Lajme

E enjte, 13 shkurt 2003

Përmbajtja:

• Presidenti Rugova u takua me kryeministrin e Italisë, Silvio Berluskoni

• Departamenti amerikan i Shtetit për statusin e Kosovës

• Norvegjia i detyron shqiptarët të pajisen me pasaporta serbe

• Që nga 17 shkurti të gjithë qytetarët e Kosovës mund të marrin vizat gjermane në Prishtinë

• Buçkovski bisedoi në Prishtinë me gjeneralin Mini dhe kryeadministratorin Shtajner

• Franca merr përsipër shërimin e 250 fëmijëve të Kosovës

• Komuna e Gjilanit merr nën mbrojtje 14 monumente rralla të natyrës

• Podujevë: Filloi punën seminari dy ditor me temën “Integrimi i çështjeve gjinore në strukturat dhe praktikat komunale”

• Në seancën e sotme të Kuvendit nuk hyri në rend dite deklarata për pavarësinë e Kosovës

• Këshilli i Evropës më 15 shkurt hap zyrën për demokratizim lokal në Gjilan

• UNMIK-u e KFOR-i pohojnë se në Kosovë nuk ka grupe terroriste

• Prej 17 shkurtit Zyra gjermane fillon të japë viza për qytetarët e Kosovës

• Një serb ëshë arrestuar lidhur me vrasjen e një shqiptari 18-vjeçar në Zubin Potok të Mitrovicës

• Grupi parlamentar serb kërcënohet me një kundërdeklaratë

• Svilanoviq nesër viziton Tiranën

• Shqiptarët protestuan në Bujanovc

• Tiranë: Ambasadori amerikan Jeffrey bën thirrje për të luftuar krimin

• Presidentët e Kroacisë, Maqedonisë dhe Shqipërisë nënshkruajnë një deklaratë partneriteti

• Zyrtarët ndërkombëtarë në Shkup kanë hedhur poshtë spekulimet për ndonjë "ofensivë pranverore"

• Ish-krerët ushtarakë përgënjeshtrojnë pohimet serbe se AKSH-ja ka shpërndarë ftesat për mobilizim të ri të pjesëtarëve të UÇPMB-së

• Buçkovski spekulon se ekzistojnë banda të armatosura që infiltrohen nga Kosova për ta destabilizuar Maqedoninë?!

• Kryetari i PDSH-së thotë se nuk do të marrë pjesë në takimin me nëshkruesit e Marrëveshjes së Ohrit

• Shrëder mbron qëndrimin ndaj Irakut

• SHBA përpiqen për rezolutë të re të OKB-së për Irakun

• SHBA kritikon sërish Gjermaninë dhe Francën për qëndrimin ndaj Irakut

• Franca dhe Gjermania sigurojnë Turqinë për mbështetje në rast rreziku

• Gjatë luftimeve triditëshe në Filipine janë vrarë 122 guerilë muslimanë

• Koreja e Veriut ka tërhequr vërejtjen se mund të godasë caqet amerikane kudo në botë

• Osama bin Ladeni parasheh se do të vdesë si "martir"

• Beogradi bën plane për kinse sulmet terroriste nga Kosova

• Të pakten 16 protestues janë vrarë dhe 80 të tjerë janë plagosur në demonstratat në Bolivi

• Pauell përsëri në Këshillin e Sigurimit të OKB-së

• Dyshime të OKB-së për raketat irakiane

• SHBA-të kanë vendosur rreth Uashingtonit avionë lufte e radarë për mbrojtjen ajrore

• Bler thotë se KS akoma mund të miratojë një rezolutë të dytë për Irakun

• NATO nuk arriti të dakordohet për mbrojtjen e Turqisë në rast lufte

• Pauell thotë se rasti i Kosovës është shembulli më i përsosur i intervenimit ushtarak edhe pa lejen e OKB-së

Presidenti Rugova u takua me kryeministrin e Italisë, Silvio Berluskoni

 

Silvio Berluskoni

Romë, 13 shkurt 2003 - Presidenti i Kosovës Ibrahim Rugova u takua mbrëmë (e mërkurë) në Romë me kryeministrin e Italisë, z. Silvio Berluskoni. Në takim u bisedua për gjendjen në Kosovë, për çështje aktuale politike, ekonomike dhe të sigurisë, si dhe për perspektivën e zhvillimeve të ardhshme në Kosovë. Pasi foli për arritjet e deritanishme në Kosovën e pasluftës, sidomos në punë të zgjedhjes dhe ndërtimit të institucioneve demokratike, Presidenti Rugova tha se në periudhën e ardhshme objektiva kryesore janë konsolidimi i mëtejmë i institucioneve, zhvillimi ekonomik përmes tërheqjes së investimeve të huaja dhe privatizimit të ekonomisë shtetërore, si dhe krijimi i vendeve të reja të punës. Duke folur për gjendjen e sigurisë, Presidenti Rugova tha se ajo ka shënuar përmirësime dhe theksoi angazhimin e institucioneve për sundim të ligjit dhe për integrimin e të gjitha grupeve etnike në jetën politike, administrative e ekonomike të Kosovës.

     

Këto ditë, së bashku me UNMIK-un, po punojmë në modalitetet e bartjes graduale të kompetencave nga administrate e OKB-së në Kosovë tek institucionet e vendit, theksoi Presidenti Rugova.

Krahas realizimit të këtyre objektivave, tha Presidenti Ibrahim Rugova, "ne punojmë për njohjen formale të pavarësisë së Kosovës, që do të siguronte paqe dhe stabilitet aftagjatë në vend dhe në rajon, me synim përfundimtar integrimet në UE dhe në NATO e në miqësi të përhershme me Shtetet e Bashkuara të Amerikës".

Presidenti Rugova e falënderoi kryeministrin Berluskoni dhe Qeverinë e Italisë për kontributin e dhënë për Kosovën para, gjatë, dhe pas luftës si dhe për praninë aktuale ushtarake e administrative në vendin tonë.

Kryeministri i Italisë, z. Silvio Berluskoni, duke e siguruar Presidentin Rugova për vazhdimin e përkrahjes së Italisë, vuri theks të veçantë në zhvillimin ekonomik të Kosovës si rrugë me efikase drejt një stabiliteti më të qëndrueshëm në të gjitha planet.

Presidenti Rugova dhe kryeministri Berluskoni u pajtuan që të krijohen mundësi më të mëdha për investime të biznesit italian në Kosovë.

 

 

Departamenti amerikan i Shtetit për statusin e Kosovës

 

Beograd, 13 shkurt 2003 - SHBA-të kanë paralajmëruar të enjtën se përpjekjet e Beogradit zyrtar dhe të disa institucioneve politike të Kosovës që të "imponojnë ritmin e procesit" të zgjidhjes së statusit të ardhshëm të Kosovës "nuk ndihmojnë" dhe se janë "potencialisht destabilizues".

 

SHBA-të janë të "shqetësuara për shkak të zhvillimeve të paradokohshme të ngjarjeve në Serbi e Mal të Zi dhe në Kosovë në lidhje me momentin dhe natyrën e vendimeve për statusin e ardhshëm të Kosovës", thekson zëdhënësi i Departamentit të Shtetit Riçard Bauçer në një deklaratë që e ka shpërndarë Ambasada amerikane në Beograd.

Bauçer ka kritikuar përpjekjet që të "imponohet ritmi i procesit" të zgjidhjes së statusit të Kosovës, si edhe përpjekja e "riinterpretimit të dispozitave të Rezolutës 1244". "Angazhohemi te të gjithë të interesuarit që të vazhdojnë punën me bashkësinë ndërkombëtare në krijimin e bazave për Kosovën demokratike", thotë zëdhënësi Bauçer duke përkujtuar se SHBA-të mbështesin Rezolutën 1244, dhe se ajo parasheh që çështja e statusit të zgjidhet me një "proces politik".

 

SHBA-të mbështesin edhe politikën e shefit të UNMIK-ut Mihael Shtajner "standardet para statusit", përkatësisht që para zgjidhjes përfundimtare të statusit të Kosovës duhet të arrihen standardet e caktuara të shoqërisë demokratike dhe stabile. Kjo është "rruga më e mirë dhe e vetme e pranueshme të përgatitjeve për bisedime për statusin e ardhshëm, ka vlerësuar Departamenti i Shtetit.

 

 

Norvegjia i detyron shqiptarët të pajisen me pasaporta serbe

 

Oslo, 13 shkurt 2003 - Ka disa muaj që Departamenti për të huaj dhe policia norvegjeze, kanë filluar fushatën për të detyruar qytetarët e Kosovës që të pajisen me pasaporta jugosllave.

Ministria për të huajt gjer më tani ka pajisur shqiptarët e Kosovës me pasaporta emigrantësh (Utlendinkspass), por tani, papritmas, me vendimin e Departamentit për të huaj (UDI) shqiptarëve të Kosovës u merren pasaportat e emigrantëve dhe të njëjtit i udhëzon që të bëjnë kërkesën për pasaportë serbe pranë ambasadës së shtetit të ri Serbi- Mal i Zi, që gjendet në Oslo!

Kosovarët nuk duan të pajisen me pasaportën e një shteti të huaj. Ata përpiqen që të bindin administratën norvegjeze se kosovarët kanë dokumentet e tyre të udhëtimit të lëshuar dhe të aprovuar nga UNMIK-u, por më kot.

Bashkatdhetarët tanë në Norvegji janë të indinjuar ndaj veprimeve të tilla të burokracisë së qeverisë norvegjeze.

 

 

Që nga 17 shkurti të gjithë qytetarët e Kosovës mund të marrin vizat gjermane në Prishtinë

 

Prishtinë, 13 shkurt 2003 - Që nga data 17 shkurt të gjithë qytetarët e Kosovës mund të marrin vizat gjermane të quajtura Shengen edhe në Prishtinë, bëri të ditur sot shefi i Zyrës gjermane, Peter Rondorf.

 

Në këtë mënyrë Gjermania do t'u mundësojë qytetarëve të Kosovës të marrin vizat gjermane dhe këto viza vlejnë edhe për të gjitha vendet e Bashkimit Evropian, nënshkruese të marrëveshjes së Shengenit, tha Rondorf. Mirëpo, sipas zotit Rondorf, qytetarët e Kosovës me vizat gjermane duhet të qëndrojnë një kohë në Gjermani e pastaj mund të udhëtojnë edhe në vendet e tjera të BE-së.

 

Këto viza do të jenë turistike, por gjithashtu do të jipen edhe viza speciale që vlejnë vetëm për Gjermaninë, por kërkojnë një përpunim të veçantë. Gjithashtu do të mund të merren edhe viza biznesi, punësimi, për studime, lidhje martesore dhe bashkim familjar dhe ato kurrsesi nuk mund të keqpërdoren për të kërkuar azil politik, saktësoi Rondorf dhe shtoi se fillimi i dhënies së vizave gjermane në Prishtinë duhet të shërbejë si shembull edhe për vendet e tjera.

Mbrëmë edhe Ministria e Punëve të Jashtme të Gjermanisë konfirmoi dhënien e vizave në Prishtinë, duke thënë se një hap i tillë është ndërmarrë për faktin se qytetarët e Kosovës ballafaqoheshin me vështirësi të shumta në Shkup dhe Tiranë.

 

 

Buçkovski bisedoi në Prishtinë me gjeneralin Mini dhe kryeadministratorin Shtajner

 

Prishtinë, 13 shkurt 2003 - Ministri maqedonas i Mbrojtjes Vllado Buçkovski u takua sot në Prishtinë me komandantin e KFOR-it Fabio Mini dhe me kryeadministratorin Mihael Shtajner, ku ka biseduar rreth bashkëpunimit policor e ushtarak.

Buçkovski u shpreh i kënaqur me bisedimet që ka pasur me Shtajnerin dhe Minin, duke thënë se së bashku mund të koordinohen më mirë punët në mbrojtjen e kufirit verior të Maqedonisë, ndërkaq bashkë me policinë e UNMIK-ut dhe KFOR-in mund të luftohen ekstremistët dhe kriminaliteti.

Bashkëbiseduesit kanë rënë dakord që një linjë telefonike "hot line" do të vendoset mes KFOR-it dhe shtabit të ushtrisë maqedonase dhe nëpërmjet saj do të shkëmbehen informacione lidhur me incidentet eventuale në kufi. KFOR-i ka pranuar edhe propozimin e Maqedonisë që një oficer i saj i ndërlidhjes të vendoset në Shtabin e KFOR-it në Prishtinë.

Mini është shprehur se është i kënaqur me bashkëpunmin.

Shtajneri tha se në këtë takim është biseduar për implementimin e marrëveshjes për policinë, e cila është shumë me rendësi për të dyja palët. Ai tha se me Shkupin do të ketë një koordinim shumë të mirë në këtë çështje dhe se kufijtë e Maqedonisë do të ruhen dhe do të jetë më mirë për të dyja palët.

 

 

Franca merr përsipër shërimin e 250 fëmijëve të Kosovës

 

Gjilan, 13 shkurt 2003 - Për 250 fëmijë të Kosovës të cilët vuajnë nga sëmundjet e zemrës, nga Franca ka arritur një lajm i mirë.

 

Sipas Bali Sahitit, drejtor i Qendrës për rehabilitim të fëmijëve dhe familjes në Gjilan, kjo është një shpresë e madhe për këta fëmijë që t`i menjanojnë vështirësitë që i kanë, meqenëse është arritur marrëveshja dhe pritet që, pas një kontrollimi paraparak, në Gjilan të fillojë edhe dërgimi i tyre në Francë për shërbim, thotë Baliu.

Mjeku që ka marrë përsipër shërimin e këtyre pacientëve dr.Bernard de Geeter, pritet që të arrijë në Gjilan nga fundi i majit. Sahiti shpreson se do t`ia dalë të sigurojë mjete për shpenzimet e qëndrimit te ketyre femijeve ne spital, ndersa operimi do te jete gratis.

 

 

Komuna e Gjilanit merr nën mbrojtje 14 monumente rralla të natyrës

 

Gjilan, 13 shkurt 2003 - Kuvendi Komunal i Gjilanit mund t`i shpallë monumente të mbrojtura të natyrës 14 zona, të cilat janë propozuar nga Instituti për Mbrojtjen e Natyrës dhe Mjedisit të Kosovës. Bordi i drejtorëve është njoftuar në takimin e fundit me këtë propoziom dhe është dakorduar që ai të vazhdohet në procedurat vijuese, deri në Kuvendin Komunal, i cili duhet ta marrë vendimin.

Sipas këtij propozimi, monumente, parqe ose peizazhe të natyrës do të jenë Lugina e lumit Llapushnik (pjesa e sipërme), Burimi i ujit termo-mineral në Kmetoc, Liqeni i Përlepnicës me rrethinë, Trungjet e dardhës së egër në Lipovicë, Trungu i bungut në fshatin Dragancë, Trungjet e bungut në fshatin Koretishtë, Lisi në fshatin Pasjan, Kompleksi i trungjeve të bungut në fshatin Burincë, Burimi i ujit termal në fshatin Uglar, Burimi i ujit termal në fshatin Gumnishtë, Trungjet e bungut në fshatin Ponesh (Lagja e Muhaxhirëve), Burimi i ujit mineral në fshatin Ponesh, Kompelski i trungjeve të bungut në fshatin Bresalc dhe Burimi i ujit termo-mineral në fshatin Pidiq.

Ekipi nga Instituti për Mbrojtjen e Natyrës dhe të Mjedisit, pasi ka kryer një vizitë hulumtuese në gjithë terrenin e komunës së Gjilanit, ka vlerësuar se këto vende posedojnë vlera unikale dhe meritojnë të shpallen të mbrojtura nga shteti.

 

 

Podujevë: Filloi punën seminari dy ditor me temën “Integrimi i çështjeve gjinore në strukturat dhe praktikat komunale”

 

Podujevë, 13 shkurt 2003 - Ngritja e vetëdijes dhe ndërgjegjësimi i institucioneve komunale për të siguruar perpsektivë dhe hapësirë për të dy gjinitë ndikon në ndërtimin e shoqërisë stabile në komunë dhe në Kosovë, tha zv.kryetari i komunës së Podujevës Agim Kikaj në hapje të seminarit dyditor me temën "Integrimi i çështjeve gjinore në strukturat dhe praktikat komunale". Ndërkaq administratori komunal z

 

Majkëll Verling pohoi se themelimi i institucioneve të reja nënkupton një proces të vështirë, mirëpo nëse kujdesemi për njëri-tjetrin dhe ndihmohemi atëherë edhe ecja përpara është më e lehtë.

Në ditën e parë të seminarit para drejtorëve të drejtorive, këshilltareve të KK dhe përfaqësuesve të OJQ-ve do të ligjërojë trajnerja për çështje gjinore Flora Macula dhe Betariçe Sopa nga UNIFEM-i.

Seminari "Integrimi i çështjeve gjinore në strukturat dhe praktikat komunale" është organizuar nga Fondi për Gra i Kombeve të Bashkuara – UNIFEM, KK i Podujevës dhe OSBE-ja.

 

 

Në seancën e sotme të Kuvendit nuk hyri në rend dite deklarata për pavarësinë e Kosovës

 

Prishtinë, 13 shkurt 2003 - Sot po i zhvillon punimet seanca e rregullt e Kuvendit të Kosovës, por nuk ka hyrë në rend dite deklarata për pavarësinë e Kosovës. Ndërkohë kryetari i Kuvendit Nexhat Daci, tha se pasi e konsideron legjitime nismën e 42 deputetëve, konform rregullave të parlamentit.

 

Pastaj anëtari i Kryesisë Hydajet Hyseni në emër të tri grupeve parlamentare, lexoi një deklaratë të përbashkët. Në këtë deklaratë thuhet:

"Përkrahim nismën e deputetëve të Kuvendit të Kosovës për miratimin e deklaratës për Kosovën shtet sovran dhe i pavarur të datës 3 shkurt 2003. Nisma e deputetëve ka hyrë në procedurë të rregullt në kuvend dhe vazhdon shqyrtimi i saj.

 

Kryetarët e grupeve parlamentare marrin përsipër harmonizimin e qëndrimeve për deklaratën e pavarësisë me grupet parlamentare dhe me institucionet e tjera të pushtetit në Kosovë.

 

Deklarata e harmonizuar do të dalë për miratim në ndonjërën nga seancat e ardhshme të Kuvendit të Kosovës në procedurë të rregullt në bashkëpunim të kryetarëve të grupeve parlamentare dhe Kryesisë së kuvendit". Kjo deklaratë është nënshkruar nga shefat e tri grupve parlamentare.

Me këtë deklaratë të përbashkët nuk u pajtua deputeti Muhamet Kelmendi, duke thënë se harmonizimi i saj duhet të bëhet në ndonjërën nga seancat e ardshme ku do të merret vendimi i gjithë deputetëv ee jo vetëm i tri grupeve parlamentare.

Pastaj seanca vazhdoi me rendin e ditës së paraparë dhe kryeministri Bajram Rexhepi paraqiti një ekspoze të shkurtër të projektligjit për likuidim dhe riorganizim të personave juridikë në bankrotim i cili është inicuar nga qeveria e Kosovës.

Po sot në rend dite është edhe shqyrtimi i parë i projektligjit për farat dhe shqyrtimi i dytë i projektligjit për pyjet e Kosovës.

Pas një bojkoti tremujor në seancën e sotme po marrin pjesë edhe deputetët e koalicionit serb "Kthimi".

 

 

Këshilli i Evropës më 15 shkurt hap zyrën për demokratizim lokal në Gjilan

 

Gjilan, 13 shkurt 2003 - Këshilli i Evropës më 15 shkurt të këtij viti do të hapë zyrën për demokratizim lokal në Gjilan. Paraprakisht është bërë një vizitë hulumtuese nga një ekip i Këshillit të Evropës, i cili kishte ngelur i impresionuar me zhvillimet e përgjithshme që ka bërë kjo komunë, pas luftës e sidomos në integrimin e komuniteteve.

Avancimi i pozitës së komuniteteve në Gjilan, ka qenë i dukshëm për delegacionin, i cili ka vërejtur qytetarë të komuniteteve duke lëvizur lirshëm nëpër qytet dhe pa kurrfarë rreziku që të jenë të fyer ose keqtrajtuar nga ndokush.

Ata kanë çmuar edhe motivimin e udhëheqësve lokalë për të siguruar një përfaqësim adekuat të komuniteteve edhe në punësi, ashtu siç është bërë në administratën komunale.

Të gjitha këto parakushte i kanë dhënë përparësi Gjilanit për ta vendosur këtu zyrën e ADL-it, që eshtë e 11-ta për Evropën Juglindore.

Kryetari i komunës, Lutfi Haziri thotë se për Këshillin e Evropës kanë qenë inkurajuese përpjekjet e vendorëve për të krijuar vlera të reja në shoqërinë kosovare si dhe një ambient të sigurtë për të gjitha komunitetet që dëshirojnë të jetojnë këtu.

 

 

UNMIK-u e KFOR-i pohojnë se në Kosovë nuk ka grupe terroriste

 

Prishtinë, 13 shkurt 2003 - Autoritetet ndërkombëtare civile dhe ushtarake në Kosovë thanë se nuk kanë informacione për ekzistimin e ndonjë grupi terrorist që vepron në Kosovë. Këto komente zyrtarët e administratës ndërkombëtare dhe policisë së UNMIK-ut i bënë pas deklaratave të zëvendëskryeministrit serb Çoviq se në Kosovë ekzistojnë grupe të armatosura që planifikojnë të futen në Luginën e Preshevës dhe se Serbia është e gatshme të parandalojë sulmet e mundshme, të siç ka thënë, terroristëve në Luginën e Preshevës.

 

Mirëpo, zëdhënësi i policisë se UNMIK-ut Derek Çepell thotë se komentet e z. Çoviq janë të gabuara dhe se nuk ka pasur bisedime të autoriteteve të Beogradit me përfaqësuesit policorë të UNMIK-ut rreth ekzistimit të ndonjë grupi terrorist që vepron në Kosovë dhe që planifikon të futet në Luginën e Preshevës.

Po kështu edhe zëdhënësi i UNMIK-ut Sejmon Hasellok ka theksuar se në Kosovë nuk kanë informacione për mobilizimin e Armatës Kombëtare Shqiptare. "Të gjitha informacionet që i disponojmë bazohen në atë se çka kanë dëgjuar në media dhe në deklaratat e përfaqësuesve politikë në Serbi", nënvizoi Hasellok. Ai shtoi se diskutimet mes policisë së UNMIK-ut dhe asaj të Serbisë ekzistojnë, por ato zhvillohen për shqetësimet e përgjithshme rajonale.

Spekulimet serbe për ekzistimin e grupeve terroriste në Kosovë i ka përgënjeshtruar kategorikisht edhe zëdhënësi i forcave të KFOR-it Entoni Adams. Ai nënvizoi se as KFOR-i dhe as shërbimet e tij të zbulimit nuk kanë informacion për ekzistimin dhe veprimin e çfarëdo organizate terroriste në Kosovë.

Ndërkaq lidhur me këto spekulime serbe kryeadministratori Mihael Shtajner ka thënë shkurt: "Lufta ka mbaruar".

 

 

Prej 17 shkurtit Zyra gjermane fillon të japë viza për qytetarët e Kosovës

 

Berlin, 13 shkurt 2003 - Pas përgatitjeve të gjatë në Prishtinë do të fillojë punën Zyra gjermane për lëshimin e vizave për qytetarët e Kosovës. Kjo do të ndodhë më 17 shkurt. Këtë lajm e konfirmoi edhe Zyra për Informim e Ministrisë së Punëve të Jashtme të Gjermanisë në Berlin.

 

Zëdhënësja e Ministrisë së Punëve të Jashtme gjermane ka theksuar se në këtë zyrë për një vizë mund të aplikojnë vetëm qytetarët e Kosovës që duan të udhëtojnë për në Gjermani, por jo edhe ata që duan të udhëtojnë në vendet e tjera evropiane.

 

Ndërkaq të gjithë ata qytetarë që tashmë kanë aplikuar për të marrë vizë në ambasadat gjermane në Tiranë apo në Shkup mund të vendosin sipas dëshirës nëse duan t'i marrin vizat atje ku kanë aplikuar apo këtë ta bëjnë në Prishtinë.

Ministria e Punëve të Jashtme të Gjermanisë vendosi për një hap të tillë për faktin se qytetarët e Kosovës ballafaqoheshin me vështirësi të shumta në Shkup dhe Tiranë. Gjermania pas Zvicrës është vendi i dytë që bënë të mundur aplikimin për dhënien e vizave për qytetarët e Kosovës.

 

 

Një serb ëshë arrestuar lidhur me vrasjen e një shqiptari 18-vjeçar në Zubin Potok të Mitrovicës

 

Zubin Potok - Mitrovicë, 13 shkurt 2003 - Një pjesëtar i pakicës serbe është arrestuar lidhur me vrasjen e një 18-vjeçari shqiptar që ndodhi ditë më parë në Zubin Potok në veri të Kosovës, njoftojnë burimet e policisë ndërkombëtare në Mitrovicë.

 

 

Grupi parlamentar serb kërcënohet me një kundërdeklaratë

 

Prishtinë, 13 shkurt 2003 - Deputeti i Kuvendit të Kosovës Dragisha Kërstoviq ka deklaraur se grupi parlamentar serb do të shpallë deklaratën për njohjen e integritetit territorial të Serbisë e Malit të Zi nëse deputetët shqiptarë shpallin deklaratën për pavarësinë e Kosovës.

 

Ai i ka bërë këtë paralajmërim pas takimit të djeshëm të koalicionit "Kthimi" një ditë para se ky koalicion të kthehet në Kuvendin e Kosovës pas bojkotit tre muajsh.

 

"Ne kemi përpiluar një strategji të veprimit tonë se si do të sillemi në rast se në rend dite futet edhe iniciativa e deputetëve shqiptarë", tha Kërstoviq.

 

Ai tha se deputetët e koalicionit "Kthimi" e kanë të gatshme deklaratën për ruajtjen e integritetit territorial të Serbisë e Malit të Zi, të cilën do ta shpalin nëse Kuvendi i Kosovës do të shqyrtojë deklaratën e pavarësisë së Kosovës.

 

 

Svilanoviq nesër viziton Tiranën

 

Tiranë, 13 shkurt 2003 - Ministri i Punëve të Jashtme të Serbisë dhe Malit të Zi, Goran Svilanoviq, nesër më 14 shkurt, mbërrin në Tiranë për një vizitë zyrtare njëditore.

Svilanoviq do të takohet me ministrin e Jashtëm shqiptar Ilir Meta, si dhe me presidentin Alfred Moisiu dhe me kryeministrin Fatos Nano.

 

 

Shqiptarët protestuan në Bujanovc

 

Bujanovc, 13 shkurt 2003 - Në Bujanovc sot u bajt një tubim proteste kundër arrestimit të shtatë ish-pjesëtarëve të UÇPMB-së nga policia serbe. Në këtë tubim foli Jonuz Musliu, kryetar i Lëvizjes së Progresit Demokratik, i cili tha se ky tubim është thirrur për të mbrojtur të vërtetën dhe krenarinë shqiptare. "Ne nuk jemi terroristë, ne jetojmë në shtëpitë tona dhe të tjera nuk kemi", tha Musliu.

 

Është e vërtetë se situata politike është përkeqësuar shumë, tha Musliu dhe shtoi se jo me fajin e shqiptarëve, por me fajin e tjetërkujt. Akuzat që u mvishen shqiptarëve kanë për qëllim destabilizimin e rajonit, tha ai dhe kërkoi të ndërpriten ndjekjet kundër ushtarëve të ish-UÇPMB-së.

 

Protestuesit mbanin pankarta me mbishkrimet: "Liri çlirimtarëve", "Çoviqi si Millosheviqi", etj. Tubimi u përmbyll pa incidente.

 

 

Tiranë: Ambasadori amerikan Jeffrey bën thirrje për të luftuar krimin

 

Tiranë, 13 shkurt 2003 - Ambasdadori amerikan Amerikës në Tiranë, Xhems Xhefri u bëri thirrje punonjësve të sistemit të drejtësisë në Shqipëri që të punojnë në mënyrë sa më të vendosur në luftë kundër kriminalitet dhe trafikimit të qënjeve njerzore. Zoti Xhefri tha se punonjësit e drejtësisë duhet të marrin përsipër përgjegjësitë e tyre për të goditur kriminelët që po shkatrrojnë vendin.

 

 

Presidentët e Kroacisë, Maqedonisë dhe Shqipërisë nënshkruajnë një deklaratë partneriteti

 

Tiranë, 13 shkurt 2003 - Presidenti i Kroacisë, Stipe Mesiq, i Maqedonisë, Boris Trajkovski dhe ai i Shqipërisë, Alfred Moisiu nënshkruan të mërkurën në Tiranë një deklaratë partneriteti me qëllim koordinimin e përpjekjeve të të trija vendeve ballkanike për t'u anëtarësuar në NATO.

Takimi, i cili u bë me ftesë të presidentit të Shqipërisë, filloi të projektohej që në muajin nëntor në samitin e NATO-s në Pragë.

 

Aleanca vendosi atëherë zgjerimin e radhëve të saj me disa vende nga ish-blloku komunist, por duke lënë jashtë Shqipërinë, Maqedoninë dhe Kroacinë, me premtimin se portat e NATO-s do të mbeteshin të hapura.

Mes SHBA-së dhe tre vendeve pritet që në mars të nënshkruhet një marrëdhënie partneriteti që do të njihet si 'Adriatiku 3'.

NATO dhe BE-ja kanë bërë thirrje për më shumë bashkëpunim rajonal mes vendeve të Ballkanit perëndimor përpara se të shqyrtojnë anëtarësinë e këtyre vende në të dyja organizmat.

 

 

Zyrtarët ndërkombëtarë në Shkup kanë hedhur poshtë spekulimet për ndonjë "ofensivë pranverore"

 

Shkup, 13 shkurt 2003 - Zyrtarët ndërkombëtarë në Shkup kanë hedhur poshtë spekullimet për ndonjë "ofenzivë pranverore" në Maqedoni duke insistuar se incidentet e dhunshme të kohëve të fundit janë punë bandash kriminale. Por, ministri maqedonas i Mbrojtjes, Vllado Buçkovski, thotë se ai "nuk e përjashton as mundësinë e incidenteve të armatosura", të cilave thotë se "duhet tu përgjigjemi me forcë", as mundësinë e "destabilizimit të rajonit".

 

 

Ish-krerët ushtarakë përgënjeshtrojnë pohimet serbe se AKSH-ja ka shpërndarë ftesat për mobilizim të ri të pjesëtarëve të UÇPMB-së

 

Preshevë, 13 shkurt 2003 - Ish-krerët e UÇPMB-së në Luginën e Preshevës kanë përgënjeshtruar kategorikisht pohimet e palës serbe, sipas të cilave anëtarët e kësaj organizate të shpërbërë po përgatiten nëpër disa kampe të Gjilanit dhe Kamenicës në kuadër të AKSH-së për të bërë pastaj një sulm drejt komunave të Bujanovcit dhe Preshevës dhe kinse AKSH-ja ka bërë shpërndarjen e ftesave për mobilizim të ri të pjesëtarëve të ish-UÇPMB-së.

Shefket Musliu, ish-ushtarak tha se kjo është propagandë e këshillit koordinues serb të udhëhequr nga Nebojsha Çoviq, i cili synon të mbajë situatën të tensionuar dhe dëshiron t'i mbajë kriminelët serbë në rajonin e Kosovës Lindore.

Ndërkohë, subjektet politike shqiptare kanë paralajmëruar për sot organizimin e një proteste të madhe në qendër të Bujanocit si reagim ndaj arrestimit të shtatë shqiptarëve në Luginën e Preshevës.

 

 

Buçkovski spekulon se ekzistojnë banda të armatosura që infiltrohen nga Kosova për ta destabilizuar Maqedoninë?!

 

Shkup, 13 shkurt 2003 - Ministri maqedonas i Mbrojtjes Vllado Buçkovski tha se gjendja në zonat ku pati konflikte të armatosur në vitin 2001 është e brishtë. Sipas tij ekzistojnë grupe të armatosura që synojnë destabilizimin e Maqedonisë dhe se këto banda, siç i quajti ai, infiltrohen nga Kosova.

 

Duke folur në Komisionin Parlamentar për Çështjet e Sigurisë dhe të Mbrotjes, ministri maqedonas i Mbrojtjes tha se ekziston motiv politik i këtyre grupeve për ta destabilizuar rajonin. Ai parlajëmroi edhe pranimin e 120 pjesëtarëve të përkatësisë shqiptare, oficerë në radhët e ushtrisë maqedonase.

 

 

Kryetari i PDSH-së thotë se nuk do të marrë pjesë në takimin me nëshkruesit e Marrëveshjes së Ohrit

 

Shkup, 13 shkurt 2003 - Kryetari i Partisë Demokratike Shqiptare Arbër Xhaferi bëri të ditur se nuk do të marrë pjesë në takimin e ardhshëm me nëshkruesit e Marrëveshjes së Ohrit në zyrën e presidentit Trajkovski. Xhaferi e bëri të ditur qëndrimin e tij në një letër dërguar presidentit maqedonas Trajkovski.

 

Në këtë letër ai thekson se institucionet maqedonase nuk po e respektojnë marrëveshjen për amnistinë për ish-luftëtarët shqiptarë.

 

 

Shrëder mbron qëndrimin ndaj Irakut

 

Berlin, 13 shkurt 2003 - Kancelari gjerman, Gerhard Shrëder, ka mbrojtur me vendosmëri kundërshtimin e qeverisë së tij ndaj një lufte kundër Irakut. Duke foluar para parlamentit në Berlin, kancelari Shrëder tha se Iraku nuk ka raketa bërthamore apo me rreze të gjatë veprimi.

Ai shtoi se inspektorëve duhet t'u jepet më shumë kohë për të gjetur saktësisht se çfarë armësh ka Iraku dhe pastaj Këshilli i Sigurimit duhet të thotë fjalën e fundit se çfarë duhet bërë.

Kancelari Shrëder i tha parlamentit tha se rezoluta 1441 nuk e përfshin ndërhyrjen automatike ushtarake:
"Rezoluta 1441 nuk përfshin automatikisht ndërhyrjen ushtarake. Përparësi është që të shfrytëzojmë të gjithë mundësitë për një zgjidhje paqësore dhe për të ndihmuar shfrytëzimin e këtyre mundësive", tha kancelari gjerman.

 

 

SHBA përpiqen për rezolutë të re të OKB-së për Irakun

 

Uashington, 13 shkurt 2003 - Sipas të dhënave të SHBA, aktualisht po vazhdojnë bisedimet për formulimin e një rezolute të re të Këshillit të Sigurimit të OKB-së për Irakun. Çdo rezolutë e re duhet të përforcojë vlefshmërinë e rezolutës së nëntorit, tha zëdhënësi i Presidentit amerikan, Ari Flajsher. SHBA dhe Britania e Madhe kërkojnë të miratohet një rezolutë, e cila autorizon përdorimin e dhunës ushtarake, nëse Iraku i shkel kërkesat për carmatim.

Ndërkohë, Franca u ka shpërndarë anëtarëve të Këshillit të Sigurimit një letër jozyrtare, në të cilën paraqitet një alternativë ndaj një sulmi ndaj Irakut. Në të kërkohet zgjerimi i inspektimeve të armatimit, një koordinator i përhershëm i OKB-së në Bagdad dhe angazhimi i ekspertëve të doganave.

 

 

SHBA kritikon sërish Gjermaninë dhe Francën për qëndrimin ndaj Irakut

 

Uashington, 13 shkurt 2003 - Qeveria amerikane e kritikoi sërish qëndrimin e Francës, Gjermanisë dhe Belgjikës për ndihmën ndaj Turqisë. Zëdhënësi i Shtëpisë së Bardhë, Ari Flajsher tha përsa i përket Gjermanisë, se ajo është në një shkallë të tillë kundër luftës, sa e "ka humbur çdo objektivitet".

"Unë mendoj se ka dalë në pah që Gjermania, e cila është plotësisht kundër përdorimit të forcës, do të kundërshtojë sërish lidhjet e Osama bin Ladenit me Irakun, megjithë faktet që parashtroi sekretari Pauell, se ne e dimë që anëtarë të Al Kaidës po veprojnë brenda Bagdadit", tha Ari Flajsher.

 

 

Franca dhe Gjermania sigurojnë Turqinë për mbështetje në rast rreziku

 

Berlin, 13 shkurt 2003 - Pavarësisht nga mosmarrëveshja formale në NATO për mbrojtjen ushtarake të Turqisë në rast të një lufte në Irak, Franca dhe Gjermania e kanë siguruar qeverinë e Ankarasë për mbështetje në rast rreziku.

 

Presidenti francez, Zhak Shirak i tha në një bisede telefonikë homologut të tij turk, Ahmet Nexhdet Sezer se do të ofrohet ndihmë, nëse Turqia rrezikohet me të vërtetë. Në mënyrë të ngjashme është shprehur edhe kancelari gjerman, Gerhard Shrëder.

Në Këshillin e NATO-s në Bruksel vazhdojnë sot përpjekjet për gjetjen e një kompromisi në këtë çështje. Disa mbledhje radhazi të 19 anëtarëve të NATO-s për të gjetur një rrugëdalje kanë rezultuar pa sukses.

 

 

Gjatë luftimeve triditëshe në Filipine janë vrarë 122 guerilë muslimanë

 

Pikit/ Filipine, 13 shkurt 2003 – Ministria filipinase ka deklaruar se gjatë luftimeve të rrepta triditëshe në ujdhesën jugore Mindanao, janë vrarë 122 guerilë muslimanë, njofton Rojter.

 

Trupat, gjithashtu, kanë shpëtuar dy familje që guerilasit e Frontit të Çlirimit Islamik të Moros (MILF) i kishin mbajtur si mburojë njerëzore, të cilët ishin përpjekur të iknin gjatë sulmeve të njësiteve të atrmatës afër qytetit Pikit, 580 mila në juglindje të kryeqytetit Manila.

 

I njëjti burim ka thënë se gjatë këtyre luftimeve janë vrarë tre ushtarë, kurse janë plagosur 15 të tjerë.

 

 

Koreja e Veriut ka tërhequr vërejtjen se mund të godasë caqet amerikane kudo në botë

 

Phenian, 13 shkurt 2003 – Në kohën kur trysnia për heqjen dorë të programve të saja bërthamore po rritet dhe çështja do të shqyrtohet edhe në KS të OKB-së, Koreja e Veriut ka tërhequr vërejtjen se mund të godasë objektivat amerikane kudo në botë, njofton AFP.

 

"Në rastin e masave të vetëmbrojtjes, mund të ndërmirret një sulm kundër gjithë personelit ushtarak dhe kundër të gjitha komandave ushtarake të Shteteve të Bashkuara në botë", ka thënë zyrtari i lartë i Ministrisë së Jashtme, Ri Kvang Hjok, në një intervistë për këtë agjenci.

 

 

Osama bin Ladeni parasheh se do të vdesë si "martir"

 

Londër, 13 shkurt 2003 - Një agjenci e lajmeve islamike, Al Ansaar, ka njoftuar sot se ka një shirit tonik të Osama bin Ladenit në të cilin lideri i rrjetit terrorist i Al Kaidës parasheh se do të vdesë si "martir" me rastin e sulmeve kundër armiqve.

 

Kjo agjenci me seli në Birmingen pohon se incizimi tonik që zgjat 53 minuta është bërë këtë muaj dhe është siguruar përmes një shitësi në internet.

 

 

Beogradi bën plane për kinse sulmet terroriste nga Kosova

 

Beograd, 13 shkurt 2003 - Ministria e Punëve të Brendshme të Serbisë ka njoftuar të enjtën se policia po ndërmerr masa parandaluese dhe të tjera të sigurisë sepse, siç thuhet, "planet e grupeve terroriste në Kosovë dhe në rajon po krijojnë një rrezik real të formave të ndryshme të sulmeve terroriste në vend".

 

 

Të pakten 16 protestues janë vrarë dhe 80 të tjerë janë plagosur në demonstratat në Bolivi

 

La Paz, 13 shkurt 2003 – Të pakten 16 protestues, përfshirë edhe 4 policë zyrtarë, janë vrarë dhe 80 të tjerë janë plagosur në demonstratat masovike kundër ngritjes së taksave nga ana e presidentit Gonzalo Sançez de Lozada, i cili kështu u detyrua t'i shfuqizojë ato, njofton AFP.

 

Përleshjet e së merkurës sollën situatën buzë shpërthimit të protestës nacionale, të thirrur nga sindikata më e madhe e vendit për të protestua kundër politikës ekonomike të presidentit, nga i cili është kërkuar edhe dorëheqja.

 

 

Pauell përsëri në Këshillin e Sigurimit të OKB-së

 

Uashington, 13 shkurt 2003 - Sekretari amerikan i Shtetit Kolin Pauell tha se duket qartë se Iraku nuk e ka kaluar provimin e çarmatimit të vendosur nga Këshilli i Sigurimit.

Në një interpelancë para kongresit amerikan, zoti Pauell tha se dështimi i Këshilli të Sigurimit për të detyruar Irakun të përmbushë rezolutën për çarmatim të nëntorit të vitit të kaluar do të rrezikonte besueshmërinë politike të këshillit.

 

Ai tha se do t'i konfrontonte kolegët e tij gjermanë dhe francezë mbi motivet për këtë vonesë të mëtejshme në ndërmarjen e veprimeve.

"Franca dhe Gjermania po rezistojnë. Ato besojnë se duhen më shumë inspektime, më shumë kohë. Pyetja ime do të jetë: Përse më shumë inspektorë? Edhe sa kohë më shumë duhet t'u jepet?

 

Apo thjesht po shkaktoni vonesa për ta shpëtuar Sadam Huseinin nga përgjegjësia dhe nga çarmatimi? Këto janë pyetjet sfiduese që to të shtroja para tyre të premten dhe javën e ardhshme ndërsa debati mbi këtë çështje vazhdon".

 

 

Dyshime të OKB-së për raketat irakiane

 

Bagdad, 13 shkurt 2003 - Njoftohet se ekspertët e raketave kanë arritur në përfundimin se Iraku po zhvillon raketa balistike që i kalojnë kufizimet e vendosura nga Kombet e Bashkuara.

Rëndësia strategjike nuk është e qartë. Ato mund të godasin Kuvajtin, por nuk mund të shkojnë deri në Izrael.

Megjithatë çështja ka të bëjë me atë nëse këto raketa mund të adaptohen për të fluturuar më tej.

Shqetësimi tjetër është nëse këto raketa mund të mbajnë kapsula me pajisje kimike dhe biologjike.

Iraku mohon se raketat e tij kalojnë kufizimet e vëna nga OKB-ja.

 

 

SHBA-të kanë vendosur rreth Uashingtonit avionë lufte e radarë për mbrojtjen ajrore

 

Uashington, 13 shkurt 2003 - Autoritetet e Shteteve të Bashkuara thonë se kanë vendosur rreth Uashingtonit avionë lufte, radarë për mbrojtjen ajrore dhe lansues raketorë pas alarmimeve për kërcënime të larta terrori.

Zëdhënësja e Komandës për Mbrojtjen e Hapësirës Ajrore të Amerikës Veriore, majorja Brenda Barker tha se tash është aktivizuar siguria e jashtwzakonshme.

 

Ajo tha se përgjigja përfshin raketa kundër ajrore Avenger, radarë Sentinel dhe raketa Stinger në tokë, shërbim helikopterësh në ajër dhe aeroplanë luftarakë që patrullojnë mbi krye.

 

 

Bler thotë se KS akoma mund të miratojë një rezolutë të dytë për Irakun

 

Londër, 13 shkurt 2003 - Kryeministri britanik, Toni Bler ka thënë se Këshilli i Sigurimit akoma mund të miratojë një rezolutë të dytë për Irakun për të autorizuar përdorimin e forcës, duke përsëritur se kriza rreth Irakut duhet të zgjidhet nëpërmjet Kombeve të Bashkuara.

 

"Nëse Iraku bashkëpunon, atëherë inspektorët mund të kenë aq kohë sa u nevojitet dhe dëshirojnë për të kryer punën e tyre.

 

Nga ana tjetër, nëse Iraku nuk bashkëpunon, atëherë duhet të jemi të kujdesshëm që të mos gjendemi sërish në situatën në të cilën ishim në vitet 90' kur inspektorët qëndruan atje për katër vite", ka thënë kryeministri britanik.

 

 

NATO nuk arriti të dakordohet për mbrojtjen e Turqisë në rast lufte