Lajme

E hëne, 10 shkurt 2003

Përmbajtja:

• Presidenti Rugova përgëzon për festën e Bajramit të Vogël

• Presidenti Rugova uroi edhe Rexhep Bojën

• Urimi i myftiut të Kosvës, Rexhep Boja për festën e Kurban-Bajramit

• Kryesia cakton seancën e ardhshme pa futur Deklaratën e 42 deputetëve për pvarësinë e Kosovës

• Ekspertët e Këshillit të Evropës për decentralizimin e pushtetit lokal në Kosovë

• P.Mur: Kërkesa e Gjingjiqit dhe ajo për pavarësi të menjehershme, bën që UNMIK-u të vendosë pa asnjë fleksibilitet në Kosovë

• Kryetari i KK të Podujevës gjendet për një vizitë njëjavëshe në Tirol të Austrisë

• Dikinson: "Askush nuk thotë se partitë politike në Kosovë dhe deputetët nuk duhet ta bëjnë të qartë se e duan pavarësinë"

• Me armë zjarri është vrarë një shqiptar 19-vjeçar në një fshat afër Prizrenit

• Ombuspersoni i Kosovës thotë se për serbët është me rëndësi qartësimi i së ardhmes së Kosovës

• Në Preshevë u protestua kundër arrestimit të shtatë shqiptarëve

• Njoftohen emrat e shqiptarëve të arrestuar në luginën e Preshevës

• Gjermanët e Vojvodinës kërkojnë shfuqizimin e vendimeve të AVNOJ-it dhe kthimin e pronave të konfiskuara

• Incidentet e shkaktuara në Luginën e Preshevës - skenarë të përgatitur më herët

• Fatos Nano pati një takim të veçantë me Arbër Xhaferin, Ali Ahmetin dhe Veton Surroin

• Shtatë shqiptarëve të luginës së Preshevës u është caktuar masa e paraburgimit prej 30 ditësh

• Banka Evropiane e Investimeve do të investojë në rajonin e Ballkanit mbi 400 milionë euro

• Partia Demokratike kërkon dorëheqjen e kryeministrit të Shqipërisë

• Policia shqiptare në disa fshatra të Vlorës ka konfiskur rreth 700 kilogram hashash

• Në Mal të Zi dështuan sërish zgjedhjet presidenciale për shkak të pjesëmarrjes së ultë

• Franca e Belgjika kanë bllokuar kërkesën e SHBA-ve të sigurojë mbështetjen e NATO-së për Turqinë

• Bush takohet sot me një nga aleatët më të ngushtë

• "Përparim" në bisedime në Irak, thotë Bliks

• Putin i bashkohet Francës dhe Gjermanisë

• Burgim të përjetshëm për disidentin kinez

• Irani zbulon rezerva uraniumi

• Mjekim i ri për parandalimin e SIDA-s

• Bush ka vazhduar presionin ndaj Irakut dhe Kombeve të Bashkuara

• Pauell: Propozimi i Berlinit dhe Parisit është “diverzon, e jo zgjidhje” për çarmatosjen e Irakut

• Gjashtë ushtarë rus janë vrarë në Çeçeni

Presidenti Rugova përgëzon për festën e Bajramit të Vogël

 

Prishtinë, 10 shkurt 2003 - Presidenti i Kosovës Ibrahim Rugova ka përgëzuar popullin e Kosovës dhe kryetarin e Bashkësisë Islame të Kosovës për festën e Bajramit.

Në urimin e Presidenti Rugova drejtuar qytetarëve të Kosovës thuhet:

"Të gjithë qytetarëve dhe besimtarëve të Kosovës jua uroj festën e Bajramit të Vogël.

Bajrami i Vogël është ditë e sakrificës për të mirën, për paqen dhe lumturinë e njeriut. Është ditë e besimit në Zotin, ditë e mirëkuptimit dhe e respektimit si dhe e dashurisë ndaj njëri-tjetrit.

Dhashtë Zoti që Bajramin e Vogël të ardhshëm ta festojmë me njohjen formale të pavarësisë së Kosovës për të gjithë qytetarët e saj!

Me fat Bajrami i Vogël!

Zoti e bekoftë Kosovën dhe popullin e saj të qytetëruar"!, thuhet në urimet e Presidentit Rugova për festën e Bajramit të Vogël.

 

 

Presidenti Rugova uroi edhe Rexhep Bojën

 

Prishtinë, 10 shkurt 2003 - Në një telegram urimi të Presidentit Rugova dërguar Dr. Rexhep Bojës, kryetar i Bashkësisë Islame të Kosovës, thuhet:

"Me rastin e festës së Bajramit të Vogël, Ju shpreh urimet e mia të sinqerta dhe të popullit të Kosovës.

E çmojmë lart punën Tuaj shpirtërore për paqe, mirëkuptim dhe tolerancë midis njerëzve të Kosovës në këtë ditë të festës së sakrificës.

Dhashtë Zoti që Bajramin e Vogël të ardhshëm ta festojmë me njohjen formale të pavarësisë së Kosovës", thuhet në urimet e Presidentit Rugova drejtuar Rexhep Bojës.

 

 

Urimi i myftiut të Kosvës, Rexhep Boja për festën e Kurban-Bajramit

 

Prishtinë, 10 shkurt 2003 - "Ndiej kënaqësi të veçantë me rastin e festës së Kurban-Bajranit që në emër të Kryesisë së Bashkësisë islame të Kosovës dhe në emrin tim personal, t'ju uroj të gjithë besimtarëve islamë këtë festë të madhe", thuhet në fillim të urimit të kryetarit të Bashkësisë Islame të Kosovës Dr.Rexhep Boja drejtuar besimtarëve islamë të Kosovës.

"Nesër është festa më e madhe e fesë sonë, Islamit, fe të cilën e ka lavdëruar Zoti i botërave, e ka lavdruar pejgamberi i nderuar Muhamedi a.s. e ka lavdruar historia dhe çdo njeri i ndershëm.

Ky bajram është festë e nderuar e muslimanëve në veçanti haxhinjve, të cilët kanë veshur ihramet e bardha dhe janë zhveshur nga interesat e vogla të kësaj bote. Haxhi pra është pamja më madhshtore e barazisë. Të gjithë njësoj para Zotit. I pasuri pa pasurinë e tij, i varëfri pa varfërinë e tij, i forti pa forcën e ti, i dobëti pa dobësinë e tij, të gjithë vëllezër për hirë të së vërtetës".

"Ky Bajram po ashtu mban të fshehur kujtimin e përkushtimit të pejgamberit Ibrahim a.s. dhe dorëzimit të pejgamberit Ismailit a.s.. Përkushtimi i Ibrahimit ishte i tillë që detyroi një baba të bëjë kurban pa iu dridhur qerpiku, djalin e tij të vetëm, ndërsa dorëzimi i Ismailit a.s. ishte i tillë që edhe thika e kuptoi atë, duke tejkaluar ligjin fizik të të prerit dhe nuk preu".

"Kjo ditë e madhe, Kurban-Bajrami, vjen sot në mbarë njerëzinë për t'i sjellë botës mesazhin e respektit, tolerancës, dashurisë dhe sakrificës. Në këtë ditë të gjithë besimtarët përjetojnë ndjenja të përbashkëta.

 

Sot është dita e shtrëngimit të duarve, e pastrimit të shiprtave, e bashkimit të zemrave, e shuarjes së zënkave, sheshimit të kontradiktave. Kjo është dita kur i shërojmë plagët që i kemi bërë njëri-tjetrit me buzëqeshje dhe gëzim, me paqe dhe vëllazëri".

"Le të jetë festa e Kurban-Bajramit rast për t’i azgjatur dorën e ndihmës e të solidaritetit invalidve të luftës, fëmive të dëshmorve, familjeve të të burgosurve dhe të gjithë atyre që kanë nevojë për ndihmë".

"Shfrytzojmë rastin që të gjithë besimtarëve islamë në Kosovë, Shqipëri, Maqedoni, Mal të Zi e diasporë si dhe të gjithë besimtarëve të tjerë kudo që janë t'ua urojmë festën e Kurban –Bajramit, me shpresë se ndër ne dhe kudo në botë të mbretërojë paqja qetësia dhe toleranca.

Me fat për shumë vjet festën e Kurban-Bajramit", thuhet në fund të urimit të myftiut të Kosovës, Dr.Rexhep Boja.

 

 

Kryesia cakton seancën e ardhshme pa futur Deklaratën e 42 deputetëve për pvarësinë e Kosovës

 

Prishtinë, 10 shkurt 2003 - Kryesia e Kuvendit ka caktuar mbledhjen e ardhshme të rregullt të Kuvendit të Kosovës për më 13 shkurt, por nuk e ka futur në rend dite të mbledhjes së radhës propozimin e 42 deputetëve.

 

Kryesia thekson se nuk janë bërë përgatitjet e duhura që çështje të futet në rend dite. Në shenjë pakënaqësie, anëtar i Kryesisë nga radhët e AAK-së Bajram Kosumi, ka braktisur mbledhjen, duke thënë se është shkelur rregullorja e Kuvendit për procedim.

 

Ramush Tahiri, këshilltar i kryeparlamentarit Daci, ka deklaruar se nuk është shkelur rregullorja meqenëse është kërkuar mbledhje e jashtëzakonshme dhe për klëtë arsye nevojiten konsultime. Sipas tij Kryesia për këtë çështje nuk mund të votojë dhe nuk i merr të drejtën deputetëve që në një seancë ta shtrojnë këtë çështje.

 

Tahiri thotë se propozimi në fjalë mund të hyjë me procedurë urgjente, madje është biseduar edhe me grupet parlamentare dhe nuk është arritur qëndrim unik me gjithë nënshkrimin e 42 deputetëve.

 

 

Ekspertët e Këshillit të Evropës për decentralizimin e pushtetit lokal në Kosovë

 

Prishtinë, 10 shkurt 2003 - Një grup i ekspertëve të Këshillit të Evropës sot e ka filluar punën lidhur me përgatitjet e strategjisë për decentralizimin e pushtetit lokal në Kosovë. Sipas zëdhënësit të UNMIK-ut, Sunil Narula, pritet që ekspertët nga Këshilli i Evropës të angazhohen në këtë proces gjatë nëntë muajve të ardhshëm.

 

Siç dihet decentralizimi është paralajmëruar në prag të zgjedhjeve lokale të vitit të kaluar nga kryeadministratori Mihael Shtajner, por puna në këtë proces është shtyrë për shkak të pjesëmarrjes simbolike të serbëve në këto zgjedhje.

 

 

P.Mur: Kërkesa e Gjingjiqit dhe ajo për pavarësi të menjehershme, bën që UNMIK-u të vendosë pa asnjë fleksibilitet në Kosovë

 

Pragë, 10 shkurt 2003 - Nëse kryeministri serb Gjingjiq kërkon hapjen e bisedimeve, kjo do të thotë që shqiptarët e Kosovës duan pavarësinë e menjëhershme, dhe më tutje, kjo do të thotë që UNMIK-u të vendosë që çdo gjë të mbetet ashtu siç ka qenë pa asnjë fleksibilitet sa i përket qeverisjes vendore dhe edhe prerogativave të institucioneve të Kosovës, thotë Patrik Mur, analist i radios "Evropa e lirë".

 

Ky është një këndvështrim ekstremist, thotë analisti Mur, pasi qoftë bisedimet e menjëhershme të Gjingjiqit, qoftë pavarësimi i menjëhershëm (i Kosovës), qoftë pozicioni i linjës së ashpër i rolit të UNMIK-ut ndaj Parlamentit, nuk do të jetë produktiv.

 

Duhet dëgjuar atë që tha zoti ambasadori amerikan në Këshillin e Sigurmit, Negroponte, për kalimin gradual të pushtetit në duart e kosovarëve që kanë të bëjnë me ardhmërinë e tyre, thotë analisti i "Evropës së lirë".

 

 

Kryetari i KK të Podujevës gjendet për një vizitë njëjavëshe në Tirol të Austrisë

 

Podujevë, 10 shkurt 2003 – Kryetari i komunës i Podujevës z. Agim Veliu me ftesë të ministrit për çështje sociale dhe refugjatë z. Peter Logar gjendet për një vizitë zyrtare një javore në krahinën Tirol të Austrisë.

 

Kjo vizitë është konfirmimi i bashkëpunimit të mëtejmë me Tirolin e Austrisë i cili ka ndihmuar komunën e Podujevës që nga paslufta dhe po vazhdon edhe në ditët e sotme, tha z. Veliu para nisjes në Insbruk.

Kryetari Agim Veliu tha se në Tirol pritet të takohet me kryetarin e ri të Qeverisë së Tirolit z. Herwig van Staa, mikun e madh të Podujevës ministrin Logar, përfaqësues të komunës me të cilën kanë filluar bisedat për binjakëzim si dhe me drejtues të Qendrës për Menazhim të turizmit në Insbruk.

 

 

Dikinson: "Askush nuk thotë se partitë politike në Kosovë dhe deputetët nuk duhet ta bëjnë të qartë se e duan pavarësinë"

 

Londër, 10 shkurt 2003 - Shefi i Zyrës britanike në Prishtinë, Mark Dikinson, ka vlerësuar se përbërja e tanishme e Kuvendit të Kosovës, në bazë të Kornizës Kushtetuese nuk ka të drejtë të miratojë deklarata për pavarësinë e Kosovës. Zoti Dikinson i deklaori BBC-së se standardet para statusit janë bazë për fillimin e negociatave për statusin përfundimtar të Kosovës.

Dikinson tha se të gjitha vendet perëndimore e kanë bërë të qartë se statusi përfundimtar i Kosovës do të përcaktohet përmes negociatave dhe nga Këshilli i Sigurimit i Kombeve të Bashkuara. "Dhe deklaratat e njëanshme, qofshin ato të Prishtinës apo Beogradit, nuk kanë ndonjë efekt në statusin përfundimtar", tha Dikinson duke shtuar se arsyeja pse "ne nuk besojmë se është e drejtë për Kuvendin që të procedojë me deklaratën e këtillë është e thjeshtë: sepse kjo do të thotë është jashtë kornizës kushtetuese dhe i takon apo është në duart e përfaqësuesit të posaçëm të sekretarit të përgjithshëm të OKB-së".

"Askush nuk thotë se partitë politike në Kosovë dhe deputetët nuk duhet ta bëjnë të qartë se e duan pavarësinë, sepse të gjithë e dinë këtë. Atë që po them është se Kuvendi nuk është vend ku duhet bërë këtë. Sepse Kuvendi ka detyra dhe obligime sipas Kornizës Kushtetuese", nënvizoi Dikinson.

 

 

Me armë zjarri është vrarë një shqiptar 19-vjeçar në një fshat afër Prizrenit

 

Prizren, 11 shkurt 2003 - Në një fshat afër Prizrenit është vrarë një i ri shqiptar 19-vjeçar. Policia e UNMIK-ut tha ende nuk i ka gjetur të dyshuarit, por hetimet po vazhdojnë.

Sipas kësaj policie java që u mbyll ka shënuar një rënie sa u përket krimeve dhe se shumica e patrullimeve kanë qenë operacionet e kontrollit të veturave anembanë vendit.

 

Sipas zëdhënësit Beri Fleçër gjatë javës së kaluar janë kontrolluar 20 mijë vetura në 2000 vendkontrollime, janë gjetur 120 armë pa leje, 6 makina të vjedhura dhe 200 dokumente falso janë konfiskuar.

 

 

Ombuspersoni i Kosovës thotë se për serbët është me rëndësi qartësimi i së ardhmes së Kosovës

 

Prishtinë, 11 shkurt 2003 - Ombucpersoni i Kosovës Marek Antoni Novicki thotë se, si për të gjithë ashtu edhe për serbët, është me rëndësi qartësimi i së ardhmes së Kosovës. Prandaj lënia hapur e statusit përfundimtar nuk ndihmon procesin e kthimit të zhvendosurve në Kosovë. Ai ka përmendur në këtë kontekst edhe gjëndjen e rëndë ekonomike.

Në një intervistë dhënë "Evropës së lirë", z. Novicki ka theksuar se serbët mendojnë se do të kthehen në Kosovën e tyre, e cila më nuk ekziston pasi Kosova është ndryshe nga që ishte në vitin 1999, kur serbët u larguan. Ai ka shtuar se serbët edhe mëtutje po vazhdojnë të shesin pasurinë e tyre në Kosovë.

Habitati që është një drejtorat i UNMIK-ut për çështje banimi dhe pronësie me shumë efikasitet ka rikthyer banesat e uzupuara të serbëve, por këta të fundit sapo i rikthejnë pronat ua shesin ato shqiptarëve, ka theksuar Novicki.

 

Prandaj për derisa serbët që jetojnë në Serbi e në Mal të Zi mendojnë se a do të kthehen në Kosovë, serbët që jetojnë në Kosovë kanë dilema nëse do të vazhdojnë të jetojnë këtu apo të shkojnë në Serbi.

Novicki konstaton se termi shoqëri multietnike është i paqartë për një vend ku jetojnë 90 për qind shqiptarë dhe 10 për qind pjesëtarë të pakicave kombëtare.

 

 

Në Preshevë u protestua kundër arrestimit të shtatë shqiptarëve

 

Preshevë, 10 shkurt 2003 - Mbi 1000 qytetarë të Preshevës sot kanë protestuar nëpër rrugët e këtij qyteti, me moton "Ndal dhunën, liri për çlirimtarët". Kjo protestë është organizuar në shenjë proteste kundër arrestimit të 7 shqiptarëve të luginës së Preshevës, ish-pjesëtarë të UÇPMB-së së shpërbërë.

 

Protestuesit marshuan nëpër rrugët e Preshevës me pankarta në dorë dhe duke brohoritur parulla. Njoftohet se incidente nuk ka pasur.

Shtatë shqiptarët e arrestuar akuzohen nga organet gjyqësore serbe për terrorizëm dhe kundër tyre është caktuar paraburgimi prej 30 ditësh.

 

 

Njoftohen emrat e shqiptarëve të arrestuar në luginën e Preshevës

 

Vranjë, 10 shkurt 2003 - Sot janë bërë të ditur edhe emrat e të arrestuarve në luginën e Preshevës. Këta janë: Xhevdet Musliu, nga Konçuli, Besim Leka nga Bujanovci, Elhami, Vullnet, Rahmet, Argtim dhe Avdixhik Salihu nga Tërnoci, të cilët mbahen në paraburgim për shkak se, siç thuhet, kanë kryer vepra penale të bashkimit për veprimtari armiqësore dhe në lidhje me mbajtjen ilegale të armëve.

 

Prej të arrestuarve vetëm njëri është i dyshuar për mbajtje ilegale të armëve, kurse të tjerët për veprimtari armiqësore.

Ministri federal Rasim Lajiq ka thënë se do të vazhdojë "izolimi i atyre që terrirozojnë popullin shqiptar në jug të Serbisë". Lajiq ka shtuar se do të vazhdohet me masa shtetërore për izolimin e shqiptarëve ekstremistë nga ish-UÇPMB-ja.

 

 

Gjermanët e Vojvodinës kërkojnë shfuqizimin e vendimeve të AVNOJ-it dhe kthimin e pronave të konfiskuara

 

Novi Sad, 10 shkurt 2003 - Pas Luftës së Dytë Botërore gjermanët që jetonin në Vojovodinë përjetuan kampet, persekutimet dhe u ishin marrë 600.000 hektarë tokë të pjellore.

 

Shoqata e gjermanëve "Dunau" me seli në Novi Sad tani kërkon që të shfuqizohen vendimet e AVNOJ-it të vitit 1943, deklaratat, ligjet dhe vendimet përcjellëse me të cilat këto krime ishin lagalizuar.

Gjermanët jetojnë në territorin e Vojvodinës së sotme që nga shekulli 17 dhe deri në vitin 1939 numëronin 537.000 banorë. Tani në Vojvodinë jetojnë më pak se 4.000.

Me vendimet e AVNOJ-it nga viti 19943 në Jajce dhe me një vendim të 21 nëntorit të vitit 1944 në Beograd gjermanët u privuan nga të gjitha të drejtat dhe iu konfiskua prona e tyre e lëvizshme dhe e palëvizshme. U dha urdhër që të dëbohen nga Jugosllavia.

 

Prej numrit të përgjithshëm rreth 200.000 prej tyre i pritën partizanët jugosllavë dhe Armatën e Kuqe. Gjatë luftës prej vitit 1941 e deri më 1944 një numër i gjermanëve u mobilizuan apo vullnetarisht morën pjesë në luftë në anën e Rajhut të Tretë.

Deri më 1944 u vranë rreth 70.000 gjermanë, kurse me mijëra të tjerë përfunduan në kampe për gjermanët, ku u keqtrajtuan edhe me uri, të privuar nga çdo ndihmë mjekësore dhe deri në mars të vitit 1948 pësuan rreth 70.000 fëmijë, gra e pleq.

Rreth 200 deri më 300 mijë qytetarë gjermanë u dëbuan nga Jugosllavia.

Prona që iu konfiskua atyre iu dha serbëve që e kolonizuan Vojvodinën.

Tani shoqatat gjermane në Vojvodinë kërkojnë që t'u njihet statusi i pakicës kombëtare dhe t'u kthehen pronat e konfiskuara.

 

 

Incidentet e shkaktuara në Luginën e Preshevës - skenarë të përgatitur më herët

 

Bujanovc, 10 shkurt 2003 - Situata politike dhe e sigurisë në rajonin e Luginës së Preshevës, e posaçërisht në komunën e Bujanocit është e rëndë dhe tepër shqetësuese.

 

Kjo gjendje kaq tensionuese vjen si rezultat i incidenteve të shkaktuara javën e fundit e që i kanë rrënjët shumë më herët nga apo ato skenarë të përgatitur me profesionalizëm për ta destabilizuar situatën edhe ashtu të brishtë në rajonin e Luginës së Preshevës, thuhet në një komunikatë të Partisë Lëvizja e Progresit Demokrat.

Më tutje thuhet se PLPD me kohë ua ka tërhequr vërejtjen organeve shtetërore të Serbisë dhe faktorëve ndërkombëtarë se nuk është duke u zhvilluar një qasje e drejtë dhe e qëndrueshme rreth zgjidhjes së krizës politike dhe ekonomike të rajonit të Preshevës, Bujanocit dhe Medvegjës.

Shpallja luftë e "terrorizmit" në Luginën e Preshevës fill pas takimit të shefit të Këshillit Koordinues serb në Bujanoc Nebojsha Çoviq me ministrin e mbrojtjes nga Maqedonia zotin Buçkovski, në afërsi të Vrajës është një nga provokimet më serioze që i është bërë popullatës shqiptare pas konflikteve të armatosura në këto hapësira, thekson më tutje komunikata.

Lëvizja e Progresit Demokratik kërkon nga qytetarët të jenë vigjilentë dhe të përmbajtur para këtyre fortunave të ngritura pa dashjen e tyre. Vetëm të bashkuar mund t’i përballojmë këto vështirësit që kanë motive politike ashtu siç kemi ditur e mundur gjithherë gjatë historisë, përfundon komunikata e nënshkruar nga kryetari i LPD, Jonuz Musliu.

 

 

Fatos Nano pati një takim të veçantë me Arbër Xhaferin, Ali Ahmetin dhe Veton Surroin

 

Tiranë, 11 shkurt 2003 - Kryeministri Fatos Nano u takua dje me dy politikanët shqiptarë nga Maqedonia Arbër Xhaferin dhe Ali Ahmetin si dhe me botuesin e "Kohës ditote" Veton Surroin nga Kosova. Temë e diskutimit ishte gjendja e përgjithshme në rajon dhe çështja shqiptare në veçanti.

 

Sipas agjencive të lajmeve kryeministri Nano e çmoi veçanërisht kontributin e Ali Ahmetit në proceset e demokratizimit në Maqedoni.

 

Nano ka thënë se Ali Ahmeti, i cili është faktor bashkëqeverisë në këtë vend, po shfaq aftësi gjithëpërfshirëse të shqiptarëve për të konkurruar dhe për të kontribuar në demokratizimin e shoqërive në vendet respektive, si dhe në forcimin e institucionve të pranishme në procesin e reformave në rajon.

 

 

Shtatë shqiptarëve të luginës së Preshevës u është caktuar masa e paraburgimit prej 30 ditësh

 

Bujanoc, 11 shkurt 2003 - Shtatë shqiptarëve të arrestuar në Tërnoc dhe në Konçul të Bujanocit nga organet serbe të sigurimit, të cilët po mbahen në burgun e Vranjës, u është caktuar masa e paraburgimit prej 30 ditësh. Një gjyqëtar në Vranjë i fajësoi ata për veprën penale të terrorizmit.

Ndërkaq, ish-komandanti i UÇPMB-së Shefqet Musliu u kërkoi autoriteteve serbe lirimin e të gjithë të burgosurve dhe siç u shpreh të mos nxisin luftë në Luginën e Preshevës.

Ai ka akuzuar zëvendëskryeministrin serb Nebojsha Çoviq se me qëllim kishte organizuar këto aksione me pretekst për të mbajtur forcat ushtarake në Luginën e Preshevës në kundërshti me Marrëveshjen e Konçulit.

 

 

Banka Evropiane e Investimeve do të investojë në rajonin e Ballkanit mbi 400 milionë euro

 

Bruksel, 11 shkurt 2003 - Banka Evropiane e Investimeve do të investojë mbi 400 milionë euro gjatë tri viteve të ardhshme për të lidhur kështu në një rrjet të vetëm pesë bankat perëndimore që operojnë në Ballkan.

 

Ajo do të financojë ndërtimin dhe rikonstruktimin e autostradave, aeroporteve dhe porteve detare. Numri më i madh i projekteve ishte propozuar nga bashkimi Serbi - Mali i Zi, ndërkohë që vendet tjera kanë dorëzuar jo më tepër se 20 projekte së bashku.

 

 

Partia Demokratike kërkon dorëheqjen e kryeministrit të Shqipërisë

 

Tiranë, 11 shkurt 2003 - Partia Demokratike kërkon dorëheqjen e kryeministrit e Shqipërisë Fatos Nano, duke akuzuar atë si penguesin kryesor të reformave në ekonominë e vendit, por edhe për mbështetje dhe përkrahje të elementëve të korruptuar në qeveri.

 

Pikërisht për këtë arsye anëtarë të PD thanë se e vetmja rrugëdalje do të ishte dorëheqja e Nanos dhe jo e ministrave të qeverisë që drejton ai.

 

Një nga argumentet që po përdor opozita në fushatën e saj është shtyrja e nënshkrimit të një marrëveshje midis Qeverisë dhe Fondit Monetar Ndërkombëtar të planifikur për t'u nënshkruar në këtë muaj.

 

 

Policia shqiptare në disa fshatra të Vlorës ka konfiskur rreth 700 kilogram hashash

 

Vlorë, 11 shkurt 2003 - Policia e Shqipërisë ka filluar një fushatë kundër kultivimit dhe trafikimit të bimëve narkotike. Kështu gjatë një aksioni kjo polici në disa fshatra të Vlorës ka konfiskur rreth 700 kilogram hashash dhe janë arrestuar 3 person. Operacione të ngjashme pritet të zhvillohen në të gjitha rajonet jugore.

 

 

Në Mal të Zi dështuan sërish zgjedhjet presidenciale për shkak të pjesëmarrjes së ultë

 

Podgoricë, 11 shkurt 2003 - Në Mal të Zi dështuan sërish zgjedhjet presidenciale për shkak të pjesëmarrjes së ultë. Sipas të dhënave të vëzhguesve të pavarur pjesëmarrja në votime ishte 47.5 për qind, apo vetëm dy për qind më shumë se në zgjedhjet e mëparshme të dështuara.

 

Në bazë të ligjit zgjedhore në Mal të Zi pjesëmarrja minimale e pranueshme duhet të jetë 50 për qind.

 

Ndryshe, më shumë se 450 mijë zgjedhësve iu bë thirrje dje që të votojnë për të vendosur se cili do të jetë presidenti i ri i Malit të Zi.

 

Kandidati më me shumë shansë konsiderohet presidenti i Parlamentit malazez Filip Vujanoviq. Megjithatë edhe këtë radhë atiu iu desht të konfrontohej me bojkotin e zgjedhësve.

 

 

Franca e Belgjika kanë bllokuar kërkesën e SHBA-ve të sigurojë mbështetjen e NATO-së për Turqinë

 

Bruksel, 10 shkurt 2003 - Në Bruksel po mbahet sot një sesion urgjent i anëtarëve të NATO-s, pasi Franca dhe Belgjika kanë bllokuar formalisht kërkesën e SHBA-ve të sigurojë mbështetjen e NATO-së për Turqinë në rast të një lufte me Irakun, njofton BBCWorld.

 

Kjo ka vënë edhe më shumë në dukje ndarjet ndërmjet Uashingtonit dhe disa aleatëve evropian, pikërisht në javën vendimtare të krizës me Irakun. Franca, e mbështetur nga Belgjika, ka arsyetuar se përgatitjet për mbrojtjen e Turqisë mund të minojnë përpjekjet diplomatike për të evituar konfliktin me Irakun.

 

 

Bush takohet sot me një nga aleatët më të ngushtë

 

Uashington, 10 shkurt 2003 – Presidenti Bush, kërkesa e të cilit për çarmatimin e Irakut, ka hasur në kundërshtim të kordinuar të Francës, Gjermanisë dhe Rusisë, fillon javën vendimtare të diplomacisë sot (të hënën) me takimin me një nga aleatët më të ngushtë, kryeministrin e Australisë, Xhon Hauard, njofton Rojter.

 

Ndonëse qeveria e tij është ndeshur me një rrebesh kritikash, Hauard tashmë ka dërguar trupat t'u bashkohen forcave britanike dhe amerikane në Gji për luftë kundër Irakut. Pas kryeministrit Toni Bler, me të cilin Hauard do të zhvillojë bisedcime kësaj jave, lideri australian është “ndër aleatët më të fuqishëm të Amerikës”, ka thënë zëdhënësi i Shtëpisë së Bardhë, Ari Fleisçër.

 

Vizita e tij, bisedat telefonike dhe takimet e tjera janë pjesë e përpjekjeve të Shtëpisë së Bardhë për të mbajtur përqendrimin në Irakun dhe Kombet e Bashkuara në ditët e ardhshme para raportit të 14 shkurtit, për të cilin zyrtatrët amerikanë kanë thënë se shënon fazën finale të çarmatimit të presidentit irakian, Sadam Hysein.

 

 

"Përparim" në bisedime në Irak, thotë Bliks

 

Bagdad, 10 shkurt 2003 - Inspektorët e armëve të Kombeve të Bashkuara thanë se kanë filluar të shënojnë ndryshime të qëndrimit të Irakut, drejt përmbushjes së obligimeve për t'u çarmatosur.

Shefi i inspektorëve, Hans Bliks, tha në konferencën me gazetarë në Bagdad se fjala "mposhtje" është shumë e fuqishme - por Iraku ka bërë propozime konstruktive dhe se ai shpreson se kjo është një shenjë se ata po e marrin më seriozisht çështjen e çarmatimit.

Shefi i inspektorëve bërthamorë, Mohamed El-Baradei, tha se shpreson që qëndrimi i ri irakian do të testohet brenda ditëve dhe javëve të ardhshme dhe se ata do të kenë mundësinë që të kënaqin Këshillin e Sigurimit se inspektimi ka kryer punë dhe se nuk ka mbetur alternativë për luftë.

Të dy do të dorëzojnë një raport të ri në Kombet e Bashkuara ditën e premte.

 

 

Putin i bashkohet Francës dhe Gjermanisë

 

Berlin, 10 shkurt 2003 - Pesidenti rus, Vladimir Putin tha se mbështet propozimet e ofruara nga Gjermania dhe Franca, të cilat, besojnë ato, do të ndihmojnë në çarmatosjen e Irakut pa nevojën e luftës.

 

Propozimet janë njoftuar të kenë përfshirë edhe planin për dërgimin e një numri shtesë të inspektorëve në Irak së bashku me mijëra ushtarë të Kombeve të Bashkuara.

Duke folur pas takimit me kancelarin gjerman, Gerhard Shroeder, zoti Putin tha se përdorimi i njëanshëm i forcës do të shkaktonte vuajtje të mëdha dhe do të rriste tensionet në gjithë rajonin.

Presidenti rus do të udhëtojë për në Paris, për një vizitë tre ditore dhe biseda rreth Irakut me presidentin Zhak Shirak.

 

 

Burgim të përjetshëm për disidentin kinez

 

Pekin, 10 shkurt 2003 - Një gjykatë në jug të Kinës ka dënuar me burgim të përjetshëm dezidentin Wang Bingzhang që jetonte në Shtetet e Bashkuara, pasi u gjet fajtor se kishte spiunuar për Tajvanin dhe drejtonte një grup terrorist.

Sipas BBC-së dënimi - i cili është një nga më të rëndit dhënë ndonjë disidenti - shënon edhe kulmin e çështjes më të çuditshme.

Zoti Wang u zhduk qershorin e kaluar ndërsa shkonte në Vietman për t'u takuar me udhëheqësit popullor kinezë.

Grupi desident me qendër në Uashington 'Lëvizja për Kinën e Lirë', thotë se zoti Wang u rrëmbye nga autoritetet kineze gjatë udhëtimit për në Vietnam.

Por zyrtarët kinezë, thanë se ai ishte shpëtuar nga policia, e cila e kishte gjetur zotin Wang të lidhur në një tempull në jug të Kinës.

 

 

Irani zbulon rezerva uraniumi

 

Teheran, 10 shkurt 2003 - Presidenti i Iran Mohammad Khatami, ka njoftuar zbulimin e depozitave të uraniumit, për herët të parë në vendin e tij. Ai tha se planifikonte t'i përdorte ato për zhvillimin e programit bërthamor të Iranit.

Duke folur për televizionin shtetëror presidenti Khatami tha se falë uraniumit Irani tani është në gjendje të prodhojë energji atomike pa qënë nevoja e ndihmës nga jashtë.

Ky njoftim surprizë pritet të alarmojë Shtetet e Bashkuara, që e kanë akuzuar Iranin se po përgatit infrastrukturën për zhvillimin e armëve bërthamore.

 

 

Mjekim i ri për parandalimin e SIDA-s

 

Londër, Uashington 10 shkurt 2003 - Një grup shkencëtarësh kanë publikuar një studim, i cili ka treguar progres në rrugët për parandalimin e përhapjes të virusit HIV/SIDA.

Shkencëtarët nga Britania dhe Shtetet e Bashkuara thanë se kanë zbuluar një kimikat që mbyt mikro-organizmat në organin gjenital të majmunit femër.

Majmuni, i cili u ekspozua ndaj një forme të virusit HIV tregoi një farë mbrojtjeje për shkak të ilaçit të përdorur.

Korrespondentët thonë se studimi mund t'u shërbejë grave, partnerët e të cilëve nuk duan të përdorin prezervativë, si pjesë e mbrojtjes prej sëmundjeve seksualisht të transmetushme.

 

 

Bush ka vazhduar presionin ndaj Irakut dhe Kombeve të Bashkuara

 

Uashington, 10 shkurt 2003 - Presidenti i Shteteve të Bashkuara, Xhorxh Bush ka vazhduar presionin ndaj Irakut dhe Kombeve të Bashkuara duke thënë se Bagdadi duhet të çarmatoset domosdo, kurse Këshilli i Sigurimit duhet të vendosë nëse do që të mbesë relevant.

 

Në një fjalim që ka mbajtur në Virxhini, Bush ka thënë se "Kombet e Bashkuara do të duhet së shpejti të vendosin nëse duan apo jo të mbesin relevante në çështjet e paqes".

"Kjo administratë dhe ky vend e mbajnë Këshillin e Sigurimit dhe botën për kërkesat e tyre që Sadam Husein të çarmatoset", ka thënë presidenti i Shteteve të Bashkuara.

 

Bush ka përsëritur sërish se "për hir të paqes dhe të sigurisë, Shtetet e Bashkuara dhe miqët dhe aleatët e tyre do te çarmatosin Sadam Huseinin, nëse ai nuk e çarmatos vetveten".

 

 

Pauell: Propozimi i Berlinit dhe Parisit është “diverzon, e jo zgjidhje” për çarmatosjen e Irakut

 

Munih, 10 shkurt 2003 - Gjermania thotë se Berlini dhe Parisi do t'i paraqesin Këshillit të Sigurimit planin e përbashkët si përpjekje për të shmangur luftën në Irak, i cili përfshin mbështetjen e inspektimeve të armatimit me trupa të Kombeve të Bashkuara. Ky plan u kritikua si irelevant nga zyratrë të lartë amerikanë dhe britanikë.

Në Uashington, sekeretari amerikan i Shtetit, Pauell tha se propozimi i Berlinit dhe Parisit është "diversion, e jo zgjidhje" për çarmatosjen e Irakut. "Ai e huq qëllimin. Nuk na nevojiten më shumë inspektorë, por bashkëpunim shumë më i madh nga Sadam Husein.

 

Nevojitet që ai t'u nënshtrohet kërkesave bazë të rezloutës 1441 të Këshillit të Sigurimit", ka thënë sekertari amerikan i shtetit.

 

 

Gjashtë ushtarë rus janë vrarë në Çeçeni

 

Grozni, 10 shkurt 2003 - Një zyrtar i administratës pro-moskovite në Çeçeni ka thënë se gjashtë ushtarë rus janë vrarë në harkun e fundit kohor nga sulme kryengritësish dhe shpërthime minash.

Copyright©2000-2003 Trepca.net - Të gjitha të  drejtat e rezervuara.