneli Prohaska duke komentuar paraqitjen dhe plaçkitjet e njerëzve me maska. KFOR-i, sipas tij, është në gjendje që t'u dalë në ndihmë qytetarëve në çdo kohë.

Pavarësisht kësaj gjendja e përgjithshme e cila përcillet me shumë kujdes dhe KFOR-i do të ndihmojë UNMIK-un në luftimin e krimit.

Nënkoloneli Prohaska njoftoi se SIMIC-u po vazhdon të ndihmojë popullatën civile në fshatra të ndryshme të Podujevës me veshmbathje dhe gjëra ushqimore, ndihma të arritura nga Çekia.

 

 

Gjilan: Mjetet për renovimin e infrastrukturës publike presin tenderët

 

Gjilan, 14 shkurt 2003 - Kryeshefi ekzekutiv i komunës së Gjilanit, Enver Muja, u ka kërkuar drejtorive përkatëse që të përshpejtojnë procesin e përgatitjes dhe të publikimit të tenderëve për renovimin e infrastrukturës publike, të dëmtuar nga tërmeti i 24 prillit 2002, me mjetet që i ka ndarë për këtë qëllim Ministria e Ekonomisë dhe Financave të Kosovës, ngase ato rrezikohen të humben nëse nuk shfrytëzohen deri më 30 qeshor të këtij viti.

 

Enver Muja ua ka tërhequr vërejtjen drejtorëve se "faji do të jetë yni, nëse i humbin këto mjete".

Edhe administratori komunal Robert Simons ka sugjeruar se mjetet duhet të shfrytëzohen gjithsesi në afatin e paraparë.

Aktualisht është shpallur vetëm tenderi për rekonstuimin e objektit të vjetër të komunës, ndërsa fondi i mbetur prej 231 mijë euro, është planifikuar edhe për ndërtesa tjera publike, arsimore, shëndetësore si dhe për Shtabin e Zonës së 6-të të TMK-së.

 

Sipas drejtorit të urbanizmit, rindërtimit dhe ambientit, Habib Mahmuti, është i gatshëm edhe projekti për renovim të infrastrukturës së Shtabit të TMK-në Gjilan.

Do të ishte dëm i madh për Gjilanin nëse nuk arrin t`i shfrytëzojë këto mjete në afatin e paraparë, kur dihet se nevojat për ndihmë në sanimin e pasojave të tërmetit, janë mjaft të mëdha, si në infastrukturën publike, ashtu edhe në atë familjare.

Bordi i drejtorëve e ka përcakuar si detyrë urgjente përgatitjen e projekteve dhe të tenderëve për renovimin e objekteve të parapara nga mjetet e Ministrisë së Ekonomisë dhe Financave.

 

 

Çmimi tradicional "Hasan Prishtina" i jipet familjes Jashari

 

Prishtinë, 14 shkurt 2003 - Shoqata për Kthimin e Shqiptarëve të Shpërngulur të Kosovës, me një vendim të kryesisë së saj, më 14 shkurt, me rastin e 14-vjetorit të themelimit, i ka ndarë familjes Jashari Çmimin tradicional "Hasan Prishtina".

Çmimi familjes Jashari i dorëzohet, të premten, më 7 mars, në odën e Jasharëve, në Prekaz, 5 minuta para orës 12:00.

Deri më tani çmimi "Hasan Prishtina", nga SHKSHSHK i është ndarë Nënës Shqiptare, ish-presidentit amerikan Bill Klinton, kryeministrit britanik Toni Bler dhe tani Familjes Jashari.

Çmimi ndahet për merita të veçanta, në pengimin e pastrimit etnik të Kosovës dhe të krijimit të kushteve për kthim në atdhe.

 

 

Ndihma e Tirolit për Podujevën do të vazhdojë konkretisht dhe në fusha të caktuara

 

Podujevë, 14 shkurt 2003 – Ndihma e Qeverisë së Tirolit të Austrisë do të vazhdojë konkretisht dhe në fusha të caktuara, tha kryetari i KK të Podujevës Agim Veliu dhe njoftoi se ministri i krahinës së Tirolit Peter Logar ka konfirmuar vazhdimin e bashkëpunimit edhe në të ardhmen.

 

Qeveria e Tirolit do të fillojë në pranverë të këtij viti ndërtimin e Qendrës informative turistike në Liqenin e Batllavës, kurse për sezonën e sivjetme do të shpenzojë afro 20 mijë euro për marketing.

 

Sipas z. Veliu, Tiroli do të ndihmojë projektin e Liqenit të Batllavës dhe në kuadër të ndihmës për turizmin në Qendrën për Menaxhment në Insbruk ndodhen për një trajnim 6 javor dy të punësuarit në Qendrën Informative.

Qeveria e Tirolit do ta ndihmojë komunën e Podujevës edhe në fushën e blegtorisë dhe bujqësisë.

 

 

Testi i ADN-së identifikoi personat që konsideroheshin të zhdukur Xhevahir Gashin dhe Brahim Poterën

 

Podujevë, 14 shkurt 2003 (QIK) - Zyra e UNMIK-ut për persona të zhdukur dhe mjekësi ligjore i ka komunikuar familjes së Rizah Gashit nga Podujeva se në bazë të testit të ADN-së është identifikuar kufoma e djalit Xhevahir Gashi i konsideruar i zhdukur që nga 25 marsi 1999.

 

Nga 25 familjarë që i kishte arrestuar policia serbe, 5 burra i kishte ndarë dhe që nga ajo ditë ne nuk kemi pasur kurrfarë informate për ta edhe pse për Xhevahirin thoshin se ishte dikund në burgjet serbe, deklaroi Rizai, baba i të ndjerit Xhevahir Gashi.

 

Prej 6 kufomave të gjetura në hyrje të fshatit Obrançë pas ekshumimit, zyra për personat e zhdukur dhe mjekësi ligjore ka arritur t'i identifikojë dy persona në bazë të testit të ADN-së, Xhevahir Gashin nga Podujeva dhe Brahim Poterën nga Llapashtica.

Babai i 40 vjeçarit Xhevahir Gashi njoftoi se rivarrimi i të birit të tij do të bëhet të hënën në ora 15.00.

 

 

Deputetja Trajkoviq thotë se deputetët e Kosovës përfundimisht kanë shpallur pavarësinë e Kosovës

 

Prishtinë, 14 shkurt 2003 - Deputetja e kolacionit serb "Kthimi" Rada Trajkoviq thotë se dje përfundimisht është shpallur pavarësia e Kosovës dhe se ky është një vendim i cili nuk mund të shfuqizohet nga bashkësia ndërkombëtare.

 

Deputetët serbë në fakt i kanë dhënë legjitimitetin dhe legalitetin e pavarësisë së Kosovës. Këto komente ajo i bëri dje pasi deklarata për pavarësinë e Kosovës hyri në procedurë të rregullt të Kuvendit të Kosoëvs.

 

Ndërkaq ndryshe mendon anëtari tjetër i këtij koalicioni, Oliver Ivanoviq, i cili thotë se në mbledhjen e djeshme të Kuvendit të Kosovës nuk ka ndodhur asgjë e jashtëzakonshme.

 

Për më shumë, thotë Ivanoviq, është respektuar vendimi i Kryesisë së Kuvendit që kjo çështje të mos vendoset në rend të ditës.

 

"Kjo nuk është miratim, kjo është deklaratë se nuk do të diskutohet për këtë. Ata e mbështesin nismën e 42 deputetëve, mirëpo për këtë nuk është diskutuar", thotë Ivanoviq.

 

 

Nënshkruhet direktiva për aplikimin e parapagimit për RTK-në nëpërmjet faturave të KEK-ut

 

Prishtinë, 14 shkurt 2003 - Është nënshkruar direktiva administrative 2003/5 e përfaqësuesit special të sekretarit të përgjithshëm për aplikimin e parapagimit për Radiotelevizionin e Kosovës nëpërmjet faturave të KEK-ut.

 

Parapagimi mujor i paraparë me këtë urdhëresë është 3 euro në muaj për amvisëri dhe shfrytëzuesit komercialë. Sipas kësaj direktive detajet e implementimit duhet të organizohen midis RTK-së dhe KEK-ut brenda 30 ditësh. Kjo direktivë e nënshkrur nga zëvendësi i kryeadministratorit Shtajner, Çarlls Brajshou hyn në fuqi më 5 shkurt.

 

 

Forcat e KFOR-it dhe policia e UNMIK-ut kanë konfiskuar në Zveçan një sasi armësh dhe municioni

 

Zveçan, 14 shkurt 2003 - Forcat paqeruajtëse të KFOR-it dhe policia e UNMIK-ut gjatë një kontrolli nëpër disa shtëpi në Zveçan, lokalitet ky që me shumicë përbëhet nga serbët, kanë konfiskuar një sasi të konsiderueshme të armëve dhe municionit. Njoftohet se deri më tash askush nuk është arrestuar gjatë këtij operacioni.

 

 

Forcat suedeze për herë të parë nën flamurin e BE-së në Maqedoni

 

Stokholm, 14 shkurt 2003 - Suedia do të dërgojë më së shumti 20 ushtarakë në Maqedoni pasi Bashkimi Evropian të marrë nga NATO mbi vete përgjegjësinë për trupat paqësore në këtë vend.

Përbërja e forcës suedeze do të dihet vetëm pasi BE-ja të ketë vendosur se ç'do të bëjnë vendet përkatëse. Forcat e Bashkimit Evropian do të kenë 300 deri në 400 veta.

Do të jetë kjo hera e parë që Bashkimi Evropian merr përgjegjësinë e një detyrimi për nxitjen e paqes. Por si parakusht për përballimin e një detyrimi të këtillë mbetet që NATO-ja edhe më tutje ta mbështesë këtë forcë të Bashkimit Evropian.

Deri tani forcat e NATO-s janë angazhuar në shuarjen e armiqësive ndërmjet banorëve shqiptarë dhe banorëve sllavë të Maqedonisë.

Në Maqedoni gjithashtu gjenden disa qindra vëzhgues nga Organizata për Siguri dhe Bashkëpunim në Evropë dhe nga BE. Këta do të bashkëveprojnë me ushtarakët e BE-së për parandalimin e shkaktimit të trazirave të reja në Maqedoni./shs/.

 

 

L.Hajdaraga: "Çdo zgjidhje në kundërshtim me rezolutën 1244 nuk i shërben proceseve të ngritjes së shoqërisë demokratike shumetnike në Kosovë"

 

Tiranë, 14 shkurt 2003 - Zëvendësministri i Punëve të Jashtme të Shqipërisë, Luan Hajdaraga, u shpreh të enjten për media se "rajoni ynë është i përfshirë nga një atmosferë e përgjithshme bashkëpunimi konstruktiv, karakterizuar nga ndërmarrja e nismave të reja dy dhe shumëpalëshe, në funksion proceseve integruese".

Lidhur me qëndrimin e qeverisë shqiptare ndaj riformulimit kushtetues të Serbisë dhe Malit të Zi dhe mënyrës se si shikohet përfshirja e Kosovës në preambulën e dokumentit kushtetues, zëvendësministri Hajdaraga tha se "Shqipëria respekton marrëveshjen mes Serbisë dhe Malit të Zi, si një formë e re bashkëjetese që arrihet me anë të dialogut të hapur dhe që shpreh vullnetin e popujve respektivë".

Sipas tij, përfshirja e Kosovës në këtë dokument nuk përbën shqetësim, pasi Kosova qeveriset nga Rezoluta 1244 e Këshillit të Sigurimit të OKB-së, deri në përcaktimin final të statusit të saj, duke marrë parasysh vullnetin e lirë të të gjithë popullit të Kosovës në bashkëpunim të ngushtë me faktorin ndërkombëtar.

Ndërkaq, duke komentuar nismën e 42 deputetëve të Kuvendit të Kosovës për shpalljen e Pavarësisë, z.Hajdaraga vlerësoi se Kosova ka nevojë për konsolidimin e institucioneve demokratike, zhvillim ekonomik, përmirësim të kushteve të sigurisë, kthimin e të shpërngulurve në një Kosovë unike, si dhe funksionimin e bashkëjetesës së qytetëruar shumetnike.

"Ndaj të njëjtin mendim me bashkësinë ndërkombëtare dhe Kryeadministratorin Shtajner se vëmendja e institucioneve të Kosovës dhe popullit të saj tashmë duhet të përqëndrohet në përmbushjen dhe jetësimin e këtyre standardeve bazë, për të arritur gradualisht në zgjidhjen përfundimtare të çështjes së statusit", tha ai.

Hajdaraga thotë se "çdo zgjidhje që vjen në kundërshtim me përcaktimet e rezolutës 1244 të Këshillit të Sigurimit të OKB-së, nuk i shërben as proceseve të ngritjes së shoqërisë demokratike shumetnike në Kosovë, as klimës së përgjithshme pozitive, që ka përfshirë rajonin".

 

Pyetjes se ç'mendonte për veprimtarinë e formacioneve të tilla si, Armata Kombëtare Shqiptare (AKSH), Fronti për Bashkimin Kombëtar Shqiptar (FBKSH), zëvendësministri i Punëve të Jashtme, Hajdaraga tha se qeveria shqiptare vazhdon të mbetet konsekuente në qëndrimet e saj se nuk mbështet asnjë forcë apo organizatë të mundshme që furnizon apo shërben si gjenezë e konflikteve të reja të armatosura.

 

"Duke shprehur bindjen se këto grupime nuk gëzojnë asnjë lloj mbështetjeje, u bëjmë thirrje të gjithë faktorëve të distancohen prej tyre, pasi zgjidhja e problemeve arrihet me mjete demokratike dhe në rrugë institucionale", thotë Hajdaraga.

 

 

Fillojnë negociatat e Shqipërisë me Bashkimin Evropian

 

Tiranë, 14 shkurt 2003 - Në Tiranë është zhvilluar raundi i parë i negociatave mes Bashkimit Europian dhe Shqipërisë për marrëveshjen e stabilizim asocimit. Mësohet se raundi i parë është përqëndruar në parimet e përgjithshme të marrëveshjes si dhe në ato nene që kanë të bëjnë me bashkpunimin rajonal.

 

Çelja zyrtare e negociatave u bë dy javë më parë në Tiranë në praninë e presidentit të Komisionit Evropian, Romano Prodi. Qeveria shqiptare ka shprehur angazhim të plotë për plotësimin e standarteve të marrëveshjes, por vëzhguesit mendojnë se Shqipëria ka shumë për të bërë dhe se procesi i negociatave do të jetë i gjatë.

 

 

Batler thotë se ata që kërcënojnë Maqedoninë rrezikojnë të gjenden në listën e zezë të presidentit Bush

 

Shkup, 14 shkurt 2003 - Ambasadori amerikan në Shkup, Lorens Batler shprehu keqardhje për vendimin e Partisë Demokratike Shqiptare për të mos marrë pjesë në takimin e udhëheqësve nënshkrues të Marrëveshjes së Ohrit me presidentin Boris Trajkovski.

 

Zoti Batler megjithatë tha se ka besim të plotë se kjo parti e përkrah Marrëveshjen Kornizë, duke shtuar se mirëpret kthimin e VMRO-së në këto bisedime.

Ambasadori amerikan ka mbështetur aksionet e policisë në luftën kundër krimit të organizuar dhe grupeve që veprojnë në ish-zonat e krizës.

 

Batler ka theksuar se ata që kërcënojnë stabilitetin dhe integritetin e Maqedonisë rrezikojnë të gjenden në listën e zezë të presidentit Xhorxh Bush, apo të arrestohen diku në Kosovë.

 

 

OSBE-ja ka tërhequr vëmendjen për tensionet e reja në Luginën e Preshevës

 

Vjenë, 14 shkurt 2003 - OSBE-ja ka tërhequr vëmendjen për tensionet e reja në Luginën e Preshevës, duke theksuar se situata po mbikëqyret për së afërmi.

 

Shefi i Misionit të OSBE-së në Serbi dhe Mal të Zi Maurucio Masari ka thënë në Vjenë se situata aktuale nuk duhet nënçmuar, por nuk duhet të ketë as reagime të tepruara.

 

Ai i bëri këto komentime duke iu referuar incidenteve të fundit kur forcat serbe të sigurisë arrestuan shtatë shqiptarë për posedim ilegal armësh.

 

 

Bashkimi Evropian ka shprehur brengosjen e thellë për shkak ngjarjeve në Luginën e Preshevës

 

Bruksel, 14 shkurt 2003 - Bashkimi Evropian ka shprehur brengosjen e thelllë për shkak ngjarjeve të fundit në Luginën e Preshevës, thuhet në komunikatën e lëshuar për shtyp të nënshkruar nga pëfaqësuesi i lartë i BE-së Havier Solana.

 

"Jam thellësisht i shqetësuar me përpjekjet serioze për të penguar vendosjen e rendit dhe ligjit dhe për të destabilizuar situatën në luginë", thotë në deklaratën e tij Solana dhe shton se sulmet e shtuara kundër policisë shumëkombëshe, keqtrajtimi i autoriteteve lokale dhe rritja në reketim nga ana e grupeve të ekstremistëve duhet të ndalen menjëherë.

 

Asnjë lloj i përdorimit të dhunës nuk do të tolerohet sepse një gjë e tillë është tërësisht e papranueshme, ka theksuar shefi i diplomacisë evropiane.

 

 

Në Shkup ka filluar trajnimi i 300 policëve nga të cilët 200 janë shqiptarë

 

Shkup, 14 shkurt 2003 - Në Shkup ka filluar trajnimi i 300 policëve nga të cilët 200 janë shqiptarë, ndërkaq të tjerët janë maqedonas dhe pjesëtarë të bashkësive të tjera etnike që jetojnë në Maqedoni.

 

Ky është grupi i katërt i policëve të rinj që stërviten në këtë vend pas arritjes së Marrëveshjes së Ohrit. Trajnimi i policëve të rinj bëhet nga ekspertë të OSBE-së.

Sipas Marrëveshjes së Ohrit parashihet që deri në fund të vitit 2004 në Maqedoni të punësohen 1500 policë shqiptarë. Aktualisht në sektorin e punëve të brendshme janë të punësuar rreth 800 policë shqiptarë, ndërkaq numri i përgjithshëm i policëve në këtë vend është mbi 9000.

 

 

OKB-së i mungojnë paratë për të shmangur krizën humanitare në rast të një lufte në Irak

 

Nju Jork, 14 shkurt 2003 - Për të shmangur katastrofën humanitare në rast të një lufte në Irak, Kombeve të Bashkuara u mungojnë të paktën 83 milionë dollarë. Koordinatori i ndihmës së OKB-së, Kenzo Oshima bëri të ditur më tej se që tani shumë irakianë janë të varur nga programi "naftë në këmbim të ushqimeve".

 

Në rast të një lufte, të paktën dhjetë nga 22 milionë irakianët do të jenë të varur nga ndihma të menjëhershme ushqimore prej Kombeve të Bashkuara. Kombet e Bashkuara besojnë se në rast lufte do të ketë 2 milionë refugjatë brenda vendit dhe deri një milion e gjysmë të tjerë që do të kërkojnë strehim në vendet fqinjë.

 

 

Dhoma e Landeve diskuton sot sërish ligjin e emigracionit

 

Berlin, 14 shkurt 2003 - Bundesrati, Dhoma e Landeve në Gjermani do të trajtojë sot sërish ligjin e emigrimit. Qeveria federale do ta sjellë edhe njëherë ligjin e saj të vjetër në dhomën e landeve.

 

Gjykata kushtetuese federale e deklaroi të pavlefshëm për shkaqe votimin e mëparshëm për ligjin.

 

Ministri i brendshëm gjerman, Oto Shili bëri të ditur se qeveria federale synon ta kaloje parashtrimin e ri të ligjit për emigrimin para verës në Bundestag, në Parlament dhe në Bundesrat, në dhomën e landeve.

 

 

Robertson hedh poshtë kritikat për punën e tij

 

Londër, 14 shkurt 2003 - Sekretari i Përgjithshëm i NATO-s, Xhorxh Robertson e hodhi poshtë kritikën për mënyrën si ka vepruar në grindjen për mbështetjen ushtarake Turqisë. Në një deklaratë zyrtare thuhet se shkak për tensionet janë pozicionet e ndryshme midis një grupi të vogël vendesh dhe anëtarëve të tjerë të Aleancës, dhe jo puna e Robertsonit.

 

Belgjika, e cila së bashku me Gjermaninë dhe Francën bllokon aktualisht planifikimet për dhënien e mbështetjes ushtarake, e ka akuzuar Robertsonin se është përpjekur të përçajë Këshillin e NATO-s.

 

 

J.Fisher: Inspektorëve të armatimit të OKB-së t'u jepet kohë e mjaftueshme

 

Nju Jork, 14 shkurt 2003 - Ministri i jashtëm gjerman Joshka Fisher iu përgjigj sot në Nju Jork pyetjes nëse kanë ndryshuar shanset për një zgjidhje paqësore të konfliktit të Irakut që prej mbledhjes së kaluar të KS të OKB-së:

"Ne po përpiqemi për këtë. Tani shtrohet çështja që të dëgjohet raporti i Bliksit dhe i Baradeit dhe që inspektorëve t'u jepet mundësia që të punojnë në mënyrë sa më efektive për të vënë në jetë rezolutën 1441, pra carmatimin e plotë të Irakut dhe që ata të fitojnë kohën që u duhet".

 

 

Presidenti Bush ka shtuar presionin ndaj OKB-së

 

Nju Jork, 14 shkurt 2003 - Presidenti amerikan, Xhorxh Bush e ka shtuar presionin ndaj Kombeve të Bashkuara pak orë para paraqitjes së raportit të inspektorëve të OKB-së për armatimin.

 

Ata duhet të tregojnë se kanë shtyllë kurrizore dhe guxim, që të mos katandisen në një klub të parëndësishëm debatimi. Bush bëri edhe njëherë të ditur se është i gatshëm ta nisë luftën në rast nevoje edhe pa mbështetje të OKB-së.

 

 

Arafati do të emërojë kryeministrin, i nxitur nga ndërmjetësuesit ndërkombëtarë paqësorë

 

Ramallah, 14 shkurt 2003 – Presidenti palestinez, Jaser Arafat, ka deklaruar sot (të premten) se ai ka vendosur të caktojë kryeministrin, i nxitur nga ndërmjetësuesit ndërkombëtarë paqësorë, njofton Rojter. Arafati, me gjithatë, s'e ka zbuluar kë do ta emërojë në këtë post dhe kur do të bëjë emërimin.

 

"Në dritën e kontakteve që kemi pasur me anëtarët e Kuartetit... kam vendosur të emëroj kryeministrin", ka thënë Arafat. Arafati ka thënë në vazhdim se do të konvokojë parlamentin palestinez dhe këshillin qendror për të marrë pëlqimin për të ndërmarrë hapat e domosdoshëm për emërimin e kryeministrit.

 

 

Të pakten 23 të vdekur dhe rreth 100 të plagosur në protestat dyditëshe në Bolivi

 

La Paz, 14 shkurt 2003 – Të pakten 23 të vdekur dhe rreth 100 të plagosur në protestat dyditëshe kundër masave ekonomike të shtrengimit të rripit, të propozuara nga presidenti Gonzales Sançez de Lozada, njofton AFP. Trazirat e dhunshme kanë vazhduar edhe mëtutje në kryeqytet, ndërsa opozita politike dhe sindikata kanë bërë thirrje për dorëheqjen e presidentit.

 

 

Policia britanike ka arrestuar edhe katër persona në një operacion kundër të terroristëve të dyshuar

 

Londër, 14 shkurt 2003 – Policia britanike ka deklaruar sot (të premten) se ka arrestuar edhe katër persona të tjerë në një operacion të masave energjike kundër të terroristëve të dyshuar, që drohet se kanë lidhje me ndonjë sulm të Al Kaidës.

 

Policia ka thënë se ata janë arrestuar në distriktin perendimor të Londrës në një rrugë që shpiente në aeroportin Hithrou dhe tash po merren në pyetje.

 

 

Bler u ka dërguar një letër liderëve të Bashkimit Evropian

 

Londër, 14 shkurt 2003 - Kryeministri britanik, Toni Bler u ka dërguar një letër liderëve të Bashkimit Evropian me kërkesën që ata të mos e përjashtojnë aksioninin ushtarak kundër Irakut kur do të takohen ditën e hënë në Bruksel, ku pritet të diskutojnë krizën lidhur me Irakun.

 

Bler thotë në letrën e tij se po kalon koha për zgjidhje paqësore të krizës irakiane. Kryeministri britanik thotë se aksioni ushtarak është shtegdalja e fundit, por nuk duhet të përjashtohet nëse aksioni i tillë do të ruante autoritetin e Këshillit të Sigurimit.

 

 

Policia britanike ka arrestuar një person nga Venezuela në aeroportin Gatvick të Londrës

 

Londër, 14 shkurt 2003 - Policia britanike ka arrestuar një person nga Venezuela në aeroportin Gatvik të Londrës pasi kishin gjetur një granatë të mundëshme në bagazhin e tij. Personi i paidentifikuar kishte arritur në aeroport me një fluturim nga Kolumbia.

 

 

Presidenti Bush i bën thirje OKB-së të përmbushë përgjegjësitë e saj

 

Uashington, 14 shkurt 2003 - Presidenti amerikan Xhorxh Bush thotë se Kombet e Bashkuara duhet të përgatiten për të vepruar ashpër për të detyruar zbatimin e rezolutave për çarmatimin e Irakut.

 

Presidenti Bush i bëri këto komente në një bazë detare amerikane në shtetin e Floridës, ku ai u bëri thirrje marinarëve dhe vendit të përgatiten për një luftë të mundëshme.

 

Presidenti dha një mesazh të dyfishtë. Ai u tha marinarëve të jenë gati për luftë, duke shtuar se Amerika do të përdorë të gjithë fuqinë e saj për të mposhtur Sadam Huseinin. Ndërkohë ai i bëri thirrje Organizatës së Kombeve të Bashkuara që të përmbushë përgjegjësitë e e saj.

 

"Këshilli i Sigurimit i OKB-së tani mund të vendosë nëse e ka apo jo vendosmërinë për të imponuar zbatimin e rezolutave të tij", tha presidenti.

 

 

Qëllimi amerikan do të ishte të kalohet me shpejtësi nga udhëheqja ushtarake në një udhëheqje civile në Irak

 

Uashington, 14 shkurt 2003 - Administrata e presidentit Bush thotë se vazhdon të shpresojë se mund të shmanget një konflikt lidhur me mosrespektimin nga ana e Irakut të rezolutave të OKB-së për çarmatimin.

 

Por zyrtarë të lartë të administratës thonë se po erdhi puna tek lufta, operacionet ushtarake do të kenë si objektiv shmangien e dëmtimeve të mëdha në infrastrukturën civile të vendit dhe që çdo administratë ushtarake e pasluftës për vendin nuk do të qendrojë gjatë.

Duke folur para Komisionit të Buxhetit të Dhomës së Përfaqësuesve, Sekretari amerikan i Shtetit, Kolin Pauell, tha se nuk do të bënte vlerësime të prera përsa i takon zgjatjes dhe kostos së konfliktit, por shtoi se ai do të ishte i shkurt 2003ër dhe se operacionet do të përqendroheshin në atë që ai e quajti udhëheqja despotike e vendit dhe jo në shoqërinë civile.

 

 

Këshilli i Sigurimit pret raportin për Irakun

 

Nju Jork, 14 shkurt 2003 - Kryeinspektorët e armëve të Kombeve të Bashkuara po përgatiten që të japin para Këshillit të Sigurimit një raport kyç, i cili mund të vendosë rrjedhën e mëtejshme të krizës së Irakut.Shumë gjëra varen nga sesioni para Këshillit të Sigurimit, ku do të raportojnë veç e veç Hans Bliks dhe shefi i agjensisë atomike të Kombeve të Bashkuara, Mohamed al-Baradai.

Shtëpia e Bardhë shpreson se inspektorët e Kombeve të Bashkuara do të prezantojnë një raport bardh e zi për të treguar se Iraku nuk po zbaton kushtet e vëna.

Shtëpia e Bardhë beson se është mjaft e dukshme se Iraku nuk është çarmatosur, por nuk ka provuar të bëjë ndonjë gjë.

 

Copyright©2000-2003 Trepca.net - Të gjitha të  drejtat e rezervuara.