Lajme

E mërkure, 12 shkurt 2003

Përmbajtja:

• Presidenti Rugova ndodhet për një vizitë në Itali

• Qeveria diskutoi për kërkesat e ministrave për transferin e përgjegjësive dhe për skretarin e përhershëm të MSH

• Arrestohen dy serbë për shkak se kanë kërcënuar një pjesëtar të SHPK-së

• Marrëveshje bashkëpunimi ndërmjet Universitetit të Prishtinës dhe atij të Tetovës

• Komiteti i Bashkuar Islamik ndau 4 mijë kg mish për 1 mijë familje llapjane

• Dëbimi i "Rilindjes" nga Pallati i saj ka si pasojë mbylljen faktike të gazetës tradicionale të Kosovës

• Kryeshefi i Ekzekutivit të Prishtinës Ramosaj dha dorëheqje të parevokueshme

• Në mbarë Kosovën u festua Bajrami i Vogël

• Fabio Mini thotë se nuk ekzistojnë rrethana politike për kthimin e forcave serbe në Kosovë

• Kongresisti amerikan Haid thotë se edhe tash është koha e përshtatshme për pavarësinë e Kosovës

• Xh. Huper thotë se kërkesa e kryeministri serb për bisedime mbi të ardhmen e Kosovës i gjeti shqiptarët e papërgatitur

• Klubi i basketbollit "Trepça" me web site të vetin

• Cërvenkovski thotë se ekziston rreziku nga bandat kriminale dhe grupet ekstremiste në Maqedoni

• Samit tripalësh në Tiranë

• Nuk ka rimobilizim të guerilëve shqiptarë, thonë autoritetet shqiptare në Luginën e Preshevës

• A do të heqet Ali Ahmeti nga lista e zezë e presidentit amerikan Xhorxh Bush?

• Ministri maqedonas i Mbrojtjes të enjten do të vizitojë Kosovën

• Masmediat serbe spekulojnë për mundësinë e sulmeve të grupeve të armatosura shqiptare në jug të Serbisë

• Presidenti filipinas ka urdhëruar ushtrinë të ndërmarrë një ofensivë kundër kryengritësve muslimanë

• Gjatë bombardimeve të forcave amerikane Luginën e Bagramit janë vrarë të pakten 17 civilë

• Janë gjetur copat e aeroplanit, në të cilin ndodhej edhe ministri kolumbian

• Putin thotë se deklarata e përbashkët e Francës, Gjermanisë dhe Rusisë nuk është e drejtuar kundër askujt

• Bauçer: Rrjeti Al Kaida i Bin Ladenit ende paraqet kërcënim

• Trupat izraelite kanë vrarë dy palestinezë

• Pauell shpreson që NATOja ta kapërcejë bllokimin e mbështetjes ushtarake ndaj Turqisë

• Bin Laden-i bën thirrje për luftë të shenjtë

• BE-ja ndërmjetëson në krizën e Koresë së Veriut

• Trupat izraelite hynë në Betlehem

• Inspektorët e KB kanë vazhduar punën e tyre në Irak

• NATO nuk arriti t'i japë fund njërës nga krizat më të rënda në historinë

• Kryeministri i Turqisë ka kërkuar sërish nga NATO që të mbrojë Turqinë në rast lufte në Irakun

• Strou thotë se Kombet e Bashkuara duhet të mbesin "në qendër të përpjekjeve" për luftimin e terrorizmit"

• Shefi i CIA-s thotë se informacionet e fundit të zbulimit sugjerojnë sulme të mundshme terroriste në SHBA

Presidenti Rugova ndodhet për një vizitë në Itali

 

Romë, 12 shkurt 2003 - Presidenti i Kosovës Ibrahim Rugova ndodhet në për një vizitë në Itali. Zotit Rugova do t'i dorëzohet çmimi i Shën Valentinit, të cilin e ndan Dioqeza e Ternit, afër Romës.

Gjithashtu pritet që Presidenti Rugova të ketë edhe takime me zyrtarë të lartë të Italisë.

 

 

Qeveria diskutoi për kërkesat e ministrave për transferin e përgjegjësive dhe për skretarin e përhershëm të MSH

 

Prishtinë, 12 shkurt 2003 - Kërkesat e ministrave për transferin e përgjegjësive në kompetencë të vendorëve dhe çështja e sekretarit të përhershëm në Ministrinë e Shëndetësisë kanë qenë pikat kryesore për të cilat ka diskutuar sot Qeveria e Kosovës në takimin e rregullt.

 

Kryeministri Bajram Rexhepi ka njoftuar se të gjitha ministrat kanë dorëzuar kërkesat e tyre për bartjen e kimpetencave, të cilat pastaj do t'i dërgohen UNMIK-ut si strategji e unike e qeverisë.

Ndërkaq për sekretarin e përhershëm të Ministrisë së Shëndetësisë Rexhepi tha se Qeveria nuk mund të marrë asnjë qëndrim.

Por ministri i shëndetësisë Baliq mendon ndryshe. Baliq ka thënë se në rastin konkret është shkelur procedura dhe se në mbledhjen e sotme kishte marrë përkrahjen e gjashtë ministrave të tjerë për përsëritjen e konkursit, sepse, sipas tij procedura është shkelur nga komisioni.

 

Baliq tha se do t'i shkruajë shefit të UNMIK-ut që të anulohet vendimi i komisionit dhe të rishpallet konkursi.

Qeveria poashtu ka diskutuar edhe për një çëshje tjetër - për mënyrën sesi Kosova të përfshihet në procesin e asociim stabilizimit si dhe ka kërkuar nga institucionet që të paguhen borxhet ndaj KEK-ut.

 

 

Arrestohen dy serbë për shkak se kanë kërcënuar një pjesëtar të SHPK-së

 

Mitrovicë, 12 shkurt 2003 - Në pjesën veriore të Mitrovicës janë arrestuar dy serbë për shkak se kanë kërcënuar një pjesëtar të SHPK-së, i cili në atë moment ndodhej duke patrulluar.

 

Zëdhënësi i policisë së UNMIK-ut në Mitrovicë ka bërë të ditur se nja dhjetë huliganë serbë kanë fyer dhe kërcënuar pjesëtarin e Shërbimti Policor të Kosovës, në momentin kur ai bashkë me dy policë ndërkombëtar ishte duke patrulluar në një rrugë të pjesës veriore të Mitrovicës, njoftojnë mediat lokale.

 

Madje huliganët i kanë përcjellë me kërcënime derisa policët kan hyrë në stacionin policor. Pastaj policët ndërkombëtarë arrestojnë dy huliganë, kurse hetimet vazhdojnë edhe kundër huliganëve të tjerë.

 

 

Marrëveshje bashkëpunimi ndërmjet Universitetit të Prishtinës dhe atij të Tetovës

 

Prishtinë, 12 shkurt 2003 - Në Prishtinë sot është nënshkruar një marrëveshje bashkëpunimi ndëruniversitare ndërmjet Universitetit të Prishtinës dhe Universitetit të Tetovës. Në emër të UP këtë marrëveshje e nënshkroi prof.dr. Zenel Kelmendi kurse në emër të UT-së Dr. Ramiz Abdyli.

 

Të dy nënshkruesit e kësaj marrëveshje thanë se qëllimi i saj është përmirësimi i cilsisë së arsimit të lartë brenda hapësirës shqiptare.

 

 

Komiteti i Bashkuar Islamik ndau 4 mijë kg mish për 1 mijë familje llapjane

 

Podujevë, 12 shkurt 2003 – Komiteti i i Bashkuar Islamik – IWC me rastin e Kurban Bajramit dje ndihmoi mbi një mijë familje llapjane me nga 4 kg mish, deklaroi sot menaxheri i Lagjes Kuvajtiane në Ballofc të Podujevës z. Rashdi Xharoun.

 

Sipas z. Xharoun në mesin e familjeve të cilave u shpërndanë 4 mijë kg mish janë familjet e dëshmorëve, familjet e jetimëve dhe familje me gjendje të rëndë sociale. Nga kjo ndihmë e cila ka kushtuar mbi 13 mijë euro kanë përfituar edhe 130 familjet e Lagjes Kuvajtiane, njoftoi Rashid Xharoun.

Me rastin e festës së Bajramit të Vogël ndihma ka shpërndarë edhe Karitasi i Prishtinës për fëmijët e 24 familjeve skamnore.

 

 

Dëbimi i "Rilindjes" nga Pallati i saj ka si pasojë mbylljen faktike të gazetës tradicionale të Kosovës

 

Prishtinë, 12 shkurt 2003 - Sot, për herë të parë, nuk do të mbahet manifestimi tradicional i 12 Shkurtit - Ditës së "Rilindjes", gazetës së parë, tradicionale, të Kosovës, që në këtë ditë ka ditëlindjen e 58-të, tha para gazetarëve nën qiellin e hapur, Behlul Jashari, kryetar i Këshillit Drejtues dhe u.d. Kryeredaktor i "Rilindjes".

Në rrethanat e krijuara të ndërprerjes së detyrueshme të botimit të gazetës për shkak të marrjes së Pallatit të Rilindjes për ndërtesë qeveritare, pa bërë zgjidhje alternative, duket e pakuptimtë mbajtja e manifestimit, tha ai dhe me këtë rast shprehu shqetësimin për vonesën e madhe të zgjidhjes për "Rilindjen".

Behlul Jashari tha se dëbimi i "Rilindjes" nga Pallati i saj, pa i siguruar lokal alternativ pune, ka si pasojë mbylljen faktike të gazetës tradicionale të Kosovës dhe është shkelje e të drejtave dhe lirive të njeriut, e të drejtës për punë, pronë e ekzistencë, e integritetit të shtypit të lirë dhe të një institucioni siç është «Rilindja».

 

 

Kryeshefi i Ekzekutivit të Prishtinës Ramosaj dha dorëheqje të parevokueshme

 

Prishtinë, 12 shkurt 2003 - Kryeshefi i Ekzekutivit të Kuvendit Komunal të Prishtinës, Dr. Berim Ramosaj, sot ka njoftuar kryetarin e Komunës së Prishtinës, Ismet Beqiri, administratorin ndërkombëtar, Anil Vasisht dhe Bordin e Drejtorëve të KK të Prishtinës, për dorëheqjen e tij të parevokueshme nga posti i kryeshefit ekzekutiv.

Në tekstin e dorëheqjes me shkrim, z. Ramosaj thotë se nga posti i kryeshefit të Ekzekutivit të Komunës së Prishtinës tërhiqet "me qëllim të sprovimit të kuadrove të reja në udhëheqjen e Administratës lokale".

Dr. Berim Ramosaj falënderoi gjithë stafin për bashkëpunim, ndërkaq kryetari i Komunës së Prishtinës, Ismet Beqiri, duke falënderuar për angazhimin e z. Ramosaj, theksoi se as në të ardhmen nuk do të mungojë bashkëpunimi, sepse të gjithë i pret një periudhë e rëndë për sendërtimin e objektivave të përbashkëta. Zotin Ramosaj e falënderoi edhe administratori bdërkombëtar, Anil Vasisht.

 

Bordin e drejtorëve, kryetari i KK të Prishtinës, z. Ismet Beqiri e njoftoi se dorëheqja e kryeshefit të Ekzekutivit, do të miratohet në Asamble, kurse deri në shpalljen e konkursit të ri për shef të ekzekutivit, ushtrues detyre u caktua, Sami Hamiti. Gjithashtu, edhe drejtorët e drejtorive deri në shpalljen e konkursit do të jenë ushtrues detyre në drejtoritë përkatëse.

 

 

Në mbarë Kosovën u festua Bajrami i Vogël

 

Prishtinë, 12 shkurt 2003 - Dje në mbarë Kosovën u festua festa e Bajramit të Vogël, kurse manifestimi qendror u mbajt në xhaminë "Sulltan Mehmet Fatih", në Prishtinë. Kryeimami i Bashkësisë Islame të Kosovës, Naser Tërnava u uroi besimtarëve të fesë islame festën e Bajramit dhe që kjo festë të jetë simbol paqeje, lumturie e mirëkuptimi ndërnjerëzor dhe njëherit të shmangë të keqen, mosdurimin dhe jotolerancën.

"Nuk ka ditë më të madhe se dita e Kurban Bajramit. Le të jetë namazi ynë, Kurbani, jeta jonë dhe vdekja jonë vetëm se për Allahun, Zotin e Botërave. Gjithnjë e mira duhet ta mbizotërojë të keqen, bujaria-padurimin, toleranca-hidhërimin dhe krenaria-kryelartësinë", u tha ndër të tjera në ceremoninë e faljes së Kurban Bajramit.

Ndërkohë besimtarët në mbarë Kosovën shprehën solidaritetin e tyre me familje të varfëra si dhe me familje të dëshmorëve e të pengjeve të luftës.

 

 

Fabio Mini thotë se nuk ekzistojnë rrethana politike për kthimin e forcave serbe në Kosovë

 

Prishtinë, 12 shkurt 2003 - Komandanti i forcave të KFOR-it në Kosovë, gjenerali Fabio Mini ka vlerësuar se rrethanat aktuale nuk mundësojnë kthimin e forcave serbe të sigurimit, siç kanë kërkuar disa përfaqësues të Beogradit.

 

Z.Mini në një intervistë dhënë radios "Evropa e lirë", ka thënë se kërkesa e autoriteteve serbe për kthimin e forcave serbe ka më shumë karakter politik sesa praktik.

 

Komandanti i KFOR-it ka shpjeguar se megjithë faktin se me Rezolutën 1244 të KS të OKB-së është paraparë kthimi i një numri të caktuar të personelit serb, vendimi për një çështje të këtillë nuk mund ta miratojnë autoritetet serbe.

"Kryeministri serb Zoran Gjingjiq ka të drejtë të kërkojë çfarë të dojë, por edhe ne kemi të drejtë të përgjigjemi, duke thënë se rrethanat aktuale politike që do të mundësonin kthimin e personelit serb në Kosovë nuk ekzistojnë", tha z. Mini.

 

 

Kongresisti amerikan Haid thotë se edhe tash është koha e përshtatshme për pavarësinë e Kosovës

 

Uashington, 12 shkurt 2003 - Pas takimit me kryetarin e njërës dhomë të Parlamentit të Serbisë dhe Malit të Zi, Dragolub Miçunoviq, kyetari i Komitetit për politikë të jashtme, kongresisti Henri Hajd bëri një koment lidhur me atë nëse tash është koha e përshtatshme për pavarësinë e Kosovës.

 

Z. Haid tha se koha është gjithmonë e përshtatshme kur bëhet fjalë për pavarësinë e një popull. Ai konfirmoi se gjatë takimit me z. Miqunoviq u diskutua rreth çështjes së pavarësisë së Kosovës dhe u ra dakord për nevojën e fillimit të një dialogu midis serbëve dhe shqiptarëve.

 

Kongresisti amerikan theksoi se aktualisht Kosova përballet me probleme të mëdha që fillojnë zgjidhjen, por shtoi se me dialog dhe me durim këto probleme mund të zgjidhen.

 

 

Xh. Huper thotë se kërkesa e kryeministri serb për bisedime mbi të ardhmen e Kosovës i gjeti shqiptarët e papërgatitur

 

Uashington, 12 shkurt 2003 - Kërkesa e kryeministrit serb Zoran Gjingjiq për të hapur bisedimet mbi të ardhmen e Kosovës i gjeti shqiptarët e papërgatitur, theksoi Xhejms Huper, drejtori i Grupit të politikave dhe ligjit publik ndërkombëtar me seli në Uashington.

 

Ai i bëri këto komente në një intervistë për "Zërin e Amerikës dhe shpjegoi se së pari Gjingjiq u përpoq të tregojë se ai është më aktiv në këtë çështje, se ai është më i suksesshëm për të bërë diçka për Serbinë dhe po përpiqet ta vërë Koshunicën në pozitën mbrojtëse.

 

Sipas këtij analisti amerikan kërkesa e Gjingjiqit ka të bëjë me politikën e brendshme dhe ai ndjeu se ky ishte një rast për të treguar se komuniteti ndërkombëtar ka njëfarë simpatie për pozitën e serbëve.

 

Ai synonte gjithashtu t'i kapte shqiptarët në befasi, sespe ishin shqiptarët ata që thoshin se kërkonin pavarësinë, mirëpo kjo nuk ndodhi dhe dukej sikur kjo çështje ishte lënë pasdore. Tash Gjingjiq e shtron përsëri këtë çështje por tash ai nuk flet vetëm për bisedime, por edhe për dërgimin e trupave serbe në Kosovë, thotë Hupër.

 

Sipas tij kjo tregon se vetë shqiptarët duhet të jenë më aktivë dhe ata nuk duhet të supozojnë se do të jetë komuniteti ndërkombëtar që do të kujdeset për interesat e tyre. Ata duhet të jenë më këmbëngulës mbi interesat e tyre.

Shqiptrët duhet të peshojnë mirë se çfarë kërkojnë në negociata, ku do të zhvillohen ato, me cilin do të bisedojnë, cila do të jetë suaza e bisedimeve, a do të jetë Rezoluta 1244 ku do të zhvillohen ato, si dhe një seri e tërë çështjesh që kanë të bëjnë me pronën private, ekonominë dhe objektet fetare, trajtimin e pakicave, demokratizimin, thotë Huper dhe thekson se të gjitha këto çështje duhet peshuar mirë, sepse janë pjesë e paketës së pavarësisë.

 

 

Klubi i basketbollit "Trepça" me web site të vetin

 

Mitrovicë, 12 shkurt 2003 - Klubi i basketbollit "Trepça" e Mitrovicës, ka krijuar website të vetin (http://www.trepca.org), dhe ky është klubi i parë me faqe në internet. Në këtë faqe, që është krijim e sipër, mund të gjenden shënime për klubin "Trepça", ekipin dhe simpatizantët e saj të njohur me emrin "Torcida".

"Trepça" është nënkampion aktual i Kosovës në basketboll, kurse në renditjen e tashme tabelare ndodhet në vendin e pestë.

 

 

Cërvenkovski thotë se ekziston rreziku nga bandat kriminale dhe grupet ekstremiste në Maqedoni

 

Shkup, 12 shkurt 2003 - "Duhet të jemi vigjilentë, jo 12 por 24 orë, ngase është e qartë se rreziku ekziston, qoftë kur është fjala për bandat kriminale apo për grupet e organizuara ekstremiste", ka deklaruar mbrëmë për mediat e vendit kryeministri maqedonas Branko Cërvenkovski.

Ndërkaq, duke komentuar rrezikun nga "ofensiva pranverore", Cërvenkovski ka thënë se autoritetet e Shkupit do t'i ndërmarrin të gjitha masat e parapara me ligj, por njëherit ai kërkon edhe bashkëpunim me popullsinë lokale në rajonet potenciale të krizës në Maqedoni.

 

 

Samit tripalësh në Tiranë

 

Tiranë, 12 shkurt 2003 - Me ftesën e presidentit të Shqipërisë, Alfred Moisiu, dje arritën për një takim trepalësh presidentët e Kroacisë, Stipe Mesiç dhe ai i Maqedonisë, BorisTrajkovski. Ky takim i nivelit të lartë mes tre vendeve ballkanike është quajtur “Drejt NATO-s”.

 

Nga vetë emri i takimit kuptohet se temë qëndrore e bisedimeve pritet të jenë përpjekjet e përbashkëta të këtyre tre vendeve që synojnë të bëhen në të ardhmen anëtare të Aleancës së Atlantikut të Veriut.

 

Takimi filloi të projektohej që në muajin nëntor në samitin e NATO-s në Pragë, ku Aleanca vendosi zgjerimin e radhëve të saj me disa vende nga ish-blloku komunist, por duke lënë jashtë Shqipërinë, Maqedoninë dhe Kroacinë, me premtimin se portat e NATO-s do të mbeteshin të hapura.

 

 

Nuk ka rimobilizim të guerilëve shqiptarë, thonë autoritetet shqiptare në Luginën e Preshevës

 

Preshevë, 12 shkurt 2003 - Situata në Luginën e Preshevës vazhdon të jetë e tensionuar pas arrestimit të 12 shqiptarëve pjesëtarë të ish-guerilës shqiptare, 7 nga të cilët ndodhen në paraburgim.

Jonuz Musliu, kryetar i Lëvizjes së Progresit Demokratik, parti kjo e dalë nga ish-UÇPMB-ja, ka thënë se "gjendja është e tensionuar edhe si pasojë 42 automjete kanë ardhur nga Serbia dhe iu kanë vërsulë Bujanocit, gjë që e ka tensionuar situatën edhe më shumë".

 

Ndërkaq kryetari i KMDLNJ në Bujanovc Shaip Kamberi thekson se në në fshatin Tërnoc aktulisht mbretëron një situatë e tensionuar duke përkujtuar faktorin ndërkombëtar që nuk po përmbush obligimet që ka marrë me rastin e nënshkrimit të marrëveshjes paqësore të 21 majit të vitit 2001.

 

KMDLNJ ka mbledhur dëshmi për shkelje flagrante të të drejtave të njeriut dhe për këtë janë njoftuar të gjitha ambasadat e vendeve perëndimore në Beograd.

Ndërkohë zyrtarët serbë thonë se ish-guerilja shqiptare ka filluar të rimobilizohet, mirëpo, z. Musliu ka hedhur poshtë këto pohime, duke thënë se Beogradi me një vlerësim të tillë dëshiron krijimin e një preteksti për t'i dëbuar shqiptarët nga trojet e tyre.

 

 

A do të heqet Ali Ahmeti nga lista e zezë e presidentit amerikan Xhorxh Bush?

 

Shkup, 12 shkurt 2003 - A do të heqet Ali Ahmeti nga lista e zezë e presidentit amerikan Xhorxh Bush? Në Partinë e Bashkimit Demokratik për Integrim thonë se shpresojnë që një gjë e tillë të ndodhë së shpejti edhe për shkak të politikës së tij konstruktive. Njoftohet se kjo gjë do të ndodhë së shpejti, citohet të ketë thënë nënkryetarja e PDI-së Teuta Arifi.

Ngjashëm u shpreh edhe ambasadori amerikan në Shkup Batler. Ai tha se lista e zezë shpesh është objekt i revidimit që të shihet se i përmbushin apo jo personat që gjenden në të kriteret e domosdoshme për t'u hequr, apo për të mbetur edhe mëtej në të. Sipas ambasadorit Batler të drejtën për këtë e ka vetëm presidenti Xhorxh Bush.

 

 

Ministri maqedonas i Mbrojtjes të enjten do të vizitojë Kosovën

 

Shkup, 12 shkurt 2003 - Ministri maqedonas i Mbrojtjes Vlado Buçkovski pritet që të enjten të vizitojë Kosovën ku do të takohet me kryeamdministratorin Mihael Shtajner dhe me komandantin e forcave të NATO-s në Kosovë, Fabio Mini, ka bërë të ditur Ministria maqedonase e Mbrojtjes, duke mos njoftuar për temën e bisedimeve.

Kjo vizitë e Buçkovskit në Kosovë u njoftua menjëherë pas takimit që ai zhvilloi me zëvendëskryeministrin serb Nebojsha Çoviq në qytetin Vranjë të Serbisë. Ndërkaq vetë Buçkovski ka rikonfirmuar se do të vizitojë Kosovën në përpjekje për veprime parandaluese në shkallëzimin eventual të dhunës.

 

 

Masmediat serbe spekulojnë për mundësinë e sulmeve të grupeve të armatosura shqiptare në jug të Serbisë

 

Beograd, 12 shkurt 2003 - Masmediat serbe spekulojnë për mundësinë e sulmeve të grupeve të armatosura shqiptare në jug të Serbisë. Po sipas këtyre burimeve, shefi i shtabit të policisë së UNMIK-ut Robert Betler kinse i ka ofruar qendrës koordinative serbe të dhëna për përgatitjen e grupeve të armatosura në Gjilan dhe në Kamenicë për sulme të mundshme në jug të Serbisë.

 

Zëvendëskryeministri i Serbisë Nebojsha Çoviq, ka thënë se Serbia nuk dëshiron luftë, por është e gatshme për konfrontim me, siç tha ai, grupet terroriste.

 

 

Presidenti filipinas ka urdhëruar ushtrinë të ndërmarrë një ofensivë kundër kryengritësve muslimanë

 

Pikit, Filipine, 12 shkurt 2003 – Presidenti filipinas Gloria ka urdhëruar sot (të merkurën) ushtrinë filipinase të ndërmarrë një ofensivë kundër kryengritësve muslimanë, njofton Rojter. Ofensiva ka filluar pasi të dy palët kanë injoruar thirrjet për të ndalur luftimet, në të cilat janë vrarë dhjetëra njerëz.

 

Urdhëri për ofensivë është dhënë menjëherë pasi kryengritësit kanë bojkotuar takimin me komandantët ushtarakë për të diskutuar ndaljen e armiqësive, gjë që kërcënon shtyrjen e mëtejshme të bisedimeve për t'i dhënë fund konfliktit 31-vjeçar separatist.

 

 

Gjatë bombardimeve të forcave amerikane Luginën e Bagramit janë vrarë të pakten 17 civilë

 

Bagram, 12 shkurt 2003 – Autoritetet provinciale afgane kanë thënë se të pakten 17 civilë janë vrarë gjatë bombardimeve të forcave amerikane, për të cilat Uashingtoni thotë se kanë pasur për qëllim çrrënjosjen e mbeturinave të talibanëve, njofton Rojter.

 

Zyrtarët ushtarakë amerikanë kanë deklaruar sot (të merkurën) se bombarduesit B-52 dhe B-1 kanë goditur vargmalet në Afganistanin Qendror, ku kanë vërejtur se rreth 25 talibanë të armatosur që kishin zënë pozicionet për luftim.

 

Ndërkaq, zëdhënësi ushtarak amerikan, kol. Roxher King, në një konferencë të djeshme shtypi në Bazën ajrore në Bagram kishte thënë se 12 të dyshimtë ishin kapur gjatë një operacioni afër fshatit Lejaj në Luginën e Bagramit. Por ai ka thënë se s’ka informacione për vdekjet e mundshme të civilëve.

 

 

Janë gjetur copat e aeroplanit, në të cilin ndodhej edhe ministri kolumbian

 

Bogota, 12 shkurt 2003 - Pesë ditë pasi është përplasur në malet Ande janë gjetur copat e aeroplanit, në të cilin ndodhej edhe ministri më i popullarizuar kolumbian, Huan Luis Londono, njofton Rojter. Përderisa ekipet e kërkimshpëtimit s'kanë mund të arrijnë në vendin e aksidentit, mbikëqyrësit nga helikopterët kanë thënë se s'ka mundësi të ketë shpëtuar ndonjë njeri nga përplasja.

 

Ministri Londono ishte figura më popullore në qeverinë e vijës së fortë të presidentit Alvaro Uribe, por gjithashtu edhe një nga ministrat më të aftë. Javën e kaluar udhëtonte më aeroplan për të marrë pjesë në një seri mitingjesh, që mbaheshin anembanë vendit, por duke kaluar Andet me një aeroplan të vogël pësoi fatkeqësi.

 

Mbeturinat e aeroplanit nuk janë zbuluar deri tash, ngase guerilët marksistë, që veprojnë në këtë rajon, hapnin zjarr ndaj helikpopterëve që kërkonin ministrin Londono. Por, thuhet se edhe sikur z. Londono dhe të katër personat e tjerë që udhëtonin me të t'i kishin shpëtuar fatkeqësisë, ata nuk do të kishin mundur të mbesin gjallë pesë ditë në kushtet e acarit të Andeve.

 

 

Putin thotë se deklarata e përbashkët e Francës, Gjermanisë dhe Rusisë nuk është e drejtuar kundër askujt

 

Paris, 12 shkurt 2003 - Presidenti rus Vladimit Putin deklaroi të martën në Paris se deklarata e përbashkët e Francës, Gjermanisë dhe Rusisë për zgjidhjen paqësore të krizës irakiane nuk do të thotë krijim i bllokut ose i boshtit kundër "kujdoqoftë", duke aluduar në SHBA-të.

 

"Nuk është fjala që të krijohet blloku apo boshti i drejtuar kundër kujtdoqoftë", ka thënë shefi i shtetit rus në një kanal televiziv francez me rastin e deklaratës së përbashkët të cilën e ka nënshkruar në Paris.

 

 

Bauçer: Rrjeti Al Kaida i Bin Ladenit ende paraqet kërcënim

 

Uashignton, 12 shkurt 2003 - Zëdhënësi i Departamentit të Shetit Riçard Bauçer ka deklaruar se mesazhi, për të cilin thuhet se e ka dhënë Osama bin Laden, i emituar të martën në mbrëmje në TV e Katarit El Xhazira, tregon se rrjeti Al Kaida i Bin Ladenit ende paraqet kërcënim jo vetëm për SHBA-të por edhe për tërë botën.

"Mendoj se mesazhi tregon se Al Kaida ende paraqet rrezik për ne. Mendoj se kërcënimi nuk ka të bëjë vetëm me SHBA-të, por edhe me shtetet e tjera, siç janë Arabia Saudite, Jemeni. Jordania dhe të tjerat, si edhe tërë bota", ka thënë Bauçer.

 

 

Trupat izraelite kanë vrarë dy palestinezë

 

Gaza, 12 shkurt 2003 – Trupat izraelite kanë vrarë sot (të merkurën) dy palestinezë afër një vendbanimi hebraik në Rripin e Gazës dhe siç kanë thënë burimet ushtarake ka qenë një përpjekje për të kryer një sulm me thika dhe granata, njofton Rojter.

 

Kjo dhunë ka ndodhur vetëm një ditë pasi Izraeli ka mbyllur Bregun Perendimor dhe Rripin e Gazës duke imponuar ndalimqarkullimin edhe gjatë kremtës katërditëshe të palestinezëve, Kurban Bajramit.

 

Zyrtarët thonë se shtetrrethimi ka qenë i domosdoshëm për të parapenguar sulmet vetëvrasëse në shtetin hebraik.

 

 

Pauell shpreson që NATOja ta kapërcejë bllokimin e mbështetjes ushtarake ndaj Turqisë

 

Uashington, 12 shkurt 2003 – Sekretari i shtetit, Kolin Pauell, tha se shpreson që NATOja ta kapërcejë shpejt bllokimin e bisedimeve mbi mbështetjen ushtarake ndaj Turqisë në rast të ndonjë lufte me Irakun.

 

Ai gjithashtu u tha senatorëve se Këshilli i Sigurimit i OKB-së po i afrohet momentit të së vërtetës mbi dështimin e Irakut që të dokumentojë asgjësimin e armëve të shkatërrimit në masë.

 

Sekretari Pauell shprehu qartë zemrimin e tij që aleatët e NATOs, Franca, Gjermania dhe Belgjika, po e përdornin të drejtën e vetos brenda aleancës për të treguar kundërshtimin e tyre ndaj politikës së ashpër të administratës së presidentit Bush mbi inspektimet e armëve të Irakut.

 

 

Bin Laden-i bën thirrje për luftë të shenjtë

 

Katar, 12 shkurt 2003 - Stacioni televiziv arab, Al-Xhazira, ka transmetuar një mesazh të ri për të cilin thotë se është nga Osama bin Ladeni. Në këtë mesazh Bin Ladeni u bën thirrje myslimanëve në të gjithë botën që të tregojnë solidaritet me Irakun në konfrontimin e mundshëm me Shtetet e Bashkuara.

 

Mesazhi që dëgjohet me vështirësi nga cilësia e dobët e regjistrimit, u bën thirrje irakianëve të kujtojnë se si Osama bin Ladeni dhe luftëtarët e Al Kaidës mbijetuan në shpellat e Tora Borës në Afganistan vitin e kaluar gjatë sulmeve amerikane nga toka dhe ajri. Në mesazh thuhet se çdo udhëheqës arab që e mbështet luftën kundër Irakut, meriton të vdesë.

Zyrtarë amerikanë thanë se besonin se regjistrimi i transmetuar nga Al Xhazira mund të jetë i vërtetë. Sekretari amerikan i Shtetit, Kolin Pauell, tha se ai provonte se qeveria irakiane kishte lidhje me Al Kaidën.

 

 

BE-ja ndërmjetëson në krizën e Koresë së Veriut

 

Bruksel, 12 shkurt 2003 - BE-ja njoftoi se është i gatshëm të ndërmjetësojë në krizën e Koresë së Veriut. I ngarkuari i BE-së me politikën e jashtme dhe të sigurimit, Havier Solana paralajmëroi për këtë qëllim një vizitë në Penjan. Delegacioni do të përpiqet të ndërmjetësojë bisedime midis përfaqësuesve të qeverisë amerikane dhe atyre të Koresë së Veriut.

 

Solana u kërkoi autoriteteve koreanoveriore rikthimin në vend të inspektorëve të Kombeve të Bashkuara dhe rimbylljen e reaktorit bërthamor të riaktivizuar. Ai hodhi megjithatë poshtë mundësinë e vendosjes së sanskioneve ndaj Koresë së Veriut.

 

 

Trupat izraelite hynë në Betlehem

 

Betlehem, 12 shkurt 2003 - Trupat izraelite njoftohet të kenë hyrë në qendrën e Betlehemit dhe ta kenë shpallur qytetin si zonë të ndaluar ushtarake. Sipas agjencive të lajmeve, banorëve të qytetit u është ndaluar qarkullimi.

 

Veprimet e ushtrisë izraelite vijnë si reagim pas vrasjes së një izraeliti prej një palestinezi të armatosur. Burimet palestineze bënë të ditur gjithashtu, se ushtarët izraelitë kanë qëlluar për vdekje në Kalkilja një fëmijë tetë vjeç.

 

 

Inspektorët e KB kanë vazhduar punën e tyre në Irak

 

Bagdad, 12 shkurt 2003 - Inspektorët për armatim të KB kanë vazhduar punën e tyre në Irak edhe gjaë ditës së djeshme, e cila është festë muslimane e Kurban Bajramit.

 

Sipas njoftimeve irakiane ata kontroluan 4 objekte, në mesin e të cilave edhe ambientet e ku ishte ish reaktori atomik rreth 25 kilometra në jug të Bagdadit në El Tuaita.

 

 

NATO nuk arriti t'i japë fund njërës nga krizat më të rënda në historinë

 

Bruksel, 12 shkurt 2003 - Edhe ditën e dytë të takimeve emergjente në Bruksel, NATO nuk arriti t'i japë fund njërës nga krizat më të rënda në historinë 35-vjeçare të Aleancës, refuzimit të Francës, Gjermanisë dhe Belgjikës që të heqin veton e tyre ndaj planit të mbështetur nga Ushingtoni për mbështetjen e mbrojtjes së Turqisë kundër sulmi të mundshëm raketor nga Iraku.

 

Pas dy shtyrjeve gjatë ditës, ambasadorët e 19 vendeve të NATO-s janë takuar vetëm 15 minuta në mbrëmje para se të përfundojnë mbledhjen, por do të vazhdojnë bisedimet nesër.

Zëdhënësi i Shtëpisë së Bardhë tha në Uashington se se Franca, Gjermaia dhe Belgjika "po e izolojnë vetveten" duke iu kundërvënë 16 vendeve tjera të NATO-s lidhur me mbrojtjen e Turqisë. Por, zëdhënësi Ari Fleiçer e karakterizoi mosmarrëveshjen si kalimtare dhe shfaqi optimizëm se Aleanca do të mbesë e fortë.

 

 

Kryeministri i Turqisë ka kërkuar sërish nga NATO që të mbrojë Turqinë në rast lufte në Irakun

 

Ankara, 12 shkurt 2003 - Kryeministri i Turqisë, Abdullah Gul kishte kërkuar sërish nga NATO që të mbrojë Turqinë në rast lufte në Irakun fqinj. Ai tha se Turqia e ka mbrojtur Evropën gjatë Luftës së Ftohtë, prandaj NATO tani duhet të plotësojë detyrimet e veta.

 

"Turqia e mbrojti mbarë Evropën gjatë Luftës së Ftohtë. Ajo shërbeu si mburojë për Evropën.

 

Rrjedhimisht, nuk ka kurrëfarë dyshimi se NATO tani duhet të përmbushë zotimet e veta", ka deklaruar kryeministri Abdullah Gul.

 

 

Strou thotë se Kombet e Bashkuara duhet të mbesin "në qendër të përpjekjeve" për luftimin e terrorizmit"

 

Londër, 12 shkurt 2003 - Sekretari i Jashtëm britanik, Xhek Strou ka thënë se Kombet e Bashkuara duhet të mbesin "në qendër të përpjekjeve" për luftimin e terrorizmit" dhe forcimin e ligjit ndërkombëtar lidhur me çarmatosjen e Irakun, por ka tërhequr edhe vëretjen për pasojat nëse dështon të merret me kërcënimet e reja.

 

"Nëse Këshilli i Sugurimit do të demonstrojë se ishte i paaftë të merret me kërcënimet e reja nga armë të zhdukjes në masë dhe terrorizmi, do të rrezikojë t'i shkatojë po aq dëme Kombeve të Bashkuara sa pësoi edhe Liga e Kombeve kur dështoi të ballafqohet me sfidat e viteve të 1930-ta", ka thënë Strou.

 

 

Shefi i CIA-s thotë se informacionet e fundit të zbulimit sugjerojnë sulme të mundshme terroriste në SHBA

 

Uashington, 12 shkurt 2003 - Drejtori i CIA-s, Xhorxh Tenet ka thënë se informacionet e fundit të zbulimit sugjerojnë sulme të mundshme terroriste në Shtetet e Bashkuara apo në Gadishullin Arabik.

 

CIA ka informata që sugjerojnë se rrjeti terrorist Al Kiada komploton sulme që mund të përfshijnë materiale radioaktive apo armë kimike, ka thënë Tenet para komitetit përkatës në Senat.

 

"Shohim shenja shqetësuese se Al kaida ka vendosur prani si në Iran ashtu edhe në Irak,dhe jemi të brengosur në mënyrë plotësuese se al Kaida vazhdonë të gjejë strehim në rajonet malore të Afganistanit dhe Pakistanit", ka thënë drejtori i CIA-s.

Copyright©2000-2003 Trepca.net - Të gjitha të  drejtat e rezervuara.